ଭାରତୀୟ ଷ୍ଟ୍ରିଟ୍ ଫୁଡ୍ ବା ରାସ୍ତାକଡ଼ର ଖାଦ୍ୟକୁ ନେଇ ଅନେକ ସମୟରେ ସ୍ୱଚ୍ଛତା ପ୍ରଶ୍ନ ଉଠିଥାଏ। ନିକଟରେ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେଉଛି, ଯାହା ଗୁପଚୁପ୍ (ପାନିପୁରୀ) ପ୍ରେମୀଙ୍କୁ ଚିନ୍ତାରେ ପକାଇ ଦେଇଛି। ଏହି ଭିଡିଓରେ ଗୁପଚୁପ୍ ମସଲା ପାଣି ଭିତରୁ ଏକ ଜୀବନ୍ତ ମୂଷା ବାହାରୁଥିବାର ଦୃଶ୍ୟ ଦେଖିବାକୁ ମିଳିଛି। ଏହି ଘଟଣା ସାମ୍ନାକୁ ଆସିବା ପରେ ଲୋକମାନେ ରାସ୍ତାକଡ଼ ଖାଦ୍ୟର ସୁରକ୍ଷା ଓ ପରିଚ୍ଛନ୍ନତାକୁ ନେଇ ପ୍ରଶ୍ନ ଉଠାଇଛନ୍ତି।

ଗୁପଚୁପ୍ ମସଲା ପାତ୍ରରୁ ଡିଆଁ ମାରିଲା ମୂଷା

ଭାଇରାଲ ହେଉଥିବା ଏହି ଭିଡିଓଟି ଜଣେ ଫୁଡ୍ ବ୍ଲଗର୍ ଇନଷ୍ଟାଗ୍ରାମରେ ସେୟାର କରିଛନ୍ତି। ଭିଡିଓରେ ଦେଖାଯାଉଛି ଯେ, ଦୋକାନୀ ଜଣକ ଗୁପଚୁପ୍ ମସଲା ପାତ୍ରରୁ ଏକ ମୂଷାକୁ ବାହାର କରିବାକୁ ଚେଷ୍ଟା କରୁଛନ୍ତି। କିଛି ସମୟ ପରେ, ମସଲା ବୋଳା ହୋଇଥିବା ମୂଷାଟି ପାତ୍ର ଭିତରୁ ଡିଆଁ ମାରି ପାଖରେ ଥିବା ଏକ ଡ୍ରେନ୍ ଭିତରକୁ ଦୌଡ଼ି ପଳାଉଛି। ରିପୋର୍ଟ ଅନୁଯାୟୀ, ବ୍ଲଗର୍ ଜଣକ ତାଙ୍କ ବନ୍ଧୁଙ୍କ ସହ ଗୁପଚୁପ୍ ଖାଉଥିବା ବେଳେ ଏହି ଭୟଙ୍କର ଦୃଶ୍ୟ ଦେଖିବାକୁ ପାଇଥିଲେ।

ଗୁପଚୁପ୍ ପ୍ରେମୀ ସାବଧାନ! ମସଲା ପାଣିରୁ ବାହାରିଲା ଜୀବନ୍ତ ମୂଷା, ଭିଡିଓ ଦେଖିଲେ ଉଡ଼ିଯିବ ହୋସ୍ #ViralVideo #Golgappa #Hygiene #StreetFood #FoodSafety #SocialMediaViral pic.twitter.com/QH5KNFqVPi

— Sakala News (@SakalaNews) February 18, 2026

ସୋସିଆଲ ମିଡିଆରେ ତୀବ୍ର ପ୍ରତିକ୍ରିୟା

ଏହି ଭିଡିଓଟି ଇନଷ୍ଟାଗ୍ରାମ ବ୍ୟବହାରକାରୀ 'karan_dhanju26' ଙ୍କ ଦ୍ୱାରା ସେୟାର କରାଯାଇଛି। ଭିଡିଓଟି ଭାଇରାଲ ହେବା ପରେ ଲୋକମାନେ ନିଜର ଅସନ୍ତୋଷ ବ୍ୟକ୍ତ କରିଛନ୍ତି। ଜଣେ ବ୍ୟବହାରକାରୀ ଲେଖିଛନ୍ତି, "ଦୟାକରି କୁହନ୍ତୁ ଯେ ଏହା AI (କୃତ୍ରିମ ବୁଦ୍ଧିମତା) ଦ୍ୱାରା ତିଆରି ଭିଡିଓ, ସତ ନୁହେଁ।" ଅନ୍ୟ ଜଣେ ୟୁଜର୍ କମେଣ୍ଟ କରିଛନ୍ତି ଯେ, ଏହା ଦେଖିବା ପରେ ରାସ୍ତାକଡ଼ ଖାଦ୍ୟ ଖାଇବାକୁ ଭୟ ଲାଗୁଛି। ଅନେକ ଲୋକ ଖାଦ୍ୟ ସୁରକ୍ଷା ଅଧିକାରୀମାନଙ୍କୁ ଏଭଳି ଦୋକାନଗୁଡ଼ିକ ଉପରେ କଡ଼ା ନଜର ରଖିବାକୁ ଅନୁରୋଧ କରିଛନ୍ତି।

ପୂର୍ବରୁ ମଧ୍ୟ ଆସିଛି ଅଭିଯୋଗ

ଏହା ପ୍ରଥମ ଘଟଣା ନୁହେଁ ଯେଉଁଠି ଷ୍ଟ୍ରିଟ୍ ଫୁଡ୍‌ରେ ଏଭଳି ଅସ୍ୱାସ୍ଥ୍ୟକର ପରିବେଶ ଦେଖିବାକୁ ମିଳିଛି। ପୂର୍ବରୁ ମଧ୍ୟ ବିଭିନ୍ନ ସ୍ଥାନରୁ ଖାଦ୍ୟରେ ଅପମିଶ୍ରଣ ଏବଂ ପୋକଜୋକ ବାହାରିବାର ଭିଡିଓ ସାମ୍ନାକୁ ଆସିଛି। ତେବେ ଗୁପଚୁପ୍ ଭଳି ଲୋକପ୍ରିୟ ଖାଦ୍ୟରେ ମୂଷା ବାହାରିବା ଘଟଣା ଖାଦ୍ୟ ପ୍ରେମୀଙ୍କ ବିଶ୍ୱାସକୁ ଦୋହଲାଇ ଦେଇଛି।