ପପ୍ ଷ୍ଟାର ଜଷ୍ଟିନ ବିବର (Justin Bieber) ନିଜର କୋଚେଲା ୨୦୨୬ (Coachella 2026) ର ପ୍ରଦର୍ଶନ ପାଇଁ ବର୍ତ୍ତମାନ କଡ଼ା ସମାଲୋଚନାର ଶିକାର ହେଉଛନ୍ତି। ଏହି ମ୍ୟୁଜିକ୍ ଫେଷ୍ଟିଭାଲ୍‌ରେ ସେ ଇତିହାସର ସବୁଠାରୁ ମହଙ୍ଗା କଳାକାର ଭାବେ ରେକର୍ଡ କରିଥିଲେ ମଧ୍ୟ ତାଙ୍କର ପ୍ରଦର୍ଶନ ପ୍ରଶଂସକମାନଙ୍କୁ ନିରାଶ କରିଛି। ରିପୋର୍ଟ ଅନୁଯାୟୀ, ଗାୟକ ଏହି ଇଭେଣ୍ଟ ପାଇଁ ରେକର୍ଡ ୧୦ ମିଲିୟନ ଡଲାର ଫି' ନେଇଛନ୍ତି, କିନ୍ତୁ ଷ୍ଟେଜ୍ ଉପରେ ତାଙ୍କର 'ଅଳସୁଆ' ଶୈଳୀକୁ ନେଇ ସୋସିଆଲ୍ ମିଡିଆରେ ଅସନ୍ତୋଷ ପ୍ରକାଶ ପାଇଛି।

ଷ୍ଟେଜ୍‌ରେ କେବଳ ଲାପଟପ୍ ଆଉ ୟୁଟ୍ୟୁବ୍ ଭିଡିଓ

ବିବରଙ୍କ ଏହି ବହୁ ପ୍ରତୀକ୍ଷିତ କମ୍‌ବ୍ୟାକ୍ ପ୍ରଦର୍ଶନ ଅତ୍ୟନ୍ତ ସାଧାରଣ ଥିଲା। ଶନିବାର ରାତିରେ ସେ ଏକ ହୁଡି ଏବଂ ସର୍ଟସ୍ ପିନ୍ଧି ଷ୍ଟେଜ୍‌ରେ ପହଞ୍ଚିଥିଲେ। କୌଣସି ଡ୍ୟାନ୍ସର କିମ୍ବା ଲାଇଭ୍ ବ୍ୟାଣ୍ଡ ବିନା, ସେ କେବଳ ଗୋଟିଏ ଷ୍ଟୁଲ୍ ଉପରେ ବସି ନିଜ ଲାପଟପ୍‌ରୁ ପୁରୁଣା ୟୁଟ୍ୟୁବ୍ ଭିଡିଓ (YouTube Videos) ଚଲାଇଥିଲେ। ନିଜର ନୂଆ ଆଲବମ୍ 'ସ୍ୱାଗ୍-୨' (SWAG II) ସମେତ ତାଙ୍କର କିଛି ଲୋକପ୍ରିୟ ଗୀତଗୁଡ଼ିକୁ ସେ ଲାପଟପ୍ ମାଧ୍ୟମରେ ପ୍ରଦର୍ଶନ କରିଥିଲେ, ଯାହା ଉପସ୍ଥିତ ଦର୍ଶକଙ୍କୁ ଆଶ୍ଚର୍ଯ୍ୟ କରିଥିଲା।

ଦର୍ଶକଙ୍କ ତୀବ୍ର ସମାଲୋଚନା ଓ 'ଡବଲ୍ ଷ୍ଟାଣ୍ଡାର୍ଡ' ବିତର୍କ

ଏହି ପ୍ରଦର୍ଶନ ପରେ ଟ୍ୱିଟର (X) ଓ ଅନ୍ୟାନ୍ୟ ସୋସିଆଲ୍ ମିଡିଆରେ ଦର୍ଶକଙ୍କ ପ୍ରତିକ୍ରିୟାର ସୁଅ ଛୁଟିଥିଲା। ଅନେକ ପ୍ରଶଂସକ କହିଥିଲେ ଯେ ବିବର କେବଳ ୟୁଟ୍ୟୁବ୍ ଗୀତ ବଜାଇବା ପାଇଁ ୧୦ ମିଲିୟନ ଡଲାର୍ ନେଇ ଆୟୋଜକଙ୍କୁ ଠକିଛନ୍ତି। ଏହାସହ ଇଣ୍ଡଷ୍ଟ୍ରିରେ ଥିବା 'ଡବଲ୍ ଷ୍ଟାଣ୍ଡାର୍ଡ' (ଦୈତ୍ୟ ନୀତି) କୁ ନେଇ ମଧ୍ୟ ଚର୍ଚ୍ଚା ଜୋର ଧରିଛି।

ପ୍ରଶଂସକମାନେ ବିବରଙ୍କ ଏହି ପ୍ରଦର୍ଶନକୁ ମହିଳା କଳାକାର ସାବ୍ରିନା କାର୍ପେଣ୍ଟର (Sabrina Carpenter) ଙ୍କ ସହ ତୁଳନା କରିଛନ୍ତି। ସାବ୍ରିନାଙ୍କୁ ଏହି ଇଭେଣ୍ଟ ପାଇଁ କେବଳ ୫ ମିଲିୟନ ଡଲାର ମିଳିଥିବାବେଳେ ସେ ଚମତ୍କାର ଆଉଟଫିଟ୍, କୋରିଓଗ୍ରାଫି ଓ ବାସ୍ତବିକ ଭୋକାଲ୍ସ ସହ ଦର୍ଶକଙ୍କୁ ମନୋରଞ୍ଜନ ଯୋଗାଇଥିଲେ। ଗୋଟିଏ କମେଣ୍ଟରେ ଲେଖାଯାଇଛି ଯେ, 'ଯଦି ସାବ୍ରିନା କାର୍ପେଣ୍ଟର ବିବରଙ୍କ ଭଳି ଲାପଟପ୍ ଧରି ବସିଥାନ୍ତେ, ତେବେ ତାଙ୍କ କ୍ୟାରିଅର୍ ଶେଷ ହୋଇଯାଇଥାନ୍ତା'। ଆଉ କିଛି ଲୋକ ଏହାକୁ ଇତିହାସର ସବୁଠାରୁ 'ବୋରିଂ' ଏବଂ 'ଅସମ୍ମାନଜନକ' କୋଚେଲା ହେଡଲାଇନର୍ ବୋଲି କହିଛନ୍ତି।

କୋଚେଲାର ସର୍ବାଧିକ ପାରିଶ୍ରମିକପ୍ରାପ୍ତ କଳାକାର

ସମାଲୋଚନା ସତ୍ତ୍ୱେ, ଜଷ୍ଟିନ ବିବର ଏହି ଶୋ' ପାଇଁ ବିୟୋନ୍ସେ (Beyoncé) ଏବଂ ଲେଡି ଗାଗା (Lady Gaga) ଙ୍କ ଭଳି ପୂର୍ବତନ ହେଡଲାଇନର୍ସଙ୍କ ଆୟକୁ ପଛରେ ପକାଇଛନ୍ତି। ସେ କୋଚେଲା ଇତିହାସରେ ଏପର୍ଯ୍ୟନ୍ତ ସର୍ବାଧିକ ଅର୍ଥ ଗ୍ରହଣ କରିଥିବା କଳାକାର ପାଲଟିଛନ୍ତି। ତାଙ୍କ ପ୍ରଦର୍ଶନ ସମୟରେ ଷ୍ଟେଜ୍‌ରେ ଡିଜୋନ୍ (Dijon) ଏବଂ ଟେମ୍‌ସ୍ (Tems) ମଧ୍ୟ ଅତିଥି ଭାବେ ନଜର ଆସିଥିଲେ। ତାଙ୍କର ଏହି ଶୋ' ଦେଖିବା ପାଇଁ ଲକ୍ଷାଧିକ ଲୋକଙ୍କ ଭିଡ଼ ଜମିଥିଲା ଏବଂ କିଛି ରିପୋର୍ଟର ଟ୍ରାଫିକରେ ଘଣ୍ଟା ଘଣ୍ଟା ଫସି ରହିଥିବା ଖବର ମଧ୍ୟ ଆସିଛି।

ହଲିଉଡର ସବୁଠାରୁ ଲୋକପ୍ରିୟ ଯୋଡ଼ି ଟମ୍ ହଲାଣ୍ଡ ଏବଂ ଜେଣ୍ଡାୟାଙ୍କୁ ନେଇ ଏକ ବଡ଼ ଖବର ସାମ୍ନାକୁ ଆସିଛି। ରିପୋର୍ଟ ଅନୁଯାୟୀ, ଏହି ଚର୍ଚ୍ଚିତ ଦମ୍ପତି ଗୁପ୍ତରେ ବିବାହ କରିସାରିଛନ୍ତି। ଜେଣ୍ଡାୟାଙ୍କ ଦୀର୍ଘ ଦିନର ଷ୍ଟାଇଲିଷ୍ଟ ଲ' ରୋଚ୍ (Law Roach) ନିକଟରେ ଏହି ସୂଚନା ଦେଇଛନ୍ତି, ଯାହା ପ୍ରଶଂସକଙ୍କୁ ଆଶ୍ଚର୍ଯ୍ୟଚକିତ କରିଛି।

କ'ଣ କହିଲେ ଲ' ରୋଚ୍?

୨୦୨୬ ଆକ୍ଟର ଆୱାର୍ଡସ୍ (2026 Actor Awards) ର ରେଡ୍ କାର୍ପେଟରେ 'ଆକ୍ସେସ୍ ହଲିଉଡ'କୁ ଏକ ସାକ୍ଷାତକାର ଦେବା ସମୟରେ ଲ' ରୋଚ୍ ଏହି ତଥ୍ୟ ପ୍ରକାଶ କରିଛନ୍ତି। ଯେତେବେଳେ ତାଙ୍କୁ ଟମ୍ ଏବଂ ଜେଣ୍ଡାୟାଙ୍କ ବିବାହ ଯୋଜନା ବିଷୟରେ ପଚରାଗଲା, ସେ ହସି ହସି ଉତ୍ତର ଦେଲେ, "ବିବାହ ହୋଇସାରିଛି, ଆପଣମାନେ ଏହାକୁ ମିସ୍ କରିଦେଇଛନ୍ତି"। ଏହା କୌଣସି ମଜାକ କି ବୋଲି ପଚରାଯିବାରୁ ସେ ଦୃଢ଼ ଭାବରେ କହିଲେ ଯେ ଏହା ସମ୍ପୂର୍ଣ୍ଣ ସତ୍ୟ।

ସମ୍ପର୍କ ଏବଂ ନିର୍ବନ୍ଧ ଚର୍ଚ୍ଚା

ଉଲ୍ଲେଖଯୋଗ୍ୟ ଯେ, ଜାନୁଆରୀ ୨୦୨୫ରେ ଅନୁଷ୍ଠିତ ଗୋଲ୍ଡେନ୍ ଗ୍ଲୋବସ୍ (Golden Globes) ସମାରୋହରେ ଜେଣ୍ଡାୟାଙ୍କ ହାତରେ ଏକ ବଡ଼ ହୀରା ମୁଦି ଦେଖିବାକୁ ମିଳିଥିଲା, ଯାହା ପରେ ଉଭୟଙ୍କ ନିର୍ବନ୍ଧ ହୋଇଥିବା ନେଇ ଚର୍ଚ୍ଚା ଜୋର ଧରିଥିଲା। ୨୦୧୬ ମସିହାରେ 'ସ୍ପାଇଡର୍-ମ୍ୟାନ୍: ହୋମକମିଂ' ସେଟରେ ଉଭୟଙ୍କ ସାକ୍ଷାତ ହୋଇଥିଲା ଏବଂ ସେବେଠାରୁ ସେମାନଙ୍କ ସମ୍ପର୍କ ମଜବୁତ ରହିଛି।

ପ୍ରଶଂସକଙ୍କ ଉତ୍ସାହ

ଏହି ଖବର ସାମ୍ନାକୁ ଆସିବା ପରେ ସୋସିଆଲ ମିଡିଆରେ ଶୁଭେଚ୍ଛାର ସୁଅ ଛୁଟିଛି। ଯଦିଓ ଟମ୍ କିମ୍ବା ଜେଣ୍ଡାୟାଙ୍କ ପକ୍ଷରୁ ଏନେଇ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ, ତଥାପି ଲ' ରୋଚ୍‌ଙ୍କ ବୟାନକୁ ପ୍ରଶଂସକମାନେ ସତ ବୋଲି ଗ୍ରହଣ କରୁଛନ୍ତି। ଉଭୟ କଳାକାର ନିଜ ବ୍ୟକ୍ତିଗତ ଜୀବନକୁ ଗୋପନୀୟ ରଖିବାକୁ ପସନ୍ଦ କରନ୍ତି, ତେଣୁ ଏହି ଗୁପ୍ତ ବିବାହ ଖବର ସେମାନଙ୍କ ସ୍ୱଭାବ ସହ ମେଳ ଖାଉଛି।