ମଧ୍ୟପ୍ରଦେଶର ଛତରପୁର ଜିଲ୍ଲାରେ ଅବସ୍ଥିତ ପ୍ରସିଦ୍ଧ ବାଗେଶ୍ୱର ଧାମ (Bageshwar Dham)କୁ ଏବେ ବିଦେଶରୁ ମଧ୍ୟ ଦାନ ବା ଚାନ୍ଦା ମିଳିପାରିବ। ବାଗେଶ୍ୱର ଧାମର ପୀଠାଧୀଶ୍ୱର ଧୀରେନ୍ଦ୍ର କୃଷ୍ଣ ଶାସ୍ତ୍ରୀଙ୍କ ସଂସ୍ଥାକୁ ବିଦେଶୀ ପାଣ୍ଠି ସଂଗ୍ରହ ପାଇଁ ଭାରତ ସରକାରଙ୍କ ତରଫରୁ ଅନୁମତି ମିଳିଯାଇଛି। କେନ୍ଦ୍ର ଗୃହ ମନ୍ତ୍ରଣାଳୟ ଦ୍ୱାରା ଫରେନ କଣ୍ଟ୍ରିବ୍ୟୁସନ ରେଗୁଲେସନ ଆକ୍ଟ (FCRA) ଅଧୀନରେ ଏହି ମଞ୍ଜୁରୀ ପ୍ରଦାନ କରାଯାଇଛି।

ଏହି ଅନୁମତି ମିଳିବା ପରେ ଏବେ ବାଗେଶ୍ୱର ଧାମ ସହିତ ଜଡ଼ିତ ସଂସ୍ଥା ବିଦେଶରେ ରହୁଥିବା ଅନୁଗାମୀ ଏବଂ ଶ୍ରଦ୍ଧାଳୁମାନଙ୍କଠାରୁ ଆଇନଗତ ଭାବେ ଦାନ ଗ୍ରହଣ କରିପାରିବ। ପୂର୍ବରୁ ବିଦେଶରୁ ଚାନ୍ଦା ଆଣିବା ପାଇଁ ସ୍ୱତନ୍ତ୍ର ଅନୁମତିର ଆବଶ୍ୟକତା ପଡ଼ୁଥିଲା।

ସାମାଜିକ ଓ ଧାର୍ମିକ କାର୍ଯ୍ୟରେ ଲାଗିବ ଅର୍ଥ

ଧୀରେନ୍ଦ୍ର ଶାସ୍ତ୍ରୀଙ୍କ ତତ୍ତ୍ୱାବଧାନରେ 'ଶ୍ରୀ ବାଗେଶ୍ୱର ଜନ ସେବା ସମିତି' ନାମକ ଏକ ସଂସ୍ଥା ମଧ୍ୟପ୍ରଦେଶର ଛତରପୁର ଜିଲ୍ଲାର ଗଡ଼ା ଗ୍ରାମରେ କାର୍ଯ୍ୟ କରୁଛି। ସୂଚନା ଅନୁଯାୟୀ, ଏହି ସଂସ୍ଥା ମୁଖ୍ୟତଃ ଧାର୍ମିକ (ହିନ୍ଦୁ), ସାମାଜିକ, ଶୈକ୍ଷିକ, ସାଂସ୍କୃତିକ ଏବଂ ଅର୍ଥନୈତିକ କ୍ଷେତ୍ରରେ କାର୍ଯ୍ୟ କରିଥାଏ। ଏଫସିଆରଏ ଅନୁମୋଦନ ମିଳିବା ପରେ, ବିଦେଶରୁ ମିଳୁଥିବା ଅର୍ଥକୁ ଏହିସବୁ ସେବାମୂଳକ ଏବଂ ଧାର୍ମିକ କାର୍ଯ୍ୟକୁ ଆଗେଇ ନେବାରେ ବିନିଯୋଗ କରାଯିବ।

କ'ଣ ଏହି ଏଫସିଆରଏ (FCRA) ନିୟମ?

ଏଫସିଆରଏ (FCRA) ନିୟମ ଅନୁଯାୟୀ, ବିଦେଶରୁ ପାଣ୍ଠି ଗ୍ରହଣ କରୁଥିବା ଯେକୌଣସି ଅଣ-ସରକାରୀ ସଂସ୍ଥା (NGO)କୁ ନିଜ ଆୟ ଏବଂ ବ୍ୟୟର ସମ୍ପୂର୍ଣ୍ଣ ହିସାବ ରଖିବାକୁ ପଡ଼ିଥାଏ। ଅର୍ଥାତ୍ ଟଙ୍କା କେଉଁଠୁ ଆସିଲା ଏବଂ କେଉଁ କାର୍ଯ୍ୟରେ ଖର୍ଚ୍ଚ ହେଲା, ସେହି ସବୁ ତଥ୍ୟ ସରକାରଙ୍କୁ ପ୍ରଦାନ କରିବା ବାଧ୍ୟତାମୂଳକ ଅଟେ।

ଏହି ବିଦେଶୀ ଦେଣନେଣ ଏକ ନିର୍ଦ୍ଦିଷ୍ଟ ବ୍ୟାଙ୍କ ଆକାଉଣ୍ଟ ମାଧ୍ୟମରେ କରାଯାଇଥାଏ ଏବଂ ସମୟ ସମୟରେ ଏହାର ରିପୋର୍ଟ ମଧ୍ୟ ଦାଖଲ କରିବାକୁ ପଡ଼େ। ଏହି ପଞ୍ଜୀକରଣର ବୈଧତା ୫ ବର୍ଷ ପର୍ଯ୍ୟନ୍ତ ରହିଥାଏ, ଯାହା ପରେ ସଂସ୍ଥାକୁ ଏହାର ନବୀକରଣ (ରିନ୍ୟୁଆଲ୍) କରିବାକୁ ପଡ଼ିଥାଏ।

ଦେଶ ବିଦେଶରେ ବଢୁଛି ବାଗେଶ୍ୱର ବାବାଙ୍କ ଲୋକପ୍ରିୟତା

ଗତ କିଛି ବର୍ଷ ଧରି ବାଗେଶ୍ୱର ଧାମର ପ୍ରମୁଖ ୨୯ ବର୍ଷୀୟ ଧୀରେନ୍ଦ୍ର କୃଷ୍ଣ ଶାସ୍ତ୍ରୀ ବେଶ ଚର୍ଚ୍ଚାରେ ରହିଆସିଛନ୍ତି। ତାଙ୍କ କାର୍ଯ୍ୟକ୍ରମରେ ଲକ୍ଷ ଲକ୍ଷ ସଂଖ୍ୟାରେ ଶ୍ରଦ୍ଧାଳୁଙ୍କ ଭିଡ଼ ଜମୁଥିବା ଦେଖିବାକୁ ମିଳୁଛି। କେବଳ ଭାରତରେ ନୁହେଁ, ବିଦେଶରେ ମଧ୍ୟ ତାଙ୍କର ବହୁ ସଂଖ୍ୟାରେ ଅନୁଗାମୀ ଅଛନ୍ତି। ଏପରି ପରିସ୍ଥିତିରେ ଏହି ମଞ୍ଜୁରୀ ତାଙ୍କ ସଂସ୍ଥା ପାଇଁ ଏକ ବଡ଼ ପଦକ୍ଷେପ ବୋଲି ବିବେଚନା କରାଯାଉଛି। ଏପ୍ରିଲ ୧୫ ସୁଦ୍ଧା ଯେଉଁ ୩୮ଟି ଏନଜିଓକୁ ଏଫସିଆରଏ ପଞ୍ଜୀକରଣ ପ୍ରଦାନ କରାଯାଇଛି, ସେଥିମଧ୍ୟରେ ବାଗେଶ୍ୱର ଧାମ ମଧ୍ୟ ସାମିଲ ରହିଛି।

ନୂଆଦିଲ୍ଲୀ: ସୋନମ ୱାଙ୍ଗଚୁକ୍‌ଙ୍କ ନାଁରୁ NSA ହଟାଇଲେ ସରକାର । ଖୁବଶୀଘ୍ର ଜେଲ୍‌ରୁ ମୁକୁଳିବେ ଲଦାଖ ଆନ୍ଦୋଳନକାରୀ ସୋନମ ୱାଙ୍ଗଚୁକ । କେନ୍ଦ୍ର ସରକାର ଶନିବାର ଦିନ ଜାତୀୟ ସୁରକ୍ଷା ଆଇନ (National Security Act - NSA) ଅଧୀନରେ ବନ୍ଦୀ ଥିବା ଲଦାଖର ପ୍ରସିଦ୍ଧ ପରିବେଶବିତ୍ ତଥା ସାମାଜିକ କର୍ମୀ ସୋନମ ୱାଙ୍ଗଚୁକଙ୍କ ଅଟକାଦେଶକୁ ତୁରନ୍ତ ପ୍ରତ୍ୟାହାର କରିନେଇଛନ୍ତି। କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ଏହି ସୂଚନା ଦିଆଯାଇଛି। ମନ୍ତ୍ରଣାଳୟ କହିଛି ଯେ, ଲଦାଖରେ ଶାନ୍ତି, ସ୍ଥିରତା ଏବଂ ପାରସ୍ପରିକ ବିଶ୍ୱାସର ପରିବେଶ ସୃଷ୍ଟି କରିବା ପାଇଁ ସରକାର ପ୍ରତିବଦ୍ଧ ରହିଛନ୍ତି।

ଗୃହ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ, ସମସ୍ତ ଅଂଶୀଦାରଙ୍କ ସହ ସକାରାତ୍ମକ ଏବଂ ଅର୍ଥପୂର୍ଣ୍ଣ ଆଲୋଚନାକୁ ସହଜ କରିବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଇଛି। ସରକାରଙ୍କ କହିବା ଅନୁଯାୟୀ, ସୋନମ ୱାଙ୍ଗଚୁକ ତାଙ୍କ ଅଟକ ଅବଧିର ପ୍ରାୟ ଅଧା ସମୟ କାଟି ସାରିଛନ୍ତି। ଅନ୍ୟପକ୍ଷରେ, ଲଦାଖରେ କ୍ରମାଗତ ବନ୍ଦ ଏବଂ ବିକ୍ଷୋଭ ଯୋଗୁଁ ଛାତ୍ରଛାତ୍ରୀ, ବ୍ୟବସାୟୀ, ପର୍ଯ୍ୟଟକ ଏବଂ ସମଗ୍ର ଅର୍ଥନୀତି ଉପରେ ପ୍ରତିକୂଳ ପ୍ରଭାବ ପଡ଼ୁଥିବା ସରକାର ଦର୍ଶାଇଛନ୍ତି ଏବଂ ଏହାକୁ ରୋକିବା ପାଇଁ ସ୍ଥାନୀୟ ନେତାମାନଙ୍କ ସହ ନିରନ୍ତର ଆଲୋଚନା ଜାରି ରଖିଛନ୍ତି।

ସରକାରଙ୍କ ଏହି ନିଷ୍ପତ୍ତି ସୁପ୍ରିମକୋର୍ଟଙ୍କ ହସ୍ତକ୍ଷେପର କିଛି ଦିନ ପରେ ଆସିଛି। ସୁପ୍ରିମକୋର୍ଟ ମାର୍ଚ୍ଚ ୧୭ ତାରିଖକୁ ଶୁଣାଣି ଘୁଞ୍ଚାଇବା ସହ ୱାଙ୍ଗଚୁକଙ୍କ ଖରାପ ସ୍ୱାସ୍ଥ୍ୟବସ୍ଥାକୁ ଦୃଷ୍ଟିରେ ରଖି ତାଙ୍କ ଅଟକ ନିଷ୍ପତ୍ତିର ପୁନର୍ବିଚାର କରିବାକୁ କେନ୍ଦ୍ରକୁ କହିଥିଲେ। ତାଙ୍କ ପତ୍ନୀ ଗୀତାଞ୍ଜଳି ଆଙ୍ଗମୋ ସୁପ୍ରିମକୋର୍ଟରେ ଏହି ଅଟକକୁ ଚ୍ୟାଲେଞ୍ଜ କରିଥିଲେ, ଯାହାର ପ୍ରଥମ ଶୁଣାଣି ଗତବର୍ଷ ଅକ୍ଟୋବର ୬ରେ ହୋଇଥିଲା। 

ଲଦାଖକୁ ପୂର୍ଣ୍ଣ ରାଜ୍ୟ ପାହ୍ୟା ଏବଂ ସମ୍ବିଧାନର ଷଷ୍ଠ ଅନୁସୂଚୀରେ ସାମିଲ କରିବା ଦାବିରେ ଆନ୍ଦୋଳନ ତୀବ୍ର ହେବା ପରେ, ଗତ ସେପ୍ଟେମ୍ବର ୨୬, ୨୦୨୫ରେ ଲେହ ଜିଲ୍ଲା ମାଜିଷ୍ଟ୍ରେଟଙ୍କ ନିର୍ଦ୍ଦେଶକ୍ରମେ ୱାଙ୍ଗଚୁକଙ୍କୁ ଏନଏସଏ (NSA) ବଳରେ ଅଟକ ରଖାଯାଇଥିଲା। ପରେ ତାଙ୍କୁ ରାଜସ୍ଥାନର ଜୋଧପୁର ଜେଲକୁ ସ୍ଥାନାନ୍ତର କରାଯାଇଥିଲା। ସରକାର ଅଭିଯୋଗ କରିଥିଲେ ଯେ, ୱାଙ୍ଗଚୁକ ନେପାଳ ଓ ବାଂଲାଦେଶ ଭଳି ବିଦ୍ରୋହ ପାଇଁ ଯୁବକମାନଙ୍କୁ ଉସକାଉଥିଲେ। ଏଥିସହ ସେପ୍ଟେମ୍ବର ୨୪ ତାରିଖର ହିଂସା ସହ ମଧ୍ୟ ତାଙ୍କୁ ଯୋଡ଼ା ଯାଇଥିଲା, ଯେଉଁଥିରେ ୪ ଜଣଙ୍କର ମୃତ୍ୟୁ ହେବା ସହ ୧୬୦ରୁ ଅଧିକ ଲୋକ ଆହତ ହୋଇଥିଲେ।

କେନ୍ଦ୍ର ଗୃହ ମନ୍ତ୍ରଣାଳୟ (MHA) ବୁଧବାର ଜାତୀୟ ଗୀତ ‘ବନ୍ଦେ ମାତରମ୍’ ପାଇଁ ନୂତନ ନିୟମାବଳୀ ଜାରି କରିଛି। ଏହି ନିୟମ ଅନୁଯାୟୀ, ବର୍ତ୍ତମାନ ସରକାରୀ କାର୍ଯ୍ୟକ୍ରମ ଏବଂ ଶିକ୍ଷାନୁଷ୍ଠାନଗୁଡ଼ିକରେ ‘ଜନ ଗଣ ମନ’ (ଜାତୀୟ ସଙ୍ଗୀତ) ପୂର୍ବରୁ ‘ବନ୍ଦେ ମାତରମ୍’ ଗାନ କରାଯିବା ବାଧ୍ୟତାମୂଳକ କରାଯାଇଛି। ଏହା ସହିତ, ଯେତେବେଳେ ବି ଏହି ଗୀତ ଗାନ କରାଯିବ କିମ୍ବା ବଜାଯିବ, ସେତେବେଳେ ସମସ୍ତ ବ୍ୟକ୍ତିଙ୍କୁ ଛିଡ଼ା ହେବା ବାଧ୍ୟତାମୂଳକ ବୋଲି ନିର୍ଦ୍ଦେଶ ଦିଆଯାଇଛି।

କଣ ରହିଛି ନୂଆ ଗାଇଡଲାଇନ୍?

କେନ୍ଦ୍ର ସରକାରଙ୍କ ଦ୍ୱାରା ଜାରି କରାଯାଇଥିବା ନୂତନ ଗାଇଡଲାଇନ୍ ଅନୁଯାୟୀ, ଯେଉଁଠାରେ ଜାତୀୟ ଗୀତ ଏବଂ ଜାତୀୟ ସଙ୍ଗୀତ ଉଭୟ ବଜାଯିବାର କାର୍ଯ୍ୟକ୍ରମ ରହିଛି, ସେଠାରେ ପ୍ରଥମେ ‘ବନ୍ଦେ ମାତରମ୍’ ଏବଂ ପରେ ‘ଜନ ଗଣ ମନ’ ବଜାଯିବ। ସମସ୍ତ ସ୍କୁଲରେ ଦିନର ଆରମ୍ଭ ‘ବନ୍ଦେ ମାତରମ୍’ର ସାମୂହିକ ଗାନ ସହିତ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି। ଏହି ଗୀତର ସମ୍ପୂର୍ଣ୍ଣ ୬ଟି ପଦ (stanzas) ଗାନ କରାଯିବ, ଯାହାର ଅବଧି ପ୍ରାୟ ୩ ମିନିଟ୍ ୧୦ ସେକେଣ୍ଡ ରହିବ।

ସିନେମା ହଲ୍ ପାଇଁ ନିୟମ କୋହଳ

ତେବେ ସିନେମା ହଲ୍ କିମ୍ବା ଥିଏଟର ପାଇଁ ଏହି ନିୟମରେ କିଛିଟା କୋହଳ କରାଯାଇଛି। ଯଦି କୌଣସି ଚଳଚ୍ଚିତ୍ର କିମ୍ବା ଡକ୍ୟୁମେଣ୍ଟାରୀର ଅଂଶବିଶେଷ ଭାବରେ ‘ବନ୍ଦେ ମାତରମ୍’ ବଜାଯାଏ, ତେବେ ଦର୍ଶକମାନଙ୍କୁ ଛିଡ଼ା ହେବା ଆବଶ୍ୟକ ନାହିଁ। କାରଣ ଏହା ଦ୍ୱାରା ଚଳଚ୍ଚିତ୍ର ପ୍ରଦର୍ଶନରେ ବାଧା ସୃଷ୍ଟି ହେବା ସହ ବିଶୃଙ୍ଖଳା ଦେଖାଦେବାର ଆଶଙ୍କା ରହିଥାଏ।

ସରକାରଙ୍କ ଉଦ୍ଦେଶ୍ୟ

ଜାତୀୟ ସଙ୍ଗୀତ ‘ଜନ ଗଣ ମନ’ ଭଳି ଜାତୀୟ ଗୀତ ‘ବନ୍ଦେ ମାତରମ୍’କୁ ମଧ୍ୟ ସମାନ ସମ୍ମାନ ଦେବା ଉଦ୍ଦେଶ୍ୟରେ ସରକାର ଏହି ପଦକ୍ଷେପ ଗ୍ରହଣ କରିଛନ୍ତି। ଦେଶରେ ‘ବନ୍ଦେ ମାତରମ୍’ର ୧୫୦ ତମ ବର୍ଷ ପୂର୍ତ୍ତି ପାଳନ କରାଯାଉଥିବା ସମୟରେ ଏହି ଐତିହାସିକ ନିଷ୍ପତ୍ତି ନିଆଯାଇଛି। ପୂର୍ବରୁ କେବଳ ଜାତୀୟ ସଙ୍ଗୀତ ପାଇଁ ନିର୍ଦ୍ଦିଷ୍ଟ ପ୍ରୋଟୋକଲ୍ ଥିବାବେଳେ ବର୍ତ୍ତମାନ ଜାତୀୟ ଗୀତ ପାଇଁ ମଧ୍ୟ ସ୍ପଷ୍ଟ ନିୟମାବଳୀ ପ୍ରସ୍ତୁତ କରାଯାଇଛି।