ତାମିଲନାଡୁର ମୁଖ୍ୟମନ୍ତ୍ରୀ ତଥା ସୁପରଷ୍ଟାର ବିଜୟ ଙ୍କ ଅଭିନୀତ ଶେଷ ଚଳଚ୍ଚିତ୍ର 'ଜନ ନାୟଗନ' କୁ ନେଇ ଏବେ ବଡ଼ ଖବର ସାମ୍ନାକୁ ଆସିଛି। ସେନ୍ସର ବୋର୍ଡ ବା ସିବିଏଫସି (CBFC) ର କଟକଣା ଏବଂ ଆଇନଗତ ସମସ୍ୟା କାରଣରୁ ଫିଲ୍ମର ରିଲିଜ୍ ଲଗାତାର ବିଳମ୍ବ ହେଉଛି। ଏହି ପରିସ୍ଥିତିକୁ ଦୃଷ୍ଟିରେ ରଖି ବିତରକମାନଙ୍କ ଉପରେ ପଡ଼ୁଥିବା ଆର୍ଥିକ ଚାପକୁ କମାଇବା ପାଇଁ ଏକ ବଡ଼ ପଦକ୍ଷେପ ନେଇଛନ୍ତି ବିଜୟ। ସେ ଫିଲ୍ମର ପ୍ରଯୋଜନା ସଂସ୍ଥା କେଭିଏନ୍ ପ୍ରଡକ୍ସନ୍ସ କୁ ନିର୍ଦ୍ଦେଶ ଦେଇଛନ୍ତି ଯେ, ସେମାନେ ବିତରକମାନଙ୍କଠାରୁ ନେଇଥିବା ସମସ୍ତ ଅଗ୍ରୀମ ରାଶି ଅବିଳମ୍ବେ ଫେରାଇ ଦିଅନ୍ତୁ।

କାହିଁକି ବିଳମ୍ବ ହେଉଛି ରିଲିଜ୍?

ଦର୍ଶକମାନେ ଦୀର୍ଘ ଦିନ ହେବ ଏହି ଫିଲ୍ମକୁ ଅପେକ୍ଷା କରିଛନ୍ତି। ପ୍ରାରମ୍ଭିକ ଯୋଜନା ଅନୁଯାୟୀ, ନିର୍ଦ୍ଦେଶକ ଏଚ୍. ବିନୋଦ ଙ୍କ ଏହି ଫିଲ୍ମଟି ଚଳିତ ବର୍ଷ ଜାନୁଆରୀ ୯ ତାରିଖରେ ପୋଙ୍ଗଲ୍ ଉପଲକ୍ଷେ ସିନେମାଘରକୁ ଆସିବାର ଥିଲା। କିନ୍ତୁ ବିଗତ ୬ ମାସ ହେବ ଏହି ଫିଲ୍ମଟି କେନ୍ଦ୍ରୀୟ ଚଳଚ୍ଚିତ୍ର ପ୍ରମାଣନ ବୋର୍ଡ ପାଖରେ ଅଟକି ରହିଛି। ପ୍ରଥମେ ଫିଲ୍ମକୁ ଏକ UA 16+ ସାର୍ଟିଫିକେଟ୍ ମିଳିବା ନେଇ ସୁପାରିଶ କରାଯାଇଥିଲା, କିନ୍ତୁ ପରବର୍ତ୍ତୀ ସମୟରେ ଏହାର ପ୍ରମାଣପତ୍ର ପ୍ରକ୍ରିୟା ଆଇନଗତ ବିବାଦରେ ଫସିଯାଇଥିଲା। ତେଣୁ ଫିଲ୍ମର ରିଲିଜ୍ ଉପରେ ଏବେବି ଅନିଶ୍ଚିତତା ଲାଗିରହିଛି।

ଫିଲ୍ମର ଭବିଷ୍ୟତ କ'ଣ ହେବ?

ଏହି ରିଫଣ୍ଡ ନିଷ୍ପତ୍ତି ପରେ ଫିଲ୍ମର ଥିଏଟ୍ରିକାଲ୍ ଏଗ୍ରିମେଣ୍ଟ ବା ସମସ୍ତ ବ୍ୟବସାୟିକ ଚୁକ୍ତିଗୁଡ଼ିକ ବାତିଲ୍ ହୋଇଯିବ। ଖବର ଅନୁଯାୟୀ, କେଭିଏନ୍ ପ୍ରଡକ୍ସନ୍ସ ଏବେ ଫିଲ୍ମର ରିଲିଜ୍ ଦାୟିତ୍ୱ ସମ୍ପୂର୍ଣ୍ଣ ରୂପେ ନିଜ ହାତକୁ ନେବାକୁ ଯାଉଛି। ଥରେ ସେନ୍ସର ବୋର୍ଡ ଏବଂ କୋର୍ଟ କଚେରୀର ମାମଲା ସମାଧାନ ହୋଇଗଲେ, ପ୍ରଯୋଜକମାନେ ସ୍ୱାଧୀନ ଭାବରେ ଏହି ଫିଲ୍ମକୁ ମୁକ୍ତିଲାଭ କରାଇବେ। ସକ୍ରିୟ ରାଜନୀତିରେ ଯୋଗ ଦେବା ପୂର୍ବରୁ ଏହା ହେଉଛି ବିଜୟ ଙ୍କ ଶେଷ ଫିଲ୍ମ, ତେଣୁ ଏହି ବିବାଦ ସତ୍ତ୍ୱେ ଦର୍ଶକ ତଥା ପ୍ରଶଂସକଙ୍କ ମଧ୍ୟରେ ଫିଲ୍ମ ପ୍ରତି ଥିବା ଉତ୍ସାହ କମିନାହିଁ।

କନ୍ନଡ଼ ସୁପରଷ୍ଟାର ୟଶ (Yash)ଙ୍କ ଆଗାମୀ ବହୁପ୍ରତୀକ୍ଷିତ ଫିଲ୍ମ 'ଟକ୍ସିକ୍: ଏ ଫେୟାରୀ ଟେଲ୍ ଫର୍ ଗ୍ରୋନ୍ ଅପ୍ସ' (Toxic: A Fairy Tale for Grown-Ups) ର ରିଲିଜ୍ ଡେଟ୍‌କୁ ପୁଣିଥରେ ଘୁଞ୍ଚାଇ ଦିଆଯାଇଛି। ପୂର୍ବ ନିର୍ଦ୍ଧାରିତ ତାରିଖ ଅନୁଯାୟୀ ଏହି ଫିଲ୍ମଟି ଆସନ୍ତା ଜୁନ୍ ୪ ତାରିଖରେ ସିନେମାଘରକୁ ଆସିବାର ଥିଲା। କିନ୍ତୁ ବୁଧବାର ଦିନ ଫିଲ୍ମର ନିର୍ମାତା ଏବଂ ଅଭିନେତା ୟଶ ଏକ ବିବୃତ୍ତି ଜାରି କରି ଫିଲ୍ମର ରିଲିଜକୁ ସ୍ଥଗିତ ରଖିଛନ୍ତି। ଫିଲ୍ମର ସୁଟିଂ ଶେଷ ହୋଇସାରିଥିଲେ ମଧ୍ୟ ବିଶ୍ୱସ୍ତରରେ ଏହାକୁ ବ୍ୟାପକ ଭାବରେ ରିଲିଜ୍ କରିବା ଲକ୍ଷ୍ୟରେ ଏହି ନିଷ୍ପତ୍ତି ନିଆଯାଇଛି ବୋଲି ୟଶ ସ୍ପଷ୍ଟ କରିଛନ୍ତି।

ସିନେମାକନ୍‌ରେ ମିଳିଲା ଜବରଦସ୍ତ ରେସ୍ପନ୍ସ

ଗତ କିଛି ଦିନ ତଳେ ଲାସ୍ ଭେଗାସ୍ ଠାରେ ଆୟୋଜିତ ହୋଇଥିବା ସିନେମାକନ୍ ୨୦୨୬ (CinemaCon 2026) ରେ 'ଟକ୍ସିକ୍'ର ଏକ ୯-ମିନିଟ୍‌ର ପ୍ରିଭ୍ୟୁ ପ୍ରଦର୍ଶିତ ହୋଇଥିଲା। ଏହି ଇଭେଣ୍ଟରେ ବିଶ୍ୱର ବିଭିନ୍ନ ପ୍ରାନ୍ତରୁ ଆସିଥିବା ଡିଷ୍ଟ୍ରିବ୍ୟୁଟର୍ସ ଏବଂ ସିନେମା ବିଶେଷଜ୍ଞଙ୍କ ପକ୍ଷରୁ ଫିଲ୍ମକୁ ବିପୁଳ ପ୍ରଶଂସା ମିଳିଥିଲା। ୟଶ ନିଜ ବୟାନରେ କହିଛନ୍ତି ଯେ, "ସିନେମାକନ୍‌ରେ ମିଳିଥିବା ରେସ୍ପନ୍ସ ଆମକୁ ବିଶ୍ୱାସ ଦେଇଛି ଯେ ଏହି ଫିଲ୍ମ ସାରା ବିଶ୍ୱରେ ଏକ ବଡ଼ ଦର୍ଶକ ବର୍ଗଙ୍କ ପାଖରେ ପହଞ୍ଚିବା ଦରକାର। ଫିଲ୍ମର କାମ ସମ୍ପୂର୍ଣ୍ଣ ହୋଇସାରିଛି। ବର୍ତ୍ତମାନ ଆମେ ଗ୍ଲୋବାଲ୍ ଡିଷ୍ଟ୍ରିବ୍ୟୁସନ୍ ଏବଂ ପାର୍ଟନରସିପ୍ ଉପରେ କାମ କରୁଛୁ। ଏହି କାରଣରୁ ଆମେ ଜୁନ୍ ୪ ରିଲିଜ୍ ଡେଟ୍‌କୁ ବଦଳାଇ ଏକ ନୂଆ ଗ୍ଲୋବାଲ୍ ତାରିଖରେ ଫିଲ୍ମକୁ ରିଲିଜ୍ କରିବାକୁ ଯାଉଛୁ।"

ପୂର୍ବରୁ ମଧ୍ୟ ଘୁଞ୍ଚିଥିଲା ରିଲିଜ୍ ଡେଟ୍

ସୂଚନାଯୋଗ୍ୟ ଯେ, ଏହା ପୂର୍ବରୁ 'ଟକ୍ସିକ୍' ପ୍ରଥମେ ୨୦୨୬ ମସିହା ମାର୍ଚ୍ଚ ୧୯ ତାରିଖରେ ରିଲିଜ୍ ହେବାର ଥିଲା। କିନ୍ତୁ ମଧ୍ୟପ୍ରାଚ୍ୟରେ ଦେଖାଦେଇଥିବା ଭୂ-ରାଜନୈତିକ ଅସ୍ଥିରତା ଏବଂ ଯୁଦ୍ଧ ପରିସ୍ଥିତି କାରଣରୁ ମେକର୍ସ ଏହାକୁ ଜୁନ୍ ୪କୁ ଘୁଞ୍ଚାଇ ଦେଇଥିଲେ। ବର୍ତ୍ତମାନ ପୁଣିଥରେ ଏହାର ରିଲିଜ୍ ତାରିଖ ଘୁଞ୍ଚିବା ଫ୍ୟାନ୍ସଙ୍କ ପାଇଁ ନିରାଶାଜନକ ହୋଇପାରେ, କିନ୍ତୁ ଏକ ବଡ଼ ସିନେମାଟିକ୍ ଅଭିଜ୍ଞତା ଦେବା ପାଇଁ ଏହି ସମୟ ଆବଶ୍ୟକ ବୋଲି ନିର୍ମାତା ଦାବି କରିଛନ୍ତି।

ଏହି ଆକ୍ସନ୍ ଡ୍ରାମା ଫିଲ୍ମର ନିର୍ଦ୍ଦେଶନା ଗୀତୁ ମୋହନଦାସ ଦେଇଥିବା ବେଳେ ଏଥିରେ ୟଶଙ୍କ ସମେତ ନୟନତାରା, କିଆରା ଆଡଭାନୀ, ହୁମା କ୍ୟୁରେସି, ରୁକ୍ମିଣୀ ବସନ୍ତ ଏବଂ ତାରା ସୁତାରିଆ ପ୍ରମୁଖ ଭୂମିକାରେ ନଜର ଆସିବେ। ଏହାକୁ କେଭିଏନ୍ ପ୍ରଡକ୍ସନ୍ସ (KVN Productions) ଏବଂ ମନଷ୍ଟର ମାଇଣ୍ଡ କ୍ରିଏସନ୍ସ ମିଳିତ ଭାବେ ପ୍ରଯୋଜନା କରୁଛନ୍ତି। ଖୁବ୍ ଶୀଘ୍ର ଫିଲ୍ମର ନୂଆ ରିଲିଜ୍ ତାରିଖ ଘୋଷଣା କରାଯିବ।

ମୁମ୍ବାଇ: କେଜିଏଫ୍ ପରେ ପୁଣି ଥରେ ବଡ଼ ପରଦାରେ ଧମାକା କରିବାକୁ ପ୍ରସ୍ତୁତ ରକିଂ ଷ୍ଟାର ୟଶ। ଦୀର୍ଘ ଦିନର ଅପେକ୍ଷା ପରେ ତାଙ୍କର ଆଗାମୀ ଆକ୍ସନ୍ ଥ୍ରୀଲର ଚଳଚ୍ଚିତ୍ର ‘ଟକ୍ସିକ୍: ଏ ଫେୟାରୀଟେଲ୍ ଫର୍ ଗ୍ରୋନ୍-ଅପ୍ସ’ର ଅଫିସିଆଲ୍ ଟିଜର ଆଜି ମୁକ୍ତିଲାଭ କରିଛି। ଆସନ୍ତା ମାର୍ଚ୍ଚ ୧୯ ତାରିଖରେ ଏହି ଚଳଚ୍ଚିତ୍ରଟି ବିଶ୍ୱବ୍ୟାପୀ ମୁକ୍ତିଲାଭ କରିବାକୁ ଥିବାବେଳେ, ଏହାର ଟିଜର ଦର୍ଶକଙ୍କ ମଧ୍ୟରେ ଉତ୍କଣ୍ଠା ବଢାଇ ଦେଇଛି।

୨ ମିନିଟର ଏହି ଟିଜରରେ ୟଶଙ୍କୁ ଏକ ଭୟଙ୍କର ଏବଂ ଷ୍ଟାଇଲିସ୍ ଅବତାରରେ ଦେଖିବାକୁ ମିଳିଛି। ଏକ ପାର୍ଟିର ଦୃଶ୍ୟରୁ ଆରମ୍ଭ ହୋଇଥିବା ଏହି ଟିଜରରେ ଭରପୂର ଆକ୍ସନ୍ ରହିଛି। ୟଶଙ୍କ ଚରିତ୍ର ‘ରାୟା’କୁ ବେଶ୍ ଶକ୍ତିଶାଳୀ ଭାବେ ଉପସ୍ଥାପନ କରାଯାଇଛି। ଟିଜରରେ ୟଶ କହୁଛନ୍ତି, “ଖେଳ ସେତେବେଳେ ସରିବ, ଯେତେବେଳେ ମୁଁ କହିବି... ସେପର୍ଯ୍ୟନ୍ତ କିଛି ସମ୍ମାନ ଶିଖ।” ଟିଜରର ଶେଷ ଭାଗରେ ୟଶ ହାତରେ ଏକ ଚେନ୍ କରତ (chainsaw) ଧରି ଶତ୍ରୁ ସଂହାର କରୁଥିବା ଦୃଶ୍ୟ ସମସ୍ତଙ୍କୁ ଚମକାଇ ଦେଇଛି। ନିର୍ମାତାମାନେ ଏହି ଟିଜରକୁ କନ୍ନଡ, ହିନ୍ଦୀ, ତେଲୁଗୁ, ତାମିଲ ଏବଂ ମାଲାୟାଲମ୍ ଭାଷାରେ ରିଲିଜ୍ କରିଛନ୍ତି।

ଏହି ଚଳଚ୍ଚିତ୍ରରେ କେବଳ ୟଶ ନୁହନ୍ତି, ବରଂ ଏକାଧିକ ବଡ଼ ତାରକାଙ୍କୁ ଦେଖିବାକୁ ମିଳିବ। ଫିଲ୍ମରେ ନୟନତାରା ‘ଗଙ୍ଗା’ ଭୂମିକାରେ, କିଆରା ଆଡଭାନୀ ‘ନାଦିଆ’ ଭୂମିକାରେ, ହୁମା କୁରେଶୀ ‘ଏଲିଜାବେଥ୍’ ଭାବରେ ଏବଂ ତାରା ସୁତାରିଆ ‘ରେବେକା’ ଭୂମିକାରେ ନଜର ଆସିବେ। ପ୍ରଖ୍ୟାତ ନିର୍ମାତା ଗୀତୁ ମୋହନଦାସ ଏହାର ନିର୍ଦ୍ଦେଶନା ଦେଇଥିବାବେଳେ, ଏହା କନ୍ନଡ ଏବଂ ଇଂରାଜୀ ଭାଷାରେ ଏକକାଳୀନ ସୁଟିଂ କରାଯାଇଛି।

‘ଟକ୍ସିକ୍’ର କାହାଣୀ ୧୯୪୦ ରୁ ୧୯୭୦ ଦଶକ ମଧ୍ୟରେ ଗୋଆରେ ସେଟ୍ ହୋଇଥିବା କୁହାଯାଉଛି। ଏହା ଏକ ଗ୍ୟାଙ୍ଗଷ୍ଟର ଡ୍ରାମା, ଯେଉଁଥିରେ ଅପରାଧ ଜଗତର କଳା ସାମ୍ରାଜ୍ୟ, ଭୟ ଏବଂ ବିଶ୍ୱାସଘାତକତାର କାହାଣୀ ଦେଖିବାକୁ ମିଳିବ। ଆସନ୍ତା ବର୍ଷ ମାର୍ଚ୍ଚ ୧୯ରେ ଇଦ୍, ଉଗାଡି ଏବଂ ଗୁଡି ପାଡୱା ଅବସରରେ ଏହା ରିଲିଜ୍ ହେବ। ତେବେ ବକ୍ସ ଅଫିସରେ ଏହା ରଣବୀର ସିଂହଙ୍କ ଅଭିନୀତ ଚଳଚ୍ଚିତ୍ର ‘ଧୁରନ୍ଧର: ଦ ରିଭେଞ୍ଜ’ ସହ ମୁହାଁମୁହିଁ ହେବ ବୋଲି ଜଣାପଡିଛି।