ନୂଆଦିଲ୍ଲୀ: ଭାରତ ମଣ୍ଡପମରେ ୟୁଥ କଂଗ୍ରେସର ହଙ୍ଗାମା । ସାର୍ଟ ଖୋଲି ପ୍ରତିବାଦ କରିବା ସହ ମୋଦୀ ବିରୋଧୀ ନାରାବାଜି ଦେଲେ ଯୁବ କଂଗ୍ରେସର କର୍ମକର୍ତ୍ତା । ନୂଆଦିଲ୍ଲୀସ୍ଥିତ ଭାରତ ମଣ୍ଡପମଠାରେ ଚାଲିଥିବା 'ଇଣ୍ଡିଆ ଏଆଇ ଇମ୍ପାକ୍ଟ ସମ୍ମିଟ୍ ୨୦୨୬'ରେ ଶୁକ୍ରବାର ଦିନ ଇଣ୍ଡିଆନ ୟୁଥ କଂଗ୍ରେସର କର୍ମୀମାନେ ସୁରକ୍ଷା ବ୍ୟବସ୍ଥା ଭେଦ କରି ସମ୍ମିଳନୀ ସ୍ଥଳରେ ସାର୍ଟ ଖୋଲି ବିକ୍ଷୋଭ ପ୍ରଦର୍ଶନ କରିଛନ୍ତି। ଏହି ସମୟରେ ସେମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୋଧରେ ନାରାବାଜି କରିବା ସହ ନିକଟରେ ହୋଇଥିବା ଭାରତ-ଆମେରିକା ବାଣିଜ୍ୟ ଚୁକ୍ତିକୁ ତୀବ୍ର ବିରୋଧ କରିଥିଲେ।

ଏହି ଘଟଣାକୁ ଗୁରୁତର ସହ ନେଇ ଦିଲ୍ଲୀ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ପୋଲିସ ସୂଚନା ଅନୁଯାୟୀ, ଘଟଣାସ୍ଥଳରୁ ୪ରୁ ୫ ଜଣଙ୍କୁ ଅଟକ ରଖାଯାଇଛି ଏବଂ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଏତେ ବଡ଼ ଆନ୍ତର୍ଜାତୀୟ ସମ୍ମିଳନୀରେ ସେମାନେ କିପରି ପ୍ରବେଶ କଲେ, ସେମାନଙ୍କ ପାଖରେ ବୈଧ ପାସ୍ କିମ୍ବା QR କୋଡ୍ ଥିଲା କି ନାହିଁ, ସେ ନେଇ ଅଧିକାରୀମାନେ ଯାଞ୍ଚ ଚଳାଇଛନ୍ତି।

ବିଜେପିର ରାଷ୍ଟ୍ରୀୟ ମୁଖପାତ୍ର ଶେହଜାଦ ପୁନାୱାଲା ଏହି ଘଟଣାକୁ କଡ଼ା ନିନ୍ଦା କରି କଂଗ୍ରେସ ଉପରେ ବର୍ଷିଛନ୍ତି। ସେ କଂଗ୍ରେସକୁ "ଆଣ୍ଟି-ନ୍ୟାସନାଲ କଂଗ୍ରେସ" ବୋଲି ସମ୍ବୋଧନ କରି କହିଛନ୍ତି ଯେ, କଂଗ୍ରେସ ପାଇଁ 'AI' ର ଅର୍ଥ ହେଉଛି 'ଆଣ୍ଟି ଇଣ୍ଡିଆ'। ବିଶ୍ୱସ୍ତରରେ ଭାରତର ସଫଳତାକୁ କଂଗ୍ରେସ ସହ୍ୟ କରିପାରୁନାହିଁ। ରାହୁଲ ଗାନ୍ଧୀଙ୍କ ଇଶାରାରେ ହୋଇଥିବା ଏହି ପ୍ରଦର୍ଶନକୁ ସେ "ଚରିତ୍ରହୀନ, ବୁଦ୍ଧିହୀନ ଏବଂ ଭାବନାହୀନ" ବୋଲି କହିଛନ୍ତି।

ଅନ୍ୟପକ୍ଷରେ, ଇଣ୍ଡିଆନ ୟୁଥ କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ଉଦୟ ଭାନୁ ଚିବ ଏହି ପ୍ରଦର୍ଶନକୁ ଯଥାର୍ଥ ବୋଲି ଦର୍ଶାଇଛନ୍ତି। ସେ ଅଭିଯୋଗ କରିଛନ୍ତି ଯେ, କର୍ପୋରେଟ୍ ସ୍ୱାର୍ଥ ପାଇଁ ଦେଶର ସ୍ୱାର୍ଥକୁ ଜଳାଞ୍ଜଳି ଦିଆଯାଉଛି। କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟ ଏହି ବାଣିଜ୍ୟ ଚୁକ୍ତିକୁ ବିରୋଧ କରି କହିଛନ୍ତି ଯେ, ଏହି ଚୁକ୍ତି ନାଁରେ ଦେଶର ଚାଷୀମାନଙ୍କ ସହ ବିଶ୍ୱାସଘାତକତା କରାଯାଉଛି ଏବଂ ଏହା କୃଷିର ଭବିଷ୍ୟତ ସହ ଜଡ଼ିତ ପ୍ରସଙ୍ଗ।

ନୂଆଦିଲ୍ଲୀ: ନୂଆଦିଲ୍ଲୀର ଭାରତ ମଣ୍ଡପମରେ ଚାଲିଥିବା 'ଏଆଇ ଇମ୍ପାକ୍ଟ ସମ୍ମିଳନୀ-୨୦୨୬'ରେ ଏକ ବଡ଼ ଧରଣର ବିବାଦ ଦେଖିବାକୁ ମିଳିଛି। ‘ଚାଇନିଜ୍ ରୋବୋ-ଡଗ୍’ କୁ ନିଜର ଉଦ୍ଭାବନ ବୋଲି ଦାବି କରି ବିବାଦ ଘେରକୁ ଆସିଥିବା Galgotias University (ଗାଲଗୋଟିଆସ୍ ବିଶ୍ୱବିଦ୍ୟାଳୟ) ଶେଷରେ ନିଜର ଷ୍ଟଲ୍ ଖାଲି କରିଛି। ବୁଧବାର ଦିନ ବିଶ୍ୱବିଦ୍ୟାଳୟର କର୍ମଚାରୀ ଏବଂ ଛାତ୍ରଛାତ୍ରୀମାନେ ଷ୍ଟଲ୍ ଛାଡି ଯାଉଥିବାର ଦୃଶ୍ୟ ସାମ୍ନାକୁ ଆସିଛି।

ସୂଚନା ଅନୁଯାୟୀ, ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହୋଇଥିଲା ଯେଉଁଥିରେ ବିଶ୍ୱବିଦ୍ୟାଳୟର ପ୍ରଫେସର ନେହା ସିଂହ ଏହି ରୋବୋ-ଡଗ୍‌କୁ ‘ଓରିଅନ୍’ (Orion) ନାମ ଦେଇ ଏହା ବିଶ୍ୱବିଦ୍ୟାଳୟର ‘ସେଣ୍ଟର ଅଫ୍ ଏକ୍ସଲେନ୍ସ’ ଦ୍ୱାରା ବିକଶିତ ହୋଇଥିବା ଦାବି କରିଥିଲେ। ସେ କହିଥିଲେ ଯେ ଏହି ମେସିନ୍ ସର୍ଭିଲାନ୍ସ କରିବାରେ ସକ୍ଷମ। ତେବେ ଇଣ୍ଟରନେଟ୍ ବ୍ୟବହାରକାରୀମାନେ ତୁରନ୍ତ ଚିହ୍ନଟ କରିଥିଲେ ଯେ ଏହା ପ୍ରକୃତରେ ଚୀନର ରୋବୋଟିକ୍ସ କମ୍ପାନୀ Unitree ଦ୍ୱାରା ନିର୍ମିତ। ଅନ୍ୟର ଉଦ୍ଭାବନକୁ ନିଜର ବୋଲି କହିବା ଘଟଣାକୁ ନେଇ ସମାଲୋଚନା ଆରମ୍ଭ ହୋଇଥିଲା।

ସମ୍ମିଳନୀରେ ଏହି ଘଟଣାକୁ “ଜାତୀୟ ଲଜ୍ଜା” ବୋଲି ବିବେଚନା କରାଯାଇ ବିଶ୍ୱବିଦ୍ୟାଳୟକୁ ଷ୍ଟଲ୍ ଖାଲି କରିବାକୁ ନିର୍ଦ୍ଦେଶ ଦିଆଯାଇଥିବା ବିଶେଷ ସୂତ୍ରରୁ ଜଣାପଡିଛି। ଘଟଣାସ୍ଥଳରୁ ଆସିଥିବା ଭିଡିଓରେ ଦେଖାଯାଇଛି ଯେ ଷ୍ଟଲର ବିଦ୍ୟୁତ ସଂଯୋଗ କାଟି ଦିଆଯାଇଛି ଏବଂ କର୍ମଚାରୀମାନେ ଜିନିଷପତ୍ର ଧରି ଫେରୁଛନ୍ତି। ତେବେ ପ୍ରଫେସର ନେହା ସିଂହ ପ୍ରାରମ୍ଭିକ ପର୍ଯ୍ୟାୟରେ କହିଥିଲେ ଯେ ସେମାନଙ୍କୁ ଷ୍ଟଲ୍ ଖାଲି କରିବାକୁ କୌଣସି ନିର୍ଦ୍ଦେଶ ମିଳିନାହିଁ।

ବିବାଦ ବଢିବା ପରେ ଗାଲଗୋଟିଆସ୍ ବିଶ୍ୱବିଦ୍ୟାଳୟ ପକ୍ଷରୁ ସଫେଇ ଦିଆଯାଇଛି। ସୋସିଆଲ ମିଡିଆରେ ଏକ ବିବୃତ୍ତି ଜାରି କରି ବିଶ୍ୱବିଦ୍ୟାଳୟ କହିଛି ଯେ, “ଆମେ କେବେବି ଏହି ରୋବୋ-ଡଗ୍ ନିର୍ମାଣ କରିଥିବା ଦାବି କରିନାହୁଁ। ଛାତ୍ରଛାତ୍ରୀମାନଙ୍କୁ ଆଧୁନିକ ଜ୍ଞାନକୌଶଳ ବିଷୟରେ ଶିକ୍ଷା ଦେବା ପାଇଁ ଏହାକୁ ବ୍ୟବହାର କରାଯାଉଛି।” ଏହା ସହିତ ବିଶ୍ୱବିଦ୍ୟାଳୟ ଏହି ଘଟଣାକୁ ଏକ “ଅପପ୍ରଚାର” ବୋଲି ଅଭିହିତ କରିଛି ଏବଂ କହିଛି ଯେ ଏହା ଦ୍ୱାରା ଛାତ୍ରଛାତ୍ରୀଙ୍କ ମନୋବଳ ଭାଙ୍ଗିବାର ଆଶଙ୍କା ରହିଛି।

ଭାରତରେ ଆୟୋଜିତ ହେବାକୁ ଥିବା ବିଶାଳ 'ଏଆଇ ଇମ୍ପାକ୍ଟ ସମ୍ମିଳନୀ' (AI Impact Summit) ପାଇଁ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି। ନୂଆଦିଲ୍ଲୀର ଭାରତ ମଣ୍ଡପମରେ ଫେବୃଆରୀ ୧୬ରୁ ୨୦ ପର୍ଯ୍ୟନ୍ତ ଏହି ସମ୍ମିଳନୀ ଅନୁଷ୍ଠିତ ହେବ। ତେବେ ଗୁରୁତ୍ୱପୂର୍ଣ୍ଣ କଥା ହେଉଛି, ବିଶ୍ୱର ୧୦୦ରୁ ଅଧିକ ଦେଶ ଏଥିରେ ଅଂଶଗ୍ରହଣ କରୁଥିବା ବେଳେ ପଡ଼ୋଶୀ ଦେଶ ପାକିସ୍ତାନକୁ ଏଥିପାଇଁ ନିମନ୍ତ୍ରଣ କରାଯାଇ ନାହିଁ।

୧୦୦ରୁ ଅଧିକ ଦେଶର ପ୍ରତିନିଧି ହେବେ ସାମିଲ

ଭାରତ ସରକାରଙ୍କ ଦ୍ୱାରା ଆୟୋଜିତ ଏହି ସମ୍ମିଳନୀରେ ବିଶ୍ୱର ପ୍ରମୁଖ ନେତା ଏବଂ ପ୍ରଯୁକ୍ତିବିଦ୍ୟା ବିଶେଷଜ୍ଞମାନେ ଯୋଗଦେବେ। ଫ୍ରାନ୍ସର ରାଷ୍ଟ୍ରପତି ଏମାନୁଏଲ ମାକ୍ରୋନ୍ ଏବଂ ବ୍ରାଜିଲର ରାଷ୍ଟ୍ରପତି ଲୁଲା ଡା ସିଲଭାଙ୍କ ଭଳି ବଡ଼ ନେତାମାନେ ଏଥିରେ ଅଂଶଗ୍ରହଣ କରିବାର କାର୍ଯ୍ୟକ୍ରମ ରହିଛି। ଏହି ସମ୍ମିଳନୀର ମୁଖ୍ୟ ଉଦ୍ଦେଶ୍ୟ ହେଉଛି କୃତ୍ରିମ ବୁଦ୍ଧିମତ୍ତା (AI)ର ସକାରାତ୍ମକ ବ୍ୟବହାର ଏବଂ ଏହାର ପ୍ରଭାବ ଉପରେ ଆଲୋଚନା କରିବା। 'ପିପୁଲ, ପ୍ଲାନେଟ୍ ଏବଂ ପ୍ରୋଗ୍ରେସ' (ଲୋକ, ପୃଥିବୀ ଏବଂ ପ୍ରଗତି) - ଏହି ତିନୋଟି ମୂଳ ମନ୍ତ୍ର ଉପରେ ସମ୍ମିଳନୀ ଆଧାରିତ ହେବ।

ପାକିସ୍ତାନକୁ କାହିଁକି ମିଳିଲାନି ନିମନ୍ତ୍ରଣ?

ରିପୋର୍ଟ ଅନୁଯାୟୀ, ଆତଙ୍କବାଦ ଏବଂ କୂଟନୈତିକ ସମ୍ପର୍କରେ ତିକ୍ତତା କାରଣରୁ ଭାରତ ପାକିସ୍ତାନକୁ ଏହି ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମରୁ ବାଦ୍ ଦେଇଛି। ଅନ୍ୟପକ୍ଷରେ, ପାକିସ୍ତାନ ନିଜେ ଫେବୃଆରୀ ୯ ତାରିଖରେ ଇସଲାମାବାଦରେ 'ଇଣ୍ଡସ୍ ଏଆଇ ସମ୍ମିଳନୀ' (Indus AI Summit) ଆୟୋଜନ କରିଥିଲା, ଯେଉଁଥିରେ ସୀମିତ ସଂଖ୍ୟକ ବିଦେଶୀ ପ୍ରତିନିଧି ଯୋଗ ଦେଇଥିଲେ। ଭାରତର ଏହି ପଦକ୍ଷେପ ଆନ୍ତର୍ଜାତିକ ମଞ୍ଚରେ ପାକିସ୍ତାନକୁ ପୁଣି ଥରେ ଏକଘରିକିଆ କରିଦେଇଛି।

ଭାରତର ବଢୁଛି ଦବଦବା

ଏହି ସମ୍ମିଳନୀ ଜରିଆରେ ଭାରତ ଗ୍ଲୋବାଲ ସାଉଥ୍ ବା ବିକାଶଶୀଳ ଦେଶଗୁଡ଼ିକର ନେତୃତ୍ୱ ନେବାକୁ ଲକ୍ଷ୍ୟ ରଖିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି କାର୍ଯ୍ୟକ୍ରମକୁ ଉଦଘାଟନ କରିବେ। କୃତ୍ରିମ ବୁଦ୍ଧିମତ୍ତା କ୍ଷେତ୍ରରେ ଭାରତର ବଢୁଥିବା ଶକ୍ତି ଏବଂ ବିଶ୍ୱସ୍ତରୀୟ ଗ୍ରହଣୀୟତା ଏହି ସମ୍ମିଳନୀ ମାଧ୍ୟମରେ ପ୍ରମାଣିତ ହେବ।