ଏୟାର ଇଣ୍ଡିଆ ବିମାନ AI 2379ରେ ଏକ ବଡ଼ ଧରଣର ଯାନ୍ତ୍ରିକ ତ୍ରୁଟି ସାମ୍ନାକୁ ଆସିଛି। ଗତ ଅଗଷ୍ଟ ୪ ତାରିଖରେ ଫୁକେଟ୍‌ରୁ ଦିଲ୍ଲୀ ଆସୁଥିବା ଏହି ବିମାନଟି ମଝି ଆକାଶରେ ହଠାତ୍ ୩୦୦ ଫୁଟ୍ ତଳକୁ ଖସିପଡ଼ିଥିଲା। ପ୍ରଥମେ ଏହାକୁ କେବଳ ବାୟୁମଣ୍ଡଳୀୟ ଅଶାନ୍ତି (ଟର୍ବୁଲାନ୍ସ) ବୋଲି କୁହାଯାଉଥିବା ବେଳେ ବର୍ତ୍ତମାନ ବିମାନ ନିର୍ମାତା କମ୍ପାନୀ ଏୟାରବସ୍ (Airbus)ର ପ୍ରାରମ୍ଭିକ ରିପୋର୍ଟରୁ ଏକ ଭୟଙ୍କର ସତ୍ୟ ପଦାକୁ ଆସିଛି। ଏହି ଘଟଣାରେ ବିମାନରେ ଥିବା ଯାତ୍ରୀ ଏବଂ କ୍ରୁ ସଦସ୍ୟଙ୍କୁ ମିଶାଇ ମୋଟ ୨୪ ଜଣ ଆହତ ହୋଇଥିଲେ।

ଏୟାରବସ୍ ରିପୋର୍ଟରୁ ବଡ଼ ଖୁଲାସା

ବିମାନର 'ଡିଜିଟାଲ୍ ଫ୍ଲାଇଟ୍ ଡାଟା ରେକର୍ଡର୍' (ବ୍ଲାକ୍ ବକ୍ସ)ର ତଥ୍ୟ ଅନୁଯାୟୀ, ଉଡ଼ାଣ ସମୟରେ ବିମାନର ତିନୋଟି ଯାକ ମୁଖ୍ୟ ହାଇଡ୍ରୋଲିକ୍ ସିଷ୍ଟମ୍ (ଗ୍ରୀନ୍, ବ୍ଲୁ ଏବଂ ୟେଲୋ) ହଠାତ୍ କାମ କରିବା ବନ୍ଦ କରିଦେଇଥିଲା। ଫଳସ୍ୱରୂପ, ପ୍ରାୟ ୪ ସେକେଣ୍ଡ ପାଇଁ ପାଇଲଟଙ୍କ ହାତରୁ ବିମାନର ସମ୍ପୂର୍ଣ୍ଣ ନିୟନ୍ତ୍ରଣ (ଏଲିଭେଟର୍ସ, ଏଲେରନ୍ସ ଏବଂ ସ୍ପଏଲର୍ସ) ଚାଲିଯାଇଥିଲା। ଏହି ୪ ସେକେଣ୍ଡ ସମୟ ମଧ୍ୟରେ ବିମାନଟି ସମ୍ପୂର୍ଣ୍ଣ ରୂପେ ନିୟନ୍ତ୍ରଣ ବାହାରେ ଥିଲା।

କକ୍‌ପିଟ୍ ଭିତରେ କ'ଣ ଘଟିଥିଲା?

ରିପୋର୍ଟ ଅନୁଯାୟୀ, ଯେତେବେଳେ ହାଇଡ୍ରୋଲିକ୍ ସିଷ୍ଟମ୍ ଫେଲ୍ ମାରିଲା, ଅଟୋପାଇଲଟ୍ ସିଷ୍ଟମ୍ ମଧ୍ୟ ବିଚ୍ଛିନ୍ନ ହୋଇଯାଇଥିଲା। କକ୍‌ପିଟ୍‌ରେ 'ଷ୍ଟଲ୍ ୱାର୍ଣ୍ଣିଂ' ଆସିବା ପରେ କୋ-ପାଇଲଟ୍ ବିମାନର ନାକ (Nose)କୁ ତଳକୁ କରିବା ପାଇଁ କଣ୍ଟ୍ରୋଲ୍ ଷ୍ଟିକ୍‌କୁ ଆଗକୁ ଠେଲିଥିଲେ। କିନ୍ତୁ ହାଇଡ୍ରୋଲିକ୍ ପାୱାର୍ ନଥିବାରୁ ବିମାନଟି ପ୍ରଥମେ କୌଣସି ପ୍ରତିକ୍ରିୟା ଦେଇନଥିଲା। ମାତ୍ର କିଛି ସେକେଣ୍ଡ ପରେ ଯେତେବେଳେ ହାଇଡ୍ରୋଲିକ୍ ପାୱାର୍ ଫେରିଆସିଲା, କୋ-ପାଇଲଟ୍ ଦେଇଥିବା ନିର୍ଦ୍ଦେଶ ହଠାତ୍ କାର୍ଯ୍ୟକାରୀ ହୋଇଥିଲା ଏବଂ ବିମାନଟି ଦ୍ରୁତ ବେଗରେ ୩୦୦ ଫୁଟ୍ ତଳକୁ ଖସିପଡ଼ିଥିଲା। ଏହି ହଠାତ୍ ଝଟକା ଯୋଗୁଁ ଯାତ୍ରୀମାନେ ଆହତ ହୋଇଥିଲେ।

ମୁଖ୍ୟ ପାଇଲଟଙ୍କ ନାମରେ ସାଂଘାତିକ ଅଭିଯୋଗ

ଏହି ବୈଷୟିକ ତ୍ରୁଟି ସହିତ ପାଇଲଟଙ୍କୁ ନେଇ ମଧ୍ୟ ଏକ ସାଂଘାତିକ ଅଭିଯୋଗ ସାମ୍ନାକୁ ଆସିଛି। ସୂତ୍ର ଅନୁଯାୟୀ, ଘଟଣା ସମୟରେ ବିମାନର ପାଇଲଟ୍-ଇନ୍-କମାଣ୍ଡ (PIC) ନିଶାସକ୍ତ ଅବସ୍ଥାରେ ଥିଲେ ଏବଂ କକ୍‌ପିଟ୍ ଚଟାଣରେ ବସି ରହିଥିଲେ। ସେ ନିଜେ ଚାଲିବା ସ୍ଥିତିରେ ମଧ୍ୟ ନଥିଲେ। ପରବର୍ତ୍ତୀ ସମୟରେ ତାଙ୍କର ଡୋପ୍ ଟେଷ୍ଟ୍ ରିପୋର୍ଟ (ଗଞ୍ଜେଇ ବ୍ୟବହାର) ପଜିଟିଭ୍ ଆସିଥିବା ଜଣାପଡ଼ିଛି। ଏଭଳି ଏକ ଜରୁରୀକାଳୀନ ପରିସ୍ଥିତିରେ ଯୁବ କୋ-ପାଇଲଟ୍ ଏକାକୀ ବିମାନଟିକୁ ନିୟନ୍ତ୍ରଣ କରି ସୁରକ୍ଷିତ ଭାବେ ଦିଲ୍ଲୀରେ ଅବତରଣ କରାଇଥିଲେ।

ଘଟଣାର ତଦନ୍ତ ଜାରି

ଏହି ଗୁରୁତର ଘଟଣାର ତଦନ୍ତ ଭାରତର 'ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ୍ ବ୍ୟୁରୋ' (AAIB) କରୁଛି। ତଦନ୍ତରେ ସହାୟତା କରିବା ପାଇଁ ଫ୍ରାନ୍ସର ବେସାମରିକ ବିମାନ ଚଳାଚଳ ସୁରକ୍ଷା ପ୍ରାଧିକରଣ (BEA) ଏବଂ ଏୟାରବସ୍ର ବୈଷୟିକ ଟିମ୍ ମଧ୍ୟ ସାମିଲ ହୋଇଛନ୍ତି।

ନୂଆଦିଲ୍ଲୀ: ସମସ୍ତ ଏୟାର ଇଣ୍ଡିଆ ପାଇଲଟଙ୍କର ଆଜିଠାରୁ ଡୋପ୍‌ ଟେଷ୍ଟ ନିଷ୍ପତ୍ତି । ଯାତ୍ରୀଙ୍କ ସୁରକ୍ଷାକୁ ସୁନିଶ୍ଚିତ କରିବା ପାଇଁ ଏୟାର ଇଣ୍ଡିଆର ବଡ଼ ନିଷ୍ପତ୍ତି । ଫୁକେଟରୁ ଦିଲ୍ଲୀ ଆସୁଥିବା ବିମାନରେ ଘଟିଥିବା ଏକ ଅଘଟଣ ପରେ ଏୟାର ଇଣ୍ଡିଆ ଏପରି ବଡ଼ ପଦକ୍ଷେପ ନେଇଛି। ଏହି ବିମାନର ମୁଖ୍ୟ ପାଇଲଟଙ୍କ ଡୋପ୍‌ ଟେଷ୍ଟ ରିପୋର୍ଟ ପଜିଟିଭ୍ ଆସିବା ପରେ ଏବେ ସଂସ୍ଥାର ସମସ୍ତ ପାଇଲଟଙ୍କ ପାଇଁ ବାଧ୍ୟତାମୂଳକ ନିଶାଦ୍ରବ୍ୟ ପରୀକ୍ଷା (Substance-abuse screening) କରାଯିବ ବୋଲି ଘୋଷଣା କରାଯାଇଛି। ଆଜି ଠାରୁ ଏହି ପ୍ରକ୍ରିୟା ଆରମ୍ଭ ହେବ।

ଗତ ଅଗଷ୍ଟ ୪ ତାରିଖ ଦିନ ଫୁକେଟରୁ ଦିଲ୍ଲୀ ଅଭିମୁଖେ ଯାତ୍ରା କରୁଥିବା ବିମାନ ଏଆଇ୨୩୭୯ (AI2379) ରେ ଏହି ଅଘଟଣ ଘଟିଥିଲା। ଏହି ଏୟାରବସ୍ ଏ୩୨୦ (Airbus A320) ବିମାନଟି ଆକାଶରେ ଉଡ଼ାଣ ଭରୁଥିବା ବେଳେ ହଠାତ୍ ପ୍ରାୟ ୩୦୦ ଫୁଟ୍ ତଳକୁ ଖସି ଆସିଥିଲା। ଏହି ଘଟଣାରେ ୨୦ ଜଣ ଯାତ୍ରୀ ଏବଂ ୪ ଜଣ କ୍ରୁ ସଦସ୍ୟଙ୍କୁ ମିଶାଇ ସମୁଦାୟ ୨୪ ଜଣ ଆହତ ହୋଇଥିଲେ। ପ୍ରଥମେ ଏୟାର ଇଣ୍ଡିଆ ଏହାକୁ ଟର୍ବୁଲାନ୍ସ (Turbulence) ବୋଲି କହିଥିଲେ ମଧ୍ୟ ପରେ ପାଇଲଟଙ୍କ ଡୋପ୍‌ ଟେଷ୍ଟରେ ସେ ଗଞ୍ଜେଇ (Marijuana/Cannabis) ସେବନ କରିଥିବା ପ୍ରମାଣିତ ହୋଇଥିଲା।

ବିମାନ ଚଳାଚଳ ସୁରକ୍ଷାକୁ ଦୃଷ୍ଟିରେ ରଖି ଏୟାର ଇଣ୍ଡିଆ ନିଜର କର୍ମଚାରୀମାନଙ୍କୁ ଏକ ଇମେଲ୍ ମାଧ୍ୟମରେ ସୂଚନା ଦେଇଛି ଯେ, ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (DGCA) ର ନିୟମାନୁଯାୟୀ କମ୍ପାନୀ ସର୍ବଦା କାର୍ଯ୍ୟ କରିଆସୁଛି। ତେବେ ସୁରକ୍ଷା ଓ ପେସାଦାର ମନୋଭାବର ଉଚ୍ଚ ମାନ ବଜାୟ ରଖିବା ପାଇଁ ବର୍ତ୍ତମାନର ନିୟମଠାରୁ ଗୋଟିଏ ପାଦ ଆଗକୁ ଯାଇ ଏହି ନିଷ୍ପତ୍ତି ନିଆଯାଇଛି। ସମସ୍ତ ଗ୍ରୁପ୍ ପାଇଲଟଙ୍କର ଏକ ସମ୍ପୂର୍ଣ୍ଣ ସ୍କ୍ରିନିଂ କରାଯିବ।

ଏୟାର ଇଣ୍ଡିଆର ସୂଚନା ଅନୁଯାୟୀ, ପାଇଲଟମାନଙ୍କର କାର୍ଯ୍ୟସୂଚୀ ତଥା ସେମାନଙ୍କର ବେସ୍ ଅନୁଯାୟୀ ଏକାଧିକ ସ୍ଥାନରେ ଏହି ପରୀକ୍ଷା କରାଯିବ। ଟ୍ରେନିଂ ସମୟରେ ଏହା କମ୍ପାନୀର ଗୁରୁଗ୍ରାମ ଏକାଡେମୀରେ କରାଯିବ। ଏହା ସହିତ ଫ୍ଲାଇଟ୍ ବ୍ରିଫିଙ୍ଗ୍ ସେଣ୍ଟର, ଏୟାର ଇଣ୍ଡିଆ ଅଫିସ୍ ଏବଂ ବିଭିନ୍ନ ବେସ୍ ଷ୍ଟେସନରେ ମଧ୍ୟ ଟେଷ୍ଟ କରାଯିବ। ଯାତ୍ରୀ ତଥା କର୍ମଚାରୀମାନଙ୍କ ସୁରକ୍ଷା ପ୍ରତି ଥିବା ପ୍ରତିବଦ୍ଧତାକୁ ସୁଦୃଢ଼ କରିବା ପାଇଁ ଏହି ପଦକ୍ଷେପ ନିଆଯାଇଛି।

ବର୍ତ୍ତମାନ ଫୁକେଟ୍-ଦିଲ୍ଲୀ ବିମାନରେ ଘଟିଥିବା ଘଟଣାର ତଦନ୍ତ ଆକ୍ରାଫ୍ଟ ଆକ୍ସିଡେଣ୍ଟ୍ ଇନଭେଷ୍ଟିଗେସନ୍ ବ୍ୟୁରୋ (AAIB) କରୁଛି। ରିପୋର୍ଟ ଅନୁଯାୟୀ, ଉଚ୍ଚତା କମିବା ସମୟରେ ବିମାନର ପୋଷ୍ଟ-ଫ୍ଲାଇଟ୍ ଫଲ୍ଟ ଲଗରେ ଏହାର ହାଇଡ୍ରୋଲିକ୍ ସିଷ୍ଟମ୍, ଫ୍ଲାଇଟ୍ କଣ୍ଟ୍ରୋଲ୍ ଏବଂ ଅଟୋପାଇଲଟ୍ ସମ୍ବନ୍ଧୀୟ ଅନେକ ତ୍ରୁଟି ଦେଖାଯାଇଥିଲା। ପାଇଲଟଙ୍କ ପ୍ରଥମ ନିଶାଦ୍ରବ୍ୟ ପରୀକ୍ଷା "ନନ୍-ନେଗେଟିଭ୍" (Non-negative) ଆସିବା ପରେ ଅଧିକ ଟେଷ୍ଟ କରାଯାଇଥିଲା, ଯେଉଁଥିରେ ସେ ନିଶାଦ୍ରବ୍ୟ ନେଇଥିବା ସ୍ପଷ୍ଟ ହୋଇଛି।

ଗତ ବର୍ଷ ଜୁନ୍ ୧୨, ୨୦୨୫ ତାରିଖରେ ଅହମ୍ମଦାବାଦରେ ହୋଇଥିବା ମର୍ମନ୍ତୁଦ ଏୟାର ଇଣ୍ଡିଆ (Air India) ଏଆଇ-୧୭୧ (AI-171) ବିମାନ ଦୁର୍ଘଟଣାକୁ ଆଜି ଏକ ବର୍ଷ ପୂରଣ ହୋଇଛି। ଏହି ଅବସରରେ ଭାରତର ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ୍ ବ୍ୟୁରୋ (AAIB) ପକ୍ଷରୁ ଏକ ମଧ୍ୟବର୍ତ୍ତୀକାଳୀନ ବିବୃତି ଜାରି କରାଯାଇଛି। ସଂସ୍ଥା କହିଛି ଯେ ଦୁର୍ଘଟଣାର ଚୂଡ଼ାନ୍ତ ରିପୋର୍ଟ ପ୍ରସ୍ତୁତି ଦିଗରେ 'ଉଲ୍ଲେଖନୀୟ ଅଗ୍ରଗତି' ହୋଇଛି ଏବଂ ସଂଗୃହିତ ପ୍ରମାଣଗୁଡ଼ିକର ତନ୍ନ ତନ୍ନ କରି ବିଶ୍ଳେଷଣ କରାଯାଉଛି।

ଦୁର୍ଘଟଣାର ପୃଷ୍ଠଭୂମି ଓ ପ୍ରାଥମିକ ରିପୋର୍ଟ

ଅହମ୍ମଦାବାଦର ସର୍ଦ୍ଦାର ବଲ୍ଲଭଭାଇ ପଟେଲ ଆନ୍ତର୍ଜାତୀୟ ବିମାନବନ୍ଦରରୁ ଲଣ୍ଡନ ଅଭିମୁଖେ ଉଡ଼ାଣ ଭରିବାର ମାତ୍ର ୩୦ ସେକେଣ୍ଡ ମଧ୍ୟରେ ବୋଇଂ ୭୮୭-୮ (Boeing 787-8) ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଭୟାବହ ଦୁର୍ଘଟଣାରେ ବିମାନରେ ଥିବା ଯାତ୍ରୀ ଏବଂ ତଳେ ଥିବା ଲୋକଙ୍କୁ ମିଶାଇ ସର୍ବମୋଟ ୨୬୦ ଜଣଙ୍କର ପ୍ରାଣହାନି ଘଟିଥିଲା। ଗତ ବର୍ଷ ଜୁଲାଇରେ ପ୍ରକାଶିତ ପ୍ରାଥମିକ ରିପୋର୍ଟରୁ ଜଣାପଡ଼ିଥିଲା ଯେ ଟେକ୍-ଅଫ୍ କରିବାର ମାତ୍ର ୩ ସେକେଣ୍ଡ ପରେ ବିମାନର ଇଞ୍ଜିନକୁ ଯାଉଥିବା ଇନ୍ଧନ ଯୋଗାଣ ବନ୍ଦ ହୋଇଯାଇଥିଲା। କେଉଁ ପରିସ୍ଥିତିରେ ଫୁଏଲ୍ ସୁଇଚ୍‌ଗୁଡ଼ିକ ଆପେ ଆପେ ବନ୍ଦ ହୋଇଗଲା, ତାହା ଏବେ ବି ଏକ ରହସ୍ୟ ହୋଇ ରହିଛି।

ତଦନ୍ତର ବର୍ତ୍ତମାନର ସ୍ଥିତି

ଏଏଆଇବି (AAIB) ଅନୁଯାୟୀ, ଗତ ଏକ ବର୍ଷ ମଧ୍ୟରେ ତଦନ୍ତକାରୀ ଦଳ ବୈଷୟିକ, କାର୍ଯ୍ୟକ୍ଷମ ଏବଂ ମାନବୀୟ ତ୍ରୁଟି ଆଦି ବିଭିନ୍ନ ଦିଗ ଉପରେ କଡ଼ା ନଜର ରଖିଛନ୍ତି। ବିମାନର ସିଷ୍ଟମ୍, ଫ୍ଲାଇଟ୍ ରେକର୍ଡର ଡାଟା କିମ୍ବା ବ୍ଲାକ୍ ବକ୍ସ, ଏବଂ ଇଞ୍ଜିନ୍ ସମ୍ବନ୍ଧୀୟ ଯନ୍ତ୍ରାଂଶଗୁଡ଼ିକର ପରୀକ୍ଷା ଆମେରିକାରେ ଜାରି ରହିଛି। ସୂତ୍ରରୁ ପ୍ରକାଶ ଯେ ସମ୍ପୂର୍ଣ୍ଣ ସତ୍ୟାସତ୍ୟ ପଦାକୁ ଆଣିବା ପାଇଁ ଫାଇନାଲ୍ ରିପୋର୍ଟ ପ୍ରକାଶ ପାଇବାରେ ଆହୁରି ୨ ମାସ ସମୟ ଲାଗିପାରେ। ଏହି ତଦନ୍ତରେ ଆମେରିକାର ଏନଟିଏସବି (NTSB), ବୋଇଂ କମ୍ପାନୀ ଏବଂ ଇଞ୍ଜିନ୍ ନିର୍ମାତା ଜେନେରାଲ ଇଲେକ୍ଟ୍ରିକ୍ ଆଦି ଅନେକ ବିଶେଷଜ୍ଞ ସାମିଲ ଅଛନ୍ତି।

ପାଇଲଟ୍ ସଂଘର ଉଦ୍‌ବେଗ

ଅନ୍ୟପକ୍ଷରେ, ଫେଡେରେସନ୍ ଅଫ୍ ଇଣ୍ଡିଆନ୍ ପାଇଲଟ୍ସ ଚୂଡ଼ାନ୍ତ ରିପୋର୍ଟ ପ୍ରକାଶ ପାଇବାରେ ବିଳମ୍ବକୁ ନେଇ ପ୍ରଶ୍ନ ଉଠାଇଛି। ବିନା କୌଣସି ଠୋସ୍ ପ୍ରମାଣରେ ଅସମ୍ପୂର୍ଣ୍ଣ ମଧ୍ୟବର୍ତ୍ତୀକାଳୀନ ରିପୋର୍ଟ ଜାରି ନକରିବାକୁ ସଂଘ ଅନୁରୋଧ କରିଛି, କାରଣ ଏହାଦ୍ୱାରା ଦୁର୍ଘଟଣାର କାରଣକୁ ନେଇ ଅଧିକ ଦ୍ୱନ୍ଦ୍ୱ ଉପୁଜିବାର ଆଶଙ୍କା ରହିଛି। ତେବେ ତଦନ୍ତ ପ୍ରକ୍ରିୟା ଶେଷ ହେବା ପରେ କୌଣସି ତଥ୍ୟ ଲୁଚାଯିବ ନାହିଁ ଏବଂ ସମସ୍ତ ବିବରଣୀ ସର୍ବସାଧାରଣରେ ପ୍ରକାଶ ପାଇବ ବୋଲି ସରକାରୀ ସୂତ୍ରରୁ ସ୍ପଷ୍ଟ କରାଯାଇଛି।

ମହାରାଷ୍ଟ୍ର: ମହାରାଷ୍ଟ୍ରର ବାରାମତୀ ନିକଟରେ ଘଟିଥିବା ଭୟାବହ ବିମାନ ଦୁର୍ଘଟଣାର ତଦନ୍ତ ପ୍ରକ୍ରିୟାକୁ ତ୍ୱରାନ୍ୱିତ କରାଯାଇଛି। ଜାନୁଆରୀ ୨୮ତାରିଖରେ ଘଟିଥିବା ଏହି ଦୁଃଖଦ ଦୁର୍ଘଟଣାରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସମେତ ଅନ୍ୟ ୪ ଜଣଙ୍କର ପ୍ରାଣହାନୀ ଘଟିଥିଲା। ବେସାମରିକ ବିମାନ ଚଳାଚଳ ମନ୍ତ୍ରାଳୟ ଗୁରୁବାର ସ୍ପଷ୍ଟ କରିଛି ଯେ ଦୁର୍ଘଟଣାଗ୍ରସ୍ତ ବିମାନର ‘ବ୍ଲାକ୍ ବକ୍ସ’କୁ ସଫଳତାର ସହ ଉଦ୍ଧାର କରାଯାଇଛି, ଯାହା ଦୁର୍ଘଟଣାର କାରଣ ଜାଣିବାରେ ମୁଖ୍ୟ ଭୂମିକା ଗ୍ରହଣ କରିବ।

ମନ୍ତ୍ରାଳୟର ସୂଚନା ଅନୁଯାୟୀ, ଦୁର୍ଘଟଣାର ପୁଙ୍ଖାନୁପୁଙ୍ଖ ତଦନ୍ତ ପାଇଁ ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ୍ ବ୍ୟୁରୋ (AAIB) ର ତିନିଜଣିଆ ଟିମ୍ ଏବଂ ଡିଜିସିଏ (DGCA) ର ଅନ୍ୟ ଏକ ଟିମ୍ ଜାନୁଆରୀ ୨୮ ତାରିଖରେ ହିଁ ଘଟଣାସ୍ଥଳରେ ପହଞ୍ଚିଥିଲେ। AAIB ର ମହାନିର୍ଦ୍ଦେଶକ ମଧ୍ୟ ସେହିଦିନ ଘଟଣାସ୍ଥଳ ପରିଦର୍ଶନ କରିଥିଲେ। ଉଦ୍ଧାର ହୋଇଥିବା ବ୍ଲାକ୍ ବକ୍ସରୁ ବିମାନର ଉଡାଣ ସମ୍ବନ୍ଧୀୟ ଗୁରୁତ୍ୱପୂର୍ଣ୍ଣ ତଥ୍ୟ ମିଳିବ ବୋଲି ଆଶା କରାଯାଉଛି।

ଉଲ୍ଲେଖଯୋଗ୍ୟ ଯେ, ବୋମ୍ବାଡିୟର୍ ଲିୟରଜେଟ୍ ୪୫ (Bombardier Learjet 45) ନାମକ ଏହି ବିମାନଟି ବାରାମତୀ ଏୟାରଷ୍ଟ୍ରିପରେ ଅବତରଣ କରିବାକୁ ଚେଷ୍ଟା କରୁଥିବାବେଳେ ଦୁର୍ଘଟଣାଗ୍ରସ୍ତ ହୋଇଥିଲା। ମନ୍ତ୍ରାଳୟ ସୋସିଆଲ ମିଡିଆରେ ସୂଚନା ଦେଇ କହିଛି ଯେ, “AAIB ନିୟମାବଳୀ, ୨୦୨୫ର ନିୟମ ୫ ଏବଂ ୧୧ ଅନୁଯାୟୀ ତଦନ୍ତ ଆରମ୍ଭ କରାଯାଇଛି। ଏକ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ସ୍ୱଚ୍ଛ ଏବଂ ନିରପେକ୍ଷ ତଦନ୍ତ ଶେଷ କରିବା ଆମର ପ୍ରାଥମିକତା।”