ଲକ୍ଷ୍ନୌ: ଉତ୍ତରପ୍ରଦେଶର ଛାତ୍ରୀମାନଙ୍କ ପାଇଁ ଯୋଗୀ ସରକାରଙ୍କ ପକ୍ଷରୁ ଏକ ବଡ଼ ଉପହାର ଘୋଷଣା କରାଯାଇଛି। ମେଧାବୀ ଛାତ୍ରୀମାନଙ୍କୁ ପରୀକ୍ଷାରେ ଭଲ ପ୍ରଦର୍ଶନ ପାଇଁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ରାଜ୍ୟ ସରକାର ମାଗଣା ସ୍କୁଟି ପ୍ରଦାନ ଯୋଜନାକୁ ମଞ୍ଜୁରୀ ଦେଇଛନ୍ତି। କ୍ୟାବିନେଟ୍ ବୈଠକରେ ରାଣୀ ଲକ୍ଷ୍ମୀବାଈ ସ୍କୁଟି ଯୋଜନାକୁ ସବୁଜ ସଙ୍କେତ ମିଳିଛି। ଏହି ଯୋଜନା ଅନୁସାରେ ପ୍ରାୟ ୫୦ ହଜାର ମେଧାବୀ ଛାତ୍ରୀଙ୍କୁ ମାଗଣା ସ୍କୁଟି ଦିଆଯିବ ।

ଏହି ଯୋଜନା ଅଧୀନରେ ୨୦୨୫-୨୬ ଶିକ୍ଷାବର୍ଷରେ ସ୍ନାତକ (ଗ୍ରାଜୁଏସନ୍) ସ୍ତରରେ ପ୍ରତ୍ୟେକ କଲେଜ ଏବଂ ବିଶ୍ୱବିଦ୍ୟାଳୟର ଟପ୍-୫ ଛାତ୍ରୀମାନଙ୍କୁ ସରକାରଙ୍କ ପକ୍ଷରୁ ମାଗଣାରେ ସ୍କୁଟି ପ୍ରଦାନ କରାଯିବ। ସମସ୍ତ ସରକାରୀ, ବେସରକାରୀ, ସେଲ୍ଫ-ଫଣ୍ଡିଂ କିମ୍ବା ଅନ୍ୟାନ୍ୟ ସ୍ୱୀକୃତିପ୍ରାପ୍ତ ବିଶ୍ୱବିଦ୍ୟାଳୟ ଏବଂ କଲେଜଗୁଡ଼ିକୁ ଏହି ଯୋଜନାରେ ଅନ୍ତର୍ଭୁକ୍ତ କରାଯାଇଛି। ଉଚ୍ଚଶିକ୍ଷା ମନ୍ତ୍ରୀ ଯୋଗେନ୍ଦ୍ର ଉପାଧ୍ୟାୟଙ୍କ ସୂଚନା ଅନୁଯାୟୀ, ମେରିଟ୍ ଆଧାରରେ ଉତ୍ତୀର୍ଣ୍ଣ ଛାତ୍ରୀମାନଙ୍କୁ ଏହି ଲାଭ ମିଳିବ।

ପରିବାରର ବାର୍ଷିକ ଆୟ ନିର୍ଦ୍ଧାରିତ ସୀମା ମଧ୍ୟରେ ଥିବା ଯୋଗ୍ୟ ଛାତ୍ରୀଙ୍କୁ ଏହି ଯୋଜନାରେ ପ୍ରାଥମିକତା ଦିଆଯିବ । ନିରାଶ୍ରୟ, ଦିବ୍ୟାଙ୍ଗ କିମ୍ବା ସହିଦ ପରିବାରର ଛାତ୍ରୀମାନଙ୍କ ପାଇଁ ମେରିଟ୍ ଏବଂ ଆୟ ସୀମାର ନିୟମ ଲାଗୁ ହେବ ନାହିଁ ବୋଲି ମନ୍ତ୍ରୀ ସ୍ପଷ୍ଟ କରିଛନ୍ତି। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହି ବର୍ଗର ଛାତ୍ରୀମାନଙ୍କୁ ବାଧ୍ୟତାମୂଳକ ଭାବେ ସ୍କୁଟି ଯୋଗାଇଦେବାକୁ ନିର୍ଦ୍ଦେଶ ଦେଇଛନ୍ତି। ଚଳିତ ବର୍ଷ ଏହି ଯୋଜନା ପାଇଁ ପ୍ରାୟ ୪୦୦ କୋଟି ଟଙ୍କାର ବଜେଟ୍ ବ୍ୟବସ୍ଥା କରାଯାଇଥିବା ବେଳେ ପ୍ରଥମ ପର୍ଯ୍ୟାୟରେ ପ୍ରାୟ ୫୦,୦୦୦ ଛାତ୍ରୀ ଉପକୃତ ହେବେ।

ସରକାରଙ୍କ ମତରେ, ଦୂରଦୂରାନ୍ତରୁ କଲେଜକୁ ଯାଉଥିବା ଛାତ୍ରୀମାନଙ୍କ ପାଇଁ ଯାତାୟାତ ଏକ ବଡ଼ ସମସ୍ୟା । ଅନେକ ଥର ପିଲାମାନେ ପଢା ମଧ୍ୟ ଛାଡିଦେଉଛନ୍ତି । ଏହାକୁ ଧ୍ୟାନରେ ରଖି ସରକାର ଛାତ୍ରୀମାନଙ୍କୁ ସ୍କୁଟି ଉପଲବ୍ଧ କରାଇବା ପାଇଁ ନିଷ୍ପତ୍ତି ନିଆଯାଇଛି । ମାଗଣା ସ୍କୁଟି ମିଳିଲେ ସେମାନେ ସହଜରେ ଉଚ୍ଚଶିକ୍ଷା ଜାରି ରଖିପାରିବେ ଏବଂ ଆତ୍ମନିର୍ଭରଶୀଳ ହୋଇପାରିବେ । ସୁଟିଂ ସହିତ ପଞ୍ଜିକରଣ, ବୀମା, ହେଲମେଟ, ୪ ଲିଟର ପେଟ୍ରୋଲ ଏବଂ ଜରୁରୀ ଉପକରଣ ମିଳିବ।

ଉତ୍ତରପ୍ରଦେଶର ନୋଏଡା ସ୍ଥିତ ଏକ ଗାଁରେ ଏକ ବଡ଼ ଧରଣର ଅଗ୍ନିକାଣ୍ଡ ଘଟିଛି। ଏହି ଦୁର୍ଘଟଣାରେ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ବହୁ ଲୋକ ଆହତ ହୋଇଥିବା ସୂଚନା ମିଳିଛି। ଇଲେକ୍ଟ୍ରିକ୍ ବାଇକ୍‌ରେ ସ୍ପାର୍କିଂ ହେବା କାରଣରୁ ଏହି ନିଆଁ ଲାଗିଥିଲା, ଯାହାକି ପରେ ଏକ ଭୟାନକ ରୂପ ନେଇଥିଲା। ଏହି ଘଟଣାରେ ପାଖାପାଖି ୫୦ଟି ପରିବାର ଫସି ରହିଥିଲେ, ଯେଉଁମାନଙ୍କୁ ସୁରକ୍ଷିତ ଭାବେ ଉଦ୍ଧାର କରିବା ପାଇଁ ଅଗ୍ନିଶମ ବାହିନୀ ପକ୍ଷରୁ ବ୍ୟାପକ ପ୍ରୟାସ କରାଯାଇଛି।

କେମିତି ଘଟିଲା ଅଘଟଣ?

ରିପୋର୍ଟ ଅନୁଯାୟୀ, ଫେଜ୍-୩ ଥାନା ଅନ୍ତର୍ଗତ ମାମୁରା ଗାଁରେ ଥିବା ଏକ ଆବାସିକ କୋଠାରେ ଏକ ଇଲେକ୍ଟ୍ରିକ୍ ବାଇକ୍ ପାର୍କିଂ କରି ରଖାଯାଇଥିଲା। ହଠାତ୍ ସେହି ଇଲେକ୍ଟ୍ରିକ୍ ବାଇକ୍‌ରେ ସ୍ପାର୍କିଂ ହୋଇ ନିଆଁ ଲାଗିଯାଇଥିଲା। ଦେଖୁ ଦେଖୁ ନିଆଁ ଚତୁର୍ଦ୍ଦିଗକୁ ବ୍ୟାପିଯାଇଥିଲା ଏବଂ ସମ୍ପୂର୍ଣ୍ଣ ବିଲ୍ଡିଂକୁ ନିଜ କବଳକୁ ନେଇଯାଇଥିଲା। ନିଆଁ ଏତେ ଶୀଘ୍ର ବ୍ୟାପିଥିଲା ଯେ, ବିଲ୍ଡିଂ ଭିତରେ ଥିବା ପ୍ରାୟ ୫୦ଟି ପରିବାର ତଳକୁ ଓହ୍ଲାଇ ପାରିନଥିଲେ ଏବଂ ଭିତରେ ଫସି ରହିଥିଲେ। ଧୂଆଁ ଏବଂ ନିଆଁ ଯୋଗୁଁ ଶ୍ୱାସରୁଦ୍ଧ ହୋଇ ୨ ଜଣଙ୍କର ମୃତ୍ୟୁ ଘଟିଛି।

ଉଦ୍ଧାର କାର୍ଯ୍ୟ ଓ ପୋଲିସର ତଦନ୍ତ

ଅଗ୍ନିକାଣ୍ଡ ସମ୍ପର୍କରେ ଖବର ପାଇବା ମାତ୍ରେ ସ୍ଥାନୀୟ ପୋଲିସ ଏବଂ ଅଗ୍ନିଶମ ବାହିନୀର ଏକାଧିକ ଗାଡ଼ି ଘଟଣାସ୍ଥଳରେ ପହଞ୍ଚିଥିଲେ। ଅଗ୍ନିଶମ ବାହିନୀର କର୍ମଚାରୀମାନେ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଘଣ୍ଟା ଘଣ୍ଟାର କଠିନ ପରିଶ୍ରମ ପରେ ନିଆଁକୁ ଆୟତ୍ତ କରାଯାଇଥିଲା। ଫସି ରହିଥିବା ଲୋକମାନଙ୍କୁ ସୁରକ୍ଷିତ ଭାବେ ତଳକୁ ଅଣାଯାଇଥିଲା। ବର୍ତ୍ତମାନ ପୋଲିସ ଏବଂ ପ୍ରଶାସନ ଘଟଣାର ତଦନ୍ତ କରୁଛନ୍ତି। ଇଲେକ୍ଟ୍ରିକ୍ ଯାନଗୁଡ଼ିକରେ ବାରମ୍ବାର ଘଟୁଥିବା ଏଭଳି ଅଗ୍ନିକାଣ୍ଡ ସ୍ଥାନୀୟ ଲୋକଙ୍କ ମଧ୍ୟରେ ଭୟ ଓ ଚିନ୍ତା ସୃଷ୍ଟି କରିଛି।

ଉତ୍ତରପ୍ରଦେଶର ମହାରାଜଗଞ୍ଜ ନିକଟସ୍ଥ ଭାରତ-ନେପାଳ ସୀମାରୁ ଜଣେ ଆମେରିକୀୟ ନାଗରିକଙ୍କୁ ଗିରଫ କରାଯାଇଛି। ବିନା କୌଣସି ବୈଧ କାଗଜପତ୍ର କିମ୍ବା ପାସପୋର୍ଟରେ ନେପାଳ ମଧ୍ୟକୁ ପ୍ରବେଶ କରିବାକୁ ଉଦ୍ୟମ କରୁଥିବା ବେଳେ ସଶସ୍ତ୍ର ସୀମା ବଳ (ଏସଏସବି) ତାଙ୍କୁ କାବୁ କରିଛି। ଗିରଫ ହୋଇଥିବା ବ୍ୟକ୍ତି ଜଣକ ନିଜକୁ ଆମେରିକାର କାଲିଫର୍ଣ୍ଣିଆର ବାସିନ୍ଦା ଜୋର୍ଡାନ ବ୍ରାଉନ୍ (୩୬ ବର୍ଷ) ଏବଂ ଜଣେ ପୂର୍ବତନ ଆମେରିକୀୟ ନୌସେନା ଓ ସ୍ୱତନ୍ତ୍ର ବାହିନୀ (Special Forces) ର କମାଣ୍ଡୋ ବୋଲି ଦାବି କରିଛନ୍ତି। ତେବେ ତାଙ୍କର ଭାରତ ଆସିବାର ପ୍ରକୃତ ଉଦ୍ଦେଶ୍ୟ ଏବେ ମଧ୍ୟ ଏକ ରହସ୍ୟ ହୋଇ ରହିଛି।

ସୂଚନା ଅନୁଯାୟୀ, ଗତ ଜୁଲାଇ ୧୧ ତାରିଖ ଦିନ ସୋନୌଲି ସୀମା ନିକଟରେ ଏସଏସବି ଯବାନମାନେ ନିୟମିତ ଯାଞ୍ଚ କରୁଥିବା ସମୟରେ ତାଙ୍କୁ ଅଟକାଇଥିଲେ। କିନ୍ତୁ ପଚରାଉଚରା ବେଳେ ସେ ଘଟଣାସ୍ଥଳରୁ ଖସି ପଳାଇବାକୁ ଉଦ୍ୟମ କରିଥିଲେ। ସୁରକ୍ଷାକର୍ମୀମାନେ ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ଗୋଡ଼ାଇ ଧରିବାରେ ସଫଳ ହୋଇଥିଲେ। ତଲାସୀ ସମୟରେ ତାଙ୍କ ନିକଟରୁ କୌଣସି ପାସପୋର୍ଟ କିମ୍ବା ଭିସା ମିଳିନଥିଲା, ବରଂ ତାଙ୍କ ପାଖରୁ ୩୧,୪୬୦ ଟଙ୍କା ନଗଦ ଏବଂ ଦୁଇଟି ମୋବାଇଲ୍ ଫୋନ୍ ଜବତ କରାଯାଇଛି।

ସମୁଦ୍ର ପଥ ଦେଇ ଭାରତରେ ପ୍ରବେଶ

ପଚରାଉଚରା ବେଳେ ବ୍ରାଉନ୍ ପୋଲିସକୁ ଏକ ଆଶ୍ଚର୍ଯ୍ୟଜନକ କାହାଣୀ ଶୁଣାଇଛନ୍ତି। ସେ ଦାବି କରିଛନ୍ତି ଯେ ସେ ପ୍ରଥମେ ଏକ ଟୁରିଷ୍ଟ ଭିସାରେ ଥାଇଲ୍ୟାଣ୍ଡ ଯାଇଥିଲେ, ଯେଉଁଠାରେ ତାଙ୍କର ପାସପୋର୍ଟ ହଜି ଯାଇଥିଲା। ଏହା ପରେ ସେ ସମୁଦ୍ର ପଥ ଦେଇ ଶ୍ରୀଲଙ୍କାରେ ପହଞ୍ଚିଥିଲେ ଏବଂ ପରେ ନଭେମ୍ବର ୨, ୨୦୨୫ ରେ ସମୁଦ୍ର ପଥ ଦେଇ ବେଆଇନ ଭାବେ ଭାରତରେ ପ୍ରବେଶ କରିଥିଲେ। ଭାରତରେ ପହଞ୍ଚିବା ପରେ ସେ ପ୍ରାୟ ସାତ ମାସ ଧରି ଗୋଆରେ ରହୁଥିଲେ। ନିକଟରେ ସେ ବେଙ୍ଗାଲୁରୁରୁ ଉତ୍ତରପ୍ରଦେଶର ସୋନୌଲି ସୀମାରେ ପହଞ୍ଚି ନେପାଳ ଯିବାକୁ ଉଦ୍ୟମ କରୁଥିଲେ।

ଗୁଇନ୍ଦା ସଂସ୍ଥା ଦ୍ୱାରା ତଦନ୍ତ ଜାରି

ବିନା କାଗଜପତ୍ରରେ ଭାରତରେ ଅନୁପ୍ରବେଶ କରିଥିବା ଅଭିଯୋଗରେ ତାଙ୍କ ବିରୋଧରେ ଇମିଗ୍ରେସନ୍ ଆଣ୍ଡ ଫରେନର୍ସ ଆକ୍ଟର ଧାରା ୨୧ ଏବଂ ୨୩ ଅନୁଯାୟୀ ମାମଲା ରୁଜୁ କରାଯାଇଛି। ତାଙ୍କୁ ନ୍ୟାୟିକ ହେପାଜତକୁ ପଠାଇ ଦିଆଯାଇଛି ଏବଂ ଏହି ଘଟଣା ସମ୍ପର୍କରେ ଆମେରିକୀୟ ଦୂତାବାସକୁ ମଧ୍ୟ ଅବଗତ କରାଯାଇଛି। ବର୍ତ୍ତମାନ ଏକାଧିକ କେନ୍ଦ୍ରୀୟ ଗୁଇନ୍ଦା ସଂସ୍ଥା ଏବଂ ପୋଲିସ ତାଙ୍କର ଏହି ଦାବିର ସତ୍ୟତା, ଗୋଆରୁ ୟୁପି ପର୍ଯ୍ୟନ୍ତର ଯାତ୍ରା ଏବଂ ଭାରତ ଭ୍ରମଣର ପ୍ରକୃତ ଉଦ୍ଦେଶ୍ୟ ସମ୍ପର୍କରେ ତଦନ୍ତ ଚଳାଇଛନ୍ତି ।

ଶ୍ରୀରାମ ମନ୍ଦିର ନିର୍ମାଣ ପାଇଁ ଆସିଥିବା ଚାନ୍ଦା ଅର୍ଥ ହେରଫେର ଏବଂ ଜମି କିଣା ଦୁର୍ନୀତି ମାମଲାରେ ଏବେ ନୂଆ ମୋଡ଼ ଆସିଛି। ପ୍ରଧାନମନ୍ତ୍ରୀ କାର୍ଯ୍ୟାଳୟ (PMO) ରାମ ମନ୍ଦିର ଟ୍ରଷ୍ଟଠାରୁ ସମ୍ପୂର୍ଣ୍ଣ ଆର୍ଥିକ ହିସାବ ମାଗିଥିବା ବେଳେ ଟ୍ରଷ୍ଟ ଏହାକୁ ପ୍ରଦାନ କରିବାକୁ ସିଧାସଳଖ ମନା କରିଦେଇଛି। ଟ୍ରଷ୍ଟ ପକ୍ଷରୁ କୁହାଯାଇଛି ଯେ ବର୍ତ୍ତମାନ ଏସଆଇଟି (SIT) ତଦନ୍ତ ଚାଲିଥିବାରୁ ପ୍ରଶାସନକୁ କୌଣସି ଆର୍ଥିକ ତଥ୍ୟ ଦିଆଯାଇପାରିବ ନାହିଁ।

ପିଏମଓଙ୍କ ଚିଠି ଏବଂ ଟ୍ରଷ୍ଟର ପ୍ରତ୍ୟାଖ୍ୟାନ

ସୂଚନା ଅନୁଯାୟୀ, ରାମ ମନ୍ଦିରରେ ଚାନ୍ଦା ଅର୍ଥ ଚୋରି ଏବଂ ଜମି କ୍ରୟରେ ହୋଇଥିବା ଅନିୟମିତତାକୁ ନେଇ ପ୍ରଧାନମନ୍ତ୍ରୀ କାର୍ଯ୍ୟାଳୟ ପକ୍ଷରୁ ଏକ ଚିଠି ଲେଖାଯାଇଥିଲା। ଏହି ଚିଠି ଆଧାରରେ ଅଯୋଧ୍ୟା ଜିଲ୍ଲା ପ୍ରଶାସନ ଶ୍ରୀ ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ସହ ଯୋଗାଯୋଗ କରି ସମ୍ପୂର୍ଣ୍ଣ ଆର୍ଥିକ ବିବରଣୀ ମାଗିଥିଲେ। କିନ୍ତୁ ଟ୍ରଷ୍ଟର ମହାସଚିବ ଚମ୍ପତ ରାୟ ଏସଆଇଟି ତଦନ୍ତର କାରଣ ଦର୍ଶାଇ ପ୍ରଶାସନକୁ କୌଣସି ତଥ୍ୟ ଦେବାକୁ ରୋକଠୋକ୍ ମନା କରିଦେଇଛନ୍ତି।

ଏସଆଇଟି ତଦନ୍ତରେ ୧୭ ଜଣ ଅଭିଯୁକ୍ତ

ଉତ୍ତରପ୍ରଦେଶ ସରକାର ଏହି ଚାନ୍ଦା ଚୋରି ଓ ଆର୍ଥିକ ହେରଫେର ମାମଲାର ତଦନ୍ତ ପାଇଁ ଏକ ତିନି ଜଣିଆ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଗଠନ କରିଥିଲେ। ଏସଆଇଟି ତଦନ୍ତ ରିପୋର୍ଟରେ ଟ୍ରଷ୍ଟର ମହାସଚିବ ଚମ୍ପତ ରାୟ ଏବଂ ଟ୍ରଷ୍ଟି ଡକ୍ଟର ଅନିଲ ମିଶ୍ରଙ୍କ ସମେତ ମୋଟ ୧୭ ଜଣଙ୍କୁ ଅଭିଯୁକ୍ତ ଭାବେ ଦର୍ଶାଯାଇଛି। ରିପୋର୍ଟ ଅନୁସାରେ, ଖୁବଶୀଘ୍ର ଏହି ଅଭିଯୁକ୍ତମାନଙ୍କ ନାମରେ ଏଫଆଇଆର (FIR) ରୁଜୁ ହେବା ପ୍ରାୟ ନିଶ୍ଚିତ ହୋଇଛି।

ଦାନବାକ୍ସର ଚାବି ଉଦ୍ଧାର

ଏସଆଇଟି ତଦନ୍ତ ବେଳେ ଅନେକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ମନ୍ଦିରର ଦାନବାକ୍ସଗୁଡ଼ିକର ଚାବି ଟିନ୍ନୁ ନାମକ ଜଣେ ବ୍ୟକ୍ତିଙ୍କ ପାଖରୁ ଜବତ କରାଯାଇଛି। ଏତେ ବଡ଼ ଆର୍ଥିକ ଦୁର୍ନୀତି ମାମଲାରେ ଏସଆଇଟି ଏବେ ପୁଙ୍ଖାନୁପୁଙ୍ଖ ତଦନ୍ତ ଜାରି ରଖିଛି। ଅନ୍ୟପକ୍ଷରେ, କେନ୍ଦ୍ର ସରକାରଙ୍କ ହସ୍ତକ୍ଷେପ ସତ୍ତ୍ୱେ ଟ୍ରଷ୍ଟର ଏଭଳି ଆଭିମୁଖ୍ୟକୁ ନେଇ ସାଧାରଣରେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି।

କାନପୁର: ପ୍ରେମ ଅନ୍ଧ ବୋଲି ସମସ୍ତେ କୁହନ୍ତି, କିନ୍ତୁ ଏହା ଯେ କୌଣସି ସୀମା ବା ସମ୍ପର୍କକୁ ମାନେ ନାହିଁ, ତାହା ପୁଣିଥରେ ପ୍ରମାଣିତ ହୋଇଛି। ଉତ୍ତରପ୍ରଦେଶର କାନପୁର ଦେହାତ ଅଞ୍ଚଳରେ ଏକ ଅଜବ ତଥା ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ବ୍ୟକ୍ତି ନିଜର ସମ୍ପର୍କୀୟ ଶାଶୁଙ୍କ ସହ ପ୍ରେମରେ ପଡ଼ିବା ପରେ ତାଙ୍କୁ ବିବାହ କରିଛନ୍ତି।

ସୂଚନା ଅନୁଯାୟୀ, ଏହି ଘଟଣାଟି ଆକବରପୁର ଅଞ୍ଚଳର। ବିବାହ ପରେ ଜ୍ୱାଇଁ ନିଜ ଶାଶୁ ଘରକୁ ଯିବାଆସିବା କରୁଥିଲେ। ଏହି ସମୟରେ ସେ ନିଜ ଶାଶୁଙ୍କ ପ୍ରତି ଆକର୍ଷିତ ହୋଇଥିଲେ ଏବଂ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ସେମାନଙ୍କ ମଧ୍ୟରେ ବୟସର ବ୍ୟବଧାନ ଥିଲେ ମଧ୍ୟ, ସେମାନେ ସମାଜର ନିନ୍ଦା ଅପବାଦକୁ ଖାତିର କରିନଥିଲେ। ସମ୍ପର୍କ ଏତେ ନିବିଡ଼ ହୋଇଗଲା ଯେ ସେମାନଙ୍କର ଏକ ସନ୍ତାନ ମଧ୍ୟ ଥିବା ଜଣାପଡିଛି।

ଶେଷରେ ଉଭୟେ ଘରୁ ଫେରାର ହୋଇଯାଇଥିଲେ ଏବଂ ଏକ କୋର୍ଟରେ ବିବାହ କରିଥିଲେ। ବିବାହ ପରେ ସେମାନେ ସୋସିଆଲ ମିଡିଆରେ ଏକ ଭିଡିଓ ଜାରି କରିଛନ୍ତି। ଏହି ଭିଡିଓରେ ସେମାନେ ନିଜର ବିବାହ ପ୍ରମାଣପତ୍ର (କୋର୍ଟ ସାର୍ଟିଫିକେଟ୍) ଦେଖାଇବା ସହ ସ୍ୱେଚ୍ଛାକୃତ ଭାବେ ବିବାହ କରିଥିବା ଦର୍ଶାଇଛନ୍ତି। ବର୍ତ୍ତମାନ ଏହି ଭିଡିଓଟି ଭାଇରାଲ୍ ହେବାରେ ଲାଗିଛି। ସମାଜ ସେମାନଙ୍କର ଏହି ସମ୍ପର୍କକୁ ଗ୍ରହଣ କରିବା ସହ ଆଶୀର୍ବାଦ କରିବ ବୋଲି ନବଦମ୍ପତି ଆଶାବ୍ୟକ୍ତ କରିଛନ୍ତି।

ଉତ୍ତରପ୍ରଦେଶ: ଉତ୍ତରପ୍ରଦେଶର ମିର୍ଜାପୁର ଜିଲ୍ଲାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଦୁଇଟି ଟ୍ରକ୍ ମଝିରେ ଏକ କାର୍ ଚାପି ହୋଇଯିବା ଫଳରେ ଏହି ସିରିଜ ଦୁର୍ଘଟଣା ଘଟିଛି। ଏହି ଭୟଙ୍କର ଦୁର୍ଘଟଣାରେ ଶିଶୁଙ୍କ ସମେତ ମୋଟ ୧୧ ଜଣଙ୍କର ମୃତ୍ୟୁ ଘଟିଥିବା ପୋଲିସ ଗୁରୁବାର ଦିନ ସୂଚନା ଦେଇଛି। ଡ୍ରାମଣ୍ଡଗଞ୍ଜ ଘାଟିରୁ ଲାସୋଡା ଅଞ୍ଚଳକୁ ଖସୁଥିବା ଏକ ରାସ୍ତାରେ ଏହି ଦୁର୍ଘଟଣା ଘଟିଥିଲା।

ପୋଲିସର ପ୍ରାଥମିକ ତଦନ୍ତ ଅନୁଯାୟୀ, ଘାଟିରୁ ତଳକୁ ଖସୁଥିବା ଏକ ଟ୍ରକର ବ୍ରେକ୍ ଫେଲ୍ ହୋଇଯିବା କାରଣରୁ ଏହି ଦୁର୍ଘଟଣା ଘଟିଥିଲା ବୋଲି ସନ୍ଦେହ କରାଯାଉଛି। ଏକ ଟ୍ରକ୍ ନିୟନ୍ତ୍ରଣ ହରାଇ ତା' ଆଗରେ ଯାଉଥିବା ଅନ୍ୟ ଏକ ଟ୍ରକକୁ ଧକ୍କା ଦେଇଥିଲା। ଏହି ସମୟରେ ଦୁଇ ଟ୍ରକ୍ ମଝିରେ ଯାଉଥିବା ଏକ ଅଲ୍ଟୋ କାର୍ ସମ୍ପୂର୍ଣ୍ଣ ରୂପେ ଚାପି ହୋଇଯାଇଥିଲା। ଏହି ଶୃଙ୍ଖଳାବଦ୍ଧ ଧକ୍କା ପରେ ଅନ୍ୟ ଏକ ବୋଲେରୋ କାର୍ ମଧ୍ୟ ଏହା ସହ ପିଟି ହୋଇ ନିଆଁ ଲାଗିଯାଇଥିଲା।

ଦୁର୍ଘଟଣା ସମ୍ପର୍କରେ ଖବର ପାଇବା ମାତ୍ରେ ପୋଲିସ ଏବଂ ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ସ୍ଥାନୀୟ ବାସିନ୍ଦାଙ୍କ ସହାୟତାରେ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ମିର୍ଜାପୁରର ପୋଲିସ ଅଧୀକ୍ଷକ (ଏସପି) ଅପର୍ଣ୍ଣା ରଜତ କୌଶିକ ସୂଚନା ଦେଇ କହିଛନ୍ତି ଯେ କ୍ଷତିଗ୍ରସ୍ତ ଯାନବାହନ ଭିତରେ ଫସି ରହିଥିବା ଲୋକଙ୍କୁ ଉଦ୍ଧାର କରାଯାଇଛି। ବର୍ତ୍ତମାନ ସୁଦ୍ଧା ୧୧ ଜଣଙ୍କର ମୃତ୍ୟୁ ହୋଇଥିବା ରିପୋର୍ଟ ମିଳିଛି ଏବଂ ସମସ୍ତ ମୃତକଙ୍କ ପରିଚୟ ଜାଣିବା ପାଇଁ ଉଦ୍ୟମ ଜାରି ରହିଛି।

ଉତ୍ତରପ୍ରଦେଶର ପ୍ରୟାଗରାଜ ଅନ୍ତର୍ଗତ ଫାଫାମଉ ଅଞ୍ଚଳରେ ସୋମବାର ଏକ ବଡ଼ ଧରଣର ଅଘଟଣ ଘଟିଛି। ଏକ କୋଲ୍ଡ ଷ୍ଟୋରେଜର କାନ୍ଥ ଭୁଶୁଡ଼ି ପଡ଼ିବାରୁ ମାଟି ଅତଡ଼ା ତଳେ ଚାପି ହୋଇ ୯ ଜଣ ଶ୍ରମିକଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି। ଆମୋନିଆ ଗ୍ୟାସ୍ ପାଇପ୍ ଫାଟିଯିବା କାରଣରୁ ଏହି ଦୁର୍ଘଟଣା ଘଟିଥିବା ଜଣାପଡ଼ିଛି।

କିପରି ଘଟିଲା ଦୁର୍ଘଟଣା?

ସୂଚନା ଅନୁଯାୟୀ, ଦୁର୍ଘଟଣା ସମୟରେ କୋଲ୍ଡ ଷ୍ଟୋରେଜ୍‌ ଭିତରେ ପ୍ରାୟ ୨୦ ଜଣ ଶ୍ରମିକ କାମ କରୁଥିଲେ। ହଠାତ୍ ଏକ ଶକ୍ତିଶାଳୀ ବିସ୍ଫୋରଣ ଶବ୍ଦ ଶୁଭିବା ସହ କାନ୍ଥଟି ଭୁଶୁଡ଼ି ପଡ଼ିଥିଲା। ଆମୋନିଆ ଗ୍ୟାସ୍ ପାଇପ୍ ଫାଟିଯିବା ଯୋଗୁଁ କାନ୍ଥଟି ଭାଙ୍ଗିପଡ଼ିଥିବା ପ୍ରାଥମିକ ତଦନ୍ତରୁ ଜଣାପଡିଛି। ଗ୍ୟାସ୍ ଲିକ୍ ହେବା ଫଳରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା ଏବଂ ଲୋକଙ୍କ ମଧ୍ୟରେ ଧାଁଦଉଡ଼ ପରିସ୍ଥିତି ସୃଷ୍ଟି ହୋଇଥିଲା।

ଉଦ୍ଧାର କାର୍ଯ୍ୟ ଜାରି

ଖବର ପାଇ ପୋଲିସ, ଅଗ୍ନିଶମ ବାହିନୀ ଏବଂ ଏସଡିଆରଏଫ୍ (SDRF) ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ୭ଟି ବୁଲଡୋଜର ନିୟୋଜିତ କରାଯାଇଛି। ବର୍ତ୍ତମାନ ସୁଦ୍ଧା ମାଟି ତଳୁ ୭ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ବେଳେ, ଅନ୍ୟ ଫସି ରହିଥିବା ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ଅଭିଯାନ ଜୋରସୋରରେ ଚାଲିଛି। ଆହତମାନଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଛି।

ତଦନ୍ତ ଓ କାର୍ଯ୍ୟାନୁଷ୍ଠାନ

ଏହି କୋଲ୍ଡ ଷ୍ଟୋରେଜ୍‌ଟି ଚାନ୍ଦପୁରର ଜଣେ ପୂର୍ବତନ ବିଧାୟକଙ୍କର ବୋଲି ସୂଚନା ମିଳିଛି। ସୁରକ୍ଷା ବ୍ୟବସ୍ଥାରେ ଅବହେଳା ଏବଂ ରକ୍ଷଣାବେକ୍ଷଣରେ ତ୍ରୁଟି ଅଭିଯୋଗରେ ପୋଲିସ କୋଲ୍ଡ ଷ୍ଟୋରେଜର ମ୍ୟାନେଜର ଏବଂ ଅନ୍ୟ କିଛି ବରିଷ୍ଠ କର୍ମଚାରୀଙ୍କୁ ଅଟକ ରଖି ପଚରାଉଚରା କରୁଛି। ଉଦ୍ଧାର କାର୍ଯ୍ୟରେ ଯେପରି କୌଣସି ବାଧା ନଆସେ, ସେଥିପାଇଁ ପୋଲିସ ପକ୍ଷରୁ ଉକ୍ତ ରାସ୍ତାରେ ଯାତାୟାତକୁ ଡାଇଭର୍ସନ୍ କରାଯାଇଛି। ଏହି ହୃଦୟବିଦାରକ ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।

ମିରଟ ପୋଲିସ ଏକ ବଡ଼ ଧରଣର ଅନ୍ତର୍ଜାତୀୟ ସାଇବର ଠକେଇ ନେଟୱର୍କର ପର୍ଦ୍ଦାଫାଶ କରିଛି। ପାଠପଢ଼ା ନାଁରେ ଭାରତରେ ପ୍ରବେଶ କରି ଲୋକଙ୍କୁ କୋଟି କୋଟି ଟଙ୍କା ଠକୁଥିବା ଜଣେ ନାଇଜେରିଆ ନାଗରିକଙ୍କୁ ପୋଲିସ ଗିରଫ କରିଛି। ଗିରଫ ହୋଇଥିବା ଅଭିଯୁକ୍ତର ନାମ ସୈଫୁ ମୟାନା ଉମର ବୋଲି ଜଣାପଡ଼ିଥିବା ବେଳେ, ସେ ମିରଟର ପ୍ରସିଦ୍ଧ ସୁଭାରତୀ ୟୁନିଭରସିଟିରେ ବିଏସସି ନର୍ସିଂ (BSc Nursing) ପଢ଼ୁଥିଲା।

୨୦ ମାସରେ ୮ କୋଟି ଟଙ୍କାର ଠକେଇ

ପୋଲିସ ସୂଚନା ଅନୁଯାୟୀ, ଅଭିଯୁକ୍ତ ଉମର ଗତ ୨୦ ମାସ ଧରି ଏହି ସାଇବର ଠକେଇ ନେଟୱର୍କ ଚଳାଉଥିଲା। ଗେମିଂ ଆପ୍, ଅନଲାଇନ୍ ଟ୍ରେଡିଂ ଏବଂ ଅନଲାଇନ୍ ଲୋନ୍ ଦେବା ବାହାନାରେ ସେ ଲୋକଙ୍କଠାରୁ ପ୍ରାୟ ୮ କୋଟି ଟଙ୍କା ଠକି ନେଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। କେବଳ ତାହାର ଗୋଟିଏ ବ୍ୟାଙ୍କ ଆକାଉଣ୍ଟରୁ ୪୫ ଲକ୍ଷ ଟଙ୍କାର ନେଣଦେଣ ହୋଇଥିବା ପୋଲିସ ଠାବ କରିଛି। ତେବେ ଠକେଇରେ ବ୍ୟବହୃତ ହୋଇଥିବା ତାର ଅନ୍ୟ ୪ଟି ବ୍ୟାଙ୍କ ଆକାଉଣ୍ଟ ଏବେ ସମ୍ପୂର୍ଣ୍ଣ ଖାଲି ହୋଇଯାଇଛି।

ମାଷ୍ଟରମାଇଣ୍ଡ ସାଥୀ ଫେରାର୍

ଏହି ଠକେଇ ଗ୍ୟାଙ୍ଗର ମାଷ୍ଟରମାଇଣ୍ଡ ତଥା ଉମରର ସାଥୀ ୟୁସୁଫ୍ ବର୍ତ୍ତମାନ ଫେରାର୍ ଅଛି। ୟୁସୁଫ୍ ମଧ୍ୟ ଜଣେ ନାଇଜେରିଆ ନାଗରିକ ଏବଂ ସେ ହରିୟାଣାରେ ନର୍ସିଂ ପଢ଼ା ଶେଷ କରିସାରିଛି। ବିଭିନ୍ନ ବ୍ୟାଙ୍କ ଆକାଉଣ୍ଟରେ ଟଙ୍କା ଜମା କରିବା ଏବଂ ତାହାକୁ ଉଠାଇବା କାମ ୟୁସୁଫ୍ କରୁଥିଲା। ପୋଲିସ ଚଢ଼ାଉ କରିବା ପୂର୍ବରୁ ସେ ନାଇଜେରିଆ ଫେରିଯାଇଥିବା ସନ୍ଦେହ କରାଯାଉଛି।

ବିଭିନ୍ନ ରାଜ୍ୟରେ ୧୬ଟି ମାମଲା ରୁଜୁ

ଏହି ଘଟଣା ନେଇ ମିରଟର ଏସପି ସିଟି ଆୟୁଷ ବିକ୍ରମ କହିଛନ୍ତି ଯେ, ଅଭିଯୁକ୍ତ ଉମର ୨୦୨୨-୨୩ ମସିହାରେ ସୁଭାରତୀ କଲେଜରେ ନାମ ଲେଖାଇଥିଲା ଏବଂ ପାଠପଢ଼ା ସହିତ ସାଇବର କ୍ରାଇମ୍ କରୁଥିଲା। ତା' ନାମରେ ଉତ୍ତରପ୍ରଦେଶ, ଆନ୍ଧ୍ରପ୍ରଦେଶ, ଦିଲ୍ଲୀ, ତାମିଲନାଡୁ, ଓଡ଼ିଶା, ତେଲେଙ୍ଗାନା, ରାଜସ୍ଥାନ ଏବଂ ପଶ୍ଚିମବଙ୍ଗ ଆଦି ରାଜ୍ୟରେ ମୋଟ ୧୬ଟି ମାମଲା ରୁଜୁ ହୋଇଛି। ବର୍ତ୍ତମାନ ଟିପି ନଗର ଥାନା ପୋଲିସ ଅଭିଯୁକ୍ତକୁ ରିମାଣ୍ଡରେ ନେଇ ଅଧିକ ପଚରାଉଚରା କରିବା ସହ ନେଟୱର୍କରେ ସାମିଲ ଥିବା ଅନ୍ୟ ସଦସ୍ୟମାନଙ୍କୁ ଖୋଜିବା ଆରମ୍ଭ କରିଛି।

ଉତ୍ତରପ୍ରଦେଶର ମିରଟରେ ଜଣେ ନକଲି ଆଇଏଏସ୍ ଅଧିକାରୀ ପୋଲିସ ହାତରେ ଧରାପଡ଼ିଛନ୍ତି। ନିଜକୁ ୨୦୦୮ ବ୍ୟାଚ୍ର ଜଣେ ଆଇଏଏସ୍ ଅଧିକାରୀ (IAS Officer) ତଥା ଭାରତ ସରକାରଙ୍କ ଡେପୁଟି ସେକ୍ରେଟାରୀ (Deputy Secretary) ବୋଲି ପରିଚୟ ଦେଉଥିବା ଜଣେ ବ୍ୟକ୍ତିଙ୍କୁ ପୋଲିସ ଗିରଫ କରିଛି। ଅଭିଯୁକ୍ତ ଜଣକ ମଦ୍ୟପାନ କରି ପୋଲିସ ଏବଂ ବରିଷ୍ଠ ଅଧିକାରୀମାନଙ୍କୁ ଫୋନ୍ କରି ଧମକାଉଥିବା ସମୟରେ ଧରାପଡ଼ିଥିଲେ।

ନିଶାରେ ଥିଲା, ଅଧିକାରୀଙ୍କୁ କରୁଥିଲା ଫୋନ୍

ମିରଟର ନୌଚଣ୍ଡୀ ଥାନା ଅଞ୍ଚଳରେ ଏହି ଘଟଣା ଘଟିଛି। ଗିରଫ ଅଭିଯୁକ୍ତଙ୍କ ନାମ ହେଉଛି ରାହୁଲ କୌଶିକ୍। ପୋଲିସର ସୂଚନା ଅନୁଯାୟୀ, ଅଭିଯୁକ୍ତ ରାହୁଲ ପ୍ରବଳ ମଦ୍ୟପାନ କରି ରାସ୍ତା ଉପରେ ହଙ୍ଗାମା କରୁଥିଲା। ଏହି ସମୟରେ ସେ ପୋଲିସ କଣ୍ଟ୍ରୋଲ ରୁମ୍ ୧୧୨ (Dial 112) ଏବଂ ବିଭିନ୍ନ ବରିଷ୍ଠ ପୋଲିସ ଅଧିକାରୀଙ୍କ ସିୟୁଜି ନମ୍ବର (CUG number) କୁ କଲ୍ କରି ବିଭ୍ରାନ୍ତିକର ତଥ୍ୟ ଦେବା ସହିତ ନିଜ ପଦବୀର ଦବଦବା ଦେଖାଇବାକୁ ଚେଷ୍ଟା କରିଥିଲା। ସ୍ଥାନୀୟ ପୋଲିସକୁ ଚାପରେ ପକାଇବା ପାଇଁ ସେ ବାରମ୍ବାର ନିଜକୁ ଜଣେ ପ୍ରଭାବଶାଳୀ ବ୍ୟକ୍ତି ଭାବେ ଉପସ୍ଥାପନ କରୁଥିଲା।

ଏମିତି ଖୋଲିଲା ନକଲି ଆଇଏଏସ୍‌ଙ୍କ ଗୁମର

ସୂଚନା ପାଇବା ପରେ ଯେତେବେଳେ ନୌଚଣ୍ଡୀ ଥାନା ପୋଲିସ ଘଟଣାସ୍ଥଳରେ ପହଞ୍ଚିଥିଲା, ସେତେବେଳେ ରାହୁଲର କଥାବାର୍ତ୍ତାରୁ ପୋଲିସର ସନ୍ଦେହ ବଢ଼ିଥିଲା। ସିଓ (ସିଭିଲ୍ ଲାଇନ୍ସ) ଅଭିଷେକ ତିୱାରୀଙ୍କ ସୂଚନା ମୁତାବକ, ଯାଞ୍ଚ ବେଳେ ଜଣାପଡ଼ିଥିଲା ଯେ ଅଭିଯୁକ୍ତ ଜଣକ ନିଜ ପାଖରେ ଏକ ନକଲି ବୋର୍ଡ ରଖିଥିଲା, ଯେଉଁଥିରେ ସେ ନିଜକୁ ଜଣେ ଆଇଏଏସ୍ ଅଧିକାରୀ ବୋଲି ଉଲ୍ଲେଖ କରିଥିଲା। ପୋଲିସ ତୁରନ୍ତ ସେହି ନକଲି ବୋର୍ଡକୁ ଜବତ କରିଥିଲା। ପୋଲିସର କଡ଼ା ପଚରାଉଚରା ପରେ ତାଙ୍କ ମିଛ ଧରାପଡ଼ିଥିଲା ଏବଂ ସେ ଜଣେ ନକଲି ଅଧିକାରୀ ବୋଲି ସ୍ପଷ୍ଟ ହୋଇଥିଲା।

ଜେଲ୍ ଗଲା ଠକ

ଏହି ଘଟଣାର ସତ୍ୟତା ସାମ୍ନାକୁ ଆସିବା ପରେ ପୋଲିସ ଅଭିଯୁକ୍ତ ରାହୁଲ କୌଶିକ୍ ବିରୋଧରେ ଏକ ମାମଲା ରୁଜୁ କରିଛି। ତାଙ୍କୁ ତୁରନ୍ତ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ଏବଂ ପରେ ତାଙ୍କୁ ଜେଲ୍ ପଠାଇ ଦିଆଯାଇଛି। ସାଧାରଣ ଲୋକ ଓ ପ୍ରଶାସନକୁ ଭୁଆଁ ବୁଲାଉଥିବା ଏହି ଠକର ଗିରଫଦାରୀ ପରେ ସ୍ଥାନୀୟ ଅଞ୍ଚଳରେ ଏହା ଚର୍ଚ୍ଚାର ବିଷୟ ପାଲଟିଛି।

ଉତ୍ତରପ୍ରଦେଶର ବିଜନୌର ଜିଲ୍ଲାରେ ଗୁରୁବାର ସନ୍ଧ୍ୟାରେ ଏକ ଅଭାବନୀୟ ଘଟଣା ଘଟିଯାଇଛି। ନଗିନା ଥାନା ଅଞ୍ଚଳରେ ଥିବା ଏକ ଘରୋଇ ଡାକ୍ତରଖାନା ମଧ୍ୟରେ ଜଣେ ଡାକ୍ତରଙ୍କୁ ଦୁର୍ବୃତ୍ତମାନେ ଗୁଳି କରି ହତ୍ୟା କରିଛନ୍ତି। ମୃତକ ହେଲେ ୪୫ ବର୍ଷୀୟ ଡାକ୍ତର ରାଜକୁମାର। ଏହି ଘଟଣା ପରେ ସମଗ୍ର ଅଞ୍ଚଳରେ ଭୟର ବାତାବରଣ ଖେଳିଯାଇଛି।

କ୍ଲିନିକ ଭିତରେ ପଶି ଆକ୍ରମଣ

ସୂଚନା ଅନୁଯାୟୀ, ଡାକ୍ତର ରାଜକୁମାର ନଗିନା-ଧାମପୁର ରୋଡରେ 'ଶିବାଳୟ ହେଲଥ କେୟାର' ନାମକ ଏକ କ୍ଲିନିକ ଚଳାଉଥିଲେ। ଗୁରୁବାର ସନ୍ଧ୍ୟାରେ ସେ ନିଜ ଚ୍ୟାମ୍ବରରେ ବସି ରୋଗୀ ଦେଖୁଥିବା ସମୟରେ ଜଣେ ଅଜ୍ଞାତ ବ୍ୟକ୍ତି ବାଇକରେ ସେଠାରେ ପହଞ୍ଚିଥିଲେ। ଦୁର୍ବୃତ୍ତ ଜଣକ ସିଧା ଡାକ୍ତରଙ୍କ କ୍ୟାବିନ ଭିତରକୁ ପଶି ତାଙ୍କ ଛାତିକୁ ଲକ୍ଷ୍ୟ କରି ଗୁଳି ଚଳାଇଥିଲେ। ଗୁଳିମାଡ଼ ପରେ ଡାକ୍ତର ଗୁରୁତର ଆହତ ହୋଇ ପଡ଼ିଯାଇଥିଲେ ଏବଂ ଘଟଣାସ୍ଥଳରେ ଉପସ୍ଥିତ ରୋଗୀ ଓ କର୍ମଚାରୀଙ୍କ ମଧ୍ୟରେ ଦୌଡ଼ାଦୌଡ଼ି ଆରମ୍ଭ ହୋଇଯାଇଥିଲା।

ଡାକ୍ତର ମୃତ ଘୋଷିତ

ଗୁଳିମାଡ଼ ପରେ ସ୍ଥାନୀୟ ଲୋକେ ତୁରନ୍ତ ରକ୍ତ ଜୁଡୁବୁଡୁ ଅବସ୍ଥାରେ ଡାକ୍ତର ରାଜକୁମାରଙ୍କୁ ଉଦ୍ଧାର କରି ନିକଟସ୍ଥ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର (CHC) କୁ ନେଇଥିଲେ। ହେଲେ ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷିତ କରିଥିଲେ। ମୃତ ଡାକ୍ତର ରାଜକୁମାର ମୂଳତଃ ଗାଜିଆବାଦର ବାସିନ୍ଦା ଥିଲେ ଏବଂ ବିଗତ ୪ ବର୍ଷ ହେବ ନଗିନାରେ ରହି ଚିକିତ୍ସା ସେବା ଯୋଗାଉଥିଲେ।

ପୋଲିସର ତଦନ୍ତ ଜାରି

ଘଟଣା ସମ୍ପର୍କରେ ଖବର ପାଇ ପୋଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଅତିରିକ୍ତ ପୋଲିସ ଅଧୀକ୍ଷକ (ASP) ପ୍ରକାଶ କୁମାରଙ୍କ ସୂଚନା ମୁତାବକ, ଅଭିଯୁକ୍ତ ବ୍ୟକ୍ତି ନିଜ ବାଇକଟିକୁ ଘଟଣାସ୍ଥଳରେ ଛାଡ଼ି ଫେରାର ହୋଇଯାଇଛି। ପୋଲିସ ବାଇକକୁ ଜବତ କରିବା ସହ ସିସିଟିଭି ଫୁଟେଜ ଯାଞ୍ଚ କରୁଛି। ହତ୍ୟାକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଅଭିଯୁକ୍ତକୁ ଧରିବା ପାଇଁ ପୋଲିସ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି।

ଉତ୍ତରପ୍ରଦେଶର ଆଗ୍ରା ଜିଲ୍ଲାରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ସୈୟାଁ ଥାନା ଅଞ୍ଚଳରେ ଜଣେ ଅଟୋ ଚାଳକଙ୍କୁ ନିର୍ମମ ଭାବେ ହତ୍ୟା କରାଯାଇଛି। ପୋଲିସ ଏହି ହତ୍ୟାକାଣ୍ଡର ପର୍ଦ୍ଦାଫାସ କରିବା ସହ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତମାନେ ଅଟୋ ଚାଳକଙ୍କ ସହ ଅପ୍ରାକୃତିକ ଯୌନ ସମ୍ପର୍କ ରଖିବାକୁ ଉଦ୍ୟମ କରିଥିଲେ ଏବଂ ବିରୋଧ କରିବାରୁ ତାଙ୍କୁ ହତ୍ୟା କରି ମୃତଦେହକୁ ଏକ ନାଳରେ ଫିଙ୍ଗି ଦେଇଥିଲେ।

ମଦ ନିଶାରେ ଘଟିଲା ଅଘଟଣ

ପୋଲିସର ସୂଚନା ଅନୁଯାୟୀ, ମୃତ ଅଟୋ ଚାଳକଙ୍କ ନାମ ବିଜୟପାଲ ସିଂହ (୩୮) ଏବଂ ସେ ରାଜସ୍ଥାନର ଧୌଲପୁରର ବାସିନ୍ଦା ଥିଲେ। ଫେବୃଆରୀ ୧୪ ତାରିଖରେ ଅଭିଯୁକ୍ତମାନେ ୩୦୦ ଟଙ୍କାରେ ବିଜୟପାଲଙ୍କ ଅଟୋ ଭଡ଼ାରେ ନେଇଥିଲେ। ରାସ୍ତାରେ ସେମାନେ ମଦ୍ୟପାନ କରିଥିଲେ ଏବଂ ଚାଳକଙ୍କୁ ମଧ୍ୟ ଜୋରଜବରଦସ୍ତି ମଦ ପିଆଇଥିଲେ। ମଦ ନିଶାରେ ସେମାନେ ଚାଳକଙ୍କ ସହ ଅପ୍ରାକୃତିକ ସମ୍ପର୍କ ରଖିବାକୁ ଚେଷ୍ଟା କରିଥିଲେ। କିନ୍ତୁ ବିଜୟପାଲ ଏହାକୁ ବିରୋଧ କରିବାରୁ ଉଭୟ ଅଭିଯୁକ୍ତ ଉତ୍ତ୍ୟକ୍ତ ହୋଇ ତାଙ୍କୁ ମାଡ଼ ମାରିଥିଲେ।

ନାଳ ପାଣିରେ ବୁଡ଼ାଇ ହତ୍ୟା

ଅଭିଯୁକ୍ତମାନେ ବିଜୟପାଲଙ୍କ ଲୁଗାପଟା ଚିରି ଦେଇଥିଲେ ଏବଂ ତାଙ୍କୁ ଧକ୍କା ଦେଇ ରାସ୍ତା କଡ଼ରେ ଥିବା ଏକ ନାଳ (ଡ୍ରେନ) ଭିତରକୁ ଠେଲି ଦେଇଥିଲେ। ସେତିକିରେ ସେମାନଙ୍କର ମନ ବୁଝିନଥିଲା, ବରଂ ବିଜୟପାଲଙ୍କ ମୃତ୍ୟୁ ନ ହେବା ପର୍ଯ୍ୟନ୍ତ ସେମାନେ ତାଙ୍କ ମୁଣ୍ଡକୁ ପାଣିରେ ଚାପି ଧରିଥିଲେ। ହତ୍ୟା ପରେ ଅଭିଯୁକ୍ତମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ।

ଦୁଇ ଅଭିଯୁକ୍ତ ଗିରଫ

ସନ୍ଦିଗ୍ଧ ଅବସ୍ଥାରେ ନାଳରୁ ମୃତଦେହ ମିଳିବା ପରେ ପୋଲିସ ତଦନ୍ତ ଆରମ୍ଭ କରିଥିଲା। ସର୍ଭିଲାନ୍ସ ଏବଂ ସୂଚନା ଆଧାରରେ ପୋଲିସ ଦୁଇ ଅଭିଯୁକ୍ତ ବିଷ୍ଣୁ ଏବଂ ଅମିତ ଶୁକ୍ଳାଙ୍କୁ ଗିରଫ କରିଛି। ପଚରାଉଚରା ବେଳେ ଉଭୟ ନିଜର ଅପରାଧ ସ୍ୱୀକାର କରିଛନ୍ତି। ପୋଲିସ ମୃତକଙ୍କ ବ୍ୟାଗ୍, ଆଧାର କାର୍ଡ ଏବଂ ଡ୍ରାଇଭିଂ ଲାଇସେନ୍ସ ମଧ୍ୟ ଜବତ କରିଛି।

ଉତ୍ତର ପ୍ରଦେଶର ବାଗପତ ଜିଲ୍ଲାରେ ଏକ ଅଭାବନୀୟ ଘଟଣା ଘଟିଛି। ଜଣେ ଦିଅର ତାର ଭାଉଜଙ୍କୁ ନିର୍ମମ ଭାବେ ହତ୍ୟା କରିବା ପରେ ନିଜେ ଆତ୍ମହତ୍ୟା କରିବାକୁ ଉଦ୍ୟମ କରିଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ଗୁରୁତର ଆହତ ଅଭିଯୁକ୍ତକୁ ଡାକ୍ତରଖାନାରେ ଭର୍ତ୍ତି କରିଛି।

ଇଟାରେ ଛେଚି କଲା ହତ୍ୟା

ମିଳିଥିବା ସୂଚନା ଅନୁଯାୟୀ, ଘଟଣାଟି ଖେକଡା ଥାନା ଅନ୍ତର୍ଗତ ସାଙ୍କରୋଦ ଗ୍ରାମରେ ଘଟିଛି। ବୁଧବାର ସନ୍ଧ୍ୟାରେ ମହିଳା ଜଣକ ଘର କାମ କରୁଥିବା ସମୟରେ ତାଙ୍କ ଦିଅର ସାହିଲ ହଠାତ୍ ଆକ୍ରମଣ କରିଥିଲା। ସେ ଏକ ଇଟାରେ ଭାଉଜ ଚଞ୍ଚଳଙ୍କ ମୁଣ୍ଡକୁ ବାରମ୍ବାର ଛେଚି ଦେଇଥିଲା, ଯାହା ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା।

୨୫ ଫୁଟ ଉଚ୍ଚରୁ ଡେଇଁଲା ଅଭିଯୁକ୍ତ

ହତ୍ୟାକାଣ୍ଡ ଘଟାଇବା ପରେ ଅଭିଯୁକ୍ତ ସାହିଲ ଭୟଭୀତ ହୋଇ ଦ୍ୱିତୀୟ ମହଲା ଛାତ ଉପରୁ ତଳକୁ ଡେଇଁ ପଡିଥିଲା। ପ୍ରାୟ ୨୫ ଫୁଟ ଉଚ୍ଚରୁ ପଡିବା କାରଣରୁ ସେ ଗୁରୁତର ଆହତ ହୋଇଛି। ପୋଲିସ ତାକୁ ଉଦ୍ଧାର କରି ମିରଟର ଏକ ଡାକ୍ତରଖାନାରେ ଭର୍ତ୍ତି କରିଛି, ଯେଉଁଠାରେ ତାର ଚିକିତ୍ସା ଚାଲିଛି।

ପୋଲିସର ତଦନ୍ତ ଜାରି

ମୃତକଙ୍କ ସ୍ୱାମୀ ନବୀନ ଜଣେ ଦିନ ମଜୁରିଆ ଭାବେ କାମ କରନ୍ତି। ତେବେ ହତ୍ୟାକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ ଆରମ୍ଭ କରିଛି। ଅଭିଯୁକ୍ତ ସୁସ୍ଥ ହେବା ପରେ ପୋଲିସ ତାକୁ ପଚରାଉଚରା କରିବ ବୋଲି ସୂଚନା ଦେଇଛି।