ଆମେରିକା ଏବଂ ଇରାନ ମଧ୍ୟରେ ଏକ ରୋମାଞ୍ଚକର ଉଦ୍ଧାର ଅଭିଯାନର ଖବର ସାମ୍ନାକୁ ଆସିଛି। ଇରାନରେ ଖସିପଡିଥିବା ଏକ ଆମେରିକୀୟ F-15E ଯୁଦ୍ଧବିମାନରୁ ଫସିଯାଇଥିବା ଜଣେ ଅଧିକାରୀଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ତେବେ ଉଦ୍ଧାର ପୂର୍ବରୁ ପାଇଲଟ୍‌ଙ୍କ ଦ୍ୱାରା ପଠାଯାଇଥିବା ମାତ୍ର ୩ଟି ଶବ୍ଦର ଏକ ବାର୍ତ୍ତା ଆମେରିକୀୟ ସେନା ଅଧିକାରୀଙ୍କ ଚିନ୍ତା ବଢ଼ାଇ ଦେଇଥିଲା।

ସେହି ୩ଟି ଶବ୍ଦ କ'ଣ ଥିଲା?

ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୂଚନା ଦେଇଛନ୍ତି ଯେ, ଇରାନରେ ବିମାନ ଦୁର୍ଘଟଣାଗ୍ରସ୍ତ ହେବା ପରେ ଏହାର ୱେପନ୍ସ ସିଷ୍ଟମ୍ସ ଅଫିସର ପାରାଚ୍ୟୁଟ୍ ଯୋଗେ ଖସିଥିଲେ। ଏହାପରେ ସେ ନିଜର କମାଣ୍ଡ୍ ସେଣ୍ଟରକୁ ଏକ ରେଡିଓ ବାର୍ତ୍ତା ପଠାଇଥିଲେ, ଯେଉଁଥିରେ ସେ କେବଳ ତିନୋଟି ଶବ୍ଦ ଲେଖିଥିଲେ- "ଗଡ୍ ଇଜ୍ ଗୁଡ୍" (God is good)। ପ୍ରଥମେ ଏହି ବାର୍ତ୍ତାଟି "Power be to God" ଭାବେ ଶୁଣାଯାଇଥିଲା। ଏହି ଆଶ୍ଚର୍ଯ୍ୟଜନକ ବାର୍ତ୍ତା ପାଇବା ପରେ, ଏହା ଆମେରିକୀୟ ଫୋର୍ସକୁ ଫସାଇବା ପାଇଁ ଇରାନ ସେନାର କୌଣସି ଜାଲ ବା ଷଡ଼ଯନ୍ତ୍ର ନୁହେଁ ତ ବୋଲି ଆମେରିକୀୟ ଅଧିକାରୀମାନେ ସନ୍ଦେହ କରିଥିଲେ।

୨୪ ଘଣ୍ଟା ଧରି ପାହାଡ଼ିଆ ଅଞ୍ଚଳରେ ଲୁଚି ରହିଥିଲେ ଅଧିକାରୀ

ଆହତ ହୋଇଥିବା ଏହି ଆମେରିକୀୟ ଅଧିକାରୀ ଜଣକ ୨୪ ଘଣ୍ଟାରୁ ଅଧିକ ସମୟ ଧରି ଇରାନର ଏକ ପାହାଡ଼ିଆ ଫାଟରେ ଲୁଚି ରହିଥିଲେ। ତାଙ୍କୁ ଖୋଜିବା ପାଇଁ ହଜାର ହଜାର ସଂଖ୍ୟାରେ ଇରାନୀ ସୈନ୍ୟ ଏବଂ ସ୍ଥାନୀୟ ଲୋକ ନିୟୋଜିତ ହୋଇଥିଲେ ଏବଂ ତାଙ୍କୁ ଧରିବା ପାଇଁ ପୁରସ୍କାର ମଧ୍ୟ ଘୋଷଣା କରାଯାଇଥିଲା। ତଥାପି ସିଆଇଏ (CIA) ଦ୍ୱାରା ଚଲାଯାଇଥିବା ଡିସେପ୍ସନ୍ (ଭ୍ରମିତ କରିବା) ମିଶନ୍ ଏବଂ ଆମେରିକୀୟ ସର୍ଭିଲାନ୍ସ ସିଷ୍ଟମ୍ ତାଙ୍କର ସଠିକ୍ ଲୋକେସନ୍ ଟ୍ରାକ୍ କରିବାରେ ସଫଳ ହୋଇଥିଲା।

ରାତି ଅଧରେ ୨୦୦ ସ୍ପେଶାଲ୍ ଫୋର୍ସଙ୍କ ଦ୍ୱାରା ହାଇ-ରିସ୍କ ରେସକ୍ୟୁ

ଏହି ଉଦ୍ଧାର ଅଭିଯାନ ଦୁଇଟି ପର୍ଯ୍ୟାୟରେ କରାଯାଇଥିଲା। ପ୍ରଥମେ ଦିନବେଳା ଭାରୀ ଗୁଳିବିନିମୟ ମଧ୍ୟରେ ମୁଖ୍ୟ ପାଇଲଟ୍‌ଙ୍କୁ ସୁରକ୍ଷିତ ଉଦ୍ଧାର କରାଯାଇଥିଲା। ଦ୍ୱିତୀୟ ମିଶନରେ ୱେପନ୍ ଅଫିସରଙ୍କୁ ରାତି ଅଧରେ ଉଦ୍ଧାର କରାଯାଇଥିଲା। ଏଥିପାଇଁ ଇରାନ ସୀମା ଭିତରେ ଏକ ଅସ୍ଥାୟୀ ବେସ୍ କ୍ୟାମ୍ପ୍ ପ୍ରସ୍ତୁତ କରାଯିବା ସହ ପ୍ରାୟ ୨୦୦ ଜଣ ଆମେରିକୀୟ ସ୍ପେଶାଲ୍ ଫୋର୍ସର କମାଣ୍ଡୋ ସାମିଲ ହୋଇଥିଲେ। ବିଶେଷ କଥା ହେଉଛି, ଏହି ବିପଜ୍ଜନକ ଅଭିଯାନରେ ଇସ୍ରାଏଲ୍ ମଧ୍ୟ ଆମେରିକାକୁ ସୀମିତ କିନ୍ତୁ ଗୁରୁତ୍ୱପୂର୍ଣ୍ଣ ସହାୟତା ପ୍ରଦାନ କରିଥିଲା। ଶେଷରେ ଉଭୟ କ୍ରୁ-ମେମ୍ବରଙ୍କୁ ସୁରକ୍ଷିତ ଭାବେ ଫେରାଇ ଅଣାଯାଇଥିଲା।

ବିଦେଶରେ କାମ କରିବାକୁ ଯାଇ ପୁଣି ଥରେ ଫସିଛନ୍ତି ଓଡ଼ିଆ ଶ୍ରମିକ। ଥାଇଲ୍ୟାଣ୍ଡର ଏକ ପ୍ଲାଇଉଡ୍ କମ୍ପାନୀରେ କାର୍ଯ୍ୟ କରୁଥିବା ୬ ଜଣ ଓଡ଼ିଆ ଶ୍ରମିକ ଏବେ ସେଠାରେ ଅତ୍ୟନ୍ତ ଦୟନୀୟ ଅବସ୍ଥାରେ ଥିବା ଜଣାପଡିଛି। ସେମାନଙ୍କ ମଧ୍ୟରୁ ୫ ଜଣ କେନ୍ଦ୍ରାପଡା ଜିଲ୍ଲା ରାଜକନିକା ଅଞ୍ଚଳର ହୋଇଥିବା ବେଳେ ଜଣେ ଭଦ୍ରକ ଜିଲ୍ଲା ଚାନ୍ଦବାଲି ଅଞ୍ଚଳର। ଗତ ୨୦୨୪ ଅଗଷ୍ଟ ମାସରେ ସେମାନେ ରୋଜଗାର ଆଶାରେ ଥାଇଲ୍ୟାଣ୍ଡ ଯାଇଥିଲେ।

ଏହି ଶ୍ରମିକମାନେ ଏକ ଭିଡିଓ ବାର୍ତ୍ତା ଜରିଆରେ ନିଜର ଦୁଃଖ ପ୍ରକାଶ କରିବା ସହ ରାଜ୍ୟ ସରକାରଙ୍କୁ ଉଦ୍ଧାର ପାଇଁ ଅନୁରୋଧ କରିଛନ୍ତି। ସେମାନଙ୍କ ଅଭିଯୋଗ ଅନୁଯାୟୀ, ଗତ ୪ ମାସ ହେବ କମ୍ପାନୀ ସେମାନଙ୍କୁ କୌଣସି ପାରିଶ୍ରମିକ ଦେଇନାହିଁ। ଦରମା ମାଗିଲେ ମାଲିକ ସେମାନଙ୍କୁ ଧମକ ଚମକ ଦେଉଛନ୍ତି। ଏମିତିକି ଗତ ୪ ଦିନ ହେବ ସେମାନଙ୍କୁ ଖାଇବାକୁ ମଧ୍ୟ ଦିଆଯାଉନାହିଁ। ଭୋକ ଉପାସରେ ଏହି ଶ୍ରମିକମାନେ ଏବେ ସେଠାରେ ଗୃହବନ୍ଦୀ ଭଳି ଜୀବନ କାଟୁଛନ୍ତି।

ବାରମ୍ବାର ସମାନ ଘଟଣା

ଏହା ପ୍ରଥମ ଥର ନୁହେଁ, ପୂର୍ବରୁ ମଧ୍ୟ କେନ୍ଦ୍ରାପଡା ଜିଲ୍ଲାର ଅନେକ ଶ୍ରମିକ ଥାଇଲ୍ୟାଣ୍ଡରେ ଫସି ରହିଥିବାର ଖବର ସାମ୍ନାକୁ ଆସିଛି। ୨୦୨୩ ମସିହାରେ ପ୍ରାୟ ୩୮ ଜଣ ଶ୍ରମିକ ଏବଂ ପରେ ୨୦୨୪ ଜୁଲାଇ ମାସରେ ଆଉ ୭ ଜଣ ଶ୍ରମିକ ସେଠାରେ ନିର୍ଯ୍ୟାତନାର ଶିକାର ହୋଇଥିବା ଅଭିଯୋଗ ହୋଇଥିଲା। ଅନେକ କ୍ଷେତ୍ରରେ ଦଲାଲମାନେ ଶ୍ରମିକଙ୍କୁ ଟୁରିଷ୍ଟ ଭିସାରେ ବିଦେଶ ପଠାଇ ଦେଉଛନ୍ତି, ଯାହା ପରବର୍ତ୍ତୀ ସମୟରେ ସେମାନଙ୍କ ପାଇଁ ବଡ଼ ସମସ୍ୟା ସୃଷ୍ଟି କରୁଛି। ଭିସା ଅବଧି ସରିବା ପରେ ପୁଲିସ୍ ଭୟରେ ଶ୍ରମିକମାନେ ଲୁଚି ରହିବାକୁ ବାଧ୍ୟ ହେଉଛନ୍ତି।

ଫେବୃଆରୀ ୨୦୨୬ - ୬ଜଣ

ଜୁଲାଇ ୨୦୨୪ - ୭ଜଣ

ଅକ୍ଟୋବର ୨୦୨୩ - ୩୮ଜଣ

ଏହି ଘଟଣା ସମ୍ପର୍କରେ ସୂଚନା ମିଳିବା ପରେ କେନ୍ଦ୍ରାପଡା ଜିଲ୍ଲା ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି। କେନ୍ଦ୍ରାପଡାର ଅତିରିକ୍ତ ଜିଲ୍ଲାପାଳ କହିଛନ୍ତି ଯେ, ଏହି ସମସ୍ୟା ସମ୍ପର୍କରେ ଜିଲ୍ଲା ଶ୍ରମ ଅଧିକାରୀଙ୍କୁ ଅବଗତ କରାଯାଇଛି। ଶ୍ରମିକମାନଙ୍କ ସମ୍ପର୍କରେ ସବିଶେଷ ତଥ୍ୟ ସଂଗ୍ରହ କରାଯାଇ ସେମାନଙ୍କୁ କିପରି ସୁରକ୍ଷିତ ଭାବେ ସ୍ୱଦେଶ ଫେରାଇ ଅଣାଯିବ, ସେ ନେଇ ରାଜ୍ୟ ସରକାରଙ୍କ ସହ ସମନ୍ୱୟ ରକ୍ଷା କରାଯାଉଛି।