ପୁରୀ: ରାତି ପାହିଲେ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ରଥଯାତ୍ରା । ରଥଯାତ୍ରା ପାଇଁ ସାରା ଶ୍ରୀକ୍ଷେତ୍ର ପୁରୀ ଚଳଚଞ୍ଚଳ ହୋଇଉଠିଛି । ଆସନ୍ତାକାଲି ମହାପ୍ରଭୁ ଶ୍ରୀଜଗନ୍ନାଥ, ବଡ଼ଭାଇ ବଳଭଦ୍ର ଓ ଭଉଣୀ ଦେବୀ ସୁଭଦ୍ରା ଶ୍ରୀମନ୍ଦିରରୁ ବାହାରି ନଅ ଦିନିଆ ଯାତ୍ରାରେ ଗୁଣ୍ଡିଚା ମନ୍ଦିର ଅଭିମୁଖେ ବାହାରିବେ । ଏଥିପାଇଁ ପୁରୀ ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି ।

ରଥଯାତ୍ରାର ଚୂଡ଼ାନ୍ତ ପ୍ରସ୍ତୁତି ସ୍ୱରୂପ ବୁଧବାର ଦିନ ତିନି ରଥକୁ ସେମାନଙ୍କ ପାରମ୍ପରିକ ନିର୍ମାଣ ସ୍ଥଳ 'ରଥଖଳା'ରୁ ଶ୍ରୀମନ୍ଦିରର ସିଂହଦ୍ୱାର ସମ୍ମୁଖକୁ ଅଣାଯାଇଛି । ଭକ୍ତି ଓ ଆନନ୍ଦମୟ ପରିବେଶ ମଧ୍ୟରେ ଦେଶବିଦେଶରୁ ଆସିଥିବା ଲକ୍ଷ ଲକ୍ଷ ଭକ୍ତ ମହାପ୍ରଭୁଙ୍କ ନନ୍ଦିଘୋଷ, ବଳଭଦ୍ରଙ୍କ ତାଳଧ୍ୱଜ ଓ ଦେବୀ ସୁଭଦ୍ରାଙ୍କ ଦର୍ପଦଳନ ରଥକୁ ଗୁରୁବାର ଦିନ ଗୁଣ୍ଡିଚା ମନ୍ଦିର ଅଭିମୁଖେ ଟାଣିବେ ।

ଶ୍ରୀଜଗନ୍ନାଥ ମନ୍ଦିର ପ୍ରଶାସନ (ଏସଜେଟିଏ)ର ମୁଖ୍ୟ ପ୍ରଶାସକ ଅରବିନ୍ଦ କୁମାର ପାଢ଼ୀ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ, ରଥଯାତ୍ରା ପାଇଁ ସମସ୍ତ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ରଥଯାତ୍ରା ଦିନ ହେବାକୁ ଥିବା ଶ୍ରୀଜୀଉଙ୍କ ପହଣ୍ଡି ବିଜେ ନୀତି ସକାଳ ୯ଟାରୁ ୯.୩୦ ମିନିଟ ମଧ୍ୟରେ ଆରମ୍ଭ ହେବାକୁ ସମୟ ଧାର୍ଯ୍ୟ କରାଯାଇଛି ।

ଚଳିତ ବର୍ଷ ଶ୍ରଦ୍ଧାଳୁଙ୍କ ସଂଖ୍ୟାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ପୁରୀ ଜିଲ୍ଲାପାଳଙ୍କ ସୂଚନା ଅନୁଯାୟୀ, ଭକ୍ତଙ୍କ ସୁବିଧା ଏବଂ ଶୃଙ୍ଖଳିତ ଦର୍ଶନ ପାଇଁ ବିଭିନ୍ନ ବିଭାଗ ସଜାଗ ରହିଛନ୍ତି । ସୁରକ୍ଷା ଦାୟିତ୍ୱରେ ପ୍ରାୟ ୧୨,୦୦୦ ପୋଲିସ କର୍ମଚାରୀଙ୍କ ସମେତ କେନ୍ଦ୍ରୀୟ ସଶସ୍ତ୍ର ପୋଲିସ ବଳ (ସିଏପିଏଫ) ମୁତୟନ ହେବେ । ସାମୁଦ୍ରିକ ସୀମା ଉପରେ ନଜର ରଖିବା ପାଇଁ ଭାରତୀୟ କୋଷ୍ଟଗାର୍ଡ ଏବଂ ନୌସେନା ମଧ୍ୟ ସଜାଗ ରହିଛନ୍ତି । ସମ୍ପୂର୍ଣ୍ଣ ସୁରକ୍ଷା ବ୍ୟବସ୍ଥାର ତଦାରଖ କରିବା ପାଇଁ ୧୯ ଜଣ ବରିଷ୍ଠ ଆଇପିଏସ ଅଫିସରଙ୍କୁ ନିୟୋଜିତ କରାଯାଇଛି ।

ଶାନ୍ତିଶୃଙ୍ଖଳା ରକ୍ଷା ପାଇଁ ପୁରୀର ବିଭିନ୍ନ ସ୍ଥାନରେ ୪୭୩ଟି ସିସିଟିଭି କ୍ୟାମେରା ଲଗାଯାଇଛି । ଭକ୍ତମାନଙ୍କୁ ସୂଚନା ପ୍ରଦାନ ପାଇଁ ୬୫ଟି ବଡ଼ ଏଲଇଡି ସ୍କ୍ରିନର ବ୍ୟବସ୍ଥା କରାଯାଇଛି, ଯେଉଁଥିରେ ଓଡ଼ିଆ, ହିନ୍ଦୀ ଏବଂ ଇଂରାଜୀ ଭାଷାରେ ଗୁରୁତ୍ୱପୂର୍ଣ୍ଣ ଘୋଷଣା କରାଯିବ । ମୋବାଇଲ ନେଟୱର୍କ ସୁଧାରିବା ପାଇଁ ୧୬ଟି ସ୍ଥାୟୀ ଓ ଅନେକ ଅସ୍ଥାୟୀ ମୋବାଇଲ ଟାୱାର ସ୍ଥାପନ କରାଯାଇଛି । ଏହା ସହିତ ଯାତ୍ରୀଙ୍କ ସୁବିଧା ପାଇଁ ପୁରୀ ସହରରେ ୫୯୫ଟି ସ୍ଥାୟୀ ଏବଂ ୧,୦୫୦ଟି ଅସ୍ଥାୟୀ ସାଇନବୋର୍ଡ ମଧ୍ୟ ଲଗାଯାଇଛି ।

ପୁରୀ: ଶ୍ରୀକ୍ଷେତ୍ର ପୁରୀରେ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ଘୋଷଯାତ୍ରା ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ଶ୍ରୀଜଗନ୍ନାଥ ମନ୍ଦିର ପ୍ରଶାସନ (SJTA) ପକ୍ଷରୁ ରଥଯାତ୍ରା ପାଇଁ ଆନୁଷ୍ଠାନିକ ନୀତିକାନ୍ତି ସୂଚୀ ପ୍ରକାଶ ପାଇଛି। ଏହି ସୂଚୀ ଅନୁଯାୟୀ, ଆସନ୍ତାକାଲି ଅପରାହ୍ନ ୪ଟା ସମୟରେ ରଥଟଣା କାର୍ଯ୍ୟ ଆରମ୍ଭ ହେବ। ଏହାପୂର୍ବରୁ ପବିତ୍ର ଛେରା ପହଁରା ନୀତି ସମ୍ପନ୍ନ କରାଯିବ।

ପ୍ରଶାସନ ପକ୍ଷରୁ ପ୍ରକାଶିତ ନୀତି ନିର୍ଘଣ୍ଟ ଅନୁଯାୟୀ, ଭୋର ସମୟରୁ ମହାପ୍ରଭୁଙ୍କ ବିଭିନ୍ନ ଗୁପ୍ତ ନୀତି ଓ ପୂଜାର୍ଚ୍ଚନା ଆରମ୍ଭ ହେବ। ସକାଳ ୯ଟା ସମୟରେ ରଥ ପ୍ରତିଷ୍ଠା କାର୍ଯ୍ୟକ୍ରମ ଅନୁଷ୍ଠିତ ହେବ। ଏହାପରେ ସକାଳ ୯:୩୦ ରୁ ମଧ୍ୟାହ୍ନ ୧୨:୩୦ ମଧ୍ୟରେ ଚତୁର୍ଦ୍ଧାମୂର୍ତ୍ତିଙ୍କର ଭବ୍ୟ ପହଣ୍ଡି ବିଜେ ଅନୁଷ୍ଠିତ ହେବ, ଯେଉଁଥିରେ ପ୍ରଭୁ ବଳଭଦ୍ର, ଦେବୀ ସୁଭଦ୍ରା ଏବଂ ମହାପ୍ରଭୁ ଶ୍ରୀଜଗନ୍ନାଥ ରଥାରୂଢ଼ ହେବେ।

ପହଣ୍ଡି ନୀତି ପରେ ଦ୍ୱିପହର ୨ଟା ରୁ ଅପରାହ୍ନ ୩ଟା ମଧ୍ୟରେ ଅତ୍ୟନ୍ତ ମହତ୍ତ୍ୱପୂର୍ଣ୍ଣ ଛେରା ପହଁରା ନୀତି ଅନୁଷ୍ଠିତ ହେବ। ଗଜପତି ମହାରାଜା ରଥ ଉପରେ ସୁନା ଖଡ଼ିକାରେ ସେବା ପ୍ରଦାନ କରିବେ। ଏହି ସମସ୍ତ ପ୍ରକ୍ରିୟା ଶେଷ ହେବା ପରେ ଅପରାହ୍ନ ୪ଟାରେ ବହୁ ପ୍ରତିକ୍ଷିତ ରଥଟଣା କାର୍ଯ୍ୟ ଆରମ୍ଭ ହେବ। କୋଟି କୋଟି ଭକ୍ତଙ୍କ ନୟନର ସାରଥି ମହାପ୍ରଭୁଙ୍କ ତିନି ରଥକୁ ଭକ୍ତମାନେ ବଡ଼ଦାଣ୍ଡରେ ଟାଣି ଟାଣି ଗୁଣ୍ଡିଚା ମନ୍ଦିର ଅଭିମୁଖେ ନେଇଯିବେ।

ଶ୍ରୀମନ୍ଦିର ପ୍ରଶାସନ ସମସ୍ତ ଭକ୍ତ ଓ ଶ୍ରଦ୍ଧାଳୁମାନଙ୍କୁ ଏହି ନୀତି ନିର୍ଘଣ୍ଟ ଅନୁଯାୟୀ ସହଯୋଗ କରିବାକୁ ନିବେଦନ କରିଛି, ଯେପରି ସମସ୍ତ ରୀତିନୀତି ଶୃଙ୍ଖଳିତ ଏବଂ ସମୟାନୁବର୍ତ୍ତୀ ଭାବେ ଶେଷ ହୋଇପାରିବ। ଚଳିତ ବର୍ଷ ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ପୁରୀରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ଭିଡ଼ ନିୟନ୍ତ୍ରଣ ଏବଂ ସୁଗମ ରଥଟଣା ପାଇଁ ପ୍ରଶାସନ ଓ ପୋଲିସ ବାହିନୀ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା ଗ୍ରହଣ କରାଯାଇଛି।

ବିଶ୍ୱପ୍ରସିଦ୍ଧ ପୁରୀ ରଥଯାତ୍ରା ପାଇଁ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ଶୃଙ୍ଖଳିତ ଦର୍ଶନ ଏବଂ ଯାତାୟାତ ନିମନ୍ତେ ପୁରୀ ପୋଲିସ ଏବଂ ଟ୍ରାଫିକ୍ ନିୟନ୍ତ୍ରଣ କକ୍ଷ ପକ୍ଷରୁ ଏକ ବିସ୍ତୃତ ଟ୍ରାଫିକ୍ ଏବଂ ପାର୍କିଂ ମ୍ୟାନେଜମେଣ୍ଟ ପ୍ଲାନ୍ ଜାରି କରାଯାଇଛି। ଟ୍ରାଫିକ୍ ସମସ୍ୟା ଯେପରି ନହୁଏ, ସେଥିପାଇଁ ସହରରେ ସ୍ୱତନ୍ତ୍ର ନୋ-ଭେଇକିଲ୍ ଜୋନ୍ (ଗାଡ଼ି ଚଳାଚଳ ନିଷେଧାଞ୍ଚଳ) ଲାଗୁ କରାଯିବା ସହ ପାର୍କିଂ ପାଇଁ ଏକାଧିକ ସ୍ଥାନ ଚିହ୍ନଟ ହୋଇଛି।

୩୦ଟି ପାର୍କିଂ ସ୍ଥାନ ଚିହ୍ନଟ

ଚଳିତ ବର୍ଷ ଗାଡ଼ି ମୋଟର ପାର୍କିଂ ପାଇଁ ସର୍ବମୋଟ ୩୦ଟି ପାର୍କିଂ ଲଟ୍ ବ୍ୟବସ୍ଥା କରାଯାଇଛି, ଯେଉଁଥିରେ ପ୍ରାୟ ୨୩,୮୪୦ଟି ଗାଡ଼ି ରହିପାରିବ।

* ଚାରି ଚକିଆ ଯାନ: କାର୍ ଓ ଅନ୍ୟାନ୍ୟ ଛୋଟ ଗାଡ଼ି ପାଇଁ ୨୨ଟି ସ୍ଥାନ ଚିହ୍ନଟ କରାଯାଇଛି, ଯେଉଁଠାରେ ୭,୭୩୦ଟି ଗାଡ଼ି ପାର୍କିଂ କରିବାର ସୁବିଧା ଅଛି।

* ଦୁଇ ଚକିଆ ଯାନ: ବାଇକ୍ ପାର୍କିଂ ପାଇଁ ମାଟିତୋଟା-୧, ମାଟିତୋଟା-୨, ପୁରୁଣା ଜଗନ୍ନାଥ ବଲ୍ଲଭ ଏବଂ ବ୍ଲୁ ଫ୍ଲାଗ୍-ନୀଳାଚଳ ଅଶୋକ ଭଳି ୪ଟି ବଡ଼ ସ୍ଥାନ ନିର୍ଦ୍ଧାରିତ କରାଯାଇଛି। ଏଠାରେ ପ୍ରାୟ ୧୫,୦୦୦ ଦୁଇ ଚକିଆ ଗାଡ଼ି ରହିପାରିବ।

* ବସ୍ ପାର୍କିଂ: ବସ୍ ଗୁଡ଼ିକର ରହଣି ପାଇଁ ମାଳତୀପାଟପୁର, ତାଳବଣିଆ, ସ୍ୱାମୀ ନାରାୟଣ ମନ୍ଦିର ଏବଂ ସମଙ୍ଗ ଠାରେ ୪ଟି ସ୍ଥାନ ଚିହ୍ନଟ ହୋଇଛି। ଏହି ସ୍ଥାନଗୁଡ଼ିକରେ ପ୍ରାୟ ୭୫୦ ବସ୍ ରଖିବା ପାଇଁ ବ୍ୟବସ୍ଥା କରାଯାଇଛି।

ନୋ-ଭେଇକିଲ୍ ଜୋନ୍ ଏବଂ ସେଫ୍ ଜୋନ୍

ଟ୍ରାଫିକ୍ ଭିଡ଼କୁ ଏଡ଼ାଇବା ପାଇଁ ଡାକ୍ତରଖାନା ଛକରୁ ଶ୍ରୀମନ୍ଦିର ପର୍ଯ୍ୟନ୍ତ ବଡ଼ଦାଣ୍ଡକୁ ନୋ-ଭେଇକିଲ୍ ଜୋନ୍ ଘୋଷଣା କରାଯାଇଛି। ସେହିପରି ଝାଡ଼େଶ୍ୱରୀ ଛକରୁ ହସ୍ପିଟାଲ୍ ଛକ, ଜେଲ୍ ରୋଡ୍ ପାର୍କିଂରୁ ହସ୍ପିଟାଲ୍ ଛକ, ଏବଂ ବୃଷଭ ଛକରୁ ମନ୍ଦିର ପର୍ଯ୍ୟନ୍ତ ଗାଡ଼ି ଚଳାଚଳ ଉପରେ କଟକଣା ଲଗାଯାଇଛି। ଏହି ସ୍ଥାନଗୁଡ଼ିକରେ କେବଳ ଅନୁମୋଦିତ ସଟଲ୍ ବସ୍ ଏବଂ ଜରୁରୀକାଳୀନ ଯାନ ଯାତାୟାତ କରିପାରିବେ। ଏହାଛଡ଼ା, ଜରୁରୀ ପରିସ୍ଥିତିରେ ଶ୍ରଦ୍ଧାଳୁଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ ବଡ଼ଦାଣ୍ଡର ୩ କିଲୋମିଟର ରାସ୍ତାରେ ୨୬ଟି ସେଫ୍ ଜୋନ୍ ପ୍ରସ୍ତୁତ କରାଯାଇଛି।

କଡ଼ା ସୁରକ୍ଷା ଓ ସିସିଟିଭି ନଜର

ଭିଡ଼ ନିୟନ୍ତ୍ରଣ ତଥା ଟ୍ରାଫିକ୍ ଉପରେ ନଜର ରଖିବା ପାଇଁ ସହରରେ ମୋଟ ୨୪୪ଟି ସିସିଟିଭି କ୍ୟାମେରା ସମେତ ଡ୍ରୋନ୍ ମାଧ୍ୟମରେ ସର୍ଭେଲାନ୍ସର ବ୍ୟବସ୍ଥା କରାଯାଇଛି। ସହର ବାହାରେ ଥିବା ପାର୍କିଂ ସ୍ଥଳରୁ ଶ୍ରଦ୍ଧାଳୁମାନଙ୍କୁ ମନ୍ଦିର ନିକଟକୁ ଆଣିବା ପାଇଁ ସ୍ୱତନ୍ତ୍ର ସଟଲ୍ ବସ୍ ସେବା ମଧ୍ୟ ଯୋଗାଇ ଦିଆଯିବ। ପ୍ରଶାସନ ପକ୍ଷରୁ ଗାଡ଼ିଗୁଡ଼ିକର ପ୍ରବେଶ ଏବଂ ପ୍ରସ୍ଥାନକୁ ଟ୍ରାକ୍ କରିବା ପାଇଁ ସ୍ୱତନ୍ତ୍ର ଟ୍ରାଫିକ୍ ଅଧିକାରୀମାନଙ୍କୁ ନିଯୁକ୍ତ କରାଯାଇଛି।

ପୁରୀ: ସ୍ନାନ ମଣ୍ଡପରେ ଶେଷ ହୋଇଛି ମହାପ୍ରଭୁଙ୍କ ଦେବସ୍ନାନ ନୀତି । ଦୁର୍ଲଭ ଗଜବେଶରେ ଭକ୍ତଙ୍କୁ ଦର୍ଶନ ଦେଉଛନ୍ତି ଚତୁର୍ଦ୍ଧାମୂର୍ତ୍ତି । ୧୦୮ଗରା ସୁବାଶିଷ ଜଳରେ ସ୍ନାନ କରି ଗଜାନନ ବେଶରେ ଲକ୍ଷାଧିକ ଶ୍ରଦ୍ଧାଳୁଙ୍କୁ ଦର୍ଶନ ଦେଉଛନ୍ତି ମର୍ତ୍ତ୍ୟ ବୈକୁଣ୍ଠ ଅଧିପତି । ଗଜପତି ମହାରାଜା ଦିବ୍ୟସିଂହ ଦେବଙ୍କ ଛେରା ପହଁରା ନୀତି ସମାପନ ପରେ ବିଭିନ୍ନ ଅଳଙ୍କାର ପରିଧାନ କରିଛନ୍ତି ଶ୍ରୀଜିଉ । ସ୍ନାନ ମଣ୍ଡପରେ ଗଜାନନ ବେଶରେ ଦର୍ଶନ ଦେଉଛନ୍ତି ସୁଦର୍ଶନ, ବଡ଼ ଭାଇ ବଳଭଦ୍ର, ଦେବୀ ସୁଭଦ୍ରା ଓ ମହାବହୁ ଶ୍ରୀଜଗନ୍ନାଥ ।

ଆଜି ପବିତ୍ର ଦେବସ୍ନାନ ପୂର୍ଣ୍ଣିମା । ଏହି ଅବସରରେ ସକାଳୁ ସକାଳୁ ଧାଡି ପହଣ୍ଡି କରି ସ୍ନାନବେଦୀରେ ବିଜେ କରିଥିଲେ ଚତୁର୍ଦ୍ଧାମୂର୍ତ୍ତି । ଏହାପରେ ହୋଇଥିଲା ମଙ୍ଗଳ ଆଳତୀ । ପରେ ଜଳ ବିଜେ, ପୂଜା ଓ ସ୍ନାନ ନୀତି ଅନୁଷ୍ଠିତ ହୋଇଥିଲା । ଏହା ପରେ ଆରମ୍ଭ ହୋଇଥିଲା ମହାପ୍ରଭୁଙ୍କ ଦିବ୍ୟ ସ୍ନାନ ନୀତି । ଏହି ଦିବ୍ୟ ମୂହୁର୍ତ୍ତକୁ ଦର୍ଶନ କରିଥିଲେ ଲକ୍ଷ ଲକ୍ଷ ଭକ୍ତ । ୧୦୮ କଳସୀ ସୁବାସିତ ଜଳରେ ସ୍ନାନ କରିଥିଲେ ଚତୁର୍ଦ୍ଧାମୂର୍ତ୍ତି ।

ପରେ ଗଜପତି ମହାରାଜ ଦିବ୍ୟସିଂହ ଦେବ ସ୍ନାନବେଦୀରେ ପହଞ୍ଚିଥିଲେ । ଚତୁର୍ଦ୍ଧାମୂର୍ତ୍ତିଙ୍କୁ ଦର୍ଶନ କରିବା ସହିତ ଛେରାପହଁରା ନୀତି ସମ୍ପାପନ କରିଥିଲେ । ଛେରାପହଁରା ନୀତି ସମ୍ପନ୍ନ ପରେ ଚତୁର୍ଦ୍ଧା ମୂର୍ତ୍ତିଙ୍କର 'ଗଜାନନ ବେଶ' ଆରମ୍ଭ ହୋଇଥିଲା । ଗଜାନନ ବେଶରେ ସଜ୍ଜେଇ ହୋଇଛନ୍ତି ଚତୁର୍ଦ୍ଧାମୂର୍ତ୍ତି । 

ପୁରୀ: ଆରମ୍ଭ ହେଲା ଚତୁର୍ଦ୍ଧାମୂର୍ତ୍ରୀଙ୍କ ଦିବ୍ୟ ସ୍ନାନ ନୀତି । ୧୦୮ ଗରା ସୁବାସିତ ଜଳରେ ସ୍ନାନ କରୁଛନ୍ତି ଶ୍ରୀଜିଉ । ଏହି ଦିବ୍ୟ ଲୀଳାକୁ ଦେଖିବା ପାଇଁ ବଡ଼ଦାଣ୍ଡରେ ଲକ୍ଷାଧିକ ଶ୍ରଧାଳୁଙ୍କ ସମାଗମ ହୋଇଛି । ଭକ୍ତଙ୍କ ହରିବୋଲ, ହୁଳହୁଳିରେ କମ୍ପୁଛି ବଡଦାଣ୍ଡ । ଭାବର ଠାକୁର ଆଜି ନିଜ ଭକ୍ତଙ୍କ ପାଇଁ ରତ୍ନସିଂହାସନ ଛାଡ଼ି ସ୍ନାନବେଦୀକୁ ଓହ୍ଲାଇ ଆସିଛନ୍ତି । ଏହି ଦିବ୍ୟ ମହାସ୍ନାନ ପରେ ମହାପ୍ରଭୁ ଧାରଣ କରିବେ ଗଜବେଶ, ଯାହାର ଦର୍ଶନ ପାଇଁ ଭକ୍ତଙ୍କ ଅପେକ୍ଷା ଆହୁରି ବଢ଼ିଯାଇଛି । ସ୍ନାନପୂର୍ଣ୍ଣିମା କେବଳ ଏକ ଉତ୍ସବ ନୁହେଁ, ଏହା ଭକ୍ତ ଓ ଭଗବାନଙ୍କ ଅନନ୍ତ ପ୍ରେମ, ଆସ୍ଥା ଓ ଆତ୍ମିକ ସମ୍ପର୍କର ଏକ ମହାମିଳନ । ଏଠାରେ ଭକ୍ତି ଅଛି, ଭାବନା ଅଛି, ଆଉ ଅଛି କାଳିଆ ସାଆନ୍ତଙ୍କ ଅସୀମ କରୁଣାର ସ୍ପର୍ଶ ।

ଦେବସ୍ନାନ ପରେ ଆରମ୍ଭ ହେବ ପନ୍ଦର ଦିନିଆ ଅଣସର ନୀତି । ଏହି ଅବଧିରେ ଶ୍ରୀମନ୍ଦିରରେ ମହାପ୍ରଭୁଙ୍କ ସର୍ବସାଧାରଣ ଦର୍ଶନ ବନ୍ଦ ରହିବ । ଅଣସର ସମାପ୍ତି ପରେ ‘ନବଯୌବନ ଦର୍ଶନ’ରେ ଭକ୍ତମାନେ ପୁଣିଥରେ ଶ୍ରୀଜିଉଙ୍କ ଦିବ୍ୟ ରୂପ ଦର୍ଶନ କରିବାର ସୁଯୋଗ ପାଇବେ । ଏହା ପରେ ଆରମ୍ଭ ହେବ ବିଶ୍ୱବିଖ୍ୟାତ ଶ୍ରୀଗୁଣ୍ଡିଚା ରଥଯାତ୍ରା ।

ପୁରୀ: ଆଜି ମହାପ୍ରଭୁଙ୍କ ପବିତ୍ର ସ୍ନାନଯାତ୍ରା । ରତ୍ନ ମଣ୍ଡପରୁ ସ୍ନାନ ମଣ୍ଡପକୁ ଓହ୍ଲାଇ ଆସିଛନ୍ତି ଚତୁର୍ଦ୍ଧାମୂର୍ତ୍ତି । ମହାପ୍ରଭୁଙ୍କୁ ଦେଖିବା ପାଇଁ ପୁରୀରେ ଲକ୍ଷାଧିକ ଭକ୍ତଙ୍କ ଭିଡ଼ ଦେଖିବାକୁ ମିଳିଛି । ହରିବୋଲ, ହୁଳହୁଳିରେ କମ୍ପୁଛି ବଡଦାଣ୍ଡ । ମହାପ୍ରଭୁଙ୍କ ଏହି ଦିବ୍ୟ ସ୍ନାନ ଦେଖିବା ପାଇଁ ଶ୍ରୀମନ୍ଦିର ସିଂହଦ୍ବାରଠୁ ମରିଚି କୋଟ ଓ ଶ୍ରୀମନ୍ଦିର ପରିକ୍ରମାମାର୍ଗ ସଂଲଗ୍ନ ସାହି ରାସ୍ତାଗୁଡ଼ିକ ଜନଗହଳି ହୋଇଉଠିଛି । ପରିକ୍ରମା ମାର୍ଗ ଓ ସିଂହଦ୍ୱାର ସମ୍ମୁଖରେ ଯାତ୍ରୀମାନେ ସ୍ନାନବେଳର ସେହି ଦୁର୍ଲଭ ମୁହୂର୍ତ୍ତ ଦେଖିବାପାଇଁ ରବିବାର ସନ୍ଧ୍ୟାରୁ ଡେରା ପକାଇ ବସିଛନ୍ତି ଭକ୍ତ । ରାତିସାରା ବଡ଼ଦାଣ୍ଡରେ ଉଜାଗର ରହିଛନ୍ତି ଲକ୍ଷ ଲକ୍ଷ ଭକ୍ତ। ଆଜି ଦେଖିବେ ମହାପ୍ରଭୁଙ୍କ ଦୁର୍ଲଭ ହାତୀବେଶ। 

ବଡ଼ଦାଣ୍ଡରେ ଭକ୍ତଙ୍କ ଶୃଙ୍ଖଳିତ ଦର୍ଶନ ପାଇଁ ମାର୍କେଟ ଛକଠାରୁ ଶ୍ରୀମନ୍ଦିର ପର୍ଯ୍ୟନ୍ତ ବ୍ୟାରିକେଡ୍‌ ବ୍ୟବସ୍ଥା କରାଯାଇଛି। ଭକ୍ତମାନେ ଧାଡ଼ିରେ ଯାଇ ମହାପ୍ରଭୁଙ୍କୁ ଶୃଙ୍ଖଳିତଭାବେ ଦର୍ଶନ କରିବାର ସୁଯୋଗ ପାଇ ପାରିବେ। ଗରମ ଗୁଳୁଗୁଳିରୁ ରକ୍ଷା ପାଇଁ ବ୍ୟାରିକେଡ଼ ଉପରେ ଛାମୁଡ଼ିଆ ବ୍ୟବସ୍ଥା ସହ ପାନୀୟ ଜଳର ସୁବନ୍ଦୋବସ୍ତ କରାଯାଇଛି। ମହାପ୍ରଭୁଙ୍କ ଏହି ଦିବ୍ୟ ଦୁର୍ଲ୍ଲଭ ବେଶକୁ ଦର୍ଶନ କରିବା ପାଇଁ ସମସ୍ତ ନୀତିକାନ୍ତି ଶୃଙ୍ଖଳିତ କରିବାକୁ ସେବାୟତଙ୍କ ସହ ବିସ୍ତୃତ ଆଲୋଚନା କରାଯାଇଛି।

ପୁରୀ: ଆଜି ପବିତ୍ର ଦେବସ୍ନାନ ପୂର୍ଣ୍ଣିମା । ୧୦୮ଗରା ସୁବାଶିଷ ଜଳରେ ସ୍ନାନ କରି ଗଜାନନ ବେଶରେ ଦେବେ ଦର୍ଶନ ଦେବେ ମର୍ତ୍ତ୍ୟ ବୈକୁଣ୍ଠ ଅଧିପତି । ଅଗଣିତ ଭକ୍ତଙ୍କୁ ମହାପ୍ରଭୁ ଦିବ୍ୟ ସ୍ନାନ ଲୀଳା ଏବଂ ଗଜାନନ ବେଶରେ ଦର୍ଶନ ଦେବେ। ଏହି ପବିତ୍ର ଉତ୍ସବରେ ସାମିଲ ହେବା ପାଇଁ ଓଡ଼ିଶା ତଥା ଦେଶର ବିଭିନ୍ନ ପ୍ରାନ୍ତରୁ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସମାଗମ ହୋଇଛି। ଏହା ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ପ୍ରସ୍ତୁତିର ପ୍ରାରମ୍ଭିକ ପର୍ବ।

ଜ୍ୟେଷ୍ଠ ମାସ ପୂର୍ଣ୍ଣିମା ତିଥିରେ ଅନୁଷ୍ଠିତ ହେଉଥିବା ଏହି ସ୍ନାନ ପୂର୍ଣ୍ଣିମା ଦିନ ସକାଳେ ଶ୍ରୀଜୀଉମାନଙ୍କର ପାରମ୍ପରିକ ପହଣ୍ଡି ନୀତି ଆରମ୍ଭ ହୋଇଥିଲା। ଗର୍ଭଗୃହରୁ ପ୍ରଭୁ ସୁଦର୍ଶନ, ଶ୍ରୀବଳଭଦ୍ର, ଦେବୀ ସୁଭଦ୍ରା ଏବଂ ଶ୍ରୀଜଗନ୍ନାଥ ପାରମ୍ପରିକ ଧାଡ଼ି ପହଣ୍ଡିରେ ସ୍ନାନ ମଣ୍ଡପକୁ ବିଜେ କରିଥିଲେ। 'ଜୟ ଜଗନ୍ନାଥ' ଧ୍ୱନି, ବେଦ ମନ୍ତ୍ର, ଶଙ୍ଖ ନାଦ ଓ ପାରମ୍ପରିକ ବାଦ୍ୟରେ ସମଗ୍ର ଶ୍ରୀମନ୍ଦିର ପରିସର ପ୍ରକମ୍ପିତ ହୋଇଥିଲା। ସକାଳ ପ୍ରାୟ ୭:୫୧ ସୁଦ୍ଧା ଶ୍ରୀଜୀଉମାନେ ସ୍ନାନ ମଣ୍ଡପରେ ବିରାଜମାନ କରିଥିଲେ।

ସ୍ନାନ ଯାତ୍ରାର ମୁଖ୍ୟ ହେଉଛି ଶ୍ରୀଜୀଉମାନଙ୍କର ପବିତ୍ର ମହାସ୍ନାନ। ଶ୍ରୀମନ୍ଦିରର ସୁନାକୁଅରୁ ସଂଗୃହୀତ ୧୦୮ ଗରା ପବିତ୍ର ଜଳରେ ଚତୁର୍ଦ୍ଧାମୂର୍ତ୍ତିଙ୍କୁ ସ୍ନାନ କରାଯିବାର ପରମ୍ପରା ରହିଛି। ଏହି ପବିତ୍ର ଜଳରେ ଚନ୍ଦନ, ଔଷଧୀୟ ବୃକ୍ଷ, ସୁଗନ୍ଧିତ ପୁଷ୍ପ ଓ ଅନ୍ୟାନ୍ୟ ଦ୍ରବ୍ୟ ମିଶ୍ରଣ କରାଯାଇଥାଏ, ଯାହା ଶୁଦ୍ଧିକରଣ ଏବଂ ଆରୋଗ୍ୟର ପ୍ରତୀକ ଅଟେ। ସ୍ନାନ ପରେ ସେବାୟତମାନେ ପିଷ୍ଟକ ଆଳତି ସମ୍ପନ୍ନ କରିଥାନ୍ତି।

ମହାପ୍ରଭୁଙ୍କ ଦିବ୍ୟ ସ୍ନାନ ନୀତି ସମ୍ପନ୍ନ ହେବା ପରେ ଦୁର୍ଲଭ ଗଜାନନ ବେଶ ଅନୁଷ୍ଠିତ ହେବ। ମହାବାହୁ ଶ୍ରୀଜଗନ୍ନାଥ, ଶ୍ରୀବଳଭଦ୍ର ଏବଂ ଦେବୀ ସୁଭଦ୍ରାଙ୍କୁ ଅତି ଚିତ୍ତାକର୍ଷକ ହାତୀ ବେଶ ବା ଗଜାନନ ବେଶରେ ସଜ୍ଜିତ କରାଯାଏ। ଏହି ଦୁର୍ଲଭ ରୂପରେ ଭଗବାନ ଗଣେଶଙ୍କ ଭଳି ଦର୍ଶନ ଦେଇଥାନ୍ତି ମହାପ୍ରଭୁ, ଯାହା ଜ୍ଞାନ, ସୁରକ୍ଷା ଏବଂ ବିଘ୍ନ ବିନାଶର ପ୍ରତୀକ ଅଟେ। ପ୍ରତିବର୍ଷ ଏହି ପବିତ୍ର ବେଶ ଦର୍ଶନ ପାଇଁ ଭକ୍ତମାନେ ଉତ୍କଣ୍ଠାର ସହ ଅପେକ୍ଷା କରିଥାନ୍ତି।

ରଥଯାତ୍ରା ପୂର୍ବରୁ ସ୍ନାନ ପୂର୍ଣ୍ଣିମାର ଆଧ୍ୟାତ୍ମିକ ଗୁରୁତ୍ୱ ବେଶ୍ ଅଧିକ। ମନ୍ଦିରର ପରମ୍ପରା ଅନୁଯାୟୀ, ଅତ୍ୟଧିକ ସ୍ନାନ କାରଣରୁ ମହାପ୍ରଭୁ ଜ୍ୱରରେ ପୀଡ଼ିତ ହୋଇଥାନ୍ତି। ତେଣୁ ସେମାନଙ୍କୁ ଅଣସର ଘରକୁ ନିଆଯାଏ, ଯେଉଁଠାରେ ସେମାନେ ପ୍ରାୟ ୧୫ ଦିନ ଧରି ବିଶ୍ରାମ ନେବା ସହ ଗୁପ୍ତ ସେବା ଗ୍ରହଣ କରନ୍ତି। ଏହି ସମୟରେ ଭକ୍ତମାନଙ୍କ ପାଇଁ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ବନ୍ଦ ରହେ। ରଥଯାତ୍ରାର ଠିକ୍ ଗୋଟିଏ ଦିନ ପୂର୍ବରୁ ନେତ୍ରୋତ୍ସବ ବା ନବଯୌବନ ଦର୍ଶନ ଅବସରରେ ମହାପ୍ରଭୁ ପୁଣିଥରେ ଭକ୍ତଙ୍କୁ ଦର୍ଶନ ଦେଇଥାନ୍ତି।

ପୁରୀ: ଅଦିନିଆ ରଥଯାତ୍ରା ଉପରେ ରୋକ୍‌ ଲାଗିପାରୁ ନାହିଁ। ଏବେ ବି ଭାରତ ଭିତରେ ଅତିଥିରେ ରଥଯାତ୍ରା ଅନୁଷ୍ଠିତ ହେଉଛି। ଶ୍ରୀମନ୍ଦିର ପ୍ରଶାସନ ଏ ନେଇ ଯେତେ ଯାହା କଲେ ମଧ୍ୟ ଅନେକ ଅମାନିଆ ହେଉଛନ୍ତି। ନିକଟରେ ଉତ୍ତର ପ୍ରଦେଶରେ ଅତିଥିରେ ରଥଯାତ୍ରା ନେଇ କଡ଼ା ଆଭିମୁଖ୍ୟ ରଖିଛି ଶ୍ରୀମନ୍ଦିର ପ୍ରଶାସନ। ହାପୁର ଜିଲ୍ଲାର ଭଗବାନ ଶ୍ରୀଜଗନ୍ନାଥ ରଥଯାତ୍ରା ସେବା ସମିତି ପକ୍ଷରୁ ଗତ ୧୩ ତାରିଖରେ ନେତ୍ରୋତ୍ସବ ଓ ୧୪ ତାରିଖରେ ରଥଯାତ୍ରା ପାଳନ ନେଇ ଗଣମାଧ୍ୟମରେ ଖବର ପ୍ରକାଶ ପାଇଥିବାରୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଏହାର ଦୃଢ଼ ପ୍ରତିବାଦ କରାଯାଇଛି। 

ଏହି ପରିପ୍ରେକ୍ଷୀରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ ହାପୁର ଜିଲ୍ଲାର ଜିଲ୍ଲା ମାଜିଷ୍ଟ୍ରେଟ୍‌ଙ୍କୁ ସୋମବାର ପତ୍ର ଲେଖିଛନ୍ତି। ସମ୍ପୃକ୍ତ ରଥଯାତ୍ରା ସେବା ସମିତିଙ୍କୁ ପାରମ୍ପରିକ ତିଥି ବ୍ୟତିରେକ ଅତିଥିରେ ଏହି ଉତ୍ସବ ପାଳନରୁ ନିବୃତ ରହିବାକୁ ଉଚିତ୍‌ ବ୍ୟବସ୍ଥା ଗ୍ରହଣ କରିବାକୁ ଅନୁରୋଧ କରିଛନ୍ତି।   ମୁଖ୍ୟ ପ୍ରଶାସକ ତାଙ୍କ ପତ୍ରରେ ହାପୁର ଜିଲ୍ଲା ମାଜିଷ୍ଟ୍ରେଟ୍‌ଙ୍କ ଦୃଷ୍ଟି ଆକର୍ଷଣ କରି କହିଛନ୍ତି ଯେ, ଅତିଥିରେ ପାଳନ କରାଯାଉଥିବା ରଥଯାତ୍ରାକୁ ବିରୋଧ କରି ଗଜପତି ମହାରାଜାଙ୍କ ଅଧ୍ୟକ୍ଷତାରେ ଅନୁଷ୍ଠିତ ପରିଚାଳନା କମିଟି ସଂକଳ୍ପ ଗ୍ରହଣ କରିଛନ୍ତି। ଚଳିତ ବର୍ଷ ଶ୍ରୀଜଗନ୍ନାଥ ମହାପ୍ରଭୁଙ୍କ ନେତ୍ରୋତ୍ସବ ଓ ରଥଯାତ୍ରା, ପାରମ୍ପରିକ ତଥା ଶାସ୍ତ୍ରାନୁମୋଦିତ ବିଧି ଅନୁସାରେ ଯଥାକ୍ରମେ ଜୁଲାଇ ୧୪ ଓ ୧୬ ତାରିଖରେ ଅନୁଷ୍ଠିତ ହେବ। ଏହିଦିନ ଭିନ୍ନ ଅନ୍ୟ କୌଣସି ଦିନ ନେତ୍ରୋତ୍ସବ ଓ ରଥଯାତ୍ରା ପାଳନ କଲେ ଦେଶ ବିଦେଶର ଅଗଣିତ ଭକ୍ତମାନଙ୍କର ଧାର୍ମିକ ଭାବନାରେ ଆଘାତ ସୃଷ୍ଟି କରିବ ବୋଲି ମୁଖ୍ୟ ପ୍ରଶାସକ ପତ୍ରରେ ଉଲ୍ଲେଖ କରିଛନ୍ତି।

ଶ୍ରୀକ୍ଷେତ୍ର ପୁରୀରେ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ପ୍ରସ୍ତୁତି ଆରମ୍ଭ ହେବାକୁ ଯାଉଛି। ଚଳିତ ବର୍ଷ ରଥ ନିର୍ମାଣ କାର୍ଯ୍ୟକୁ ଅଧିକ ସୁରକ୍ଷିତ ଏବଂ ଶୃଙ୍ଖଳିତ କରିବା ଉଦ୍ଦେଶ୍ୟରେ ଶ୍ରୀମନ୍ଦିର ପ୍ରଶାସନ ଓ ପୋଲିସ ପକ୍ଷରୁ ଏକ ବଡ଼ ପଦକ୍ଷେପ ଗ୍ରହଣ କରାଯାଇଛି। ନିଷ୍ପତ୍ତି ଅନୁଯାୟୀ, ଏଥର ରଥଖଳା ସମ୍ପୂର୍ଣ୍ଣ ଭାବରେ ସିସିଟିଭି (CCTV) ନଜରରେ ରହିବ।

ରଥଖଳାର ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବା ପାଇଁ ଏଠାରେ ମୋଟ ୧୨ଟି ସିସିଟିଭି କ୍ୟାମେରା ଲଗାଯିବ। ଏଥିମଧ୍ୟରେ ଦୁଇଟି ଅତ୍ୟାଧୁନିକ ପିଟିଜେଡ୍ (PTZ - Pan, Tilt, Zoom) କ୍ୟାମେରା ସାମିଲ ରହିଛି। ଏହି ବିଶେଷ କ୍ୟାମେରାଗୁଡ଼ିକ ବିଭିନ୍ନ ପାର୍ଶ୍ୱକୁ ଘୂରିବା ସହ ଉପରୁ ତଳକୁ ଏବଂ ବହୁ ଦୂରରୁ ଜୁମ୍ କରି ସ୍ପଷ୍ଟ ଭିଡିଓ ଉତ୍ତୋଳନ କରିବାରେ ସକ୍ଷମ ହେବେ। ଆସନ୍ତା ଏପ୍ରିଲ ୨୦ ତାରିଖ (ପବିତ୍ର ଅକ୍ଷୟ ତୃତୀୟା) ଠାରୁ ରଥ ନିର୍ମାଣ କାର୍ଯ୍ୟ ଆରମ୍ଭ ହେବ ଏବଂ ଏହି କ୍ୟାମେରାଗୁଡ଼ିକ ନିର୍ମାଣ କାର୍ଯ୍ୟ ଶେଷ ହେବା ପର୍ଯ୍ୟନ୍ତ ଅର୍ଥାତ୍ ଜୁଲାଇ ୧୫ ତାରିଖ ଯାଏଁ ଅସ୍ଥାୟୀ ଭାବେ ଖଞ୍ଜାଯିବ।

ଚନ୍ଦନ ଯାତ୍ରା ପାଇଁ ମଧ୍ୟ ସ୍ୱତନ୍ତ୍ର ସୁରକ୍ଷା ବ୍ୟବସ୍ଥା

କେବଳ ରଥଖଳା ନୁହେଁ, ମହାପ୍ରଭୁଙ୍କ ଆସନ୍ତା ଚନ୍ଦନ ଯାତ୍ରା ପାଇଁ ମଧ୍ୟ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ନରେନ୍ଦ୍ର ପୁଷ୍କରିଣୀ ସ୍ଥିତ ଚନ୍ଦନ ଚକଡ଼ାରେ ୧୪ଟି ସିସିଟିଭି କ୍ୟାମେରା ଲଗାଯିବ, ଯେଉଁଥିରେ ମଧ୍ୟ ୨ଟି ପିଟିଜେଡ୍ କ୍ୟାମେରା ରହିବ। ଚନ୍ଦନ ଯାତ୍ରା ଚାଲିବା ସମୟରେ ଅର୍ଥାତ୍ ଏପ୍ରିଲ ୨୦ରୁ ମେ' ୧୦ ତାରିଖ ପର୍ଯ୍ୟନ୍ତ ଏହି କ୍ୟାମେରାଗୁଡ଼ିକ କାର୍ଯ୍ୟକ୍ଷମ ରହିବ।

ଏହି ସମସ୍ତ ସିସିଟିଭି କ୍ୟାମେରାଗୁଡ଼ିକୁ ସିଧାସଳଖ ପୁରୀ ପୋଲିସ୍ କଣ୍ଟ୍ରୋଲ ରୁମ୍ ସହ ସଂଯୋଗ କରାଯିବ, ଯେଉଁଠାରୁ ଅଧିକାରୀମାନେ ୨୪ ଘଣ୍ଟିଆ ନଜର ରଖିବେ। ରଥ ନିର୍ମାଣ କାର୍ଯ୍ୟକୁ କୌଣସି ବାଧାବିଘ୍ନ ବିନା ଶେଷ କରିବା ଏବଂ ଚନ୍ଦନ ଯାତ୍ରାରେ ସାମିଲ ହେବାକୁ ଥିବା ହଜାର ହଜାର ଭକ୍ତଙ୍କ ସୁରକ୍ଷା ନିଶ୍ଚିତ କରିବା ପାଇଁ ପୋଲିସ ଏବଂ ପ୍ରଶାସନ ପକ୍ଷରୁ ଏହି ପଦକ୍ଷେପ ନିଆଯାଇଛି।

ପୁରୀ ଶ୍ରୀମନ୍ଦିରର ବହୁ ପ୍ରତୀକ୍ଷିତ ରତ୍ନଭଣ୍ଡାର ଗଣତି ମଣତି କାର୍ଯ୍ୟ ଆସନ୍ତା ମାର୍ଚ୍ଚ ୨୫ ତାରିଖରୁ ଆରମ୍ଭ ହେବାକୁ ଯାଉଛି। ସୋମବାର ଅନୁଷ୍ଠିତ ଶ୍ରୀମନ୍ଦିର ପରିଚାଳନା କମିଟିର ଏକ ଗୁରୁତ୍ୱପୂର୍ଣ୍ଣ ବୈଠକରେ ଏହି ନିଷ୍ପତ୍ତି ନିଆଯାଇଛି। ଦୀର୍ଘ ଦଶନ୍ଧି ପରେ ମହାପ୍ରଭୁଙ୍କ ଅମୂଲ୍ୟ ସମ୍ପଦର ତାଲିକା ପ୍ରସ୍ତୁତ ହେବାକୁ ଥିବାରୁ ଭକ୍ତମାନଙ୍କ ମଧ୍ୟରେ ଉତ୍ସାହ ଦେଖାଦେଇଛି।

ଶୁଭ ମୁହୂର୍ତ୍ତ ଓ ସମୟ ନିର୍ଘଣ୍ଟ

ମାର୍ଚ୍ଚ ୨୫ ତାରିଖ, ଚୈତ୍ର ଶୁକ୍ଳ ସପ୍ତମୀ ତିଥିରେ ଏହି ଗଣତି କାର୍ଯ୍ୟ ଆରମ୍ଭ ହେବ। ମଧ୍ୟାହ୍ନ ୧୨ଟା ୧୨ ମିନିଟରୁ ୧ଟା ୪୫ ମିନିଟ୍ ମଧ୍ୟରେ ଶୁଭ 'ମହେନ୍ଦ୍ର ବେଳା'ରେ ରତ୍ନଭଣ୍ଡାର ଖୋଲାଯାଇ ଅଳଙ୍କାର ଗଣତି ଆରମ୍ଭ କରାଯିବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ସୂଚନା ଦେଇଛନ୍ତି।

କିପରି ହେବ ଗଣତି କାର୍ଯ୍ୟ?

ରତ୍ନଭଣ୍ଡାର ଗଣତି ପାଇଁ ଦୁଇଟି ସ୍ୱତନ୍ତ୍ର କମିଟି ଗଠନ କରାଯାଇଛି। ଏଥିରେ ଏକ ୩ ଜଣିଆ 'ତଦାରଖ କମିଟି' ଏବଂ ଅଳଙ୍କାର ଯାଞ୍ଚ ପାଇଁ ଏକ ୧୦ ଜଣିଆ 'ହ୍ୟାଣ୍ଡଲିଂ ଟିମ୍' ରହିବେ।

* ଶ୍ରଦ୍ଧାଳୁଙ୍କ ଦର୍ଶନକୁ ଦୃଷ୍ଟିରେ ରଖି ଶନିବାର, ରବିବାର ଏବଂ ଅନ୍ୟ ବଡ଼ ପର୍ବପର୍ବାଣି ଦିନମାନଙ୍କରେ ଗଣତି କାର୍ଯ୍ୟ ବନ୍ଦ ରହିବ।

* ସ୍ୱଚ୍ଛତା ବଜାୟ ରଖିବା ପାଇଁ ସମସ୍ତ ଅଳଙ୍କାରର ଡିଜିଟାଲ ଡକ୍ୟୁମେଣ୍ଟେସନ୍ ସହ ଭିଡିଓଗ୍ରାଫି କରାଯିବ।

* ଏଥିରେ ଭାରତୀୟ ରିଜର୍ଭ ବ୍ୟାଙ୍କ (RBI)ର ପ୍ରତିନିଧି, ବିଶେଷଜ୍ଞ ଏବଂ ବରିଷ୍ଠ ସେବାୟତମାନେ ସାମିଲ ହେବେ।

ଐତିହାସିକ ପଦକ୍ଷେପ

ଦୀର୍ଘ ୪୮ ବର୍ଷ ପରେ ରତ୍ନଭଣ୍ଡାରର ପୁଙ୍ଖାନୁପୁଙ୍ଖ ଗଣତି କରାଯାଉଛି। ଏହା ପୂର୍ବରୁ ୧୯୭୮ ମସିହାରେ ଶେଷ ଥର ପାଇଁ ରତ୍ନଭଣ୍ଡାରର ଗଣତି ହୋଇଥିଲା, ଯାହାକୁ ସମ୍ପୂର୍ଣ୍ଣ କରିବାକୁ ସେତେବେଳେ ୭୨ ଦିନ ସମୟ ଲାଗିଥିଲା। ଚଳିତ ଥର ପ୍ରଥମେ 'ବାହାର ଭଣ୍ଡାର' ଏବଂ ପରେ 'ଭିତର ଭଣ୍ଡାର'ର ଗଣତି କରାଯିବ।

ଓଡ଼ିଶାର କଳା, ସଂସ୍କୃତି ଓ ପରମ୍ପରାରେ ଦୋଳ ପୂର୍ଣ୍ଣିମାର ସ୍ଥାନ ଅତ୍ୟନ୍ତ ସ୍ୱତନ୍ତ୍ର। ଫାଲଗୁନ ମାସର ଶୁକ୍ଳପକ୍ଷ ପୂର୍ଣ୍ଣିମା ତିଥିରେ ଏହି ପବିତ୍ର ପର୍ବ ପାଳନ କରାଯାଏ। ଏହା କେବଳ ରଙ୍ଗର ପର୍ବ ନୁହେଁ, ବରଂ ଭକ୍ତି ଓ ଆଧ୍ୟାତ୍ମିକତାର ଏକ ଅନନ୍ୟ ସମାଗମ। ଏହି ଦିନକୁ ବସନ୍ତ ଋତୁର ସ୍ୱାଗତ ପର୍ବ ଭାବରେ ମଧ୍ୟ ବିବେଚନା କରାଯାଏ। ତେବେ ଓଡ଼ିଶାରେ ଏହି ପର୍ବ ପାଳନ କରିବା ପଛରେ ଅନେକ ପୌରାଣିକ ଓ ଐତିହାସିକ କାରଣ ରହିଛି।

ପୌରାଣିକ ମହତ୍ତ୍ୱ

ଶାସ୍ତ୍ର ଅନୁଯାୟୀ, ଦୋଳ ପୂର୍ଣ୍ଣିମା ମୁଖ୍ୟତଃ ଭଗବାନ ଶ୍ରୀକୃଷ୍ଣ ଓ ରାଧାରାଣୀଙ୍କ ପ୍ରେମ ଏବଂ ଲୀଳା ସହ ଜଡ଼ିତ। ବିଶ୍ୱାସ କରାଯାଏ ଯେ, ଏହି ଦିନ ଶ୍ରୀକୃଷ୍ଣ ଗୋପୀମାନଙ୍କ ସହ ଅବିର ଓ ରଙ୍ଗ ଖେଳି ବସନ୍ତ ଉତ୍ସବ ପାଳନ କରିଥିଲେ। ତେଣୁ ଏହି ଦିନ ରାଧା-କୃଷ୍ଣଙ୍କ ଯୁଗଳ ମୂର୍ତ୍ତିକୁ ସୁସଜ୍ଜିତ ବିମାନରେ ବସାଇ ଦୋଳ ଖେଳାଯାଏ। ଏହା ଭକ୍ତ ଓ ଭଗବାନଙ୍କ ମଧ୍ୟରେ ଥିବା ନିବିଡ଼ ସମ୍ପର୍କକୁ ଦର୍ଶାଇଥାଏ।

ଶ୍ରୀମନ୍ଦିରରେ ସ୍ୱତନ୍ତ୍ର ନୀତି

ପୁରୀ ଶ୍ରୀମନ୍ଦିରରେ ଦୋଳ ପୂର୍ଣ୍ଣିମାର ଏକ ବିଶେଷ ମହତ୍ତ୍ୱ ରହିଛି। ଏହି ଦିନ ମହାପ୍ରଭୁ ଶ୍ରୀଜଗନ୍ନାଥ ଭାଇ ବଳଭଦ୍ର ଓ ଦେବୀ ସୁଭଦ୍ରାଙ୍କ ସହ ରତ୍ନସିଂହାସନ ଉପରେ 'ରାଜରାଜେଶ୍ୱର ବେଶ' ବା ସୁନାବେଶରେ ଦର୍ଶନ ଦିଅନ୍ତି। ଶ୍ରୀଜୀଉମାନଙ୍କର ଏହି ଦିବ୍ୟ ରୂପ ଦର୍ଶନ କରିବା ପାଇଁ ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ। ଏହି ଦିନ ପରଠାରୁ ଓଡ଼ିଆ ପଞ୍ଜିକାର ନୂତନ ବର୍ଷ ପାଇଁ ଗଣନା ଆରମ୍ଭ ହୁଏ।

ଦୋଳ ମେଳଣ ଓ ସାମାଜିକ ଏକତା

ଓଡ଼ିଶାର ଗାଁ ଗହଳିରେ ଦୋଳ ଯାତ୍ରା ପ୍ରାୟ ୫ ରୁ ୭ ଦିନ ଧରି ଚାଲେ। ଠାକୁରମାନେ ବିମାନରେ ବସି ଗ୍ରାମ ପରିକ୍ରମା କରନ୍ତି ଏବଂ ଭକ୍ତମାନଙ୍କ ଦ୍ୱାରରେ ଭୋଗ ଗ୍ରହଣ କରନ୍ତି। ଏହାପରେ ବିଭିନ୍ନ ଗ୍ରାମର ଠାକୁରମାନେ ଏକ ନିର୍ଦ୍ଦିଷ୍ଟ ସ୍ଥାନରେ ଏକାଠି ହୁଅନ୍ତି, ଯାହାକୁ 'ମେଳଣ' କୁହାଯାଏ। ଏହି ପରମ୍ପରା ସମାଜରେ ଭାଇଚାରା ଓ ଏକତା ସୃଷ୍ଟି କରିବାରେ ସାହାଯ୍ୟ କରେ। ଦୋଳ ପୂର୍ଣ୍ଣିମା କେବଳ ପୂଜା ନୁହେଁ, ଏହା ଓଡ଼ିଆ ଜନଜୀବନର ଏକ ଅବିଚ୍ଛେଦ୍ୟ ଅଙ୍ଗ।

ବର୍ତ୍ତମାନର ଡିଜିଟାଲ ଯୁଗରେ ସୋସିଆଲ ମିଡିଆ କେବଳ ସୂଚନା ଆଦାନପ୍ରଦାନର ମାଧ୍ୟମ ହୋଇ ରହିନାହିଁ, ବରଂ ଏହା ଏକ ବଡ଼ ଭକ୍ତିମୟ ପ୍ଲାଟଫର୍ମରେ ପରିଣତ ହୋଇଛି। ବିଗତ କିଛି ଘଣ୍ଟା ମଧ୍ୟରେ ଏକ୍ସ (ପୂର୍ବରୁ ଟ୍ୱିଟର) ଭଳି ବିଭିନ୍ନ ସୋସିଆଲ ମିଡିଆ ସାଇଟରେ ପ୍ରଭୁ ଜଗନ୍ନାଥ ଏବଂ ଭଗବାନ ଗୋବିନ୍ଦାଙ୍କ ଭକ୍ତିମୟ ପୋଷ୍ଟଗୁଡ଼ିକର ବନ୍ୟା ଛୁଟିଛି। ଶ୍ରଦ୍ଧାଳୁମାନେ ଜୟ ଜଗନ୍ନାଥ ଏବଂ ଗୋବିନ୍ଦା ଗୋବିନ୍ଦା ଧ୍ୱନି ସହ ବିଭିନ୍ନ ଦୈବୀ ପ୍ରତିମା ଓ ମନ୍ଦିରର ଫଟୋ ସେୟାର କରି ନିଜର ଭକ୍ତି ପ୍ରକଟ କରୁଥିବା ଦେଖିବାକୁ ମିଳିଛି।

ସୁଦର୍ଶନ ପଟ୍ଟନାୟକଙ୍କ ଭକ୍ତିପୂର୍ଣ୍ଣ ସନ୍ଦେଶ

ବିଶିଷ୍ଟ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ମଧ୍ୟ ଏହି ଭକ୍ତିମୟ ଧାରାରେ ସାମିଲ ହୋଇଛନ୍ତି। ସେ ମହାପ୍ରଭୁ ଶ୍ରୀଜଗନ୍ନାଥଙ୍କ ଏକ ସୁନ୍ଦର ଫଟୋ ସେୟାର କରିବା ସହ ଜୟ ଜଗନ୍ନାଥ ବୋଲି ଶୁଭେଚ୍ଛା ଜଣାଇଛନ୍ତି। ତାଙ୍କର ଏହି ପୋଷ୍ଟକୁ ହଜାର ହଜାର ଲୋକ ପସନ୍ଦ କରିବା ସହ ସେୟାର ମଧ୍ୟ କରୁଛନ୍ତି। ଏହା ସୋସିଆଲ ମିଡିଆରେ ଏକ ସକାରାତ୍ମକ ଏବଂ ଆଧ୍ୟାତ୍ମିକ ପରିବେଶ ସୃଷ୍ଟି କରିବାରେ ସହାୟକ ହୋଇଛି।

Jai Jagannath 🙏 pic.twitter.com/6kskj5SxIL

— Sudarsan Pattnaik (@sudarsansand) February 28, 2026

ଡିଜିଟାଲ ମାଧ୍ୟମରେ ଦିବ୍ୟ ଦର୍ଶନ

ଅନେକ ଉପଭୋକ୍ତା ନିଜ ପୋଷ୍ଟରେ ଏହାକୁ ଦିବ୍ୟ ଦର୍ଶନ ବୋଲି ଅଭିହିତ କରୁଛନ୍ତି। ମନ୍ଦିର ପରିସରର ଦୃଶ୍ୟ ଏବଂ ପ୍ରଭୁଙ୍କ ମନୋରମ ବେଶର ଫଟୋଗୁଡ଼ିକ ଶ୍ରଦ୍ଧାଳୁଙ୍କୁ ଭକ୍ତିଭାବରେ ବିଭୋର କରୁଛି। ଲୋକେ ଘରେ ବସି ସୋସିଆଲ ମିଡିଆ ମାଧ୍ୟମରେ ଭଗବାନଙ୍କ ଆଶୀର୍ବାଦ ଲୋଡୁଛନ୍ତି। ବିଶେଷ କରି ଜଗନ୍ନାଥ ଏବଂ ଗୋବିନ୍ଦାଙ୍କ ମଧ୍ୟରେ ଥିବା ଆଧ୍ୟାତ୍ମିକ ସମ୍ପର୍କକୁ ନେଇ ଭକ୍ତମାନଙ୍କ ମଧ୍ୟରେ ଅନେକ ଉତ୍ସାହ ଦେଖିବାକୁ ମିଳିଛି। ଏହି ଭକ୍ତିମୟ ପୋଷ୍ଟଗୁଡ଼ିକ କେବଳ ଓଡ଼ିଶା ନୁହେଁ, ବରଂ ସାରା ବିଶ୍ୱର ଶ୍ରଦ୍ଧାଳୁଙ୍କୁ ଏକ ସୂତ୍ରରେ ବାନ୍ଧି ରଖିଛି।