ଆଜିକାଲିର ବ୍ୟସ୍ତବହୁଳ ଜୀବନଶୈଳୀ, ମାନସିକ ଚାପ, ଏବଂ ଭୁଲ୍ ଖାଦ୍ୟପେୟ ଯୋଗୁଁ ତ୍ୱଚା ସମ୍ବନ୍ଧୀୟ ଅନେକ ସମସ୍ୟା ଦେଖାଯାଉଛି। ପ୍ରତ୍ୟେକ ବ୍ୟକ୍ତି ସୁନ୍ଦର ଏବଂ ଉଜ୍ଜ୍ୱଳ ତ୍ୱଚା ପାଇବାକୁ ଇଚ୍ଛା କରନ୍ତି। ତେବେ ପାର୍ଲର ଯାଇ ଟଙ୍କା ଖର୍ଚ୍ଚ କରିବା ପରିବର୍ତ୍ତେ ଆପଣ ଘରେ ଥିବା ମୁଲତାନି ମାଟି ବ୍ୟବହାର କରି ପାର୍ଲର ଭଳି ଗ୍ଲୋ ପାଇପାରିବେ। ଆସନ୍ତୁ ଜାଣିବା ଭିନ୍ନ ଭିନ୍ନ ତ୍ୱଚା ପାଇଁ ଏହାକୁ କିପରି ବ୍ୟବହାର କରାଯାଇପାରିବ।

ତେଲିଆ ତ୍ୱଚା (Oily Skin) ପାଇଁ

ଯଦି ଆପଣଙ୍କ ତ୍ୱଚା ତେଲିଆ, ତେବେ ମୁଲତାନି ମାଟି ସହିତ ଗୋଲାପ ଜଳ ମିଶାଇ ଏକ ପେଷ୍ଟ ପ୍ରସ୍ତୁତ କରନ୍ତୁ। ଏହି ପେଷ୍ଟକୁ ମୁହଁରେ ଲଗାଇ ୧୦ ରୁ ୧୫ ମିନିଟ୍ ପର୍ଯ୍ୟନ୍ତ ଛାଡି ଦିଅନ୍ତୁ। ଶୁଖିଗଲା ପରେ ଏହାକୁ ଥଣ୍ଡା ପାଣିରେ ଧୋଇ ନିଅନ୍ତୁ। ଏହା ମୁହଁରୁ ଅତିରିକ୍ତ ତେଲ ବାହାର କରିଦିଏ ଏବଂ ତ୍ୱଚାକୁ ସତେଜ ରଖେ।

ଶୁଷ୍କ ତ୍ୱଚା (Dry Skin) ପାଇଁ

ଶୁଷ୍କ ତ୍ୱଚା ସମସ୍ୟା ଥିଲେ, ମୁଲତାନି ମାଟିରେ ଦହି, କ୍ଷୀର ଏବଂ ଆଲୋଭେରା ମିଶାଇ ଏକ ହାଇଡ୍ରେଟିଂ ଫେସ୍ ପ୍ୟାକ୍ ତିଆରି କରନ୍ତୁ। ଏହି ପ୍ୟାକ୍‌କୁ ମୁହଁରେ ଲଗାଇ ୧୦ ରୁ ୧୫ ମିନିଟ୍ ରଖନ୍ତୁ। ଏହା ତ୍ୱଚାକୁ ଭିତରୁ ମଏଶ୍ଚରାଇଜ୍ କରିବା ସହ ଶୁଷ୍କତା ଦୂର କରିବାରେ ସାହାଯ୍ୟ କରେ।

ଉଜ୍ଜ୍ୱଳ ତ୍ୱଚା (Glowing Skin) ପାଇଁ

ତ୍ୱଚାରେ ଚମକ ଆଣିବା ପାଇଁ ମୁଲତାନି ମାଟିରେ ହଳଦୀ, ମହୁ ଏବଂ ଲେମ୍ବୁ ରସ ଭଲଭାବେ ମିଶାଇ ଏକ ପ୍ୟାକ୍ ପ୍ରସ୍ତୁତ କରନ୍ତୁ। ଏହାକୁ ମୁହଁରେ ଲଗାଇ ୧୦ ରୁ ୧୫ ମିନିଟ୍ ପର୍ଯ୍ୟନ୍ତ ଛାଡ଼ିଦିଅନ୍ତୁ ଓ ପରେ ଥଣ୍ଡା ପାଣିରେ ଧୋଇନିଅନ୍ତୁ। ଏହାକୁ ନିୟମିତ ବ୍ୟବହାର କରିବା ଦ୍ୱାରା ତ୍ୱଚା ନରମ ହୁଏ ଏବଂ ମୁହଁରେ ଅଦ୍ଭୁତ ନିଖାର ଆସେ।

ମୁଲତାନି ମାଟି ପ୍ରାକୃତିକ ଭାବରେ ତ୍ୱଚାକୁ ପରିଷ୍କାର କରିବା ସହିତ ଦାଗ ଏବଂ ବ୍ରଣ ସମସ୍ୟାରୁ ମୁକ୍ତି ଦେଇଥାଏ। ତେଣୁ ଘରେ ବସି ନିଜ ସ୍କିନ୍ କେୟାର ରୁଟିନ୍‌ରେ ଏହାକୁ ସାମିଲ କରନ୍ତୁ ଏବଂ ପାଆନ୍ତୁ ସୁନ୍ଦର, ଦାଗହୀନ ତ୍ୱଚା।

ହିନ୍ଦୁ ଧର୍ମରେ ବେଲ ପତ୍ରର ଏକ ସ୍ୱତନ୍ତ୍ର ସ୍ଥାନ ରହିଛି। ଭଗବାନ ଶିବଙ୍କ ପୂଜାରେ ଏହା ଅତ୍ୟନ୍ତ ଆବଶ୍ୟକ ବୋଲି ବିବେଚନା କରାଯାଏ। ତେବେ କେବଳ ଧାର୍ମିକ କାର୍ଯ୍ୟରେ ନୁହେଁ, ଆୟୁର୍ବେଦ ଶାସ୍ତ୍ର ଅନୁଯାୟୀ ବେଲ ପତ୍ର ସ୍ୱାସ୍ଥ୍ୟ ପାଇଁ ଏକ ମହୌଷଧି ଭଳି କାମ କରେ। ଏଥିରେ ଥିବା ପୋଷକ ତତ୍ତ୍ୱ ଅନେକ ଗୁରୁତର ରୋଗରୁ ରକ୍ଷା କରିବାରେ ସହାୟକ ହୋଇଥାଏ।

ମଧୁମେହ ରୋଗୀଙ୍କ ପାଇଁ ରାମବାଣ

ବର୍ତ୍ତମାନ ସମୟରେ ଖରାପ ଜୀବନଶୈଳୀ ଯୋଗୁଁ ମଧୁମେହ ବା ଡାଇବେଟିସ୍ ରୋଗୀଙ୍କ ସଂଖ୍ୟା ବୃଦ୍ଧି ପାଉଛି। ବେଲ ପତ୍ରରେ ଥିବା 'ଆଣ୍ଟି-ଡାଇବେଟିକ୍' ଗୁଣ ରକ୍ତରେ ଶର୍କରା ସ୍ତରକୁ ନିୟନ୍ତ୍ରଣ କରିବାରେ ସାହାଯ୍ୟ କରେ। ପ୍ରତିଦିନ ସକାଳେ ଖାଲି ପେଟରେ ବେଲ ପତ୍ର ରସ କିମ୍ବା କଞ୍ଚା ପତ୍ର ଚୋବାଇ ଖାଇଲେ ଇନସୁଲିନ୍ ସ୍ତର ନିୟନ୍ତ୍ରିତ ରହିଥାଏ।

ପେଟ ଜନିତ ସମସ୍ୟାର ସମାଧାନ

ଯଦି ଆପଣ ଗ୍ୟାସ୍, ବଦହଜମି କିମ୍ବା କୋଷ୍ଠକାଠିନ୍ୟ ଭଳି ସମସ୍ୟାରେ ପୀଡିତ ଅଛନ୍ତି, ତେବେ ବେଲ ପତ୍ର ଆପଣଙ୍କ ପାଇଁ ଲାଭଦାୟକ ହୋଇପାରେ। ଏଥିରେ ଥିବା ଫାଇବର ଏବଂ ଲାକ୍ସେଟିଭ୍ ଗୁଣ ପାଚନ ତନ୍ତ୍ରକୁ ସୁସ୍ଥ ରଖିବା ସହ ପେଟ ସଫା କରିବାରେ ସହାୟକ ହୁଏ।

ହୃଦଘାତ ଆଶଙ୍କା କମାଏ

ବେଲ ପତ୍ରରେ ପ୍ରଚୁର ପରିମାଣରେ ଆଣ୍ଟି-ଅକ୍ସିଡାଣ୍ଟ ରହିଥାଏ, ଯାହା ହୃଦୟକୁ ସୁସ୍ଥ ରଖିବାରେ ସାହାଯ୍ୟ କରେ। ଏହା ଶରୀରରୁ ଖରାପ କୋଲେଷ୍ଟ୍ରଲ (Bad Cholesterol) କମାଇବା ସହ ରକ୍ତଚାପକୁ ନିୟନ୍ତ୍ରଣରେ ରଖେ, ଫଳରେ ହୃଦଘାତ ଆଶଙ୍କା ହ୍ରାସ ପାଇଥାଏ।

ଭୁବନେଶ୍ୱର: ରଙ୍ଗର ପର୍ବ ହୋଲିକୁ ନେଇ ସାରା ଦେଶରେ ଉତ୍ସାହର ମାହୋଲ ରହିଥାଏ। ତେବେ ଏହି ଖୁସି ସମୟରେ ଅନେକ ସମୟରେ କେଶର ଯତ୍ନ ନେବାକୁ ଆମେ ଭୁଲିଯାଉ। ବଜାରରେ ମିଳୁଥିବା ରାସାୟନିକ ରଙ୍ଗ କେଶର ପ୍ରାକୃତିକ ଚମକ ନଷ୍ଟ କରିବା ସହ ଏହାକୁ ରୁକ୍ଷ କରିଦେଇଥାଏ। ତେଣୁ ହୋଲି ଖେଳିବା ପୂର୍ବରୁ ଏବଂ ପରେ କେଶର ବିଶେଷ ଯତ୍ନ ନେବା ଆବଶ୍ୟକ।

ହୋଲି ଖେଳିବା ପୂର୍ବରୁ ପ୍ରସ୍ତୁତି

ହୋଲି ଖେଳିବାକୁ ବାହାରିବା ପୂର୍ବରୁ କେଶରେ ଭଲ ଭାବେ ନଡ଼ିଆ ତେଲ, ସୋରିଷ ତେଲ କିମ୍ବା ଅଲିଭ୍ ଅଏଲ୍ ଲଗାଇବା ଉଚିତ। ଏହା କେଶ ଉପରେ ଏକ ସୁରକ୍ଷା କବଚ ଭଳି କାମ କରେ, ଯାହାଫଳରେ ରଙ୍ଗ କେଶର ଭିତର ସ୍ତରକୁ ଯାଇପାରେ ନାହିଁ। ଏଥିସହିତ କେଶକୁ ଖୋଲା ନଛାଡ଼ି ବାନ୍ଧି କରି ରଖିବା ଦ୍ୱାରା କମ୍ ରଙ୍ଗ ଲାଗିଥାଏ।

ରଙ୍ଗ ଛଡ଼ାଇବା ପାଇଁ ଘରୋଇ ଉପଚାର

କେଶରୁ ରଙ୍ଗ ଛଡ଼ାଇବା ପାଇଁ ତୁରନ୍ତ ଗରମ ପାଣି ବ୍ୟବହାର କରନ୍ତୁ ନାହିଁ। ପ୍ରଥମେ ସାଧାରଣ ପାଣିରେ କେଶକୁ ଭଲ ଭାବେ ଧୋଇ ଦିଅନ୍ତୁ। ଏହାପରେ ଏକ ହର୍ବାଲ୍ କିମ୍ବା ମାଇଲ୍ଡ ଶାମ୍ପୁ ବ୍ୟବହାର କରି କେଶ ସଫା କରନ୍ତୁ। ଯଦି ରଙ୍ଗ ସହଜରେ ଛାଡୁନାହିଁ, ତେବେ ଦହି କିମ୍ବା ଲେମ୍ବୁ ରସର ସାହାଯ୍ୟ ନିଆଯାଇପାରେ। ଦହି କେବଳ ରଙ୍ଗ ଛଡ଼ାଇବାରେ ସାହାଯ୍ୟ କରେ ନାହିଁ, ବରଂ କେଶକୁ କୋମଳ ମଧ୍ୟ କରିଥାଏ।

ହୋଲି ପରବର୍ତ୍ତୀ ଯତ୍ନ

ଥରେ ରଙ୍ଗ ଛାଡ଼ିବା ପରେ କେଶରେ କଣ୍ଡିସନର୍ ବ୍ୟବହାର କରିବାକୁ ଭୁଲନ୍ତୁ ନାହିଁ। ଏହା କେଶର ଆର୍ଦ୍ରତା ବଜାୟ ରଖିବାରେ ସାହାଯ୍ୟ କରିଥାଏ। ଯଦି ସମ୍ଭବ ହୁଏ, ହୋଲିର ଦୁଇ-ତିନି ଦିନ ପରେ ଏକ ଭଲ ହେୟାର ସ୍ପା କିମ୍ବା ଘରେ ହେୟାର ମାସ୍କ ଲଗାନ୍ତୁ। ଏହାଦ୍ୱାରା ରାସାୟନିକ ରଙ୍ଗ ଯୋଗୁଁ ହୋଇଥିବା କ୍ଷତିର ଭରଣା ହୋଇପାରିବ।

ଆଜିକାଲି ବଜାରରେ ମିଳୁଥିବା ଦାମୀ ଫେସ୍ ୱାଶ୍ ଏବଂ କ୍ଲିଞ୍ଜରରେ ଅନେକ ପ୍ରକାରର କେମିକାଲ୍ ବ୍ୟବହାର କରାଯାଇଥାଏ, ଯାହା ତ୍ୱଚା ପାଇଁ କ୍ଷତିକାରକ ହୋଇପାରେ। ଯଦି ଆପଣ ବିନା ଖର୍ଚ୍ଚରେ ପାର୍ଲର ଭଳି ଗ୍ଲୋ ପାଇବାକୁ ଚାହୁଁଛନ୍ତି, ତେବେ ରୋଷେଇ ଘରେ ଥିବା ସାମଗ୍ରୀ ବ୍ୟବହାର କରି ପ୍ରସ୍ତୁତ କରନ୍ତୁ ଏହି ନ୍ୟାଚୁରାଲ ଫେସ୍ ୱାଶ୍। ବିଶେଷକରି ବେସନ, ହଳଦୀ ଏବଂ ଚନ୍ଦନରେ ପ୍ରସ୍ତୁତ ଏହି ଫେସ୍ ୱାଶ୍ ଆପଣଙ୍କ ତ୍ୱଚାକୁ ଦାଗମୁକ୍ତ ଓ ଉଜ୍ଜ୍ୱଳ କରିବାରେ ସାହାଯ୍ୟ କରିବ।

କେମିତି ପ୍ରସ୍ତୁତ କରିବେ ଏହି ହୋମମେଡ୍ ଫେସ୍ ୱାଶ୍?

ଏହି ନ୍ୟାଚୁରାଲ ଫେସ୍ ୱାଶ୍ ବନାଇବା ପାଇଁ ଆପଣଙ୍କୁ କିଛି ସାଧାରଣ ସାମଗ୍ରୀର ଆବଶ୍ୟକତା ପଡ଼ିବ। ଏଥିପାଇଁ ୨ ଚାମଚ ବେସନ, ୧ ଚାମଚ କସ୍ତୁରୀ ହଳଦୀ, ୨ ଚାମଚ ଚନ୍ଦନ ପାଉଡର, ୧ ଚାମଚ ମୁଲତାନି ମାଟି ଏବଂ ୧ ଚାମଚ ଚାଉଳ ଗୁଣ୍ଡ ନିଅନ୍ତୁ। ଏହି ସମସ୍ତ ଶୁଖିଲା ସାମଗ୍ରୀକୁ ଏକ ଏୟାର-ଟାଇଟ୍ ପାତ୍ରରେ ଭଲ ଭାବରେ ମିଶାଇ ରଖନ୍ତୁ। ଏହାକୁ ଆପଣ ବହୁଦିନ ପର୍ଯ୍ୟନ୍ତ ସଂରକ୍ଷିତ କରି ରଖିପାରିବେ।

ତ୍ୱଚା ପାଇଁ କାହିଁକି ଲାଭଦାୟକ?

ଏଥିରେ ଥିବା ବେସନ ତ୍ୱଚାରୁ ଧୂଳିମଳି ଏବଂ ଅତ୍ୟଧିକ ତେଲ ବାହାର କରିବାରେ ସାହାଯ୍ୟ କରେ। କସ୍ତୁରୀ ହଳଦୀରେ ଆଣ୍ଟି-ବ୍ୟାକ୍ଟେରିଆଲ୍ ଗୁଣ ଥାଏ, ଯାହା ବ୍ରଣ ଏବଂ ଦାଗ ଦୂର କରିବାରେ ସହାୟକ ହୁଏ। ସେହିପରି ଚନ୍ଦନ ପାଉଡର ତ୍ୱଚାକୁ ଥଣ୍ଡା ରଖିବା ସହ ପ୍ରାକୃତିକ ଚମକ ଆଣିଥାଏ। ଯଦି ଆପଣଙ୍କର ତେଲିଆ ତ୍ୱଚା ଥାଏ, ତେବେ ମୁଲତାନି ମାଟି ଏଥିପାଇଁ ବେଶ୍ ଉପକାରୀ ସାବ୍ୟସ୍ତ ହେବ।

ବ୍ୟବହାର କରିବାର ତରିକା

ଏହି ମିଶ୍ରଣକୁ ବ୍ୟବହାର କରିବା ପାଇଁ ହାତ ପାପୁଲିରେ ୨ ଚାମଚ ପାଉଡର ନିଅନ୍ତୁ। ଏଥିରେ ଆବଶ୍ୟକ ଅନୁଯାୟୀ ଗୋଲାପ ଜଳ ମିଶାଇ ଏକ ପେଷ୍ଟ ପ୍ରସ୍ତୁତ କରନ୍ତୁ। ଯଦି ଆପଣଙ୍କ ତ୍ୱଚା ଶୁଷ୍କ ବା ଡ୍ରାଏ, ତେବେ ଗୋଲାପ ଜଳ ବଦଳରେ କଞ୍ଚା କ୍ଷୀର କିମ୍ବା ମହୁ ମିଶାଇ ପାରିବେ। ଏହି ପେଷ୍ଟକୁ ମୁହଁରେ ଲଗାଇ ୧୦-୧୫ ମିନିଟ୍ ପର୍ଯ୍ୟନ୍ତ ଛାଡ଼ି ଦିଅନ୍ତୁ ଏବଂ ପରେ ଥଣ୍ଡା ପାଣିରେ ମୁହଁ ଧୋଇ ଦିଅନ୍ତୁ। ନିୟମିତ ବ୍ୟବହାର ଦ୍ୱାରା ତ୍ୱଚାରେ ଚମତ୍କାର ପରିବର୍ତ୍ତନ ଦେଖିବାକୁ ମିଳିବ।

ବଦଳୁଥିବା ଋତୁରେ ଅନେକ ଲୋକଙ୍କର ଗଳାରେ କଫ ଜମିବା କିମ୍ବା ନାକରୁ ଗଳା ଭିତରକୁ ସିଙ୍ଘାଣି ବୋହିବା ଭଳି ସମସ୍ୟା ଦେଖାଦେଇଥାଏ। ଡାକ୍ତରୀ ଭାଷାରେ ଏହାକୁ 'ପୋଷ୍ଟ ନାଜାଲ୍ ଡ୍ରିପ୍' (Post Nasal Drip) କୁହାଯାଏ। ଏହା ଦ୍ୱାରା ଗଳା ଦରଜ ହେବା, କୁଣ୍ଡାଇ ହେବା ସହ ବାରମ୍ବାର କାଶ ହୋଇଥାଏ। ତେବେ କିଛି ସହଜ ଘରୋଇ ଉପଚାର ଦ୍ୱାରା ଏଥିରୁ ମୁକ୍ତି ମିଳିପାରିବ।

ପର୍ଯ୍ୟାପ୍ତ ପରିମାଣରେ ପାଣି ପିଅନ୍ତୁ

ଶରୀରକୁ ହାଇଡ୍ରେଟେଡ୍ ବା ଜଳୀୟ ଅଂଶ ବଜାୟ ରଖିବା ନିହାତି ଜରୁରୀ। ପର୍ଯ୍ୟାପ୍ତ ପାଣି ପିଇବା ଦ୍ୱାରା ଗଳାରେ ଥିବା କଫ ପତଳା ହୋଇଥାଏ, ଯାହା ସହଜରେ ବାହାରିଯାଏ। ଉଷୁମ ପାଣି, ସୁପ୍ କିମ୍ବା ହର୍ବାଲ୍ ଟି ପିଇବା ଏଥିପାଇଁ ଅଧିକ ଲାଭଦାୟକ।

ଲୁଣ ପାଣିରେ କୁଳି କରନ୍ତୁ

ଦିନକୁ ଦୁଇରୁ ତିନି ଥର ଉଷୁମ ପାଣିରେ ଅଳ୍ପ ଲୁଣ ମିଶାଇ କୁଳି ବା ଗାର୍ଗଲ୍ (Gargle) କରନ୍ତୁ। ଏହା ଗଳାରେ ହେଉଥିବା ଇନଫେକ୍ସନ ଓ ଯନ୍ତ୍ରଣା କମାଇବା ସହ କଫ ସଫା କରିବାରେ ସାହାଯ୍ୟ କରେ।

ବାମ୍ଫ ନିଅନ୍ତୁ (Steam Inhalation)

ନାକ ଏବଂ ଗଳା ପାଇଁ ବାମ୍ଫ ନେବା ଏକ ରାମବାଣ ସଦୃଶ। ଗରମ ପାଣିର ବାମ୍ଫ ନେବା ଦ୍ୱାରା ନାକ ଭିତର ଓଦା ରହେ ଏବଂ ଜମି ରହିଥିବା କଫ ତରଳି ବାହାରି ଆସେ। ଆପଣ ଚାହିଁଲେ ପାଣିରେ ଏସେନସିଆଲ୍ ଅଏଲ୍ କିମ୍ବା ୟୁକାଲିପଟାସ୍ ତେଲ ପକାଇପାରିବେ।

ଶୋଇବା ସମୟରେ ଧ୍ୟାନ ଦିଅନ୍ତୁ

ଯଦି ରାତିରେ ଶୋଇବା ବେଳେ କାଶ ଅଧିକ ହେଉଛି, ତେବେ ମୁଣ୍ଡ ତଳେ ଅଧିକ ତକିଆ ଦେଇ ମୁଣ୍ଡକୁ ଟିକେ ଉଚ୍ଚାରେ ରଖନ୍ତୁ। ଏହା ଦ୍ୱାରା ନାକରୁ ବାହାରୁଥିବା ତରଳ ପଦାର୍ଥ ଗଳାରେ ଜମା ନ ହୋଇ ସହଜରେ ତଳକୁ ଯାଇଥାଏ।

ଯଦି ଏହି ଘରୋଇ ଉପଚାର ପରେ ମଧ୍ୟ ସମସ୍ୟା ଲାଗି ରହେ କିମ୍ବା କଫର ରଙ୍ଗ ପରିବର୍ତ୍ତନ ହୁଏ, ତେବେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଉଚିତ୍।