ସାଉଥ୍ ସିନେମା ଜଗତର ଲୋକପ୍ରିୟ ସଙ୍ଗୀତ ନିର୍ଦ୍ଦେଶକ ତଥା ଗାୟକ ଅନିରୁଦ୍ଧ ରବିଚନ୍ଦର ଏବଂ ଆଇପିଏଲ୍ ଟିମ୍ ସନରାଇଜର୍ସ ହାଇଦ୍ରାବାଦର ସିଇଓ ତଥା ମାଲିକାଣୀ କାବ୍ୟା ମାରନ୍ ଙ୍କ ବିବାହକୁ ନେଇ ବର୍ତ୍ତମାନ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି। ଏହି ଖବର ସାମ୍ନାକୁ ଆସିବା ପରେ ଉଭୟଙ୍କ ପ୍ରଶଂସକଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ତେବେ ଏହି ଖବରରେ କେତେ ସତ୍ୟତା ରହିଛି, ଆସନ୍ତୁ ଜାଣିବା।

ପରିବାରର ମିଳିଛି ସବୁଜ ସଙ୍କେତ!

ବିଭିନ୍ନ ରିପୋର୍ଟ ଏବଂ ସୋସିଆଲ ମିଡିଆ ଫ୍ୟାନ୍ ପେଜ୍ ମାଧ୍ୟମରେ ଦାବି କରାଯାଉଛି ଯେ, କାବ୍ୟା ମାରନ୍ ଏବଂ ଅନିରୁଦ୍ଧ ରବିଚନ୍ଦର ଖୁବ୍ ଶୀଘ୍ର ବିବାହ ବନ୍ଧନରେ ଆବଦ୍ଧ ହେବାକୁ ଯାଉଛନ୍ତି। କୁହାଯାଉଛି ଯେ, ଉଭୟଙ୍କ ପରିବାର ଏହି ସମ୍ପର୍କକୁ ସ୍ୱୀକୃତି ଦେଇଛନ୍ତି। ରିପୋର୍ଟ ଅନୁଯାୟୀ, ଚଳିତ ବର୍ଷ ଶେଷ ଆଡ଼କୁ ଏହି ଗ୍ରାଣ୍ଡ୍ ୱେଡିଂ ଅନୁଷ୍ଠିତ ହୋଇପାରେ। ଏହି ବିବାହ ଉତ୍ସବ ସ୍ପେନ୍ ରେ ଆୟୋଜିତ ହେବାର ସମ୍ଭାବନା ଥିବା ବେଳେ ଏହା ପରେ ଚେନ୍ନାଇ ଠାରେ ଏକ ଗ୍ରାଣ୍ଡ୍ ରିସେପ୍ସନ୍ ପାର୍ଟିର ଆୟୋଜନ କରାଯିବ ବୋଲି ଚର୍ଚ୍ଚା ହେଉଛି।

ସୋସିଆଲ ମିଡିଆରେ ଜୋର ଧରିଛି ଗୁଜବ

ଇଣ୍ଟରନେଟରେ ଏବେ ଏହି ଦୁଇ ସେଲିବ୍ରିଟିଙ୍କୁ ନେଇ ଅନେକ ପୋଷ୍ଟ ଭାଇରାଲ୍ ହେବାରେ ଲାଗିଛି। ବିଶେଷ କରି ରେଡ୍ଡିଟ୍ ଏବଂ ଏକ୍ସ (ପୂର୍ବର ଟ୍ୱିଟର) ରେ ପ୍ରଶଂସକମାନେ ନିଜର ମତ ରଖିଛନ୍ତି। କିଛି ଲୋକଙ୍କ କହିବା ଅନୁଯାୟୀ ଉଭୟେ ଗତ ଏକ ବର୍ଷରୁ ଅଧିକ ସମୟ ଧରି ରିଲେସନସିପ୍ ରେ ଅଛନ୍ତି ଏବଂ ବିଭିନ୍ନ ପାର୍ଟି ଓ ବିଦେଶ ଗସ୍ତରେ ଏକାଠି ନଜର ଆସିଛନ୍ତି।

କଣ ରହିଛି ପ୍ରକୃତ ସତ?

ଯଦିଓ ଫ୍ୟାନ୍ସଙ୍କ ମଧ୍ୟରେ ଏହି ବିବାହକୁ ନେଇ ପ୍ରବଳ ଉତ୍ସାହ ଦେଖିବାକୁ ମିଳିଛି, କିନ୍ତୁ ବର୍ତ୍ତମାନ ସୁଦ୍ଧା ଅନିରୁଦ୍ଧ ରବିଚନ୍ଦର କିମ୍ବା କାବ୍ୟା ମାରନ୍ ଙ୍କ ତରଫରୁ ଏନେଇ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ। ଉଲ୍ଲେଖଯୋଗ୍ୟ ଯେ, ଏହା ପ୍ରଥମ ଥର ନୁହେଁ ଯେବେ ଏହି ଯୋଡ଼ିଙ୍କୁ ନେଇ ଗୁଜବ ଉଠିଛି। ପୂର୍ବରୁ ମଧ୍ୟ ଏପରି ଖବର ଭାଇରାଲ୍ ହୋଇଥିଲା। ସେହି ସମୟରେ ଅନିରୁଦ୍ଧ ରବିଚନ୍ଦର ଏହି ସବୁ ଖବରକୁ ଖଣ୍ଡନ କରି ନିଜ ଏକ୍ସ (X) ଆକାଉଣ୍ଟରେ ଲେଖିଥିଲେ, ବିବାହ? ହାହା... ଶାନ୍ତ ରୁହନ୍ତୁ ଏବଂ ଦୟାକରି ଏଭଳି ଗୁଜବ ପ୍ରଚାର ବନ୍ଦ କରନ୍ତୁ। ତେଣୁ ଯେପର୍ଯ୍ୟନ୍ତ କୌଣସି ଅଫିସିଆଲ୍ ବୟାନ ସାମ୍ନାକୁ ନ ଆସିଛି, ସେ ପର୍ଯ୍ୟନ୍ତ ଏହାକୁ କେବଳ ଏକ ଗୁଜବ ବୋଲି ହିଁ ଧରିନିଆଯିବ।

ଭାରତୀୟ ସିନେମା ପାଇଁ ଆଜି ଏକ ଐତିହାସିକ ଦିନ। ଦୀର୍ଘ ୪୭ ବର୍ଷର ଅପେକ୍ଷା ପରେ ଦକ୍ଷିଣ ଭାରତୀୟ ସିନେମାର ଦୁଇ ମହାନାୟକ ରଜନୀକାନ୍ତ ଏବଂ କମଲ ହାସନ ପୁଣି ଥରେ ପରଦାରେ ଏକାଠି ନଜର ଆସିବେ। ଶନିବାର ଦିନ ଫିଲ୍ମ ନିର୍ମାତାମାନେ ଏହି ବଡ଼ ଘୋଷଣା କରିବା ସହ ଏକ ଦମଦାର ପ୍ରୋମୋ ଭିଡିଓ ଜାରି କରିଛନ୍ତି, ଯାହା ସୋସିଆଲ ମିଡିଆରେ ନିଆଁ ଲଗାଇ ଦେଇଛି।

ନେଲସନଙ୍କ ନିର୍ଦ୍ଦେଶନା ଓ ଅନିରୁଦ୍ଧଙ୍କ ସଙ୍ଗୀତ

ଏହି ମେଗା ବଜେଟ୍ ଫିଲ୍ମର ନିର୍ଦ୍ଦେଶନା ଦାୟିତ୍ୱ ଲୋକପ୍ରିୟ ନିର୍ଦ୍ଦେଶକ ନେଲସନ ଦିଲୀପକୁମାର ଗ୍ରହଣ କରିଛନ୍ତି। ଏହା ପୂର୍ବରୁ ନେଲସନ ରଜନୀକାନ୍ତଙ୍କ ସହ 'ଜେଲର' ଭଳି ବ୍ଲକବଷ୍ଟର ଫିଲ୍ମ ଭେଟି ଦେଇଥିଲେ। ଏହି ଫିଲ୍ମର ସଙ୍ଗୀତ ପରିଚାଳନା କରିବେ 'ରକ୍ ଷ୍ଟାର' ଅନିରୁଦ୍ଧ ରବିଚନ୍ଦର। ରେଡ୍ ଜଏଣ୍ଟ ମୁଭିଜ୍ (Red Giant Movies) ବ୍ୟାନରରେ ନିର୍ମିତ ହେବାକୁ ଥିବା ଏହି ଫିଲ୍ମର ନାମ ବର୍ତ୍ତମାନ ପାଇଁ 'KHxRK' ରଖାଯାଇଛି।

ମଜାଦାର ପ୍ରୋମୋ ଭିଡିଓ ରିଲିଜ୍

ରିଲିଜ୍ ହୋଇଥିବା ପ୍ରୋମୋ ଭିଡିଓରେ ନିର୍ଦ୍ଦେଶକ ନେଲସନ ଏବଂ ସଙ୍ଗୀତ ନିର୍ଦ୍ଦେଶକ ଅନିରୁଦ୍ଧଙ୍କୁ ଏକ ହୋଟେଲ କରିଡରରେ ଦେଖିବାକୁ ମିଳିଛି। କାହା ରୁମକୁ ପ୍ରଥମେ ଯିବେ ବୋଲି ନେଲସନ ଦ୍ୱନ୍ଦ୍ୱରେ ଥିବାବେଳେ, ଶେଷରେ ଦୁଇ ମହାନାୟକ ରଜନୀ ଓ କମଲ ରେଟ୍ରୋ ଲୁକ୍‌ରେ ଏକାଠି ବାହାରକୁ ଆସୁଛନ୍ତି। ଦୁହେଁ କଳା ଚଷମା ଓ ଷ୍ଟାଇଲିସ୍ ଜ୍ୟାକେଟ୍ ପିନ୍ଧି ନିଜର ପୁରୁଣା ଅନ୍ଦାଜ ଦେଖାଇଛନ୍ତି। ଭିଡିଓ ଶେଷରେ ଦୁହେଁ ନିର୍ଦ୍ଦେଶକଙ୍କୁ ପଚାରୁଛନ୍ତି, "ଆମ ଦୁହିଁଙ୍କ ଭିତରୁ ହିରୋ କିଏ?" ଯାହା ଦର୍ଶକଙ୍କୁ ବେଶ୍ ପସନ୍ଦ ଆସିଛି।

୪ ଦଶନ୍ଧି ପରେ ମହାମିଳନ

ସୂଚନାଯୋଗ୍ୟ ଯେ, ରଜନୀକାନ୍ତ ଓ କମଲ ହାସନ ଶେଷଥର ପାଇଁ ୧୯୭୯ ମସିହାରେ ରିଲିଜ୍ ହୋଇଥିବା ଫିଲ୍ମ 'ଆଲାଉଦ୍ଦିନମ୍ ଅଲଭୁଥା ଭିଲାକ୍କୁମ୍' (Allauddinum Albhutha Vilakkum) ରେ ଏକାଠି ଅଭିନୟ କରିଥିଲେ। ୧୯୮୫ରେ ହିନ୍ଦୀ ଫିଲ୍ମ 'ଗିରଫ୍ତାର'ରେ ଉଭୟ ଥିଲେ ମଧ୍ୟ ସେମାନଙ୍କର ଏକାଠି କୌଣସି ଦୃଶ୍ୟ ନଥିଲା। ତେବେ ଦୀର୍ଘ ଦଶନ୍ଧି ପରେ ଏହି ଦୁଇ କିମ୍ବଦନ୍ତୀ କଳାକାରଙ୍କୁ ଗୋଟିଏ ଫ୍ରେମରେ ଦେଖିବା ପ୍ରଶଂସକଙ୍କ ପାଇଁ ସ୍ୱପ୍ନ ସତ ହେବା ପରି।