କୋରାପୁଟ: କୋରାପୁଟ ଜିଲ୍ଲା ଲାମତାପୁଟ ବ୍ଲକ ଅନ୍ତର୍ଗତ ଗୁଣେଇପଡ଼ା ଅଞ୍ଚଳରେ ଏକ ବିରାଟ ଭାଲୁ ବୁଲୁଥିବା ଦେଖିବାକୁ ମିଳିଛି। ସ୍ଥାନୀୟ ଏକ ସ୍କୁଲ ପରିସର ଏବଂ ନିକଟସ୍ଥ ଗାଁରେ ଭାଲୁଟି ପଶିଯିବା କାରଣରୁ ଛାତ୍ରଛାତ୍ରୀ, ଶିକ୍ଷକ ଏବଂ ଅଭିଭାବକମାନଙ୍କ ମଧ୍ୟରେ କୋକୂଆ ଭୟ ଖେଳିଯାଇଛି।

ସୂଚନା ଅନୁଯାୟୀ, ଗାଁର କିଛି ଲୋକ ସ୍କୁଲ ବାରଣ୍ଡାରେ ଭାଲୁଟିକୁ ଶୋଇଥିବାର ଦେଖିବାକୁ ପାଇଥିଲେ। ପ୍ରାୟ ଘଣ୍ଟାଏ କାଳ ଭାଲୁଟି ସ୍କୁଲର ରୋଷେଇ ଘର ଏବଂ ଖେଳ ପଡ଼ିଆରେ ବୁଲିଥିଲା। ପରେ ସ୍ଥାନୀୟ ଲୋକଙ୍କ ସହାୟତାରେ ଭାଲୁଟିକୁ ଜଙ୍ଗଲ ଆଡ଼କୁ ଘଉଡ଼ାଇ ଦିଆଯାଇଥିଲା। ଲୋକେ ପାଟିତୁଣ୍ଡ କରିବାରୁ ଭାଲୁଟି ଜଙ୍ଗଲକୁ ପଳାଇଥିଲା, ମାତ୍ର ସନ୍ଧ୍ୟା ସମୟରେ ପୁଣି ଗାଁ ଆଡ଼କୁ ଫେରିଆସିଥିବା ସ୍ଥାନୀୟ ଲୋକେ ପ୍ରକାଶ କରିଛନ୍ତି।

ସୌଭାଗ୍ୟବଶତଃ ଭାଲୁଟି କାହାର କିଛି କ୍ଷତି କରିନାହିଁ। ଏହା ଏକ ପୋଷା ଭାଲୁ ହୋଇଥାଇପାରେ ବୋଲି ମଧ୍ୟ କିଛି ଲୋକ ସନ୍ଦେହ କରୁଛନ୍ତି। ତେବେ ଏହି ଘଟଣାକୁ ନେଇ ଅଭିଭାବକମାନେ ନିଜ ପିଲାଙ୍କ ସୁରକ୍ଷାକୁ ନେଇ ଖୁବ୍ ଚିନ୍ତିତ ହୋଇପଡ଼ିଛନ୍ତି।

ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ସ୍କୁଲ ଚାରିପଟେ କୌଣସି ସୀମା ପ୍ରାଚୀର ବା ପାଚେରୀ ନଥିବାରୁ ବନ୍ୟଜନ୍ତୁମାନେ ବାରମ୍ବାର ଏବଂ ଅତି ସହଜରେ ସ୍କୁଲ ପରିସରରେ ପ୍ରବେଶ କରୁଛନ୍ତି। ଏହାଦ୍ୱାରା ସ୍କୁଲରେ ପଢୁଥିବା ଛୋଟ ଛୋଟ ପିଲାଙ୍କ ଜୀବନ ପ୍ରତି ବିପଦ ଦେଖାଦେଉଛି।

ଏହି ଘଟଣା ସମ୍ପର୍କରେ ପ୍ରତିକ୍ରିୟା ରଖି ସ୍କୁଲର ପ୍ରଧାନଶିକ୍ଷକ କହିଛନ୍ତି ଯେ, "ବର୍ତ୍ତମାନ ସମସ୍ତ ପିଲା ସୁରକ୍ଷିତ ଅଛନ୍ତି। ଆମେ ଏହି ସମସ୍ୟା ନେଇ ବନ ବିଭାଗ ଏବଂ ପ୍ରଶାସନକୁ ଲିଖିତ ଭାବେ ଅବଗତ କରାଇବୁ।"

ଅନ୍ୟପକ୍ଷରେ, ଘଟଣା ସମ୍ପର୍କରେ ଖବର ପାଇବା ପରେ ଲାମତାପୁଟ ବନାଞ୍ଚଳ ଅଧିକାରୀ (Forest Range Officer) କହିଛନ୍ତି ଯେ, ବନ ବିଭାଗର ଏକ ଟିମ୍‌କୁ ଘଟଣାସ୍ଥଳକୁ ପଠାଯାଇଛି ଏବଂ ଖୁବ୍‌ଶୀଘ୍ର ଏହି ସମସ୍ୟାର ସମାଧାନ କରାଯିବ।

ନୂଆପଡ଼ା: ସାବଧାନ ! ରାସ୍ତାରେ ବୁଲୁଛି ବାଘ । ଓଡ଼ିଶାର ନୂଆପଡ଼ା ଜିଲ୍ଲା ଅନ୍ତର୍ଗତ ସୁନାବେଡ଼ା ବନ୍ୟପ୍ରାଣୀ ଅଭୟାରଣ୍ୟରେ ଦେଖିବାକୁ ମିଳିଛି ଦୁଇଟି କଲରାପତରିଆ ବାଘ । ସୋମବାର ସନ୍ଧ୍ୟା ସମୟରେ ଏକ ବ୍ୟସ୍ତବହୁଳ ଜଙ୍ଗଲ ରାସ୍ତା କଡ଼ରେ ଦୁଇଟି କଲରାପତରିଆ ବାଘ ବୁଲୁଥିବାର ଦେଖିବାକୁ ମିଳିଥିଲା। ବାଘ ବୁଲୁଥିବା ଦେଖି ସ୍ଥାନୀୟ ଲୋକେ ଆତଙ୍କିତ ହୋଇପଡିଛନ୍ତି। ଏହି ରାସ୍ତାଦେଇ ଯାତାୟାତ କରିବା ପାଇଁ ଲୋକେ ଭୟ କରୁଛନ୍ତି ।

ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁଯାୟୀ, କିଛି ଯୁବକ ସୁନାବେଡ଼ାରୁ ଜାମଗାଁ ଅଭିମୁଖେ ଯାଉଥିବା ସମୟରେ ହଠାତ୍ ରାସ୍ତା କଡ଼ରେ ଦୁଇଟି କଲରାପତରିଆ ବାଘଙ୍କୁ ଦେଖିବାକୁ ପାଇଥିଲେ। ସେମାନଙ୍କ ମଧ୍ୟରୁ ଗୋଟିଏ ବାଘ ରାସ୍ତା କଡ଼ରେ କିଛି ସମୟ ରହିଥିଲା, ଯାହାର ସ୍ପଷ୍ଟ ଭିଡିଓ ଯାତ୍ରୀମାନେ ନିଜ ମୋବାଇଲ୍ ଫୋନ୍‌ରେ କଏଦ କରିବାରେ ସକ୍ଷମ ହୋଇଥିଲେ। ତେବେ ସନ୍ଧ୍ୟା ସମୟର ଅନ୍ଧକାରର ସୁଯୋଗ ନେଇ ଅନ୍ୟ ବାଘଟି ଘଞ୍ଚ ଜଙ୍ଗଲ ଭିତରକୁ ଅଦୃଶ୍ୟ ହୋଇଯାଇଥିଲା। 

ସୁନାବେଡ଼ା ଅଭୟାରଣ୍ୟ ପୂର୍ବରୁ ମଧ୍ୟ କଲରାପତରିଆ ବାଘଙ୍କ ବାସସ୍ଥଳୀ ଭାବେ ବେଶ୍ ଜଣାଶୁଣା। ନିକଟରେ କରାଯାଇଥିବା କ୍ୟାମେରା ଟ୍ରାପ୍ ସର୍ଭେରୁ ଏଠାରେ ବହୁ ସଂଖ୍ୟାରେ କଲରାପତରିଆ ବାଘ ଥିବା ସ୍ପଷ୍ଟ ହୋଇଥିଲା। ତେବେ ସାଧାରଣ ରାସ୍ତା କଡ଼ରେ ଏକାସାଙ୍ଗରେ ଦୁଇଟି ବାଘ ଦେଖାଯିବା ଏକ ବିରଳ ଘଟଣା ବୋଲି ବିବେଚନା କରାଯାଉଛି। ଏହି ଘଟଣା ପରେ ଜଙ୍ଗଲ ରାସ୍ତାରେ ଯାତାୟାତ କରୁଥିବା ପର୍ଯ୍ୟଟକ ଓ ସ୍ଥାନୀୟ ଲୋକଙ୍କୁ ସତର୍କତା ଅବଲମ୍ବନ କରିବାକୁ ପ୍ରଶାସନ ଓ ବନ୍ୟପ୍ରାଣୀ ସଂରକ୍ଷଣକାରୀଙ୍କ ପକ୍ଷରୁ ପରାମର୍ଶ ଦିଆଯାଇଛି। 

କେନ୍ଦ୍ରାପଡ଼ା: କେନ୍ଦ୍ରାପଡ଼ା ଜିଲ୍ଲାର ବନ୍ୟା ପ୍ରଭାବିତ ଅଞ୍ଚଳରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ସୋମବାର ଭୋର ସମୟରେ ନଦୀରେ ଗାଧୋଉଥିବା ବେଳେ ଜଣେ ୪୬ ବର୍ଷୀୟା ମହିଳାଙ୍କୁ କୁମ୍ଭୀର ଟାଣି ନେଇଥିବା ଅଭିଯୋଗ ହୋଇଛି। ମିଳିଥିବା ସୂଚନା ଅନୁଯାୟୀ, ଏହି ଘଟଣାଟି ଆଳପୁଆ ପଞ୍ଚାୟତର ଦାମଦରପାଟଣା ଗାଁରେ ଘଟିଛି। ଗତ ଏକ ସପ୍ତାହ ଧରି ଏହି ଅଞ୍ଚଳ ବନ୍ୟା ଜଳରେ ଜଳମଗ୍ନ ରହିଛି। ନିଖୋଜ ମହିଳାଙ୍କ ନାମ ସୁଚିତ୍ରା ଦାସ ବୋଲି ଜଣାପଡ଼ିଛି। ଭୋର ସମୟରେ ସେ ନିକଟସ୍ଥ ନଦୀକୁ ଗାଧୋଇବାକୁ ଯାଇଥିବା ବେଳେ ହଠାତ୍ ଏକ କୁମ୍ଭୀର ତାଙ୍କୁ ଆକ୍ରମଣ କରି ପାଣି ଭିତରକୁ ଟାଣି ନେଇଥିଲା। ଘଟଣାସ୍ଥଳରୁ ଅର୍ଥାତ୍ ନଦୀ କୂଳରୁ ତାଙ୍କର ଚପଲ, ଟର୍ଚ୍ଚ, ମୋବାଇଲ୍ ଫୋନ୍ ଏବଂ ସାବୁନ୍ ଉଦ୍ଧାର କରାଯାଇଛି।

ଖବର ପାଇବା ମାତ୍ରେ ପଟ୍ଟାମୁଣ୍ଡାଇ ଅଗ୍ନିଶମ ବାହିନୀର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ନଦୀରେ ସର୍ଚ୍ଚ ଅପରେସନ୍ ଆରମ୍ଭ କରିଛନ୍ତି। ତେବେ ଖବର ଲେଖାହେବା ସୁଦ୍ଧା ମହିଳାଙ୍କର କୌଣସି ପତ୍ତା ମିଳିପାରି ନାହିଁ।

ଅନ୍ୟପକ୍ଷରେ, ବନ୍ୟା ସମୟରେ ବନ୍ୟଜନ୍ତୁଙ୍କ ବାରମ୍ବାର ଆକ୍ରମଣକୁ ନେଇ ସ୍ଥାନୀୟ ଲୋକେ ତୀବ୍ର ଅସନ୍ତୋଷ ବ୍ୟକ୍ତ କରିଛନ୍ତି। ସେମାନଙ୍କ ଅଭିଯୋଗ ଅନୁଯାୟୀ, ବାରମ୍ବାର ଦାବି ସତ୍ତ୍ୱେ ବନ ବିଭାଗ ପକ୍ଷରୁ ବିପଦସଙ୍କୁଳ ଗ୍ରାମଗୁଡ଼ିକରେ କୌଣସି ସଚେତନତା କାର୍ଯ୍ୟକ୍ରମ କିମ୍ବା ଆବଶ୍ୟକୀୟ ପ୍ରତିଷେଧକ ମୂଳକ ପଦକ୍ଷେପ ଗ୍ରହଣ କରାଯାଇନାହିଁ। ପୂର୍ବରୁ କେନ୍ଦ୍ରାପଡ଼ା ଜିଲ୍ଲାପାଳ ବନ୍ୟା ପ୍ରଭାବିତ ଅଞ୍ଚଳ ପରିଦର୍ଶନରେ ଆସିଥିବା ବେଳେ ଲୋକେ ଏହି ସମସ୍ୟା ସମ୍ପର୍କରେ ତାଙ୍କୁ ଅବଗତ କରାଇଥିଲେ। ସେତେବେଳେ ଜିଲ୍ଲାପାଳ ବନ ବିଭାଗ ପକ୍ଷରୁ ସଚେତନତା କାର୍ଯ୍ୟକ୍ରମ କରାଯିବ ବୋଲି ପ୍ରତିଶ୍ରୁତି ଦେଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ପଦକ୍ଷେପ ନିଆଯାଇ ନଥିବା ଗ୍ରାମବାସୀ ଅଭିଯୋଗ କରିଛନ୍ତି।

କେଦ୍ରାପଡା: ପର୍ଯ୍ୟଟକଙ୍କ ପାଇଁ ଏକ ଖୁସି ଖବର। ବିଶ୍ୱ ପ୍ରସିଦ୍ଧ ଭିତରକନିକା ଜାତୀୟ ଉଦ୍ୟାନ ଆଜିଠାରୁ ଦେଶ ବିଦେଶର ପର୍ଯ୍ୟଟକଙ୍କ ପାଇଁ ପୁଣି ଥରେ ଖୋଲିଛି। ବଉଳା କୁମ୍ଭୀରମାନଙ୍କ ପ୍ରଜନନ ଋତୁକୁ ଦୃଷ୍ଟିରେ ରଖି ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ମେ ୧ ତାରିଖରୁ ଜୁଲାଇ ୩୧ ତାରିଖ ପର୍ଯ୍ୟନ୍ତ ଦୀର୍ଘ ତିନି ମାସ ଧରି ବନ୍ଦ ରଖାଯାଇଥିଲା। ଏହି ସମୟରେ ମାଈ କୁମ୍ଭୀରମାନେ ନଦୀ ଏବଂ ନାଳ କୂଳରେ ସେମାନଙ୍କର ବସାକୁ ଜଗି ରହିବା ସହ ବେଶ୍ ଆକ୍ରମଣାତ୍ମକ ହୋଇପଡ଼ନ୍ତି। ତେଣୁ କୁମ୍ଭୀରମାନଙ୍କର ନିରାପଦ ପ୍ରଜନନକୁ ସୁନିଶ୍ଚିତ କରିବା ଏବଂ ପର୍ଯ୍ୟଟକମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ଜଙ୍ଗଲ ବିଭାଗ ପକ୍ଷରୁ ପ୍ରବେଶ ଉପରେ କଟକଣା ଲଗାଯାଇଥିଲା।

ଆଜିଠାରୁ ପ୍ରଜନନ ଋତୁ ଶେଷ ହେବା ସହ ଭିତରକନିକା ଜାତୀୟ ଉଦ୍ୟାନରେ ପର୍ଯ୍ୟଟକମାନଙ୍କ ପାଇଁ ଉଦ୍ଦିଷ୍ଟ ସମସ୍ତ ସୁବିଧା, ଯେପରିକି ବୋଟ୍ ସେବା, ୱାଚ୍ ଟାୱାର ଏବଂ ପ୍ରବେଶ ଦ୍ୱାର ସ୍ୱାଭାବିକ ଭାବରେ କାର୍ଯ୍ୟକ୍ଷମ ହୋଇଛି। ତେବେ ପାର୍କ ଭିତରକୁ ପ୍ରବେଶ କରିବାକୁ ଚାହୁଁଥିବା ପର୍ଯ୍ୟଟକଙ୍କ ପାଇଁ ଏକ ନୂଆ ନିୟମ କଡ଼ାକଡ଼ି କରାଯାଇଛି। ସମସ୍ତ ପର୍ଯ୍ୟଟକ ନିଜ ସାଥୀରେ ଏକ ବୈଧ ପରିଚୟ ପତ୍ର (Identity Proof) ରଖିବା ବାଧ୍ୟତାମୂଳକ କରାଯାଇଛି। ବିନା ପରିଚୟ ପତ୍ରରେ ପାର୍କ ମଧ୍ୟକୁ ପ୍ରବେଶ ଅନୁମତି ମିଳିବ ନାହିଁ ବୋଲି ସୂଚନା ଦିଆଯାଇଛି।

ଛତିଶଗଡ଼ର ଏକ ଗାଁରେ ମଣିଷ ଏବଂ ଏକ ହିଂସ୍ର ଜଳଚର ପ୍ରାଣୀ ମଧ୍ୟରେ ଥିବା ନିଆରା ସମ୍ପର୍କ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। କୁମ୍ଭୀର ନାଁ ଶୁଣିଲେ ସାଧାରଣତଃ ଲୋକଙ୍କ ମନରେ ଭୟ ସୃଷ୍ଟି ହୋଇଥାଏ, କିନ୍ତୁ ଛତିଶଗଡ଼ ରାଜ୍ୟର ବେମେତରା ଜିଲ୍ଲା ଅନ୍ତର୍ଗତ ବାୱା ମୋହତରା ଗ୍ରାମବାସୀଙ୍କ ପାଇଁ କୁମ୍ଭୀର କୌଣସି ହିଂସ୍ର ଜନ୍ତୁ ନୁହେଁ, ବରଂ ପରିବାରର ଜଣେ ସଦସ୍ୟ ଥିଲା। ଏହି କୁମ୍ଭୀରର ନାମ ଥିଲା ଗଙ୍ଗାରାମ।

ମଣିଷ ଓ ବନ୍ୟଜନ୍ତୁ ସମ୍ପର୍କର ନିଆରା ଉଦାହରଣ

ବାୱା ମୋହତରା ଗାଁର ଏକ ପୋଖରୀରେ ରହୁଥିବା ଏହି କୁମ୍ଭୀର ସହିତ ଲୋକଙ୍କର ଖୁବ୍ ନିବିଡ଼ ସମ୍ପର୍କ ଥିଲା। ଗ୍ରାମବାସୀଙ୍କ କହିବା ଅନୁଯାୟୀ, ଗଙ୍ଗାରାମ ପ୍ରାୟ ୧୩୦ ବର୍ଷ ଧରି ସେହି ଗୋଟିଏ ପୋଖରୀରେ ବାସ କରୁଥିଲା। ଏହି ଦୀର୍ଘ ସମୟ ମଧ୍ୟରେ ଗାଁର ଅନେକ ପିଢ଼ି ବଦଳି ଯାଇଥିଲା, କିନ୍ତୁ ଗଙ୍ଗାରାମ ସେଠାରେ ରହି ଲୋକଙ୍କ ସହ ଏକ ଅତୁଟ ବିଶ୍ୱାସ ଗଢ଼ି ତୋଳିଥିଲା। ଆଶ୍ଚର୍ଯ୍ୟର କଥା ହେଉଛି, ଏତେ ବର୍ଷ ମଧ୍ୟରେ ସେ କେବେବି କୌଣସି ମଣିଷ କିମ୍ବା ଗୃହପାଳିତ ପଶୁଙ୍କ ଉପରେ ଆକ୍ରମଣ କରିନଥିଲା।

ପରିବାରର ସଦସ୍ୟ ସାଜିଥିଲା 'ଗଙ୍ଗାରାମ'

ସାଧାରଣତଃ କୁମ୍ଭୀର ଥିବା ପୋଖରୀକୁ ଯିବାକୁ ଲୋକେ ଭୟ କରିଥାନ୍ତି। କିନ୍ତୁ ଏହି ଗାଁର ମହିଳାମାନେ ନିର୍ଭୟରେ ସେହି ପୋଖରୀରେ ଲୁଗା ସଫା କରିବା ସହ ପାଣି ଆଣୁଥିଲେ। ଛୋଟ ପିଲାମାନେ ପୋଖରୀ କୂଳରେ ଖେଳୁଥିଲେ ଏବଂ ଚାଷୀମାନେ ନିଜ ଗୋରୁଗାଈଙ୍କୁ ସେଠାରେ ପାଣି ପିଆଉଥିଲେ। ଗଙ୍ଗାରାମ ପାଖରେ ପହଁରୁଥିଲେ ମଧ୍ୟ କେବେ କାହାର କୌଣସି କ୍ଷତି କରିନଥିଲା। ଶାନ୍ତ ସ୍ୱଭାବର ଏହି କୁମ୍ଭୀର କେବଳ ଗାଁ ନୁହେଁ, ବରଂ ଆଖପାଖ ଅଞ୍ଚଳ ପାଇଁ ମଧ୍ୟ ଏକ ଚର୍ଚ୍ଚାର ବିଷୟ ପାଲଟିଥିଲା। ଗ୍ରାମବାସୀ ତାକୁ ଗାଁର ରକ୍ଷକ ବୋଲି ମାନୁଥିଲେ।

ମୃତ୍ୟୁରେ ସ୍ତବ୍ଧ ହୋଇଥିଲା ପୂରା ଗାଁ, ଜଳି ନଥିଲା ଚୁଲି

ବର୍ଷ ୨୦୧୯ରେ ପ୍ରାୟ ୨୫୦ କିଲୋଗ୍ରାମ ଓଜନ ଏବଂ ୩.୪ ମିଟର ଲମ୍ବର ଏହି ବିଶାଳ କୁମ୍ଭୀରର ପ୍ରାକୃତିକ କାରଣରୁ ମୃତ୍ୟୁ ହୋଇଥିଲା। ତା'ର ମୃତ୍ୟୁ ଖବର ପୂରା ଗାଁକୁ ଶୋକସାଗରରେ ଭସାଇ ଦେଇଥିଲା। ମୃତ୍ୟୁର ଶୋକ ଏତେ ଗଭୀର ଥିଲା ଯେ, ସେଦିନ ଗାଁର କୌଣସି ଘରେ ଚୁଲି ଜଳି ନଥିଲା। ପ୍ରାୟ ୫୦୦ରୁ ଅଧିକ ଲୋକ ଏକାଠି ହୋଇ ଏକ ଟ୍ରାକ୍ଟରକୁ ଫୁଲରେ ସଜାଇ ଗଙ୍ଗାରାମର ଶେଷ ଯାତ୍ରା ବାହାର କରିଥିଲେ ଏବଂ ସମ୍ପୂର୍ଣ୍ଣ ରୀତିନୀତି ସହ ତାର ଶେଷକୃତ୍ୟ ସମ୍ପନ୍ନ କରିଥିଲେ। ପରବର୍ତ୍ତୀ ସମୟରେ ପୋଖରୀ କୂଳରେ ତାର ଏକ ସ୍ମୃତିପୀଠ ମଧ୍ୟ ନିର୍ମାଣ କରାଯାଇଥିଲା। ଏବେ ଗଙ୍ଗାରାମ ଓ ଗ୍ରାମବାସୀଙ୍କ ଏହି ଅନନ୍ୟ ବନ୍ଧୁତାର କାହାଣୀ ପିଲାଙ୍କ ବହିରେ ସ୍ଥାନ ପାଇବାକୁ ଯାଉଛି।

ଗଞ୍ଜାମ: ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅନ୍ତର୍ଗତ ଜରଡ଼ା ଗାଁ ନିକଟରେ ଏକ ଗଛରେ ଝୁଲନ୍ତା ଅବସ୍ଥାରେ ଏକ କଲରାପତରିଆ ବାଘର ମୃତଦେହ ଉଦ୍ଧାର କରାଯାଇଛି। ବାଘଟିର କିପରି ମୃତ୍ୟୁ ଘଟିଲା, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇପାରି ନାହିଁ। ସ୍ଥାନୀୟ ଲୋକମାନେ ପ୍ରଥମେ ଗଛରେ ଏହି ବାଘର ମୃତଦେହଟିକୁ ଝୁଲୁଥିବାର ଦେଖିଥିଲେ। ଏହା ପରେ ସେମାନେ ତୁରନ୍ତ ସ୍ଥାନୀୟ ପୋଲିସ ଏବଂ ବନ ବିଭାଗ ଅଧିକାରୀଙ୍କୁ ଖବର ଦେଇଥିଲେ। ସୂଚନା ପାଇବା ମାତ୍ରେ ପ୍ରଶାସନିକ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ।

ଘଟଣାସ୍ଥଳରେ କବିସୂର୍ଯ୍ୟନଗର ପୋଲିସ ଏବଂ ପୋଲସରା ବନ ବିଭାଗର ଅଧିକାରୀମାନେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ମୃତଦେହକୁ ଜବତ କରାଯାଇ ବ୍ୟବଚ୍ଛେଦ ପାଇଁ ପଠାଯାଇଛି। ଏହା ଏକ ଶିକାର ଜନିତ ହତ୍ୟାକାଣ୍ଡ ନା ଏହା ପଛରେ ଅନ୍ୟ କୌଣସି କାରଣ ରହିଛି, ସେ ନେଇ ବନ ବିଭାଗ ଅଧିକାରୀମାନେ ଅନୁସନ୍ଧାନ କରୁଛନ୍ତି। ବନ ବିଭାଗ ସ୍ପଷ୍ଟ କରିଛି ଯେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ଏବଂ ଯଦି ଏଥିରେ କାହାର ସମ୍ପୃକ୍ତି ଥିବା ପ୍ରମାଣିତ ହୁଏ, ତେବେ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ମହାରାଷ୍ଟ୍ର: ବାଘ ଆକ୍ରମଣରେ ୪ ମହିଳା ମୃତ । କେନ୍ଦୁପତ୍ର ସଂଗ୍ରହ ପାଇଁ ଜଙ୍ଗଲକୁ ଯାଇଥିବା ବେଳେ ଆକ୍ରମଣ କଲା ବାଘ । ମହାରାଷ୍ଟ୍ରର ଚନ୍ଦ୍ରପୁର ଜିଲ୍ଲାରେ ଜଙ୍ଗଲକୁ କେନ୍ଦୁ ପତ୍ର ସଂଗ୍ରହ କରିବାକୁ ଯାଇଥିବା ୪ ଜଣ ମହିଳାଙ୍କୁ ଗୋଟିଏ ବାଘ ଆକ୍ରମଣ କରି ମାରିଦେଇଥିବା ନେଇ ବନ ବିଭାଗ ଅଧିକାରୀ ସୂଚନା ଦେଇଛନ୍ତି। ବାଘ ଆତଙ୍କ ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି ।

ଏହି ଆକ୍ରମଣ ଜିଲ୍ଲା ମୁଖ୍ୟାଳୟଠାରୁ ପ୍ରାୟ ୭୦ କିଲୋମିଟର ଦୂର ସିନ୍ଦେୱାହି ତହସିଲ ଅନ୍ତର୍ଗତ ଗୁଞ୍ଜେୱାହି ଗ୍ରାମ ନିକଟସ୍ଥ ଜଙ୍ଗଲରେ ଘଟିଛି। ସୂଚନା ଅନୁଯାୟୀ, କିଛି ମହିଳା ବିଡ଼ି ତିଆରି ପାଇଁ ବ୍ୟବହୃତ ହେଉଥିବା କେନ୍ଦୁ ପତ୍ର ତୋଳିବାକୁ ଏକ ଜଙ୍ଗଲିଆ ଅଞ୍ଚଳକୁ ଯାଇଥିଲେ। ସେମାନେ ପତ୍ର ସଂଗ୍ରହରେ ବ୍ୟସ୍ତ ଥିବା ବେଳେ ହଠାତ୍ ଏକ ବାଘ ସେମାନଙ୍କ ଉପରେ ଆକ୍ରମଣ କରିଥିଲା। ଏହି ଭୟଙ୍କର ଆକ୍ରମଣରେ ୪ ଜଣ ମହିଳାଙ୍କର ମୃତ୍ୟୁ ହୋଇଛି।

ମୃତ ମହିଳାମାନେ ହେଲେ କୱାଡାବାଇ ମୋହୁର୍ଲେ (୪୫), ଅନିତାବାଇ ମୋହୁର୍ଲେ (୪୦), ସୁନିତା ମୋହୁର୍ଲେ (୩୮) ଏବଂ ସଂଗୀତା ଚୌଧୁରୀ (୫୦)। ଏହି ସମସ୍ତ ମୃତକ ଗୁଞ୍ଜେୱାହି ଗ୍ରାମର ବାସିନ୍ଦା ବୋଲି ଜଣାପଡିଛି। ତେବେ ବାଘଟି ଏହି ଚାରି ଜଣଙ୍କୁ ଗୋଟିଏ ସ୍ଥାନରେ ଏକାସାଙ୍ଗରେ ଆକ୍ରମଣ କରିଛି ନା ଅଲଗା ଅଲଗା ସ୍ଥାନରେ ଶିକାର କରିଛି, ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇପାରି ନାହିଁ।

ଖବର ପାଇବା ମାତ୍ରେ ବନ ବିଭାଗର ଏକ ଟିମ୍ ଘଟଣାସ୍ଥଳରେ ପହଞ୍ଚିଛି। ଚନ୍ଦ୍ରପୁର ସର୍କଲର ମୁଖ୍ୟ ବନ ସଂରକ୍ଷକ ଆର. ଏମ୍. ରାମାନୁଜମ୍ କହିଛନ୍ତି ଯେ ଅଧିକାରୀମାନେ ତଦନ୍ତ ଆରମ୍ଭ କରିଛନ୍ତି ଏବଂ 'ପଞ୍ଚନାମା' ଶେଷ ହେବା ପରେ ଏହି ଘଟଣା ସମ୍ପର୍କରେ ଅଧିକ ତଥ୍ୟ ସାମ୍ନାକୁ ଆସିବ। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଥିବା ବେଳେ ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି।

ସାପ ନାଁ ଶୁଣିଲେ ଅନେକଙ୍କର ହାଲତ୍ ଖରାପ ହୋଇଯାଏ। ଯଦି ହଠାତ୍ ଆପଣଙ୍କ ସାମ୍ନାକୁ ଏକ ୮ ମିଟର ଲମ୍ବା ଏବଂ ୨୦୦ କିଲୋ ଓଜନର ବିଶାଳ ଆନାକୋଣ୍ଡା ଚାଲିଆସେ, ତେବେ କ’ଣ ହେବ? ସୋସିଆଲ ମିଡିଆରେ ବର୍ତ୍ତମାନ ଏଭଳି ଏକ ଭିଡିଓ ଭାଇରାଲ ହେଉଛି, ଯାହାକୁ ଦେଖିଲେ ଆପଣଙ୍କ ଲୋମ ଟାଙ୍କୁରି ଉଠିବ। ଏହି ଭିଡିଓରେ ଜଣେ ଗୋତାଖୋର (Diver) ଏବଂ ଏକ ବିଶାଳ ଆନାକୋଣ୍ଡାର ମୁହାଁମୁହିଁ ଦୃଶ୍ୟ କଏଦ ହୋଇଛି।

୨୦୦ କିଲୋ ଓଜନର ସାପକୁ ଦେଖି ଡରିଗଲେ ଡାଇଭର

ଭିଡିଓରେ ଦେଖିବାକୁ ମିଳୁଛି ଯେ ଜଣେ ଗୋତାଖୋର ପାଣି ଭିତରକୁ ଯାଇଥିବା ବେଳେ ହଠାତ୍ ଏକ ବିଶାଳ ଆନାକୋଣ୍ଡା ସହ ତାଙ୍କର ସାକ୍ଷାତ ହୋଇଥିଲା। ସାପଟିର ଲମ୍ବ ପ୍ରାୟ ୮ ମିଟର ଏବଂ ଓଜନ ୨୦୦ କିଲୋ ରହିଥିଲା। ସାପଟି ଡାଇଭରଙ୍କ ଆଡକୁ ମୁହାଁଇବା ଦେଖି ସେ ପ୍ରଥମେ ଭୟଭୀତ ହୋଇଯାଇଥିଲେ। ତାଙ୍କୁ ଲାଗିଲା ଯେ ଆନାକୋଣ୍ଡାଟି ବୋଧହୁଏ ଆକ୍ରମଣ କରିବ, କିନ୍ତୁ ଆଶ୍ଚର୍ଯ୍ୟଜନକ ଭାବେ ସାପଟି ତାଙ୍କୁ କୌଣସି କ୍ଷତି ନ ପହଞ୍ଚାଇ ପାଖ ଦେଇ ଶାନ୍ତିରେ ଚାଲିଯାଇଥିଲା।

ସୋସିଆଲ ମିଡିଆରେ ଭିଡିଓ ଭାଇରାଲ

https://twitter.com/chronicalguy/status/2016878067822792941?s=20

ଏହି ରୋମାଞ୍ଚକର ଭିଡିଓଟିକୁ @chronicalguy ନାମକ ଏକ୍ସ (ପୂର୍ବରୁ ଟ୍ୱିଟର) ଆକାଉଣ୍ଟରୁ ସେୟାର କରାଯାଇଛି। କ୍ୟାପସନରେ ଲେଖାଯାଇଛି ଯେ, "ଆନାକୋଣ୍ଡାଟି ମୋ ପାଇଁ ଅଟକିଲା, ମୋ ଆଖିରେ ଆଖି ମିଶାଇଲା ଏବଂ ମୁଁ କ୍ଷମା ମାଗିବା ପରେ ମୋ ଶରୀରକୁ ଘଷି ହୋଇ ତଳ ଦେଇ ଚାଲିଗଲା"। ମାତ୍ର ୨୮ ସେକେଣ୍ଡର ଏହି ଭିଡିଓକୁ ବର୍ତ୍ତମାନ ସୁଦ୍ଧା ୩ ଲକ୍ଷରୁ ଅଧିକ ଲୋକ ଦେଖିସାରିଲେଣି। ଅନେକ ୟୁଜର ଏହି ଦୃଶ୍ୟକୁ 'ଭୟଙ୍କର କିନ୍ତୁ ଅଦ୍ଭୁତ' ବୋଲି ବର୍ଣ୍ଣନା କରିଛନ୍ତି।