ଗାଜିଆବାଦର ତିନି ନାବାଳିକା ଭଉଣୀଙ୍କ ଆତ୍ମହତ୍ୟା ଘଟଣା ସମଗ୍ର ଦେଶରେ ଚର୍ଚ୍ଚାର ବିଷୟ ପାଲଟିଛି। ପୋଲିସର ଫୋରେନସିକ ଯାଞ୍ଚରୁ ବର୍ତ୍ତମାନ ଏକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ତଦନ୍ତରୁ ଜଣାପଡିଛି ଯେ ତିନି ଭଉଣୀ ଏକ 'କୋରିଆନ୍ ଗେମ୍' ଏବଂ କୋରିଆନ୍ ସଂସ୍କୃତି ପ୍ରତି ଅତ୍ୟଧିକ ଆକର୍ଷିତ ଥିଲେ। ସେମାନେ ଦିନକୁ ପ୍ରାୟ ୨୦ ଘଣ୍ଟା ମୋବାଇଲ୍ ସ୍କ୍ରିନରେ ବିତାଉଥିଲେ।

ଫୋରେନସିକ ରିପୋର୍ଟରେ ବଡ଼ ଖୁଲାସା

ପୋଲିସ ସୂଚନା ଅନୁଯାୟୀ, ତିନି ଭଉଣୀଙ୍କ ମୋବାଇଲ୍ ଫୋନରୁ ଡିଲିଟ୍ ହୋଇଯାଇଥିବା ଡାଟା ରିକଭର କରାଯାଇଛି। ତଦନ୍ତରୁ ଜଣାପଡିଛି ଯେ ସେମାନେ ନିୟମିତ ଭାବରେ କୋରିଆନ୍, ଚାଇନିଜ୍ ଏବଂ ଜାପାନିଜ୍ ସୋ’ ଦେଖୁଥିଲେ। ଏହା ସହିତ ସେମାନେ କିଛି ଭୟଙ୍କର (Horror) ଗେମ୍ ମଧ୍ୟ ଖେଳୁଥିଲେ, ଯାହାର ଉଲ୍ଲେଖ ସେମାନଙ୍କ ସୁଇସାଇଡ୍ ନୋଟରେ ମଧ୍ୟ ରହିଛି। ପିଲାଙ୍କ ବାପା ଘଟଣାର କିଛି ଦିନ ପୂର୍ବରୁ ଏହି ଫୋନ୍ ଗୁଡ଼ିକୁ ବିକ୍ରି କରିଦେଇଥିଲେ ମଧ୍ୟ ପୋଲିସ ସେଗୁଡିକୁ ଜବତ କରି ତଥ୍ୟ ସଂଗ୍ରହ କରିବାରେ ସଫଳ ହୋଇଛି।

‘କୋରିଆନ୍ ଲଭ୍ ଗେମ୍’ ଏବଂ ୫୦ଟି ଟାସ୍କ

ମୃତକଙ୍କ ବାପାଙ୍କ ଅଭିଯୋଗ ଅନୁଯାୟୀ, ଝିଅମାନେ ଏକ ‘କୋରିଆନ୍ ଲଭ୍ ଗେମ୍’ ଜାଲରେ ଫସି ଯାଇଥିଲେ। ଏହି ଗେମରେ ପ୍ରାୟ ୫୦ଟି ଟାସ୍କ ବା କାର୍ଯ୍ୟ ରହିଥିଲା ଏବଂ ଶେଷ ଟାସ୍କଟି ଆତ୍ମହତ୍ୟା ଥିଲା ବୋଲି ସନ୍ଦେହ କରାଯାଉଛି। ଘଟଣାସ୍ଥଳରୁ ମିଳିଥିବା ଏକ ୯ ପୃଷ୍ଠାର ଡାଏରୀରେ ପିଲାମାନେ କୋରିଆନ୍ ସଂସ୍କୃତିକୁ ନିଜର ‘ପ୍ରକୃତ ଜୀବନ’ ବୋଲି ବର୍ଣ୍ଣନା କରିଛନ୍ତି। ସେମାନେ ଲେଖିଛନ୍ତି ଯେ, "ଆମେ କୋରିଆନ୍‌କୁ ବହୁତ ଭଲପାଉ"।

ମୋବାଇଲ୍ ନିଶା ସାଜିଲା କାଳ

ଗତ ଦୁଇ ବର୍ଷ ଧରି ତିନି ଭଉଣୀ ସ୍କୁଲ ଯାଉନଥିଲେ ଏବଂ ଘର ଭିତରେ ଆବଦ୍ଧ ରହି କେବଳ ମୋବାଇଲରେ ବ୍ୟସ୍ତ ରହୁଥିଲେ। ଯେତେବେଳେ ପରିବାର ଲୋକେ ସେମାନଙ୍କ ମୋବାଇଲ୍ ବ୍ୟବହାର ଉପରେ କଟକଣା ଲଗାଇଲେ ଏବଂ ଫୋନ୍ ଛଡ଼ାଇ ନେଲେ, ସେତେବେଳେ ସେମାନେ ମାନସିକ ଭାବେ ଭାଙ୍ଗି ପଡିଥିଲେ। ଏହି ମାନସିକ ଚାପ ଏବଂ ଗେମ୍‌ର ପ୍ରଭାବ ଯୋଗୁଁ ସେମାନେ ନବମ ମହଲାରୁ ଡେଇଁ ଜୀବନ ହାରିଦେଲେ ବୋଲି ପୋଲିସ ପ୍ରାଥମିକ ତଦନ୍ତରୁ ଅନୁମାନ କରୁଛି।

ଉତ୍ତରପ୍ରଦେଶର ଗାଜିଆବାଦ ସହରରେ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ଏଠାରେ ତିନିଜଣ ନାବାଳିକା ଭଉଣୀ ନବମ ମହଲାରୁ ଡେଇଁ ଆତ୍ମହତ୍ୟା କରିଛନ୍ତି। ଘଟଣାସ୍ଥଳରୁ ମିଳିଥିବା ସୁଇସାଇଡ୍ ନୋଟ୍, ଡାଏରୀ ଏବଂ କାନ୍ଥରେ ଲେଖାଯାଇଥିବା କିଛି ଅଜବ କଥା ଏବେ ପୋଲିସ ପାଇଁ ଚିନ୍ତାର ବିଷୟ ପାଲଟିଛି। ମୃତକଙ୍କ ବାପା ଚେତନ ଏହି ଘଟଣା ପଛରେ ଥିବା କିଛି ଗୁରୁତ୍ୱପୂର୍ଣ୍ଣ ରହସ୍ୟ ଉପରୁ ପରଦା ହଟାଇଛନ୍ତି।

ଅନ୍‌ଲାଇନ୍ ଗେମ୍ ଓ କୋରିଆନ୍ କଲଚର୍‌ର ନିଶା

ଫେବୃଆରୀ ୪, ୨୦୨୬ ରାତି ପ୍ରାୟ ୨ଟା ସମୟରେ ଗାଜିଆବାଦର ଭାରତ ସିଟି ସୋସାଇଟିରେ ଏହି ଘଟଣା ଘଟିଥିଲା। ମୃତ ତିନି ଭଉଣୀ ହେଲେ ନିଶିକା (୧୬), ପ୍ରାଚୀ (୧୪) ଏବଂ ପାଖୀ (୧୨)। ବାପା ଚେତନଙ୍କ କହିବା ଅନୁଯାୟୀ, ତିନି ଭଉଣୀଙ୍କୁ ମୋବାଇଲ୍‌ରେ ଅନ୍‌ଲାଇନ୍ ଗେମ୍ ଖେଳିବାର ଭୟଙ୍କର ନିଶା ଥିଲା। ସେମାନେ କୋରିଆନ୍ ସଂସ୍କୃତି ଦ୍ୱାରା ଅତ୍ୟଧିକ ପ୍ରଭାବିତ ଥିଲେ ଏବଂ ସବୁବେଳେ କୋରିଆ ଯିବା କଥା କହୁଥିଲେ। ଗତ ଦୁଇ ବର୍ଷ ହେଲା ସେମାନେ ସ୍କୁଲ ଯିବା ମଧ୍ୟ ବନ୍ଦ କରିଦେଇଥିଲେ। ପରୀକ୍ଷାରେ ଫେଲ୍ ହେବା ପରେ ସେମାନେ ଘରେ ରହି କେବଳ ମୋବାଇଲ୍‌ରେ ସମୟ ବିତାଉଥିଲେ।

‘ପ୍ରାଚୀ ଥିଲା ବସ୍, ଅନ୍ୟମାନେ ମାନୁଥିଲେ କଥା’

ବାପା ଚେତନ ଆହୁରି ମଧ୍ୟ କହିଛନ୍ତି ଯେ, ତିନି ଭଉଣୀଙ୍କ ମଧ୍ୟରେ ଏକ ଅଦ୍ଭୁତ ବୁଝାମଣା ଥିଲା। ମଝିଆ ଝିଅ ପ୍ରାଚୀ ନିଜକୁ ‘ବସ୍’ ବୋଲି ଭାବୁଥିଲା ଏବଂ ଅନ୍ୟ ଦୁଇ ଭଉଣୀ ତା’ କଥା ମାନୁଥିଲେ। ସେମାନେ ଏକାଠି ଖାଉଥିଲେ, ଏକାଠି ଶୋଉଥିଲେ ଏବଂ ଏପରିକି ଟଏଲେଟ୍ ମଧ୍ୟ ଏକାଠି ଯାଉଥିଲେ। ଘଟଣା ଦିନ ବାପା-ମା’ ଶୋଇବା ପରେ ସେମାନେ ବାହାରୁ କବାଟ ବନ୍ଦ କରି ୯ମ ମହଲାରୁ ଡେଇଁ ପଡିଥିଲେ।

କାନ୍ଥ ଓ ଡାଏରୀରେ ଲେଖାଥିଲା ରହସ୍ୟମୟ କଥା

ପୋଲିସ ତଦନ୍ତ ବେଳେ ଝିଅମାନଙ୍କ ରୁମ୍‌ରୁ ଏକ ଡାଏରୀ ଓ ସୁଇସାଇଡ୍ ନୋଟ୍ ଜବତ କରିଛି। ସୁଇସାଇଡ୍ ନୋଟ୍‌ରେ ଲେଖାଥିଲା, "True Life Story (ଜୀବନର ସତ କାହାଣୀ)... I’m Really Sorry Papa"। ସେହିପରି ଡାଏରୀରେ "We Love Korean Games" ବୋଲି ଉଲ୍ଲେଖ ରହିଛି। ସବୁଠାରୁ ଆଶ୍ଚର୍ଯ୍ୟର କଥା ହେଲା, ସେମାନଙ୍କ ରୁମ୍ କାନ୍ଥରେ ଲେଖାଥିଲା- "Make me a heart of broken. I am very alone"।

ଗାଜିଆବାଦ ଡିସିପି ନିମିଶ ପାଟିଲ କହିଛନ୍ତି ଯେ, ଝିଅମାନଙ୍କର ନିଜର ଫୋନ୍ ନଥିଲା, ସେମାନେ ବାପା-ମା’ଙ୍କ ଫୋନ୍ ବ୍ୟବହାର କରୁଥିଲେ। କିଛି ଦିନ ତଳେ ପରିବାର ଲୋକେ ମୋବାଇଲ୍ ବ୍ୟବହାର ଉପରେ କଟକଣା ଲଗାଇଥିଲେ, ଯାହାକୁ ନେଇ ସେମାନେ ଆହତ ହୋଇଥିଲେ। ବର୍ତ୍ତମାନ ପରିବାରର ମୋବାଇଲ୍ ଫୋନ୍‌ଗୁଡ଼ିକୁ ଫୋରେନସିକ୍ ଯାଞ୍ଚ ପାଇଁ ପଠାଯାଇଛି ଏବଂ ଏହା କୌଣସି ଟାସ୍କ ବେସ୍ଡ ଗେମ୍ (Task-based game) କି ନୁହେଁ, ତାହାର ତଦନ୍ତ ଚାଲିଛି।

ଉତ୍ତରପ୍ରଦେଶର ଗାଜିଆବାଦରୁ ଏକ ଅତ୍ୟନ୍ତ ଦୁଃଖଦ ତଥା ହୃଦୟ ବିଦାରକ ଖବର ସାମ୍ନାକୁ ଆସିଛି। ଏଠାରେ ଏକ ଅନଲାଇନ୍ ଗେମ୍‌ର ନିଶା ତିନିଜଣ ନାବାଳିକା ଭଉଣୀଙ୍କ ଜୀବନ ନେଇଛି। 'କୋରିଆନ୍ ଲଭର୍' ନାମକ ଏକ ଗେମ୍ ଖେଳି ଗୋଟିଏ ପରିବାରର ତିନି ଝିଅ ୯ମ ମହଲାରୁ ଡେଇଁ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ଏହି ଘଟଣା ସମଗ୍ର ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।

ଗାଜିଆବାଦର ଟିଲା ମୋଡ୍ ଥାନା ଅନ୍ତର୍ଗତ ଭାରତ ସିଟିରେ ଏହି ଅଭାବନୀୟ ଘଟଣା ଘଟିଛି। ସୂଚନା ଅନୁଯାୟୀ, ଚେତନ କୁମାରଙ୍କ ତିନି ଝିଅ ନିଶିକା (୧୬), ପ୍ରାଚୀ (୧୪) ଏବଂ ପାଖୀ (୧୨) ବିଳମ୍ବିତ ରାତି ପ୍ରାୟ ୨:୩୦ ସମୟରେ ନିଜ ଆପାର୍ଟମେଣ୍ଟର ୯ମ ମହଲାରୁ ତଳକୁ ଡେଇଁ ପଡିଥିଲେ। ଶବ୍ଦ ଶୁଣି ଲୋକମାନେ ଦୌଡ଼ି ଆସିଥିଲେ ଏବଂ ରକ୍ତ ଜୁଡୁବୁଡୁ ଅବସ୍ଥାରେ ତିନି ଭଉଣୀଙ୍କୁ ଉଦ୍ଧାର କରି ହସ୍ପିଟାଲ ନେଇଥିଲେ, କିନ୍ତୁ ଡାକ୍ତର ସେଠାରେ ସେମାନଙ୍କୁ ମୃତ ଘୋଷଣା କରିଥିଲେ।

କ’ଣ ଏହି 'କୋରିଆନ୍ ଲଭର୍' ଗେମ୍?

ପ୍ରାଥମିକ ତଦନ୍ତରୁ ଜଣାପଡିଛି ଯେ ତିନି ଭଉଣୀ 'କୋରିଆନ୍ ଲଭର୍' (Korean Lover) ନାମକ ଏକ ଅନଲାଇନ୍ ଟାସ୍କ-ବେସ୍ଡ ଗେମ୍‌ ଖେଳୁ ଥିଲେ। ମୃତକଙ୍କ ବାପାଙ୍କ କହିବା ଅନୁଯାୟୀ, ଏହି ଗେମ୍‌ରେ ମୋଟ ୫୦ଟି ଟାସ୍କ ରହିଥିଲା। ଘଟଣା ଦିନ ପିଲାମାନଙ୍କର ଶେଷ ଟାସ୍କ ଥିଲା, ଯାହାକୁ ପୂରଣ କରିବା ପାଇଁ ସେମାନେ ଏଭଳି ଚରମ ପଦକ୍ଷେପ ନେଇଥିଲେ। ବାଲକୋନିରୁ ଡେଇଁବା ପାଇଁ ସେମାନେ ଏକ ଛୋଟ ସିଡ଼ିର ମଧ୍ୟ ବ୍ୟବହାର କରିଥିଲେ।

ସୁଇସାଇଡ୍ ନୋଟ୍ ଏବଂ ପୋଲିସ ତଦନ୍ତ

ଘଟଣାସ୍ଥଳରୁ ପୋଲିସକୁ ଏକ ସୁଇସାଇଡ୍ ନୋଟ୍ ମିଳିଛି, ଯେଉଁଥିରେ କେବଳ 'ମମି ପାପା ସରି' ଲେଖାଯାଇଛି। ଏଥିରୁ ପିଲାମାନଙ୍କ ଉପରେ ଥିବା ମାନସିକ ଚାପ ସ୍ପଷ୍ଟ ବାରି ହୋଇପଡୁଛି। ଏସିପି ଅତୁଲ କୁମାର କହିଛନ୍ତି ଯେ ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି ଏବଂ ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି ଯାଞ୍ଚ ଆରମ୍ଭ କରିଛି। ପିଲାମାନେ ବ୍ୟବହାର କରୁଥିବା ମୋବାଇଲ୍ ଫୋନ୍‌ଗୁଡ଼ିକୁ ଜବତ କରାଯାଇ ଡିଜିଟାଲ୍ ଯାଞ୍ଚ ପାଇଁ ପଠାଯାଇଛି, ଯାହା ଦ୍ୱାରା ଏହି ରହସ୍ୟମୟ ଗେମ୍ ବିଷୟରେ ଅଧିକ ତଥ୍ୟ ମିଳିପାରିବ।

ଉତ୍ତରପ୍ରଦେଶର ଗାଜିଆବାଦ ସ୍ଥିତ ଭାରତ ସିଟି ସୋସାଇଟିରେ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ଏଠାରେ ତିନି ନାବାଳିକା ଭଉଣୀ ଏକାସାଙ୍ଗରେ ୯ ମହଲାରୁ ଡେଇଁ ଆତ୍ମହତ୍ୟା କରିଛନ୍ତି। ପୋଲିସ ଘଟଣାସ୍ଥଳରୁ ଏକ ଡାଏରୀ ଜବତ କରିଛି, ଯେଉଁଥିରେ ମୃତ୍ୟୁ ପୂର୍ବରୁ ଲେଖାଯାଇଥିବା କିଛି ଚାଞ୍ଚଲ୍ୟକର ତଥ୍ୟ ରହିଛି।

ଡାଏରୀରେ ଲେଖାଥିଲା ‘True Life Story’

ଘଟଣାସ୍ଥଳରୁ ମିଳିଥିବା ଡାଏରୀରେ ପିଲାମାନେ ଲେଖିଥିଲେ, "True Life Story… Read Now"। ଏଥିରେ କାନ୍ଦୁଥିବା ଆଖିର ଚିତ୍ର ଅଙ୍କାଯାଇଥିଲା ଏବଂ ସେମାନେ ନିଜ ବାପା-ମା’ଙ୍କୁ କ୍ଷମା ମାଗି ଲେଖିଥିଲେ, "I’m Really Sorry Papa… I Love You"। ଡାଏରୀର ପୃଷ୍ଠାରେ 'କୋରିଆନ୍ ଗେମ୍ସ' ବିଷୟରେ ମଧ୍ୟ ଉଲ୍ଲେଖ ରହିଛି, ଯାହା କୌଣସି ଅନଲାଇନ୍ ଟାସ୍କ ବା ଗଭୀର ମାନସିକ ଚାପ ଆଡକୁ ଇଙ୍ଗିତ କରୁଛି।

ମୋବାଇଲ୍ ନିଶା ସାଜିଲା କାଳ?

ଗାଜିଆବାଦ ଡିସିପି ନିମିଶ ପାଟିଲଙ୍କ ସୂଚନା ଅନୁଯାୟୀ, ମୃତ ତିନି ଭଉଣୀ ନିଶିକା (୧୬), ପ୍ରାଚୀ (୧୪) ଏବଂ ପାଖୀ (୧୨) ମୋବାଇଲ୍ ଗେମ୍‌ର ଘୋର ନିଶାରେ ଥିଲେ। ନିଜର ଫୋନ୍ ନଥିବାରୁ ସେମାନେ ବାପା-ମା’ଙ୍କ ଫୋନ୍ ବ୍ୟବହାର କରୁଥିଲେ। ପାଠପଢ଼ାରେ ବ୍ୟାଘାତ ହେବାରୁ ପରିବାର ଲୋକେ ମୋବାଇଲ୍ ବ୍ୟବହାର ଉପରେ କଟକଣା ଲଗାଇଥିଲେ, ଯାହା ସେମାନଙ୍କୁ ଗଭୀର ଆଘାତ ଦେଇଥିଲା ବୋଲି ପୋଲିସ ସନ୍ଦେହ କରୁଛି।

ଜୀବନ ଓ ମୃତ୍ୟୁର ସାଥୀ

ପଡ଼ୋଶୀ ଏବଂ ପରିଜନଙ୍କ କହିବା ମୁତାବକ, ତିନି ଭଉଣୀ ପରସ୍ପରର ଖୁବ୍ ନିକଟତର ଥିଲେ। ଖାଇବା, ଶୋଇବା, ସ୍କୁଲ ଯିବା ଭଳି ସବୁ କାମ ସେମାନେ ଏକାଠି କରୁଥିଲେ। ଶେଷରେ ମୃତ୍ୟୁର ରାସ୍ତା ମଧ୍ୟ ସେମାନେ ଏକାଠି ବାଛିଥିଲେ। ରାତି ପ୍ରାୟ ୨ଟା ସମୟରେ ଫ୍ଲାଟ୍ ନମ୍ବର ୯୦୭ର ବାଲକୋନିରୁ ତିନିହେଁ ଏକାସାଙ୍ଗରେ ତଳକୁ ଡେଇଁ ପଡ଼ିଥିଲେ।

ପାରିବାରିକ ସ୍ଥିତି ଓ ତଦନ୍ତ

ମୃତକଙ୍କ ବାପା ଚେତନ କୁମାର ଅନଲାଇନ୍ ଟ୍ରେଡିଂ କାମ କରନ୍ତି। ସେ ଦୁଇଜଣ ସଗା ଭଉଣୀଙ୍କୁ ବିବାହ କରିଥିଲେ ଏବଂ ଗତ ୪ ବର୍ଷ ହେଲା ସମସ୍ତେ ଏକାଠି ରହୁଥିଲେ। ପୋଲିସ ବର୍ତ୍ତମାନ ପରିବାରର ମୋବାଇଲ୍ ଫୋନ୍ ଜବତ କରି ଫୋରେନ୍ସିକ୍ ଯାଞ୍ଚ ପାଇଁ ପଠାଇଛି। କୌଣସି 'ଟାସ୍କ ବେସ୍‌ଡ କୋରିଆନ୍ ଗେମ୍' ଏହି ଆତ୍ମହତ୍ୟା ପଛର ପ୍ରକୃତ କାରଣ କି ନାହିଁ, ତାହା ରିପୋର୍ଟ ଆସିବା ପରେ ସ୍ପଷ୍ଟ ହେବ।