କୋଲକାତା ବିମାନବନ୍ଦରରେ ଶୁକ୍ରବାର ଏକ ବଡ଼ ଧରଣର ଦୁର୍ଘଟଣା ଅଳ୍ପକେ ଟଳିଯାଇଛି। ପ୍ରବଳ ଝଡ଼ବର୍ଷା ସମୟରେ ବିମାନବନ୍ଦରରେ ଛିଡ଼ା ହୋଇଥିବା ଏକ ଇଣ୍ଡିଗୋ ବିମାନ (IndiGo flight) ଉପରେ ବଜ୍ରପାତ ହୋଇଛି। ସୌଭାଗ୍ୟବଶତଃ ଏହି ଘଟଣାରେ ବିମାନରେ ଥିବା ସମସ୍ତ ୧୪୧ ଜଣ ଯାତ୍ରୀ ଏବଂ ୬ ଜଣ କ୍ରୁ ସଦସ୍ୟ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି।

ବିମାନର ପାୱାର୍ ସିଷ୍ଟମ୍ ହେଲା ପ୍ରଭାବିତ

ଭାରତୀୟ ବିମାନବନ୍ଦର ପ୍ରାଧିକରଣ (AAI) ର ଅଧିକାରୀଙ୍କ ସୂଚନା ଅନୁଯାୟୀ, ଶୁକ୍ରବାର ସକାଳ ପ୍ରାୟ ୯.୩୦ ମିନିଟ୍ ସମୟରେ ଏହି ଘଟଣା ଘଟିଥିଲା। କୋଲକାତାରୁ ଅଗରତାଲା ଅଭିମୁଖେ ଯିବାକୁ ଥିବା ଇଣ୍ଡିଗୋ ଫ୍ଲାଇଟ୍ 6E6068 (VT-IPW) ବିମାନବନ୍ଦରର ଏରୋବ୍ରିଜ୍ 56L ରେ ପାର୍କିଂ କରାଯାଇଥିଲା। ବୋର୍ଡିଂ ପ୍ରକ୍ରିୟା ଶେଷ ହୋଇସାରିଥିବା ବେଳେ ହଠାତ୍ ବିମାନର 'ଅକ୍ସିଲାରି ପାୱାର୍ ୟୁନିଟ୍ (APU)' ଉପରେ ବଜ୍ରପାତ ହୋଇଥିଲା। ଏହା ଫଳରେ ବିମାନର ବିଦ୍ୟୁତ୍ ବ୍ୟବସ୍ଥା ବାଧାପ୍ରାପ୍ତ ହୋଇଥିଲା ଏବଂ ହଠାତ୍ ବିଦ୍ୟୁତ୍ ସରବରାହ ବନ୍ଦ ହୋଇଯାଇଥିଲା।

ଯାତ୍ରୀଙ୍କୁ ଅନ୍ୟ ବିମାନରେ ପଠାଗଲା

ବଜ୍ରପାତ କାରଣରୁ ବିମାନଟି ଯାତ୍ରା ପାଇଁ ଅନୁପଯୁକ୍ତ ହୋଇପଡ଼ିଥିଲା। ତେଣୁ ବିମାନ କର୍ତ୍ତୃପକ୍ଷ ତୁରନ୍ତ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ତଳକୁ ଓହ୍ଲାଇ ଦେଇଥିଲେ। ପରେ ସମସ୍ତ ଯାତ୍ରୀଙ୍କୁ ଅନ୍ୟ ଏକ ଏ୩୨୧ (A321) ବିମାନ (VT-ICD) ଯୋଗେ ଅଗରତାଲା ପଠାଯାଇଥିଲା। ସୂଚନାଯୋଗ୍ୟ ଯେ, ମୂଳ ବିମାନଟି ସକାଳ ୯.୨୦ ରେ ଉଡ଼ାଣ ଭରିବାକୁ ଥିବା ବେଳେ ବଦଳାଯାଇଥିବା ବିମାନଟି ଦିନ ୧୨.୫୦ ରେ ଅଗରତାଲା ଅଭିମୁଖେ ଯାତ୍ରା କରିଥିଲା।

୨ ଜଣ ଗ୍ରାଉଣ୍ଡ ଷ୍ଟାଫ୍ ସାମାନ୍ୟ ଆହତ

ଯଦିଓ କୌଣସି ଯାତ୍ରୀ ଏହି ଘଟଣାରେ ଆହତ ହୋଇନାହାଁନ୍ତି, ତଥାପି ବଜ୍ରପାତ ସମୟରେ ବାହାରେ କାର୍ଯ୍ୟରତ ଥିବା ୨ ଜଣ ଗ୍ରାଉଣ୍ଡ ଷ୍ଟାଫ୍ ସାମାନ୍ୟ ଆହତ ହୋଇଥିବା ନେଇ ଇଣ୍ଡିଗୋ ପକ୍ଷରୁ ସୂଚନା ଦିଆଯାଇଛି। ସେମାନଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା ଏବଂ ପ୍ରାଥମିକ ଚିକିତ୍ସା ପରେ ସେମାନେ ସୁସ୍ଥ ଥିବା ଡାକ୍ତରମାନେ ସ୍ପଷ୍ଟ କରିଛନ୍ତି।

ଶୁକ୍ରବାର ସକାଳୁ କୋଲକାତା ଏବଂ ଏହାର ଆଖପାଖ ଅଞ୍ଚଳରେ ପ୍ରବଳ ଝଡ଼ବର୍ଷା ଜାରି ରହିଛି। ଖରାପ ପାଗ ଯୋଗୁଁ ବିମାନବନ୍ଦରରେ ଉଡ଼ାଣ ବାଧାପ୍ରାପ୍ତ ହୋଇଥିବା ବେଳେ ଯାତ୍ରୀଙ୍କ ସୁରକ୍ଷା ପାଇଁ କର୍ତ୍ତୃପକ୍ଷ କଡ଼ା ନଜର ରଖିଛନ୍ତି।

କୋଲକାତା: ଶନିବାର ସକାଳେ କୋଲକାତାର ନେତାଜୀ ସୁଭାଷ ଚନ୍ଦ୍ର ବୋଷ ଅନ୍ତର୍ଜାତୀୟ ବିମାନବନ୍ଦରରେ ଏକ ବଡ଼ ଧରଣର ବୋମା ଆତଙ୍କ ଦେଖାଦେଇଛି। କୋଲକାତାରୁ ଶିଲଂ ଅଭିମୁଖେ ଯାଉଥିବା ଏକ ଇଣ୍ଡିଗୋ ବିମାନରେ ବୋମା ଥିବା ନେଇ ଖବର ମିଳିବା ପରେ ଯାତ୍ରୀମାନଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଥିଲା। ସୁରକ୍ଷା ଦୃଷ୍ଟିରୁ ତୁରନ୍ତ ବିମାନରୁ ସମସ୍ତ ଯାତ୍ରୀଙ୍କୁ ଓହ୍ଲାଇ ଦିଆଯାଇଛି।

ବିମାନର ଶୌଚାଳୟରୁ ମିଳିଲା ଚିଠି

ସୂଚନା ଅନୁଯାୟୀ, ଇଣ୍ଡିଗୋ ବିମାନ ୬ଇ ୩୦୭୪ (6E 3074) ଶନିବାର ସକାଳ ୯ଟା ୧୫ ମିନିଟରେ କୋଲକାତାରୁ ଶିଲଂ ଅଭିମୁଖେ ଉଡ଼ାଣ ଭରିବାର କାର୍ଯ୍ୟକ୍ରମ ଥିଲା। ତେବେ ବିମାନ ଉଡ଼ାଣ ପୂର୍ବରୁ ଯାତ୍ରୀମାନେ ବୋର୍ଡିଂ କରୁଥିବା ସମୟରେ ବିମାନର କ୍ରୁ ସଦସ୍ୟ ଶୌଚାଳୟରେ ଏକ କାଗଜ ଟୁକୁଡ଼ା ପାଇଥିଲେ। ଏଥିରେ ବିମାନ ଭିତରେ ବୋମା ଥିବା ନେଇ ଲେଖାଯାଇଥିଲା। ଏହି ଘଟଣା ସାମ୍ନାକୁ ଆସିବା ପରେ ତୁରନ୍ତ ବିମାନବନ୍ଦର କର୍ତ୍ତୃପକ୍ଷଙ୍କୁ ଏବିଷୟରେ ଜଣାଯାଇଥିଲା।

ଆଇସୋଲେସନ୍ ବେ’କୁ ନିଆଗଲା ବିମାନ

ବୋମା ଧମକ ମିଳିବା ପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ବିମାନରୁ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବରେ ଓହ୍ଲାଇ ଦିଆଯିବା ସହ ବିମାନଟିକୁ ଯାଞ୍ଚ ପାଇଁ ଏକ ‘ଆଇସୋଲେସନ୍ ବେ’ (ପୃଥକ ସ୍ଥାନ)କୁ ନିଆଯାଇଛି। ସେଠାରେ ବୋମା ନିଷ୍କ୍ରିୟକାରୀ ଦଳ (BDDS) ଏବଂ ସୁରକ୍ଷା ଏଜେନ୍ସି ପକ୍ଷରୁ ବିମାନଟିର ଟିକିନିଖି ଯାଞ୍ଚ କରାଯାଉଛି।

ବିମାନବନ୍ଦର ନିର୍ଦ୍ଦେଶକଙ୍କ ସୂଚନା ମୁତାବକ, ଯାତ୍ରୀମାନଙ୍କ ସୁରକ୍ଷାକୁ ପ୍ରାଥମିକତା ଦିଆଯାଇଛି ଏବଂ ସମସ୍ତ ପ୍ରକାର ସୁରକ୍ଷା ପ୍ରୋଟୋକଲ୍ ପାଳନ କରାଯାଉଛି। ତେବେ ଏହା ଏକ ପ୍ରକୃତ ଧମକ ନା କେବଳ ଏକ ଗୁଜବ, ତାହା ଯାଞ୍ଚ ଶେଷ ହେବା ପରେ ଜଣାପଡ଼ିବ।