ଭୁବନେଶ୍ୱର: ଓଡ଼ିଶାରେ ବନ୍ୟା ସ୍ଥିତିରେ ଧୀରେ ଧୀରେ ସୁଧାର ଆସୁଛି। ରାଜ୍ୟର ପ୍ରମୁଖ ନଦୀଗୁଡ଼ିକର ଜଳସ୍ତର ଲଗାତାର ହ୍ରାସ ପାଉଥିବା ବେଳେ ବର୍ଷା ପରିମାଣ ମଧ୍ୟ ଯଥେଷ୍ଟ କମିଛି। ସର୍ବଶେଷ ରିପୋର୍ଟ ଅନୁଯାୟୀ, ରାଜ୍ୟର ଯାଜପୁର, ମୟୂରଭଞ୍ଜ ଏବଂ ବାଲେଶ୍ୱର ଜିଲ୍ଲା ଏବେ ବି ବନ୍ୟା ଦ୍ୱାରା ଅଧିକ ପ୍ରଭାବିତ ହୋଇ ରହିଛି। 

ବର୍ତ୍ତମାନ ରାଜଘାଟ ନିକଟରେ କେବଳ ସୁବର୍ଣ୍ଣରେଖା ନଦୀ ବିପଦ ସଙ୍କେତ ଉପରେ ପ୍ରବାହିତ ହେଉଛି। ଏହାର ଜଳସ୍ତର ୧୦.୮୪ ମିଟର ଥିଲେ ମଧ୍ୟ ଏହା ଧୀରେ ଧୀରେ ହ୍ରାସ ପାଉଥିବା ଲକ୍ଷ୍ୟ କରାଯାଇଛି। ଏହା ବ୍ୟତୀତ ମହାନଦୀ, ଇବ୍, ବ୍ରାହ୍ମଣୀ, ବୈତରଣୀ, ବୁଢ଼ାବଳଙ୍ଗ, ବଂଶଧାରା ଏବଂ ଜଳକା ନଦୀର ଜଳସ୍ତର ତଳକୁ ଖସିବାରେ ଲାଗିଛି।

ଭାରତୀୟ ପାଣିପାଗ ବିଭାଗ (IMD) ପକ୍ଷରୁ କେତେକ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତସିଂହପୁର, କଟକ, କେନ୍ଦୁଝର ଏବଂ ମୟୂରଭଞ୍ଜ ଜିଲ୍ଲାରେ ବଜ୍ରପାତ ସହ ଘଣ୍ଟାପ୍ରତି ୩୦ରୁ ୪୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି। ପ୍ରଶାସନ ପକ୍ଷରୁ ସ୍ଥାନୀୟ ବନ୍ୟା ପରିସ୍ଥିତି, ରାସ୍ତାଘାଟ ବୁଡ଼ିବା ଏବଂ ଫସଲ କ୍ଷତିର ଆଶଙ୍କା ଥିବାରୁ ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି।

ଭୁବନେଶ୍ୱର: ରାଜ୍ୟରେ ପୁଣିଥରେ ବନ୍ୟା ପରିସ୍ଥିତି ଉପୁଜିଛି। ସୁବର୍ଣ୍ଣରେଖା ଏବଂ ବୈତରଣୀ ନଦୀର ଜଳସ୍ତର ବିପଦ ସଙ୍କେତ ଉପରେ ପ୍ରବାହିତ ହେଉଥିବାରୁ ଶହ ଶହ ଗ୍ରାମ ଜଳମଗ୍ନ ହୋଇଛି ଏବଂ ହଜାର ହଜାର ଲୋକଙ୍କ ଜୀବନଯାତ୍ରା ପ୍ରଭାବିତ ହୋଇଛି।

ଉପରମୁଣ୍ଡରେ ପ୍ରବଳ ବର୍ଷା ଏବଂ ଝାଡ଼ଖଣ୍ଡର ଗାଲୁଡିହ ବ୍ୟାରେଜ୍‌ର ୧୩ଟି ଗେଟ୍ ଦେଇ ୫,୦୩୯ କ୍ୟୁସେକ୍ ଜଳ ନିଷ୍କାସନ ଯୋଗୁଁ ସୁବର୍ଣ୍ଣରେଖା ନଦୀର ଜଳସ୍ତର ହଠାତ୍ ବୃଦ୍ଧି ପାଇଛି। ରାଜଘାଟ ଠାରେ ନଦୀର ସତର୍କ ସଙ୍କେତ ୯.୪୫ ମିଟର ଏବଂ ବିପଦ ସଙ୍କେତ ୧୦.୩୬ ମିଟର ଥିବାବେଳେ, ସକାଳ ୭ଟା ସୁଦ୍ଧା ଏହା ୧୧.୫୪ ମିଟରରେ ପ୍ରବାହିତ ହେଉଥିଲା। ଚଳିତ ଋତୁରେ ଏହା ହେଉଛି ତୃତୀୟ ବନ୍ୟା।

ଏହି ନୂଆ ବନ୍ୟା ଯୋଗୁଁ ବାଲେଶ୍ୱର ଜିଲ୍ଲାର ବାଲିଆପାଳ, ଜଳେଶ୍ୱର ଏବଂ ଭୋଗରାଇ ବ୍ଲକ୍ର ଅନେକ ଗାଁ ଜଳମଗ୍ନ ହୋଇଛି। ରାସ୍ତାଘାଟ ଉପରେ ପ୍ରାୟ ୫ ଫୁଟ୍ ଉଚ୍ଚର ବନ୍ୟା ଜଳ ପ୍ରବାହିତ ହେଉଥିବାରୁ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଛି। ସାଧାରଣ ଲୋକମାନେ ଘରୁ ବାହାରି ନପାରି ଅତ୍ୟାବଶ୍ୟକ ସାମଗ୍ରୀ ପାଇବାରୁ ବଞ୍ଚିତ ହେଉଛନ୍ତି।

ଅନ୍ୟପଟେ, ବୈତରଣୀ ନଦୀରେ ବନ୍ୟା ଆସିବା ଫଳରେ ଯାଜପୁର ଜିଲ୍ଲାରେ ଘାଇ ସୃଷ୍ଟି ହୋଇଛି ଏବଂ ଅନେକ ରାସ୍ତା ଧୋଇଯାଇଛି। ପୂର୍ବ ବନ୍ୟା ଜଳ ସମ୍ପୂର୍ଣ୍ଣ ନ ଖସୁଣୁ ପୁଣି ବନ୍ୟା ଆସିଥିବାରୁ ପ୍ରଶାସନ ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛି। ତେବେ, ମୟୂରଭଞ୍ଜ ଜିଲ୍ଲାରେ ବୁଢ଼ାବଳଙ୍ଗ ନଦୀର ଜଳସ୍ତର କମିବାରୁ ଲୋକେ ଆଶ୍ୱସ୍ତ ହୋଇଛନ୍ତି ଏବଂ ରିଲିଫ୍ କ୍ୟାମ୍ପରୁ ନିଜ ଘରକୁ ଫେରୁଛନ୍ତି। ବର୍ତ୍ତମାନ ବିପର୍ଯ୍ୟୟ ମୁକାବିଲା ବାହିନୀ ପ୍ରଭାବିତ ଅଞ୍ଚଳରେ ମୁତୟନ ଅଛନ୍ତି ଏବଂ ପ୍ରଶାସନ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛି।

ଭୁବନେଶ୍ୱର: ବାଲେଶ୍ୱର ଜିଲ୍ଲା ରାଜଘାଟଠାରେ ସୁବର୍ଣ୍ଣରେଖା ନଦୀର ଜଳସ୍ତର କ୍ରମାଗତ ଭାବେ ବୃଦ୍ଧି ପାଉଛି। ବୁଧବାର ବିଳମ୍ବିତ ରାତି ସୁଦ୍ଧା ଏଠାରେ ଜଳସ୍ତର ସର୍ବୋଚ୍ଚ ସ୍ତର ୧୧.୪ ରୁ ୧୧.୬ ମିଟର ଛୁଇଁବାର ଆଶଙ୍କା ରହିଛି ବୋଲି ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ (ଇଆଇସି) ଦିଲ୍ଲୀପ ରାଉତ ସୂଚନା ଦେଇଛନ୍ତି। ତେବେ ରାଜ୍ୟର ଅନ୍ୟ ପ୍ରମୁଖ ନଦୀଗୁଡ଼ିକର ଜଳସ୍ତର ହ୍ରାସ ପାଉଥିବାରୁ ଏବଂ ସ୍ଥିର ରହୁଥିବାରୁ ସାମଗ୍ରିକ ବନ୍ୟା ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣରେ ଥିବା ସେ ସ୍ପଷ୍ଟ କରିଛନ୍ତି।

ଝାଡ଼ଖଣ୍ଡର ଗାଲୁଡିହ ବ୍ୟାରେଜରୁ ବନ୍ୟାଜଳ ଛଡ଼ାଯିବା କାରଣରୁ ସୁବର୍ଣ୍ଣରେଖା ନଦୀର ଜଳସ୍ତର ବୃଦ୍ଧି ପାଇବାରେ ଲାଗିଛି। ଆଜି ରାତି ସୁଦ୍ଧା ଏହି ଜଳ ରାଜଘାଟରେ ପହଞ୍ଚିବାର ସମ୍ଭାବନା ରହିଛି। ରାଜଘାଟଠାରେ ବିପଦ ସଙ୍କେତ ୧୦.୩୬ ମିଟର ଥିବା ବେଳେ ବର୍ତ୍ତମାନ ଏହାର ଜଳସ୍ତର ୧୦.୮୩ ମିଟରରେ ପ୍ରବାହିତ ହେଉଛି ଏବଂ କ୍ରମାଗତ ଭାବେ ବଢ଼ୁଛି। ଆଜି ରାତି ସୁଦ୍ଧା ଏହା ୧୧.୪ ରୁ ୧୧.୬ ମିଟର ପର୍ଯ୍ୟନ୍ତ ବୃଦ୍ଧି ପାଇପାରେ ବୋଲି ବିଭାଗୀୟ ଅଧିକାରୀ ଆକଳନ କରିଛନ୍ତି।

ବୁଧବାର ଭୋର ୨ଟାରୁ ସକାଳ ୭ଟା ମଧ୍ୟରେ ଗାଲୁଡିହ ବ୍ୟାରେଜରୁ ପ୍ରାୟ ୬,୬୦୦ କ୍ୟୁସେକ ଜଳ ଛଡ଼ାଯାଇଥିଲା, ଯାହାକି ପରେ ୫,୫୩୮ କ୍ୟୁସେକକୁ ହ୍ରାସ ପାଇଥିଲା। ଏହି ସର୍ବୋଚ୍ଚ ଜଳପ୍ରବାହ ୮ ରୁ ୧୦ ଘଣ୍ଟା ପର୍ଯ୍ୟନ୍ତ ରହିବ ଏବଂ ଗୁରୁବାର ସକାଳ ଆଡ଼କୁ ଜଳସ୍ତର କମିବା ଆରମ୍ଭ କରିବ ବୋଲି ଶ୍ରୀ ରାଉତ ପ୍ରକାଶ କରିଛନ୍ତି।

ରାଜ୍ୟରେ ଲଘୁଚାପର ପ୍ରଭାବ କମିଛି ଏବଂ କେବଳ ସୁନ୍ଦରଗଡ଼ ଓ ବରଗଡ଼ ଜିଲ୍ଲା ପାଇଁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ଆଗାମୀ ଦୁଇ ଦିନ ପାଇଁ ଭାରତୀୟ ପାଣିପାଗ ବିଭାଗ (ଆଇଏମଡି) ପକ୍ଷରୁ କୌଣସି ସତର୍କ ସୂଚନା ଦିଆଯାଇନାହିଁ। ଅନ୍ୟପକ୍ଷରେ, ରାଜ୍ୟର ଅଧିକାଂଶ ନଦୀଗୁଡ଼ିକର ଜଳସ୍ତର କ୍ରମଶଃ ହ୍ରାସ ପାଉଛି ଅଥବା ସ୍ଥିର ରହିଛି।

ଜଳକା ନଦୀର ଜଳସ୍ତର ୬.୫ ମିଟର ବିପଦ ସଙ୍କେତ ଥିବା ବେଳେ ବର୍ତ୍ତମାନ ଏହା ୬.୫୬ ମିଟରରେ ରହି ଧୀରେ ଧୀରେ କମୁଛି। ବ୍ରାହ୍ମଣୀ ନଦୀର ଜେନାପୁରଠାରେ ଜଳସ୍ତର ୨୧.୬୬ ମିଟର ରହିଛି, ଯାହାକି ବିପଦ ସଙ୍କେତ ୨୩ ମିଟର ଠାରୁ ଯଥେଷ୍ଟ ତଳେ ରହିଛି। ଏହା ରେଙ୍ଗାଲି ଡ୍ୟାମ୍ ଦ୍ୱାରା ନିୟନ୍ତ୍ରିତ ହେଉଥିବାରୁ କୌଣସି ବନ୍ୟା ଆଶଙ୍କା ନାହିଁ।

ସେହିପରି ଆଖୁଆପଦାଠାରେ ବୈତରଣୀ ନଦୀର ଜଳସ୍ତର ମଙ୍ଗଳବାର ତୁଳନାରେ ହ୍ରାସ ପାଇ ବର୍ତ୍ତମାନ ୧୮.୫୭ ମିଟରରେ ପ୍ରବାହିତ ହେଉଛି। ଭଦ୍ରକଠାରେ ସାଳନ୍ଦୀ ନଦୀର ଜଳସ୍ତର ଗତ ଦୁଇ ଦିନ ହେବ ସ୍ଥିର ରହିଛି ଏବଂ ବିପଦ ସଙ୍କେତ ୧୭ ଫୁଟ ତୁଳନାରେ ବର୍ତ୍ତମାନ ୧୬.୪ ଫୁଟରେ ପ୍ରବାହିତ ହେଉଛି। ବୁଢ଼ାବଳଙ୍ଗ ନଦୀର ଜଳସ୍ତର ମଧ୍ୟ ହ୍ରାସ ପାଉଥିବା ଦେଖିବାକୁ ମିଳିଛି, ଯାହାକି ବିପଦ ସଙ୍କେତ ୧୮.୧୩ ମିଟର ତୁଳନାରେ ଏବେ ୧୭.୧୨ ମିଟରରେ ରହିଛି। ସମଗ୍ର ରାଜ୍ୟରେ ବନ୍ୟା ସ୍ଥିତି ନିୟନ୍ତ୍ରଣରେ ଥିବା ବିଭାଗ ପକ୍ଷରୁ ଆଶ୍ୱାସନା ଦିଆଯାଇଛି।

ବାଲେଶ୍ୱର: ବାଲେଶ୍ୱରରେ ପୁଣି ଥରେ ବନ୍ୟା ଆଶଙ୍କା ଦେଖାଦେଇଛି। ସୁବର୍ଣ୍ଣରେଖା ନଦୀର ଜଳସ୍ତର ପୁଣି ଥରେ ବିପଦ ସଙ୍କେତ ଟପିଯାଇଛି। ଫଳରେ ଜିଲ୍ଲାରେ ଦ୍ୱିତୀୟ ଥର ପାଇଁ ଏକ ବଡ଼ ବନ୍ୟା ଆସିବାର ଆଶଙ୍କା ସୃଷ୍ଟି ହୋଇଛି। ମିଳିଥିବା ସୂଚନା ଅନୁଯାୟୀ, ସକାଳ ୯ଟା ସୁଦ୍ଧା ରାଜଘାଟ ଠାରେ ସୁବର୍ଣ୍ଣରେଖାର ଜଳସ୍ତର ୧୦.୪୦ ମିଟର ଥିଲା। ଏଠାରେ ନଦୀର ବିପଦ ସଙ୍କେତ ହେଉଛି ୧୦.୩୬ ମିଟର। ଅର୍ଥାତ୍ ନଦୀର ଜଳସ୍ତର ବିପଦ ସଙ୍କେତ ଠାରୁ ଉପରେ ପ୍ରବାହିତ ହେଉଛି। ଉପରମୁଣ୍ଡରେ ପ୍ରବଳ ବର୍ଷା କାରଣରୁ ନଦୀର ଜଳସ୍ତର ଲଗାତାର ଭାବେ ବୃଦ୍ଧି ପାଉଛି। ଏହାବ୍ୟତୀତ, ରାତି ପ୍ରାୟ ୩ଟା ସମୟରେ ଗାଲୁଡିହ ବ୍ୟାରେଜ୍ ରୁ ପ୍ରାୟ ୬,୫୦୦ କ୍ୟୁସେକ ବନ୍ୟା ଜଳ ଛଡ଼ାଯିବା ଫଳରେ ତଳମୁଣ୍ଡରେ ଜଳସ୍ତର ଦ୍ରୁତ ଗତିରେ ବୃଦ୍ଧି ପାଇଛି।

ଇତିମଧ୍ୟରେ ବାଲିଆପାଳ ଏବଂ ଭୋଗରାଇ ବ୍ଲକର ତଳିଆ ଅଞ୍ଚଳରେ ବନ୍ୟା ଜଳ ପ୍ରବେଶ କରିସାରିଲାଣି। ଜଳସ୍ତର ଏଭଳି ବୃଦ୍ଧି ପାଇଲେ ଉକ୍ତ ଦୁଇ ବ୍ଲକର ପ୍ରାୟ ୧୦ଟି ପଞ୍ଚାୟତ ବନ୍ୟା ଦ୍ୱାରା ପ୍ରଭାବିତ ହେବାର ଆଶଙ୍କା ଥିବା ନେଇ ଜିଲ୍ଲା ପ୍ରଶାସନ ପକ୍ଷରୁ ଉଦବେଗ ପ୍ରକାଶ କରାଯାଇଛି।

ଅନ୍ୟପକ୍ଷରେ, କେନ୍ଦ୍ରୀୟ ଜଳ ଆୟୋଗର ରିପୋର୍ଟ ଅନୁଯାୟୀ ମୟୂରଭଞ୍ଜ ଜିଲ୍ଲାର ଜାମଶୋଳାଘାଟ ଠାରେ ଗୁରୁତର ବନ୍ୟା ପରିସ୍ଥିତି ସୃଷ୍ଟି ହୋଇଛି। ସକାଳ ୯ଟା ସୁଦ୍ଧା ଏଠାରେ ନଦୀର ଜଳସ୍ତର ୫୨.୧୮ ମିଟର ରେ ପହଞ୍ଚିଛି। ଏହି ସ୍ଥାନରେ ନଦୀର ବିପଦ ସଙ୍କେତ ହେଉଛି ୪୯.୧୬ ମିଟର। ଅର୍ଥାତ୍ ଜଳସ୍ତର ବିପଦ ସଙ୍କେତ ଠାରୁ ୩.୦୨ ମିଟର ଉପରେ ପ୍ରବାହିତ ହେଉଛି ଏବଂ ଏହା ଆହୁରି ବୃଦ୍ଧି ପାଉଥିବା ଦେଖିବାକୁ ମିଳିଛି। ସମ୍ଭାବ୍ୟ ବନ୍ୟା ପରିସ୍ଥିତି ଉପରେ ଜିଲ୍ଲା ପ୍ରଶାସନ ତୀକ୍ଷ୍ଣ ନଜର ରଖିଛି। ଏହା ସହିତ ତଳିଆ ଅଞ୍ଚଳରେ ରହୁଥିବା ଲୋକଙ୍କୁ ସତର୍କ ରହିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି।

ବାଲେଶ୍ଵର: ଖରସ୍ରୋତା ସୁବର୍ଣ୍ଣରେଖା ନଦୀର ଉପରମୁଣ୍ଡରେ ଥିବା ଗାଲୁଡିହି ବ୍ୟାରେଜରୁ ଗତକାଲି ପୁର୍ବାହ୍ନରେ ୮୦୦୦ କ୍ୟୁମେକ ପାଣି ଛାଡିବା ପରେ ରାତିରୁ ନଦୀର ଜଳପତ୍ତନ ବୃଦ୍ଧି ପାଇବାରେ ଲାଗିଛି। ଆଜି ଦିନ ଗୋଟାଏ ସମୟରେ ନଦୀର ଜଳପତ୍ତନ ରାଜଘାଟ ଠାରେ ୧୦.୫୯ ମିଟର ରେ ପ୍ରବାହିତ ହେଉଛି। ଏଠାରେ ନଦୀର ବିପଦ ସଙ୍କେତ ୧୦.୩୬ ମିଟର ରହିଛି। ଆଜି ସକାଳ ୬ ଟାରୁ ନଦୀ ବିପଦ ସଙ୍କେତ ଉପରେ ପ୍ରବାହିତ ହେବା ଆରମ୍ଭ କରିଥିଲା। ନଦୀର ଜଳପତ୍ତନ ବୃଦ୍ଧି ଯୋଗୁଁ ନଦୀର ନିମ୍ନ ଅବବାହିକା କୁହାଯାଉଥିବା ବାଲେଶ୍ବର ଜିଲ୍ଲାର ଭୋଗରାଇ,ଜଳେଶ୍ଵର,ବାଲିଆପାଳ ଓ ବସ୍ତା ବ୍ଲକରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ବିଭିନ୍ନ ସ୍ଥାନରେ ନଦୀବନ୍ଧ ନଥିବାରୁ ବନ୍ୟାଜଳ ପ୍ରଖର ସ୍ରୋତରେ ଗାଁ ଗଣ୍ଡା ଭିତରକୁ ମାଡ଼ି ଆସୁଛି। ଫଳରେ ନଦୀତଟ ଓ ଏହାର ଆଖପାଖ ରେ ଥିବା ବାଲେଶ୍ଵର ଜିଲ୍ଲା ଭୋଗରାଇ ବ୍ଲକର ୧୭ ଟି ପଞ୍ଚାୟତ,ଜଳେଶ୍ଵର ବ୍ଲକର ନଦୀ ୧୩ ଟି ପଞ୍ଚାୟତ,ବସ୍ତା ବ୍ଲକର ୭ ଟି ପଞ୍ଚାୟତ ଓ ବାଲିଆପାଳ ବ୍ଲକର ୧୧ ଟି ପଞ୍ଚାୟତରେ ବନ୍ୟା ପରିସ୍ଥିତି ସୃଷ୍ଟି ହୋଇଛି।

ଭୋଗରାଇ, ଜଳେଶ୍ଵର ଓ ବାଲିଆପାଳ ଅଞ୍ଚଳର ୨୩ ରୁ ଉର୍ଦ୍ଧ ଗାଁ ଏକପ୍ରକାର ଜଳବନ୍ଦୀ ରହିଥିବାର କୁହାଯାଇଛି। ବାଲିଆପାଳ ବ୍ଲକ ର ବିଷ୍ଣୁପୁର ଓ କୁଦମାନସିଂ,ରଣପୁର ଜଳେଶ୍ଵର ବ୍ଲକର ଶ୍ରୀରାମପୁର ପଞ୍ଚାୟତର ମାଳିପାଳ ଗାଁ ବାହ୍ୟ ଜଗତରୁ ସମ୍ପୁର୍ଣ୍ଣ ବିଛିନ୍ନ ରହିଛି। କମର୍ଦ୍ଦା ବାଲିଆପାଳ ରାସ୍ତାର ଉଲୁଣ୍ଡା ନିକଟରେ ରାସ୍ତା ଉପରେ ବନ୍ୟା ପାଣି ପ୍ରଭାବିତ ହେଉଛି। ବନ୍ୟା ଯୋଗୁଁ ବିଭିନ୍ନ ନଦୀତଟ ଅଞ୍ଚଳରେ ପନିପରିବା ଚାଷ ମଧ୍ୟ କ୍ଷତି ହେବା ଆଶଙ୍କା କରାଯାଉଛି। ବନ୍ୟା ମୁକାବିଲା ପାଇଁ ଜଳସମ୍ପଦ ବିଭାଗ ତରଫରୁ ଜଳେଶ୍ଵର ସବଡିଭିଜନର ସବୁଠାରୁ ବିପଦ ସଙ୍କୁଳ ସ୍ଥାନ କୁହାଯାଉଥିବା ଭୋଗରାଇର ଭୋଗରାଇ ଲକ୍,ରଣକୋଠା, ଖାଳଯୋଡି ସ୍ଲୁଇସ ଠାରେ ୫ ହଜାର ଲେଖାଏଁ ବାଲିବସ୍ତା ସହ ବଲା ମହଜୁଦ ରଖାଯାଇଛି ବୋଲି ଜଳେଶ୍ୱର ସ୍ଥିତ ବିଭାଗୀୟ ସହକାରୀ ଯନ୍ତ୍ରୀ ଇଂ ପ୍ରିୟବ୍ରତ ସିଂ ସୂଚନା ଦେଇଛନ୍ତି।

ଜଳେଶ୍ବର : ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକ ପାଇକସିଦା ପଞ୍ଚାୟତର ବାଲିକବାଡ଼ ଠାରେ ସୁବର୍ଣ୍ଣରେଖା ନଦୀର ପ୍ରଥମ ବନ୍ୟା ପାଣିରୁ ଵିରଳ ପ୍ରଜାତିର ମାଛ ଉଦ୍ଧାର କରାଯାଇଛି । ମାଛ ଦେଖିବାକୁ ଲୋକଙ୍କର ଭିଡ ଜମିଛି । ସୂଚନା ଅନୁଯାୟୀ ବାଲିକ ବାଡ଼ ଗ୍ରାମର ଶତ୍ରୁଘନ ଜେନା ଦିନ ୧୦ଟା ସମୟରେ ସୁବର୍ଣ୍ଣ ରେଖା ନଦୀର ବନ୍ୟା ପାଣିରେ ଡାଙ୍ଗୀ ଜାଲ ବସାଇ ଥିଲେ।ସେଥିରେ ଏକ ବିରଳ ପ୍ରଜାତିର ମାଛ ପଡିଥିଲା।ତେବେ ତାକୁ ଦେଖିବାକୁ ଲୋକଙ୍କ ମଧ୍ୟରେ ଭିଡ ଜମିଥିଲା ତେବେ ମାଛଟିକୁ କେହି ଚିହ୍ନି ପାରି ନ ଥିଲେ।