ମଧ୍ୟପ୍ରାଚ୍ୟରେ ଲାଗି ରହିଥିବା ଯୁଦ୍ଧ ପରିସ୍ଥିତି ଏବେ ଏକ ଭୟଙ୍କର ରୂପ ନେବାରେ ଲାଗିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏକ ଆକ୍ରମଣାତ୍ମକ ରାଷ୍ଟ୍ରୀୟ ସମ୍ବୋଧନର ତୁରନ୍ତ ପରେ ଇରାନ ପକ୍ଷରୁ ଇସ୍ରାଏଲ ଉପରେ କ୍ଷେପଣାସ୍ତ୍ର ମାଡ଼ କରାଯାଇଛି। ଆମେରିକା ଯୁଦ୍ଧରେ ନିଜ ବିଜୟ ଏବଂ ଏହା ଶେଷ ହେବାକୁ ଯାଉଥିବା ନେଇ ଦାବି କରୁଥିବା ବେଳେ, ଇରାନର ଏହି କ୍ରମାଗତ ଆକ୍ରମଣ ସ୍ପଷ୍ଟ କରୁଛି ଯେ ଏହି ବିବାଦ ଶୀଘ୍ର ଥମିବାର କୌଣସି ସମ୍ଭାବନା ନାହିଁ। ଏହି ଘଟଣା ଯୋଗୁଁ ସମଗ୍ର ଗଲ୍ଫ ଅଞ୍ଚଳରେ ଉତ୍ତେଜନା ଚରମ ସୀମାରେ ପହଞ୍ଚିଛି।

ଟ୍ରମ୍ପଙ୍କ ଚେତାବନୀ ଓ ଆମେରିକାର ଦାବି

ନିଜର ରାଷ୍ଟ୍ରୀୟ ସମ୍ବୋଧନରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି ଯେ ଆମେରିକା ଏବଂ ଇସ୍ରାଏଲ ମିଳିତ ଭାବେ ଇରାନର ସାମରିକ ଶକ୍ତି, ବିଶେଷ କରି ସେମାନଙ୍କର ନୌସେନା ଏବଂ ବାୟୁସେନାକୁ ପ୍ରାୟତଃ ନଷ୍ଟ କରିଦେଇଛନ୍ତି। ସେ କହିଛନ୍ତି ଯେ ଏହି ଯୁଦ୍ଧ ଏବେ ନିଜର ଶେଷ ପର୍ଯ୍ୟାୟରେ ପହଞ୍ଚିଛି। ତେବେ ଇରାନକୁ କଡ଼ା ଚେତାବନୀ ଦେଇ ଟ୍ରମ୍ପ କହିଛନ୍ତି ଯେ ଆଗାମୀ ୨ ରୁ ୩ ସପ୍ତାହ ମଧ୍ୟରେ ଇରାନ ଉପରେ ଏତେ ଭୟଙ୍କର ଆକ୍ରମଣ ହେବ ଯେ ସେମାନେ ପ୍ରସ୍ତର ଯୁଗକୁ ଫେରିଯିବେ। ଆମେରିକାର ସମସ୍ତ ସାମରିକ ଲକ୍ଷ୍ୟ ଖୁବ୍ ଶୀଘ୍ର ପୂରଣ ହେବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।

ଇରାନର କଡ଼ା ଜବାବ ଓ ଇସ୍ରାଏଲର ପ୍ରତିରକ୍ଷା

ଟ୍ରମ୍ପଙ୍କ ଭାଷଣ ଶେଷ ହେବା କ୍ଷଣି ଇରାନ ଏହାର କଡ଼ା ଜବାବ ଦେଇଥିଲା। ଇସ୍ରାଏଲୀ ସେନା ଅନୁଯାୟୀ, ଇରାନ ପକ୍ଷରୁ କେତେକ କ୍ଷେପଣାସ୍ତ୍ର ଉତକ୍ଷେପଣ କରାଯାଇଥିବା ଚିହ୍ନଟ କରାଯାଇଥିଲା। ଏହି ବିପଦର ମୁକାବିଲା କରିବା ପାଇଁ ଇସ୍ରାଏଲ ନିଜର ଆଧୁନିକ ଏୟାର ଡିଫେନ୍ସ ସିଷ୍ଟମ୍କୁ ତୁରନ୍ତ ସକ୍ରିୟ କରିଦେଇଥିଲା ଏବଂ କ୍ଷେପଣାସ୍ତ୍ରଗୁଡ଼ିକୁ ଆକାଶ ମାର୍ଗରେ ନଷ୍ଟ କରିବା ପ୍ରକ୍ରିୟା ଆରମ୍ଭ କରିଥିଲା। ଏହା ସହିତ ଉତ୍ତର ଓ କେନ୍ଦ୍ରୀୟ ଇସ୍ରାଏଲର ଅନେକ ଅଞ୍ଚଳରେ ସାଇରନ୍ ବାଜିବା ଆରମ୍ଭ ହୋଇଯାଇଥିଲା, ଯାହା ପରିସ୍ଥିତିର ଗମ୍ଭୀରତାକୁ ଦର୍ଶାଉଥିଲା।

ହର୍ମୁଜ ପ୍ରଣାଳୀ ଓ ବିଶ୍ୱ ଅର୍ଥନୀତି ଉପରେ ପ୍ରଭାବ

ମଧ୍ୟପ୍ରାଚ୍ୟରେ ଚାଲିଥିବା ଏହି ଉତ୍ତେଜନା ବିଶ୍ୱ ଅର୍ଥନୀତି ପାଇଁ ଚିନ୍ତାର କାରଣ ପାଲଟିଛି। ରାଷ୍ଟ୍ରପତି ଟ୍ରମ୍ପ ଗୁରୁତ୍ୱପୂର୍ଣ୍ଣ ହର୍ମୁଜ ପ୍ରଣାଳୀ ସମ୍ପର୍କରେ କହିଥିଲେ ଯେ ଯୁଦ୍ଧ ଶେଷ ହେବା ପରେ ଏହା ସ୍ୱାଭାବିକ ଭାବେ ଖୋଲିଯିବ ଏବଂ ଅନ୍ୟ ଦେଶମାନେ ମଧ୍ୟ ନିଜର ତୈଳ ଯୋଗାଣର ସୁରକ୍ଷା ନିଶ୍ଚିତ କରିବା ଉଚିତ୍। ତେବେ ଇରାନ ଏବଂ ଆମେରିକା-ଇସ୍ରାଏଲ ମଧ୍ୟରେ ବଢୁଥିବା ଏହି ଆକ୍ରମଣ ଓ ପ୍ରତ୍ୟାକ୍ରମଣ ଯୋଗୁଁ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବୃଦ୍ଧି ପାଇ ବ୍ୟାରେଲ ପିଛା ୧୦୫ ଡଲାର ଅତିକ୍ରମ କରିଛି, ଯାହା ବିଶ୍ୱ ସ୍ତରରେ ମହଙ୍ଗା ମାଡ଼ ଓ ଅର୍ଥନୈତିକ ସଙ୍କଟର ଆଶଙ୍କା ସୃଷ୍ଟି କରିଛି।

ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶାନ୍ତି ପ୍ରସ୍ତାବର ଜବାବରେ ଇରାନ ପୁନର୍ବାର ଆଲୋଚନା ପାଇଁ କଡ଼ା ସର୍ତ୍ତ ରଖିଛି। ଉପସାଗରୀୟ ଅଞ୍ଚଳରେ ଥିବା ଆମେରିକାର ସମସ୍ତ ସାମରିକ ଘାଟି ବନ୍ଦ କରିବା ଏବଂ କଟକଣା ହଟାଇବା ପାଇଁ ତେହେରାନ ଦାବି କରିଛି।

ଯୁଦ୍ଧବିରାମ ଆଲୋଚନା ପାଇଁ ଇରାନ କଡ଼ା ଆଭିମୁଖ୍ୟ ଗ୍ରହଣ କରିଛି। ଉପସାଗରରେ ଆମେରିକାର ସାମରିକ ଘାଟି ବନ୍ଦ ଏବଂ ସମସ୍ତ କଟକଣା ସମ୍ପୂର୍ଣ୍ଣ ପ୍ରତ୍ୟାହାର କରିବାକୁ ଦାବି କରିଛି। ଏହା ସହ ଯୁଦ୍ଧ କ୍ଷତିପୂରଣ ମଧ୍ୟ ମାଗିଛି। ଏହା ବ୍ୟତୀତ ହୋର୍ମୁଜ ପ୍ରଣାଳୀ ଦେଇ ଯାଉଥିବା ଜାହାଜଗୁଡ଼ିକରୁ ଶୁଳ୍କ ଆଦାୟ ପାଇଁ ଏକ ନୂଆ ବ୍ୟବସ୍ଥା ଲାଗୁ କରିବାକୁ ପ୍ରସ୍ତାବ ଦେଇଛି, ଯାହାଦ୍ୱାରା ଏହି ଗୁରୁତ୍ୱପୂର୍ଣ୍ଣ ଜଳପଥ ଉପରେ ଏହାର ନିୟନ୍ତ୍ରଣ ରହିବ। ଭବିଷ୍ୟତରେ ଯେପରି କୌଣସି ଆକ୍ରମଣ ନହୁଏ, ସେଥିପାଇଁ ଦୃଢ଼ ନିଶ୍ଚିତତା ଦାବି କରିଛି।

କଡ଼ା ସର୍ତ୍ତ ସତ୍ତ୍ୱେ ଇରାନ ପରଦା ପଛରେ କିଛି ନମନୀୟତା ଦେଖାଉଥିବା ସୂଚନା ମିଳିଛି। ରିପୋର୍ଟ ଅନୁଯାୟୀ, ଇରାନ ଆସନ୍ତା ୫ ବର୍ଷ ପାଇଁ ନିଜର ବାଲାଷ୍ଟିକ କ୍ଷେପଣାସ୍ତ୍ର କାର୍ଯ୍ୟକ୍ରମ ସ୍ଥଗିତ ରଖିବା ସହ ୟୁରାନିୟମ ସମୃଦ୍ଧକରଣ ହ୍ରାସ କରିବାକୁ ବିଚାର କରିପାରେ। ଏହାଛଡ଼ା ୬୦% ସମୃଦ୍ଧ ୟୁରାନିୟମ ଭଣ୍ଡାର ଉପରେ ଆଲୋଚନା କରିବାକୁ ଏବଂ ଆନ୍ତର୍ଜାତିକ ପରମାଣୁ ଶକ୍ତି ସଂସ୍ଥା (IAEA) କୁ ଏହାର ସେଣ୍ଟ୍ରିଫ୍ୟୁଜ ଯାଞ୍ଚ ପାଇଁ ଅନୁମତି ଦେବାକୁ ପ୍ରସ୍ତୁତ ଅଛି। ହିଜବୁଲ୍ଲା, ହମାସ ଏବଂ ଇରାକୀ ମିଲିସିଆ ଭଳି ସଂଗଠନକୁ ସମର୍ଥନ ବନ୍ଦ କରିବା ଉପରେ ମଧ୍ୟ ବିଚାର କରିପାରେ।

ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ୧୫-ସୂତ୍ରୀ ଶାନ୍ତି ପ୍ରସ୍ତାବକୁ ନେଇ ଇରାନ ସନ୍ଦେହ ପ୍ରକଟ କରିଛି। ଅତୀତରେ ଆମେରିକା ଏବଂ ଇସ୍ରାଏଲର କାର୍ଯ୍ୟକଳାପ ଯୋଗୁଁ ତେହେରାନ ଆଉ ବୋକା ବନିବାକୁ ଚାହୁଁନାହିଁ ବୋଲି ସ୍ପଷ୍ଟ କରିଛି। ପୂର୍ବରୁ କୂଟନୈତିକ ଆଲୋଚନା ପୂର୍ବରୁ ଆକ୍ରମଣ ହୋଇଥିବାରୁ ଇରାନର ଆମେରିକା ପ୍ରତି ଅବିଶ୍ୱାସ ବଢ଼ିଛି।

ଗତ ଫେବୃଆରୀ ୨୮ ତାରିଖରେ ଯୁକ୍ତରାଷ୍ଟ୍ର ଆମେରିକା ଓ ଇସ୍ରାଏଲର ଏକ ମିଳିତ ଆକ୍ରମଣରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇ ଏବଂ କିଛି ବରିଷ୍ଠ ଅଧିକାରୀଙ୍କ ମୃତ୍ୟୁ ପରେ ଏହି ଯୁଦ୍ଧ ଆରମ୍ଭ ହୋଇଥିଲା। ଏହାର ଜବାବରେ ଇରାନ ପଶ୍ଚିମ ଏସିଆରେ ଥିବା ଆମେରିକାର ସାମରିକ ଘାଟି ଉପରେ ବ୍ୟାପକ କ୍ଷେପଣାସ୍ତ୍ର ଓ ଡ୍ରୋନ ଆକ୍ରମଣ କରିଥିଲା। ଏହି ଯୁଦ୍ଧରେ ଇରାନ ମଧ୍ୟରେ ଏପର୍ଯ୍ୟନ୍ତ ୨,୩୦୦ ରୁ ଅଧିକ ଲୋକ ପ୍ରାଣ ହରାଇଛନ୍ତି, ଯେଉଁଥିରେ ୧,୩୦୦ ରୁ ଅଧିକ ସାଧାରଣ ନାଗରିକ ଏବଂ ୧୨ ବର୍ଷରୁ କମ୍ ବୟସର ପ୍ରାୟ ୨୦୦ ଶିଶୁ ସାମିଲ ଅଛନ୍ତି।

ପଶ୍ଚିମ ଏସିଆରେ ଇରାନ ବିପକ୍ଷରେ ଆମେରିକା ଏବଂ ଇସ୍ରାଏଲର ଯୁଦ୍ଧ ଦିନକୁ ଦିନ ତୀବ୍ର ହେବାରେ ଲାଗିଛି। ଏହି ବଢୁଥିବା ଉତ୍ତେଜନା କାରଣରୁ ଭାରତର ଶକ୍ତି ସୁରକ୍ଷା ଉପରେ ଗମ୍ଭୀର ବିପଦ ସୃଷ୍ଟି ହୋଇଛି। ଏହାକୁ ଦୃଷ୍ଟିରେ ରଖି ତୈଳ ଆମଦାନୀ ଏବଂ ବାଣିଜ୍ୟିକ ଜାହାଜଗୁଡ଼ିକର ସୁରକ୍ଷିତ ଯାତାୟାତ ସୁନିଶ୍ଚିତ କରିବା ପାଇଁ ଭାରତୀୟ ନୌସେନା (Indian Navy) ପକ୍ଷରୁ ହର୍ମୁଜ୍ ପ୍ରଣାଳୀ (Strait of Hormuz) ଏବଂ ଆରବ ସାଗର ନିକଟରେ ନିଜର ଉପସ୍ଥିତି ବୃଦ୍ଧି କରାଯାଇଛି।

ହର୍ମୁଜ୍ ପ୍ରଣାଳୀରେ ବଢୁଛି ସଙ୍କଟ

ପଶ୍ଚିମ ଏସିଆରେ ସାମରିକ ଅଶାନ୍ତି କାରଣରୁ ବିଶ୍ୱର ଅନ୍ୟତମ ପ୍ରମୁଖ ତୈଳ ଏବଂ ଗ୍ୟାସ୍ ପରିବହନ ମାର୍ଗ ହର୍ମୁଜ୍ ପ୍ରଣାଳୀ ଦେଇ ଜାହାଜ ଚଳାଚଳ ବାଧାପ୍ରାପ୍ତ ହୋଇଛି। ଭାରତ ନିଜର ଆବଶ୍ୟକତାର ପ୍ରାୟ ୪୫% କଞ୍ଚା ତୈଳ ଏବଂ ୯୦% ଏଲପିଜି (LPG) ଗଲ୍ଫ ଦେଶଗୁଡ଼ିକରୁ ଆମଦାନୀ କରିଥାଏ। ତେଣୁ ଏହି ସାମୁଦ୍ରିକ ପଥରେ ଅବରୋଧ ଯୋଗୁଁ ଘରୋଇ ବଜାରରେ ଇନ୍ଧନ ଅଭାବ ଦେଖାଦେବାର ଆଶଙ୍କା ସୃଷ୍ଟି ହୋଇଛି। ବର୍ତ୍ତମାନ ଏହି ଅଞ୍ଚଳରେ ଅନେକ ବାଣିଜ୍ୟିକ ଜାହାଜ ଫସି ରହିଥିବା ସୂଚନା ମିଳିଛି।

ଭାରତୀୟ ନୌସେନାର 'ଅପରେସନ୍ ସଙ୍କଳ୍ପ'

ଏହି ସଙ୍କଟମୟ ପରିସ୍ଥିତିର ମୁକାବିଲା ପାଇଁ ଭାରତୀୟ ନୌସେନା ଅପରେସନ୍ ସଙ୍କଳ୍ପ ଅଧୀନରେ ଆରବ ସାଗର ଏବଂ ଓମାନ୍ ଉପସାଗରରେ ନିଜର ଅପରେସନାଲ୍ ମୁତୟନ ବୃଦ୍ଧି କରିଛି। ବାଣିଜ୍ୟିକ ଜାହାଜଗୁଡ଼ିକୁ ସୁରକ୍ଷା ପ୍ରଦାନ କରିବା ଉଦ୍ଦେଶ୍ୟରେ ଭାରତ ପକ୍ଷରୁ ୭ଟି ଅତିରିକ୍ତ ଯୁଦ୍ଧପୋତ ମୁତୟନ କରାଯାଇଛି। ଏହା ସହିତ ଲଜିଷ୍ଟିକ୍ ସପୋର୍ଟ ଭେସେଲ୍‌ଗୁଡ଼ିକୁ ମଧ୍ୟ ପ୍ରସ୍ତୁତ ରଖାଯାଇଛି, ଯାହାଦ୍ୱାରା ଯେକୌଣସି ଜରୁରୀକାଳୀନ ପରିସ୍ଥିତିରେ ତୁରନ୍ତ ପଦକ୍ଷେପ ନିଆଯାଇପାରିବ।

ଶକ୍ତି ସୁରକ୍ଷା ଏବଂ କୂଟନୈତିକ ପ୍ରୟାସ

ଯୁଦ୍ଧ ପରିସ୍ଥିତି ମଧ୍ୟରେ କଞ୍ଚା ତୈଳକୁ ସୁରକ୍ଷିତ ଭାବେ ଦେଶକୁ ଆଣିବା ପାଇଁ ଭାରତ ସରକାର ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି। ସୂଚନା ଅନୁଯାୟୀ, ହର୍ମୁଜ୍ ପ୍ରଣାଳୀ ନିକଟରେ ଫସି ରହିଥିବା ୨୦ରୁ ଅଧିକ ଭାରତୀୟ ଜାହାଜଗୁଡ଼ିକୁ ସୁରକ୍ଷିତ ବାହାର କରିବା ପାଇଁ ନୂଆଦିଲ୍ଲୀ ପକ୍ଷରୁ ଇରାନ ସହିତ କୂଟନୈତିକ ସ୍ତରରେ ଆଲୋଚନା ଜାରି ରହିଛି। ସାମୁଦ୍ରିକ ବାଣିଜ୍ୟ ପଥର ସୁରକ୍ଷା ଏବଂ ଦେଶର ଶକ୍ତି ସୁରକ୍ଷାକୁ ବଜାୟ ରଖିବା ବର୍ତ୍ତମାନ ଭାରତର ସର୍ବୋଚ୍ଚ ପ୍ରାଥମିକତା ପାଲଟିଛି।

ମଧ୍ୟପ୍ରାଚ୍ୟ ଏବଂ ଏହାର ଆଖପାଖ ଅଞ୍ଚଳରେ ଲାଗିରହିଥିବା ଯୁଦ୍ଧ କେବଳ ଧନଜୀବନ ନଷ୍ଟ କରୁନାହିଁ, ବରଂ କୋଟି କୋଟି ପିଲାଙ୍କ ଭବିଷ୍ୟତକୁ ମଧ୍ୟ ଅନ୍ଧକାର ଆଡ଼କୁ ଠେଲି ଦେଉଛି। ବିଶ୍ୱର ସବୁଠାରୁ ବଡ଼ ବାଲ୍ୟ ଅଧିକାର ସଂସ୍ଥା ସେଭ୍ ଦି ଚିଲ୍ଡ୍ରେନ୍ (Save the Children) ର ଏକ ତାଜା ରିପୋର୍ଟ ଅନୁଯାୟୀ, ଇରାନ-ଇସ୍ରାଏଲ୍ ଏବଂ ପାକିସ୍ତାନ-ଆଫଗାନିସ୍ତାନ ଭଳି ଦେଶଗୁଡ଼ିକରେ ଲାଗିରହିଥିବା ସଂଘର୍ଷ କାରଣରୁ ପ୍ରାୟ ୫.୨ କୋଟି ପିଲା ନିଜର ଶିକ୍ଷାରୁ ବଞ୍ଚିତ ହୋଇଛନ୍ତି। ମିଳିତ ଜାତିସଂଘର ତଥ୍ୟ ଉପରେ ଆଧାରିତ ଏହି ରିପୋର୍ଟ ଦର୍ଶାଉଛି ଯେ, ୫ ରୁ ୧୭ ବର୍ଷ ବୟସର ପିଲାମାନେ ବର୍ତ୍ତମାନ ସ୍କୁଲ୍ ଯିବା ପରିବର୍ତ୍ତେ ନିଜ ଜୀବନ ବଞ୍ଚାଇବା ପାଇଁ ସଂଘର୍ଷ କରୁଛନ୍ତି। ଏହି ପରିସ୍ଥିତିକୁ ଏକ 'ଏଜୁକେସନ୍ ଇମର୍ଜେନ୍ସି' ବା ଶିକ୍ଷାଗତ ଜରୁରୀକାଳୀନ ସ୍ଥିତି ବୋଲି କୁହାଯାଉଛି।

ସ୍କୁଲ୍ ବଦଳରେ ଶୁଭୁଛି ବିସ୍ଫୋରଣର ଶବ୍ଦ

ରିପୋର୍ଟ ଅନୁଯାୟୀ, ମଧ୍ୟପ୍ରାଚ୍ୟର ପ୍ରାୟ ୧୨ଟି ଦେଶରେ ଶିକ୍ଷା ବ୍ୟବସ୍ଥା ସମ୍ପୂର୍ଣ୍ଣ ରୂପେ ଭୁସୁଡ଼ି ପଡ଼ିଛି। ସେଥିମଧ୍ୟରେ ଇରାନ, ଇସ୍ରାଏଲ୍, ଜୋର୍ଡାନ, ସାଉଦି ଆରବ, ପାଲେଷ୍ଟାଇନ୍ ଏବଂ ସଂଯୁକ୍ତ ଆରବ ଏମିରେଟ୍ସ (UAE) ଆଦି ଦେଶ ସାମିଲ ଅଛନ୍ତି। ଯୁଦ୍ଧ ବିମାନର ଆକ୍ରମଣରେ ଅନେକ ସ୍କୁଲ୍ ସମ୍ପୂର୍ଣ୍ଣ ରୂପେ ନଷ୍ଟ ହୋଇଯାଇଛି। କେବଳ ଇରାନରେ ହୋଇଥିବା ବିମାନ ଆକ୍ରମଣରେ ୬୫ ଟି ସ୍କୁଲ୍ ଧ୍ୱଂସସ୍ତୂପରେ ପରିଣତ ହୋଇଥିବା ଇରାନିଆନ୍ ରେଡ୍ କ୍ରିସେଣ୍ଟ ସୋସାଇଟି ପ୍ରକାଶ କରିଛି। ଯେଉଁ ଶ୍ରେଣୀଗୃହଗୁଡ଼ିକରେ କେବେ ପିଲାମାନଙ୍କର କୋଳାହଳ ଶୁଭୁଥିଲା, ସେଠାରେ ଏବେ କେବଳ ଇଟା, ପଥର ଏବଂ ଧୂଆଁ ଦେଖିବାକୁ ମିଳୁଛି।

ସ୍କୁଲ୍ ଏବେ ପାଲଟିଛି 'ଆଶ୍ରୟସ୍ଥଳୀ'

ଯେଉଁ ସ୍କୁଲ୍‌ଗୁଡ଼ିକ ବର୍ତ୍ତମାନ ସୁଦ୍ଧା ସୁରକ୍ଷିତ ରହିଛି, ସେଗୁଡ଼ିକୁ ମଧ୍ୟ ବନ୍ଦ କରିଦିଆଯାଇଛି। କାରଣ ଯୁଦ୍ଧ ଯୋଗୁଁ ବାସହୀନ ହୋଇପଡ଼ିଥିବା ହଜାର ହଜାର ପରିବାର ଏହି ସ୍କୁଲ୍‌ଗୁଡ଼ିକରେ ଆଶ୍ରୟ ନେଉଛନ୍ତି। ଅର୍ଥାତ୍ ବର୍ତ୍ତମାନ କ୍ଲାସ୍‌ରୁମ୍‌ଗୁଡ଼ିକ ଶରଣାର୍ଥୀଙ୍କ ପାଇଁ ଆଶ୍ରୟସ୍ଥଳୀରେ ପରିଣତ ହୋଇଛି। ଯୁଦ୍ଧର ପ୍ରଭାବ କେବଳ ସେହି ଦେଶଗୁଡ଼ିକରେ ସୀମିତ ନାହିଁ ବରଂ ପାକିସ୍ତାନ ଓ ଆଫଗାନିସ୍ତାନ ଭଳି ପଡ଼ୋଶୀ ଦେଶଗୁଡ଼ିକରେ ମଧ୍ୟ ଏହାର ବ୍ୟାପକ ପ୍ରଭାବ ଦେଖିବାକୁ ମିଳିଛି।

ବିଫଳ ହେଲା ଅନ୍‌ଲାଇନ୍ ଶିକ୍ଷା

ପିଲାମାନଙ୍କ ଶିକ୍ଷାକୁ ଜାରି ରଖିବା ପାଇଁ କିଛି ଦେଶ ଅନ୍‌ଲାଇନ୍ ଶିକ୍ଷା ବ୍ୟବସ୍ଥା ଆରମ୍ଭ କରିବାକୁ ପ୍ରୟାସ କରିଥିଲେ। କିନ୍ତୁ ଏହି ପ୍ରୟାସ ମଧ୍ୟ ସମ୍ପୂର୍ଣ୍ଣ ରୂପେ ବିଫଳ ହୋଇଛି। ଯୁଦ୍ଧଗ୍ରସ୍ତ ଅଞ୍ଚଳରେ ଇଣ୍ଟରନେଟ୍ ସେବା ବାରମ୍ବାର କାଟ୍ ହେବା ସହ ବିଜୁଳିର ଘୋର ଅଭାବ ଏବଂ ଆବଶ୍ୟକୀୟ ଉପକରଣର ଅନୁପସ୍ଥିତି କାରଣରୁ ପିଲାମାନେ ମାସ ମାସ ଧରି ବହିଠାରୁ ଦୂରରେ ଅଛନ୍ତି। ସେଭ୍ ଦି ଚିଲ୍ଡ୍ରେନ୍ ର ଏହି ରିପୋର୍ଟ ବିଶ୍ୱ ନେତୃବୃନ୍ଦଙ୍କ ପାଇଁ ଏକ ବଡ଼ ଚେତାବନୀ, କାରଣ ଯଦି ଶୀଘ୍ର ଏହାର ସମାଧାନ କରା ନଯାଏ, ତେବେ ଏକ ସମ୍ପୂର୍ଣ୍ଣ ପିଢ଼ିର ଭବିଷ୍ୟତ ନଷ୍ଟ ହୋଇଯିବ।

ଇରାନ ଏବଂ ଆମେରିକା-ଇସ୍ରାଏଲ ମଧ୍ୟରେ ଲାଗିରହିଥିବା ଯୁଦ୍ଧ ଏବେ ଏକ ବିନାଶକାରୀ ରୂପ ନେବାରେ ଲାଗିଛି। ଏହି ଭୟାବହ ପରିସ୍ଥିତି କାରଣରୁ ମଧ୍ୟପ୍ରାଚ୍ୟରେ କାମ କରୁଥିବା ପ୍ରବାସୀ ଭାରତୀୟ, ବିଶେଷ କରି ଓଡ଼ିଆ ଶ୍ରମିକମାନେ ଘୋର ସଙ୍କଟରେ ପଡ଼ିଛନ୍ତି।

ବର୍ତ୍ତମାନ ଇରାନ କେବଳ ଇସ୍ରାଏଲ ଉପରେ ଆକ୍ରମଣ ସୀମିତ ରଖିନାହିଁ, ବରଂ ମଧ୍ୟପ୍ରାଚ୍ୟର ପ୍ରାୟ ୧୧ଟି ଦେଶ ଉପରେ କ୍ଷେପଣାସ୍ତ୍ର ଏବଂ ଡ୍ରୋନ୍ ମାଡ଼ କରୁଛି। ଏହି ଦେଶଗୁଡ଼ିକ ମଧ୍ୟରେ ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଏବଂ କୁଏତ ଭଳି ପ୍ରମୁଖ ରାଷ୍ଟ୍ର ସାମିଲ ଅଛନ୍ତି। କ୍ରମାଗତ ଆକ୍ରମଣ ଯୋଗୁଁ ସମଗ୍ର ଅଞ୍ଚଳରେ ଯୁଦ୍ଧର ଆତଙ୍କ ଖେଳିଯାଇଛି।

ଏହି କ୍ରମାଗତ ବିସ୍ଫୋରଣ ଏବଂ ଯୁଦ୍ଧ ସ୍ଥିତି ଯୋଗୁଁ ଦୁବାଇରେ କାମ କରୁଥିବା ବହୁ ସଂଖ୍ୟକ ଓଡ଼ିଆ ଶ୍ରମିକ ଫସି ରହିଛନ୍ତି। ବିମାନ ଚଳାଚଳ ବାଧାପ୍ରାପ୍ତ ହେବା ସହ ସ୍ଥାନୀୟ ଅଞ୍ଚଳରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିବାରୁ ଶ୍ରମିକମାନେ ସ୍ୱଦେଶ ଫେରିବା ନେଇ ଅନିଶ୍ଚିତତା ଦେଖାଦେଇଛି। ଫସି ରହିଥିବା ଶ୍ରମିକଙ୍କ ପରିବାର ଲୋକେ ବର୍ତ୍ତମାନ କେନ୍ଦ୍ର ଓ ରାଜ୍ୟ ସରକାରଙ୍କୁ ସେମାନଙ୍କର ସୁରକ୍ଷିତ ପ୍ରତ୍ୟାବର୍ତ୍ତନ ପାଇଁ ନିବେଦନ କରୁଛନ୍ତି।

ଆନ୍ତର୍ଜାତୀୟ ସ୍ତରରେ ଲାଗି ରହିଥିବା ଇରାନ-ଇସ୍ରାଏଲ ଯୁଦ୍ଧର ପ୍ରଭାବ ଏବେ ସାଧାରଣ ଖାଉଟିଙ୍କ ଉପରେ ପଡ଼ିବାରେ ଲାଗିଛି। ବିଶ୍ୱବ୍ୟାପୀ ଏବେ ଏଲପିଜି ଗ୍ୟାସ୍ ସିଲିଣ୍ଡରର ଘୋର ଅଭାବ ଦେଖାଦେଇଛି। ଏହାର ପ୍ରଭାବରେ ଅନେକ ବଡ଼ ସହରରେ ରେସ୍ତୋରାଁଗୁଡ଼ିକ ବନ୍ଦ ହୋଇଯିବା ସହ ହୋଟେଲରେ ଖାଦ୍ୟ ଦର ମଧ୍ୟ ଆକାଶଛୁଆଁ ହୋଇଛି। ଏଭଳି ଏକ ସଙ୍କଟଜନକ ସ୍ଥିତିରେ ନିଜ ଝିଅର ବିବାହ ଭୋଜି କିପରି ଆୟୋଜନ କରିବେ, ତାହାକୁ ନେଇ ମହାରାଷ୍ଟ୍ରର ନାସିକର ଏକ ପରିବାର ଏବେ ଘୋର ଚିନ୍ତାରେ ପଡ଼ିଛନ୍ତି। ଗ୍ୟାସ ସିଲିଣ୍ଡରର ଅଭାବ ଏବେ ସେମାନଙ୍କ ଘରର ବିବାହ ଖୁସିକୁ ଫିକା କରିଦେଇଛି।

୨୦୦୦ ଅତିଥି ଓ ମାର୍ଚ୍ଚ ୧୪ରେ ବିବାହ

ନାସିକର ସହାରା ଅଞ୍ଚଳରେ ବସବାସ କରୁଥିବା ବେଲସରେ ପରିବାରର କନ୍ୟା ଖୁସ୍ବୁ ବେଲସରେଙ୍କ ବିବାହ ଆସନ୍ତା ମାର୍ଚ୍ଚ ୧୪ ତାରିଖରେ ଅନୁଷ୍ଠିତ ହେବାକୁ ଯାଉଛି। ଏହି ବିବାହ ଉତ୍ସବ ପାଇଁ ପ୍ରାୟ ୨୦୦୦ ଅତିଥିଙ୍କୁ ନିମନ୍ତ୍ରଣ କରାଯାଇଛି। ଘରେ ହଳଦୀ, ମେହେନ୍ଦୀ ଓ ସଙ୍ଗୀତ ଭଳି ପୂର୍ବ-ବିବାହ କାର୍ଯ୍ୟକ୍ରମ ଆରମ୍ଭ ହୋଇସାରିଥିବା ବେଳେ ଗ୍ୟାସ ଅଭାବ ପରିବାରର ମୁରବୀଙ୍କୁ ଚାପଗ୍ରସ୍ତ କରିଛି। ଅନ୍ୟପକ୍ଷରେ, କଲ୍ୟାଣ ମଣ୍ଡପର ମାଲିକ କୈଳାସ ଗୁପ୍ତା ସ୍ପଷ୍ଟ ଭାବରେ ଜଣାଇ ଦେଇଛନ୍ତି ଯେ, ଭୋଜି ପ୍ରସ୍ତୁତି ପାଇଁ ପରିବାରକୁ ନିଜେ ସିଲିଣ୍ଡର ବ୍ୟବସ୍ଥା କରିବାକୁ ପଡିବ। ବର୍ତ୍ତମାନର ବଜାର ସ୍ଥିତିରେ ଗୋଟିଏ ହେଲେ ସିଲିଣ୍ଡର ଯୋଗାଡ଼ କରିବା କଷ୍ଟକର ହୋଇପଡ଼ିଥିବାରୁ, ପରିବାର ଲୋକେ ରୋଷେଇ ପାଇଁ ଖାଦ୍ୟ ତାଲିକା ବା ମେନୁ ପରିବର୍ତ୍ତନ କରିବାକୁ ବାଧ୍ୟ ହେଉଛନ୍ତି।

ବିବାହ ବେଦୀରେ ବସିବାକୁ ଯାଉଥିବା କନ୍ୟା ଖୁସ୍ବୁ ନିଜର ନିରାଶା ବ୍ୟକ୍ତ କରି କହିଛନ୍ତି ଯେ, ମଣ୍ଡପ ମାଲିକ ଗ୍ୟାସ ଯୋଗାଇବା ଅସମ୍ଭବ ବୋଲି ରୋକଠୋକ୍ ଶୁଣାଇଦେଇଛନ୍ତି। ଏବେ ସବୁଠାରୁ ବଡ଼ ସମସ୍ୟା ହେଉଛି ଅତିଥିମାନଙ୍କୁ କିପରି ବାରଣ କରିବୁ। ଆମେ ସମସ୍ତଙ୍କୁ ନିମନ୍ତ୍ରଣ କାର୍ଡ ପଠାଇ ସାରିଥିବାରୁ ୨୦୦୦ ଅତିଥିଙ୍କ ବଦଳରେ ୧୦୦୦ ଲୋକଙ୍କୁ ଆସିବାକୁ କହିପାରିବୁ ନାହିଁ। ଏଭଳି ଅସ୍ୱାଭାବିକ ପରିସ୍ଥିତିରେ ବିବାହ ଭୋଜି କିପରି ସମ୍ପନ୍ନ ହେବ, ସେନେଇ ସମ୍ପୂର୍ଣ୍ଣ ପରିବାର ଏବେ ମାନସିକ ଚାପ ଦେଇ ଗତି କରୁଛନ୍ତି।

ଇରାନ ସହ ଚାଲିଥିବା ଭୟଙ୍କର ଯୁଦ୍ଧ ମଧ୍ୟରେ ଇସ୍ରାଏଲରେ ଫସି ରହିଥିବା ନିଜ ନାଗରିକଙ୍କୁ ଆମେରିକା ଏକ ବଡ଼ ଝଟକା ଦେଇଛି। ଆମେରିକା ସରକାର ସ୍ପଷ୍ଟ ଭାବରେ କହିଛନ୍ତି ଯେ ବର୍ତ୍ତମାନର ପରିସ୍ଥିତିରେ ସେମାନଙ୍କୁ ଉଦ୍ଧାର କରିବା ସମ୍ଭବ ନୁହେଁ, ତେଣୁ ନାଗରିକମାନେ ନିଜେ ଦେଶରୁ ବାହାରିବା ପାଇଁ ଯୋଜନା ପ୍ରସ୍ତୁତ କରନ୍ତୁ।

ସୀମିତ ରହିଛି ବାହାରିବାର ବିକଳ୍ପ

ଇସ୍ରାଏଲରେ ଥିବା ଆମେରିକୀୟ ରାଷ୍ଟ୍ରଦୂତ ମାଇକ୍ ହକାବି (Mike Huckabee) ସୁରକ୍ଷା ପରିସ୍ଥିତିକୁ ଦୃଷ୍ଟିରେ ରଖି ଏକ ଆଡଭାଇଜରୀ ଜାରି କହିଛନ୍ତି। ସେ ଚେତାବନୀ ଦେଇ କହିଛନ୍ତି ଯେ ବର୍ତ୍ତମାନ ଇସ୍ରାଏଲରୁ ବାହାରିବାର ବିକଳ୍ପ ଅତି ସୀମିତ। ସରକାର ସେମାନଙ୍କ ନିରାପଦ ପ୍ରତ୍ୟାବର୍ତ୍ତନ ପାଇଁ କୌଣସି ସ୍ୱତନ୍ତ୍ର ବ୍ୟବସ୍ଥା କରିପାରିବେ ନାହିଁ ବୋଲି ସଫା ସଫା ଜଣାଇ ଦିଆଯାଇଛି।

ମିଶର ସୀମା ଦେଇ ଯିବାକୁ ପରାମର୍ଶ

ରାଷ୍ଟ୍ରଦୂତ ହକାବି ପରାମର୍ଶ ଦେଇଛନ୍ତି ଯେ ବର୍ତ୍ତମାନ ସମୟରେ ଇସ୍ରାଏଲର ପର୍ଯ୍ୟଟନ ମନ୍ତ୍ରଣାଳୟ ଦ୍ୱାରା ପରିଚାଳିତ ସଟଲ୍ ବସ୍ ଯୋଗେ ତାବା ସୀମା (Taba Border) ଦେଇ ମିଶରକୁ ଯିବା ସବୁଠାରୁ ସୁରକ୍ଷିତ ବିକଳ୍ପ। ତାବା ପହଞ୍ଚିବା ପରେ ଯାତ୍ରୀମାନେ ସେଠାରୁ କିମ୍ବା କାହିରାରୁ ଅନ୍ତର୍ଜାତୀୟ ବିମାନ ଧରି ଆମେରିକା କିମ୍ବା ଅନ୍ୟ ଦେଶକୁ ଯାଇପାରିବେ।

ବିମାନ ବନ୍ଦରରେ ଅନିଶ୍ଚିତତା

ତେଲ ଅଭିଭ୍‌ର ବେନ୍ ଗୁରିଅନ୍ ବିମାନବନ୍ଦର କେବେ ସ୍ୱାଭାବିକ ହେବ, ସେ ନେଇ ଅନିଶ୍ଚିତତା ଲାଗି ରହିଛି। ଯଦିଓ ବିମାନବନ୍ଦର ଖୋଲେ, ତେବେ ଉଡାଣ ସଂଖ୍ୟା ବହୁତ କମ୍ ରହିବ ଏବଂ ପ୍ରାଥମିକତା କେବଳ ପୂର୍ବରୁ ଟିକେଟ୍ ବୁକ୍ କରିଥିବା ଯାତ୍ରୀମାନଙ୍କୁ, ବିଶେଷକରି ‘ଏଲ୍ ଅଲ୍’ (El Al) ବିମାନର ଯାତ୍ରୀଙ୍କୁ ଦିଆଯିବ। ଅନ୍ୟ ଅନ୍ତର୍ଜାତୀୟ ବିମାନ କମ୍ପାନୀଗୁଡ଼ିକ ତୁରନ୍ତ ସେବା ଆରମ୍ଭ କରିବାର ସମ୍ଭାବନା କମ୍ ରହିଛି। ଅନ୍ୟପକ୍ଷରେ, ଜେରୁଜେଲମ ସ୍ଥିତ ଆମେରିକୀୟ ଦୂତାବାସର କର୍ମଚାରୀ ଏବଂ ସେମାନଙ୍କ ପରିବାରକୁ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ନିଜ ନିଜ ସ୍ଥାନରେ ସୁରକ୍ଷିତ ରହିବାକୁ (Shelter in place) ନିର୍ଦ୍ଦେଶ ଦିଆଯାଇଛି।

ମଧ୍ୟ ପ୍ରାଚ୍ୟରେ ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ଭୟଙ୍କର ଯୁଦ୍ଧ ଯୋଗୁଁ ସ୍ଥିତି ଅତ୍ୟନ୍ତ ଗମ୍ଭୀର ହୋଇପଡିଛି। ଏହି ସଂଘର୍ଷ ମଧ୍ୟରେ ବଲିଉଡ ଅଭିନେତ୍ରୀ ଇଶା ଗୁପ୍ତା ବର୍ତ୍ତମାନ ୟୁଏଇରେ ଫସି ରହିଛନ୍ତି। ଆମେରିକା ଏବଂ ଇସ୍ରାଏଲ ପକ୍ଷରୁ ଇରାନ ଉପରେ ହୋଇଥିବା ଆକ୍ରମଣ ପରେ ସାରା ଅଞ୍ଚଳରେ ଆତଙ୍କ ଖେଳିଯାଇଛି। ବିମାନ ଚଳାଚଳ ବନ୍ଦ ଥିବା କାରଣରୁ ଇଶାଙ୍କ ସମେତ ଅନେକ ଭାରତୀୟ ସେଠାରେ ଅଟକି ରହିଛନ୍ତି ଏବଂ ନିଜ ଦେଶକୁ ଫେରିବା ପାଇଁ ବ୍ୟାକୁଳ ହୋଇପଡିଛନ୍ତି।

ୟୁଏଇ ସରକାରଙ୍କ ବ୍ୟବସ୍ଥାକୁ ପ୍ରଶଂସା

ଅଭିନେତ୍ରୀ ଇଶା ଗୁପ୍ତା ନିଜର ସୋସିଆଲ ମିଡିଆ ମାଧ୍ୟମରେ ପ୍ରଶଂସକମାନଙ୍କୁ ନିଜର ସୁରକ୍ଷା ବିଷୟରେ ସୂଚନା ଦେଇଛନ୍ତି। ସେ କହିଛନ୍ତି ଯେ, ସେଠାକାର ପରିସ୍ଥିତି ଜଟିଳ ଥିଲେ ମଧ୍ୟ ୟୁଏଇ ସରକାର ଫସିଥିବା ଲୋକଙ୍କର ସମସ୍ତ ପ୍ରକାର ଯତ୍ନ ନେଉଛନ୍ତି। ଏୟାରପୋର୍ଟରେ ଅଟକିଥିବା ଯାତ୍ରୀମାନଙ୍କୁ ଖାଦ୍ୟ ଯୋଗାଇବାଠାରୁ ଆରମ୍ଭ କରି ହୋଟେଲରେ ରହିବା ପର୍ଯ୍ୟନ୍ତ ସମସ୍ତ ସୁବିଧା ଅତି ସୁନ୍ଦର ଭାବେ କରାଯାଇଛି। ଆବୁଧାବିରେ ସ୍ଥିତିକୁ ଯେଉଁଭଳି ଭାବେ ନିୟନ୍ତ୍ରଣ କରାଯାଉଛି, ତାହା ଦେଶର ଶକ୍ତି ଏବଂ ଶାନ୍ତି ବଜାୟ ରଖିବା ପ୍ରକ୍ରିୟାକୁ ଦର୍ଶାଉଛି ବୋଲି ସେ ପ୍ରକାଶ କରିଛନ୍ତି।

ଶୀଘ୍ର ଘରକୁ ଫେରିବାକୁ ଆଶା

ୟୁଏଇରେ ଫସି ରହିଥିବାରୁ ଇଶା କାହାର ଫୋନ କିମ୍ବା ମେସେଜର ଉତ୍ତର ଦେଇପାରୁ ନାହାନ୍ତି, ଯେଉଁଥିପାଇଁ ସେ କ୍ଷମା ମାଗିଛନ୍ତି। ସେ ନିଜ ପୋଷ୍ଟରେ ଲେଖିଛନ୍ତି, "ମୁଁ ବର୍ତ୍ତମାନ କେବଳ ଶୀଘ୍ର ଘରକୁ ଫେରିବାକୁ ଚାହୁଁଛି।" ଇଶାଙ୍କ ବ୍ୟତୀତ ସୋନାଲ ଚୌହାନ ଏବଂ ତାମିଲ ସୁପରଷ୍ଟାର ଅଜିତ କୁମାର ମଧ୍ୟ ୟୁଏଇରେ ଅଟକି ରହିଥିବା ଜଣାପଡିଛି। ଯୁଦ୍ଧ ପରିସ୍ଥିତି ଯୋଗୁଁ ସେଠାରେ ଅନିଶ୍ଚିତତା ଦେଖାଦେଇଥିବା ବେଳେ ସମସ୍ତେ ବିମାନ ଚଳାଚଳ ସ୍ୱାଭାବିକ ହେବାକୁ ଅପେକ୍ଷା କରିଛନ୍ତି।