ଆସାରାମଙ୍କ ଜାମିନ ଆବେଦନ: ରାଜସ୍ଥାନ ସରକାରଙ୍କୁ ତାଜା ମେଡିକାଲ ରିପୋର୍ଟ ମାଗିଲେ ସୁପ୍ରିମକୋର୍ଟ

Suryakanta — Fri, 17 Jul 2026 16:30:54 +0530

ନାବାଳିକା ଦୁଷ୍କର୍ମ ମାମଲାରେ ଆଜୀବନ କାରାଦଣ୍ଡ ଭୋଗୁଥିବା ବିବାଦୀୟ ଆଧ୍ୟାତ୍ମିକ ଗୁରୁ ଆସାରାମ ବାପୁଙ୍କ ଅନ୍ତରୀଣ ଜାମିନ ଆବେଦନ ଉପରେ ଶୁକ୍ରବାର ଦିନ ସୁପ୍ରିମକୋର୍ଟରେ ଗୁରୁତ୍ୱପୂର୍ଣ୍ଣ ଶୁଣାଣି ହୋଇଛି। ସ୍ୱାସ୍ଥ୍ୟଗତ ସମସ୍ୟା ଦର୍ଶାଇ ଆସାରାମ ଅନ୍ତରୀଣ ଜାମିନ ପାଇଁ ଆବେଦନ କରିଥିବା ବେଳେ ସର୍ବୋଚ୍ଚ ନ୍ୟାୟାଳୟ ଏହି ମାମଲାରେ ରାଜସ୍ଥାନ ସରକାରଙ୍କୁ ତାଙ୍କର ତାଜା ମେଡିକାଲ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ୨୧ ଜୁଲାଇରେ ଏହି ମାମଲାର ପରବର୍ତ୍ତୀ ଶୁଣାଣି ହେବ।

ସ୍ୱାସ୍ଥ୍ୟଗତ କାରଣରୁ ଜାମିନ ଆବେଦନ

ଆସାରାମଙ୍କ ଓକିଲ କୋର୍ଟରେ ଯୁକ୍ତି ବାଢ଼ିଥିଲେ ଯେ, ତାଙ୍କ ମହକିଲଙ୍କର ତୀବ୍ର ଆଭ୍ୟନ୍ତରୀଣ ରକ୍ତସ୍ରାବ (Internal Bleeding) ହେଉଛି ଏବଂ ସେ ଗୁରୁତର ଅବସ୍ଥାରେ ଏମ୍ସ ଯୋଧପୁର (AIIMS Jodhpur) ରେ ଭର୍ତ୍ତି ହୋଇଛନ୍ତି। ଏଭଳି ସ୍ଥିତିରେ ଜଣେ 'ହାଇ-ରିସ୍କ' ରୋଗୀ ଭାବେ ତାଙ୍କୁ ଉନ୍ନତ ଚିକିତ୍ସା ପାଇଁ ତୁରନ୍ତ ଅନ୍ତରୀଣ ଜାମିନ ପ୍ରଦାନ କରାଯିବା ଆବଶ୍ୟକ।

ରାଜସ୍ଥାନ ସରକାରଙ୍କ ଯୁକ୍ତି: 'ଆସାରାମ ସମ୍ପୂର୍ଣ୍ଣ ସୁସ୍ଥ ଅଛନ୍ତି'

ରାଜସ୍ଥାନ ସରକାରଙ୍କ ପକ୍ଷରୁ ହାଜର ହୋଇଥିବା ସଲିସିଟର ଜେନେରାଲ ତୁଷାର ମେହେଟ୍ଟା ଆସାରାମଙ୍କ ଜାମିନ ଆବେଦନକୁ କଡ଼ା ବିରୋଧ କରିଥିଲେ। ସେ ଅଦାଲତଙ୍କୁ ଜଣାଇଥିଲେ ଯେ, ଆସାରାମ ସମ୍ପୂର୍ଣ୍ଣ ସୁସ୍ଥ ଅଛନ୍ତି ଏବଂ ତାଙ୍କର ସ୍ୱାସ୍ଥ୍ୟବସ୍ଥା ନେଇ ଦିଆଯାଇଥିବା ତଥ୍ୟକୁ ବଢ଼ାଇଚଢ଼ାଇ କୁହାଯାଉଛି। ମାତ୍ର ତିନି ମାସ ପୂର୍ବେ ଆସାରାମ ଅଯୋଧ୍ୟା ଏବଂ କାଶୀ ବିଶ୍ୱନାଥ ଦର୍ଶନ କରିବାକୁ ଯାଇଥିଲେ ଏବଂ ସେଠାରେ ସେ ସବୁଆଡେ ଚାଲି ଚାଲି ବୁଲିଥିଲେ। ବର୍ତ୍ତମାନର ରକ୍ତସ୍ରାବ ସମସ୍ୟା କେବଳ ଏକ ସାଧାରଣ ଗ୍ୟାଷ୍ଟ୍ରୋ ସମସ୍ୟା ଯୋଗୁଁ ହୋଇଛି ଏବଂ ଏହା ସମ୍ପୂର୍ଣ୍ଣ ଅସ୍ଥାୟୀ ବୋଲି ସେ ଯୁକ୍ତି କରିଥିଲେ।

ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ

ବିଚାରପତି ଏମ୍.ଏମ୍ ସୁନ୍ଦରେଶ ଏବଂ ପି.ବି ବରାଳେଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି ସ୍ପଷ୍ଟ କରିଛନ୍ତି ଯେ, କେବଳ ରାଜ୍ୟ ସରକାରଙ୍କ ରିପୋର୍ଟ ଆଧାରରେ ହିଁ ଜାମିନ ଉପରେ ଚୂଡାନ୍ତ ନିଷ୍ପତ୍ତି ନିଆଯିବ। ତେବେ ଖଣ୍ଡପୀଠ ଏହା ମଧ୍ୟ ଚେତାବନୀ ଦେଇଛନ୍ତି ଯେ, ଯଦି ତାଙ୍କର ସ୍ୱାସ୍ଥ୍ୟବସ୍ଥା ପ୍ରକୃତରେ ଗୁରୁତର ଥାଏ, ତେବେ କୌଣସି ଅଘଟଣ ଘଟିଲେ କୋର୍ଟ କିମ୍ବା ସରକାର ନିନ୍ଦିତ ହେବାକୁ ଚାହିଁବେ ନାହିଁ। ତେଣୁ ସରକାର ସମ୍ପୃକ୍ତ ଅଧିକାରୀଙ୍କଠାରୁ ସଠିକ୍ ରିପୋର୍ଟ ସଂଗ୍ରହ କରନ୍ତୁ। ଯଦି ଆବଶ୍ୟକ ପଡ଼େ, ତେବେ କେବଳ ଚିକିତ୍ସା ଉଦ୍ଦେଶ୍ୟରେ ସୀମିତ ସମୟ ପାଇଁ ଅନ୍ତରୀଣ ଜାମିନ ପ୍ରଦାନ କରିବାକୁ ବିଚାର କରାଯିବ ବୋଲି ସର୍ବୋଚ୍ଚ ଅଦାଲତ କହିଛନ୍ତି। ମାମଲାର ପରବର୍ତ୍ତୀ ଶୁଣାଣି ପାଇଁ ୨୧ ଜୁଲାଇ ତାରିଖକୁ ଧାର୍ଯ୍ୟ କରାଯାଇଛି।

ବଟୁକଙ୍କ ମେଡିକାଲ ରିପୋର୍ଟରେ ବଡ଼ ଖୁଲାସା: ଯୌନ ଶୋଷଣ ହୋଇଥିବା ନେଇ ପୁଷ୍ଟି, ବଢିଲା ସ୍ୱାମୀ ଅବିମୁକ୍ତେଶ୍ୱରାନନ୍ଦଙ୍କ ଅଡୁଆ

Suryakanta — Thu, 26 Feb 2026 13:28:46 +0530

ଉତ୍ତରପ୍ରଦେଶର ପ୍ରୟାଗରାଜରେ ଚର୍ଚ୍ଚାରେ ଥିବା ବହୁଚର୍ଚ୍ଚିତ ବଟୁକ ଯୌନ ଶୋଷଣ ମାମଲାରେ ଏକ ବଡ଼ ଖବର ସାମ୍ନାକୁ ଆସିଛି। ଜ୍ୟୋତିଷ ପୀଠର ଶଙ୍କରାଚାର୍ଯ୍ୟ ସ୍ୱାମୀ ଅବିମୁକ୍ତେଶ୍ୱରାନନ୍ଦ ସରସ୍ୱତୀଙ୍କ ବିରୋଧରେ ରୁଜୁ ହୋଇଥିବା ପୋକ୍ସୋ (POCSO) ମାମଲାରେ ପୀଡ଼ିତ ବଟୁକମାନଙ୍କର ମେଡିକାଲ ରିପୋର୍ଟ ଆସିଯାଇଛି। ମିଳିଥିବା ସୂଚନା ଅନୁଯାୟୀ, ଏହି ରିପୋର୍ଟରେ ବଟୁକମାନଙ୍କ ସହ ଯୌନ ଶୋଷଣ ହୋଇଥିବା ନେଇ ପୁଷ୍ଟି କରାଯାଇଛି, ଯାହା ସ୍ୱାମୀଙ୍କ ପାଇଁ ଅଡୁଆ ବଢାଇପାରେ।

ମେଡିକାଲ ରିପୋର୍ଟରେ ଚାଞ୍ଚଲ୍ୟକର ତଥ୍ୟ

ରିପୋର୍ଟ ଅନୁଯାୟୀ, ପୀଡ଼ିତ ନାବାଳକ ବଟୁକମାନଙ୍କର ଡାକ୍ତରୀ ପରୀକ୍ଷା ପରେ ଯୌନ ନିର୍ଯାତନାର ପ୍ରମାଣ ମିଳିଛି। ଏହି ରିପୋର୍ଟ ପୋଲିସ ହାତରେ ଲାଗିବା ପରେ ତଦନ୍ତ ପ୍ରକ୍ରିୟା ଆହୁରି ଜୋରଦାର ହୋଇଛି। ପୋଲିସ ବର୍ତ୍ତମାନ ଏହି ରିପୋର୍ଟକୁ ଆଧାର କରି ମାମଲାର ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରସ୍ତୁତ ହେଉଛି। କୁହାଯାଉଛି ଯେ, ରିପୋର୍ଟରେ ଥିବା ତଥ୍ୟ ଅତ୍ୟନ୍ତ ଗମ୍ଭୀର ଏବଂ ଏହା ଅଭିଯୁକ୍ତଙ୍କ ବିରୋଧରେ ଏକ ବଳିଷ୍ଠ ପ୍ରମାଣ ସାଜିପାରେ।

କଣ ରହିଛି ପୂରା ମାମଲା?

ପ୍ରୟାଗରାଜର ଏକ ସ୍ୱତନ୍ତ୍ର ପୋକ୍ସୋ ଅଦାଲତଙ୍କ ନିର୍ଦ୍ଦେଶ କ୍ରମେ ସ୍ୱାମୀ ଅବିମୁକ୍ତେଶ୍ୱରାନନ୍ଦ ଏବଂ ତାଙ୍କ ଶିଷ୍ୟ ମୁକୁନ୍ଦାନନ୍ଦ ବ୍ରହ୍ମଚାରୀଙ୍କ ବିରୋଧରେ ଏଫଆଇଆର (FIR) ରୁଜୁ କରାଯାଇଥିଲା। ଅଭିଯୋଗ ଅନୁଯାୟୀ, ମାଘ ମେଳା ସମୟରେ ‘ଗୁରୁ ସେବା’ ନାମରେ ନାବାଳକ ବଟୁକମାନଙ୍କୁ ଯୌନ ଶୋଷଣ କରାଯାଇଥିଲା। ପୀଡ଼ିତମାନଙ୍କ ବୟସ ୧୪ ରୁ ୧୭ ବର୍ଷ ମଧ୍ୟରେ ବୋଲି ଜଣାପଡିଛି। ଏହି ଘଟଣା ସାମ୍ନାକୁ ଆସିବା ପରେ ସାଧୁ ସମାଜ ଓ ରାଜନୈତିକ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା।

ଷଡଯନ୍ତ୍ର ବୋଲି କହିଲେ ସ୍ୱାମୀ ଅବିମୁକ୍ତେଶ୍ୱରାନନ୍ଦ

ଅନ୍ୟପକ୍ଷରେ, ଶଙ୍କରାଚାର୍ଯ୍ୟ ସ୍ୱାମୀ ଅବିମୁକ୍ତେଶ୍ୱରାନନ୍ଦ ଏହି ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ ଏହା ତାଙ୍କ ବିରୋଧରେ ଏକ ଷଡଯନ୍ତ୍ର ଏବଂ ତାଙ୍କର ଭାବମୂର୍ତ୍ତି କ୍ଷୁର୍ଣ୍ଣ କରିବାକୁ ଚେଷ୍ଟା କରାଯାଉଛି। ତେବେ ମେଡିକାଲ ରିପୋର୍ଟ ସାମ୍ନାକୁ ଆସିବା ପରେ ପୋଲିସର କାର୍ଯ୍ୟାନୁଷ୍ଠାନ ଉପରେ ସମସ୍ତଙ୍କ ନଜର ରହିଛି।

Medical Report - The Sakala