ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ପୁଣିଥରେ ଉତ୍ତେଜନା ଦେଖାଦେଇଛି। ପାକିସ୍ତାନ (Pakistan) ପକ୍ଷରୁ ଆଫଗାନିସ୍ତାନ (Afghanistan) ଉପରେ କରାଯାଇଥିବା ଏକାଧିକ ଏୟାରଷ୍ଟ୍ରାଇକ ବା ବୈମାନିକ ଆକ୍ରମଣରେ ଅତିକମରେ ୧୩ ଜଣଙ୍କର ମୃତ୍ୟୁ ଘଟିଥିବା ବେଳେ ୧୪ ଜଣ ଆହତ ହୋଇଛନ୍ତି।

ଆକ୍ରମଣର ନିଶାନା ଏବଂ ମୃତାହତ

ତାଲିବାନର ମୁଖ୍ୟ ମୁଖପାତ୍ର ଜବିହୁଲ୍ଲା ମୁଜାହିଦ (Zabihullah Mujahid) ବୁଧବାର ଦିନ ସୂଚନା ଦେଇଛନ୍ତି ଯେ, ପାକିସ୍ତାନୀ ସେନା ଆଫଗାନିସ୍ତାନର ଖୋଷ୍ଟ, କୁନାର ଏବଂ ପାକତିକା (Khost, Kunar and Paktika) ପ୍ରଦେଶକୁ ଟାର୍ଗେଟ କରି ଏହି ଆକ୍ରମଣ କରିଛି। ଏହି ଆକ୍ରମଣରେ ସାଧାରଣ ନାଗରିକଙ୍କ ଘରଗୁଡ଼ିକ ଉପରେ ବୋମାମାଡ଼ କରାଯାଇଛି। ସବୁଠାରୁ ଦୁଃଖଦାୟକ ବିଷୟ ହେଉଛି, ମୃତକଙ୍କ ମଧ୍ୟରେ ୧୧ ଜଣ ଶିଶୁ, ଜଣେ ମହିଳା ଏବଂ ଜଣେ ବୃଦ୍ଧ ସାମିଲ ଅଛନ୍ତି। ଅବଶ୍ୟ, ପାକିସ୍ତାନ ପକ୍ଷରୁ ଏହି ଆକ୍ରମଣକୁ ନେଇ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ପ୍ରତିକ୍ରିୟା ମିଳିପାରି ନାହିଁ।

ଉଭୟ ଦେଶ ମଧ୍ୟରେ ବଢୁଛି ବିବାଦ

ଗତ ଫେବୃଆରୀ ମାସଠାରୁ ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ସୀମା ବିବାଦକୁ ନେଇ କ୍ରମାଗତ ଭାବେ ସଂଘର୍ଷ ଲାଗିରହିଛି। ଯେଉଁଥିରେ ଶହ ଶହ ଲୋକଙ୍କର ଜୀବନ ଗଲାଣି। ମଙ୍ଗଳବାର ଦିନ ପାକିସ୍ତାନର ଖାଇବର ପାଖ୍ତୁନଖ୍ୱା (Khyber Pakhtunkhwa) ପ୍ରଦେଶରେ ଥିବା ଏକ ସୁରକ୍ଷା ପୋଷ୍ଟ ଉପରେ ଆତଙ୍କବାଦୀମାନେ ଆକ୍ରମଣ କରିଥିଲେ। ଏଥିରେ ୬ ଜଣ ପାକିସ୍ତାନୀ ସୁରକ୍ଷାକର୍ମୀଙ୍କ ମୃତ୍ୟୁ ହୋଇଥିଲା ବେଳେ ପାଲଟା ଜବାବରେ ସେନା ୮ ଜଣ ଆତଙ୍କବାଦୀଙ୍କୁ ନିପାତ କରିଥିଲା। ଏହି ଘଟଣାର ଠିକ୍ ପରେ ପରେ ଆଫଗାନିସ୍ତାନ ଉପରେ ଏହି ଏୟାରଷ୍ଟ୍ରାଇକ୍ ହୋଇଥିବା କୁହାଯାଉଛି।

ଆତଙ୍କବାଦକୁ ନେଇ ପାକିସ୍ତାନର ଅଭିଯୋଗ

ପାକିସ୍ତାନର କହିବା ଅନୁଯାୟୀ, ଆଫଗାନିସ୍ତାନ ନିଜ ମାଟିରେ ତେହେରିକ୍-ଇ-ତାଲିବାନ ପାକିସ୍ତାନ (TTP) ଆତଙ୍କବାଦୀଙ୍କୁ ଆଶ୍ରୟ ଦେଉଛି, ଯେଉଁମାନେ ପାକିସ୍ତାନ ଭିତରେ ପଶି ଆକ୍ରମଣ କରୁଛନ୍ତି। ଯଦିଓ ଟିଟିପି ଏବଂ ଆଫଗାନିସ୍ତାନର ତାଲିବାନ ଦୁଇଟି ଅଲଗା ସଂଗଠନ, ତଥାପି ସେମାନଙ୍କ ମଧ୍ୟରେ ସମ୍ପର୍କ ରହିଛି ବୋଲି ପାକିସ୍ତାନ ଅଭିଯୋଗ କରୁଛି। ତେବେ ୨୦୨୧ ମସିହାରୁ ଆଫଗାନିସ୍ତାନରେ କ୍ଷମତାକୁ ଆସିଥିବା ତାଲିବାନ ସରକାର ଏହି ଅଭିଯୋଗକୁ ସମ୍ପୂର୍ଣ୍ଣ ଭାବେ ଖଣ୍ଡନ କରିଆସୁଛି। ଆଫଗାନିସ୍ତାନ ମାଟିକୁ କୌଣସି ଦେଶ ବିରୋଧରେ ବ୍ୟବହାର କରିବାକୁ ଦିଆଯିବ ନାହିଁ ବୋଲି ତାଲିବାନ ପକ୍ଷରୁ ସ୍ପଷ୍ଟ କରାଯାଇଛି।

ନୂଆଦିଲ୍ଲୀ: ପାକିସ୍ତାନର ଅଶାନ୍ତ ଖାଇବର ପଖତୁନଖ୍ୱା ପ୍ରଦେଶରେ ଶୁକ୍ରବାର ଏକ ହୃଦୟବିଦାରକ ଘଟଣା ଘଟିଛି। ଏଠାରେ ଏକ ବିବାହ ଉତ୍ସବ ଚାଲିଥିବା ସମୟରେ ଜଣେ ଆତ୍ମଘାତୀ ବିସ୍ଫୋରଣକାରୀ ନିଜକୁ ଉଡ଼ାଇ ଦେବା ଫଳରେ ଅତିକମରେ ୭ ଜଣଙ୍କର ମୃତ୍ୟୁ ଘଟିଥିବା ବେଳେ ୨୫ ଜଣ ଆହତ ହୋଇଛନ୍ତି। ଏହି ଆକ୍ରମଣ ଡେରା ଇସମାଇଲ ଖାନ ଜିଲ୍ଲାରେ ଘଟିଛି।

ରିପୋର୍ଟ ଅନୁଯାୟୀ, ସରକାରୀ ସମର୍ଥକ ଗୋଷ୍ଠୀ ନେତା ନୁର ଆଲମ ମେହସୁଦଙ୍କ ବାସଭବନରେ ଏହି ବିବାହ ଉତ୍ସବ ଆୟୋଜିତ ହୋଇଥିଲା। ଅତିଥିମାନେ ନାଚଗୀତରେ ମସଗୁଲ ଥିବା ସମୟରେ ହଠାତ୍ ଏହି ଶକ୍ତିଶାଳୀ ବିସ୍ଫୋରଣ ଘଟିଥିଲା। ବିସ୍ଫୋରଣର ତୀବ୍ରତା ଏତେ ଅଧିକ ଥିଲା ଯେ ଘରର ଛାତ ସମ୍ପୂର୍ଣ୍ଣ ଭୁଶୁଡି ପଡିଥିଲା, ଯାହାଫଳରେ ଅନେକ ଲୋକ ଭଗ୍ନାବଶେଷ ତଳେ ଚାପି ହୋଇଯାଇଥିଲେ। ଏହା ଉଦ୍ଧାର କାର୍ଯ୍ୟରେ ମଧ୍ୟ ବାଧା ସୃଷ୍ଟି କରିଥିଲା।

ମୃତକଙ୍କ ମଧ୍ୟରେ ଶାନ୍ତି କମିଟିର ପ୍ରମୁଖ ନେତା ୱାହିଦୁଲ୍ଲା ମେହସୁଦ (ଜିଗ୍ରି ମେହସୁଦ) ସାମିଲ ଅଛନ୍ତି। ସେ ଜଣେ ପୂର୍ବତନ ସନ୍ତ୍ରାସବାଦୀ ଥିଲେ, ଯିଏକି ପରବର୍ତ୍ତୀ ସମୟରେ ସରକାରଙ୍କ ନିକଟରେ ଆତ୍ମସମର୍ପଣ କରି ଶାନ୍ତି ପ୍ରକ୍ରିୟାରେ ଯୋଗ ଦେଇଥିଲେ। ପୋଲିସର ସୂଚନା ଅନୁଯାୟୀ, ଏହା ଏକ ଆତ୍ମଘାତୀ ଆକ୍ରମଣ ଥିଲା ଏବଂ ଆହତମାନଙ୍କୁ ସ୍ଥାନୀୟ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।

ବର୍ତ୍ତମାନ ସୁଦ୍ଧା କୌଣସି ସନ୍ତ୍ରାସବାଦୀ ସଙ୍ଗଠନ ଏହି ଆକ୍ରମଣ ପାଇଁ ନିଜକୁ ଦାୟୀ କରିନାହାନ୍ତି। ତେବେ ଏହା ପଛରେ ପାକିସ୍ତାନୀ ତାଲିବାନ ବା ତେହେରିକ-ଇ-ତାଲିବାନ ପାକିସ୍ତାନ (TTP) ର ହାତ ଥିବା ସନ୍ଦେହ କରାଯାଉଛି। ଗତ କିଛି ଦିନ ହେବ ବନ୍ନୁ ଜିଲ୍ଲା ଏବଂ ଅନ୍ୟାନ୍ୟ ସ୍ଥାନରେ ଶାନ୍ତି କମିଟି ସଦସ୍ୟମାନଙ୍କୁ ଲକ୍ଷ୍ୟ କରି କ୍ରମାଗତ ଭାବେ ଆକ୍ରମଣ କରାଯାଉଛି।