ବଲିଉଡର ବହୁ ପ୍ରତୀକ୍ଷିତ ଫିଲ୍ମ 'ଡନ୍ ୩' (Don 3) କୁ ନେଇ ଏବେ ଏକ ବଡ଼ ବିବାଦ ମୁଣ୍ଡ ଟେକିଛି। ଫିଲ୍ମର ମୁଖ୍ୟ ଅଭିନେତା ରଣବୀର ସିଂହ (Ranveer Singh) ଅଚାନକ ଏହି ପ୍ରୋଜେକ୍ଟରୁ ଓହରିଯିବା ପରେ ନିର୍ଦ୍ଦେଶକ ଫରହାନ ଅଖତର (Farhan Akhtar) ଓ ତାଙ୍କ ମଧ୍ୟରେ ଫାଟ ସୃଷ୍ଟି ହୋଇଛି। ଏହି ବିବାଦ ଏବେ ଏତେ ଉଗ୍ର ରୂପ ନେଇଛି ଯେ, ଫେଡେରେସନ୍ ଅଫ୍ ୱେଷ୍ଟର୍ଣ୍ଣ ଇଣ୍ଡିଆ ସିନେ ଏମ୍ପ୍ଲୟିଜ୍ (FWICE) ରଣବୀରଙ୍କ ବିରୋଧରେ ଅସହଯୋଗ ନିର୍ଦ୍ଦେଶନାମା (ବ୍ୟାନ୍) ଜାରି କରିଛି।

ଡନ୍ ଫ୍ରାଞ୍ଚାଇଜିର ଇତିହାସ ଓ ନୂଆ ଡନ୍

ଡନ୍ ଫ୍ରାଞ୍ଚାଇଜି ବଲିଉଡର ସବୁଠାରୁ ସଫଳ ଫ୍ରାଞ୍ଚାଇଜି ମଧ୍ୟରୁ ଅନ୍ୟତମ। ୧୯୭୮ ମସିହାରେ ମେଗାଷ୍ଟାର ଅମିତାଭ ବଚ୍ଚନ (Amitabh Bachchan) ପ୍ରଥମେ 'ଡନ୍' ଭୂମିକାରେ ଅଭିନୟ କରିଥିବା ବେଳେ ପରବର୍ତ୍ତୀ ସମୟରେ ସୁପରଷ୍ଟାର ଶାହରୁଖ ଖାନ (Shah Rukh Khan) 'ଡନ୍' ଏବଂ 'ଡନ୍ ୨'ରେ ନଜର ଆସିଥିଲେ। ୨୦୨୩ ମସିହାରେ ଫରହାନ ଅଖତର ଏକ ନୂଆ ପ୍ରୋମୋ ମାଧ୍ୟମରେ ରଣବୀର ସିଂହଙ୍କୁ ନୂଆ ଡନ୍ ଭାବରେ ଘୋଷଣା କରିଥିଲେ। ଦର୍ଶକମାନେ ଏହି ଘୋଷଣାକୁ ନେଇ ବେଶ୍ ଉତ୍ସାହିତ ଥିଲେ ମଧ୍ୟ ପରେ ଫିଲ୍ମର ସୁଟିଂକୁ ନେଇ କୌଣସି ଅପଡେଟ୍ ମିଳିନଥିଲା।

କାହିଁକି ହେଲା ବିବାଦ?

ରିପୋର୍ଟ ଅନୁଯାୟୀ, ରଣବୀର ଏବଂ ନିର୍ମାତାଙ୍କ ମଧ୍ୟରେ କ୍ରିଏଟିଭ୍ ମତଭେଦ କାରଣରୁ ଏହି ବିବାଦ ସୃଷ୍ଟି ହୋଇଛି। ରଣବୀର ଡନ୍ ଚରିତ୍ରକୁ ଅଧିକ ଡାର୍କ ଏବଂ ଆଗ୍ରେସିଭ୍ କରିବାକୁ ଚାହୁଁଥିବା ବେଳେ ଫରହାନ ପୁରୁଣା ଷ୍ଟାଇଲରେ ଫିଲ୍ମ କରିବାକୁ ଚାହୁଁଥିଲେ। ଏହାଛଡ଼ା ଫିଲ୍ମର ସ୍କ୍ରିପ୍ଟ ଫାଇନାଲ୍ ହେବାରେ ବିଳମ୍ବ ଏବଂ ନିକଟରେ ରିଲିଜ୍ ହୋଇଥିବା ଫିଲ୍ମ 'ଧୁରନ୍ଧର' ର ବଡ଼ ସଫଳତା ପରେ ରଣବୀର କ୍ରମାଗତ ଭାବରେ ଆଉ ଏକ ଗ୍ୟାଙ୍ଗଷ୍ଟାର ଫିଲ୍ମ କରିବାକୁ ଚାହିଁନଥିଲେ। ଫଳରେ ସେ ଫିଲ୍ମରୁ ଓହରି ଯିବାକୁ ନିଷ୍ପତ୍ତି ନେଇଥିଲେ।

ଫରହାନଙ୍କ ଅଭିଯୋଗ ଓ ୪୫ କୋଟିର ଦାବି

ରଣବୀରଙ୍କ ଏହି ନିଷ୍ପତ୍ତି ପରେ ଫରହାନ ଅଖତର ଏବଂ ରିତେଶ ସିଧୱାନୀଙ୍କ ପ୍ରଡକ୍ସନ୍ ହାଉସ୍ ଏକ୍ସେଲ୍ ଏଣ୍ଟରଟେନମେଣ୍ଟ ବଡ଼ କ୍ଷତି ସହିଥିବା ଅଭିଯୋଗ କରିଛନ୍ତି। ସୂଚନା ଅନୁଯାୟୀ, ଫରହାନ ପ୍ରି-ପ୍ରଡକ୍ସନ୍ ବାବଦକୁ ଖର୍ଚ୍ଚ ହୋଇଥିବା ୪୫ କୋଟି ଟଙ୍କା କ୍ଷତିପୂରଣ ଦାବି କରି ଇଣ୍ଡିଆନ୍ ଫିଲ୍ମ ଆଣ୍ଡ ଟେଲିଭିଜନ ଡିରେକ୍ଟର୍ସ ଆସୋସିଏସନ (IFTDA) ରେ ଅଭିଯୋଗ କରିଥିଲେ। ପରେ ଏହି ମାମଲା FWICE ନିକଟକୁ ଯାଇଥିଲା।

FWICE ର କାର୍ଯ୍ୟାନୁଷ୍ଠାନ ଏବଂ ରଣବୀରଙ୍କ ପ୍ରତିକ୍ରିୟା

ବିବାଦର ସମାଧାନ ନହେବା ପର୍ଯ୍ୟନ୍ତ FWICE ରଣବୀରଙ୍କ ଉପରେ ଏକ ଅନିର୍ଦ୍ଦିଷ୍ଟ କାଳ ପାଇଁ ବ୍ୟାନ୍ ଲଗାଇଛି। ଏହାର ଅର୍ଥ ହେଉଛି ଆସୋସିଏସନର ପ୍ରାୟ ୪ ଲକ୍ଷରୁ ଅଧିକ ସଦସ୍ୟ ରଣବୀରଙ୍କ ସହ କୌଣସି ପ୍ରୋଜେକ୍ଟରେ କାମ କରିବେ ନାହିଁ। ଅନ୍ୟପକ୍ଷରେ, ରଣବୀର ସିଂହଙ୍କ ଟିମ୍ ଏକ ବିବୃତ୍ତି ଜାରି କରି କହିଛି ଯେ ଅଭିନେତା ଫିଲ୍ମ ଫ୍ରାଟରନିଟି ଏବଂ 'ଡନ୍' ଫ୍ରାଞ୍ଚାଇଜିକୁ ବହୁତ ସମ୍ମାନ କରନ୍ତି। ବୃତ୍ତିଗତ ଆଲୋଚନା ଏବଂ ବ୍ୟକ୍ତିଗତ ସମ୍ପର୍କକୁ ମର୍ଯ୍ୟାଦା ଏବଂ ପାରସ୍ପରିକ ସମ୍ମାନର ସହ ପରିଚାଳନା କରାଯିବା ଉଚିତ୍ ବୋଲି ରଣବୀର ବିଶ୍ୱାସ କରନ୍ତି। ତେଣୁ ସେ ଏହି ପ୍ରସଙ୍ଗରେ ନୀରବତା ବଜାୟ ରଖିବାକୁ ଉଚିତ୍ ମଣିଛନ୍ତି।

ବର୍ତ୍ତମାନ ଏହି ଘଟଣା ବଲିଉଡରେ ଚର୍ଚ୍ଚାର ବିଷୟ ପାଲଟିଥିବା ବେଳେ ଆଗକୁ 'ଡନ୍ ୩' ର ଭବିଷ୍ୟତ କଣ ହେବ, ତାହା ଦେଖିବା ବାକି ରହିଲା।

ଲୋକପ୍ରିୟ ଧାରାବାହିକ 'ଶକ୍ତିମାନ୍' ର ଅଭିନେତା ମୁକେଶ ଖାନ୍ନା ଏବଂ ଷ୍ଟାଣ୍ଡଅପ୍ କମେଡିଆନ୍ ସମୟ ରୈନାଙ୍କ ମଧ୍ୟରେ ବିବାଦ ପୁଣି ଥରେ ତେଜିବାରେ ଲାଗିଛି। ନିକଟରେ ସମୟ ରୈନା ନିଜର ଏକ ନୂଆ ଭିଡିଓରେ ମୁକେଶ ଖାନ୍ନାଙ୍କୁ ଟାର୍ଗେଟ୍ କରିବା ପରେ, ବର୍ଷୀୟାନ୍ ଅଭିନେତା ଜଣକ କଡ଼ା ଜବାବ ଦେଇଛନ୍ତି। ନିଜର ସୋସିଆଲ ମିଡିଆ ହ୍ୟାଣ୍ଡେଲରେ ମୁକେଶ ଖାନ୍ନା କମେଡିଆନ୍‌ଙ୍କ ଉପରେ ପ୍ରବଳ ବର୍ଷିଛନ୍ତି ଏବଂ ତାଙ୍କୁ 'କଳା ମୁହଁ କରି ଗଧ ଉପରେ ବସିବା ଲୋକ' ବୋଲି ଆକ୍ଷେପ କରିଛନ୍ତି।

ସମୟ ରୈନାଙ୍କ ନୂଆ ଭିଡିଓ ଓ ରୋଷ୍ଟ୍

ସୂଚନାଯୋଗ୍ୟ ଯେ, 'ଇଣ୍ଡିଆଜ୍ ଗଟ୍ ଲାଟେଣ୍ଟ୍' (India's Got Latent) ବିବାଦ ପରେ ସମୟ ରୈନା ୟୁଟ୍ୟୁବ୍‌ରେ 'SAMAY RAINA Still Alive' ନାମକ ଏକ ନୂଆ ଭିଡିଓ ପୋଷ୍ଟ କରିଛନ୍ତି। ଏହି ଭିଡିଓରେ ସେ ସେହି ସମସ୍ତ ସେଲିବ୍ରିଟିମାନଙ୍କୁ ରୋଷ୍ଟ୍ କରିଛନ୍ତି, ଯେଉଁମାନେ ପୂର୍ବ ବିବାଦ ସମୟରେ ତାଙ୍କ ବିରୋଧରେ ବୟାନ ଦେଇଥିଲେ। ସେ ସୁନୀଲ ପାଲ୍, ବି ପ୍ରାକ୍ ଏବଂ ମୁକେଶ ଖାନ୍ନାଙ୍କୁ ଟାର୍ଗେଟ୍ କରିଥିଲେ। ମୁକେଶ ଖାନ୍ନାଙ୍କ ଉଦ୍ଦେଶ୍ୟରେ ସମୟ କହିଥିଲେ ଯେ, ତାଙ୍କ ସୋ' 'ଶକ୍ତିମାନ୍' ଦେଖି ପିଲାମାନେ ବିଲ୍ଡିଂରୁ ଡେଇଁ ପଡ଼ୁଥିଲେ, ତେଣୁ ସେ କେଉଁ ନୈତିକ ଆଧାରରେ ବର୍ତ୍ତମାନ ଅନ୍ୟକୁ ଉପଦେଶ ଦେଉଛନ୍ତି।

'ଗଧ ଉପରେ ବସାଇବା ଦରକାର'

ସମୟ ରୈନାଙ୍କ ଏହି ମନ୍ତବ୍ୟ ଶୁଣିବା ପରେ ମୁକେଶ ଖାନ୍ନା ନିଜ ଇନଷ୍ଟାଗ୍ରାମରେ ଏକ ପୋଷ୍ଟ ସେୟାର କରି ରାଗ ସୁଝାଇଛନ୍ତି। ସେ ଲେଖିଛନ୍ତି ଯେ, "କୁକୁର ଲାଞ୍ଜ କେବେ ସିଧା ହୁଏନାହିଁ। ତାକୁ ଲକ୍ଷେ ଶିଶିରେ ରଖିଲେ ମଧ୍ୟ ସେ ବଙ୍କା ରହିବ। ସମୟ ରୈନା ମଧ୍ୟ ସେହିଭଳି। ସେ କୌଣସି ସିଧାସାଦା ପ୍ରାଣୀ ନୁହଁନ୍ତି, ବରଂ ସେ ଏକ 'ରୋଷ୍ଟେଡ୍ ପ୍ରାଣୀ' ଯିଏକି ଅଳିଆ ଆବର୍ଜନାର ନିଆଁରେ ପୋଡ଼ି ହୋଇଛି"। ସେ ଆହୁରି ମଧ୍ୟ କହିଛନ୍ତି ଯେ, ଏଭଳି ଲୋକର ମୁହଁରେ କଳା ବୋଳି ତାକୁ ଗଧ ଉପରେ ବସାଇ ସାରା ଦେଶରେ ବୁଲାଇବା ଦରକାର, ଯାହାଫଳରେ ପିଲାମାନେ ତାଙ୍କ ଉପରକୁ ଅଣ୍ଡା ଓ ଟମାଟୋ ମାଡ଼ କରିବେ, କାରଣ ସେ ସେମାନଙ୍କ ସୁପରହିରୋ ଶକ୍ତିମାନ୍ଙ୍କୁ ଅପମାନିତ କରିଛନ୍ତି।

ପୂର୍ବରୁ କାହିଁକି ହୋଇଥିଲା ବିବାଦ?

ଗତବର୍ଷ 'ଇଣ୍ଡିଆଜ୍ ଗଟ୍ ଲାଟେଣ୍ଟ୍' ର ଏକ ଏପିସୋଡ୍‌ରେ କିଛି ଅଶ୍ଳୀଳ ମନ୍ତବ୍ୟ ଦିଆଯିବା ପରେ ବଡ଼ ଧରଣର ବିବାଦ ମୁଣ୍ଡ ଟେକିଥିଲା, ଯାହା ଫଳରେ ସମୟ ରୈନା ଏବଂ ଅନ୍ୟ କ୍ରିଏଟର୍ସଙ୍କ ନାମରେ ଏଫ୍‌ଆଇଆର୍ (FIR) ମଧ୍ୟ ରୁଜୁ ହୋଇଥିଲା। ସେହି ସମୟରେ ମୁକେଶ ଖାନ୍ନା ଏଭଳି ଅଶ୍ଳୀଳ ବିଷୟବସ୍ତୁକୁ ନେଇ କଡ଼ା ସମାଲୋଚନା କରିଥିଲେ ଏବଂ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ। ଏବେ ପୁଣି ଥରେ ଉଭୟଙ୍କ ମଧ୍ୟରେ ଏହି ବାକ୍‌ଯୁଦ୍ଧ ମନୋରଞ୍ଜନ ଜଗତରେ ଚର୍ଚ୍ଚାର ବିଷୟ ପାଲଟିଛି।

ଆଜି ସାରା ବିଶ୍ୱରେ 'କିସ୍ ଡେ' (Kiss Day) ପାଳନ କରାଯାଉଛି। ପ୍ରେମର ଏହି ସପ୍ତାହରେ ବଲିଉଡର ଅନେକ ରୋମାଣ୍ଟିକ କାହାଣୀ ମନେ ପଡୁଥିବା ବେଳେ, କିଛି ଏମିତି ଦୃଶ୍ୟ ମଧ୍ୟ ରହିଛି ଯାହା କଳାକାରଙ୍କ ପାଇଁ ଏକ ତିକ୍ତ ଅନୁଭୂତି ପାଲଟିଯାଇଛି। ସେମିତି ଏକ ଘଟଣା ହେଉଛି ୧୯୮୮ ମସିହାର ଫିଲ୍ମ 'ଦୟାବାନ'ର, ଯେଉଁଥିରେ ଅଭିନେତ୍ରୀ ମାଧୁରୀ ଦୀକ୍ଷିତ ଏବଂ ଦିବଙ୍ଗତ ଅଭିନେତା ବିନୋଦ ଖାନ୍ନାଙ୍କ ମଧ୍ୟରେ ଏକ ଅନ୍ତରଙ୍ଗ ଚୁମ୍ବନ ଦୃଶ୍ୟ ଶୁଟ୍ କରାଯାଇଥିଲା।

ବିନୋଦ ଖାନ୍ନାଙ୍କ ସହ ଥିଲା ବିବାଦୀୟ ଦୃଶ୍ୟ

ଫିଲ୍ମ 'ଦୟାବାନ' (Dayavan) ସୁଟିଂ ସମୟରେ ମାଧୁରୀ ଦୀକ୍ଷିତ ଇଣ୍ଡଷ୍ଟ୍ରିରେ ନୂଆ ଥିଲେ ଏବଂ ତାଙ୍କ ବୟସ ମାତ୍ର ୨୦ ବର୍ଷ ହୋଇଥିଲା। ଅନ୍ୟପକ୍ଷରେ ବିନୋଦ ଖାନ୍ନା ଥିଲେ ଜଣେ ପ୍ରତିଷ୍ଠିତ ଷ୍ଟାର ଏବଂ ବୟସରେ ମାଧୁରୀଙ୍କଠାରୁ ପ୍ରାୟ ୨୦ ବର୍ଷ ବଡ଼ ଥିଲେ। ଫିଲ୍ମର ଏକ ଗୀତ 'ଆଜ୍ ଫିର୍ ତୁମପେ ପ୍ୟାର୍ ଆୟା ହୈ'ରେ ଉଭୟଙ୍କ ମଧ୍ୟରେ ଏକ ଲିପ୍-ଲକ୍ (Lip-lock) ଦୃଶ୍ୟ ରହିଥିଲା। କୁହାଯାଏ ଯେ ଏହି ଦୃଶ୍ୟର ସୁଟିଂ ସମୟରେ ବିନୋଦ ଖାନ୍ନା ଏତେ ମାତ୍ରାରେ ଭାବପ୍ରବଣ ହୋଇଯାଇଥିଲେ ଯେ ସେ ନିଜ ଉପରୁ ନିୟନ୍ତ୍ରଣ ହରାଇ ବସିଥିଲେ। ଏହି ଘଟଣା ପରେ ମାଧୁରୀ ଖୁବ୍ ଅସହଜ ମନେ କରିଥିଲେ।

ଆଜି ବି ଅନୁତାପ କରନ୍ତି ମାଧୁରୀ

ପରବର୍ତ୍ତୀ ସମୟରେ ଏକ ସାକ୍ଷାତକାରରେ ମାଧୁରୀ ଏହି ଦୃଶ୍ୟକୁ ନେଇ ନିଜର ଅନୁତାପ ପ୍ରକାଶ କରିଥିଲେ। ସେ କହିଥିଲେ ଯେ, "ସେତେବେଳେ ମୁଁ ଛୋଟ ଥିଲି ଏବଂ ମୋତେ ଜଣାନଥିଲା ଯେ ମୁଁ ନିର୍ଦ୍ଦେଶକଙ୍କୁ 'ନା' କହିପାରିବି।" ଫିଲ୍ମ ରିଲିଜ୍ ହେବା ପରେ ଏହି ଦୃଶ୍ୟକୁ ନେଇ ଖୁବ୍ ସମାଲୋଚନା ହୋଇଥିଲା। ଏହି ଘଟଣା ପରେ ମାଧୁରୀ ନିଷ୍ପତ୍ତି ନେଇଥିଲେ ଯେ ସେ ଭବିଷ୍ୟତରେ କେବେ ବି ପରଦାରେ ଏଭଳି ଚୁମ୍ବନ ଦୃଶ୍ୟରେ ଅଭିନୟ କରିବେ ନାହିଁ। ଆଜି ବି 'କିସ୍ ଡେ' ଆସିଲେ ବଲିଉଡର ଏହି ବିବାଦୀୟ କିସ୍ କାହାଣୀ ନିଶ୍ଚୟ ମନେ ପଡେ।

ବଲିଉଡ ଅଭିନେତା ମନୋଜ ବାଜପେୟୀଙ୍କ ଆଗାମୀ ଫିଲ୍ମ ‘ଘୁଷଖୋର ପଣ୍ଡତ’ (Ghooskhor Pandat)ର ଟିଜର ରିଲିଜ୍ ହେବା ମାତ୍ରେ ଏହାକୁ ନେଇ ବଡ଼ ଧରଣର ବିବାଦ ଆରମ୍ଭ ହୋଇଯାଇଛି। ଫିଲ୍ମର ଶୀର୍ଷକକୁ ନେଇ ବିରୋଧ ଏତେ ମାତ୍ରାରେ ବଢିଯାଇଥିଲା ଯେ, ନିକଟରେ ଲକ୍ଷ୍ନୌରେ ଏନେଇ ଏକ ଏଫଆଇଆର (FIR) ମଧ୍ୟ ରୁଜୁ ହୋଇଥିଲା। ବିବାଦକୁ ଦୃଷ୍ଟିରେ ରଖି ଏବେ ଓଟିଟି ପ୍ଲାଟଫର୍ମ ନେଟଫ୍ଲିକ୍ସ (Netflix) ଏକ ବଡ଼ ପଦକ୍ଷେପ ନେଇଛି। ନେଟଫ୍ଲିକ୍ସ ନିଜର ସମସ୍ତ ସୋସିଆଲ ମିଡିଆ ପ୍ଲାଟଫର୍ମରୁ ଫିଲ୍ମର ଟିଜର ଏବଂ ଅନ୍ୟାନ୍ୟ ପ୍ରମୋସନାଲ କଣ୍ଟେଣ୍ଟକୁ ହଟାଇ ଦେଇଛି।

କାହିଁକି ହେଉଛି ବିବାଦ?

ଫିଲ୍ମର ନାମ ‘ଘୁଷଖୋର ପଣ୍ଡତ’ ରଖାଯାଇଥିବାରୁ ବ୍ରାହ୍ମଣ ସମାଜ ସମେତ ବିଭିନ୍ନ ସାମାଜିକ ସଙ୍ଗଠନ ଏହାକୁ ଦୃଢ ବିରୋଧ କରିଛନ୍ତି। ଅଭିଯୋଗ ହୋଇଛି ଯେ, ‘ପଣ୍ଡତ’ ବା ପଣ୍ଡିତ ଶବ୍ଦ ସହ ‘ଘୁଷଖୋର’ ଭଳି ଶବ୍ଦ ଯୋଡିବା ଦ୍ୱାରା ଏକ ନିର୍ଦ୍ଦିଷ୍ଟ ସମ୍ପ୍ରଦାୟର ଭାବନାକୁ ଆଘାତ ଲାଗିଛି ଏବଂ ଏହା ଅପମାନଜନକ ଅଟେ। ଏହି ମାମଲାରେ ଲକ୍ଷ୍ନୌର ହଜରତଗଞ୍ଜ ଥାନାରେ ଅଭିଯୋଗ ହେବା ପରେ ନିର୍ମାତା ଓ ଡିଷ୍ଟ୍ରିବ୍ୟୁଟରମାନେ ତୁରନ୍ତ ଏହି ନିଷ୍ପତ୍ତି ନେଇଛନ୍ତି।

I respect the emotions and concerns people have shared, and I take them seriously. When something you are part of causes hurt to some people, it makes you pause and listen.

As an actor, I come to a film through the character and the story I am playing. For me, this was about… https://t.co/IGlQtLQeNs

— manoj bajpayee (@BajpayeeManoj) February 6, 2026

ନିର୍ମାତା ନୀରଜ ପାଣ୍ଡେଙ୍କ ସ୍ପଷ୍ଟୀକରଣ

ଏହି ବିବାଦ ଉପରେ ପ୍ରତିକ୍ରିୟା ଦେଇ ଫିଲ୍ମର ଲେଖକ ତଥା ନିର୍ମାତା ନୀରଜ ପାଣ୍ଡେ ନିଜର ସ୍ପଷ୍ଟୀକରଣ ଦେଇଛନ୍ତି। ସେ କହିଛନ୍ତି, “ଏହା ସମ୍ପୂର୍ଣ୍ଣ ରୂପେ ଏକ କାଳ୍ପନିକ କପ୍ ଡ୍ରାମା। ଏଥିରେ ବ୍ୟବହୃତ ‘ପଣ୍ଡତ’ ଶବ୍ଦ କୌଣସି ଜାତିକୁ ଆକ୍ଷେପ କରିବା ଉଦ୍ଦେଶ୍ୟରେ ନିଆଯାଇ ନାହିଁ, ବରଂ ଏକ କାଳ୍ପନିକ ଚରିତ୍ର ପାଇଁ ବ୍ୟବହାର କରାଯାଇଛି। ଜଣେ ଚଳଚ୍ଚିତ୍ର ନିର୍ମାତା ଭାବରେ ମୁଁ ଦାୟିତ୍ୱବାନ ଏବଂ କାହାର ଭାବନାକୁ ଆଘାତ ଦେବା ମୋର ଉଦ୍ଦେଶ୍ୟ ନୁହେଁ। ତେବେ ଲୋକଙ୍କ ଭାବନାକୁ ସମ୍ମାନ ଜଣାଇ ଆମେ ଏହି ପଦକ୍ଷେପ ନେଇଛୁ।”

ମନୋଜ ବାଜପେୟୀ କ’ଣ କହିଲେ?

ମୁଖ୍ୟ ଅଭିନେତା ମନୋଜ ବାଜପେୟୀ ମଧ୍ୟ ସୋସିଆଲ ମିଡିଆରେ ଏକ ପୋଷ୍ଟ ଜରିଆରେ ନିଜର ମତ ରଖିଛନ୍ତି। ସେ କହିଛନ୍ତି ଯେ, ସେ ସର୍ବସାଧାରଣଙ୍କ ଭାବନା ଓ ଚିନ୍ତାଧାରାକୁ ସମ୍ମାନ କରନ୍ତି। ଯଦି କୌଣସି ବିଷୟବସ୍ତୁ କାହାକୁ ଆଘାତ ଦେଉଛି, ତେବେ ତାହା ବିଚାରଯୋଗ୍ୟ। ଏହା କେବଳ ଜଣେ ଭୁଲ୍ ବ୍ୟକ୍ତିର ଆତ୍ମ-ଉପଲବ୍ଧିର ଯାତ୍ରା ଥିଲା, କୌଣସି ସମ୍ପ୍ରଦାୟ ଉପରେ ଟିପ୍ପଣୀ ନୁହେଁ ବୋଲି ସେ ସ୍ପଷ୍ଟ କରିଛନ୍ତି।

ବଲିଉଡର ଦମଦାର ଅଭିନେତା ମନୋଜ ବାଜପେୟୀ ତାଙ୍କ ଆଗାମୀ ଚଳଚ୍ଚିତ୍ର ‘ଘୁଷଖୋର ପଣ୍ଡତ’ (Ghooskhor Pandat) ସହିତ ପରଦାକୁ ଫେରୁଛନ୍ତି। ଫେବୃଆରୀ ୩ ତାରିଖରେ ମୁମ୍ବାଇରେ ଆୟୋଜିତ ଏକ କାର୍ଯ୍ୟକ୍ରମରେ ଲୋକପ୍ରିୟ ଓଟିଟି ପ୍ଲାଟଫର୍ମ Netflix ଏହାର ଟିଜର ରିଲିଜ୍ କରିଥିଲା। ହେଲେ ଟିଜର ଆସିବା ପରେ ଫିଲ୍ମର ଶୀର୍ଷକ ବା ଟାଇଟଲ୍‌କୁ ନେଇ ଏବେ ସୋସିଆଲ ମିଡିଆରେ ଜୋରଦାର ହଙ୍ଗାମା ଆରମ୍ଭ ହୋଇଯାଇଛି।

ଅନେକ ସୋସିଆଲ ମିଡିଆ ବ୍ୟବହାରକାରୀ ଫିଲ୍ମର ନାମକୁ ‘ଜାତିବାଦୀ’ ବୋଲି ଅଭିଯୋଗ କରିଛନ୍ତି। ସେମାନଙ୍କ କହିବା କଥା ହେଲା ଯେ, ଏହି ଶୀର୍ଷକ ଏକ ନିର୍ଦ୍ଦିଷ୍ଟ ସମ୍ପ୍ରଦାୟ (ବ୍ରାହ୍ମଣ ସମାଜ)କୁ ଟାର୍ଗେଟ କରୁଛି। ୟୁଜର୍ସମାନେ ଦାବି କରିଛନ୍ତି ଯେ, ଯଦି ଓଟିଟି ପ୍ଲାଟଫର୍ମ ତୁରନ୍ତ ଏହାର ନାମ ପରିବର୍ତ୍ତନ ନକରେ, ତେବେ ଆଗାମୀ ଦିନରେ ନେଟଫ୍ଲିକ୍ସକୁ ବୟକଟ୍ କରାଯିବ। ଅନେକ ପ୍ରଶ୍ନ କରିଛନ୍ତି ଯେ, କଣ ନିର୍ମାତାମାନେ ଅନ୍ୟ କୌଣସି ସମ୍ପ୍ରଦାୟ ପାଇଁ ଏଭଳି ଶବ୍ଦ ବ୍ୟବହାର କରିବାକୁ ସାହସ କରିପାରିବେ?

‘ଏକ୍ସ’ରେ ଲୋକମାନେ ନିଜର ଅସନ୍ତୋଷ ବ୍ୟକ୍ତ କରିଛନ୍ତି। ଜଣେ ବ୍ୟବହାରକାରୀ ଲେଖିଛନ୍ତି, "ଏହା ଅତ୍ୟନ୍ତ ଲଜ୍ଜାଜନକ ବିଷୟ। ଏକ ନିର୍ଦ୍ଦିଷ୍ଟ ସମ୍ପ୍ରଦାୟକୁ ସହଜ ଟାର୍ଗେଟ୍ କରାଯାଉଛି। ଏହାକୁ ତୁରନ୍ତ ପରିବର୍ତ୍ତନ କରନ୍ତୁ କିମ୍ବା ବ୍ୟାନ୍ ପାଇଁ ପ୍ରସ୍ତୁତ ରୁହନ୍ତୁ।" ଅନ୍ୟ ଜଣେ ବ୍ୟକ୍ତି ନିର୍ଦ୍ଦେଶକଙ୍କୁ ସମାଲୋଚନା କରି କହିଛନ୍ତି ଯେ, ନିର୍ଦ୍ଦେଶକ ଏବଂ କଳାକାର ନିଜେ ସେହି ସମ୍ପ୍ରଦାୟର ହୋଇ ମଧ୍ୟ କିଛି ଟଙ୍କା ପାଇଁ ନିଜ ସମାଜକୁ ବଦନାମ କରୁଛନ୍ତି।

‘ଘୁଷଖୋର ପଣ୍ଡତ’ ଏକ କ୍ରାଇମ୍ ଥ୍ରୀଲର ଚଳଚ୍ଚିତ୍ର, ଯାହାର ନିର୍ଦ୍ଦେଶନା ରୀତେଶ ଶାହା ଦେଇଛନ୍ତି ଏବଂ କାହାଣୀ ନୀରଜ ପାଣ୍ଡେ ଲେଖିଛନ୍ତି। ଏଥିରେ ମନୋଜ ବାଜପେୟୀ ଜଣେ ଦୁର୍ନୀତିଗ୍ରସ୍ତ ଦିଲ୍ଲୀ ପୋଲିସ ଅଫିସର ‘ଅଜୟ ଦୀକ୍ଷିତ’ ଭୂମିକାରେ ନଜର ଆସିବେ। ଏହି ଫିଲ୍ମରେ ନୁସରତ ଭରୁଚା, ଦିବ୍ୟା ଦତ୍ତ, ସାକିବ ସଲିମ୍, ଅକ୍ଷୟ ଓବରଏ, ଶ୍ରଦ୍ଧା ଦାସ ଏବଂ କିକୁ ଶାରଦା ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି।