ନୂଆଦିଲ୍ଲୀ: ମଧ୍ୟପ୍ରାଚ୍ୟ ଯୁଦ୍ଧରେ ଭାରତକୁ ଖୁବ୍ ଶୀଘ୍ର ବଡ଼ ଝଟକା ଲାଗିବାକୁ ଯାଉଛି। କାରଣ ଘରୋଇ ବଜାରରେ ମହଙ୍ଗା ହେବାକୁ ଯାଉଛି ପେଟ୍ରୋଲ ଏବଂ ଡିଜେଲ। ପେଟ୍ରୋଲ ଓ ଡିଜେଲ ମୂଲ୍ୟରେ ଏକାଥରକେ ବଡ଼ ଧରଣର ବୃଦ୍ଧି ଖାଉଟିଙ୍କ ସ୍ଥିତି ଦୋହଲାଇ ଦେବାକୁ ଯାଉଛି। ଏଥିରେ ପେଟ୍ରୋଲ ଲିଟର ପିଛା ୧୮ ଟଙ୍କା ଏବଂ ଡିଜେଲ ୩୫ ଟଙ୍କା ମହଙ୍ଗା ହୋଇପାରେ । ପଶ୍ଚିମବଙ୍ଗ ଓ ତାମିଲନାଡୁରେ ନିର୍ବାଚନ ଶେଷ ହେବା ପରେ ପେଟ୍ରୋଲ-ଡିଜେଲ ମୂଲ୍ୟରେ ଏଭଳି ବୃଦ୍ଧି ଘଟାଇବାକୁ ଯାଉଛନ୍ତି କେନ୍ଦ୍ର ସରକାର ।  

ଆମେରିକା ଏବଂ ଇରାନ୍ ମଧ୍ୟରେ ଚାଲିଥିବା ଯୁଦ୍ଧର ପ୍ରଭାବ ଏବେ ଭାରତୀୟ ତୈଳ ବିପଣନକାରୀ କମ୍ପାନୀଗୁଡ଼ିକ ଉପରେ ପଡିବାରେ ଲାଗିଛି।  ବିଶ୍ବ ବଜାରରେ ଅଶୋଧିତ ତୈଳ ମୂଲ୍ୟରେ ବୃଦ୍ଧି ଯୋଗୁ ତୈଳ କମ୍ପାନୀଗୁଡ଼ିକ ପ୍ରତି ଲିଟର ପେଟ୍ରୋଲରେ ପ୍ରାୟ ୧୮ ଏବଂ ଡିଜେଲରେ ୩୫ ଟଙ୍କା କ୍ଷତି ସହୁଛନ୍ତି। ଗତ ମାସରେ ତିନି କମ୍ପାନୀ ତେଲ ବିକ୍ରିରେ ପ୍ରାୟ ୨୪୦୦ କୋଟି ଟଙ୍କା କ୍ଷତି ସହିଛନ୍ତି। ସରକାରଙ୍କ ଦ୍ବାରା ଉତ୍ପାଦ ଶୁଳ୍କରେ  ୧୦ ଟଙ୍କା ଛାଡ଼ ପରେ ଏହି କ୍ଷତି ୧୬୦୦ କୋଟି ଟଙ୍କାକୁ ହ୍ରାସ ହୋଇଛି। ଅପରପକ୍ଷେ ଅଶୋଧିତ ତୈଳ ମୂଲ୍ୟରେ ବ୍ୟାରେଲ ପ୍ରତି ୧୦ ଡଲାର ବୃଦ୍ଧି ଘଟିେଲ ପେଟ୍ରୋଲ ଲିଟରରେ ପ୍ରାୟ ୬ ଟଙ୍କାର ଅତିରିକ୍ତ ଚାପ ପଡ଼ୁଛି । ତୈଳ କମ୍ପାନୀଗୁଡ଼ିକ ସମ୍ମୁଖୀନ ହେଉଥିବା ଆର୍ଥିକ କ୍ଷତି ଭରଣା କରିବା ପାଇଁ କେନ୍ଦ୍ର ସରକାର ବିଧାନସଭା ନିର୍ବାଚନ ପରେ ପେଟ୍ରୋଲ ଏବଂ ଡିଜେଲ ମୂଲ୍ୟ ବୃଦ୍ଧି କରିପାରନ୍ତି । ମ୍ୟାକ୍ୱାରି ଗ୍ରୁପର ଏକ ରିପୋର୍ଟ ଅନୁଯାୟୀ, ଏପ୍ରିଲ ପରେ ପେଟ୍ରୋଲ ବୃଦ୍ଧି ସୁନିଶ୍ଚିତ । ଏହାକୁ କେହି ଅଟକାଇପାରିବେ ନାହିଁ । 

ଇରାନରୁ ତେଲ କିଣିବାକୁ ନେଇ ଆମେରିକା ଏବଂ ଚୀନ୍ ମଧ୍ୟରେ ତିକ୍ତତା ବୃଦ୍ଧି ପାଇଛି। ଆମେରିକାର ଅର୍ଥ ମନ୍ତ୍ରୀ ସ୍କଟ୍ ବେସେଣ୍ଟ ଚେତାବନୀ ଦେଇଛନ୍ତି ଯେ ୱାଶିଂଟନ୍ କୌଣସି ପରିସ୍ଥିତିରେ ବି ଚୀନ୍‌କୁ ଇରାନରୁ ତେଲ କିଣିବାକୁ ଅନୁମତି ଦେବ ନାହିଁ। ବର୍ତ୍ତମାନର ମଧ୍ୟପ୍ରାଚ୍ୟ ଯୁଦ୍ଧ ସମୟରେ ବେଜିଂର କାର୍ଯ୍ୟକଳାପକୁ ସେ ବିଶ୍ୱାସଯୋଗ୍ୟ ନୁହେଁ ବୋଲି ସମାଲୋଚନା କରିଛନ୍ତି।

ଚୀନ୍ ଏକ ଅବିଶ୍ୱସନୀୟ ଅଂଶୀଦାର

ସାମ୍ବାଦିକମାନଙ୍କୁ ସୂଚନା ଦେଇ ସ୍କଟ୍ ବେସେଣ୍ଟ କହିଛନ୍ତି ଯେ, ଆମେରିକା-ଇସ୍ରାଏଲ୍ ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧ ସମୟରେ ଚୀନ୍ ବ୍ୟାପକ ମାତ୍ରାରେ ତେଲ ମହଜୁଦ କରୁଛି। ଫଳରେ ବିଶ୍ୱ ବଜାରରେ ତୈଳ ଦର ପ୍ରାୟ ୫୦ ପ୍ରତିଶତ ବୃଦ୍ଧି ପାଇବା ସହ ଯୋଗାଣ ଶୃଙ୍ଖଳା ବ୍ୟାହତ ହୋଇଛି। ସେ ଚୀନ୍‌କୁ ଏକ ଅବିଶ୍ୱସନୀୟ ବିଶ୍ୱସ୍ତରୀୟ ଅଂଶୀଦାର ଭାବେ ବର୍ଣ୍ଣନା କରିଛନ୍ତି। ଅତୀତର ଉଦାହରଣ ଦେଇ ସେ କହିଛନ୍ତି ଯେ, କୋଭିଡ-୧୯ ମହାମାରୀ ସମୟରେ ସ୍ୱାସ୍ଥ୍ୟ ସାମଗ୍ରୀ ମହଜୁଦ କରିବା ଏବଂ ବିରଳ ମୃତ୍ତିକା (rare earth) ରପ୍ତାନି ଉପରେ କଟକଣା ଲଗାଇବା ଭଳି କାର୍ଯ୍ୟ କରି ଚୀନ୍ ନିଜର ଅବିଶ୍ୱସନୀୟତାର ପ୍ରମାଣ ଦେଇସାରିଛି।

ଇରାନ ତେଲ ଉପରେ କଡ଼ା କଟକଣା

ବିଶ୍ୱର ପ୍ରାୟ ୨୦ ପ୍ରତିଶତ ତେଲ ଯୋଗାଣ ହେଉଥିବା ହର୍ମୁଜ ପ୍ରଣାଳୀ ଦେଇ ଚୀନ୍ ଜାହାଜଗୁଡ଼ିକୁ ଯିବାକୁ ଦିଆଯିବ ନାହିଁ ବୋଲି ଆମେରିକା ଚେତାବନୀ ଦେଇଛି। ବେସେଣ୍ଟ ସ୍ପଷ୍ଟ କରିଛନ୍ତି ଯେ, ଚୀନ୍ ଅନ୍ୟ ଦେଶରୁ ତେଲ କିଣିପାରିବ, କିନ୍ତୁ ଇରାନରୁ ନୁହେଁ। ଉଲ୍ଲେଖଯୋଗ୍ୟ ଯେ, ଚୀନ୍ ଏହାର ବାର୍ଷିକ ଆବଶ୍ୟକତାର ୮ ପ୍ରତିଶତ ତେଲ ଇରାନରୁ କିଣିଥାଏ, ଯାହାକି ଇରାନର ମୋଟ ତେଲ ରପ୍ତାନିର ୯୦ ପ୍ରତିଶତରୁ ଅଧିକ ଅଟେ।

ପ୍ରଭାବିତ ହେବ ନାହିଁ ଟ୍ରମ୍ପଙ୍କ ଗସ୍ତ

ଏହି ବିବାଦ ସତ୍ତ୍ୱେ ଆଗାମୀ ମେ' ମାସ ମଧ୍ୟଭାଗରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବେଜିଂ ଗସ୍ତ ଉପରେ କୌଣସି ପ୍ରଭାବ ପଡ଼ିବ ନାହିଁ ବୋଲି ବେସେଣ୍ଟ ସୂଚାଇଛନ୍ତି। ସେ କହିଛନ୍ତି ଯେ ଡୋନାଲ୍ଡ ଟ୍ରମ୍ପ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ଉତ୍ତମ କାର୍ଯ୍ୟଗତ ସମ୍ପର୍କ ରହିଛି ଏବଂ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରାଯିବ। ତେବେ ଇରାନର ତେଲ କିଣିବାକୁ ନେଇ ଆମେରିକାର ଏହି ଧମକ ବିଶ୍ୱ ଅର୍ଥନୀତି ଉପରେ କି ପ୍ରଭାବ ପକାଇବ, ତାହା ଦେଖିବାକୁ ବାକି ରହିଲା।

ମଧ୍ୟପ୍ରାଚ୍ୟରେ ଲାଗି ରହିଥିବା ଯୁଦ୍ଧ ପରିସ୍ଥିତି ଏବେ ଶାନ୍ତ ପଡ଼ିବାର ସମ୍ଭାବନା ସୃଷ୍ଟି ହୋଇଛି। ଆଜି ପାକିସ୍ତାନର ରାଜଧାନୀ ଇସଲାମାବାଦଠାରେ ଏକ ବହୁପ୍ରତୀକ୍ଷିତ ଶାନ୍ତି ବୈଠକ ଅନୁଷ୍ଠିତ ହେବାକୁ ଯାଉଛି। ଏହି ବୈଠକରେ ଯୋଗଦେବା ପାଇଁ ଇରାନ ଏବଂ ଆମେରିକାର ଶୀର୍ଷ ନେତାମାନେ ପାକିସ୍ତାନ ଅଭିମୁଖେ ଯାତ୍ରା କରିଛନ୍ତି।

ଶେହବାଜ ସରିଫଙ୍କ ମଧ୍ୟସ୍ଥତାରେ ଆଲୋଚନା

ଏହି ଗୁରୁତ୍ୱପୂର୍ଣ୍ଣ ଶାନ୍ତି ବୈଠକ ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ମଧ୍ୟସ୍ଥତାରେ ଅନୁଷ୍ଠିତ ହେବ। ବିଗତ କିଛି ଦିନ ଧରି ମଧ୍ୟପ୍ରାଚ୍ୟରେ ଦେଖାଦେଇଥିବା ଉତ୍ତେଜନାକୁ କମ୍ କରିବା ପାଇଁ ଏହି ଆଲୋଚନାକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମନେ କରାଯାଉଛି। ଏଥିରେ ଇରାନର ପ୍ରତିନିଧି ଏବଂ ଆମେରିକାର ଉଚ୍ଚାଧିକାରୀମାନେ ସାମିଲ ହୋଇ ଶାନ୍ତି ପ୍ରତିଷ୍ଠା ନେଇ ବିସ୍ତୃତ ଆଲୋଚନା କରିବେ।

ବିଶ୍ୱର ନଜର ଇସଲାମାବାଦ ଉପରେ

ଦୀର୍ଘ ଦିନ ଧରି ଲାଗି ରହିଥିବା ବିବାଦର ସମାଧାନ କିପରି ହେବ, ସେନେଇ ଏବେ ସମଗ୍ର ବିଶ୍ୱର ନଜର ଏହି ବୈଠକ ଉପରେ ରହିଛି। ପରସ୍ପର ବିରୋଧୀ ରାଷ୍ଟ୍ର ଭାବରେ ପରିଚିତ ଆମେରିକା ଏବଂ ଇରାନ ମଧ୍ୟରେ ସିଧାସଳଖ ଶାନ୍ତି ପ୍ରସ୍ତାବ ଉପରେ ଆଲୋଚନା ଏକ ବଡ଼ କୂଟନୈତିକ ସଫଳତା ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି। ଯଦି ଏହି ଆଲୋଚନା ସଫଳ ହୁଏ, ତେବେ ମଧ୍ୟପ୍ରାଚ୍ୟ ସମେତ ବିଶ୍ୱ ଅର୍ଥନୀତି ଓ ଶାନ୍ତି ପ୍ରତିଷ୍ଠା ଦିଗରେ ଏହା ଏକ ବଡ଼ ପଦକ୍ଷେପ ହେବ।

ବଲିଉଡର ବାଦଶାହ ଶାହରୁଖ ଖାନଙ୍କ ଆଗାମୀ ବହୁ ପ୍ରତୀକ୍ଷିତ ଫିଲ୍ମ 'କିଙ୍ଗ'କୁ ନେଇ ଏକ ବଡ଼ ଖବର ସାମ୍ନାକୁ ଆସିଛି। ମଧ୍ୟପ୍ରାଚ୍ୟରେ ଲାଗିରହିଥିବା ଯୁଦ୍ଧ ଏବଂ ଉତ୍ତେଜନାପୂର୍ଣ୍ଣ ସ୍ଥିତି କାରଣରୁ ଫିଲ୍ମର ଦୁବାଇ ସିଡ୍ୟୁଲକୁ ବାତିଲ କରିଦିଆଯାଇଛି। କଳାକାର ଓ କ୍ରୁ ମେମ୍ବରଙ୍କ ସୁରକ୍ଷାକୁ ଦୃଷ୍ଟିରେ ରଖି ନିର୍ମାତାମାନେ ଏହି ନିଷ୍ପତ୍ତି ନେଇଛନ୍ତି। ଏବେ ଦୁବାଇ ବଦଳରେ ମୁମ୍ବାଇର ଏକ ଷ୍ଟୁଡିଓରେ ମରୁଭୂମିର ଦୃଶ୍ୟ ସୁଟିଂ କରାଯିବ।

ଏପ୍ରିଲ ୯ରୁ ଦୁବାଇରେ ଆରମ୍ଭ ହେବାର ଥିଲା ସୁଟିଂ

ପୂର୍ବ ନିର୍ଦ୍ଧାରିତ ଯୋଜନା ଅନୁଯାୟୀ, ଆସନ୍ତା ଏପ୍ରିଲ ୯ ତାରିଖରୁ ଦୁବାଇରେ ଫିଲ୍ମ 'କିଙ୍ଗ'ର ଏକ ଗୁରୁତ୍ୱପୂର୍ଣ୍ଣ ଆକ୍ସନ ସିକ୍ୱେନ୍ସ ସୁଟିଂ ହେବାର ଥିଲା। ଏହି ସିଡ୍ୟୁଲ୍ ପ୍ରାୟ ଏକ ସପ୍ତାହ ଧରି ଚାଲିବାର ଥିଲା, ଯେଉଁଥିରେ ଶାହରୁଖ ଖାନ, ସୁହାନା ଖାନ ଏବଂ ଅନିଲ କପୁର ଅଂଶଗ୍ରହଣ କରିଥାନ୍ତେ। ନିର୍ମାତାମାନେ ଏଥିପାଇଁ ସମସ୍ତ ଆବଶ୍ୟକୀୟ ଅନୁମତି ମଧ୍ୟ ହାସଲ କରିସାରିଥିଲେ। କିନ୍ତୁ ପଶ୍ଚିମ ଏସିଆରେ ଲାଗିରହିଥିବା ଯୁଦ୍ଧ ପରିସ୍ଥିତିକୁ ଦେଖି ମେକର୍ସ କୌଣସି ପ୍ରକାର ରିସ୍କ ନେବାକୁ ଚାହିଁନଥିଲେ ଏବଂ ଏହି ଅନ୍ତର୍ଜାତୀୟ ସିଡ୍ୟୁଲକୁ ବାତିଲ କରିଦେଇଥିଲେ।

ମୁମ୍ବାଇର ଭିଲେ ପାର୍ଲେରେ ତିଆରି ହେଲା ଆର୍ଟିଫିସିଆଲ୍ ମରୁଭୂମି

ଦୁବାଇ ଶୁଟିଂ ବାତିଲ ହେବା ପରେ, ଏବେ ମୁମ୍ବାଇର ଭିଲେ ପାର୍ଲେ ସ୍ଥିତ ଏକ ଷ୍ଟୁଡିଓରେ ଆର୍ଟିଫିସିଆଲ୍ ମରୁଭୂମିର ଏକ ବିଶାଳ ସେଟ୍ ପ୍ରସ୍ତୁତ କରାଯାଉଛି। ରିପୋର୍ଟ ଅନୁଯାୟୀ, ନିର୍ଦ୍ଦେଶକ ସିଦ୍ଧାର୍ଥ ଆନନ୍ଦଙ୍କ ଭିଜନକୁ ବାସ୍ତବ ରୂପ ଦେବା ପାଇଁ ଖର୍ଚ୍ଚରେ କୌଣସି କାଣ୍ଟଛାଣ୍ଟ କରାଯାଇନାହିଁ। ଷ୍ଟୁଡିଓ ଭିତରେ ଶୁଟିଂ ହେବା ଦ୍ୱାରା ଲାଇଟିଂ ଏବଂ ଆକ୍ସନ ଦୃଶ୍ୟ ଉପରେ ନିର୍ଦ୍ଦେଶକଙ୍କର ଅଧିକ ନିୟନ୍ତ୍ରଣ ରହିବ ବୋଲି ଆଶା କରାଯାଉଛି। ତେବେ ଷ୍ଟୁଡିଓରେ ତିଆରି ହୋଇଥିବା ଏହି ମରୁଭୂମି ସେଟ୍ ଦର୍ଶକଙ୍କୁ କେତେ ରିଅଲ୍ ଫିଲ୍ ଦେବ, ତାହା ଦେଖିବା ବାକି ରହିଲା।

ପୂର୍ବରୁ ମଧ୍ୟ ଅଟକିଥିଲା 'କିଙ୍ଗ'ର ସୁଟିଂ

ଏହା ପ୍ରଥମ ଥର ନୁହେଁ ଯେବେ ଫିଲ୍ମ 'କିଙ୍ଗ'ର ସୁଟିଂ ପ୍ରଭାବିତ ହୋଇଛି। ଗତବର୍ଷ ଜୁଲାଇ-ଅଗଷ୍ଟ (୨୦୨୫) ମାସରେ ଏକ ଆକ୍ସନ ଦୃଶ୍ୟର ସୁଟିଂ ବେଳେ ଶାହରୁଖ ଖାନ ଆହତ ହୋଇଥିଲେ। ଚିକିତ୍ସା ପାଇଁ ତାଙ୍କୁ ଆମେରିକା ଯିବାକୁ ପଡ଼ିଥିଲା ଏବଂ ଡାକ୍ତର ତାଙ୍କୁ ଗୋଟିଏ ମାସ ବିଶ୍ରାମ ନେବାକୁ ପରାମର୍ଶ ଦେଇଥିଲେ। ପରେ ନଭେମ୍ବର ମାସରେ ସେ ପୁଣିଥରେ ସେଟକୁ ଫେରିଥିଲେ। ଏହି ଫିଲ୍ମଟି ଆସନ୍ତା ଡିସେମ୍ବର ୨୪, ୨୦୨୬ ରେ ବଡ଼ ପରଦାରେ ରିଲିଜ୍ ହେବାର କାର୍ଯ୍ୟକ୍ରମ ରହିଛି।

ପଶ୍ଚିମ ଏସିଆରେ ଜାରି ରହିଥିବା ଯୁଦ୍ଧ ମଧ୍ୟରେ ଏକ ବଡ଼ ଖବର ସାମ୍ନାକୁ ଆସିଛି। ଇସ୍ରାଏଲର ଗଣମାଧ୍ୟମ ଦାବି କରିଛି ଯେ ଏକ ସଠିକ୍ ଏୟାର ଷ୍ଟ୍ରାଇକ୍‌ରେ ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ (IRGC) ନୌସେନା କମାଣ୍ଡର ଅଲିରେଜା ତାଙ୍ଗସିରି (Alireza Tangsiri) ନିହତ ହୋଇଛନ୍ତି। ଇରାନର ଦକ୍ଷିଣ ବନ୍ଦର ସହର ବନ୍ଦର ଆବ୍ବାସ (Bandar Abbas) ଠାରେ ଏହି ଆକ୍ରମଣ କରାଯାଇଥିବା ସୂଚନା ମିଳିଛି।

ବିଶ୍ୱର ଅନ୍ୟତମ ପ୍ରମୁଖ ତୈଳ ବାଣିଜ୍ୟ ମାର୍ଗ ହର୍ମୁଜ ପ୍ରଣାଳୀ (Strait of Hormuz) ନିକଟରେ ଥିବା ଏହି ବନ୍ଦର ସହର ଇରାନ ପାଇଁ ସାମରିକ ଏବଂ ଅର୍ଥନୈତିକ ଦୃଷ୍ଟିକୋଣରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଅଲିରେଜା ତାଙ୍ଗସିରି ଏହି ହର୍ମୁଜ ପ୍ରଣାଳୀକୁ ବନ୍ଦ କରିବାର ରଣନୀତି ଏବଂ ଆମେରିକୀୟ ଜାହାଜ ଗୁଡ଼ିକୁ ଟାର୍ଗେଟ କରିବା ଦିଗରେ ପ୍ରମୁଖ ଭୂମିକା ଗ୍ରହଣ କରିଥିଲେ। ତେଣୁ ତାଙ୍କର ମୃତ୍ୟୁ ଇରାନ ସେନା ପାଇଁ ଏକ ବଡ଼ ଝଟକା ବୋଲି ବିବେଚନା କରାଯାଉଛି।

ଇରାନ ପକ୍ଷରୁ ମିଳିନାହିଁ କୌଣସି ସ୍ପଷ୍ଟୀକରଣ

ଇସ୍ରାଏଲର 'ଚ୍ୟାନେଲ ୧୨' ଏବଂ କିଛି ବରିଷ୍ଠ ଅଧିକାରୀଙ୍କ ସୂତ୍ରରୁ ଏହି ଖବର ପ୍ରକାଶ ପାଇଥିଲେ ମଧ୍ୟ ଏପର୍ଯ୍ୟନ୍ତ ଇରାନ ସରକାର କିମ୍ବା ଆନୁଷ୍ଠାନିକ ଭାବରେ ଇସ୍ରାଏଲ ସେନା (IDF) ପକ୍ଷରୁ କୌଣସି ସ୍ପଷ୍ଟୀକରଣ ଦିଆଯାଇନାହିଁ। ଯଦି ଏହି ଖବର ସତ୍ୟ ପ୍ରମାଣିତ ହୁଏ, ତେବେ ଗତ ଫେବୃଆରୀ ମାସରୁ ଆରମ୍ଭ ହୋଇଥିବା ଆମେରିକା-ଇସ୍ରାଏଲ ଏବଂ ଇରାନ ଯୁଦ୍ଧରେ ଏହା ଆଉ ଏକ ବଡ଼ ଧରଣର ସାମରିକ କ୍ଷତି ହେବ।

କିଏ ଥିଲେ ଅଲିରେଜା ତାଙ୍ଗସିରି?

ଅଗଷ୍ଟ ୨୦୧୮ ମସିହାରେ ଇରାନର ସର୍ବୋଚ୍ଚ ନେତା ଅଲି ଖାମେନେଇଙ୍କ ଦ୍ୱାରା ଅଲିରେଜା ତାଙ୍ଗସିରିଙ୍କୁ IRGC ନୌସେନା ମୁଖ୍ୟ ଭାବରେ ନିଯୁକ୍ତ କରାଯାଇଥିଲା। ସେ ଆରମ୍ଭରୁ ହିଁ ଆମେରିକା ଏବଂ ଇସ୍ରାଏଲ ପ୍ରତି କଠୋର ଆଭିମୁଖ୍ୟ ପୋଷଣ କରିଆସୁଥିଲେ। ଗଲ୍ଫ ଅଞ୍ଚଳରେ ଇରାନର ନୌସେନାକୁ ଶକ୍ତିଶାଳୀ କରିବା ସହିତ ଛୋଟ ଏବଂ ଦ୍ରୁତଗତି ସମ୍ପନ୍ନ ବୋଟ୍ ମାଧ୍ୟମରେ ଶତ୍ରୁ ପକ୍ଷକୁ ଆକ୍ରମଣ କରିବାରେ ସେ ମାହିର ଥିଲେ।

ମଧ୍ୟପ୍ରାଚ୍ୟରେ ବଢୁଛି ଉତ୍ତେଜନା

ବର୍ତ୍ତମାନ ପଶ୍ଚିମ ଏସିଆରେ ପରିସ୍ଥିତି ଅତ୍ୟନ୍ତ ଉତ୍ତେଜନାପୂର୍ଣ୍ଣ ରହିଛି। ଇସ୍ରାଏଲ ଏବଂ ଆମେରିକାକୁ କଡ଼ା ଜବାବ ଦେବା ପାଇଁ ଇରାନର IRGC ପକ୍ଷରୁ ଲଗାତାର କ୍ଷେପଣାସ୍ତ୍ର ଏବଂ ଡ୍ରୋନ ମାଧ୍ୟମରେ ୮୨ତମ ପର୍ଯ୍ୟାୟ (Wave 82) ଆକ୍ରମଣ ଜାରି ରହିଛି ବୋଲି ଦାବି କରାଯାଇଛି। ଅନ୍ୟପକ୍ଷରେ, ଇରାନ ମାଟିରେ କୌଣସି ପ୍ରକାର ସ୍ଥଳପଥ ଆକ୍ରମଣ ନକରିବାକୁ IRGC ପକ୍ଷରୁ ଆମେରିକା ଏବଂ ଇସ୍ରାଏଲ ସେନାକୁ କଡ଼ା ଚେତାବନୀ ଦିଆଯାଇଛି।

ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶାନ୍ତି ପ୍ରସ୍ତାବର ଜବାବରେ ଇରାନ ପୁନର୍ବାର ଆଲୋଚନା ପାଇଁ କଡ଼ା ସର୍ତ୍ତ ରଖିଛି। ଉପସାଗରୀୟ ଅଞ୍ଚଳରେ ଥିବା ଆମେରିକାର ସମସ୍ତ ସାମରିକ ଘାଟି ବନ୍ଦ କରିବା ଏବଂ କଟକଣା ହଟାଇବା ପାଇଁ ତେହେରାନ ଦାବି କରିଛି।

ଯୁଦ୍ଧବିରାମ ଆଲୋଚନା ପାଇଁ ଇରାନ କଡ଼ା ଆଭିମୁଖ୍ୟ ଗ୍ରହଣ କରିଛି। ଉପସାଗରରେ ଆମେରିକାର ସାମରିକ ଘାଟି ବନ୍ଦ ଏବଂ ସମସ୍ତ କଟକଣା ସମ୍ପୂର୍ଣ୍ଣ ପ୍ରତ୍ୟାହାର କରିବାକୁ ଦାବି କରିଛି। ଏହା ସହ ଯୁଦ୍ଧ କ୍ଷତିପୂରଣ ମଧ୍ୟ ମାଗିଛି। ଏହା ବ୍ୟତୀତ ହୋର୍ମୁଜ ପ୍ରଣାଳୀ ଦେଇ ଯାଉଥିବା ଜାହାଜଗୁଡ଼ିକରୁ ଶୁଳ୍କ ଆଦାୟ ପାଇଁ ଏକ ନୂଆ ବ୍ୟବସ୍ଥା ଲାଗୁ କରିବାକୁ ପ୍ରସ୍ତାବ ଦେଇଛି, ଯାହାଦ୍ୱାରା ଏହି ଗୁରୁତ୍ୱପୂର୍ଣ୍ଣ ଜଳପଥ ଉପରେ ଏହାର ନିୟନ୍ତ୍ରଣ ରହିବ। ଭବିଷ୍ୟତରେ ଯେପରି କୌଣସି ଆକ୍ରମଣ ନହୁଏ, ସେଥିପାଇଁ ଦୃଢ଼ ନିଶ୍ଚିତତା ଦାବି କରିଛି।

କଡ଼ା ସର୍ତ୍ତ ସତ୍ତ୍ୱେ ଇରାନ ପରଦା ପଛରେ କିଛି ନମନୀୟତା ଦେଖାଉଥିବା ସୂଚନା ମିଳିଛି। ରିପୋର୍ଟ ଅନୁଯାୟୀ, ଇରାନ ଆସନ୍ତା ୫ ବର୍ଷ ପାଇଁ ନିଜର ବାଲାଷ୍ଟିକ କ୍ଷେପଣାସ୍ତ୍ର କାର୍ଯ୍ୟକ୍ରମ ସ୍ଥଗିତ ରଖିବା ସହ ୟୁରାନିୟମ ସମୃଦ୍ଧକରଣ ହ୍ରାସ କରିବାକୁ ବିଚାର କରିପାରେ। ଏହାଛଡ଼ା ୬୦% ସମୃଦ୍ଧ ୟୁରାନିୟମ ଭଣ୍ଡାର ଉପରେ ଆଲୋଚନା କରିବାକୁ ଏବଂ ଆନ୍ତର୍ଜାତିକ ପରମାଣୁ ଶକ୍ତି ସଂସ୍ଥା (IAEA) କୁ ଏହାର ସେଣ୍ଟ୍ରିଫ୍ୟୁଜ ଯାଞ୍ଚ ପାଇଁ ଅନୁମତି ଦେବାକୁ ପ୍ରସ୍ତୁତ ଅଛି। ହିଜବୁଲ୍ଲା, ହମାସ ଏବଂ ଇରାକୀ ମିଲିସିଆ ଭଳି ସଂଗଠନକୁ ସମର୍ଥନ ବନ୍ଦ କରିବା ଉପରେ ମଧ୍ୟ ବିଚାର କରିପାରେ।

ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ୧୫-ସୂତ୍ରୀ ଶାନ୍ତି ପ୍ରସ୍ତାବକୁ ନେଇ ଇରାନ ସନ୍ଦେହ ପ୍ରକଟ କରିଛି। ଅତୀତରେ ଆମେରିକା ଏବଂ ଇସ୍ରାଏଲର କାର୍ଯ୍ୟକଳାପ ଯୋଗୁଁ ତେହେରାନ ଆଉ ବୋକା ବନିବାକୁ ଚାହୁଁନାହିଁ ବୋଲି ସ୍ପଷ୍ଟ କରିଛି। ପୂର୍ବରୁ କୂଟନୈତିକ ଆଲୋଚନା ପୂର୍ବରୁ ଆକ୍ରମଣ ହୋଇଥିବାରୁ ଇରାନର ଆମେରିକା ପ୍ରତି ଅବିଶ୍ୱାସ ବଢ଼ିଛି।

ଗତ ଫେବୃଆରୀ ୨୮ ତାରିଖରେ ଯୁକ୍ତରାଷ୍ଟ୍ର ଆମେରିକା ଓ ଇସ୍ରାଏଲର ଏକ ମିଳିତ ଆକ୍ରମଣରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇ ଏବଂ କିଛି ବରିଷ୍ଠ ଅଧିକାରୀଙ୍କ ମୃତ୍ୟୁ ପରେ ଏହି ଯୁଦ୍ଧ ଆରମ୍ଭ ହୋଇଥିଲା। ଏହାର ଜବାବରେ ଇରାନ ପଶ୍ଚିମ ଏସିଆରେ ଥିବା ଆମେରିକାର ସାମରିକ ଘାଟି ଉପରେ ବ୍ୟାପକ କ୍ଷେପଣାସ୍ତ୍ର ଓ ଡ୍ରୋନ ଆକ୍ରମଣ କରିଥିଲା। ଏହି ଯୁଦ୍ଧରେ ଇରାନ ମଧ୍ୟରେ ଏପର୍ଯ୍ୟନ୍ତ ୨,୩୦୦ ରୁ ଅଧିକ ଲୋକ ପ୍ରାଣ ହରାଇଛନ୍ତି, ଯେଉଁଥିରେ ୧,୩୦୦ ରୁ ଅଧିକ ସାଧାରଣ ନାଗରିକ ଏବଂ ୧୨ ବର୍ଷରୁ କମ୍ ବୟସର ପ୍ରାୟ ୨୦୦ ଶିଶୁ ସାମିଲ ଅଛନ୍ତି।

ମଧ୍ୟପ୍ରାଚ୍ୟରେ ଲାଗିରହିଥିବା ଯୁଦ୍ଧ ଏବଂ ଆମେରିକା କଟକଣାରେ କୋହଳ ପରେ ଭାରତୀୟ ତୈଳ ବିଶୋଧନାଗାର କମ୍ପାନୀଗୁଡ଼ିକ ପାଇଁ ଏକ ବଡ଼ ଆଶ୍ୱସ୍ତି ମିଳିଛି। ଦେଶର ଅଗ୍ରଣୀ କମ୍ପାନୀ ରିଲାଏନ୍ସ ଇଣ୍ଡଷ୍ଟ୍ରିଜ୍ (Reliance Industries) ଇରାନଠାରୁ ବଡ଼ ଧରଣର ଅଶୋଧିତ ତୈଳ କ୍ରୟ କରିଛି। ସୂଚନା ଅନୁଯାୟୀ, କମ୍ପାନୀ ପକ୍ଷରୁ ଇରାନରୁ ୫୦ ନିୟୁତ ବ୍ୟାରେଲ୍ ଅଶୋଧିତ ତୈଳ କିଣାଯାଇଛି।

ଆମେରିକା କଟକଣା କୋହଳର ପ୍ରଭାବ

ଦୀର୍ଘ ବର୍ଷ ଧରି କଡ଼ା ଆମେରିକୀୟ କଟକଣା କାରଣରୁ ଭାରତୀୟ କମ୍ପାନୀଗୁଡ଼ିକ ଇରାନରୁ ତୈଳ ଆମଦାନୀ ବନ୍ଦ କରିଦେଇଥିଲେ। ତେବେ ବର୍ତ୍ତମାନର ଭୌଗୋଳିକ ରାଜନୈତିକ ପରିସ୍ଥିତି ଏବଂ ମଧ୍ୟପ୍ରାଚ୍ୟରେ ଚାଲିଥିବା ସଂଘର୍ଷ କାରଣରୁ ଆମେରିକା ନିଜର ନିୟମକୁ କିଛି ମାତ୍ରାରେ କୋହଳ କରିଛି। ଏହାର ଫାଇଦା ଉଠାଇ ରିଲାଏନ୍ସ ଇଣ୍ଡଷ୍ଟ୍ରିଜ୍ ପୁଣିଥରେ ଇରାନରୁ ବିପୁଳ ପରିମାଣର ଅଶୋଧିତ ତୈଳ ଆମଦାନୀ ଆରମ୍ଭ କରିଛି।

ଭାରତୀୟ ଅର୍ଥନୀତି ଓ ବଜାର ଉପରେ ପ୍ରଭାବ

ବିଶ୍ୱ ବଜାରରେ ତୈଳ ଦର ଅସ୍ଥିର ରହିଥିବା ବେଳେ ଇରାନରୁ ରିହାତି ମୂଲ୍ୟରେ ମିଳୁଥିବା ଅଶୋଧିତ ତୈଳ ଭାରତ ପାଇଁ ଅତ୍ୟନ୍ତ ଲାଭଦାୟକ ସାବ୍ୟସ୍ତ ହେବ। ଏହି ୫୦ ନିୟୁତ ବ୍ୟାରେଲ୍ ତୈଳ ଆମଦାନୀ ଦ୍ୱାରା ଦେଶର ଶକ୍ତି ଆବଶ୍ୟକତା ପୂରଣ ହେବା ସହ ଆମଦାନୀ ଖର୍ଚ୍ଚ ହ୍ରାସ ପାଇବ। ବିଶେଷଜ୍ଞଙ୍କ ମତରେ, ଏହି ପଦକ୍ଷେପ ଘରୋଇ ବଜାରରେ ଇନ୍ଧନ ଦରକୁ ସ୍ଥିର ରଖିବାରେ ସହାୟକ ହେବ ଏବଂ ଭାରତର ଆର୍ଥିକ ଅଭିବୃଦ୍ଧିକୁ ସୁଦୃଢ଼ କରିବ।

୨୦୨୬ ମସିହାରେ ଚାଲିଥିବା ଇରାନ-ଆମେରିକା-ଇସ୍ରାଏଲ ଯୁଦ୍ଧ କାରଣରୁ ମଧ୍ୟପ୍ରାଚ୍ୟର ତୈଳ ଏବଂ ଗ୍ୟାସ ପ୍ଲାଣ୍ଟଗୁଡ଼ିକ ଉପରେ ଭୟଙ୍କର ଆକ୍ରମଣ ହେଉଛି। ଇରାନର ପାଲଟା ଆକ୍ରମଣରେ ସାଉଦି ଆରବ, କାତାର ଏବଂ ୟୁଏଇର ତୈଳ ପ୍ରକଳ୍ପ ଉପରେ ଡ୍ରୋନ୍ ଓ କ୍ଷେପଣାସ୍ତ୍ର ମାଡ଼ କରାଯାଇଛି। ଏହାଦ୍ୱାରା ବ୍ୟାପକ ଅଗ୍ନିକାଣ୍ଡ ଘଟିବା ସହ ତୈଳ ନିର୍ଗତ ହେବାରେ ଲାଗିଛି। ବିଶ୍ୱର ପ୍ରାୟ ୨୦ ପ୍ରତିଶତ ତୈଳ ଏହି ଅଞ୍ଚଳ ଦେଇ ଯାଉଥିବାରୁ ଏହି ନିଆଁକୁ ଶୀଘ୍ର ଆୟତ୍ତ କରିବା ଅତ୍ୟନ୍ତ ଜରୁରୀ ହୋଇପଡ଼ିଛି।

ସର୍ବାଧିକ କ୍ଷତିଗ୍ରସ୍ତ ହୋଇଥିବା ୭ଟି ପ୍ଲାଣ୍ଟ

ବର୍ତ୍ତମାନର ଏହି ଯୁଦ୍ଧରେ ମୁଖ୍ୟତଃ ୭ଟି ବୃହତ୍ ପ୍ଲାଣ୍ଟ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି। ସେଗୁଡ଼ିକ ହେଲା- ସାଉଦି ଆରବର ରାସ ତନୁରା ରିଫାଇନାରୀ, କାତାରର ରାସ ଲାଫାନ୍ ଏଲଏନଜି ପ୍ଲାଣ୍ଟ, ୟୁଏଇର ମୁସାଫା ଫୁଏଲ୍ ଟର୍ମିନାଲ୍, ଇରାନର ସାଉଥ୍ ପାର୍ସ ଗ୍ୟାସ୍ ଫିଲ୍ଡ, ଖାର୍ଗ୍ ଆଇଲ୍ୟାଣ୍ଡ ଅଏଲ୍ ଏକ୍ସପୋର୍ଟ ଟର୍ମିନାଲ୍, ତେହେରାନର ଦୁଇଟି ବଡ଼ ରିଫାଇନାରୀ ଓ ଡିପୋ ଏବଂ ଆବାଦାନ୍ ରିଫାଇନାରୀ ଅଞ୍ଚଳ। ଏଠାରେ ନିଆଁ ଏବଂ ଧୂଆଁର କଳା ବାଦଲ ଛାଇ ରହିବା ସହ ତୈଳ ନିର୍ଗତ ହେବା ଫଳରେ ପରିବେଶର ବ୍ୟାପକ କ୍ଷତି ଘଟୁଛି।

ତୈଳ କୂପର ନିଆଁ ଏତେ ଭୟଙ୍କର କାହିଁକି?

ବୈଜ୍ଞାନିକ ଏବଂ ଅଗ୍ନିଶମ ବିଶେଷଜ୍ଞମାନଙ୍କ ମତରେ ତୈଳ କୂପ କିମ୍ବା ପ୍ଲାଣ୍ଟରେ ଲାଗିଥିବା ନିଆଁ ଅତ୍ୟନ୍ତ ବିପଜ୍ଜନକ ଅଟେ, କାରଣ ସେଥିରୁ କ୍ରମାଗତ ଭାବେ ଗ୍ୟାସ୍, ତୈଳ ଏବଂ ପବନର ମିଶ୍ରଣ ବାହାରିଥାଏ। ଏହି ନିଆଁର ତାପମାତ୍ରା ୧୦୦୦ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ପହଞ୍ଚିଯାଏ। ଏତେ ଅଧିକ ଉତ୍ତାପ ଯୋଗୁଁ ଆଖପାଖ ଜମି ମଧ୍ୟ ଗରମ ହୋଇଯାଏ, ଯାହା ଫଳରେ ପୁନର୍ବାର ନିଆଁ ଲାଗିବାର ଆଶଙ୍କା ରହିଥାଏ। ଉଦାହରଣ ସ୍ୱରୂପ, ୧୯୯୧ କୁଏତ୍ ଯୁଦ୍ଧ ସମୟରେ ସଦ୍ଦାମ ହୁସେନ୍ ୬୦୦ରୁ ଅଧିକ ତୈଳ କୂପରେ ନିଆଁ ଲଗାଇ ଦେଇଥିଲେ, ଯାହାକୁ ଲିଭାଇବା ପାଇଁ ୯ ମାସ ସମୟ ଲାଗିଥିଲା। ଏହି ନିଆଁ ଲିଭାଇବା ପାଇଁ ଦିନ କିମ୍ବା ସପ୍ତାହ ସପ୍ତାହ ସମୟ ଲାଗିପାରେ।

ନିଆଁ ଲିଭାଇବାର ୬ଟି ମୁଖ୍ୟ ଉପାୟ

ମଧ୍ୟପ୍ରାଚ୍ୟରେ ତୈଳ କୂପ ଏବଂ ପ୍ଲାଣ୍ଟଗୁଡ଼ିକରେ ଲାଗିଥିବା ନିଆଁକୁ ଲିଭାଇବା ପାଇଁ ମୁଖ୍ୟତଃ ୬ଟି ବୈଜ୍ଞାନିକ ପଦ୍ଧତି ଅବଲମ୍ବନ କରାଯାଏ:

୧. ୱାଟର ସ୍ପ୍ରେ ବା ଜଳ ସିଞ୍ଚନ: ପ୍ରବଳ ବେଗରେ ପାଣି ପକାଇ ନିଆଁ ଏବଂ ଆଖପାଖ ଅଞ୍ଚଳକୁ ଥଣ୍ଡା କରାଯାଏ।

୨. ଡାଇନାମାଇଟ୍ ବିସ୍ଫୋରଣ: ବିସ୍ଫୋରଣ ମାଧ୍ୟମରେ ଅମ୍ଳଜାନର ସମ୍ପର୍କକୁ ଛିନ୍ନ କରି ନିଆଁ ଲିଭାଯାଏ।

୩. ଫୋମ୍ କିମ୍ବା ଡ୍ରାଏ କେମିକାଲ୍: ଏହାକୁ ପ୍ରୟୋଗ କରି ନିଆଁକୁ ଆୟତ୍ତ କରାଯାଏ।

୪. ଗ୍ୟାସ୍ ଟର୍ବାଇନ୍ ମିଷ୍ଟ: ଟର୍ବାଇନ୍ ମାଧ୍ୟମରେ ପାଣିର ଛୋଟ ଛୋଟ ବୁନ୍ଦାକୁ ତୀବ୍ର ବେଗରେ ସିଞ୍ଚନ କରାଯାଏ।

୫. ରିଲିଫ୍ ୱେଲ୍ ଡ୍ରିଲିଂ: ମୂଳ କୂପର ଚାପ କମାଇବା ପାଇଁ ପାଖରେ ଅନ୍ୟ ଏକ କୂପ ଖୋଳାଯାଏ।

୬. ମେକାନିକାଲ୍ କ୍ୟାପିଂ: ଯନ୍ତ୍ର ସାହାଯ୍ୟରେ ତୈଳ କୂପର ମୁହଁକୁ ବନ୍ଦ କରାଯାଏ ଯାହାଦ୍ୱାରା ତୈଳ ନିର୍ଗତ ପ୍ରକ୍ରିୟା ବନ୍ଦ ହୋଇଯାଏ।

ଭୁବନେଶ୍ୱର: ମଧ୍ୟପ୍ରାଚ୍ୟରେ ଭୟାବହ ଯୁଦ୍ଧ ଯୋଗୁଁ ହଜାର ହଜାର ନିରୀହ ଲୋକଙ୍କ ପ୍ରାଣହାନି ଘଟିିଛି। ଲକ୍ଷ ଲକ୍ଷ ସାଧାରଣ ଜନତା ଆହତ ହୋଇଛନ୍ତି। ଲକ୍ଷ ଲକ୍ଷ ଲୋକ ବାସହରା ହୋଇ ଦୁର୍ଦ୍ଦିନରେ ଦିନ କାଟୁଛନ୍ତି। ଏଭଳି ସ୍ଥିତିରେ ଯୁଦ୍ଧର ଅନ୍ତ ତଥା ଶାନ୍ତି ପ୍ରତିଷ୍ଠା ପାଇଁ ବିଜୁ ଜନତା ଦଳ "ଇଫତାର ଓ ଇଦ୍‌ ମିଲନ' ପାଳନ କରିବନି ବୋଲି ନିଷ୍ପତ୍ତି ନେଇଛି। ଏନେଇ ଦଳ ପକ୍ଷରୁ ସୂଚନା ପ୍ରଦାନ କରାଯାଇଛି।

ଶୁକ୍ରବାର ଶଙ୍ଖ ଭବନରେ ଆୟୋଜିତ ସାମ୍ୱାଦିକ ସମ୍ମିଳନୀରେ ଉପସଭାପତି ତଥା ପୂର୍ବତନ ମନ୍ତ୍ରୀ ପ୍ରତାପ ଜେନା କହିଥିଲେ ଯେ ପ୍ରତିବର୍ଷ ବିଜୁ ଜନତା ଦଳ ତରଫରୁ ଦଳର ସଭାପତି ନବୀନ ପଟ୍ଟନାୟକଙ୍କ ଉପସ୍ଥିତିରେ ମୁସଲମାନ ଭାଇଭଉଣୀ ଏବଂ ବିଭିନ୍ନ ଧର୍ମର ମାନ୍ୟଗଣ୍ୟ ବ୍ୟକ୍ତିବିଶେଷଙ୍କୁ ନେଇ ମହାସମାରୋହରେ ‘ଇଫତାର ଓ ଇଦ୍‌ ମିଲନ' ପାଳନ କରାଯାଇଥାଏ। ଯୁଦ୍ଧ ଯୋଗୁଁ ମଧ୍ୟପ୍ରାଚ୍ୟରେ ଓଡ଼ିଶାର ଅନେକ ଭାଇଭଉଣୀ ଦୁଃଖଦ ସ୍ଥିତିରେ ଫସି ରହିଛନ୍ତି। ଏହି ଯୁଦ୍ଧ ଦ୍ୱାରା ୧୦ରୁ ଅଧିକ ଦେଶ ପ୍ରତ୍ୟକ୍ଷ ଭାବେ କ୍ଷତିଗ୍ରସ୍ତ ହେବା ସହ ସାରା ବିଶ୍ୱ ପ୍ରଭାବିତ ହୋଇଛି। ଏଭଳି ସ୍ଥିତିରେ ଚଳିତ ବର୍ଷ ଦଳ ତରଫରୁ ‘ଇଫତାର ଓ ଇଦ୍‌ ମିଲନ' ପାଳନକୁ ସ୍ଥଗିତ ରଖିବାକୁ ନିଷ୍ପତ୍ତି ନିଆଯାଇଛି। ମଧ୍ୟପ୍ରାଚ୍ୟ ଯୁଦ୍ଧରେ ବ୍ୟାପକ ଧନଜୀବନ ହାନୀ ଯୋଗୁଁ ଦଳର ସଭାପତି ନବୀନ ପଟ୍ଟନାୟକ ଗଭୀର ଦୁଃଖ ପ୍ରକାଶ କରିବା ସହ ଏହି ଦୁଃଖଦ ମୂହୁର୍ତ୍ତରେ କୌଣସି ପ୍ରକାର ଉତ୍ସବ ପାଳନରୁ ନିବୃତ୍ତ ରହିବାକୁ ଜନସାଧାରଣଙ୍କୁ ନିବେଦନ କରିଛନ୍ତି। ଏହି ସାମ୍ୱାଦିକ ସମ୍ମିଳନୀରେ ଦଳର ସାଧାରଣ ସମ୍ପାଦକ ମନ୍ମଥ ରାଉତରାୟ, ବରିଷ୍ଠ ନେତା ଶେଖ୍‌ ନିଜାମୁଦ୍ଦିନ୍‌, ମୁଖପାତ୍ର ସୋଫିଆ ଆଲମ ଓ ସଂଖ୍ୟାଲଘୁ ସେଲର ସହ ସଂଯୋଜିକା ରିଜୱାନା ବେଗମ ପ୍ରମୁଖ ଉପସ୍ଥିତ ଥିଲେ।

ମଧ୍ୟପ୍ରାଚ୍ୟରେ ଯୁଦ୍ଧ ପରିସ୍ଥିତି ଭୟଙ୍କର ରୂପ ନେଇଛି। ଆମେରିକା ଏବଂ ଇସ୍ରାଏଲର ମିଳିତ ଆକ୍ରମଣରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନି ନିହତ ହେବା ପରେ ପରିସ୍ଥିତି ଅଣାୟତ୍ତ ହୋଇପଡିଛି। ଏହାର ପ୍ରତିଶୋଧ ନେବାକୁ ଯାଇ ଇରାନ ବିଭିନ୍ନ ଗଲ୍ଫ ଦେଶ ଉପରେ ଡ୍ରୋନ୍ ଏବଂ କ୍ଷେପଣାସ୍ତ୍ର ମାଡ଼ ଆରମ୍ଭ କରିଛି, ଯେଉଁଥିରେ ପ୍ରଥମ ଥର ପାଇଁ ଶାନ୍ତ ଦେଶ କୁହାଯାଉଥିବା ଓମାନ ମଧ୍ୟ ଶିକାର ହୋଇଛି।

ଓମାନର ଦୁକମ୍ ବନ୍ଦର ଓ ତୈଳ ଟ୍ୟାଙ୍କର ଉପରେ ଆକ୍ରମଣ

ସାଧାରଣତଃ ଯୁଦ୍ଧରୁ ଦୂରେଇ ରହୁଥିବା ଓମାନ ଉପରେ ଏହି ଆକ୍ରମଣ ବିଶ୍ୱବାସୀଙ୍କୁ ଚକିତ କରିଛି। ରିପୋର୍ଟ ଅନୁଯାୟୀ, ଓମାନର ଦୁକମ୍ ବନ୍ଦର (Duqm Port) ଉପରେ ଦୁଇଟି ଡ୍ରୋନ୍ ଆକ୍ରମଣ ହୋଇଛି। ଏଥିମଧ୍ୟରୁ ଗୋଟିଏ ଡ୍ରୋନ୍ ଶ୍ରମିକମାନଙ୍କ ବାସସ୍ଥାନ ଉପରେ ପଡ଼ିବାରୁ ଜଣେ ବିଦେଶୀ ନାଗରିକ ଆହତ ହୋଇଛନ୍ତି। ଅନ୍ୟ ଏକ ଘଟଣାରେ, ମୁସନ୍ଦମ୍ ଉପକୂଳ ନିକଟରେ 'ସ୍କାଏଲାଇଟ୍' (Skylight) ନାମକ ଏକ ତୈଳ ଟ୍ୟାଙ୍କର ଉପରେ ଆକ୍ରମଣ ହୋଇଛି, ଯେଉଁଥିରେ ୪ ଜଣ କର୍ମଚାରୀ ଆହତ ହୋଇଥିବା ସୂଚନା ମିଳିଛି।

'ଅପରେସନ୍ ଏପିକ୍ ଫ୍ୟୁରି' ଓ ଖାମେନିଙ୍କ ମୃତ୍ୟୁ

ଆମେରିକା ଓ ଇସ୍ରାଏଲ୍ ପକ୍ଷରୁ ଚାଲିଥିବା 'ଅପରେସନ୍ ଏପିକ୍ ଫ୍ୟୁରି' ଜରିଆରେ ତେହେରାନ ଉପରେ ଭୟଙ୍କର ବୋମାବର୍ଷା କରାଯାଇଥିଲା। ଏହି ଆକ୍ରମଣରେ ଇରାନର ସୁପ୍ରିମ ଲିଡର ଆୟାତୋଲ୍ଲା ଅଲି ଖାମେନିଙ୍କ ମୃତ୍ୟୁ ଘଟିଥିବା ଇରାନ ସରକାରୀ ଗଣମାଧ୍ୟମ ନିଶ୍ଚିତ କରିଛି। ଏହା ପରେ ଇରାନର 'ରିଭୋଲ୍ୟୁସନାରୀ ଗାର୍ଡ' (IRGC) ପ୍ରତିଶୋଧ ପରାୟଣ ହୋଇ ଆମେରିକା ଘାଟି ଏବଂ ସହଯୋଗୀ ଦେଶଗୁଡ଼ିକ ଉପରେ ଆକ୍ରମଣ ଜୋରଦାର କରିଛି।

ହାଇ ଆଲର୍ଟରେ ମଧ୍ୟପ୍ରାଚ୍ୟ

ଓମାନରେ ଥିବା ଆମେରିକୀୟ ଦୂତାବାସ ନିଜ କର୍ମଚାରୀମାନଙ୍କୁ ସୁରକ୍ଷିତ ସ୍ଥାନରେ ରହିବାକୁ ନିର୍ଦ୍ଦେଶ ଦେଇଛି (Shelter-in-place)। ଯୁଦ୍ଧ ଭୟରେ ଦୁବାଇ ଏବଂ ମସ୍କଟ ଭଳି ପ୍ରମୁଖ ବିମାନବନ୍ଦରରେ ବିମାନ ସେବା ବାଧାପ୍ରାପ୍ତ ହୋଇଛି। ଓମାନ ସରକାର ଏହି ଆକ୍ରମଣକୁ ନିନ୍ଦା କରିବା ସହ ଶାନ୍ତି ବଜାୟ ରଖିବାକୁ ବିଶ୍ୱ ସମୁଦାୟକୁ ନିବେଦନ କରିଛନ୍ତି।