Andhra Pradesh News - The Sakala

ହୋମୱାର୍କ କରିନଥିଲା UKG ଛାତ୍ର; ଶିକ୍ଷୟିତ୍ରୀଙ୍କ ଚାପୁଡ଼ାରେ ଚାଲିଗଲା ଜୀବନ !

Madhusudan Das — Fri, 21 Aug 2026 13:47:17 +0530

ବିଶାଖାପାଟଣା: ଆନ୍ଧ୍ରପ୍ରଦେଶର ବିଶାଖାପାଟଣା ଠାରେ ଏକ ହୃଦୟ ବିଦାରକ ତଥା ଅମାନବୀୟ ଘଟଣା ସାମ୍ନାକୁ ଆସିଛି। ସ୍କୁଲରେ ହୋମୱାର୍କ କରିନଥିବାରୁ ଜଣେ ଶିକ୍ଷୟିତ୍ରୀଙ୍କ ନିର୍ଦ୍ଦୟ ମାଡ଼ରେ ଜଣେ ୬ ବର୍ଷର କୁନି ଛାତ୍ରର ମୃତ୍ୟୁ ଘଟିଥିବା ଅଭିଯୋଗ ହୋଇଛି । ମୃତ ଛାତ୍ର ଜଣକ ୱାନ୍ ଟାଉନ୍ ଅଞ୍ଚଳରେ ଥିବା ଅଞ୍ଚଳର ଏକ ଘରୋଇ ସ୍କୁଲର ୟୁକେଜି ଛାତ୍ର ପ୍ରଣୟ ତେଜା ବୋଲି ଜଣାପଡିଛି। ଗୁରୁବାର ଦିନ ଘଟିଥିବା ଏହି ଘଟଣା ସମଗ୍ର ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।

ଏହି ଅଭାବନୀୟ ଘଟଣାର ସିସିଟିଭି ଫୁଟେଜ୍ ସାମ୍ନାକୁ ଆସିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି। ଫୁଟେଜ୍‌ରେ ଦେଖିବାକୁ ମିଳିଛି ଯେ, ଶିକ୍ଷୟିତ୍ରୀ ଜଣକ ଅନ୍ୟ ଛାତ୍ରଛାତ୍ରୀଙ୍କ ସାମ୍ନାରେ ପ୍ରଣୟ ତେଜାଙ୍କ ଡ୍ରେସ୍ ଖୋଲିବାକୁ ଚେଷ୍ଟା କରିବା ସହ ତାଙ୍କୁ ଜୋରରେ ଚାପୁଡ଼ା ମାରିଥିଲେ। ଏତେ ଛୋଟ ପିଲାଟି ଏହି କଠୋର ଦଣ୍ଡ ସହି ନପାରି ସେଠାରେ ହିଁ ଅଚେତ ହୋଇ ପଡ଼ିଯାଇଥିଲେ। ତାଙ୍କୁ ତୁରନ୍ତ ଉଦ୍ଧାର କରି କିଙ୍ଗ୍ ଜର୍ଜ ହସ୍ପିଟାଲ୍ ନିଆଯାଇଥିଲା, କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ ଘଟଣାର ମାମଲା ରୁଜୁ କରିବା ସହ ସିସିଟିଭି ଫୁଟେଜ୍ ଆଧାରରେ ଅଧିକ ତଦନ୍ତ ଆରମ୍ଭ କରିଛି। ଅଭିଯୁକ୍ତ ଶିକ୍ଷୟିତ୍ରୀଙ୍କୁ ଗିରଫ କରିବା ସହ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମୃତ ଛାତ୍ରଙ୍କ ପରିବାର ଲୋକେ ଏବଂ ସାଧାରଣ ଜନତା ଦାବି କରିଛନ୍ତି।

ନୂଆ ଦାନ ନୀତି ଲାଗୁ ହେବା ପୂର୍ବରୁ ତିରୁପତି ବାଲାଜୀ ମନ୍ଦିରକୁ ଗୋଟିଏ ଦିନରେ ମିଳିଲା ରେକର୍ଡ ୯୭ କୋଟି ଟଙ୍କାର ଦାନ

Suryakanta — Thu, 16 Jul 2026 17:28:28 +0530

ବିଶ୍ୱର ଅନ୍ୟତମ ଧନୀ ତଥା ପ୍ରସିଦ୍ଧ ଧାର୍ମିକ ପୀଠ ତିରୁପତି ବାଲାଜୀ ମନ୍ଦିରରେ ଗୋଟିଏ ଦିନରେ ସର୍ବାଧିକ ଦାନର ନୂଆ ରେକର୍ଡ ସୃଷ୍ଟି ହୋଇଛି। ତିରୁମାଲା ତିରୁପତି ଦେବସ୍ଥାନମ୍ (TTD) ର ନୂଆ ଡୋନର ପଲିସି (ଦାନ ନୀତି) ଲାଗୁ ହେବା ପୂର୍ବରୁ ଭକ୍ତଙ୍କ ପ୍ରବଳ ଭିଡ଼ ଦେଖିବାକୁ ମିଳିଥିଲା। ଫଳରେ ମାତ୍ର ୨୪ ଘଣ୍ଟା ମଧ୍ୟରେ ମନ୍ଦିରକୁ ୯୬.୯୮ କୋଟି ଟଙ୍କାର ବିପୁଳ ଦାନ ମିଳିଛି।

ନୂଆ ଡୋନର ପଲିସି ପାଇଁ ଲାଗିଲା ଭିଡ଼

ଜୁଲାଇ ୧୫ ତାରିଖ ମଧ୍ୟରାତ୍ରିରୁ ତିରୁପତି ମନ୍ଦିରରେ ନୂଆ ଦାନ ନୀତି ଲାଗୁ କରାଯାଇଛି। ପୁରୁଣା ନିୟମ ଅନୁଯାୟୀ, ମନ୍ଦିରକୁ ଏକ ବଡ଼ ଅର୍ଥ ଦାନ କରୁଥିବା ଭକ୍ତମାନଙ୍କୁ ଆଜୀବନ ଭିଆଇପି (VIP) ସୁବିଧା ଯଥା- ସ୍ୱତନ୍ତ୍ର ଦର୍ଶନ ଏବଂ ପୂଜାର୍ଚ୍ଚନାରେ ସାମିଲ ହେବାର ସୁଯୋଗ ମିଳୁଥିଲା। କିନ୍ତୁ ସାଧାରଣ ଭକ୍ତଙ୍କ ସୁବିଧାକୁ ଦୃଷ୍ଟିରେ ରଖି ଟିଟିଡି ପକ୍ଷରୁ ଏହି ନିୟମରେ ପରିବର୍ତ୍ତନ କରାଯାଇଛି। ନୂଆ ନିୟମ ଲାଗୁ ହେବା ପରେ ଆଜୀବନ ସୁବିଧା ବନ୍ଦ ହୋଇଯିବା ଆଶଙ୍କାରେ ଭକ୍ତମାନେ ମଧ୍ୟରାତ୍ରି ପୂର୍ବରୁ ଦାନ କରିବାକୁ ପ୍ରତିଯୋଗିତା କରିଥିଲେ, ଯାହା ଫଳରେ ଏହି ଅଭୂତପୂର୍ବ ରେକର୍ଡ ସୃଷ୍ଟି ହୋଇଛି।

କ'ଣ ବଦଳିଲା ନୂଆ ନିୟମରେ?

ଟିଟିଡି (TTD) ଅଧ୍ୟକ୍ଷ ବି.ଆର. ନାଇଡୁଙ୍କ ସୂଚନା ଅନୁଯାୟୀ, ନୂଆ ନିୟମ ଲାଗୁ ହେବା ପରେ ଏବେ ନୂଆ ଦାନଦାତାଙ୍କୁ ଆଉ ଆଜୀବନ ଭିଆଇପି ସୁବିଧା ମିଳିବ ନାହିଁ। ବର୍ତ୍ତମାନ ବ୍ୟକ୍ତିଗତ ଦାନଦାତାମାନଙ୍କୁ ୨୦ ବର୍ଷ ପାଇଁ ଏବଂ ବିଭିନ୍ନ ଅନୁଷ୍ଠାନ ବା ଟ୍ରଷ୍ଟଗୁଡ଼ିକୁ ମାତ୍ର ୧୫ ବର୍ଷ ପାଇଁ ସ୍ୱତନ୍ତ୍ର ସୁବିଧା ପ୍ରଦାନ କରାଯିବ। ତେବେ ଜୁଲାଇ ୧୫ ତାରିଖ ପୂର୍ବରୁ ଦାନ କରିଥିବା ପୁରୁଣା ଦାନଦାତାମାନେ ପୂର୍ବଭଳି ଆଜୀବନ ଏହି ସ୍ୱତନ୍ତ୍ର ସୁବିଧା ପାଇପାରିବେ।

୨୪ ଘଣ୍ଟା ମଧ୍ୟରେ ୨୪୬୦ ଭକ୍ତଙ୍କ ଦାନ

ରିପୋର୍ଟ ଅନୁଯାୟୀ, ନୂଆ ନିୟମ ଲାଗୁ ହେବା ପୂର୍ବରୁ ସମୁଦାୟ ୨,୪୬୦ ଜଣ ଭକ୍ତ ମନ୍ଦିରକୁ ଦାନ କରିଛନ୍ତି। ସେମାନଙ୍କ ମଧ୍ୟରୁ ୨,୩୫୪ ଜଣ ଅନଲାଇନ୍ ମାଧ୍ୟମରେ ଏବଂ ୧୦୬ ଜଣ ଅଫଲାଇନ୍‌ରେ ଅର୍ଥ ଦାନ କରିଛନ୍ତି। ତଥ୍ୟ ଅନୁସାରେ, ୧,୨୧୨ ଜଣ ଭକ୍ତ ୧ ଲକ୍ଷରୁ ୧୦ ଲକ୍ଷ ଟଙ୍କା ମଧ୍ୟରେ ଏବଂ ୧,୨୪୬ ଜଣ ୧୦ ଲକ୍ଷରୁ ୨୫ ଲକ୍ଷ ଟଙ୍କା ପର୍ଯ୍ୟନ୍ତ ଦାନ କରିଛନ୍ତି। ଏହା ସହିତ ଦୁଇ ଜଣ ଭକ୍ତ ପ୍ରତ୍ୟେକ ୧ କୋଟି ଟଙ୍କାରୁ ଅଧିକ ରାଶି ଦାନ କରିଥିବା ଜଣାପଡ଼ିଛି। ପ୍ରକାଶ ଥାଉକି, ତିରୁପତି ମନ୍ଦିରର ମୋଟ ସମ୍ପତ୍ତିର ମୂଲ୍ୟ ପ୍ରାୟ ୩.୩୮ ଲକ୍ଷ କୋଟି ଟଙ୍କା ଅଟେ ଯାହାକି ବିଶ୍ୱର ଅନେକ ଛୋଟ ଦେଶର ଜିଡିପି ଠାରୁ ମଧ୍ୟ ଅଧିକ।

ତିରୁପତି ଲଡୁ ମହାପ୍ରସାଦର ଶୁଦ୍ଧତା ପାଇଁ ଟିଟିଡିର ଐତିହାସିକ ନିଷ୍ପତ୍ତି; ବଦଳିଲା ଘିଅ କିଣା ନିୟମ, ଲାଗିବ ଜିପିଏସ୍ ଲକ୍

Suryakanta — Wed, 18 Feb 2026 18:58:03 +0530

ତିରୁମାଲା ତିରୁପତି ଦେବସ୍ଥାନମ୍ (ଟିଟିଡି) ବିଶ୍ୱପ୍ରସିଦ୍ଧ ତିରୁପତି ଲଡୁ ପ୍ରସାଦର ପବିତ୍ରତା ଏବଂ ଗୁଣବତ୍ତା ବଜାୟ ରଖିବା ପାଇଁ ଏକ ବଡ଼ ପଦକ୍ଷେପ ଗ୍ରହଣ କରିଛି। ୨୦୨୪ ମସିହାରେ ଘିଅରେ ଅପମିଶ୍ରଣ ଜନିତ ବିବାଦ ପରେ, ଭକ୍ତମାନଙ୍କ ବିଶ୍ୱାସ ଜିତିବା ଲକ୍ଷ୍ୟରେ ଟିଟିଡି ଅଧ୍ୟକ୍ଷ ବି.ଆର. ନାଇଡୁ ବୁଧବାର ଦିନ ଘିଅ ସଂଗ୍ରହ ପ୍ରକ୍ରିୟାରେ ବ୍ୟାପକ ସଂସ୍କାର ଘୋଷଣା କରିଛନ୍ତି। ନୂତନ ନିୟମ ଅନୁଯାୟୀ, ବର୍ତ୍ତମାନ ଘିଅର ଶୁଦ୍ଧତା ଯାଞ୍ଚ ପାଇଁ ଅତ୍ୟାଧୁନିକ ଜ୍ଞାନକୌଶଳ ବ୍ୟବହାର କରାଯିବ।

ନୂତନ ଗାଇଡଲାଇନ୍ ଏବଂ ସ୍ୱଚ୍ଛତା ନିୟମ

ଟିଟିଡି ପକ୍ଷରୁ ଜାରି କରାଯାଇଥିବା ନୂତନ ନିୟମାବଳୀ ଅନୁଯାୟୀ, ଘିଅ ସଂଗ୍ରହ ପ୍ରକ୍ରିୟାରେ ସ୍ୱଚ୍ଛତା ଆଣିବା ପାଇଁ ଅନେକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରାଯାଇଛି:

* ଦୂରତା ହ୍ରାସ: ଘିଅ ସଂଗ୍ରହ ପାଇଁ ପୂର୍ବରୁ ଥିବା ୧୫୦୦ କିଲୋମିଟରର ପରିଧିକୁ କମାଇ ୮୦୦ କିଲୋମିଟର କରାଯାଇଛି। ଦୂରତା କମିବା ଦ୍ୱାରା ଘିଅର ସତେଜତା ଏବଂ ସୁଗନ୍ଧ ବଜାୟ ରହିବ ବୋଲି ଆଶା କରାଯାଉଛି।

* ଜିପିଏସ୍ ଟ୍ରାକିଂ (GPS Tracking): ଘିଅ ପରିବହନ କରୁଥିବା ସମସ୍ତ ଟ୍ୟାଙ୍କରରେ ଏଣିକି ଜିପିଏସ୍ ଲକ୍ ଏବଂ ଟ୍ରାକିଂ ସିଷ୍ଟମ ବାଧ୍ୟତାମୂଳକ କରାଯାଇଛି। ଏହାଦ୍ୱାରା ରାସ୍ତାରେ ପରିବହନ ସମୟରେ କୌଣସି ପ୍ରକାରର ଅପମିଶ୍ରଣ କିମ୍ବା ହେରଫେରକୁ ରୋକାଯାଇପାରିବ।

* କଡ଼ା ଗୁଣବତ୍ତା ପରୀକ୍ଷା: ଘିଅର ମାନ ଯାଞ୍ଚ ପାଇଁ ISO 17678:2019 ଏବଂ IS Code 7770:1975 ଭଳି ଆନ୍ତର୍ଜାତୀୟ ମାନଦଣ୍ଡ ଲାଗୁ କରାଯାଇଛି। ଏହାସହ ଏକ ନୂତନ 'MRL ସ୍କୋର ବୋର୍ଡ' ବ୍ୟବସ୍ଥା ମଧ୍ୟ ଆରମ୍ଭ କରାଯାଇଛି।

ନନ୍ଦିନୀ ଡାଏରୀକୁ ମିଳିଲା ସର୍ବାଧିକ ଅର୍ଡର

ସ୍ୱଚ୍ଛ ଟେଣ୍ଡର ପ୍ରକ୍ରିୟା ମାଧ୍ୟମରେ ୨୦୨୪-୨୫ ବର୍ଷ ପାଇଁ ମୋଟ ୬୫ ଲକ୍ଷ କିଲୋଗ୍ରାମ ଘିଅ କିଣିବାକୁ ଲକ୍ଷ୍ୟ ରଖାଯାଇଛି। ଏଥିମଧ୍ୟରୁ କର୍ଣ୍ଣାଟକର ନନ୍ଦିନୀ ଡାଏରୀ (KMF) ସର୍ବାଧିକ ୪୦ ଲକ୍ଷ କିଲୋଗ୍ରାମ ଘିଅ ଯୋଗାଇବାର ଅର୍ଡର ପାଇଛି। ଏହା ବ୍ୟତୀତ ମଦର ଡାଏରୀ ଏବଂ ଅନ୍ୟାନ୍ୟ ପ୍ରତିଷ୍ଠିତ ସଂସ୍ଥା ମଧ୍ୟ ଏହି ପ୍ରକ୍ରିୟାରେ ସାମିଲ ଅଛନ୍ତି। ଟିଟିଡି ଅଧ୍ୟକ୍ଷ ସ୍ପଷ୍ଟ କରିଛନ୍ତି ଯେ କୌଣସି ନିର୍ଦ୍ଦିଷ୍ଟ କମ୍ପାନୀ ପ୍ରତି ପକ୍ଷପାତିତା କରାଯାଇନାହିଁ ଏବଂ କେବଳ ଗୁଣବତ୍ତାକୁ ଆଧାର କରି ଟେଣ୍ଡର ପ୍ରଦାନ କରାଯାଇଛି। ଏହି ନୂତନ ପଦକ୍ଷେପ ଦ୍ୱାରା ମହାପ୍ରସାଦର ସ୍ୱାଦ ଏବଂ ପବିତ୍ରତା ନେଇ ଭକ୍ତଙ୍କ ମନରେ ଥିବା ସନ୍ଦେହ ଦୂର ହେବ ବୋଲି ଆଶା କରାଯାଉଛି।