ପ୍ରତିଦିନର ଖାଦ୍ୟ ପ୍ରସ୍ତୁତିରେ ପିଆଜ ଏକ ଅତ୍ୟାବଶ୍ୟକ ଉପାଦାନ। ଆମେ ନିତିଦିନିଆ ଜୀବନରେ ଏହାକୁ ତରକାରୀଠାରୁ ଆରମ୍ଭ କରି ସାଲାଡ୍ ପର୍ଯ୍ୟନ୍ତ ବ୍ୟବହାର କରିଥାଉ। ଖାଦ୍ୟର ସ୍ୱାଦ ବଢ଼ାଇବା ସହିତ ଶରୀରକୁ ସୁସ୍ଥ ରଖିବାରେ ଏହାର ଭୂମିକା ଗୁରୁତ୍ୱପୂର୍ଣ୍ଣ। ଅଧିକାଂଶ ଲୋକ କଞ୍ଚା ପିଆଜର ଦୁର୍ଗନ୍ଧ ଯୋଗୁଁ ଏହାକୁ ଖାଇବାକୁ ପସନ୍ଦ କରନ୍ତି ନାହିଁ, କିନ୍ତୁ ଏହାର ଚମତ୍କାର ସ୍ୱାସ୍ଥ୍ୟଗତ ଉପକାରିତା ବିଷୟରେ ଜାଣିଲେ ଆପଣ ବି ଆଶ୍ଚର୍ଯ୍ୟ ହେବେ।

ରୋଗ ପ୍ରତିରୋଧକ ଶକ୍ତି ବୃଦ୍ଧି

କଞ୍ଚା ପିଆଜ ହେଉଛି ଭିଟାମିନ୍-ସି ର ଏକ ଉତ୍କୃଷ୍ଟ ଉତ୍ସ। ଏହା ଶରୀରର ରୋଗ ପ୍ରତିରୋଧକ ଶକ୍ତି ବା ଇମ୍ୟୁନିଟି ପାୱାର୍ ବଢ଼ାଇବାରେ ବିଶେଷ ସାହାଯ୍ୟ କରିଥାଏ। ଶରୀରରେ ଶ୍ୱେତ ରକ୍ତ କଣିକା ସୃଷ୍ଟି କରିବାରେ ଏହା ସହାୟକ ହୁଏ, ଯାହା ଥଣ୍ଡା, ଜ୍ୱର ଏବଂ ଫ୍ଲୁ ଭଳି ସାଧାରଣ ସଂକ୍ରମଣରୁ ରକ୍ଷା କରିଥାଏ।

ହୃଦୟ ସ୍ୱାସ୍ଥ୍ୟ ପାଇଁ ଲାଭଦାୟକ

ପିଆଜରେ କ୍ୱେରେସିଟିନ୍ ନାମକ ଆଣ୍ଟିଅକ୍ସିଡାଣ୍ଟ ଭରପୂର ମାତ୍ରାରେ ରହିଥାଏ। ଏହା ଶରୀରରେ ଖରାପ କୋଲେଷ୍ଟ୍ରଲ୍ ସ୍ତରକୁ ହ୍ରାସ କରିବାରେ ପ୍ରମୁଖ ଭୂମିକା ଗ୍ରହଣ କରିଥାଏ। କଞ୍ଚା ପିଆଜ ଖାଇବା ଦ୍ୱାରା ରକ୍ତ ସଞ୍ଚାଳନ ସ୍ୱାଭାବିକ ରହେ ଏବଂ ଉଚ୍ଚ ରକ୍ତଚାପ ନିୟନ୍ତ୍ରଣ ହେବା ସହ ହୃଦରୋଗର ଆଶଙ୍କା ଯଥେଷ୍ଟ କମ୍ ହୋଇଥାଏ।

ହଜମ ପ୍ରକ୍ରିୟାରେ ଉନ୍ନତି

ପେଟ ସମସ୍ୟା ଦୂର କରିବାରେ କଞ୍ଚା ପିଆଜ ବେଶ୍ ଉପଯୋଗୀ। ଏଥିରେ ଥିବା ଡାଏଟାରୀ ଫାଇବର ହଜମ ପ୍ରକ୍ରିୟାକୁ ସକ୍ରିୟ କରିଥାଏ। ନିୟମିତ ଏହାକୁ ଖାଇଲେ ଶରୀରରୁ ବର୍ଜ୍ୟବସ୍ତୁ ସହଜରେ ନିଷ୍କାସିତ ହୁଏ ଏବଂ କୋଷ୍ଠକାଠିନ୍ୟ ସମସ୍ୟାରୁ ମୁକ୍ତି ମିଳିଥାଏ।

ହାଡ଼କୁ କରେ ମଜବୁତ

ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ପିଆଜ ହାଡ଼ ପାଇଁ ମଧ୍ୟ ବହୁତ ଉପକାରୀ। ଏଥିରେ ପ୍ରଚୁର ମାତ୍ରାରେ ସଲଫର୍ ଯୌଗିକ ରହିଥାଏ। ଏହି ଉପାଦାନ କ୍ୟାଲସିୟମ୍ ଅବଶୋଷଣକୁ ବୃଦ୍ଧି କରିବା ସହ ଅଷ୍ଟିଓପୋରୋସିସ୍ ଭଳି ହାଡ଼ ଜନିତ ସମସ୍ୟାରୁ ରକ୍ଷା କରେ।

ରକ୍ତ ଶର୍କରା ନିୟନ୍ତ୍ରଣ

ମଧୁମେହ ବା ଡାଇବେଟିସ୍ ରୋଗୀଙ୍କ ପାଇଁ କଞ୍ଚା ପିଆଜ ଏକ ରାମବାଣ ସଦୃଶ। ଏଥିରେ ଥିବା କ୍ରୋମିୟମ୍ ଇନସୁଲିନ୍ କ୍ଷମତାକୁ ବୃଦ୍ଧି କରିଥାଏ। ଫଳରେ ରକ୍ତରେ ଶର୍କରା ସ୍ତର ସ୍ୱାଭାବିକ ରହେ ଏବଂ ମଧୁମେହ ହେବାର ଆଶଙ୍କା କମିଯାଏ।

ମସ୍ତିଷ୍କ ଓ ଓଜନ ପରିଚାଳନା

କଞ୍ଚା ପିଆଜ ଖାଇବା ଦ୍ୱାରା ମସ୍ତିଷ୍କରେ ନ୍ୟୁରୋଟ୍ରାନ୍ସମିଟର ଉତ୍ପାଦନ ବୃଦ୍ଧି ହୁଏ, ଯାହାଫଳରେ ସ୍ମୃତିଶକ୍ତି ଓ ଏକାଗ୍ରତା ବଢ଼ିଥାଏ। ସେହିପରି, ଏଥିରେ ଥିବା କମ୍ କ୍ୟାଲୋରୀ ଏବଂ ଉଚ୍ଚ ମାତ୍ରାର ଫାଇବର ଓଜନ କମାଇବାରେ ମଧ୍ୟ ସାହାଯ୍ୟ କରିଥାଏ।

ଦୈନନ୍ଦିନ ଖାଦ୍ୟରେ ଅଳ୍ପ ମାତ୍ରାରେ କଞ୍ଚା ପିଆଜ ସାମିଲ କରିବା ଦ୍ୱାରା ଏତେସବୁ ଆଶ୍ଚର୍ଯ୍ୟଜନକ ସ୍ୱାସ୍ଥ୍ୟଗତ ଲାଭ ମିଳିପାରିବ। (ବିଦ୍ର: ଏହା ଏକ ସାଧାରଣ ସୂଚନା ଉପରେ ଆଧାରିତ। କୌଣସି ଗମ୍ଭୀର ସ୍ୱାସ୍ଥ୍ୟଗତ ସମସ୍ୟା ଥିଲେ ଡାକ୍ତରଙ୍କ ପରାମର୍ଶ ନେବା ବାଞ୍ଛନୀୟ)।

ବାରମ୍ବାର ମିଠା, ଲୁଣିଆ କିମ୍ବା କୁରକୁରିଆ ଜିନିଷ ଖାଇବାକୁ ଇଚ୍ଛା ହେଉଛି କି? ତେବେ ଏହାକୁ କେବଳ ଏକ ସାଧାରଣ ଇଚ୍ଛା ଭାବି ଅଣଦେଖା କରନ୍ତୁ ନାହିଁ। ବାସ୍ତବରେ, ଏହା ଆପଣଙ୍କ ଶରୀରର ଏକ ଗୁରୁତ୍ୱପୂର୍ଣ୍ଣ ସଙ୍କେତ ହୋଇପାରେ। ଖାଦ୍ୟ କ୍ରେଭିଙ୍ଗ୍ସ (Food Cravings) କେବଳ ଖାଇବାର ସାଧାରଣ ଇଚ୍ଛା ନୁହେଁ, ବରଂ ଏହା ଶରୀରରେ ପୋଷକ ତତ୍ତ୍ୱର ଅଭାବ, ମାନସିକ ଚାପ, ନିଦ୍ରାହୀନତା ଏବଂ ହରମୋନାଲ୍ ପରିବର୍ତ୍ତନ ଆଡ଼କୁ ଇସାରା କରିଥାଏ।

କାହିଁକି ହୁଏ କ୍ରେଭିଙ୍ଗ୍ସ?

କ୍ରେଭିଙ୍ଗ୍ସ ହଠାତ୍ ହୁଏ ନାହିଁ। ଏହା ଆମ ମସ୍ତିଷ୍କ, ପାକସ୍ଥଳୀ ଏବଂ ହରମୋନ୍ ମଧ୍ୟରେ ଥିବା ସମନ୍ୱୟର ଫଳାଫଳ ଅଟେ। ଉଦାହରଣ ସ୍ୱରୂପ, ମିଠା ଖାଇବା ଦ୍ୱାରା ମସ୍ତିଷ୍କରେ ଡୋପାମାଇନ୍ (Dopamine) କ୍ଷରଣ ହୁଏ, ଯାହା ଆମକୁ ଖୁସି ପ୍ରଦାନ କରେ ଏବଂ ବାରମ୍ବାର ମିଠା ଖାଇବାକୁ ଇଚ୍ଛା ଜାଗ୍ରତ କରେ। ସେହିପରି ଲୁଣିଆ ଖାଇବାର ଇଚ୍ଛା ଶରୀରରେ ଜଳ କିମ୍ବା ଇଲେକ୍ଟ୍ରୋଲାଇଟର ଅଭାବକୁ ଦର୍ଶାଏ, ବିଶେଷକରି ଯେତେବେଳେ ଶରୀର ଡିହାଇଡ୍ରେଟ୍ ହୋଇଥାଏ। ଅନ୍ୟପକ୍ଷରେ, ଚିପ୍ସ ପରି କୁରକୁରିଆ ଖାଦ୍ୟ ଖାଇଲେ ଏକ ଭିନ୍ନ ଧରଣର ସନ୍ତୁଷ୍ଟି ମିଳେ ଏବଂ ଏହା ମାନସିକ ଚାପ କମ୍ କରିବାରେ ମଧ୍ୟ ସାହାଯ୍ୟ କରିଥାଏ।

ଭୋକ ଏବଂ ହରମୋନର ସମ୍ପର୍କ

ଆମର ଭୋକ ଏବଂ କ୍ରେଭିଙ୍ଗ୍ସ ଉପରେ ହରମୋନର ବଡ଼ ପ୍ରଭାବ ରହିଥାଏ:

* ଘ୍ରେଲିନ୍ (Ghrelin): ଏହି ହରମୋନ୍ ଭୋକ ବଢ଼ାଇଥାଏ ଏବଂ ଖାଇବା ପାଇଁ ସଙ୍କେତ ଦେଇଥାଏ।

* ଲେପ୍ଟିନ୍ (Leptin): ଏହା ପେଟ ଭରିଯିବାର ସଙ୍କେତ ଦିଏ, କିନ୍ତୁ ଏହାର ଅସନ୍ତୁଳନ ଯୋଗୁଁ ଆମେ ଆବଶ୍ୟକତାଠାରୁ ଅଧିକ ଖାଇଦେଉ।

* ଇନସୁଲିନ୍ (Insulin): ଏହା ରକ୍ତରେ ଶର୍କରା ସ୍ତର ନିୟନ୍ତ୍ରଣ କରେ। ଏହାର ଉତ୍ଥାନ-ପତନ ଯୋଗୁଁ ମିଠା ଖାଇବାର ଇଚ୍ଛା ତୀବ୍ର ହୋଇଥାଏ।

ଯେତେବେଳେ ଏହି ହରମୋନ୍ ଗୁଡ଼ିକ ସନ୍ତୁଳିତ ରହେ ନାହିଁ, ସେତେବେଳେ କ୍ରେଭିଙ୍ଗ୍ସ ଅଧିକ ଏବଂ ବାରମ୍ବାର ହେବାକୁ ଲାଗେ।

କେଉଁ ଅଭାବରୁ କି ପ୍ରକାରର କ୍ରେଭିଙ୍ଗ୍ସ ହୁଏ?

ଯଦିଓ କ୍ରେଭିଙ୍ଗ୍ସ ଏକ ସାଧାରଣ ପ୍ରକ୍ରିୟା, ତଥାପି ଏହା ଦୀର୍ଘ ସମୟ ଧରି ଲାଗି ରହିଲେ କୌଣସି ଆଭ୍ୟନ୍ତରୀଣ ସମସ୍ୟାର ସଙ୍କେତ ହୋଇପାରେ:

* ସୋଡିୟମ୍ ଅଭାବ: ଶରୀରରେ ସୋଡିୟମ୍ କମିଗଲେ ଅଧିକ ଲୁଣିଆ ଜିନିଷ ଖାଇବାକୁ ଇଚ୍ଛା ହୁଏ।

* ଆଇରନ୍ ଅଭାବ: ଆଇରନ୍ କିମ୍ବା ଲୌହସାରର ଅଭାବ ଥିଲେ କିଛି ଲୋକଙ୍କୁ ବରଫ କିମ୍ବା ଚକ୍ ପରି ଅଜବ ଜିନିଷ ଖାଇବାକୁ ମନ ହୋଇଥାଏ।

* ମ୍ୟାଗ୍ନେସିୟମ୍ ଅଭାବ: ଶରୀରରେ ମ୍ୟାଗ୍ନେସିୟମର ଅଭାବ ଦେଖାଦେଲେ ଚକୋଲେଟ୍ କିମ୍ବା ମିଠା ଖାଇବାକୁ ପ୍ରବଳ ଇଚ୍ଛା ହୁଏ।

କିପରି କରିବେ ନିୟନ୍ତ୍ରଣ?

କ୍ରେଭିଙ୍ଗ୍ସକୁ ଦବାଇବା ପରିବର୍ତ୍ତେ ଏହାକୁ ସଠିକ୍ ଭାବରେ ପରିଚାଳନା କରିବା ଆବଶ୍ୟକ। ଏଥିପାଇଁ କିଛି ସହଜ ଉପାୟ ଆପଣାଇ ପାରିବେ:

* ସନ୍ତୁଳିତ ଆହାର: ଠିକ୍ ସମୟରେ ପ୍ରୋଟିନ୍, ଫାଇବର ଏବଂ ସୁସ୍ଥ ଫ୍ୟାଟ୍ ଯୁକ୍ତ ଖାଦ୍ୟ ଗ୍ରହଣ କରନ୍ତୁ।

* ହାଇଡ୍ରେସନ୍: ପର୍ଯ୍ୟାପ୍ତ ପରିମାଣର ପାଣି ପିଅନ୍ତୁ।

* ଜୀବନଶୈଳୀରେ ପରିବର୍ତ୍ତନ: ମାନସିକ ଚାପ କମ୍ କରିବା ପାଇଁ ବ୍ୟାୟାମ କରନ୍ତୁ ଏବଂ ପର୍ଯ୍ୟାପ୍ତ ନିଦ୍ରା ଯାଆନ୍ତୁ ଯାହାଦ୍ୱାରା ହରମୋନ୍ ସନ୍ତୁଳିତ ରହିବ।

* ମାଇଣ୍ଡଫୁଲ୍ ଇଟିଂ (Mindful Eating): କ୍ରେଭିଙ୍ଗ୍ସ ହେଲେ ତୁରନ୍ତ ଖାଇବା ପରିବର୍ତ୍ତେ ଏହାକୁ ବୁଝି ଭାବିଚିନ୍ତି ଖାଆନ୍ତୁ।

ସୁସ୍ଥ ବିକଳ୍ପ ବାଛନ୍ତୁ: ଯେତେବେଳେ ମିଠା ଖାଇବାକୁ ମନ ହୁଏ, ସେତେବେଳେ ବାଦାମ, କାଜୁ କିମ୍ବା ପାଳଙ୍ଗ ଖାଇପାରିବେ। ଲୁଣିଆ ଖାଇବାକୁ ଇଚ୍ଛା ହେଲେ ନଡ଼ିଆ ପାଣି, ଭଜା ଚଣା କିମ୍ବା ସୁପ୍ ପିଅନ୍ତୁ। ସେହିପରି କିଛି କୁରକୁରିଆ ଖାଇବାକୁ ଇଚ୍ଛା ହେଲେ ଗାଜର, କାକୁଡ଼ି, ମଖାନା, ସେଓ କିମ୍ବା ସାଲାଡ୍ ଖାଇବା ଏକ ସୁସ୍ଥ ଏବଂ ଉତ୍ତମ ବିକଳ୍ପ ଅଟେ।

ଦୀର୍ଘ ଦିନ ଧରି ଡାଇବେଟିସ୍, ଫ୍ୟାଟି ଲିଭର୍ ଏବଂ ହୃଦରୋଗ ପାଇଁ କେବଳ ଶରୀରର ଓଜନ ବା Body Weight କୁ ମୁଖ୍ୟ କାରଣ ଭାବେ ବିବେଚନା କରାଯାଉଥିଲା। ଲୋକମାନଙ୍କୁ ପ୍ରାୟତଃ ପରାମର୍ଶ ଦିଆଯାଏ ଯେ ଓଜନ କମାଇଲେ ଏହି ସମସ୍ୟାଗୁଡିକର ସମାଧାନ ହୋଇଯିବ। କିନ୍ତୁ ଆଧୁନିକ ଗବେଷଣାରୁ ଜଣାପଡିଛି ଯେ, ଏହା ପଛରେ ଅନ୍ୟ ଏକ ଗୁରୁତ୍ୱପୂର୍ଣ୍ଣ କାରଣ ରହିଛି, ଯାହା ହେଉଛି ‘କ୍ରନିକ୍ ଇନଫ୍ଲାମେସନ୍’ ବା ଶରୀର ଭିତରେ ସୃଷ୍ଟି ହେଉଥିବା ପ୍ରଦାହ। ଏହା ଏକ ନୀରବ ଘାତକ ଭଳି କାମ କରେ, ଯାହା ବାହାରକୁ ଅନୁଭବ ହୁଏ ନାହିଁ କିନ୍ତୁ ଧୀରେ ଧୀରେ ଶରୀରର ଚର୍ବି ସଂରକ୍ଷଣ ଏବଂ ରକ୍ତ ସଞ୍ଚାଳନ ପ୍ରକ୍ରିୟାକୁ କ୍ଷତି ପହଞ୍ଚାଇଥାଏ।

ଲିଭର୍, ବ୍ଲଡ୍ ସୁଗାର୍ ଏବଂ ହାର୍ଟ ମଧ୍ୟରେ ସମ୍ପର୍କ

ଡାକ୍ତରୀ ବିଜ୍ଞାନ ଅନୁଯାୟୀ, ଡାଇବେଟିସ୍, ଫ୍ୟାଟି ଲିଭର୍ ଏବଂ ହୃଦରୋଗ ପରସ୍ପର ସହ ଘନିଷ୍ଠ ଭାବେ ଜଡିତ। ଯେତେବେଳେ ଶରୀର ଆବଶ୍ୟକତାଠାରୁ ଅଧିକ ଶର୍କରା ଓ କ୍ୟାଲୋରୀ ଗ୍ରହଣ କରେ, Liver (ଯକୃତ) ଏହାକୁ ଚର୍ବିରେ ପରିଣତ କରେ। ସମୟକ୍ରମେ ଏହି ଚର୍ବି ଯକୃତ କୋଷରେ ଜମା ହୋଇ Fatty Liver ରୂପ ନିଏ। ଏକ ଫ୍ୟାଟି ଲିଭର୍ କେବଳ ଚର୍ବି ଜମା କରେ ନାହିଁ, ବରଂ ଶରୀରରେ ଇନଫ୍ଲାମେସନ୍ ସୃଷ୍ଟି କରୁଥିବା ରାସାୟନିକ ସଙ୍କେତ ମଧ୍ୟ ଛାଡିଥାଏ। ଫଳରେ ଇନସୁଲିନ୍ ଠିକ୍ ଭାବେ କାମ କରେ ନାହିଁ ଏବଂ ରକ୍ତରେ ଶର୍କରା ବଢିବା ସହ ଧମନୀ ଗୁଡିକ ଦୁର୍ବଳ ହୋଇ ହୃଦରୋଗ ଆଶଙ୍କା ସୃଷ୍ଟି ହୁଏ।

ଖାଦ୍ୟପେୟ ଓ ଜୀବନଶୈଳୀର ପ୍ରଭାବ

ଆମର ଖାଦ୍ୟପେୟ ଇନଫ୍ଲାମେସନ୍ ସ୍ତରକୁ ପ୍ରଭାବିତ କରିଥାଏ। ଅତ୍ୟଧିକ ପ୍ରକ୍ରିୟାକୃତ ଖାଦ୍ୟ, ଚିନି, ମଇଦା ଜାତୀୟ ଖାଦ୍ୟ ଏବଂ ମିଠା ପାନୀୟ ଶରୀରରେ ଇନଫ୍ଲାମେସନ୍ ବଢାଇଥାଏ। ଅପରପକ୍ଷରେ, ସବୁଜ ପନିପରିବା, ଡାଲି ଜାତୀୟ ଶସ୍ୟ, ବାଦାମ ଏବଂ ସୁସ୍ଥ ଚର୍ବି (Healthy Fats) ଯୁକ୍ତ ଖାଦ୍ୟ ଶରୀରକୁ ସୁସ୍ଥ ରଖିବାରେ ସାହାଯ୍ୟ କରେ। ଏକ ଗୁରୁତ୍ୱପୂର୍ଣ୍ଣ କଥା ହେଉଛି, କେବଳ ମୋଟାପଣ ଥିବା ଲୋକଙ୍କୁ ଯେ ଏହି ରୋଗ ହୁଏ ତାହା ନୁହେଁ। ଦକ୍ଷିଣ ଏସିଆର ଅନେକ ଲୋକଙ୍କର ଓଜନ ସ୍ୱାଭାବିକ ଥିଲେ ମଧ୍ୟ ସେମାନେ Metabolic Health ସମସ୍ୟାର ଶିକାର ହେଉଛନ୍ତି।

ସୁସ୍ଥ ରହିବାର ସହଜ ଉପାୟ

କେବଳ ଓଜନ କମାଇବା ଉପରେ ଧ୍ୟାନ ନ ଦେଇ ଜୀବନଶୈଳୀରେ କିଛି ଛୋଟ ପରିବର୍ତ୍ତନ ଆଣିବା ଜରୁରୀ। ଏଥିପାଇଁ ଖାଦ୍ୟରେ ଉତ୍ତମ ମାନର Protein (ଯେପରିକି ଡାଲି, ଅଣ୍ଡା, ସୋୟାବିନ୍) ସାମିଲ କରନ୍ତୁ। ମଇଦା ଓ ଚିନି ଜାତୀୟ ଖାଦ୍ୟ କମ କରନ୍ତୁ ଏବଂ ପ୍ରଚୁର ପରିମାଣରେ ଫାଇବର ଯୁକ୍ତ ଖାଦ୍ୟ ଖାଆନ୍ତୁ। ଏହା ସହିତ ନିୟମିତ ବ୍ୟାୟାମ, ପର୍ଯ୍ୟାପ୍ତ ନିଦ୍ରା ଏବଂ ମାନସିକ ଚାପ ନିୟନ୍ତ୍ରଣ କରିବା ଦ୍ୱାରା ଶରୀରର ମେଟାବୋଲିଜିମ୍ ସୁସ୍ଥ ରହିପାରିବ।

ଆଜିକାଲି ସୁପରଫୁଡ୍ ଖାଇବାର କ୍ରେଜ୍ ଲୋକଙ୍କ ମଧ୍ୟରେ ଖୁବ୍ ବଢିବାରେ ଲାଗିଛି। ଅନେକ ଲୋକ ଭାବନ୍ତି ଯେ ବିଦେଶୀ ଏବଂ ଦାମୀ ଫଳ ଶରୀର ପାଇଁ ଅଧିକ ଲାଭଦାୟକ। କିନ୍ତୁ ଆପଣ ଜାଣି ଆଶ୍ଚର୍ଯ୍ୟ ହେବେ ଯେ, ବଜାରରେ ମିଳୁଥିବା ଶସ୍ତା ପିଜୁଳି, ଦାମୀ ବ୍ଲୁବେରି ଠାରୁ ଢେର ଗୁଣ ଅଧିକ ପୁଷ୍ଟିକର ହୋଇପାରେ। ଏନେଇ ମୁମ୍ବାଇର ଜଣେ ବିଶିଷ୍ଟ ଡାକ୍ତର ନିକଟରେ ଏକ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆଣିଛନ୍ତି।

ଦାମରେ ଆକାଶ ପାତାଳ ଫରକ, କିନ୍ତୁ ଗୁଣରେ କିଏ ଆଗରେ?

ବଜାରରେ ବ୍ଲୁବେରିର ଦାମ କିଲୋ ପ୍ରତି ପ୍ରାୟ ୨୦୦୦ ଟଙ୍କା ରହିଥିବା ବେଳେ ପିଜୁଳି ମାତ୍ର ୮୦ ରୁ ୧୦୦ ଟଙ୍କାରେ ମିଳିଥାଏ। ତେବେ ପୋଷକ ତତ୍ତ୍ୱ ଦୃଷ୍ଟିରୁ ଦେଖିଲେ, ଆମ ଦେଶୀ ପିଜୁଳି ବିଦେଶୀ ବ୍ଲୁବେରି ଉପରେ ଭାରି ପଡିଥାଏ। ଡାକ୍ତରଙ୍କ ଅନୁଯାୟୀ, ପିଜୁଳିରେ ବ୍ଲୁବେରି ତୁଳନାରେ ଅଧିକ ମାତ୍ରାରେ ଭିଟାମିନ୍ ସି ଏବଂ ଫାଇବର ରହିଛି, ଯାହା ପେଟ ରୋଗ ପାଇଁ ରାମବାଣ ସଦୃଶ।

ପିଜୁଳିରେ ରହିଛି ପ୍ରଚୁର ଭିଟାମିନ୍ ସି

ରିପୋର୍ଟ ଅନୁଯାୟୀ, ୧୦୦ ଗ୍ରାମ ବ୍ଲୁବେରିରେ ମାତ୍ର ୯.୭ ମିଲିଗ୍ରାମ ଭିଟାମିନ୍ ସି ଥିବାବେଳେ ସମାନ ପରିମାଣର ପିଜୁଳିରେ ପ୍ରାୟ ୨୧୨ ମିଲିଗ୍ରାମ ଭିଟାମିନ୍ ସି ରହିଥାଏ। ଅର୍ଥାତ୍ ବ୍ଲୁବେରି ତୁଳନାରେ ପିଜୁଳିରେ ୨୦ ଗୁଣରୁ ଅଧିକ ଭିଟାମିନ୍ ସି ମିଳିଥାଏ। ଏହା ରୋଗ ପ୍ରତିରୋଧକ ଶକ୍ତି ବଢାଇବାରେ ସାହାଯ୍ୟ କରେ।

ପେଟ ସ୍ୱାସ୍ଥ୍ୟ ପାଇଁ କେଉଁଟି ଭଲ?

ହଜମ ପ୍ରକ୍ରିୟାକୁ ସୁସ୍ଥ ରଖିବା ପାଇଁ ଶରୀରକୁ ଫାଇବରର ଆବଶ୍ୟକତା ରହିଥାଏ। ପିଜୁଳିରେ ଥିବା ଉଚ୍ଚ ଫାଇବର ରକ୍ତରେ ଶର୍କରା ସ୍ତରକୁ ନିୟନ୍ତ୍ରଣ କରିବାରେ ସାହାଯ୍ୟ କରେ ଏବଂ କୋଷ୍ଠକାଠିନ୍ୟ ଭଳି ସମସ୍ୟା ଦୂର କରେ। ଡାକ୍ତର ପରାମର୍ଶ ଦେଇଛନ୍ତି ଯେ, କେବଳ ଦାମୀ ହୋଇଥିବା କାରଣରୁ ବିଦେଶୀ ଫଳ ପଛରେ ନ ଗୋଡାଇ, ଋତୁକାଳୀନ ଦେଶୀ ଫଳ ଖାଇବା ସ୍ୱାସ୍ଥ୍ୟ ପାଇଁ ଅଧିକ ହିତକର।