ନୋଏଡାର ଜଣେ ୩୧ ବର୍ଷୀୟା ଯୁବତୀଙ୍କର ମୃତ୍ୟୁକୁ ନେଇ ଏବେ ଚାଞ୍ଚଲ୍ୟ ଖେଳିଯାଇଛି। ଡେଟିଂ ଆପ୍ ମାଧ୍ୟମରେ ପ୍ରେମ ଏବଂ ପରେ ବିବାହର ମାତ୍ର ଛଅ ମାସ ନପୂରୁଣୁ ଶ୍ୱଶୁର ଘରୁ ଉକ୍ତ ଯୁବତୀଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି। ଏହି ଘଟଣା ଏବେ ଭୋପାଳରେ ଆଲୋଡ଼ନ ସୃଷ୍ଟି କରିଥିବା ବେଳେ ଯୁବତୀଙ୍କ ପରିବାର ଲୋକେ ଏହାକୁ ଯୌତୁକ ଜନିତ ହତ୍ୟା ବୋଲି ଅଭିଯୋଗ କରିଛନ୍ତି।

ଡେଟିଂ ଆପ୍‌ରୁ ଆରମ୍ଭ ହୋଇଥିଲା ସମ୍ପର୍କ

ପୋଲିସର ସୂଚନାନୁସାରେ, ମୃତ ଯୁବତୀ ଗତ ୨୦୨୪ ମସିହାରେ ଏକ ଡେଟିଂ ଆପ୍ ଜରିଆରେ ଭୋପାଳର ଜଣେ ଆଇନଜୀବୀଙ୍କ ସହ ପରିଚିତ ହୋଇଥିଲେ। ପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା ଏବଂ ୨୦୨୫ ଡିସେମ୍ବରରେ ସେମାନେ ବିବାହ ବନ୍ଧନରେ ଆବଦ୍ଧ ହୋଇଥିଲେ। ବିବାହ ପରେ ଯୁବତୀ ଜଣକ ସ୍ୱାମୀ ଓ ଶ୍ୱଶୁର ଘର ଲୋକଙ୍କ ସହ ରହିବା ପାଇଁ ଭୋପାଳର କଟାରା ହିଲ୍ସ (Katara Hills) ଅଞ୍ଚଳକୁ ଚାଲିଆସିଥିଲେ। ତେବେ ଗତ ମେ' ୧୨ ତାରିଖରେ ନିଜ ବାସଭବନରୁ ତାଙ୍କର ଝୁଲନ୍ତା ମୃତଦେହ ଉଦ୍ଧାର କରାଯାଇଛି। ସୂଚନାଯୋଗ୍ୟ ଯେ, ଅଭିଯୁକ୍ତ ସ୍ୱାମୀ ଜଣକ ହେଉଛନ୍ତି ଜଣେ ପୂର୍ବତନ ସେସନ୍ସ ଜଜ୍‌ଙ୍କ ପୁଅ।

ଯୌତୁକ ନିର୍ଯାତନା ଅଭିଯୋଗ ଓ ଏସ୍‌ଆଇଟି (SIT) ତଦନ୍ତ

ଝିଅର ମୃତ୍ୟୁ ଖବର ପାଇବା ପରେ ପରିବାର ଲୋକେ ଶ୍ୱଶୁର ଘର ଲୋକଙ୍କ ବିରୋଧରେ ସଙ୍ଗିନ ଅଭିଯୋଗ ଆଣିଛନ୍ତି। ଯୌତୁକ ପାଇଁ ତାଙ୍କୁ ମାନସିକ ତଥା ଶାରୀରିକ ନିର୍ଯାତନା ଦିଆଯିବା ସହ ହତ୍ୟା କରାଯାଇଥିବା ନେଇ ସେମାନେ ଦାବି କରିଛନ୍ତି। ଏହି ଘଟଣାରେ ପୋଲିସ ମୃତ ଯୁବତୀଙ୍କ ସ୍ୱାମୀ ଏବଂ ଶାଶୁଙ୍କ ବିରୋଧରେ ଭାରତୀୟ ନ୍ୟାୟ ସଂହିତା (BNS)ର ଧାରା ୮୦(୨) ଅନୁଯାୟୀ ଯୌତୁକ ଜନିତ ମୃତ୍ୟୁର ଏକ ମାମଲା ରୁଜୁ କରିଛି।

ଏହି ସମ୍ବେଦନଶୀଳ ଘଟଣାର ସତ୍ୟାସତ୍ୟ ଉନ୍ମୋଚନ ପାଇଁ ସ୍ଥାନୀୟ ପ୍ରଶାସନ ପକ୍ଷରୁ ଏକ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଗଠନ କରାଯାଇଛି। ଯୌତୁକ ନିର୍ଯାତନା, ହତ୍ୟା ଏବଂ ଅନ୍ୟାନ୍ୟ ଦିଗକୁ ନେଇ ପୋଲିସ ତଦନ୍ତ ଜୋରଦାର କରିଛି। ମାତ୍ର କିଛି ମାସର ବୈବାହିକ ଜୀବନ କିପରି ଏତେ ଭୟଙ୍କର ରୂପ ନେଲା, ତାହା ଏବେ ତଦନ୍ତର ମୁଖ୍ୟ ବିଷୟ ପାଲଟିଛି।

କଟକ : ଏବେ ଯୁବକ ଯୁବତୀ ମାନେ ମନ ପସନ୍ଦର ବନ୍ଧୁ ଖୋଜିବା ଲାଗି ଡେଟିଂ ଆପ୍‌ର ବ୍ୟବହାର କରୁଥିବା ଦେଖିବାକୁ ମିଳିଛି। ସେମାନେ ଏହି ଆପ୍ ଜରିଆରେ ଚାଟିଂ, ଫୋନ୍ କଲ୍ କରିବା ସହ ବନ୍ଧୁତା ସ୍ଥାପନ କରିପାରିବେ । ଏପରି ଏକ ଡେଟିଂ ସାଇଟ୍‌ର ବ୍ୟବହାର କରି ବିଡାନାସୀ ଅଞ୍ଚଳର ଜଣେ ଯୁବକ ଠକାମିର ଶିକାର ହୋଇଛନ୍ତି। ଏନେଇ ସେ ଥାନାରେ ଅଭିଯୋଗ କରିବା ପରେ ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ସୂଚନା ମୁତାବକ, ବିଡାନାସୀ ଅଞ୍ଚଳରେ ରହୁଥିବା ଜଣେ ଯୁବକ ଏକ ଫ୍ରି ଡେଟିଂ ୱେବ୍‌ ସାଇଟ୍‌ର ବ୍ୟବହାର କରିଥିଲେ।

ସେଠାରେ ତାଙ୍କ ଜଣେ ଯୁବତୀଙ୍କ ସହ ବନ୍ଧୁତା ସ୍ଥାପନ ହୋଇଥିଲା। ଯୁବତୀ ଜଣକ କିଛି ଦିନ ଧରି ତାଙ୍କ ସହ ଚାଟିଂ ଓ ଫୋନ କଲ କରି କଥା ହେଉଥିଲେ । ଏଥିସହ ସେମାନଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା। ଏପରିକି ପରସ୍ପର ବିବାହ କରିବାକୁ ସ୍ଥିର କରିଥିଲେ | ମାତ୍ର ପ୍ରେମ କରିବା ଆଳରେ ଯୁବତୀ ଜଣକ ସମ୍ପୃକ୍ତ ଯୁବକଙ୍କ ଠାରୁ ୯୪ ହଜାର ଟଙ୍କା ନେଇଥିଲେ। ଆଉ ଯେତେବେଳେ ଯୁବକ ଜଣକ ଟଙ୍କା ଦେବା ବନ୍ଦ କରି ଦେଇଥିଲେ ଯୁବତୀ ଜଣକ ତାଙ୍କଠାରୁ ଦୂରେଇ ଯାଇଥିଲେ ।

ଗତ କିଛି ଦିନ ମଧ୍ୟରେ ସମ୍ପୃକ୍ତ ଯୁବତୀ ପ୍ରାୟ ୯୪ ହଜାର ଟଙ୍କା ଠକି ନେଇଥିବା ଅଭିଯୋଗ ହୋଇଛି । ଏପରିକି କେତେକ ଡେଟିଂ ଆପ୍ ଜରିଆରେ ପ୍ରେମ ଓ ବନ୍ଧୁତାର ପ୍ରଲୋଭନ ଦେଖାଇ ସାଇବର ଅପରାଧୀ ମାନେ ଟଙ୍କା ଠକି ନେଉଥିବା ଏତଲାରେ ଦର୍ଶାଯାଇଛି । ଏପରି ଅଭିଯୋଗ ପାଇବା ପରେ କମିସନରେଟ୍ ପୁଲିସର ସାଇବର ସେଲ୍‌ ସହାୟତାରେ ବିଡ଼ାନାସୀ ପୁଲିସ ଅଧିକ ତଦନ୍ତ ଜାରି ରଖୁଥିବା ଜଣାପଡ଼ିଛି ।