Kollywood News - The Sakala

୨୭ ବର୍ଷର ସମ୍ପର୍କରେ ପଡିଲା ପୂର୍ଣ୍ଣଚ୍ଛେଦ: ଛାଡ଼ପତ୍ର ପାଇଁ କୋର୍ଟଙ୍କ ଦ୍ୱାରସ୍ଥ ହେଲେ ଥଲପତି ବିଜୟଙ୍କ ପତ୍ନୀ ସଙ୍ଗୀତା

Suryakanta — Fri, 27 Feb 2026 17:33:22 +0530

ତାମିଲ ସୁପରଷ୍ଟାର ତଥା ଟିଭିକେ (TVK) ମୁଖ୍ୟ ବିଜୟ ଥଲପତିଙ୍କ ବ୍ୟକ୍ତିଗତ ଜୀବନକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି। ଦୀର୍ଘ ୨୭ ବର୍ଷର ବୈବାହିକ ଜୀବନ ପରେ ବିଜୟ ଏବଂ ତାଙ୍କ ପତ୍ନୀ ସଙ୍ଗୀତା ଅଲଗା ହେବାକୁ ଯାଉଛନ୍ତି। ସଙ୍ଗୀତା ନିଜେ ଚେଙ୍ଗଲପଟ୍ଟୁ କୋର୍ଟରେ ଛାଡ଼ପତ୍ର ପାଇଁ ଆବେଦନ କରିଛନ୍ତି, ଯାହା ତାଙ୍କ ପ୍ରଶଂସକମାନଙ୍କୁ ଚକିତ କରିଦେଇଛି।

ଛାଡ଼ପତ୍ରର କାରଣ କ’ଣ?

ମିଳିଥିବା ସୂଚନା ଅନୁଯାୟୀ, ସଙ୍ଗୀତା ତାଙ୍କ ଆବେଦନରେ ବିଜୟଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ସେ ଦର୍ଶାଇଛନ୍ତି ଯେ ବିଜୟଙ୍କର ଅନ୍ୟ ଜଣେ ଅଭିନେତ୍ରୀଙ୍କ ସହ ୨୦୨୧ ମସିହାରୁ ଅନୈତିକ ସମ୍ପର୍କ ରହିଛି। ଏହି କାରଣରୁ ସେମାନଙ୍କ ମଧ୍ୟରେ ମନୋମାଳିନ୍ୟ ସୃଷ୍ଟି ହୋଇଥିଲା ଏବଂ ସେ ବିବାହ ବିଚ୍ଛେଦ ପାଇଁ ନିଷ୍ପତ୍ତି ନେଇଛନ୍ତି। କୋର୍ଟ ବର୍ତ୍ତମାନ ଏହି ମାମଲାକୁ ପରିବାର କଲ୍ୟାଣ କମିଟିକୁ ହସ୍ତାନ୍ତର କରିଛନ୍ତି।

୨ ବର୍ଷ ହେଲା ଅଲଗା ରହୁଥିଲେ ଦମ୍ପତି

ରିପୋର୍ଟ ଅନୁସାରେ, ଗତ ଦୁଇ ବର୍ଷ ଧରି ବିଜୟ ଏବଂ ସଙ୍ଗୀତା ପରସ୍ପରଠାରୁ ଅଲଗା ରହୁଥିଲେ। ତେବେ ଉଭୟ ପକ୍ଷରୁ ଏନେଇ କୌଣସି ଆନୁଷ୍ଠାନିକ ଘୋଷଣା କରାଯାଇ ନଥିଲା। ସଙ୍ଗୀତା ଶ୍ରୀଲଙ୍କା ତାମିଲ ବଂଶୋଦ୍ଭବ ଏବଂ ଲଣ୍ଡନରେ ବଡ଼ ହୋଇଥିଲେ। ବିଜୟଙ୍କ ଜଣେ ବଡ଼ ପ୍ରଶଂସକ ଭାବରେ ତାଙ୍କର ବିଜୟଙ୍କ ସହ ପ୍ରଥମେ ସାକ୍ଷାତ ହୋଇଥିଲା, ଯାହା ପରେ ପ୍ରେମ ଓ ବିବାହରେ ପରିଣତ ହୋଇଥିଲା।

ରାଜନୈତିକ କ୍ୟାରିୟର ଉପରେ ପ୍ରଭାବ

ବିଜୟ ବର୍ତ୍ତମାନ ଚଳଚ୍ଚିତ୍ର ଜଗତରୁ ଦୂରେଇ ସମ୍ପୂର୍ଣ୍ଣ ରୂପେ ରାଜନୀତିରେ ସକ୍ରିୟ ଅଛନ୍ତି। ନିକଟରେ ସେ ନିଜର ଦଳ ‘ତାମିଲଗା ଭେଟ୍ରି କାଝଗମ୍’ (TVK) ଗଠନ କରିଛନ୍ତି। ରାଜନୈତିକ କ୍ଷେତ୍ରରେ ପାଦ ଦେବା ସମୟରେ ତାଙ୍କ ବ୍ୟକ୍ତିଗତ ଜୀବନର ଏହି ଝଡ଼ ଚର୍ଚ୍ଚାର ବିଷୟ ପାଲଟିଛି। ଉଲ୍ଲେଖଯୋଗ୍ୟ ଯେ, ୧୯୯୯ ମସିହାରେ ଉଭୟ ବିବାହ କରିଥିଲେ ଏବଂ ସେମାନଙ୍କର ଦୁଇଟି ସନ୍ତାନ- ପୁଅ ଜେସନ ସଞ୍ଜୟ ଓ ଝିଅ ଦିବ୍ୟା ଶାଶା ଅଛନ୍ତି।

୪୭ ବର୍ଷ ପରେ ପୁଣି ଏକାଠି ହେଲେ ରଜନୀକାନ୍ତ ଓ କମଲ ହାସନ, ନେଲସନଙ୍କ ଫିଲ୍ମରେ ଦେଖିବାକୁ ମିଳିବ ଜଲୱା

Suryakanta — Sat, 21 Feb 2026 15:31:08 +0530

ଭାରତୀୟ ସିନେମା ପାଇଁ ଆଜି ଏକ ଐତିହାସିକ ଦିନ। ଦୀର୍ଘ ୪୭ ବର୍ଷର ଅପେକ୍ଷା ପରେ ଦକ୍ଷିଣ ଭାରତୀୟ ସିନେମାର ଦୁଇ ମହାନାୟକ ରଜନୀକାନ୍ତ ଏବଂ କମଲ ହାସନ ପୁଣି ଥରେ ପରଦାରେ ଏକାଠି ନଜର ଆସିବେ। ଶନିବାର ଦିନ ଫିଲ୍ମ ନିର୍ମାତାମାନେ ଏହି ବଡ଼ ଘୋଷଣା କରିବା ସହ ଏକ ଦମଦାର ପ୍ରୋମୋ ଭିଡିଓ ଜାରି କରିଛନ୍ତି, ଯାହା ସୋସିଆଲ ମିଡିଆରେ ନିଆଁ ଲଗାଇ ଦେଇଛି।

ନେଲସନଙ୍କ ନିର୍ଦ୍ଦେଶନା ଓ ଅନିରୁଦ୍ଧଙ୍କ ସଙ୍ଗୀତ

ଏହି ମେଗା ବଜେଟ୍ ଫିଲ୍ମର ନିର୍ଦ୍ଦେଶନା ଦାୟିତ୍ୱ ଲୋକପ୍ରିୟ ନିର୍ଦ୍ଦେଶକ ନେଲସନ ଦିଲୀପକୁମାର ଗ୍ରହଣ କରିଛନ୍ତି। ଏହା ପୂର୍ବରୁ ନେଲସନ ରଜନୀକାନ୍ତଙ୍କ ସହ 'ଜେଲର' ଭଳି ବ୍ଲକବଷ୍ଟର ଫିଲ୍ମ ଭେଟି ଦେଇଥିଲେ। ଏହି ଫିଲ୍ମର ସଙ୍ଗୀତ ପରିଚାଳନା କରିବେ 'ରକ୍ ଷ୍ଟାର' ଅନିରୁଦ୍ଧ ରବିଚନ୍ଦର। ରେଡ୍ ଜଏଣ୍ଟ ମୁଭିଜ୍ (Red Giant Movies) ବ୍ୟାନରରେ ନିର୍ମିତ ହେବାକୁ ଥିବା ଏହି ଫିଲ୍ମର ନାମ ବର୍ତ୍ତମାନ ପାଇଁ 'KHxRK' ରଖାଯାଇଛି।

ମଜାଦାର ପ୍ରୋମୋ ଭିଡିଓ ରିଲିଜ୍

ରିଲିଜ୍ ହୋଇଥିବା ପ୍ରୋମୋ ଭିଡିଓରେ ନିର୍ଦ୍ଦେଶକ ନେଲସନ ଏବଂ ସଙ୍ଗୀତ ନିର୍ଦ୍ଦେଶକ ଅନିରୁଦ୍ଧଙ୍କୁ ଏକ ହୋଟେଲ କରିଡରରେ ଦେଖିବାକୁ ମିଳିଛି। କାହା ରୁମକୁ ପ୍ରଥମେ ଯିବେ ବୋଲି ନେଲସନ ଦ୍ୱନ୍ଦ୍ୱରେ ଥିବାବେଳେ, ଶେଷରେ ଦୁଇ ମହାନାୟକ ରଜନୀ ଓ କମଲ ରେଟ୍ରୋ ଲୁକ୍‌ରେ ଏକାଠି ବାହାରକୁ ଆସୁଛନ୍ତି। ଦୁହେଁ କଳା ଚଷମା ଓ ଷ୍ଟାଇଲିସ୍ ଜ୍ୟାକେଟ୍ ପିନ୍ଧି ନିଜର ପୁରୁଣା ଅନ୍ଦାଜ ଦେଖାଇଛନ୍ତି। ଭିଡିଓ ଶେଷରେ ଦୁହେଁ ନିର୍ଦ୍ଦେଶକଙ୍କୁ ପଚାରୁଛନ୍ତି, "ଆମ ଦୁହିଁଙ୍କ ଭିତରୁ ହିରୋ କିଏ?" ଯାହା ଦର୍ଶକଙ୍କୁ ବେଶ୍ ପସନ୍ଦ ଆସିଛି।

୪ ଦଶନ୍ଧି ପରେ ମହାମିଳନ

ସୂଚନାଯୋଗ୍ୟ ଯେ, ରଜନୀକାନ୍ତ ଓ କମଲ ହାସନ ଶେଷଥର ପାଇଁ ୧୯୭୯ ମସିହାରେ ରିଲିଜ୍ ହୋଇଥିବା ଫିଲ୍ମ 'ଆଲାଉଦ୍ଦିନମ୍ ଅଲଭୁଥା ଭିଲାକ୍କୁମ୍' (Allauddinum Albhutha Vilakkum) ରେ ଏକାଠି ଅଭିନୟ କରିଥିଲେ। ୧୯୮୫ରେ ହିନ୍ଦୀ ଫିଲ୍ମ 'ଗିରଫ୍ତାର'ରେ ଉଭୟ ଥିଲେ ମଧ୍ୟ ସେମାନଙ୍କର ଏକାଠି କୌଣସି ଦୃଶ୍ୟ ନଥିଲା। ତେବେ ଦୀର୍ଘ ଦଶନ୍ଧି ପରେ ଏହି ଦୁଇ କିମ୍ବଦନ୍ତୀ କଳାକାରଙ୍କୁ ଗୋଟିଏ ଫ୍ରେମରେ ଦେଖିବା ପ୍ରଶଂସକଙ୍କ ପାଇଁ ସ୍ୱପ୍ନ ସତ ହେବା ପରି।

ଅଡୁଆରେ ଧନୁଷ: ସୁଟିଂ ବିଳମ୍ବ କରିବାରୁ ପାଇଲେ ଲିଗାଲ ନୋଟିସ, ୨୦ କୋଟି କ୍ଷତିପୂରଣ ଦାବି କଲେ ପ୍ରଯୋଜକ

Suryakanta — Sat, 14 Feb 2026 17:18:27 +0530

ଦକ୍ଷିଣ ଭାରତୀୟ ସୁପରଷ୍ଟାର ଧନୁଷ ବର୍ତ୍ତମାନ ଆଇନଗତ ଅଡୁଆରେ ଫସିଥିବା ଜଣାପଡ଼ିଛି। ଏକ ପୁରୁଣା ଚଳଚ୍ଚିତ୍ରର ସୁଟିଂରେ ବିଳମ୍ବ କରିବା କାରଣରୁ ଏକ ପ୍ରତିଷ୍ଠିତ ପ୍ରଯୋଜନା ସଂସ୍ଥା ତାଙ୍କୁ ଆଇନଗତ ନୋଟିସ ପଠାଇଛି। କେବଳ ସେତିକି ନୁହେଁ, କ୍ଷତିପୂରଣ ବାବଦରେ ପ୍ରଯୋଜନା ସଂସ୍ଥା ଧନୁଷଙ୍କ ଠାରୁ ୨୦ କୋଟି ଟଙ୍କା ଦାବି କରିଛି।

କାହିଁକି ମିଳିଲା ନୋଟିସ?

ମିଳିଥିବା ସୂଚନା ଅନୁଯାୟୀ, ୨୦୧୬ ମସିହାରେ ଧନୁଷ 'ଶ୍ରୀ ଥେନାନ୍ଦଲ ଫିଲ୍ମସ୍' (Sri Thenandal Films) ସହ ଏକ ଚଳଚ୍ଚିତ୍ର ପାଇଁ ଚୁକ୍ତିବଦ୍ଧ ହୋଇଥିଲେ। ଏହି ଚଳଚ୍ଚିତ୍ରର ନାମ ଥିଲା 'ନାନ ରୁଦ୍ରନ' (Naan Rudran)। ଏହି ପ୍ରୋଜେକ୍ଟ ପାଇଁ ଧନୁଷ ଅଗ୍ରୀମ ଟଙ୍କା ମଧ୍ୟ ନେଇଥିଲେ। କିନ୍ତୁ ଦୀର୍ଘ ବର୍ଷ ବିତିଯାଇଥିଲେ ମଧ୍ୟ ସେ ଏହି ଚଳଚ୍ଚିତ୍ରର କାମ ଆରମ୍ଭ କରିନଥିଲେ। ବରଂ ସେ ଅନ୍ୟ ଚଳଚ୍ଚିତ୍ରର ନିର୍ଦ୍ଦେଶନା ଏବଂ ଅଭିନୟରେ ବ୍ୟସ୍ତ ରହିଥିଲେ, ଯାହା ପ୍ରଯୋଜନା ସଂସ୍ଥାକୁ କ୍ଷତିରେ ପକାଇଥିଲା।

୨୦ କୋଟି ଟଙ୍କାର ଦାବି

ପ୍ରଯୋଜନା ସଂସ୍ଥା ଅଭିଯୋଗ କରିଛି ଯେ, ଏହି ଚଳଚ୍ଚିତ୍ରର ପ୍ରି-ପ୍ରଡକ୍ସନ୍ ଏବଂ ଅନ୍ୟାନ୍ୟ କାର୍ଯ୍ୟରେ ସେମାନେ ପ୍ରାୟ ୨୦ କୋଟି ଟଙ୍କା ଖର୍ଚ୍ଚ କରିସାରିଛନ୍ତି। ଏଥିରେ ନାଗାର୍ଜୁନ ଆକିନେନି ଏବଂ ଏସ.ଜେ ସୂର୍ଯ୍ୟାଙ୍କ ଭଳି କଳାକାରଙ୍କୁ ଦିଆଯାଇଥିବା ଅଗ୍ରୀମ ଅର୍ଥ ମଧ୍ୟ ଅନ୍ତର୍ଭୁକ୍ତ। ନୋଟିସରେ ଉଲ୍ଲେଖ କରାଯାଇଛି ଯେ, ଯଦି ଧନୁଷ ଏହି ପ୍ରୋଜେକ୍ଟ ପାଇଁ ତୁରନ୍ତ ତାରିଖ (Dates) ନ ଦିଅନ୍ତି, ତେବେ ତାଙ୍କୁ ଖର୍ଚ୍ଚ ହୋଇଥିବା ୨୦ କୋଟି ଟଙ୍କା ସହ ଅତିରିକ୍ତ ୧ କୋଟି ଟଙ୍କା କ୍ଷତିପୂରଣ ଦେବାକୁ ପଡ଼ିବ।

୭ ଦିନର ମହଲତ

ଆଇନଜୀବୀଙ୍କ ଜରିଆରେ ପଠାଯାଇଥିବା ଏହି ନୋଟିସରେ ଧନୁଷଙ୍କୁ ନିଜର ପକ୍ଷ ରଖିବା ପାଇଁ ୭ ଦିନ ସମୟ ଦିଆଯାଇଛି। ଯଦି ଏହି ସମୟ ମଧ୍ୟରେ କୌଣସି ସମାଧାନ ନହୁଏ କିମ୍ବା ଧନୁଷ ସୁଟିଂ ପାଇଁ ରାଜି ନହୁଅନ୍ତି, ତେବେ ପ୍ରଯୋଜନା ସଂସ୍ଥା ଅଦାଲତର ଦ୍ୱାରସ୍ଥ ହେବ ବୋଲି ଚେତାବନୀ ଦେଇଛି।