କଟକ: କଟକ ରେଳ ଷ୍ଟେସନରୁ ଗତ ଶନିବାର ଅପହୃତ ହୋଇଥିବା ଜଣେ ୭ ବର୍ଷୀୟା ନାବାଳିକାଙ୍କୁ ସୋମବାର କମିଶନରେଟ୍ ପୋଲିସ ସୁରକ୍ଷିତ ଭାବେ ଉଦ୍ଧାର କରିଛି। ଏହି ଘଟଣାରେ ସମ୍ପୃକ୍ତ ଥିବା ସନ୍ଦେହରେ ଜଣେ ବୃଦ୍ଧଙ୍କୁ ଅଟକ ରଖି ପୋଲିସ ତରଫରୁ ପଚରାଉଚରା କରାଯାଉଛି। ନାବାଳିକାଙ୍କ ଉଦ୍ଧାର ପରେ ପରିବାର ଲୋକେ ଆଶ୍ୱସ୍ତି ଲାଭ କରିଛନ୍ତି।

କମିଶନରେଟ୍ ପୋଲିସ, ସରକାରୀ ରେଳବାଇ ପୋଲିସ (ଜିଆରପି), ରେଳ ସୁରକ୍ଷା ବଳ (ଆରପିଏଫ୍) ଏବଂ ଶିଶୁ କଲ୍ୟାଣ ସମିତି (ସିଡବ୍ଲ୍ୟୁସି) ର ମିଳିତ ଉଦ୍ୟମରେ କଟକର ବାଲିକୁଦା ଅଞ୍ଚଳରୁ ନାବାଳିକାଙ୍କୁ ଉଦ୍ଧାର କରାଯାଇଛି। ନାବାଳିକା ନିଖୋଜ ହେବା ପରେ ତାଙ୍କୁ ଠାବ କରିବା ଓ ସନ୍ଦିଗ୍ଧ ବ୍ୟକ୍ତିଙ୍କୁ ଚିହ୍ନଟ କରିବା ପାଇଁ ପୋଲିସ ପକ୍ଷରୁ ୧୦ଟି ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା।

ରେଳ ଷ୍ଟେସନ ଏବଂ ଆଖପାଖ ଅଞ୍ଚଳର ସିସିଟିଭି ଫୁଟେଜ୍ ଯାଞ୍ଚ କରିବା ପରେ ଜଣେ ବୃଦ୍ଧ ନାବାଳିକାଙ୍କୁ ସାଥିରେ ନେଇଯାଉଥିବାର ଦୃଶ୍ୟ ପୋଲିସର ହସ୍ତଗତ ହୋଇଥିଲା। ଏହି ସିସିଟିଭି ଫୁଟେଜ୍ ଏବଂ ଅନ୍ୟାନ୍ୟ ବୈଷୟିକ ପ୍ରମାଣକୁ ଆଧାର କରି ପୋଲିସ ସନ୍ଦିଗ୍ଧଙ୍କ ଗତିବିଧି ଟ୍ରାକ୍ କରିବାରେ ସଫଳ ହୋଇଥିଲା। ଶେଷରେ ବାଲିକୁଦା ଅଞ୍ଚଳରେ ରହୁଥିବା ଉକ୍ତ ବୃଦ୍ଧଙ୍କୁ ଧରିବା ସହ ତାଙ୍କ ପାଖରୁ ନାବାଳିକାଙ୍କୁ ଉଦ୍ଧାର କରାଯାଇଥିଲା।

ପୋଲିସର ସୂଚନାନୁସାରେ, ଉଦ୍ଧାର ହୋଇଥିବା ନାବାଳିକାଙ୍କ ସ୍ୱାସ୍ଥ୍ୟବସ୍ଥା ଭଲ ଅଛି। ନିୟମ ଅନୁଯାୟୀ ତାଙ୍କୁ ସିଡବ୍ଲ୍ୟୁସିକୁ ହସ୍ତାନ୍ତର କରାଯାଇଛି ।

ସୂଚନାଯୋଗ୍ୟ ଯେ, କେନ୍ଦ୍ରାପଡ଼ା ଜିଲ୍ଲା ଆଳି ଅଞ୍ଚଳର ଆଈ ଏବଂ ଅଜା ନାବାଳିକାଙ୍କୁ ଧରି ଅନୁଗୋଳ ଜିଲ୍ଲାର ପାଲଲହଡ଼ା ଯିବା ପାଇଁ ଶନିବାର ଅପରାହ୍ନରେ କଟକ ରେଳ ଷ୍ଟେସନରେ ଟ୍ରେନ୍ ଅପେକ୍ଷାରେ ଥିଲେ। ଏହି ସମୟରେ ନାବାଳିକା ଜଣକ ହଠାତ୍ ଷ୍ଟେସନ ପରିସରରୁ ନିଖୋଜ ହୋଇଯାଇଥିଲେ।

ବହୁ ଖୋଜାଖୋଜି ପରେ ମଧ୍ୟ ନାତୁଣୀର କୌଣସି ପତ୍ତା ନ ମିଳିବାରୁ ସେମାନେ ପ୍ରଥମେ ଜିଆରପି ନିକଟରେ ପହଞ୍ଚିଥିଲେ। ପରେ ଜିଆରପିଙ୍କ ପରାମର୍ଶ କ୍ରମେ ଆଈ ଚାଉଳିଆଗଞ୍ଜ ଥାନାରେ ଏକ ନିଖୋଜ ମାମଲା ରୁଜୁ କରିଥିଲେ। ଅଭିଯୋଗ ପାଇବା ପରେ ପୋଲିସ ତତ୍ପରତା ଦେଖାଇ ୨ ଦିନର ତଲାସି ଅଭିଯାନ ପରେ ଏହି ସଫଳତା ହାସଲ କରିଛି ଏବଂ ଘଟଣାର ଅଧିକ ତଦନ୍ତ ଜାରି ରଖିଛି।

ଗୁଜରାଟର ସୁରଟ ରେଳ ଷ୍ଟେସନ ଠାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ସହଯାତ୍ରୀଙ୍କ ସହ ମାରପିଟ୍ କରିବା ଏବଂ ସେମାନଙ୍କ ଉପରକୁ ଅଗ୍ନିନିର୍ବାପକ ଯନ୍ତ୍ର (ଫାୟାର ଏକ୍ସଟିଙ୍ଗୁଇସର୍) ସ୍ପ୍ରେ କରିଥିବା ଅଭିଯୋଗରେ ଅଟକ ଥିବା ଜଣେ ବିଦେଶୀ ନାଗରିକଙ୍କର ପୋଲିସ ହେପାଜତରେ ମୃତ୍ୟୁ ହୋଇଛି। ଗୋଲ୍ଡେନ୍ ଟେମ୍ପଲ୍ ଏକ୍ସପ୍ରେସ୍ ରେ ଏହି ହାଇଡ୍ରାମା ହେବା ପରେ ପୋଲିସ ଉକ୍ତ ବ୍ୟକ୍ତିଙ୍କୁ ପଚରାଉଚରା କରୁଥିବା ବେଳେ ତାଙ୍କର ରହସ୍ୟଜନକ ମୃତ୍ୟୁ ଘଟିଛି। ବର୍ତ୍ତମାନ ସରକାରୀ ରେଳ ପୋଲିସ (ଜିଆରପି) ପକ୍ଷରୁ ଏକ ଅପମୃତ୍ୟୁ ମାମଲା ରୁଜୁ କରାଯାଇ କଷ୍ଟୋଡିଆଲ୍ ଡେଥ୍ (ହେପାଜତରେ ମୃତ୍ୟୁ) ତଦନ୍ତ ଆରମ୍ଭ କରାଯାଇଛି।

ଟ୍ରେନରେ କ'ଣ ଘଟିଥିଲା?

ସୂଚନା ଅନୁଯାୟୀ, ଏହି ଘଟଣାଟି ଅଗଷ୍ଟ ୧୭ ତାରିଖ ରାତିରେ ଘଟିଥିଲା। ଉକ୍ତ ବିଦେଶୀ ନାଗରିକ ଜଣକ ମୁମ୍ବାଇର ବୋରିଭଲି ରୁ ଦିଲ୍ଲୀ ଅଭିମୁଖେ ଯାଉଥିବା ଗୋଲ୍ଡେନ୍ ଟେମ୍ପଲ୍ ଏକ୍ସପ୍ରେସ୍ ରେ ଯାତ୍ରା କରୁଥିଲେ। ଗୁଜରାଟର ବାପି ଷ୍ଟେସନ୍ ଛାଡିବା ପରେ ଟ୍ରେନ୍ ଗେଟ୍ ପାଖରେ ଠିଆ ହେବାକୁ କେନ୍ଦ୍ର କରି ଉକ୍ତ ବ୍ୟକ୍ତିଙ୍କର ଅନ୍ୟ ସହଯାତ୍ରୀଙ୍କ ସହ ବଚସା ଓ ପରେ ହାତାହାତି ହୋଇଥିଲା। ଏହି ସମୟରେ ଜଣେ ଯାତ୍ରୀ ୧୩୯ ରେଳ ହେଲ୍ପଲାଇନ୍ କୁ କଲ୍ କରି ଅଭିଯୋଗ କରିଥିଲେ। ପଶ୍ଚିମ ରେଳବାଇର ଭଦୋଦରା ଡିଭିଜନର ଏସପି ଅଭୟ ସୋନି ଙ୍କ କହିବା ଅନୁଯାୟୀ, ବିବାଦ ବଢ଼ିବା ପରେ ଉକ୍ତ ବିଦେଶୀ ନାଗରିକ ଟ୍ରେନରେ ଥିବା ଏକ ଅଗ୍ନିନିର୍ବାପକ ଯନ୍ତ୍ର ଆଣି ସହଯାତ୍ରୀଙ୍କ ଉପରକୁ ସ୍ପ୍ରେ କରିଦେଇଥିଲେ। ଏହାର ପ୍ରତିବାଦରେ କିଛି ଯାତ୍ରୀ ମଧ୍ୟ ତାଙ୍କୁ ଆକ୍ରମଣ କରିଥିଲେ।

ପୋଲିସ ହେପାଜତରେ ମୃତ୍ୟୁ ଏବଂ ତଦନ୍ତ

ଟ୍ରେନ୍ ଟି ରାତିରେ ସୁରଟ ରେଳ ଷ୍ଟେସନ ରେ ପହଞ୍ଚିବା କ୍ଷଣି ପୂର୍ବରୁ ପ୍ରସ୍ତୁତ ଥିବା ପ୍ରାୟ ୧୫ ରୁ ୨୦ ଜିଆରପି ଓ ଆରପିଏଫ୍ କର୍ମଚାରୀ ତାଙ୍କୁ କାବୁ କରି ଟ୍ରେନରୁ ଓହ୍ଲାଇଥିଲେ। ପରେ ତାଙ୍କୁ ପ୍ଲାଟଫର୍ମ ନମ୍ବର ୧ ରେ ଥିବା ଆରପିଏଫ୍ ଥାନାକୁ ପଚରାଉଚରା ପାଇଁ ନିଆଯାଇଥିଲା। ମାତ୍ର ସେଠାରେ ପଚରାଉଚରା ଚାଲିଥିବା ବେଳେ ଉକ୍ତ ବ୍ୟକ୍ତି ଜଣକ ହଠାତ୍ ଅଚେତ ହୋଇପଡ଼ିଥିଲେ। ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସର କହିବା ଅନୁଯାୟୀ ମୃତକଙ୍କ ବୟସ ପ୍ରାୟ ୪୫ ବର୍ଷ ହେବ ଏବଂ ସେ ଜଣେ ଆଫ୍ରିକୀୟ ନାଗରିକ ବୋଲି ଅନୁମାନ କରାଯାଉଛି। ତେବେ ତାଙ୍କ ପାଖରୁ କୌଣସି ପାସପୋର୍ଟ, ଭିସା କିମ୍ବା ପରିଚୟ ପତ୍ର ମିଳିପାରି ନାହିଁ। ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ପୋଲିସ କଷ୍ଟୋଡିଆଲ୍ ଡେଥ୍ ତଦନ୍ତ ଆରମ୍ଭ କରିଛି ଏବଂ ଶବ ବ୍ୟବଚ୍ଛେଦ ସହିତ ଫରେନ୍ସିକ୍ ଯାଞ୍ଚ ମଧ୍ୟ କରାଯାଉଛି।

ଉତ୍ତରପ୍ରଦେଶର ପ୍ରୟାଗରାଜ ରେଳ ଷ୍ଟେସନରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ଯୁବକ ନକଲି ଆରପିଏଫ୍ (RPF) ସବ୍-ଇନ୍ସପେକ୍ଟର ବା ଦାରୋଗା ସାଜି ଲୋକଙ୍କୁ ଠକୁଥିବା ବେଳେ ପୋଲିସ ହାତରେ ଧରାପଡିଛନ୍ତି। ଜିଆରପି (GRP) ଏବଂ ଆରପିଏଫ୍ର ମିଳିତ ଟିମ୍ ଉକ୍ତ ଯୁବକଙ୍କୁ ପ୍ରୟାଗରାଜ ଜଙ୍କସନର ପ୍ଲାଟଫର୍ମ ନମ୍ବର ୧ରୁ ଗିରଫ କରିଛି।

ପରିବାର ଲୋକଙ୍କୁ ଖୁସି କରିବାକୁ ସାଜିଥିଲା ନକଲି ଏସଆଇ

ପୋଲିସର ପଚରାଉଚରା ବେଳେ ଗିରଫ ଯୁବକ ନିଜର ପରିଚୟ ଗାଜିପୁର ଜିଲ୍ଲା ବରେସର ଥାନା ଅନ୍ତର୍ଗତ ରେଙ୍ଗା ଗ୍ରାମର ଦିବ୍ୟାଂଶୁ କୁମାର (୨୨) ବୋଲି ଦେଇଛି। ସେ ପ୍ରତିଯୋଗିତାମୂଳକ ପରୀକ୍ଷା ପାଇଁ ପ୍ରସ୍ତୁତ ହେଉଥିଲା। ଦିବ୍ୟାଂଶୁ ପୋଲିସକୁ କହିଛି ଯେ, ତାଙ୍କ ପରିବାର ଲୋକେ ବାରମ୍ବାର ଚାକିରି ବିଷୟରେ ପଚାରି ତାଙ୍କ ଉପରେ ଚାପ ପକାଉଥିଲେ। ଚାକିରି ନ ମିଳିବାରୁ ପରିବାର ଲୋକଙ୍କୁ ସନ୍ତୁଷ୍ଟ କରିବା ଏବଂ ଟ୍ରେନରେ ମାଗଣାରେ ଯାତ୍ରା କରିବା ଉଦ୍ଦେଶ୍ୟରେ ସେ ଆରପିଏଫ୍ ଦାରୋଗାର ବର୍ଦ୍ଦି ସିଲାଇ କରିଥିଲା। ବଜାରରୁ ସେ ଦାରୋଗାଙ୍କ ବର୍ଦ୍ଦି, ଷ୍ଟାର୍, ବ୍ୟାଜ୍ ଏବଂ ଅନ୍ୟାନ୍ୟ ସାମଗ୍ରୀ କିଣି ପିନ୍ଧିବା ଆରମ୍ଭ କରିଦେଇଥିଲା।

ପରିବାରକୁ କରାଇଥିଲା ସଙ୍ଗମ ସ୍ନାନ

ଦିବ୍ୟାଂଶୁ ଗତ ତିନି ମାସ ଧରି ନକଲି ଦାରୋଗା ସାଜି ଟ୍ରେନରେ ବିନା ଟିକେଟରେ ଯାତ୍ରା କରୁଥିଲା। ଏପରିକି, ସେ ମାଘ ମେଳା ସମୟରେ ନିଜ ପରିବାର ଲୋକଙ୍କୁ ପ୍ରୟାଗରାଜ ଆଣି ସଙ୍ଗମରେ ସ୍ନାନ ମଧ୍ୟ କରାଇଥିଲା। ରବିବାର ଦିନ ଷ୍ଟେସନରେ ଯାତ୍ରୀମାନଙ୍କୁ ଚେକିଂ କରିବା ବାହାନାରେ ସେ ନିଜର ଦବଦବା ଦେଖାଉଥିବା ସମୟରେ ଆରପିଏଫ୍ ଇନ୍ସପେକ୍ଟର ଅକଲେଶ କୁମାର ସିଂହ ଏବଂ ତାଙ୍କ ଟିମର ସନ୍ଦେହ ଘେରକୁ ଆସିଯାଇଥିଲା।

ପ୍ଲାଟଫର୍ମ ନମ୍ବର ୧ରୁ ଗିରଫ ଓ ଜବତ ସାମଗ୍ରୀ

ପୋଲିସ ଦିବ୍ୟାଂଶୁକୁ ଷ୍ଟେସନରୁ ଧରି ତଲାସୀ ନେବା ପରେ ତା' ନିକଟରୁ ନଗଦ ୬୫୦ ଟଙ୍କା, ଆଧାର କାର୍ଡ ଏବଂ ଏଟିଏମ୍ (ATM) କାର୍ଡ ଜବତ କରିଛି। ଏହା ସହିତ ତା' ଦେହରେ ଥିବା ନକଲି ବର୍ଦ୍ଦି, ମୋନୋଗ୍ରାମ, ବେଲ୍ଟ ଏବଂ ଲାଲ୍ ରଙ୍ଗର ଜୋତାକୁ ମଧ୍ୟ ପୋଲିସ ନିଜ ହେପାଜତକୁ ନେଇଛି। ଜିଆରପି ଥାନାରେ ଅଭିଯୁକ୍ତ ବିରୋଧରେ ସମ୍ପୃକ୍ତ ଦଫା ଅନୁଯାୟୀ ମାମଲା ରୁଜୁ କରାଯାଇ ତାକୁ ଜେଲ୍ ପଠାଇ ଦିଆଯାଇଛି।

ଉତ୍ତର ପ୍ରଦେଶର ମଥୁରା ଜଙ୍କସନରେ ଜଣେ ଚା’ ଦୋକାନୀଙ୍କୁ ଦୁର୍ବ୍ୟବହାର କରିବା ଏବଂ ମାଡ଼ ମାରିବା ଅଭିଯୋଗରେ ଜଣେ ସରକାରୀ ରେଳବାଇ ପୋଲିସ (ଜିଆରପି) ସବ-ଇନ୍ସପେକ୍ଟରଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଛି। ସୋସିଆଲ ମିଡିଆରେ ଏହି ଘଟଣାର ଏକ ଭିଡିଓ ଭାଇରାଲ ହେବା ପରେ ପୋଲିସ ବିଭାଗ ପକ୍ଷରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଭିଡିଓରେ ସମ୍ପୃକ୍ତ ପୋଲିସ ଅଧିକାରୀ ଜଣଙ୍କ ଚା’ ଦୋକାନୀଙ୍କୁ ଗାଳିଗୁଲଜ କରିବା ସହ ଅତ୍ୟନ୍ତ ଅଶାଳୀନ ଭାଷା ପ୍ରୟୋଗ କରୁଥିବା ଦେଖିବାକୁ ମିଳିଛି।

ସୂଚନା ଅନୁଯାୟୀ, ଗତ ବୁଧବାର ସକାଳେ ମଥୁରା ଜଙ୍କସନର ପ୍ଲାଟଫର୍ମ ନମ୍ବର ୮ରେ ଏହି ଅଭାବନୀୟ ଘଟଣା ଘଟିଥିଲା। ସବ-ଇନ୍ସପେକ୍ଟର ବିବେକ କୁମାର ଚା’ ଦୋକାନୀ ସୂରଜ ଚୌହାନଙ୍କ ପାଖକୁ ଯାଇ ଚା’ ପ୍ରସ୍ତୁତ କରିବାକୁ କହିଥିଲେ। ସେହି ସମୟରେ ସୂରଜ ନିଜ ଦୋକାନ ସଫା କରୁଥିବାରୁ ଟିକେ ସମୟ ମାଗିଥିଲେ। କିଛି ସମୟ ପରେ ବିବେକ କୁମାର ପୁଣି ଫେରିଥିଲେ ମଧ୍ୟ ସୂରଜ ସଫେଇ କାର୍ଯ୍ୟରେ ବ୍ୟସ୍ତ ଥିବା ଦେଖି ସେ ଉତ୍ତ୍ୟକ୍ତ ହୋଇପଡ଼ିଥିଲେ। ଏହାପରେ ସେ ସୂରଜଙ୍କୁ ଚାପୁଡ଼ା ମାରିବା ସହ ଅତ୍ୟନ୍ତ ଅଭଦ୍ର ଭାଷାରେ ଗାଳିଗୁଲଜ କରିଥିଲେ।

ସିସିଟିଭିରେ କଏଦ ହେଲା ଦୃଶ୍ୟ

ଏହି ସମସ୍ତ ଘଟଣା ଷ୍ଟେସନରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଥିଲା। ଭିଡିଓରେ ସବ-ଇନ୍ସପେକ୍ଟର ଜଣଙ୍କ ଦୋକାନୀଙ୍କୁ ‘ପାଟିରେ ପରିସ୍ରା କରିଦେବି’ ବୋଲି ଧମକ ଦେଉଥିବା ମଧ୍ୟ ଶୁଣିବାକୁ ମିଳିଛି। ଜିଆରପି ଏସପି ଅନିଲ କୁମାର ଝା ଏହି ଘଟଣାକୁ ଗମ୍ଭୀରତାର ସହ ନେଇ ବିବେକ କୁମାରଙ୍କୁ ନିଲମ୍ବିତ କରିବା ସହ ତାଙ୍କ ବିରୋଧରେ ବିଭାଗୀୟ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ପୋଲିସର ଏଭଳି ଆଚରଣକୁ ସାଧାରଣରେ ତୀବ୍ର ସମାଲୋଚନା କରାଯାଇଛି।

ଚା’ ପାଇଁ ବିଳମ୍ବ ହେବାରୁ ଦୋକାନୀଙ୍କୁ ମାଡ଼ ଓ ଅଶାଳୀନ ଗାଳି! ମଥୁରା ଜଙ୍କସନରେ ଜଣେ ଚା’ ବିକ୍ରେତାଙ୍କୁ ଦୁର୍ବ୍ୟବହାର କରି ଜିଆରପି ସବ-ଇନ୍ସପେକ୍ଟର ନିଲମ୍ବିତ। #Mathura #UPPolice #ViralVideo #RailwayPolice pic.twitter.com/rBgvP157k4

— Sakala News (@SakalaNews) February 27, 2026