ନୂଆଦିଲ୍ଲୀ: ବିହାରର ବୈଶାଳୀ ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି। ଏଠାରେ ଏକ ୩୪ ବର୍ଷ ପୁରୁଣା ଆକ୍ରମଣ ମାମଲାରେ ଅତିରିକ୍ତ ଜିଲ୍ଲା କୋର୍ଟ ଜଣେ ୮୫ ବର୍ଷୀୟ ବୃଦ୍ଧଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଯୌବନ ଅବସ୍ଥାରେ କରିଥିବା ଅପରାଧ ପାଇଁ ବୃଦ୍ଧାବସ୍ଥାରେ ଦଣ୍ଡ ଭୋଗିବାକୁ ପଡ଼ିଛି। ବର୍ତ୍ତମାନ ଏହି ବୃଦ୍ଧଙ୍କ ଏକ ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ୍ ହେବାରେ ଲାଗିଛି।

ଏହି ଘଟଣାଟି ୧୯୯୨ ମସିହା ମେ' ୧୦ ତାରିଖର। ପାରିବାରିକ ବିବାଦକୁ କେନ୍ଦ୍ର କରି ଏକ ଦମ୍ପତିଙ୍କ ଉପରେ ଗୁଳିଚାଳନା ଏବଂ ଧାରୁଆ ଅସ୍ତ୍ରରେ ଆକ୍ରମଣ କରାଯାଇଥିଲା। ଏହି ମାମଲାରେ ଗୋଟିଏ ପରିବାରର ୫ ଜଣଙ୍କୁ ଅଭିଯୁକ୍ତ ଦର୍ଶାଇ ଏଫଆଇଆର (FIR) ରୁଜୁ କରାଯାଇଥିଲା। ପୁଲିସ ପକ୍ଷରୁ ୧୯୯୩ ମସିହାରେ କୋର୍ଟରେ ଚାର୍ଜସିଟ୍ ଦାଖଲ କରାଯାଇଥିଲା। ତେବେ ମାମଲାର ଶୁଣାଣି ଚାଲିଥିବା ବେଳେ ୫ ଜଣ ଅଭିଯୁକ୍ତଙ୍କ ମଧ୍ୟରୁ ୪ ଜଣଙ୍କର ମୃତ୍ୟୁ ହୋଇସାରିଛି। କେବଳ ୮୫ ବର୍ଷୀୟ ଦୀପ ରାୟ ନାମକ ଜଣେ ବୃଦ୍ଧ ଜୀବିତ ଥିବାରୁ ଏବେ ତାଙ୍କୁ ଦଣ୍ଡିତ କରାଯାଇଛି।

ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳିଛି ଯେ, ବୃଦ୍ଧ ଜଣକ ହାତରେ ବାଡ଼ି ଏବଂ ଚପଲ ଧରି କୋର୍ଟ ପରିସରରୁ ବାହାରକୁ ଆସୁଛନ୍ତି। ତାଙ୍କର ଶାରୀରିକ ଅବସ୍ଥା ଏତେ ଦୁର୍ବଳ ଯେ ଉଠିବା ବସିବା ପାଇଁ ତାଙ୍କୁ ଦୁଇ ଜଣଙ୍କର ସାହାଯ୍ୟ ଦରକାର ପଡ଼ୁଛି। ତେବେ ଆଇନ ଆଗରେ ବୟସର ଅସହାୟତା କୌଣସି କାମରେ ଆସିନାହିଁ।

ଏହି ଘଟଣାଟି ବୈଶାଳୀ ଜିଲ୍ଲା ଅନ୍ତର୍ଗତ ରାଘୋପୁରର ଜୁଡାୱନପୁର ଅଞ୍ଚଳର। ସୋମବାର ଦିନ ଶୁଣାଣି ଶେଷ ହେବା ପରେ ଅତିରିକ୍ତ ଜିଲ୍ଲା ଦୌରା ଜଜ୍ ଆର୍ମ୍ସ ଆକ୍ଟ ଅଧୀନରେ ଦୀପ ରାୟଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଦୀର୍ଘ ୩୪ ବର୍ଷର ଲମ୍ବା ଆଇନଗତ ଲଢ଼େଇ ପରେ ଅଦାଲତ ଏହି ବଡ଼ ରାୟ ଶୁଣାଇଛନ୍ତି ।

ବିହାରର ମୁଜାଫରପୁରରେ ଏକ ବଡ଼ ଧରଣର ସାଇବର ଠକେଇ ଗ୍ୟାଙ୍ଗର ପର୍ଦ୍ଦାଫାଶ ହୋଇଛି। ଆଶ୍ଚର୍ଯ୍ୟର କଥା ହେଉଛି, ଏହି ଅନ୍ତଃରାଜ୍ୟ ଠକେଇ ଗିରୋହର ମାଷ୍ଟରମାଇଣ୍ଡ ହେଉଛନ୍ତି ବିହାର ସରକାରଙ୍କ ଜଣେ ଅବସରପ୍ରାପ୍ତ ପରିସଂଖ୍ୟାନ ଅଧିକାରୀ। ମୁଜାଫରପୁର ସାଇବର ପୋଲିସ ଏହି ଘଟଣାର ପର୍ଦ୍ଦାଫାଶ କରି ପାଟନାର ରାଜୀବ ନଗରରୁ ମୁଖ୍ୟ ଅଭିଯୁକ୍ତ ପ୍ରିୟରଞ୍ଜନ ଶର୍ମା (୬୦ ବର୍ଷ) ଏବଂ ତାଙ୍କ ପୁଅ ଅନନ୍ତ ଅମୀଷଙ୍କୁ ଗିରଫ କରିଛି। ସେମାନେ ସାରା ଦେଶରେ ଲୋକଙ୍କୁ 'ଡିଜିଟାଲ୍ ଆରେଷ୍ଟ'ର ଭୟ ଦେଖାଇ ଲକ୍ଷ ଲକ୍ଷ ଟଙ୍କା ଲୁଟୁଥିଲେ।

'ଡିଜିଟାଲ୍ ଆରେଷ୍ଟ' ନାଁରେ ୬୭ ଲକ୍ଷ ଟଙ୍କାର ଠକେଇ

ଗିରଫ ହୋଇଥିବା ପିତା-ପୁତ୍ର ନିଜକୁ ପୋଲିସ, ସିବିଆଇ (CBI) କିମ୍ବା ଟେଲିକମ୍ ବିଭାଗର ଅଧିକାରୀ ବୋଲି ପରିଚୟ ଦେଉଥିଲେ। ଲୋକଙ୍କୁ ଫୋନ୍ ବା ଭିଡିଓ କଲ୍ କରି ସେମାନଙ୍କ ଆଧାର କାର୍ଡର ଅପବ୍ୟବହାର ମନି ଲଣ୍ଡରିଂ ବା ଅନ୍ୟ ଅପରାଧିକ କାର୍ଯ୍ୟରେ ହୋଇଛି ବୋଲି କହି ଭୟଭୀତ କରୁଥିଲେ। ନିକଟରେ କାଜି ମହମ୍ମଦପୁର ଥାନା ଅଞ୍ଚଳର ପଞ୍ଜାବ ନ୍ୟାସନାଲ ବ୍ୟାଙ୍କର ଜଣେ ଅବସରପ୍ରାପ୍ତ ଅଧିକାରୀ ମହେଶ ଗାମୀଙ୍କୁ ଏହିଭଳି ଫାଶରେ ପକାଇଥିଲେ। ପହଲଗାମ୍ ଆକ୍ରମଣରେ ତାଙ୍କ ଆଧାର କାର୍ଡ ବ୍ୟବହାର ହୋଇଥିବା କହି ତାଙ୍କୁ ଡିଜିଟାଲ୍ ଆରେଷ୍ଟର ଭୟ ଦେଖାଇଥିଲେ ଏବଂ ତାଙ୍କଠାରୁ ୬୭ ଲକ୍ଷ ଟଙ୍କା ବିଭିନ୍ନ ବ୍ୟାଙ୍କ ଆକାଉଣ୍ଟକୁ ଟ୍ରାନ୍ସଫର କରାଇ ନେଇଥିଲେ। ଗତ ଏପ୍ରିଲ ୯ ତାରିଖରେ ଏ ନେଇ ସାଇବର ଥାନାରେ ଏଫଆଇଆର (FIR) ରୁଜୁ ହୋଇଥିଲା।

୨୦୦ କୋଟିର ସନ୍ଦିଗ୍ଧ କାରବାର ଏବଂ ବିଦେଶୀ ଲିଙ୍କ୍

ପୋଲିସର ତଦନ୍ତରୁ ଏକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ଅଭିଯୁକ୍ତମାନଙ୍କ ପାଖରେ ଏଫସିଆରଏ (FCRA) ସହ ଜଡିତ ୪ଟି ବ୍ୟାଙ୍କ ଆକାଉଣ୍ଟ ଥିଲା, ଯେଉଁଥିରେ ବିଦେଶରୁ ପ୍ରାୟ ୨୦୦ କୋଟି ଟଙ୍କାର ସନ୍ଦିଗ୍ଧ କାରବାର ହୋଇଥିବାର ପ୍ରମାଣ ମିଳିଛି। ସାଇବର ପୋଲିସର କହିବା ଅନୁଯାୟୀ, ଗିରୋହ ଦ୍ୱାରା ଗୋଟିଏ ଦିନରେ ପ୍ରାୟ ୪ କୋଟି ଟଙ୍କା ପର୍ଯ୍ୟନ୍ତ କାରବାର ହେଉଥିଲା। ଠକେଇ ଟଙ୍କାକୁ ଟ୍ରେସିଂରୁ ବଞ୍ଚାଇବା ପାଇଁ ଫେକ୍ ଏନଜିଓ ଓ କମ୍ପାନୀ ନାଁରେ ଖାତା ଖୋଲାଯାଇଥିଲା। ଏହି ଗ୍ୟାଙ୍ଗ ବିରୋଧରେ ଦେଶର ୨୮ଟି ରାଜ୍ୟରେ ଅଭିଯୋଗ ରହିଛି ଏବଂ ମୁମ୍ବାଇ କ୍ରାଇମ୍ ବ୍ରାଞ୍ଚ ମଧ୍ୟ ଏମାନଙ୍କୁ ଖୋଜୁଥିଲା।

କିପରି ହେଲା ଗିରଫଦାରୀ?

ଏସଏସପିଙ୍କ ନିର୍ଦ୍ଦେଶକ୍ରମେ ସାଇବର ଡିଏସପି ହିମାଂଶୁ କୁମାରଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା। କଲ୍ ଡିଟେଲ୍ସ ଓ ଡିଜିଟାଲ୍ ଟ୍ରାନ୍ସଜାକ୍ସନର ଯାଞ୍ଚ କରି ପୋଲିସ ପାଟନାର ରାଜୀବ ନଗର ସ୍ଥିତ ଘରେ ଚଢ଼ାଉ କରିଥିଲା। ସେଠାରୁ ନଗଦ ୨୩,୯୦୦ ଟଙ୍କା, ଗୋଟିଏ ଲାପଟପ୍, ୩ଟି ମୋବାଇଲ୍, ୧୯ଟି ବ୍ୟାଙ୍କ ପାସବୁକ୍ ଓ ଚେକବୁକ୍, ୪ଟି ମୋହର ଏବଂ ପେନ୍ ଡ୍ରାଇଭ୍ ସମେତ ଅନେକ ଗୁରୁତ୍ୱପୂର୍ଣ୍ଣ ଦସ୍ତାବିଜ୍ ଜବତ କରାଯାଇଛି। କେନ୍ଦ୍ରୀୟ ଏଜେନ୍ସିମାନଙ୍କ ସହାୟତାରେ ଏବେ ଏହି ବୃହତ ସାଇବର ନେଟୱାର୍କର ଅଧିକ ଖୋଳତାଡ଼ ଜାରି ରହିଛି।

ବିହାରର ମୋତିହାରୀରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ବିବାହର ମାତ୍ର ଦୁଇ ଦିନ ପରେ ଜଣେ ନବବଧୂ ନିଜ ସ୍ୱାମୀଙ୍କୁ ଚକମା ଦେଇ ପ୍ରେମିକ ସହ ଫେରାର ହୋଇଯାଇଛି। ସ୍ୱାମୀ କଲେଜ ଗେଟ୍ ବାହାରେ ଅପେକ୍ଷା କରି ରହିଥିବା ବେଳେ ପତ୍ନୀ ପଛ ଗେଟ୍ ଦେଇ ପ୍ରେମିକ ସହ ଚମ୍ପଟ ମାରିଥିଲା। ଏହି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।

କଲେଜ ଯିବା ବାହାନାରେ ଚକମା

ରିପୋର୍ଟ ଅନୁଯାୟୀ, ତୁରକୌଲିଆ ଥାନା ଅଞ୍ଚଳର ମାଝାର ଗାଁର ଭାନୁ ଶର୍ମା ଗତ ଫେବୃଆରୀ ୨୦ ତାରିଖରେ ସଂଗ୍ରାମପୁରର ଇନ୍ଦ୍ରଗାଛି ଗାଁର ଲକି କୁମାରୀଙ୍କୁ ବିବାହ କରିଥିଲେ। ଫେବୃଆରୀ ୨୧ରେ ବିଦାୟ ପରେ ବୋହୂ ଶାଶୁଘରକୁ ଆସିଥିଲା। କିନ୍ତୁ ବିବାହର ଦ୍ୱିତୀୟ ଦିନ, ଅର୍ଥାତ୍ ଫେବୃଆରୀ ୨୨ରେ ଲକି କୁମାରୀ କଲେଜରେ ସାର୍ଟିଫିକେଟ୍ ଯାଞ୍ଚ କରିବା ବାହାନାରେ ସ୍ୱାମୀଙ୍କ ସହ ଘରୁ ବାହାରିଥିଲେ। ଭାନୁ ନିଜ ପତ୍ନୀଙ୍କୁ ବାଇକରେ ବସାଇ ମୋତିହାରୀର ଏଲଏନଡି (LND) କଲେଜ ନେଇଯାଇଥିଲେ।

ପଛ ଗେଟ୍ ଦେଇ ପ୍ରେମିକ ସହ ଫେରାର

କଲେଜରେ ପହଞ୍ଚିବା ପରେ ଲକି ସ୍ୱାମୀଙ୍କୁ ବାହାରେ ଅପେକ୍ଷା କରିବାକୁ କହି ଭିତରକୁ ଯାଇଥିଲେ। ଭାନୁ ଜଣେ ଚୌକିଦାର ଭଳି ଗେଟ୍ ବାହାରେ ଦୀର୍ଘ ସମୟ ଧରି ଅପେକ୍ଷା କରିଥିଲେ। ମାତ୍ର ବହୁ ସମୟ ପର୍ଯ୍ୟନ୍ତ ପତ୍ନୀ ଫେରିନଥିଲେ। ସନ୍ଦେହ ହେବାରୁ ସେ ଭିତରକୁ ଯାଇ ଖୋଜାଖୋଜି କରିବା ପରେ ଜାଣିବାକୁ ପାଇଲେ ଯେ ତାଙ୍କ ପତ୍ନୀ ପୂର୍ବରୁ ପ୍ରସ୍ତୁତ ଯୋଜନା ମୁତାବକ କଲେଜର ପଛ ଗେଟ୍ ଦେଇ ନିଜ ପ୍ରେମିକ ସୁଜିତ୍ ସହ ଫେରାର ହୋଇଯାଇଛନ୍ତି।

ଗହଣା ଓ ଟଙ୍କା ନେଇ ଚମ୍ପଟ

ପୀଡ଼ିତ ସ୍ୱାମୀ ଭାନୁ ଶର୍ମାଙ୍କ ଅଭିଯୋଗ ଅନୁଯାୟୀ, ଲକି କୁମାରୀ ଘରୁ ବାହାରିବା ସମୟରେ ନିଜ ସହ ଲକ୍ଷାଧିକ ଟଙ୍କାର ମୂଲ୍ୟବାନ ଗହଣା ଏବଂ ନଗଦ ଟଙ୍କା ମଧ୍ୟ ନେଇଯାଇଛନ୍ତି। ଏହି ଘଟଣା ପରେ ବରପକ୍ଷ ତରଫରୁ ଥାନାରେ ଅଭିଯୋଗ ଦାୟର କରାଯାଇଛି। ପୋଲିସ ବର୍ତ୍ତମାନ ଘଟଣାର ତଦନ୍ତ କରୁଛି ଏବଂ ଫେରାର ପ୍ରେମୀ ଯୁଗଳଙ୍କୁ ଖୋଜୁଛି।