ବର୍ତ୍ତମାନର ଡିଜିଟାଲ ଯୁଗରେ ପିଲାମାନଙ୍କୁ ଇଣ୍ଟରନେଟର କୁପ୍ରଭାବରୁ ରକ୍ଷା କରିବା ପିତାମାତାଙ୍କ ପାଇଁ ଏକ ବଡ଼ ଆହ୍ୱାନ ହୋଇପଡ଼ିଛି। ଏହି ପରିପ୍ରେକ୍ଷୀରେ ବଲିଉଡ ଅଭିନେତ୍ରୀ ଶିଳ୍ପା ସେଟ୍ଟୀ ‘ସେଫର୍ ଇଣ୍ଟରନେଟ୍ ଡେ’ (Safer Internet Day) ଅବସରରେ ପିତାମାତାଙ୍କ ପାଇଁ କିଛି ଗୁରୁତ୍ୱପୂର୍ଣ୍ଣ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ ପିଲାମାନଙ୍କୁ ଇଣ୍ଟରନେଟ୍ ବ୍ୟବହାରରୁ ସମ୍ପୂର୍ଣ୍ଣ ବାରଣ କରିବା ବଦଳରେ ସେମାନଙ୍କୁ ‘ଡିଜିଟାଲ୍ ସଚେତନ’ କରାଇବା ଅଧିକ ଜରୁରୀ।

୧୬ ବର୍ଷ ଯାଏଁ ନଜର ରଖିବା ‘ଯତ୍ନ’, ‘ନିୟନ୍ତ୍ରଣ’ ନୁହେଁ

ଶିଳ୍ପା ନିଜ ଇନଷ୍ଟାଗ୍ରାମରେ ଏକ ଭିଡିଓ ସେୟାର କରି କହିଛନ୍ତି ଯେ ୧୬ ବର୍ଷ ବୟସ ପର୍ଯ୍ୟନ୍ତ ପିଲାମାନଙ୍କ ଇଣ୍ଟରନେଟ୍ ଗତିବିଧି ଉପରେ ନଜର ରଖିବା ପିତାମାତାଙ୍କ ଦାୟିତ୍ୱ। ଏହାକୁ ସେ ‘ନିୟନ୍ତ୍ରଣ’ (Control) ନୁହେଁ, ବରଂ ‘ଯତ୍ନ’ (Care) ବୋଲି ଅଭିହିତ କରିଛନ୍ତି। ପିଲାମାନେ କ’ଣ ଦେଖୁଛନ୍ତି ଏବଂ କେଉଁ ଧରଣର ବିଷୟବସ୍ତୁ ସହ ଜଡିତ ଅଛନ୍ତି, ତାହା ଜାଣିବା ନିହାତି ଆବଶ୍ୟକ।

ଖୋଲାଖୋଲି କଥା ହେବା ଜରୁରୀ

ଶିଳ୍ପାଙ୍କ ମତରେ, କେବଳ ପ୍ୟାରେଣ୍ଟାଲ୍ କଣ୍ଟ୍ରୋଲ୍ ଲଗାଇବା ଯଥେଷ୍ଟ ନୁହେଁ। ପିଲାମାନଙ୍କ ସହ ଖୋଲାଖୋଲି କଥା ହେବା ଦ୍ୱାରା ବିଶ୍ୱାସ ବଢିଥାଏ। ସେ କହିଛନ୍ତି, "ନୀରବତାରେ କୌତୁହଳ ବଢେ, କିନ୍ତୁ କଥାବାର୍ତ୍ତା ଦ୍ୱାରା ସମାଧାନ ମିଳେ।" ତେଣୁ ପିଲାମାନଙ୍କୁ ଇଣ୍ଟରନେଟର ଭଲ ଓ ଖରାପ ଦିଗ ବିଷୟରେ ବୁଝାଇବା ଉଚିତ୍।

ଇଣ୍ଟରନେଟ୍ ସବୁବେଳେ ସତ ନୁହେଁ

ପିଲାମାନଙ୍କୁ ଏହା ଶିଖାଇବା ଆବଶ୍ୟକ ଯେ ଅନ୍‌ଲାଇନ୍‌ରେ ଦେଖାଯାଉଥିବା ସବୁକିଛି ସତ କିମ୍ବା ନିରାପଦ ନୁହେଁ। ଶିଳ୍ପା ପିତାମାତାଙ୍କୁ ଅନୁରୋଧ କରିଛନ୍ତି ଯେ ସେମାନେ ନିଜ ପିଲାଙ୍କୁ ‘ଡିଜିଟାଲ୍ ଆଡିକ୍ଟ’ (ନିଶାଗ୍ରସ୍ତ) ନ କରାଇ, ସଚେତନ ନାଗରିକ ଭାବେ ଗଢି ତୋଳନ୍ତୁ। ଏହି ବାର୍ତ୍ତା ମାଧ୍ୟମରେ ସେ ସମସ୍ତ ଅଭିଭାବକଙ୍କୁ ଏକାଠି ହୋଇ ପିଲାଙ୍କ ଡିଜିଟାଲ ଭବିଷ୍ୟତକୁ ସୁରକ୍ଷିତ କରିବାକୁ ଆହ୍ୱାନ ଦେଇଛନ୍ତି।

ଭୁବନେଶ୍ୱର: ବର୍ତ୍ତମାନ ସମୟରେ ଛୋଟ ପିଲାଙ୍କ ହାତରେ ସ୍ମାର୍ଟଫୋନ୍ ଦେଖିବା ଏକ ସାଧାରଣ ଘଟଣା ପାଲଟିଛି। ଅନେକ ସମୟରେ ବାପା-ମା’ମାନେ ପିଲାଙ୍କୁ ଖୁଆଇବା ପାଇଁ କିମ୍ବା କାନ୍ଦ ବନ୍ଦ କରାଇବା ପାଇଁ ହାତରେ ମୋବାଇଲ୍ ଧରାଇ ଦେଉଛନ୍ତି। କିନ୍ତୁ ଏହା ଶିଶୁର ଭବିଷ୍ୟତ ପାଇଁ କେତେ ବିପଜ୍ଜନକ ହୋଇପାରେ, ସେ ନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଏବଂ ଇଣ୍ଡିଆନ୍ ଏକାଡେମୀ ଅଫ୍ ପେଡିଆଟ୍ରିକ୍ସ (IAP) ଚେତାବନୀ ଜାରି କରିଛନ୍ତି।

କେଉଁ ବୟସରେ କେତେ ସ୍କ୍ରିନ୍ ଟାଇମ୍?

ବିଶେଷଜ୍ଞଙ୍କ ପରାମର୍ଶ ଅନୁଯାୟୀ, ଶିଶୁର ବୟସ ଅନୁସାରେ ମୋବାଇଲ୍ ବ୍ୟବହାରର ସୀମା ନିର୍ଦ୍ଧାରଣ କରାଯାଇଛି। ଡାକ୍ତରଙ୍କ ମତରେ ୨ ବର୍ଷରୁ କମ୍ ବୟସର ଶିଶୁଙ୍କୁ ମୋବାଇଲ୍, ଟିଭି କିମ୍ବା ଟ୍ୟାବଲେଟ୍ ଆଦୌ ଦେଖାଇବା ଉଚିତ୍ ନୁହେଁ। ଏହି ସମୟରେ ଶିଶୁର ମସ୍ତିଷ୍କ ବିକାଶ ହେଉଥିବାରୁ ସ୍କ୍ରିନ୍ ଲାଇଟ୍ ସେମାନଙ୍କ ଉପରେ ଗଭୀର କୁପ୍ରଭାବ ପକାଇଥାଏ। କେବଳ ପରିବାର ସହ ଭିଡିଓ କଲ୍ ବ୍ୟତୀତ ସେମାନଙ୍କ ପାଇଁ 'ନୋ ସ୍କ୍ରିନ୍ ଟାଇମ୍' ନିୟମ ପାଳନ କରିବା ଜରୁରୀ। ସେହିପରି ୨ ରୁ ୫ ବର୍ଷର ପିଲାମାନଙ୍କ ପାଇଁ ଦିନକୁ ସର୍ବାଧିକ ୧ ଘଣ୍ଟା ସ୍କ୍ରିନ୍ ଟାଇମ୍ ଅନୁମତି ଦିଆଯାଇପାରେ, ତାହା ପୁଣି କେବଳ ଶିକ୍ଷଣୀୟ କାର୍ଯ୍ୟକ୍ରମ ପାଇଁ ସୀମିତ ରହିବା ଆବଶ୍ୟକ।

ପିଲାଙ୍କ ଉପରେ ପଡୁଛି ମାରାତ୍ମକ ପ୍ରଭାବ

ଅତ୍ୟଧିକ ମୋବାଇଲ୍ ବ୍ୟବହାର ଦ୍ୱାରା ପିଲାମାନଙ୍କ ଶାରୀରିକ ଓ ମାନସିକ ବିକାଶ ବାଧାପ୍ରାପ୍ତ ହେଉଛି। ଛୋଟ ବୟସରୁ ପିଲାଙ୍କ ଆଖି ଖରାପ ହେବା ସହ ଚଷମା ଲାଗିବାର ଆଶଙ୍କା ବୃଦ୍ଧି ପାଉଛି। ବାହାରେ ଖେଳକୁଦ ବନ୍ଦ କରି ଏକାଠି ବସି ରହିବା ଫଳରେ ପିଲାମାନେ ମୋଟାପଣ ବା ଓବେସିଟିର ଶିକାର ହେଉଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ମୋବାଇଲ୍ ନିଶା ଯୋଗୁଁ ପିଲାଙ୍କର କଥା କହିବାରେ ବିଳମ୍ବ (Language Delay) ଘଟୁଛି ଏବଂ ସେମାନଙ୍କର ସାମାଜିକ ବିକାଶରେ ବାଧା ସୃଷ୍ଟି ହେଉଛି। ଏହା ସହିତ ନିଦ ନ ହେବା ଏବଂ ଚିଡିଚିଡା ସ୍ୱଭାବ ଭଳି ସମସ୍ୟା ମଧ୍ୟ ଦେଖାଯାଉଛି।

ଅଭିଭାବକଙ୍କ ପାଇଁ ପରାମର୍ଶ

ଏହି ସମସ୍ୟାର ସମାଧାନ ପାଇଁ ଅଭିଭାବକମାନଙ୍କୁ ସଚେତନ ହେବାକୁ ପଡିବ। ପ୍ରଥମେ ବାପା-ମା’ ନିଜେ ପିଲାଙ୍କ ସାମନାରେ ମୋବାଇଲ୍ ବ୍ୟବହାର କମାଇବା ଉଚିତ୍, କାରଣ ପିଲାମାନେ ସେମାନଙ୍କୁ ଅନୁକରଣ କରନ୍ତି। ଶୋଇବାର ୧ ଘଣ୍ଟା ପୂର୍ବରୁ ଘରର ସମସ୍ତ ସ୍କ୍ରିନ୍ ବନ୍ଦ କରିବା ସହ ପିଲାଙ୍କ ଶୋଇବା ଘରେ ଟିଭି ନ ରଖିବାକୁ ପରାମର୍ଶ ଦିଆଯାଇଛି। ମୋବାଇଲ୍ ବଦଳରେ ପିଲାଙ୍କୁ ବହି ପଢିବା, ଚିତ୍ରାଙ୍କନ କରିବା କିମ୍ବା ବାହାରେ ଖେଳିବା ପାଇଁ ଉତ୍ସାହିତ କରିବା ଜରୁରୀ।

ଆପଣଙ୍କ ସକାଳ କ’ଣ ଚା’ ସହିତ ବିସ୍କୁଟରୁ ଆରମ୍ଭ ହୁଏ? କିମ୍ବା ଆପଣଙ୍କ ଘରେ ପିଲାମାନେ ଦିନସାରା ଚିପ୍ସ କିମ୍ବା ପ୍ୟାକେଟ୍ ଯୁକ୍ତ ଖାଦ୍ୟ ଖାଇବାକୁ ଜିଦ୍ କରନ୍ତି କି? ଯଦି ଏହାର ଉତ୍ତର ହଁ, ତେବେ ଆପଣଙ୍କୁ ସତର୍କ ହେବାର ଆବଶ୍ୟକତା ରହିଛି। ଆପଣ ଜାଣତରେ ହେଉ କିମ୍ବା ଅଜାଣତରେ, ନିଜ ପରିବାରକୁ ‘ଅଲଟ୍ରା ପ୍ରୋସେସ୍ଡ ଫୁଡ୍’ (Ultra Processed Food) ନାମକ ଏକ ଧୀର ବିଷ କିମ୍ବା ‘ସ୍ଲୋ ପଏଜନ୍’ ଖୁଆଉଛନ୍ତି। ଆସନ୍ତୁ ଜାଣିବା ଏହା କ’ଣ ଏବଂ ଶରୀର ପାଇଁ କେତେ କ୍ଷତିକାରକ।

ଅଲଟ୍ରା ପ୍ରୋସେସ୍ଡ ଫୁଡ୍ କ’ଣ?

ସାଧାରଣତଃ ଯେଉଁ ଖାଦ୍ୟ କାରଖାନାରେ ପ୍ରସ୍ତୁତ ହୁଏ ଏବଂ ଯେଉଁଥିରେ ଅନେକ ପ୍ରକାରର କେମିକାଲ୍, ରଙ୍ଗ, ସ୍ୱାଦ ବଢାଇବା ପାଇଁ ଆର୍ଟିଫିସିଆଲ୍ ଫ୍ଲେଭର ଏବଂ ସଂରକ୍ଷଣ ପାଇଁ ପ୍ରିଜରଭେଟିଭ୍ ବ୍ୟବହାର କରାଯାଇଥାଏ, ତାହାକୁ ଅଲଟ୍ରା ପ୍ରୋସେସ୍ଡ ଫୁଡ୍ କୁହାଯାଏ। ଏଥିରେ ଚିନି, ଲୁଣ ଏବଂ ଚର୍ବିର ମାତ୍ରା ଅତ୍ୟଧିକ ଥାଏ, ଯାହା ସ୍ୱାସ୍ଥ୍ୟ ପାଇଁ ହାନିକାରକ। ବିସ୍କୁଟ, ଚିପ୍ସ, କୋଲ୍ଡ ଡ୍ରିଙ୍କସ, ପ୍ୟାକେଜ୍ଡ ଜୁସ୍, ଇନଷ୍ଟାଣ୍ଟ ନୁଡୁଲ୍ସ ଇତ୍ୟାଦି ଏହି ଶ୍ରେଣୀରେ ଆସିଥାଏ।

ଶରୀର ପାଇଁ ଘାତକ ସାଜୁଛି ଏହି ଅଭ୍ୟାସ

ବିଶେଷଜ୍ଞଙ୍କ ମତରେ, ଏହି ଧରଣର ଖାଦ୍ୟରେ ପୋଷକ ତତ୍ତ୍ୱ ନଥାଏ। ଏହା ପରିବର୍ତ୍ତେ ଏଥିରେ ଥିବା ଖରାପ ଫ୍ୟାଟ୍ ଏବଂ ଅଧିକ ସୁଗାର ଶରୀରରେ ମେଦବହୁଳତା, ଡାଇବେଟିସ୍, ହୃଦଘାତ ଏବଂ ଉଚ୍ଚ ରକ୍ତଚାପ ଭଳି ଗମ୍ଭୀର ରୋଗ ସୃଷ୍ଟି କରେ। ଦୀର୍ଘଦିନ ଧରି ଏଭଳି ଖାଦ୍ୟ ଖାଇବା ଦ୍ୱାରା କ୍ୟାନସର ଭଳି ମାରାତ୍ମକ ରୋଗର ଆଶଙ୍କା ମଧ୍ୟ ବୃଦ୍ଧି ପାଇଥାଏ। ଏହା ଏକ ‘ଧୀର ବିଷ’ ଭଳି କାମ କରେ, ଯାହାର ପ୍ରଭାବ ତୁରନ୍ତ ଜଣାପଡେ ନାହିଁ କିନ୍ତୁ କିଛି ବର୍ଷ ପରେ ଶରୀରକୁ ଭିତରୁ ଫମ୍ପା କରିଦିଏ।

ପିଲାମାନଙ୍କ ପାଇଁ ଅଧିକ ବିପଜ୍ଜନକ

ବର୍ତ୍ତମାନ ସମୟରେ ପିଲାମାନଙ୍କ ମଧ୍ୟରେ ଜଙ୍କ୍ ଫୁଡ୍ ଖାଇବାର ପ୍ରବଣତା ବଢିବାରେ ଲାଗିଛି। ଏହି ଅଲଟ୍ରା ପ୍ରୋସେସ୍ଡ ଖାଦ୍ୟ ପିଲାଙ୍କ ମସ୍ତିଷ୍କ ବିକାଶରେ ବାଧା ସୃଷ୍ଟି କରିବା ସହ ସେମାନଙ୍କ ରୋଗ ପ୍ରତିରୋଧକ ଶକ୍ତି କମାଇଦିଏ। ତେଣୁ ନିଜ ପରିବାରକୁ ସୁସ୍ଥ ରଖିବା ପାଇଁ ଘରେ ତିଆରି ସତେଜ ଖାଦ୍ୟ, ଫଳ ଏବଂ ପନିପରିବା ଖାଇବା ଉପରେ ଗୁରୁତ୍ୱ ଦିଅନ୍ତୁ ଏବଂ ପ୍ୟାକେଟ୍ ଯୁକ୍ତ ଖାଦ୍ୟରୁ ଦୂରେଇ ରୁହନ୍ତୁ।

ଅନଲାଇନ୍ ଗେମ୍ କେବଳ ମନୋରଞ୍ଜନର ମାଧ୍ୟମ ନୁହେଁ, ବରଂ ଅନେକ ସମୟରେ ଏହା ଜୀବନ ପାଇଁ ବିପଦ ପାଲଟୁଛି। ନିକଟରେ ଉତ୍ତରପ୍ରଦେଶର ଗାଜିଆବାଦରେ ତିନି ଜଣ ଭଉଣୀଙ୍କ ଆତ୍ମହତ୍ୟା ଘଟଣା ସାମ୍ନାକୁ ଆସିବା ପରେ ଏହି ଚର୍ଚ୍ଚା ଜୋର ଧରିଛି। ପୋଲିସ ଏହି ଘଟଣାର ତଦନ୍ତ କରୁଥିବା ବେଳେ ଏହା ପଛରେ ‘କୋରିଆନ୍ ଲଭର୍’ (Korean Lover) ନାମକ ଏକ ଅନଲାଇନ୍ ଗେମ୍ ଥିବା ସନ୍ଦେହ କରାଯାଉଛି।

ଗାଜିଆବାଦ ଘଟଣା ଏବଂ ‘କୋରିଆନ୍ ଲଭର୍’ ରହସ୍ୟ

ଗାଜିଆବାଦର ଭାରତ ସିଟି ସୋସାଇଟିରେ ରହୁଥିବା ତିନି ଭଉଣୀ ୯ ମହଲା କୋଠାରୁ ଡେଇଁ ଆତ୍ମହତ୍ୟା କରିଥିଲେ। ମୃତକଙ୍କ ବାପାଙ୍କ କହିବା ଅନୁଯାୟୀ, ତାଙ୍କ ଝିଅମାନେ ଏକ ଅନଲାଇନ୍ ଗେମ୍ ଖେଳୁଥିଲେ ଯେଉଁଥିରେ ବିଭିନ୍ନ ଟାସ୍କ ପୂରଣ କରିବାକୁ ପଡୁଥିଲା। ଏଥିରେ ମୋଟ ୫୦ଟି ଟାସ୍କ ରହିଥିଲା ଏବଂ ତାଙ୍କର ୧୪ ବର୍ଷୀୟ ଝିଅ ଏହି ଗେମ୍‌ରେ ଲିଡର୍ ଥିଲା। ପିଲାମାନେ ଏତେ ଗୋପନୀୟ ଭାବରେ ଏହା ଖେଳୁଥିଲେ ଯେ ପରିବାର ଲୋକଙ୍କୁ ଏହାର ସାମାନ୍ୟ ସୁରାକ ମଧ୍ୟ ମିଳିନଥିଲା।

ବ୍ଲୁ ହ୍ୱେଲ୍ ଚ୍ୟାଲେଞ୍ଜର ଭୟାବହତା

ଏହି ଘଟଣା ପୁଣିଥରେ ବ୍ଲୁ ହ୍ୱେଲ୍ (Blue Whale) ଚ୍ୟାଲେଞ୍ଜର ଭୟଙ୍କର ସ୍ମୃତିକୁ ତାଜା କରିଦେଇଛି। ୨୦୧୬-୧୭ ମସିହାରେ ଋଷିଆରୁ ଆରମ୍ଭ ହୋଇଥିବା ଏହି ଗେମ୍ ବିଶ୍ୱବ୍ୟାପୀ ଅନେକ ପିଲାଙ୍କ ଜୀବନ ନେଇଥିଲା। ଏହା କୌଣସି ସାଧାରଣ ଗେମ୍ ନଥିଲା ବରଂ ଏକ ୫୦ ଦିନିଆ ଚ୍ୟାଲେଞ୍ଜ ଥିଲା, ଯେଉଁଥିରେ ଅଂଶଗ୍ରହଣକାରୀଙ୍କୁ ନିଜକୁ କ୍ଷତି ପହଞ୍ଚାଇବା, ନ ଶୋଇବା ଏବଂ ଶେଷରେ ଆତ୍ମହତ୍ୟା କରିବା ଭଳି ମାରାତ୍ମକ ନିର୍ଦ୍ଦେଶ ଦିଆଯାଉଥିଲା। ଭାରତରେ ମଧ୍ୟ ଏହି କାରଣରୁ ଅନେକ ଆତ୍ମହତ୍ୟା ମାମଲା ସାମ୍ନାକୁ ଆସିଥିଲା।

କିକି ଏବଂ ମୋମୋ ଚ୍ୟାଲେଞ୍ଜର ପ୍ରଭାବ

କେବଳ ବ୍ଲୁ ହ୍ୱେଲ୍ ନୁହେଁ, ୨୦୧୮ ମସିହାରେ ‘କିକି ଚ୍ୟାଲେଞ୍ଜ’ ଏବଂ ‘ମୋମୋ ଚ୍ୟାଲେଞ୍ଜ’ ମଧ୍ୟ ବେଶ୍ ଚର୍ଚ୍ଚାରେ ରହିଥିଲା। କିକି ଚ୍ୟାଲେଞ୍ଜରେ ଚଳନ୍ତା ଗାଡ଼ିରୁ ଓହ୍ଲାଇ ଡ୍ୟାନ୍ସ କରିବାକୁ ପଡୁଥିଲା, ଯାହା ଦ୍ୱାରା ଅନେକ ଲୋକ ଦୁର୍ଘଟଣାର ଶିକାର ହୋଇଥିଲେ। ସେହିପରି ମୋମୋ ଚ୍ୟାଲେଞ୍ଜରେ ପିଲାମାନଙ୍କୁ ଭୟଭୀତ କରାଇ ବିଭିନ୍ନ ବିପଜ୍ଜନକ କାର୍ଯ୍ୟ କରିବାକୁ ବାଧ୍ୟ କରାଯାଉଥିଲା।

କିପରି ପରିଚାଳିତ ହୁଏ ଏହି ମାରାତ୍ମକ ଖେଳ?

ଏଭଳି ବିପଜ୍ଜନକ ଗେମ୍ ଗୁଗୁଲ୍ ପ୍ଲେ ଷ୍ଟୋର୍ କିମ୍ବା ଆପ୍ ଷ୍ଟୋର୍‌ରେ ଉପଲବ୍ଧ ହୋଇନଥାଏ। ଏଗୁଡ଼ିକ ମୁଖ୍ୟତଃ ସୋସିଆଲ ମିଡିଆ ଗ୍ରୁପ୍, କମ୍ୟୁନିଟି ପେଜ୍ କିମ୍ବା ବ୍ୟକ୍ତିଗତ ମେସେଜ୍ ଜରିଆରେ ପରିଚାଳିତ ହୁଏ। ଏଥିରେ ପିଲାମାନଙ୍କୁ ମାନସିକ ସ୍ତରରେ ଏପରି ପ୍ରଭାବିତ (Manipulate) କରାଯାଏ ଯେ, ସେମାନେ ଟାସ୍କ ପୂରଣ କରିବା ନିଶାରେ ନିଜ ଜୀବନ ହାରିବାକୁ ମଧ୍ୟ ପଛାନ୍ତି ନାହିଁ। ଅଭିଭାବକମାନେ ପିଲାଙ୍କ ଅନଲାଇନ୍ କାର୍ଯ୍ୟକଳାପ ଉପରେ ନଜର ରଖିବା ନିତାନ୍ତ ଜରୁରୀ।