ମହାକୁମ୍ଭ ଫେମ୍ ମୋନାଲିସା କ’ଣ ନାବାଳିକା? ବାଲ୍ୟ ବିବାହ ଅଭିଯୋଗ ଉପରେ ସ୍ୱାମୀ ଫରମାନ ଖାନ ଦେଲେ ପ୍ରମାଣ

Suryakanta — Thu, 12 Mar 2026 10:15:43 +0530

ମହାକୁମ୍ଭରେ ରୁଦ୍ରାକ୍ଷ ମାଳା ବିକ୍ରି କରି ରାତାରାତି ଇଣ୍ଟରନେଟ୍ ସେନ୍ସେସନ୍ ପାଲଟିଥିବା ମୋନାଲିସା ପୁଣିଥରେ ଚର୍ଚ୍ଚାରେ ଅଛନ୍ତି। ନିକଟରେ ସେ ନିଜ ପରିବାରର ଇଚ୍ଛା ବିରୋଧରେ ଯାଇ ନିଜ ପ୍ରେମିକ ଫରମାନ ଖାନ୍‌ଙ୍କୁ କେରଳରେ ବିବାହ କରିଛନ୍ତି। ତେବେ ଏହି ଆନ୍ତଃଧର୍ମୀୟ ବିବାହ ପରେ ଏବେ ଏକ ନୂଆ ବିବାଦ ମୁଣ୍ଡ ଟେକିଛି। ସୋସିଆଲ୍ ମିଡିଆରେ ଗୁଜବ ସୃଷ୍ଟି ହୋଇଛି ଯେ, ମୋନାଲିସା ଜଣେ ନାବାଳିକା ଏବଂ ଏହା ଏକ ବାଲ୍ୟ ବିବାହ।

ସ୍ୱାମୀ ଫରମାନ ଦେଲେ ପ୍ରମାଣ

ଏହି ବାଲ୍ୟ ବିବାହ ଅଭିଯୋଗ ଉପରେ ଏବେ ପ୍ରତିକ୍ରିୟା ରଖିଛନ୍ତି ମୋନାଲିସାଙ୍କ ସ୍ୱାମୀ ଫରମାନ ଖାନ। ଗଣମାଧ୍ୟମ ସହ କଥାବାର୍ତ୍ତା ବେଳେ ସେ ଏହି ସମସ୍ତ ଗୁଜବକୁ ଖଣ୍ଡନ କରିବା ସହ ପ୍ରମାଣ ସ୍ୱରୂପ ମ୍ୟାରେଜ୍ ସାର୍ଟିଫିକେଟ୍ ଦେଖାଇଛନ୍ତି। ଫରମାନ କହିଛନ୍ତି ଯେ, "ଅନେକ ସ୍ଥାନରେ ଖବର ପ୍ରସାରିତ ହେଉଛି ଯେ ମୋନାଲିସା ଜଣେ ଛୋଟ ପିଲା ଏବଂ ସେ ନାବାଳିକା। କିନ୍ତୁ ଏହା ସମ୍ପୂର୍ଣ୍ଣ ମିଥ୍ୟା। ମୁଁ ସ୍ପଷ୍ଟ କରିଦେବାକୁ ଚାହେଁ ଯେ, ମୋନାଲିସା ସାବାଳିକା ଏବଂ ତାଙ୍କୁ ୧୮ ବର୍ଷରୁ ଅଧିକ ବୟସ ହୋଇଛି। ଆମର ମ୍ୟାରେଜ୍ ସାର୍ଟିଫିକେଟ୍ ଏବଂ ଆଧାର କାର୍ଡରେ ତାଙ୍କର ଜନ୍ମ ତାରିଖ ଉଲ୍ଲେଖ ରହିଛି, ଯାହା ଏହାର ସବୁଠାରୁ ବଡ଼ ପ୍ରମାଣ"।

ପୋଲିସ୍ ସୁରକ୍ଷା ବଳୟରେ କେରଳରେ ହୋଇଥିଲା ବିବାହ

ସୂଚନାଯୋଗ୍ୟ ଯେ, ମୋନାଲିସା ଏବଂ ଫରମାନଙ୍କ ମଧ୍ୟରେ ଥିବା ସମ୍ପର୍କକୁ ମୋନାଲିସାଙ୍କ ପରିବାର ଲୋକେ ତୀବ୍ର ବିରୋଧ କରିଥିଲେ, କାରଣ ଫରମାନ ଜଣେ ମୁସଲମାନ ସମ୍ପ୍ରଦାୟର ଯୁବକ ଅଟନ୍ତି। ଏପରିକି ତାଙ୍କ ବାପା ତାଙ୍କୁ ଜୋରଜବରଦସ୍ତି ଅନ୍ୟତ୍ର ବିବାହ କରାଇବାକୁ ଚେଷ୍ଟା କରିଥିଲେ। ଏଥିରୁ ବର୍ତ୍ତିବା ପାଇଁ ଏହି ପ୍ରେମୀଯୁଗଳ କେରଳ ପଳାଇଥିଲେ ଏବଂ ସେଠାକାର ପୋଲିସର ସୁରକ୍ଷା ଲୋଡ଼ିଥିଲେ। ପୋଲିସ୍ ଉଭୟଙ୍କ ବୟସ ଯାଞ୍ଚ କରିବା ପରେ ସେମାନଙ୍କୁ ସୁରକ୍ଷା ଯୋଗାଇ ଦେଇଥିଲା। ଏହାପରେ ସେମାନେ ପ୍ରଥମେ ସିଭିଲ୍ ମ୍ୟାରେଜ୍ କରିଥିଲେ ଏବଂ ପରେ ଥିରୁଭାନନ୍ତପୁରମର ଏକ ମନ୍ଦିରରେ ହିନ୍ଦୁ ରୀତିନୀତି ଅନୁଯାୟୀ ବିବାହ ବନ୍ଧନରେ ଆବଦ୍ଧ ହୋଇଥିଲେ।

ବାଲ୍ୟ ବିବାହ ଗୁଜବର ଅନ୍ତ

ମନ୍ଦିରରେ ବିବାହ ପରେ ମୋନାଲିସାଙ୍କର ନାଲି ଶାଢ଼ି, ବେକରେ ବରମାଳା ଏବଂ ମଥାରେ ସିନ୍ଦୂର ଲଗାଇଥିବା ଫଟୋ ଇଣ୍ଟରନେଟରେ ଭାଇରାଲ୍ ହୋଇଥିଲା। ଏହି ଫଟୋ ସାମ୍ନାକୁ ଆସିବା ପରେ କିଛି ଲୋକ ତାଙ୍କ ବୟସକୁ ନେଇ ପ୍ରଶ୍ନ ଉଠାଇଥିଲେ ଏବଂ ସେ ନାବାଳିକା ବୋଲି ଦାବି କରିଥିଲେ। ତେବେ ପୋଲିସ୍ ଏବଂ ସ୍ୱାମୀ ଫରମାନଙ୍କ ଦ୍ୱାରା ଦିଆଯାଇଥିବା ଆଧାର କାର୍ଡ ଓ ମ୍ୟାରେଜ୍ ସାର୍ଟିଫିକେଟ୍ ପ୍ରମାଣ ପରେ ଏବେ ଏହି ସମସ୍ତ ବିବାଦର ଅନ୍ତ ଘଟିଛି।

ମହାକୁମ୍ଭ 'ଭାଇରାଲ ଗର୍ଲ' ମୋନାଲିସାଙ୍କ ଫିଲ୍ମ 'ଦ ଡାଏରୀ ଅଫ୍ ମଣିପୁର'ର ଟ୍ରେଲର ରିଲିଜ୍, ଭାବବିହ୍ୱଳ ହେଲେ ଅଭିନେତ୍ରୀ

Suryakanta — Wed, 11 Feb 2026 14:37:08 +0530

ମହାକୁମ୍ଭ ମେଳାରେ ଫୁଲମାଳ ବିକ୍ରି କରୁଥିବା ସମୟରେ ରାତାରାତି ଇଣ୍ଟରନେଟ୍ ସେନ୍‌ସେସନ୍ ପାଲଟିଥିବା 'ଭାଇରାଲ ଗର୍ଲ' ମୋନାଲିସା ଏବେ ବଲିଉଡରେ ପାଦ ଥାପିଛନ୍ତି। ତାଙ୍କର ପ୍ରଥମ ଚଳଚ୍ଚିତ୍ର 'ଦ ଡାଏରୀ ଅଫ୍ ମଣିପୁର' (The Diary of Manipur)ର ଟ୍ରେଲର ମଙ୍ଗଳବାର ଦିନ ପ୍ରୟାଗରାଜରେ ମୁକ୍ତିଲାଭ କରିଛି। ନିଜର ପ୍ରଥମ ସିନେମାର ଟ୍ରେଲର ଲଞ୍ଚ୍ ଅବସରରେ ମୋନାଲିସା ବେଶ୍ ଭାବବିହ୍ୱଳ ହୋଇପଡିଥିଲେ।

ପ୍ରୟାଗରାଜରୁ ଆରମ୍ଭ ହୋଇଥିଲା ଯାତ୍ରା

ଯେଉଁ ସହର ମୋନାଲିସାଙ୍କୁ ପରିଚୟ ଦେଇଥିଲା, ସେହି ପ୍ରୟାଗରାଜରେ ହିଁ ଫିଲ୍ମର ଟ୍ରେଲର ରିଲିଜ୍ କରାଯାଇଛି। ଏହି କାର୍ଯ୍ୟକ୍ରମରେ ଫିଲ୍ମର ନିର୍ଦ୍ଦେଶକ ସନୋଜ ମିଶ୍ର ଏବଂ ଅଭିନେତା ଅଭିଷେକ ତିୱାରୀ ଉପସ୍ଥିତ ଥିଲେ। ନିର୍ଦ୍ଦେଶକ ସନୋଜ ମିଶ୍ର କହିଛନ୍ତି ଯେ, ଏହି ଚଳଚ୍ଚିତ୍ରଟି ପ୍ରାୟ ୧୦ କୋଟି ଟଙ୍କା ବ୍ୟୟରେ ନିର୍ମିତ ହୋଇଛି ଏବଂ ଏପ୍ରିଲ ମାସର ପ୍ରଥମ ସପ୍ତାହରେ ପ୍ରେକ୍ଷାଳୟରେ ମୁକ୍ତିଲାଭ କରିବାର ସମ୍ଭାବନା ରହିଛି।

କଣ ରହିଛି ଫିଲ୍ମର କାହାଣୀ?

'ଦ ଡାଏରୀ ଅଫ୍ ମଣିପୁର' ଏକ ପ୍ରେମ କାହାଣୀ ଉପରେ ଆଧାରିତ, ଯାହା ଦେଶର ରାଜଧାନୀ ଦିଲ୍ଲୀ ସହିତ ଉତ୍ତର-ପୂର୍ବ ରାଜ୍ୟ ମଣିପୁରକୁ ଯୋଡୁଛି। ଏଥିରେ ମୋନାଲିସା ଜଣେ ଅବସରପ୍ରାପ୍ତ ସେନା କର୍ମଚାରୀଙ୍କ ଝିଅ ଭୂମିକାରେ ଅଭିନୟ କରିଛନ୍ତି, ଯିଏ ନିଜେ ମଧ୍ୟ ସେନାରେ ଯୋଗଦେବାକୁ ସ୍ୱପ୍ନ ଦେଖୁଛନ୍ତି। ମୋନାଲିସାଙ୍କ କହିବାନୁସାରେ, ତାଙ୍କୁ ହିନ୍ଦୀ ଭାଷା ଭଲଭାବେ ଜଣାନଥିଲେ ମଧ୍ୟ ସେ ଏହି ଚରିତ୍ର ପାଇଁ କଠିନ ପରିଶ୍ରମ କରିଛନ୍ତି।

ଗାଁରେ ସ୍କୁଲ ଖୋଲିବାକୁ ଲକ୍ଷ୍ୟ

ନିଜର ପ୍ରଥମ ଫିଲ୍ମକୁ ନେଇ ମୋନାଲିସା ବହୁତ ଉତ୍ସାହିତ ଅଛନ୍ତି। ସେ କହିଛନ୍ତି ଯେ, ଏହି ଫିଲ୍ମରୁ ଯାହା ରୋଜଗାର ହେବ, ସେଥିରେ ସେ ନିଜ ଗାଁରେ ଏକ ସ୍କୁଲ ଖୋଲିବାକୁ ଚାହାଁନ୍ତି। ଏହା ସହିତ ସେ ନିଜ ସାନ ଭଉଣୀକୁ ପାଠ ପଢାଇ କଲେକ୍ଟର ବନାଇବାକୁ ସ୍ୱପ୍ନ ଦେଖିଛନ୍ତି। ସୂଚନାଯୋଗ୍ୟ ଯେ, ୨୦୨୫ ମହାକୁମ୍ଭ ସମୟରେ ମୋନାଲିସାଙ୍କ ସରଳତା ଏବଂ ସୌନ୍ଦର୍ଯ୍ୟ ତାଙ୍କୁ ସୋସିଆଲ ମିଡିଆରେ ଲୋକପ୍ରିୟ କରାଇଥିଲା।

Monalisa - The Sakala