ଉତ୍ତର ପ୍ରଦେଶରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଜଣେ ମହିଳାଙ୍କୁ ଡାକ୍ତରମାନେ ବ୍ରେନ୍ ଡେଡ୍ ବା ମୃତପ୍ରାୟ ଘୋଷଣା କରିବା ପରେ, ତାଙ୍କୁ ଘରକୁ ଅଣାଯାଉଥିଲା। ମାତ୍ର ବାଟରେ ଆମ୍ବୁଲାନ୍ସଟି ଏକ ବଡ଼ ଖାଲରେ ପଡି ଝଟକା ଖାଇବା ପରେ ମହିଳାଙ୍କ ଶରୀରରେ ଜୀବନ ଫେରିଆସିଛି। ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।

କଣ ଥିଲା ପୁରା ଘଟଣା?

ପିଲିଭିତ ଜିଲ୍ଲାର ୫୦ ବର୍ଷୀୟା ବିନୀତା ଶୁକ୍ଲା ହଠାତ୍ ଅସୁସ୍ଥ ହୋଇ ପଡିବା ପରେ ତାଙ୍କୁ ବରେଲିର ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତରମାନେ ତାଙ୍କ ଅବସ୍ଥା ଅତ୍ୟନ୍ତ ଗୁରୁତର ଥିବା କହିବା ସହ ସେ କୌଣସି ପ୍ରତିକ୍ରିୟା ଦେଉନଥିବା ଜଣାଇଥିଲେ। ବିନୀତା ବ୍ରେନ୍ ଡେଡ୍ ହୋଇଯାଇଛନ୍ତି ଏବଂ ତାଙ୍କର ବଞ୍ଚିବାର ଆଶା ନାହିଁ ବୋଲି କୁହାଯାଇଥିଲା। ଏହା ଶୁଣିବା ପରେ ତାଙ୍କ ସ୍ୱାମୀ କୁଲଦୀପ କୁମାର ଶୁକ୍ଲା ଫେବୃଆରୀ ୨୪ରେ ତାଙ୍କୁ ଆମ୍ବୁଲାନ୍ସ ଯୋଗେ ଶେଷକୃତ୍ୟ ପାଇଁ ଘରକୁ ନେଇ ଆସୁଥିଲେ।

ଖାଲ ସାଜିଲା ଦେବଦୂତ

ବରେଲି-ହରିଦ୍ୱାର ଜାତୀୟ ରାଜପଥରେ ହାଫିଜଗଞ୍ଜ ନିକଟରେ ଆମ୍ବୁଲାନ୍ସଟି ଯାଉଥିବା ସମୟରେ ଏକ ବଡ଼ ଖାଲରେ ପଡି ଜୋରରେ ଝଟକା ଖାଇଥିଲା। ବିନୀତାଙ୍କ ସ୍ୱାମୀଙ୍କ କହିବା ଅନୁଯାୟୀ, ଗାଡ଼ିଟି ଭୀଷଣ ଭାବେ ହଲିଯିବା ପରେ ହଠାତ୍ ବିନୀତା ପୁଣି ନିଶ୍ୱାସ ନେବା ଆରମ୍ଭ କରିଥିଲେ। ଏହା ଦେଖି ପରିବାର ଲୋକେ ଆଶ୍ଚର୍ଯ୍ୟ ହୋଇଯାଇଥିଲେ ଏବଂ ତୁରନ୍ତ ଘରେ ଚାଲିଥିବା ଶେଷକୃତ୍ୟ ପ୍ରସ୍ତୁତି ବନ୍ଦ କରିବାକୁ କହିଥିଲେ। ଏହାପରେ ତାଙ୍କୁ ପିଲିଭିତର ନ୍ୟୁରୋସିଟି ହସ୍ପିଟାଲରେ ଭର୍ତ୍ତି କରାଯାଇଥିଲା।

ଚିକିତ୍ସା ପରେ ସୁସ୍ଥ ହୋଇ ଘରକୁ ଫେରିଲେ

ନ୍ୟୁରୋସିଟି ହସ୍ପିଟାଲର ନ୍ୟୁରୋସର୍ଜନ ଡାକ୍ତର ରାକେଶ ସିଂହ କହିଛନ୍ତି ଯେ, ବିନୀତାଙ୍କ ଗ୍ଲାସଗୋ କୋମା ସ୍କେଲ୍ ମାତ୍ର ୩ ପଏଣ୍ଟକୁ ଖସି ଆସିଥିଲା, ଯାହା ଗଭୀର ଅଚେତ ଅବସ୍ଥାକୁ ସୂଚାଏ। ତାଙ୍କ ରକ୍ତରେ ନ୍ୟୁରୋଟକ୍ସିନ ଚିହ୍ନଟ କରାଯାଇଥିଲା। ସଠିକ୍ ରୋଗ ନିରୂପଣ ଏବଂ ଜରୁରୀକାଳୀନ ଚିକିତ୍ସା ପରେ ବିନୀତାଙ୍କ ସ୍ୱାସ୍ଥ୍ୟାବସ୍ଥାରେ ଦ୍ରୁତ ଉନ୍ନତି ଆସିଥିଲା। ସେ ପୁଣି ସଂଜ୍ଞା ଫେରି ପାଇବା ସହ କଥା କହିବା ଆରମ୍ଭ କରିଥିଲେ। ସମ୍ପୂର୍ଣ୍ଣ ସୁସ୍ଥ ହେବା ପରେ ସୋମବାର ତାଙ୍କୁ ଡାକ୍ତରଖାନାରୁ ଛୁଟି ମିଳିଛି।

ଚୀନ୍‌ର ଏକ କମ୍ପାନୀ ନିଜ କର୍ମଚାରୀଙ୍କୁ ଏକ ଅଭିନବ ଉପାୟରେ ବୋନସ ପ୍ରଦାନ କରି ସମଗ୍ର ବିଶ୍ୱରେ ଚର୍ଚ୍ଚାର ବିଷୟ ପାଲଟିଛି। ସାଧାରଣତଃ କମ୍ପାନୀଗୁଡ଼ିକ ବୋନସ ଆକାରରେ କିଛି ନିର୍ଦ୍ଦିଷ୍ଟ ଅର୍ଥ କିମ୍ବା ଉପହାର ଦେଇଥାନ୍ତି, କିନ୍ତୁ ଏହି ଚାଇନିଜ୍ କମ୍ପାନୀର ମାଲିକ କର୍ମଚାରୀଙ୍କ ପାଇଁ ନଗଦ ଟଙ୍କାର ପାହାଡ଼ ଛିଡ଼ା କରିଦେଇଛନ୍ତି। ରିପୋର୍ଟ ଅନୁଯାୟୀ, କମ୍ପାନୀ ପକ୍ଷରୁ ମୋଟ ୨୬ ମିଲିୟନ ଡଲାର (ପ୍ରାୟ ୧୮୦ ନିୟୁତ ୟୁଆନ୍) ବୋନସ ଆକାରରେ ବଣ୍ଟନ କରାଯାଇଛି।

ଟେବୁଲ ଉପରେ ବିଛା ହୋଇଥିଲା କୋଟି କୋଟି ଟଙ୍କା

ଏହି ଘଟଣାଟି ଚୀନ୍‌ର ହେନାନ ପ୍ରାନ୍ତରେ ଥିବା ‘ହେନାନ କୁଆଙ୍ଗଶାନ କ୍ରେନ୍ କୋ’ (Henan Kuangshan Crane Co) ନାମକ ଏକ କମ୍ପାନୀର ବାର୍ଷିକ ଉତ୍ସବରେ ଦେଖିବାକୁ ମିଳିଥିଲା। କମ୍ପାନୀର ମାଲିକ କୁଇ ପେଇଜୁନ୍ (Cui Peijun) କର୍ମଚାରୀଙ୍କ ପାଇଁ ଏକ ବିଶାଳ ମଞ୍ଚରେ ପ୍ରାୟ ୬୧ ନିୟୁତ ୟୁଆନ୍‌ର ନଗଦ ରାଶି ରଖିଥିଲେ। ଏକ ଲମ୍ବା ଟେବୁଲ ଉପରେ ବିଡ଼ା ବିଡ଼ା ଟଙ୍କା ରଖାଯାଇଥିଲା ଏବଂ କର୍ମଚାରୀମାନଙ୍କୁ ସେଠାରୁ ଟଙ୍କା ଗଣି ନିଜ ସାଙ୍ଗରେ ନେବାକୁ ସୁଯୋଗ ଦିଆଯାଇଥିଲା।

ନିଆରା ପ୍ରତିଯୋଗିତା: ଗଣ ଏବଂ ନିଅ

କମ୍ପାନୀ ପକ୍ଷରୁ ଏହି ବୋନସ ବଣ୍ଟନ ପାଇଁ ଏକ ନିଆରା ନିୟମ ରଖାଯାଇଥିଲା। କର୍ମଚାରୀମାନଙ୍କୁ ୧, ୩, ୫, ୧୦ କିମ୍ବା ୧୫ ମିନିଟ୍‌ର ସମୟ ଦିଆଯାଇଥିଲା। ଏହି ନିର୍ଦ୍ଦିଷ୍ଟ ସମୟ ମଧ୍ୟରେ ସେମାନେ ଯେତିକି ଟଙ୍କା ସଠିକ୍ ଭାବରେ ଗଣିପାରିବେ, ସେହି ପୁରା ଟଙ୍କା ସେମାନଙ୍କର ହେବ। ତେବେ ଭୁଲ୍ ଗଣିଲେ କିଛି ଟଙ୍କା କାଟିବାର ବ୍ୟବସ୍ଥା ମଧ୍ୟ ଥିଲା। ଏହି ପ୍ରତିଯୋଗିତାରେ ଜଣେ କର୍ମଚାରୀ ସର୍ବାଧିକ ୧ ଲକ୍ଷ ୟୁଆନ୍ (ପ୍ରାୟ ୧୨ ଲକ୍ଷ ଟଙ୍କା) ଜିତିବାରେ ସଫଳ ହୋଇଥିଲେ।

କାହିଁକି ଏଭଳି ନିଷ୍ପତ୍ତି ନେଲେ ବସ୍?

ସୋସିଆଲ ମିଡିଆରେ ଏହି ଭିଡିଓ ଭାଇରାଲ ହେବା ପରେ ଅନେକ ଲୋକ ଆଶ୍ଚର୍ଯ୍ୟ ପ୍ରକାଶ କରିଛନ୍ତି। କମ୍ପାନୀର ମାଲିକ କୁଇ ପେଇଜୁନ୍ କହିଛନ୍ତି ଯେ, ସେ କର୍ମଚାରୀମାନଙ୍କ ଆର୍ଥିକ ସମସ୍ୟାକୁ ବୁଝିପାରନ୍ତି। ତେଣୁ ୱାସିଂ ମେସିନ୍ କିମ୍ବା ଅନ୍ୟ ଉପହାର ଦେବା ପରିବର୍ତ୍ତେ ନଗଦ ଟଙ୍କା ଦେଲେ କର୍ମଚାରୀମାନେ ଅଧିକ ଉପକୃତ ହେବେ ବୋଲି ସେ ମନେ କରନ୍ତି। ଗତବର୍ଷ ମଧ୍ୟ ଏହି କମ୍ପାନୀ କର୍ମଚାରୀଙ୍କୁ ବହୁଳ ପରିମାଣର ବୋନସ ଦେଇ ଚର୍ଚ୍ଚାକୁ ଆସିଥିଲା।

ଉତ୍ତରପ୍ରଦେଶର ଆଲିଗଡ଼ରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି, ଯାହା ଶୁଣିଲେ ଆପଣ ବି ହତବାକ ହୋଇଯିବେ। ଗତବର୍ଷ ନିଜ ଝିଅର ଭାବି ଜ୍ୱାଇଁଙ୍କ ସହ ଫେରାର ହୋଇ ଚର୍ଚ୍ଚାକୁ ଆସିଥିବା ଜଣେ ମହିଳା, ଏବେ ପୁଣି ଥରେ ନିଜର ନୂଆ ପ୍ରେମିକଙ୍କ ସହ ଚମ୍ପଟ ମାରିଛନ୍ତି। ଏଥର ସେ ନିଜର ପୂର୍ବତନ ସ୍ୱାମୀଙ୍କ ଭିଣୋଇ (ନଣନ୍ଦେଇ)ଙ୍କ ସହ ଫେରାର ହୋଇଯାଇଥିବା ଅଭିଯୋଗ ହୋଇଛି।

ଘଟଣାର ପୃଷ୍ଠଭୂମି

ଏହି ଘଟଣାଟି ଆଲିଗଡ଼ର 'ଅପନା ଦେବୀ' (କିଛି ସ୍ଥାନରେ ଅନିତା ଦେବୀ ନାମରେ ପରିଚିତ) ନାମକ ଜଣେ ମହିଳାଙ୍କ ସହ ଜଡିତ। ୨୦୨୫ ମସିହା ଏପ୍ରିଲ ମାସରେ ଅପନା ଦେବୀ ନିଜ ଝିଅର ବିବାହର ମାତ୍ର କିଛି ଦିନ ପୂର୍ବରୁ, ଭାବି ଜ୍ୱାଇଁ ରାହୁଲଙ୍କ ସହ ଫେରାର ହୋଇଯାଇଥିଲେ। ସେତେବେଳେ ଏହି ଘଟଣା ସୋସିଆଲ ମିଡିଆରେ ଖୁବ୍ ଚର୍ଚ୍ଚାର ବିଷୟ ପାଲଟିଥିଲା। ପରେ ପୋଲିସ ଉଭୟଙ୍କୁ ଧରିଥିଲେ ମଧ୍ୟ ସେମାନେ ଏକାଠି ରହିବାକୁ ଜିଦ୍ ଧରିବାରୁ ଆଇନ ଅନୁଯାୟୀ ସେମାନଙ୍କୁ ଛାଡି ଦିଆଯାଇଥିଲା।

କାହାଣୀରେ ନୂଆ ମୋଡ଼

ଗତ ୧୦ ମାସ ହେଲା ଅପନା ଦେବୀ ଏବଂ ତାଙ୍କର ସେହି 'ଜ୍ୱାଇଁ-ପ୍ରେମିକ' ରାହୁଲ ବିହାରର ସୀତାମାଢ଼ି ଜିଲ୍ଲାରେ ଏକାଠି ରହୁଥିଲେ। କିନ୍ତୁ ଏବେ କାହାଣୀରେ ଏକ ନୂଆ ଟ୍ୱିଷ୍ଟ ଆସିଛି। ରାହୁଲଙ୍କ ଅଭିଯୋଗ ଅନୁଯାୟୀ, ଅପନା ଦେବୀ ବର୍ତ୍ତମାନ ତାଙ୍କୁ ଧୋକା ଦେଇ ତାଙ୍କ ପୂର୍ବତନ ସ୍ୱାମୀ (ଜିତେନ୍ଦ୍ର)ଙ୍କ ଭିଣୋଇଙ୍କ ସହ ଫେରାର ହୋଇଯାଇଛନ୍ତି। କେବଳ ସେତିକି ନୁହେଁ, ଯିବା ସମୟରେ ସେ ଘରୁ ନଗଦ ୨ ଲକ୍ଷ ଟଙ୍କା ଏବଂ ସୁନା ଗହଣା ମଧ୍ୟ ନେଇ ଯାଇଥିବା ଅଭିଯୋଗ ହୋଇଛି।

ଥାନାରେ ଅଭିଯୋଗ

ଏହି ଘଟଣା ପରେ ରାହୁଲ ଆଲିଗଡ଼ ଫେରି ପୋଲିସ ନିକଟରେ ନ୍ୟାୟ ଭିକ୍ଷା କରିଛନ୍ତି। ଯେଉଁ ରାହୁଲ ପାଇଁ ଅପନା ଦେବୀ ନିଜ ସ୍ୱାମୀ ଓ ପିଲାଙ୍କୁ ଛାଡିଥିଲେ, ଆଜି ସେହି ରାହୁଲଙ୍କୁ ଛାଡି ସେ ଅନ୍ୟ ପୁରୁଷଙ୍କ ସହ ଚାଲିଯାଇଛନ୍ତି। ପୋଲିସ ବର୍ତ୍ତମାନ ଏହି ବିଚିତ୍ର ପ୍ରେମ କାହାଣୀ ଏବଂ ଚୋରି ଅଭିଯୋଗର ତଦନ୍ତ କରୁଛି।

ଉତ୍ତରପ୍ରଦେଶର ଆଗ୍ରା ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି। ଏଠାରେ ଜଣେ ଅଭିଯୁକ୍ତ ଗିରଫଦାରୀରୁ ବଞ୍ଚିବା ପାଇଁ ନିଜକୁ ମୃତ ଘୋଷଣା କରି କୋର୍ଟ କେସ୍ ବନ୍ଦ କରାଇଥିଲେ। କିନ୍ତୁ ଦୀର୍ଘ ୧୨ ବର୍ଷ ପରେ ସେହି ବ୍ୟକ୍ତି କେବଳ ଜୀବିତ ଥିବା ଜଣାପଡିନାହିଁ, ବରଂ ସହରର ରାସ୍ତାରେ ବିନ୍ଦାସ ସ୍କୁଟି ଚଳାଉଥିବା ବେଳେ ଧରାପଡିଛନ୍ତି। ଏହି ଘଟଣା ପୋଲିସ ଓ ନ୍ୟାୟିକ ବ୍ୟବସ୍ଥାକୁ ମଧ୍ୟ ଚକିତ କରିଦେଇଛି।

ମୂଳ ଘଟଣାଟି ୧୯୯୯ ମସିହାର। ହରିପର୍ବତ ଥାନାରେ ରାଜକୁମାର ବର୍ମା ବନାମ ବିଦ୍ୟା ଦେବୀ ଓ ଅନ୍ୟମାନଙ୍କ ବିରୋଧରେ ଜାଲିଆତି ଅଭିଯୋଗରେ ଏକ ମାମଲା ରୁଜୁ ହୋଇଥିଲା। ଏଥିରେ ତାରା ଚନ୍ଦ୍ର ଶର୍ମା ନାମକ ଜଣେ ଅଭିଯୁକ୍ତ ଥିଲେ। ମାମଲାର ଶୁଣାଣି ସମୟରେ ଗିରଫଦାରୀରୁ ବର୍ତ୍ତିବା ପାଇଁ ୨୦୧୩ ମସିହାରେ କୋର୍ଟରେ ଏକ ମୃତ୍ୟୁ ପ୍ରମାଣପତ୍ର ଦାଖଲ କରାଯାଇଥିଲା, ଯେଉଁଥିରେ ଦର୍ଶାଯାଇଥିଲା ଯେ ୧୯୯୮ରେ ତାଙ୍କର ମୃତ୍ୟୁ ଘଟିଛି। ପୋଲିସର ରିପୋର୍ଟ ଆଧାରରେ କୋର୍ଟ ୨୦ ସେପ୍ଟେମ୍ବର ୨୦୧୩ରେ ଅଭିଯୁକ୍ତ ବିରୋଧରେ କାର୍ଯ୍ୟାନୁଷ୍ଠାନ ବନ୍ଦ କରିଦେଇଥିଲେ।

ଏହି ମାମଲାରେ ନୂଆ ମୋଡ଼ ସେତେବେଳେ ଆସିଲା, ଯେତେବେଳେ ୫ ନଭେମ୍ବର ୨୦୨୫ରେ ଅଭିଯୋଗକାରୀ ରାଜକୁମାର ବର୍ମା, 'ମୃତ' ଅଭିଯୁକ୍ତ ତାରା ଚନ୍ଦ୍ର ଶର୍ମାଙ୍କୁ ଗାନ୍ଧୀ ନଗର ଅଞ୍ଚଳରେ ସ୍କୁଟି ଚଳାଉଥିବା ଦେଖିଲେ। ସନ୍ଦେହ ହେବାରୁ ସେ ତାଙ୍କର ଫଟୋ ଉଠାଇ RTO ଅଫିସରେ ଯାଞ୍ଚ କରାଇଥିଲେ। ଆଶ୍ଚର୍ଯ୍ୟର କଥା ହେଲା, ଯେଉଁ ବ୍ୟକ୍ତି ୧୯୯୮ରେ ମୃତ୍ୟୁବରଣ କରିଥିବା ଦାବି କରାଯାଇଥିଲା, ତାଙ୍କ ନାମରେ ଜୁଲାଇ ୨୦୧୬ରେ ସ୍କୁଟି ପଞ୍ଜୀକରଣ ହୋଇଥିଲା। ଏହା ବ୍ୟତୀତ ସେ ବ୍ୟାଙ୍କ ଖାତା ମଧ୍ୟ ସକ୍ରିୟ ଭାବେ ବ୍ୟବହାର କରୁଥିବା ଜଣାପଡିଛି।

ଅଦାଲତଙ୍କ ନିର୍ଦ୍ଦେଶ କ୍ରମେ ନ୍ୟୁ ଆଗ୍ରା ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା। ତଦନ୍ତକାରୀ ଅଧିକାରୀ ମଧୁର କୁଶୱାହା ଅଭିଯୁକ୍ତଙ୍କ ଘରେ ପହଞ୍ଚି ତାଙ୍କୁ ଜୀବିତ ଥିବା ପାଇଲେ। ଅଭିଯୁକ୍ତଙ୍କ ପୁଅ ଆଶୁତୋଷ ଶର୍ମା ମଧ୍ୟ ସ୍ୱୀକାର କରିଛନ୍ତି ଯେ ତାଙ୍କ ବାପା ବୃଦ୍ଧାବସ୍ଥା ଯୋଗୁଁ ଘରେ ରୁହନ୍ତି ଏବଂ ବେଳେବେଳେ ସ୍କୁଟି ଚଳାନ୍ତି। ବର୍ତ୍ତମାନ ଅଭିଯୋଗକାରୀ କୋର୍ଟକୁ ଗୁମରାହ କରିବା ଏବଂ ଜାଲ୍ ଦସ୍ତାବିଜ୍ ପ୍ରସ୍ତୁତ କରିବା ଅଭିଯୋଗରେ ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି।

ଉତ୍ତରପ୍ରଦେଶର ଦେଓରିଆ ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ମୋମୋ ଖାଇବା ଲୋଭରେ ଜଣେ ସପ୍ତମ ଶ୍ରେଣୀର ଛାତ୍ର ଘରୁ ଲକ୍ଷ ଲକ୍ଷ ଟଙ୍କାର ସୁନା ଗହଣା ଚୋରି କରି ମୋମୋ ଦୋକାନୀକୁ ଦେଇଥିବା ଅଭିଯୋଗ ହୋଇଛି। ପରିବାର ଲୋକେ ଏହି ଘଟଣା ଜାଣିବା ପରେ ସ୍ତବ୍ଧ ହୋଇଯାଇଛନ୍ତି।

ମୋମୋ ଲୋଭରେ ଫସିଗଲା ପିଲା

ଏହି ଘଟଣାଟି ରାମପୁର କାରଖାନା ଥାନା ଅଞ୍ଚଳରେ ଘଟିଛି। ଭଗବାନପୁର ତିୱାରୀ ଗାଁର ବାସିନ୍ଦା ତଥା ବାରଣାସୀର ଏକ ମନ୍ଦିରରେ ପୂଜକ ଥିବା ବିମଲେଶ ମିଶ୍ର ପୋଲିସ ନିକଟରେ ଏନେଇ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ, ଡୁମରୀ ଛକରେ ମୋମୋ ଦୋକାନ କରୁଥିବା କିଛି ଯୁବକ ତାଙ୍କ ପୁଅକୁ ମୋମୋ ଖୁଆଇବାର ଲୋଭ ଦେଖାଇ ନିଜ ପ୍ରଭାବକୁ ଆଣିଥିଲେ। ପିଲାଟି ମୋମୋ ଖାଇବାକୁ ଭଲ ପାଉଥିବାରୁ ଅଭିଯୁକ୍ତମାନେ ତା’ର ଫାଇଦା ଉଠାଇଥିଲେ।

୮୬ ଲକ୍ଷ ଟଙ୍କାର ଗହଣା ଗାଏବ

ଦୋକାନୀଙ୍କ କଥାରେ ପଡ଼ି ନାବାଳକ ଜଣକ ଘରର ଆଲମିରାରୁ ପ୍ରାୟ ୮୬ ଲକ୍ଷ ଟଙ୍କାର ସୁନା ଓ ରୂପା ଗହଣା ଚୋରି କରି ଅଭିଯୁକ୍ତମାନଙ୍କୁ ଦେଇଦେଇଥିଲା। ବିମଲେଶ ମିଶ୍ର କହିଛନ୍ତି ଯେ, ଏହି ଗହଣାଗୁଡ଼ିକ ତାଙ୍କ ଭଉଣୀ ଏବଂ ତାଙ୍କ ନିଜର ଥିଲା, ଯାହାକୁ ଘରେ ସୁରକ୍ଷିତ ରଖାଯାଇଥିଲା।

କେମିତି ସାମ୍ନାକୁ ଆସିଲା ଘଟଣା?

ରବିବାର ଦିନ ଯେତେବେଳେ ବିମଲେଶଙ୍କ ଭଉଣୀ ନିଜ ଗହଣା ମାଗିଥିଲେ, ସେତେବେଳେ ଆଲମିରା ଖୋଲିବା ପରେ ସବୁ ଗହଣା ଗାଏବ ଥିବା ଦେଖିବାକୁ ମିଳିଥିଲା। ପରିବାର ଲୋକେ ତୁରନ୍ତ ପୁଅକୁ ପଚରାଉଚରା କରିବାରୁ ସେ ସ୍ୱୀକାର କରିଥିଲା ଯେ ମୋମୋ ବଦଳରେ ସେ ଦୋକାନୀକୁ ଗହଣା ଦେଇଛି। ପିଲାଟିର ବାପା ଅଭିଯୋଗ କରିଛନ୍ତି ଯେ ତିନି ଜଣ ଯୁବକ ମିଶି ପିଲାର ମାସୁମିୟତର ଫାଇଦା ଉଠାଇ ଏହି ଚୋରି କରାଇଛନ୍ତି।

ଏତେ ବଡ଼ ପରିମାଣର ଗହଣା ଚୋରି ହେବା ପରେ ପରିବାର ଲୋକେ ଗଭୀର ମାନସିକ ଓ ଆର୍ଥିକ ସଙ୍କଟରେ ପଡ଼ିଯାଇଛନ୍ତି। ରାମପୁର କାରଖାନା ଥାନା ଅଧିକାରୀ ଦେବେନ୍ଦ୍ର କୁମାର ସିଂହ କହିଛନ୍ତି ଯେ ଏନେଇ ମାମଲା ରୁଜୁ କରାଯାଇଛି। ପୋଲିସ ଘଟଣାର ତଦନ୍ତ ଆରମ୍ଭ କରିଛି ଏବଂ ସତ୍ୟାସତ୍ୟ ଜାଣିବା ପାଇଁ ପିଲାଟିକୁ ମଧ୍ୟ ପଚରାଉଚରା କରାଯାଉଛି।

ସୋସିଆଲ ମିଡିଆରେ ବର୍ତ୍ତମାନ ଏକ ଆଶ୍ଚର୍ଯ୍ୟଜନକ ଭିଡିଓ ଭାଇରାଲ ହେବାରେ ଲାଗିଛି, ଯାହାକୁ ଦେଖିଲେ ଆପଣଙ୍କୁ ନିଉଟନଙ୍କ ତୃତୀୟ ନିୟମ (କ୍ରିୟା ଓ ପ୍ରତିକ୍ରିୟା) ମନେ ପଡିଯିବ। ଛତିଶଗଡ଼ର ବିଳାସପୁରରୁ ଏହି ଘଟଣା ସାମ୍ନାକୁ ଆସିଛି, ଯେଉଁଠାରେ ମାଟି ତଳୁ ହଠାତ୍ ସୁନାମି ଭଳି ପାଣି ବାହାରିବାର ଦୃଶ୍ୟ ସମସ୍ତଙ୍କୁ ଚକିତ କରିଦେଇଛି। ଘଟଣାଟି ଜାନୁଆରୀ ୨୯ ତାରିଖ ରାତି ପ୍ରାୟ ୮ଟା ୨୫ ମିନିଟ୍ ସମୟରେ ଘଟିଥିବା କୁହାଯାଉଛି।

ସୂଚନା ଅନୁଯାୟୀ, ଏକ ଖାଲି ପ୍ଲଟରେ ଭାରୀ ମେସିନ୍ ସାହାଯ୍ୟରେ ବୋରିଂ କାମ ଚାଲିଥିଲା। ବୋରିଂ ପାଇଁ ବଡ଼ ଓ ଶକ୍ତିଶାଳୀ ମେସିନ୍ ବ୍ୟବହାର କରାଯାଉଥିବାରୁ ମାଟି ତଳେ ପ୍ରବଳ ଚାପ ସୃଷ୍ଟି ହୋଇଥିଲା। ଏହି ଚାପ ପାଖରେ ଥିବା ଏକ ଘର ପାଇଁ ବିପଦ ପାଲଟିଥିଲା। କୁହାଯାଉଛି ଯେ, ପଡ଼ୋଶୀଙ୍କ ଘରେ ପୂର୍ବରୁ ଲାଗିଥିବା ବୋରିଂ ପାଇପ୍ ଏହି ‘ହାଇ ପ୍ରେସର’ (High Pressure) ସହ୍ୟ କରିପାରିଲାନାହିଁ ଏବଂ ହଠାତ୍ ଫାଟି ଯାଇଥିଲା।

ସିସିଟିଭିରେ କଏଦ ହେଲା ଭୟଙ୍କର ଦୃଶ୍ୟ

छत्तीसगढ़ | बिलासपुर में एक प्लॉट में हैवी मशीन से बोरिंग करने का काम हो रहा था। हाईप्रेशर बनने से पड़ोसी के मकान का बोरिंग पाइप फट गया। एकदम जमीन फट गई और पानी की धार फूट पड़ी। pic.twitter.com/ClVFNwoGh2

— Sachin Gupta (@SachinGuptaUP) January 31, 2026

ଏହି ଘଟଣାର ଦୃଶ୍ୟ ପାଖରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଛି। ଭିଡିଓରେ ଦେଖାଯାଉଛି ଯେ, ପ୍ରଥମେ ଗେଟ୍ ଭିତରୁ ଧୀରେ ଧୀରେ ପାଣି ବାହାରୁଛି। କିନ୍ତୁ କିଛି ସେକେଣ୍ଡ ମଧ୍ୟରେ ପରିସ୍ଥିତି ସମ୍ପୂର୍ଣ୍ଣ ବଦଳିଯାଉଛି। ହଠାତ୍ ଜମିରେ ଫାଟ ସୃଷ୍ଟି ହୋଇ ପାଣିର ଏକ ଶକ୍ତିଶାଳୀ ଧାର ଉପରକୁ ଉଠୁଛି। ଦୃଶ୍ୟଟି ଏପରି ଥିଲା ଯେମିତି ପାଣି ନିଜେ ମାଟି ଚିରି ରାସ୍ତା ବନାଇ ବାହାରକୁ ଆସୁଛି। ସେଠାରେ ଉପସ୍ଥିତ ଜଣେ ବ୍ୟକ୍ତି ଭୟରେ ଦୌଡ଼ି ପଳାଉଥିବା ମଧ୍ୟ ଦେଖିବାକୁ ମିଳିଛି।

ଏହି ଘଟଣା ପରେ ବୋରିଂ କାମ ସମୟରେ ସୁରକ୍ଷା ନିୟମ ପାଳନ ଉପରେ ପ୍ରଶ୍ନ ଉଠିଛି। ବିଶେଷଜ୍ଞଙ୍କ ମତରେ, ବୋରିଂ କରିବା ପୂର୍ବରୁ ଆଖପାଖ ଅଞ୍ଚଳର ସର୍ଭେ କରିବା ନିହାତି ଜରୁରୀ। ଯଦି ପାଖରେ ପୁରୁଣା ବୋରିଂ, ପାଣି ପାଇପଲାଇନ୍ କିମ୍ବା ଦୁର୍ବଳ ମାଟି ଥାଏ, ତେବେ ସତର୍କତା ଅବଲମ୍ବନ କରାଯିବା ଉଚିତ୍। ଏହି ଭିଡିଓ ଏବେ ଇଣ୍ଟରନେଟରେ ଚର୍ଚ୍ଚାର ବିଷୟ ପାଲଟିଛି।

ଉତ୍ତର ପ୍ରଦେଶର ରାଜଧାନୀ ଲକ୍ଷ୍ନୌରେ ଏକ ଅତ୍ୟନ୍ତ ଦୁଃଖଦାୟକ ତଥା ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ସ୍ୱାମୀ ମଜାରେ "ମାଙ୍କେଡି" (Monkey) ବୋଲି କହିବା ପରେ, ଏଥିରେ ମର୍ମାହତ ହୋଇ ଜଣେ ମହିଳା ଆତ୍ମହତ୍ୟା କରିଛନ୍ତି। ମୃତ ମହିଳାଙ୍କ ନାମ ତନୁ ସିଂ ବୋଲି ଜଣାପଡିଛି, ଯିଏ ମଡେଲିଂ କ୍ଷେତ୍ରରେ ନିଜର କ୍ୟାରିୟର ଗଢିବାକୁ ଆଗ୍ରହୀ ଥିଲେ।

ସୂଚନା ଅନୁଯାୟୀ, ମୃତକ ତନୁ ସିଂ ତାଙ୍କ ସ୍ୱାମୀ ରାହୁଲ ଶ୍ରୀବାସ୍ତବଙ୍କ ସହ ଲକ୍ଷ୍ନୌର ଇନ୍ଦିରାନଗର ଅଞ୍ଚଳରେ ରହୁଥିଲେ। ତନୁଙ୍କ ଭଉଣୀ ଅଞ୍ଜଳିଙ୍କ ସୂଚନା ମୁତାବକ, ପରିବାର ଲୋକେ ବୁଧବାର ସନ୍ଧ୍ୟାରେ ସୀତାପୁରରୁ ଏକ ସମ୍ପର୍କୀୟଙ୍କ ଘରୁ ଫେରିଥିଲେ। ଘରେ ପହଞ୍ଚିବା ପରେ ସମସ୍ତେ ଏକାଠି ବସି ହସଖୁସିରେ କଥା ହେଉଥିଲେ। ଏହି ସମୟରେ ରାହୁଲ ମଜାରେ ତନୁଙ୍କୁ "ମାଙ୍କେଡି" ବୋଲି ସମ୍ବୋଧନ କରିଥିଲେ। ଏହି କଥାରେ ତନୁ ଖୁବ୍ ରାଗିଯାଇଥିଲେ ଏବଂ ଅନ୍ୟ ଏକ ରୁମକୁ ଚାଲିଯାଇଥିଲେ।

ବନ୍ଦ କୋଠରୀରୁ ମିଳିଲା ମୃତଦେହ

ପେଶାରେ ଜଣେ ଅଟୋ ଚାଳକ ଥିବା ରାହୁଲ କିଛି ସମୟ ପରେ ଖାଇବା ଆଣିବା ପାଇଁ ବାହାରକୁ ଯାଇଥିଲେ। ସେ ଫେରିବା ପରେ ତନୁଙ୍କୁ ଡାକିବାକୁ ଅଞ୍ଜଳିଙ୍କୁ କହିଥିଲେ। କିନ୍ତୁ ରୁମ୍‌ର କବାଟ ଭିତରୁ ବନ୍ଦ ଥିଲା। ବାରମ୍ବାର ଡାକିବା ସତ୍ତ୍ୱେ କୌଣସି ଉତ୍ତର ନ ମିଳିବାରୁ ଅଞ୍ଜଳି ଝରକା ଦେଇ ଦେଖିଥିଲେ ଯେ ତନୁ ଏକ କପଡା ସାହାଯ୍ୟରେ ଫାଶୀ ଲଗାଇ ଝୁଲୁଛନ୍ତି। ପଡୋଶୀ ଏବଂ ରାହୁଲ ତୁରନ୍ତ କବାଟ ଭାଙ୍ଗି ତାଙ୍କୁ ଉଦ୍ଧାର କରି ରାମ ମନୋହର ଲୋହିଆ ଡାକ୍ତରଖାନାକୁ ନେଇଥିଲେ, ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

୪ ବର୍ଷ ତଳେ ହୋଇଥିଲା ପ୍ରେମ ବିବାହ

ପରିବାର ଲୋକଙ୍କ କହିବାନୁସାରେ, ତନୁ ଏବଂ ରାହୁଲ ପ୍ରାୟ ୪ ବର୍ଷ ତଳେ ପ୍ରେମ ବିବାହ କରିଥିଲେ, ଯାହାକୁ ପରେ ଉଭୟ ପରିବାର ଗ୍ରହଣ କରିନେଇଥିଲେ। ଦମ୍ପତିଙ୍କର କୌଣସି ସନ୍ତାନ ନଥିଲେ ଏବଂ ତନୁଙ୍କର ମଡେଲିଂ ପ୍ରତି ବହୁତ ଦୁର୍ବଳତା ଥିଲା। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ବର୍ତ୍ତମାନ ସୁଦ୍ଧା ଏନେଇ କୌଣସି ଲିଖିତ ଅଭିଯୋଗ ହୋଇନାହିଁ।

ଉତ୍ତର ପ୍ରଦେଶର ଗାଜିଆବାଦରୁ ଏକ ହୃଦୟ ବିଦାରକ ତଥା ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ମୋଦିନଗର ଅଞ୍ଚଳରେ ଈଷା ନାମକ ଜଣେ ମହିଳା ପାରିବାରିକ କଳହ ସମୟରେ ନିଜ ସ୍ୱାମୀ ବିପିନଙ୍କ ଜିଭକୁ ଦାନ୍ତରେ କାଟି ଶରୀରରୁ ଅଲଗା କରିଦେଇଛନ୍ତି। ଡାକ୍ତରଙ୍କ କହିବା ମୁତାବକ, ବିପିନଙ୍କ ଜିଭର ରକ୍ତ କୋଷିକା ସମ୍ପୂର୍ଣ୍ଣ ରୂପେ କଟିଯାଇଛି, ଯାହା ଫଳରେ ସେ ଆଉ କେବେ ମଧ୍ୟ କଥା କହିପାରିବେ ନାହିଁ।

ଏହି ଘଟଣା ପରେ ବିପିନ ଯନ୍ତ୍ରଣାରେ ଛଟପଟ ହେଉଥିବା ବେଳେ ପରିବାର ଲୋକେ ତାଙ୍କ କଟା ଜିଭର ଟୁକୁଡାକୁ ଏକ କପଡାରେ ଗୁଡାଇ ଫ୍ରିଜରେ ରଖିଛନ୍ତି। ବିପିନଙ୍କ ଭାଇ ସନି କହିଛନ୍ତି ଯେ, ଭବିଷ୍ୟତରେ କୋର୍ଟ କିମ୍ବା ପୋଲିସ ନିକଟରେ ଅଭିଯୁକ୍ତ ପତ୍ନୀଙ୍କ ବିରୋଧରେ ଦୃଢ ପ୍ରମାଣ ଦେବା ପାଇଁ ସେମାନେ ଏହାକୁ ସାଇତି ରଖିଛନ୍ତି।

ସ୍ୱାମୀର ଦରମା ୧୭ ହଜାର, ସ୍ତ୍ରୀର ସଉକ ଦାମୀ କଫି

ବିପିନଙ୍କ ସାଙ୍ଗସାଥୀ ଏବଂ ପରିବାର ଲୋକଙ୍କ କହିବା ଅନୁଯାୟୀ, ଈଷାଙ୍କ ଚରିତ୍ର ଏବଂ ବିଳାସପୂର୍ଣ୍ଣ ଜୀବନଶୈଳୀ ଏହି ବିବାଦର ମୁଖ୍ୟ କାରଣ ଥିଲା। ବିପିନ ଏକ ୱେଲଡିଂ ଫ୍ୟାକ୍ଟ୍ରିରେ କାମ କରି ମାସକୁ ମାତ୍ର ୧୭ ରୁ ୧୮ ହଜାର ଟଙ୍କା ରୋଜଗାର କରନ୍ତି। କିନ୍ତୁ ତାଙ୍କ ସ୍ତ୍ରୀ ଈଷା ମଦ, ସିଗାରେଟ୍ ଏବଂ ଦାମୀ ରେଷ୍ଟୁରାଣ୍ଟରେ ପାର୍ଟି କରିବାକୁ ପସନ୍ଦ କରୁଥିଲେ। ସେ ୪୦୦ ଟଙ୍କାର କଫି ପିଇବା ସହ ନିଜ ବୟଫ୍ରେଣ୍ଡଙ୍କ ସହ ବୁଲିବା ପାଇଁ ସ୍ୱାମୀଙ୍କୁ ଟଙ୍କା ମାଗୁଥିଲେ। ବିପିନଙ୍କ ଘରୁ ଗର୍ଭପାତ ଔଷଧ ଏବଂ ସିଗାରେଟ ଟୁକୁଡା ମଧ୍ୟ ମିଳିଛି।

ଜାତକ ମିଳୁନଥିଲା, ତଥାପି ହୋଇଥିଲା ବାହାଘର

ବିପିନଙ୍କ ପିତା ରାମଅବତାର ବ୍ୟାଙ୍କରୁ ୧୦ ଲକ୍ଷ ଟଙ୍କା ଋଣ କରି ଏହି ବିବାହ କରାଇଥିଲେ। ବିବାହ ସମୟରେ ପଣ୍ଡିତ ଜାତକ ମିଳୁନଥିବା ନେଇ ଚେତାବନୀ ଦେଇଥିଲେ ମଧ୍ୟ ମଧ୍ୟସ୍ଥିଙ୍କ ଚାପରେ ବିବାହ ହୋଇଥିଲା। ବର୍ତ୍ତମାନ ବିପିନଙ୍କ ମାଆଙ୍କ ଅଭିଯୋଗ କ୍ରମେ ମୋଦିନଗର ପୋଲିସ ଅଭିଯୁକ୍ତ ଈଷାଙ୍କୁ ଗିରଫ କରି ଜେଲ ପଠାଇଛି ଏବଂ ଘଟଣାର ଅଧିକ ତଦନ୍ତ କରୁଛି।