ନୂଆଦିଲ୍ଲୀ: ପଶ୍ଚିମବଙ୍ଗର ନୂଆ ରାଜ୍ୟପାଳ ହେଲେ ଅବସରପ୍ରାପ୍ତ ଆଇଏଏସ ଅଧିକାରୀ ଡ.ସିଭି ଆନନ୍ଦା ବୋଷ । କେନ୍ଦ୍ର ସରକାରଙ୍କ ସୁପାରିସକ୍ରମେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ ରାଜ୍ୟପାଳ ଭାବେ ଡକ୍ଟର ବୋଷଙ୍କ ନିଯୁକ୍ତି ଉପରେ ମୋହର ମାରିଛନ୍ତି। ଦାୟିତ୍ୱ ଗ୍ରହଣ କରିବା ଦିନଠାରୁ ତାଙ୍କର ଏହି ନିଯୁକ୍ତି ଲାଗୁ ହେବ ବୋଲି ରାଷ୍ଟ୍ରପତି ଭବନ ପକ୍ଷରୁ ଜାରି ପ୍ରେସ ବିଜ୍ଞପ୍ତିରେ କୁହାଯାଇଛି ।

ପୂର୍ବତନ ରାଜ୍ୟପାଳ ଜଗଦୀପ ଧନଖଡ଼ ଭାରତର ଉପରାଷ୍ଟ୍ରପତି ହେବା ପରେ ପଶ୍ଚିମବଙ୍ଗର ରାଜ୍ୟପାଳ ପଦବୀ ଖାଲି ଥିଲା । ମଣିପୁର ରାଜ୍ୟପାଳ ଲା ଗଣେଶନ ଗତ ଜୁଲାଇରୁ ପଶ୍ଚିମବଙ୍ଗର ରାଜ୍ୟପାଳଭାବେ ଅତିରିକ୍ତ ଦାୟିତ୍ୱରେ ଥିଲେ । ଏଥିପାଇଁ କେନ୍ଦ୍ର ସରକାର ଡକ୍ଟର ବୋଷଙ୍କୁ ବେଙ୍ଗଲ ରାଜ୍ୟପାଳ ଭାବେ ନିଯୁକ୍ତି ଦେବାକୁ ସୁପାରିସ କରିଥିଲେ।

ଡ. ବୋଷ ଜଣେ ଆଇଏଏସ୍ ଅଧିକାରୀ ଭାବେ କାର୍ଯ୍ୟ କରିବାର ଅଭିଜ୍ଞତା ରଖିଛନ୍ତି। ଏକଦା ଜିଲ୍ଲାପାଳ ଭାବେ କାମ କରୁଥିବା ଡକ୍ଟର ବୋଷ କେନ୍ଦ୍ର ଓ ରାଜ୍ୟର ବିଭିନ୍ନ ବିଭାଗରେ କାମ କରିଛନ୍ତି। ଜଣେ ସ୍ତମ୍ଭକାର ଓ ଲେଖକ ଭାବେ ପରିଚିତ ବୋଷ ଇଂରାଜୀ, ମାଲାୟଲମ ଓ ହିନ୍ଦୀରେ ୪୦ଟି ବହି ଲେଖିଛନ୍ତି । ସେ ମଧ୍ୟ ଜବାହରଲାଲ ନେହେରୁ ଫେଲୋସିପ ପାଇଛନ୍ତି । ପ୍ରଶାସନିକ ସେବାରୁ ଅବସର ନେବା ପରେ ସେ ମେଘାଳୟ ସରକାରଙ୍କ ପରାମର୍ଶଦାତା ହୋଇଥିଲେ।

କୋଲକାତା : ଟିଏମସି ସରକାର ଏବଂ ପଶ୍ଚିମବଙ୍ଗ ରାଜ୍ୟପାଳ ଜଗଦୀପ ଧନିଖରଙ୍କ ମଧ୍ୟରେ ବିବାଦ ଥମିବାର ନା ଧରୁନି। ଧନଖର ରାଜ୍ୟରେ ଆଇନ ଶୃଙ୍ଖଳା ବ୍ୟବସ୍ଥା ବିପର୍ଯ୍ୟସ୍ତ ଥିବା କହିଛନ୍ତି। ଏହାକୁ ନେଇ ଟିଏମସି ସାଂସଦ ମହୁଆ ମୋଇତ୍ରି ତାଙ୍କୁ ତୀବ୍ର ସମାଲୋଚନା କରିଛନ୍ତି। ସେ କହିଛନ୍ତି ଯେ ରାଜ୍ୟପାଳ ନିଜକୁ ପଦ ଛାଡି ଦିଲ୍ଲୀ ଚାଲିଯିବା ଉଚିତ ଏବଂ ସେଠାରେ ନୂଆ ଚାକିରି ଖୋଜିବା ଉଚିତ | ମୋଇତ୍ରି ଧନଖରଙ୍କୁ ଅଙ୍କଲଜୀ ମଧ୍ୟ କହିଛନ୍ତି ।

ସେ ଅଭିଯୋଗ କରିଛନ୍ତି ଯେ ଧନଖର ନିଜ ପରିବାର ଲୋକ ଏବଂ ଅନ୍ୟ ସମ୍ପର୍କୀୟଙ୍କୁ ରାଜଭବନରେ ନିଯୁକ୍ତି ଦେଇଛନ୍ତି। ସେମାନଙ୍କୁ ଅଫିସର ଅନ ସ୍ପେସିଆଲ ଡ୍ୟୁଟି(ଓଏସଡି) ବନାଯାଇଛି। ମହୁଆ କହିଛନ୍ତି ଯେ ରାଜ୍ୟପାଳଙ୍କୁ ପ୍ରଶ୍ନ ପଚାରିବା ପାଇଁ ଆମର ଗଣତାନ୍ତ୍ରିକ ଅଧିକାର ରହିଛି। ସେ କ୍ରମାଗତ ଭାବେ ରାଜ୍ୟ ସରକାରଙ୍କୁ ପ୍ରଶ୍ନ ପଚାରୁଛନ୍ତି। ସେ ନିଜ ଚେହେରାକୁ ଆଇନାରେ ଦେଖନ୍ତୁ । ରାଜ୍ୟପାଳ ନିଜ ଗାଁ ଏବଂ ବଂଶକୁ ରାଜଭବନକୁ ନେଇ ଆସିଛନ୍ତି ।