ତାମିଲନାଡୁ ରାଜନୀତିରେ ଆଉ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟଙ୍କ ନେତୃତ୍ୱାଧୀନ ତାମିଲଗା ଭେଟ୍ରି କାଜାଗମ୍ (TVK) ସରକାରର ପ୍ରଥମ ମନ୍ତ୍ରିମଣ୍ଡଳ ସମ୍ପ୍ରସାରଣ ହେବାକୁ ଯାଉଛି। ରାଜ୍ୟ କ୍ୟାବିନେଟରେ ସାମିଲ ହେବାକୁ ଥିବା ୨୩ ଜଣ ନୂଆ ମନ୍ତ୍ରୀଙ୍କ ତାଲିକାକୁ ତାମିଲନାଡୁର ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକର ମଞ୍ଜୁରୀ ପ୍ରଦାନ କରିଛନ୍ତି। ମେ' ୨୧, ୨୦୨୬ (ଗୁରୁବାର) ସକାଳେ ଚେନ୍ନାଇ ସ୍ଥିତ ଲୋକଭବନରେ ଏହି ନବନିଯୁକ୍ତ ମନ୍ତ୍ରୀମାନଙ୍କର ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ।

୫୯ ବର୍ଷ ପରେ ସରକାରରେ କଂଗ୍ରେସ

ଏହି ମନ୍ତ୍ରିମଣ୍ଡଳ ସମ୍ପ୍ରସାରଣର ସବୁଠାରୁ ଗୁରୁତ୍ୱପୂର୍ଣ୍ଣ ଦିଗ ହେଉଛି କଂଗ୍ରେସର ପ୍ରତ୍ୟାବର୍ତ୍ତନ। ପ୍ରାୟ ୫୯ ବର୍ଷର ବ୍ୟବଧାନ ପରେ କଂଗ୍ରେସ ଦଳ ପୁଣିଥରେ ତାମିଲନାଡୁ ସରକାରରେ ସାମିଲ ହେବାକୁ ଯାଉଛି। ନୂତନ ମନ୍ତ୍ରୀମାନଙ୍କ ମଧ୍ୟରେ ୨୧ ଜଣ ଟିଭିକେ (TVK) ବିଧାୟକ ଥିବାବେଳେ ୨ ଜଣ କଂଗ୍ରେସ ବିଧାୟକ ରହିଛନ୍ତି। କଂଗ୍ରେସ ପକ୍ଷରୁ କିଲିୟୁର ବିଧାୟକ ରାଜେଶ କୁମାର ଏବଂ ମେଲୁର ବିଧାୟକ ପି. ବିଶ୍ୱନାଥନ ମନ୍ତ୍ରୀ ଭାବରେ ଶପଥ ଗ୍ରହଣ କରିବେ ବୋଲି ଜଣାପଡିଛି। ଏହା ସହିତ ତାମିଲନାଡୁ ସ୍ୱାଧୀନତା ପରେ ପ୍ରଥମ ଥର ପାଇଁ ଏକ ମେଣ୍ଟ ସରକାର ଦେଖିବାକୁ ପାଇବ।

ଶପଥ ଗ୍ରହଣ ସମାରୋହ ଏବଂ ସରକାରଙ୍କ ରୂପରେଖ

ମୁଖ୍ୟମନ୍ତ୍ରୀଙ୍କ ସୁପାରିଶ କ୍ରମେ ସମସ୍ତ ବର୍ଗ ଏବଂ ଅଞ୍ଚଳକୁ ପ୍ରତିନିଧିତ୍ୱ ଦେବା ପାଇଁ ଏହି ନୂତନ ତାଲିକା ପ୍ରସ୍ତୁତ କରାଯାଇଛି। ମେ' ୧୦ ତାରିଖରେ ସି. ଜୋସେଫ୍ ବିଜୟ ମୁଖ୍ୟମନ୍ତ୍ରୀ ଭାବରେ ଶପଥ ନେବା ସହ ତାଙ୍କ ସାଥିରେ ୯ ଜଣ ମନ୍ତ୍ରୀ କାର୍ଯ୍ୟଭାର ଗ୍ରହଣ କରିଥିଲେ। ବର୍ତ୍ତମାନ ଏହି ୨୩ ଜଣ ନୂଆ ମନ୍ତ୍ରୀଙ୍କ ଯୋଗଦାନ ପରେ ତାମିଲନାଡୁ ମନ୍ତ୍ରିମଣ୍ଡଳର ସଦସ୍ୟ ସଂଖ୍ୟା ଯଥେଷ୍ଟ ବୃଦ୍ଧି ପାଇବ। ଏହି ସମ୍ପ୍ରସାରଣ ଦ୍ୱାରା ପ୍ରଶାସନିକ କାର୍ଯ୍ୟକୁ ଅଧିକ ତ୍ୱରାନ୍ୱିତ କରିବା ଏବଂ ଲୋକାଭିମୁଖୀ ଯୋଜନାଗୁଡ଼ିକୁ ସୁଚାରୁରୂପେ ପରିଚାଳନା କରିବା ପାଇଁ ସରକାର ଲକ୍ଷ୍ୟ ରଖିଛନ୍ତି।

ତାମିଲନାଡୁ ବିଧାନସଭାରେ ନବନିର୍ବାଚିତ ମୁଖ୍ୟମନ୍ତ୍ରୀ ଥାଲାପତି ବିଜୟ ବହୁମତ ସାବ୍ୟସ୍ତ କରିବାକୁ ଯାଉଥିବା ବେଳେ ରାଜ୍ୟ ରାଜନୀତିରେ ଘନ ଘନ ପରିବର୍ତ୍ତନ ଦେଖିବାକୁ ମିଳୁଛି। ବୁଧବାର ଦିନ ବିଜୟଙ୍କ ନେତୃତ୍ୱାଧୀନ ତମିଝାଗା ଭେତ୍ରି କାଝାଗାମ୍ (TVK) ସରକାରଙ୍କ ଫ୍ଲୋର ଟେଷ୍ଟ (ବହୁମତ ପରୀକ୍ଷା) ହେବାକୁ ଥିବା ବେଳେ ଏହା ପୂର୍ବରୁ ପ୍ରମୁଖ ଦଳ AIADMK ର ଏକ ଗୋଷ୍ଠୀ ତାଙ୍କୁ ସମର୍ଥନ ଜଣାଇଛନ୍ତି। ଏହା ବିଜୟଙ୍କ ପାଇଁ ଏକ ବଡ଼ ଆଶ୍ୱସ୍ତି ଆଣିଦେଇଛି।

ବିଜୟଙ୍କ ସପକ୍ଷରେ AIADMK ର ବିଦ୍ରୋହୀ ଗୋଷ୍ଠୀ

ବରିଷ୍ଠ AIADMK ନେତା ସିଭି ସନମୁଗମ୍ ଙ୍କ ନେତୃତ୍ୱରେ ପ୍ରାୟ ୩୦ ଜଣ ବିଧାୟକ ମୁଖ୍ୟମନ୍ତ୍ରୀ ବିଜୟ ଏବଂ ତାଙ୍କ ମେଣ୍ଟ ସରକାରଙ୍କୁ ସମର୍ଥନ ଜଣାଇଛନ୍ତି। ଉଲ୍ଲେଖଯୋଗ୍ୟ ଯେ, ସଦ୍ୟ ସମାପ୍ତ ନିର୍ବାଚନରେ AIADMK ୪୭ଟି ଆସନ ଜିତିଥିବା ବେଳେ ସନମୁଗମ୍ ଦାବି କରିଛନ୍ତି ଯେ ଦଳର ସଂଖ୍ୟାଗରିଷ୍ଠ ବିଧାୟକ ତାଙ୍କ ସହ ଅଛନ୍ତି। DMK ସହ AIADMK ର ମେଣ୍ଟ ଗୁଜବକୁ ନେଇ ଅସନ୍ତୋଷ ବ୍ୟକ୍ତ କରି ସେ ଏହି ନିଷ୍ପତ୍ତି ନେଇଥିବା ପ୍ରକାଶ କରିଛନ୍ତି। ଅବଶ୍ୟ ସେ ଦଳ ଭାଙ୍ଗିବାକୁ ଚାହୁଁନାହାନ୍ତି ବୋଲି ସ୍ପଷ୍ଟ କରିଛନ୍ତି।

ବାଚସ୍ପତି ନିର୍ବାଚନ ଓ ବହୁମତ ସମୀକରଣ

ତାମିଲନାଡୁର ୨୩୪ ସଦସ୍ୟ ବିଶିଷ୍ଟ ବିଧାନସଭାରେ ସଂଖ୍ୟାଗରିଷ୍ଠତା ପାଇଁ ୧୧୮ ବିଧାୟକଙ୍କ ସମର୍ଥନ ଆବଶ୍ୟକ। ନିର୍ବାଚନରେ TVK ଏକାକୀ ୧୦୮ଟି ଆସନ ଜିତି ସର୍ବବୃହତ୍ତ ଦଳ ଭାବେ ଉଭା ହୋଇଛି। କଂଗ୍ରେସ (୫), CPI (୨), CPI-M (୨), VCK (୨) ଏବଂ ମୁସଲିମ୍ ଲିଗ୍ (୨) ର ସମର୍ଥନ ସହ ମେଣ୍ଟର ସଂଖ୍ୟା ୧୨୧ ରେ ପହଞ୍ଚିଛି। ଅନ୍ୟପକ୍ଷରେ, TVK ନିଜର ବରିଷ୍ଠ ନେତା ଜେସିଡି ପ୍ରଭାକର ଙ୍କୁ ବାଚସ୍ପତି ପଦ ପାଇଁ ମନୋନୀତ କରିଛି। ସେ ବାଚସ୍ପତି ହେବା ପରେ ସାଧାରଣ ଭୋଟିଂରେ ସାମିଲ ହୋଇପାରିବେ ନାହିଁ (କେବଳ ଟାଇ ସ୍ଥିତି ବ୍ୟତୀତ), ଯାହାଫଳରେ ଶାସକ ଦଳର ସଂଖ୍ୟାରୁ ଜଣେ ବିଧାୟକ କମିଯିବେ। ତଥାପି ମେଣ୍ଟ ପାଖରେ ପର୍ଯ୍ୟାପ୍ତ ସଂଖ୍ୟା ଥିବାରୁ ସରକାର ସୁରକ୍ଷିତ ଥିବା ଜଣାପଡ଼ିଛି।

ବିରୋଧୀ ନେତାଙ୍କ ସହ ସୌଜନ୍ୟମୂଳକ ସାକ୍ଷାତ

ଫ୍ଲୋର ଟେଷ୍ଟ ପୂର୍ବରୁ ମୁଖ୍ୟମନ୍ତ୍ରୀ ବିଜୟ ରାଜ୍ୟର ପ୍ରମୁଖ ବିରୋଧୀ ନେତାମାନଙ୍କୁ ଭେଟି ଏକ ନୂଆ ରାଜନୈତିକ ସୌହାର୍ଦ୍ଦ୍ୟର ବାର୍ତ୍ତା ଦେଇଛନ୍ତି। ସେ ପୂର୍ବତନ ମୁଖ୍ୟମନ୍ତ୍ରୀ ତଥା DMK ମୁଖ୍ୟ ଏମକେ ଷ୍ଟାଲିନ, ବିରୋଧୀ ଦଳ ନେତା ଉଦୟନିଧି ଷ୍ଟାଲିନ ଙ୍କ ସମେତ PMK, NTK ଏବଂ MDMK ନେତାମାନଙ୍କୁ ସେମାନଙ୍କ ବାସଭବନରେ ଯାଇ ଭେଟିଛନ୍ତି। ଏହି ସାକ୍ଷାତକାରଗୁଡ଼ିକ ରାଜ୍ୟରେ ଏକ ସ୍ଥିର ସରକାର ଗଠନ ଦିଗରେ ବିଜୟଙ୍କ ପରିପକ୍ୱତାକୁ ଦର୍ଶାଉଛି ବୋଲି ରାଜନୈତିକ ସମୀକ୍ଷକମାନେ ମତ ଦେଉଛନ୍ତି।

ଅଭିନେତାରୁ ରାଜନେତା ପାଲଟିଥିବା ଥଲାପତି ବିଜୟ (ସି. ଜୋସେଫ୍ ବିଜୟ) ତାମିଲନାଡୁର ୧୩ତମ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ମୁଖ୍ୟମନ୍ତ୍ରୀ ଆସନରେ ବସିବା ମାତ୍ରେ ହିଁ ସେ ନିଜର ଆକ୍ସନ ମୋଡ୍ ଦେଖାଇଛନ୍ତି। ଶପଥ ଗ୍ରହଣ କରିବାର କିଛି ସମୟ ପରେ, ସାଧାରଣ ଜନତାଙ୍କୁ ଦେଇଥିବା ୩ଟି ବଡ଼ ପ୍ରତିଶ୍ରୁତି ପୂରଣ କରି ସେ ନିଜର ପ୍ରଥମ ସରକାରୀ ଫାଇଲ୍‌ଗୁଡ଼ିକରେ ଦସ୍ତଖତ କରିଛନ୍ତି।

୩ଟି ବଡ଼ ପ୍ରତିଶ୍ରୁତି

୧. ୨୦୦ ୟୁନିଟ୍ ମାଗଣା ବିଦ୍ୟୁତ୍: ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ବିଜୟଙ୍କ ପ୍ରଥମ ନିଷ୍ପତ୍ତି ଥିଲା ରାଜ୍ୟବାସୀଙ୍କୁ ମାଗଣା ବିଦ୍ୟୁତ୍ ଯୋଗାଇଦେବା। ନୂଆ ନିୟମ ଅନୁଯାୟୀ, ପ୍ରତ୍ୟେକ ଯୋଗ୍ୟ ଘରୋଇ ଉପଭୋକ୍ତାଙ୍କୁ ୨୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ଯୋଗାଇ ଦିଆଯିବ।

୨. ମହିଳା ସୁରକ୍ଷା ପାଇଁ 'ସିଙ୍ଗାପେନ୍' ଟାସ୍କଫୋର୍ସ: ମହିଳାଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ବିଜୟ ଏକ ସ୍ୱତନ୍ତ୍ର ଟାସ୍କଫୋର୍ସ 'ସିଙ୍ଗାପେନ୍' ଗଠନ କରିଛନ୍ତି। ଏହା ସହିତ ମହିଳାଙ୍କ ସୁରକ୍ଷା ନିଶ୍ଚିତ କରିବା ପାଇଁ ଏକ ୨୪ ଘଣ୍ଟିଆ ହେଲ୍ପଲାଇନ୍ ବ୍ୟବସ୍ଥା ମଧ୍ୟ ଆରମ୍ଭ କରାଯାଇଛି।

୩. ନିଶା ନିବାରଣ ପାଇଁ ସ୍ୱତନ୍ତ୍ର ଟାସ୍କଫୋର୍ସ: ରାଜ୍ୟକୁ ନିଶାମୁକ୍ତ କରିବା ଏବଂ ଡ୍ରଗ୍ସ କାରବାର ଉପରେ ରୋକ୍ ଲଗାଇବା ପାଇଁ ଏକ ସ୍ୱତନ୍ତ୍ର ଟାସ୍କଫୋର୍ସ ଗଠନ ନେଇ ସେ ନିର୍ଦ୍ଦେଶ ଦେଇଛନ୍ତି।

ନୂଆ ଯୁଗର ଆରମ୍ଭ

ଚେନ୍ନାଇର ଜବାହରଲାଲ ନେହେରୁ ଇନଡୋର ଷ୍ଟାଡିୟମରେ ଆୟୋଜିତ ଏକ ଭବ୍ୟ ସମାରୋହରେ ତାମିଲଗା ଭେଟ୍ରି କାଜଗମ୍ (ଟିଭିକେ) ର ମୁଖ୍ୟ ଥଲାପତି ବିଜୟ ମୁଖ୍ୟମନ୍ତ୍ରୀ ପଦ ଏବଂ ଗୋପନୀୟତାର ଶପଥ ନେଇଥିଲେ। ଶପଥ ଗ୍ରହଣ ପରେ ଉଦବୋଧନ ଦେଇ ସେ କହିଥିଲେ ଯେ ସେ କୌଣସି ରାଜପରିବାରରୁ ଆସିନାହାଁନ୍ତି ବରଂ ଭୋକ ଏବଂ ଗରିବି କଣ ତାହା ସେ ବୁଝିଛନ୍ତି। ମିଥ୍ୟା ପ୍ରତିଶ୍ରୁତି ଦେଇ ସେ ଲୋକଙ୍କୁ ଠକିବେ ନାହିଁ ଏବଂ ତାମିଲନାଡୁରେ ପ୍ରକୃତ ଧର୍ମନିରପେକ୍ଷତା ତଥା ସାମାଜିକ ନ୍ୟାୟର ଏକ ନୂଆ ଶାସନ ଆରମ୍ଭ ହେବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି।

ତାମିଲନାଡୁ: ତାମିଲନାଡୁ ରାଜନୀତିରେ ଲାଗି ରହିଥିବା ଦୀର୍ଘ ଦିନର ସସପେନ୍ସର ଅନ୍ତ ଘଟିଛି। ଅଭିନେତାରୁ ରାଜନେତା ପାଲଟିଥିବା ବିଜୟଙ୍କ ପାର୍ଟି ତାମିଲଗା ଭେତ୍ରି କାଝାଗମ (TVK) କୁ ସରକାର ଗଠନ ପାଇଁ ବିଦୁଥଲାଇ ଚିରୁଥାଇଗଲ କାଚି (VCK) ସମର୍ଥନ ଜଣାଇଛି। ଏହା ଫଳରେ ତାମିଲନାଡୁରେ ଏକ ନୂତନ ସରକାର ଗଠନ ପାଇଁ ବାଟ ଫିଟିଛି।

ଭିସିକେ (VCK) ସଭାପତି ଥୋଲ. ଥିରୁମାଭାଲାଭାନ ଆନୁଷ୍ଠାନିକ ଭାବେ ନିଜ ଦଳର ସମର୍ଥନ ପତ୍ରକୁ ଟିଭିକେ (TVK) ର ସାଧାରଣ ସମ୍ପାଦକ ତଥା ନିର୍ବାଚନ ପ୍ରଚାର ପରିଚାଳକ ଆଧବ ଅର୍ଜୁନଙ୍କୁ ହସ୍ତାନ୍ତର କରିଛନ୍ତି। ଅଭିନେତା ବିଜୟଙ୍କ ରାଜନୈତିକ ଦଳ ପାଇଁ ଏହା ଏକ ବଡ଼ ସଫଳତା ବୋଲି ବିବେଚନା କରାଯାଉଛି।

୨୩୪ ସଦସ୍ୟ ବିଶିଷ୍ଟ ତାମିଲନାଡୁ ବିଧାନସଭାରେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ବା ବହୁମତ ସଂଖ୍ୟା ହେଉଛି ୧୧୮ ଆସନ। ଭିସିକେର ଏହି ସମର୍ଥନ ଫଳରେ ଟିଭିକେ ବହୁମତ ହାସଲ କରିଛି। ଭିସିକେର ବିନା ସର୍ତ୍ତରେ ବାହ୍ୟ ସମର୍ଥନ ଏବଂ ଏହା ପୂର୍ବରୁ ମିଳିଥିବା ସିପିଆଇ (CPI) ଓ ସିପିଆଇ(ଏମ୍) (CPI-M) ର ସମର୍ଥନ ବିଜୟଙ୍କ ଦଳ ପାଇଁ ସରକାର ଗଠନର ରାସ୍ତାକୁ ସମ୍ପୂର୍ଣ୍ଣ ସଫା କରିଦେଇଛି। ଏହାଦ୍ୱାରା ରାଜ୍ୟରେ ଦୀର୍ଘ ଦିନ ଧରି ଚାଲିଥିବା ରାଜନୈତିକ ଛକାପଞ୍ଝାର ମଧ୍ୟ ଅନ୍ତ ଘଟିଛି।

ଏହା ବ୍ୟତୀତ, ଭିସିକେ ପରେ ଏବେ ଇଣ୍ଡିଆନ୍ ୟୁନିଅନ୍ ମୁସଲିମ୍ ଲିଗ୍ (IUML) ର ତାମିଲନାଡୁ ଶାଖା ମଧ୍ୟ ତାମିଲନାଡୁରେ ସରକାର ଗଠନ ପାଇଁ ତାମିଲଗା ଭେତ୍ରି କାଝାଗମକୁ ନିଜର ବିନା ସର୍ତ୍ତରେ ସମର୍ଥନ ଘୋଷଣା କରିଛି।

ତାମିଲନାଡୁ ରାଜନୀତିରେ ଏବେ ଏକ ବଡ଼ ଧରଣର ସଙ୍କଟ ଦେଖାଦେଇଛି। ୨୦୨୬ ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇବା ପରେ ଅଭିନେତାରୁ ରାଜନେତା ପାଲଟିଥିବା ଥଲପତି ବିଜୟ ଏବଂ ତାଙ୍କ ଦଳ ତାମିଲଗା ଭେତ୍ରି କାଜାଗମ୍ (TVK) ସବୁଠାରୁ ବଡ଼ ଦଳ ଭାବେ ଉଭା ହୋଇଛନ୍ତି। ତେବେ ବହୁମତ ନଥିବାରୁ ସରକାର ଗଠନ ପାଇଁ ଏବେ ମେଣ୍ଟ ରାଜନୀତି ଜୋର ଧରିଛି।

ସଂଖ୍ୟାଗରିଷ୍ଠତା ଠାରୁ ଦୂରରେ ଟିଭିକେ

୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭାରେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ହେଉଛି ୧୧୮। କିନ୍ତୁ ବିଜୟଙ୍କ ଦଳ ଟିଭିକେ (TVK) ଏକାକୀ ୧୦୮ ଟି ଆସନ ଜିତିଛି। କଂଗ୍ରେସ ନିଜର ୫ ଜଣ ବିଧାୟକଙ୍କ ସମର୍ଥନ ଦେବା ପରେ ମଧ୍ୟ ଏହି ସଂଖ୍ୟା ୧୧୩ ରେ ପହଞ୍ଚିଛି। ଅନ୍ୟପକ୍ଷରେ, ଥଲପତି ବିଜୟ ଦୁଇଟି ଆସନରୁ ବିଜୟୀ ହୋଇଥିବାରୁ ତାଙ୍କୁ ଗୋଟିଏ ଆସନ ଛାଡ଼ିବାକୁ ପଡ଼ିବ। ଏହା ଫଳରେ ଗୃହର ମୋଟ ସଦସ୍ୟ ସଂଖ୍ୟା ୨୩୩ କୁ ଖସି ଆସିବ ଏବଂ ବହୁମତ ପାଇଁ ୧୧୭ ଆସନର ଆବଶ୍ୟକତା ପଡ଼ିବ। ଏବେ ସରକାର ଗଠନ କରିବା ପାଇଁ ବିଜୟଙ୍କୁ ଆଉ ୫ ଜଣ ବିଧାୟକଙ୍କ ସମର୍ଥନ ଦରକାର।

କଂଗ୍ରେସର ସମର୍ଥନ ଏବଂ ନୂଆ ସମୀକରଣ

ବହୁମତ ହାସଲ କରିବା ପାଇଁ ରାଜ୍ୟରେ ଏବେ ସମୀକରଣ ବଦଳିବାରେ ଲାଗିଛି। କଂଗ୍ରେସ ତାର ପୁରୁଣା ମେଣ୍ଟ ସାଥୀ ଡିଏମକେ (DMK) ର ହାତ ଛାଡ଼ି ବିଜୟଙ୍କୁ ସମର୍ଥନ ଜଣାଇଛି। ସଂଖ୍ୟାଗରିଷ୍ଠତା ହାସଲ କରିବା ଲକ୍ଷ୍ୟରେ ବିଜୟ ଏବେ ଭିସିକେ (VCK), ବାମପନ୍ଥୀ ଦଳ ଏବଂ ଆଇୟୁଏମଏଲ (IUML) ଭଳି ଦଳଗୁଡ଼ିକ ସହ ଆଲୋଚନା ଚଳାଇଛନ୍ତି, ଯେଉଁମାନେ ବର୍ତ୍ତମାନ ସୁଦ୍ଧା ଡିଏମକେ ମେଣ୍ଟରେ ଅଛନ୍ତି।

ଏଆଇଏଡିଏମକେ ଏବଂ ଡିଏମକେର ଚାଲ୍

ଅନ୍ୟପଟେ ରାଜ୍ୟର ଦୁଇ ପ୍ରମୁଖ ଦଳ ଡିଏମକେ (DMK) ଏବଂ ଏଆଇଏଡିଏମକେ (AIADMK) ମଧ୍ୟ ନିଜର ରଣନୀତି ପ୍ରସ୍ତୁତ କରୁଛନ୍ତି। ରିପୋର୍ଟ ଅନୁଯାୟୀ, ଥଲପତି ବିଜୟଙ୍କୁ କ୍ଷମତାରୁ ଦୂରେଇ ରଖିବା ପାଇଁ ଏହି ଦୁଇ ପାରମ୍ପରିକ ବିରୋଧୀ ଦଳ ଏକାଠି ହେବାର ସମ୍ଭାବନା ସୃଷ୍ଟି ହୋଇଛି। ଏହାରି ଭିତରେ ଏଆଇଏଡିଏମକେ ନିଜର ନବନିର୍ବାଚିତ ବିଧାୟକମାନଙ୍କୁ ପଡ଼ୋଶୀ ରାଜ୍ୟ ପୁଡୁଚେରୀକୁ ସ୍ଥାନାନ୍ତର କରିଦେଇଛି।

ତାମିଲନାଡୁ ରାଜନୀତିରେ ଦେଖାଦେଇଥିବା ଏହି ଅସ୍ଥିରତା ଏବେ ଜାତୀୟ ସ୍ତରରେ ଚର୍ଚ୍ଚାର ବିଷୟ ପାଲଟିଛି। ଆଗାମୀ ଦିନରେ କିଏ ସରକାର ଗଢ଼ିବ ଏବଂ କେଉଁ ଦଳ କାହାକୁ ସମର୍ଥନ ଦେବେ, ତାହା ଉପରେ ସମସ୍ତଙ୍କ ନଜର ରହିଛି।

ତାମିଲନାଡୁ: ତାମିଲନାଡୁ ବିଧାନସଭା ନିର୍ବାଚନରେ ଖଣ୍ଡିତ ଜନାଦେଶ ଆସିବା ପରେ ରାଜ୍ୟ ରାଜନୀତିରେ ହଟଚମଟ ସୃଷ୍ଟି ହୋଇଛି। ଅଭିନେତାରୁ ରାଜନେତା ପାଲଟିଥିବା ବିଜୟଙ୍କ ଦଳ ଟିଭିକେ (TVK) ୧୦୮ଟି ଆସନ ସହ ସବୁଠାରୁ ବଡ଼ ଦଳ ଭାବେ ଉଭା ହୋଇଥିବା ବେଳେ ସରକାର ଗଠନ ପାଇଁ କସରତ ଆରମ୍ଭ କରିଛି। ୨୩୪ ସଦସ୍ୟ ବିଶିଷ୍ଟ ତାମିଲନାଡୁ ବିଧାନସଭାରେ ବହୁମତ ସଂଖ୍ୟା ୧୧୮ ଥିବା ବେଳେ ଟିଭିକେକୁ ଆହୁରି ୧୦ଟି ଆସନର ଆବଶ୍ୟକତା ରହିଛି। ଏଥିପାଇଁ ଦଳ କଂଗ୍ରେସ, ପିଏମକେ (PMK), ବାମଦଳ ଏବଂ ଭିସିକେ (VCK) ଭଳି ଛୋଟ ଦଳଗୁଡ଼ିକର ସମର୍ଥନ ଲୋଡ଼ିଛି। ସରକାର ଗଠନ ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ବିଜୟ ରାଜ୍ୟପାଳ ରାଜେନ୍ଦ୍ର ଆର୍ଲେକରଙ୍କୁ ଭେଟିବାକୁ ସମୟ ମାଗିଛନ୍ତି। 

ଦୀର୍ଘଦିନର ମେଣ୍ଟ ସହଯୋଗୀ ଡିଏମକେ (DMK)କୁ ଛାଡ଼ି କଂଗ୍ରେସ ଏବେ ବିଜୟଙ୍କ ଦଳକୁ ସମର୍ଥନ କରିବାକୁ ନିଷ୍ପତ୍ତି ନେଇଛି। କଂଗ୍ରେସ ନେତା କାର୍ତ୍ତି ଚିଦାମ୍ବରମ କହିଛନ୍ତି ଯେ ତାମିଲନାଡୁରେ ଏକ ଧର୍ମନିରପେକ୍ଷ ଏବଂ ସ୍ଥିର ସରକାର ଗଠନ ପାଇଁ ଦଳ ସର୍ବସମ୍ମତି କ୍ରମେ ଟିଭିକେକୁ ସମର୍ଥନ କରିବାକୁ ନିଷ୍ପତ୍ତି ନେଇଛି। ମଙ୍ଗଳବାର ବିଳମ୍ବିତ ରାତିରେ ଅନୁଷ୍ଠିତ ତାମିଲନାଡୁ କଂଗ୍ରେସର ରାଜନୈତିକ ବ୍ୟାପାର କମିଟି (PAC) ବୈଠକରେ ଏହି ନିଷ୍ପତ୍ତି ନିଆଯାଇଥିଲା। ଅନ୍ୟପକ୍ଷରେ, କଂଗ୍ରେସର ଏଭଳି ପଦକ୍ଷେପକୁ ନେଇ ଡିଏମକେ ତୀବ୍ର ପ୍ରତିକ୍ରିୟା ପ୍ରକାଶ କରିଛି। ଡିଏମକେ ମୁଖପାତ୍ର ସରବଣନ ଅନ୍ନାଦୁରାଇ କଂଗ୍ରେସକୁ 'ବିଶ୍ୱାସଘାତକ' ବୋଲି କହିବା ସହ ଏହା ଏକ ଅଦୂରଦର୍ଶୀ ନିଷ୍ପତ୍ତି ବୋଲି ସମାଲୋଚନା କରିଛନ୍ତି। ସେ କହିଛନ୍ତି ଯେ ଏହା 'ଇଣ୍ଡିଆ' (INDIA) ମେଣ୍ଟ ଭାଗିଦାରୀଙ୍କ ପ୍ରତି ଧୋକା ଏବଂ ଆଗାମୀ ୨୦୨୯ ନିର୍ବାଚନରେ କଂଗ୍ରେସ ଏଥିପାଇଁ ଅନୁତାପ କରିବ।

ଅନ୍ୟପଟେ, ପ୍ରମୁଖ ବିରୋଧୀ ଦଳ ଏଆଇଏଡିଏମକେ (AIADMK) ମଧ୍ୟରେ ଅନ୍ତର୍ଦ୍ୱନ୍ଦ୍ୱ ଦେଖାଦେଇଛି। ଦଳର ଗୋଟିଏ ଗୋଷ୍ଠୀ ଇଡାପ୍ପାଡି ପଲାନିସ୍ୱାମୀଙ୍କ ନେତୃତ୍ୱରେ ଅସନ୍ତୁଷ୍ଟ ଥିବା ବେଳେ ସେମାନେ ବିଜୟଙ୍କୁ ସରକାର ଗଠନରେ ସମର୍ଥନ ଦେବାକୁ ଚାହୁଁଥିବା ଚର୍ଚ୍ଚା ହେଉଛି। ଏସବୁ ମଧ୍ୟରେ ଘୋଡ଼ା ବେପାର ଆଶଙ୍କାକୁ ଏଡ଼ାଇବା ପାଇଁ ଟିଭିକେ ତାର ସମସ୍ତ ୧୦୮ ବିଧାୟକଙ୍କୁ ମାମଲ୍ଲାପୁରମର ଏକ ବିଳାସପୂର୍ଣ୍ଣ ରିସର୍ଟରେ ରଖିଛି। ବିଧାୟକମାନଙ୍କ ସୁରକ୍ଷା ପାଇଁ ରିସର୍ଟ ଚାରିପଟେ କଡ଼ା ପୋଲିସ ପହରା ଲଗାଯାଇଛି। ସରକାର ଗଠନର ସମୀକରଣ ଯାହା ବି ହେଉନା କାହିଁକି, ତାମିଲନାଡୁ ରାଜନୀତିରେ ଏବେ ବିଜୟଙ୍କ ଯୁଗ ଆରମ୍ଭ ହୋଇଛି ବୋଲି ରାଜନୈତିକ ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।

ତାମିଲନାଡୁ: ତାମିଲନାଡୁ ନିର୍ବାଚନ ପାଇଁ ବିଜେପି ନିଜର ଇସ୍ତାହାର ଘୋଷଣା କରିଛି । ଭୋଟରଙ୍କୁ ଆକୃଷ୍ଟ କରିବା ପାଇଁ ଇସ୍ତାହାରରେ ଅନେକ ଲୋଭନୀୟ ଘୋଷଣା କରିଛି ବିଜେପି । କେନ୍ଦ୍ରମନ୍ତ୍ରୀ ଜେ.ପି. ନଡ୍ଡା ଏହି ଅବସରରେ ରାଜ୍ୟ ପାଇଁ ଅନେକ କଲ୍ୟାଣକାରୀ ଏବଂ ଶାସନଗତ ପ୍ରତିଶ୍ରୁତି ଘୋଷଣା କରିବା ସହ କ୍ଷମତାସୀନ ଡିଏମକେ ଉପରେ କଡ଼ା ଆକ୍ରମଣ କରିଛନ୍ତି। ଏହି କାର୍ଯ୍ୟକ୍ରମରେ ତାମିଲନାଡୁ ବିଜେପି ସଭାପତି ନୈନାର ନଗେନ୍ଥ୍ରନ, ବରିଷ୍ଠ ନେତା କେ. ଅନ୍ନାମଲାଇ ଏବଂ ତାମିଲିସାଇ ସୁନ୍ଦରରାଜନ ପ୍ରମୁଖ ଉପସ୍ଥିତ ଥିଲେ।

ନିର୍ବାଚନୀ ଇସ୍ତାହାରରେ ମହିଳା ଏବଂ ସାଧାରଣ ଲୋକଙ୍କ ଉନ୍ନତି ପାଇଁ ବ୍ୟାପକ ପ୍ରତିଶ୍ରୁତି ଦିଆଯାଇଛି। ବିଜେପି ଘୋଷଣା କରିଛି ଯେ ପରିବାରର ମୁଖ୍ୟ ମହିଳାଙ୍କୁ ମାସିକ ୨,୦୦୦ ଟଙ୍କା ପ୍ରଦାନ କରାଯିବ। ଏହା ସହ ବର୍ଷକୁ ୩ଟି ମାଗଣା ଏଲପିଜି ସିଲିଣ୍ଡର ଏବଂ ବର୍ଦ୍ଧିତ ଟିକସ ତଥା ଜୀବନଯାପନ ଖର୍ଚ୍ଚ ଭରଣା ପାଇଁ ପ୍ରତି ପରିବାରକୁ ଏକକାଳୀନ ୧୦,୦୦୦ ଟଙ୍କା ଆର୍ଥିକ ସହାୟତା ଦିଆଯିବ। 

ଏହା ବ୍ୟତୀତ ଯୋଗ୍ୟ ମହିଳାମାନଙ୍କୁ ଇ-ସ୍କୁଟର କିଣିବା ପାଇଁ ୨୫,୦୦୦ ଟଙ୍କାର ସବସିଡି, ପ୍ରଥମ ଥର ଘର କିଣୁଥିବା ମହିଳାଙ୍କ ପାଇଁ ଷ୍ଟାମ୍ପ ଡ୍ୟୁଟିରେ ୩ ପ୍ରତିଶତ ରିହାତି ଏବଂ ଘରୋଇ ସାମଗ୍ରୀ କ୍ରୟ ନିମନ୍ତେ ୮,୦୦୦ ଟଙ୍କାର କୁପନ ଯୋଗାଇ ଦେବାକୁ ଦଳ ନିଜ ଇସ୍ତାହାରରେ ଉଲ୍ଲେଖ କରିଛି।

ଏହି ଇସ୍ତାହାର ଉନ୍ମୋଚନ କାର୍ଯ୍ୟକ୍ରମରେ ଉଦବୋଧନ ଦେଇ ଜେ.ପି. ନଡ୍ଡା ତାମିଲ ନବବର୍ଷ ଏବଂ ଡକ୍ଟର ବି.ଆର୍. ଆମ୍ବେଦକରଙ୍କ ୧୫୦ତମ ଜନ୍ମବାର୍ଷିକୀ ଅବସରରେ ଏହି ଘୋଷଣାକୁ ଶୁଭ ବୋଲି ବର୍ଣ୍ଣନା କରିଥିଲେ। ତାମିଲନାଡୁର ସମୃଦ୍ଧ ସାଂସ୍କୃତିକ ଐତିହ୍ୟକୁ ପ୍ରଶଂସା କରି ବିଜେପି ପାରମ୍ପରିକ ଜଲ୍ଲିକାଟ୍ଟୁ ଷଣ୍ଢ ପାଳନ କରୁଥିବା ବ୍ୟକ୍ତିଙ୍କୁ ମାସିକ ୨,୦୦୦ ଟଙ୍କା ସହାୟତା ଏବଂ କୌଣସି ପ୍ରତିଯୋଗୀଙ୍କ ମୃତ୍ୟୁ ହେଲେ ୧୦ ଲକ୍ଷ ଟଙ୍କାର ଅନୁକମ୍ପାମୂଳକ ରାଶି ଦେବାକୁ ଘୋଷଣା କରିଛି। ସ୍ଥାନୀୟ ବାସିନ୍ଦାଙ୍କ ପାଇଁ ପ୍ରମୁଖ ମନ୍ଦିରଗୁଡ଼ିକରେ ପ୍ରତିଦିନ ୨ ଘଣ୍ଟିଆ ସ୍ୱତନ୍ତ୍ର ଦର୍ଶନ ସମୟ ମଧ୍ୟ ସୁନିଶ୍ଚିତ କରାଯିବ।

ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ନେଇ ଶ୍ରୀ ନଡ୍ଡା ଡିଏମକେ ସରକାରଙ୍କୁ କଡ଼ା ସମାଲୋଚନା କରିଥିଲେ। ସେ ଦାବି କରିଥିଲେ ଯେ ତାମିଲନାଡୁରେ ଡ୍ରଗ୍ସ ଜନିତ ଅପରାଧ ୫୧ ପ୍ରତିଶତ ବୃଦ୍ଧି ପାଇଛି। ଶାସକ ଦଳକୁ "ଦୁର୍ନୀତିର ରକ୍ଷକ" ବୋଲି ଆଖ୍ୟା ଦେଇ ସେ ଚାକିରି ଆବଣ୍ଟନ ଏବଂ ଟେଣ୍ଡରରେ ଅନିୟମିତତା ଭଳି ଅନେକ ଦୁର୍ନୀତି ବିଷୟ ଉଠାଇଥିଲେ। ଅପରାଧ ନିୟନ୍ତ୍ରଣ ଓ ସୁରକ୍ଷା ବ୍ୟବସ୍ଥାକୁ ମଜବୁତ କରିବା ପାଇଁ ବିଜେପି ଜିରୋ ଏଫଆଇଆର୍ ଲାଗୁ କରିବା, ଦ୍ରୁତ ବିଚାର ଅଦାଲତ ପ୍ରତିଷ୍ଠା ଏବଂ ବସ୍, ସ୍କୁଲ ଓ ବିଶ୍ୱବିଦ୍ୟାଳୟଗୁଡ଼ିକରେ ୧୦୦ ସିସିଟିଭି କ୍ୟାମେରା ଲଗାଇବାକୁ ପ୍ରସ୍ତାବ ଦେଇଛି।

ସୂଚନାଯୋଗ୍ୟ ଯେ, ତାମିଲନାଡୁ ବିଧାନସଭା ନିର୍ବାଚନ ଏପ୍ରିଲ ୨୩ ତାରିଖରେ ଗୋଟିଏ ପର୍ଯ୍ୟାୟରେ ଅନୁଷ୍ଠିତ ହେବ। ପଶ୍ଚିମବଙ୍ଗ, ଆସାମ, କେରଳ ଏବଂ ପୁଡୁଚେରୀ ବିଧାନସଭା ନିର୍ବାଚନ ଫଳାଫଳ ସହ ମିଶି ମେ ୪ ତାରିଖରେ ଏହାର ଫଳାଫଳ ପ୍ରକାଶ ପାଇବ।

ତାମିଲନାଡୁର ସେଲମରେ ଅଭିନେତା ତଥା ରାଜନେତା ବିଜୟଙ୍କ ପାର୍ଟି 'ତାମିଲଗା ଭେଟ୍ରି କାଝଗମ୍' (TVK) ର ଏକ ରାଲି ବେଳେ ପୁଣି ଥରେ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ରାଲିରେ ସାମିଲ ହୋଇଥିବା ଜଣେ ୩୭ ବର୍ଷୀୟ ଯୁବକଙ୍କ ମୃତ୍ୟୁ ଘଟିଛି। ମୃତକ ଜଣକ ମହାରାଷ୍ଟ୍ରର ବୋଲି ଜଣାପଡିଛି ଏବଂ ସେ ବିଜୟଙ୍କୁ ଦେଖିବା ପାଇଁ ସୁଦୂର ମହାରାଷ୍ଟ୍ରରୁ ଆସିଥିଲେ। ଏହି ଘଟଣା ପରେ ତାମିଲନାଡୁର ପ୍ରମୁଖ ବିରୋଧୀ ଦଳ AIADMK ବିଜୟଙ୍କୁ କଡ଼ା ସମାଲୋଚନା କରିଛି।

'ସାଙ୍ଗରେ କଫିନ୍ ଧରି ଆସନ୍ତୁ'

ଏହି ଘଟଣାକୁ ନେଇ AIADMK ପକ୍ଷରୁ ଏକ ବିବାଦୀୟ ତଥା କଡ଼ା ବୟାନ ଜାରି କରାଯାଇଛି। ଦଳ ପକ୍ଷରୁ କୁହାଯାଇଛି ଯେ, "ଭବିଷ୍ୟତରେ ବିଜୟଙ୍କ କାର୍ଯ୍ୟକ୍ରମରେ ଯୋଗଦେବାକୁ ଚାହୁଁଥିବା ଲୋକମାନେ ନିଜ ସାଙ୍ଗରେ କଫିନ୍ (ଶବପେଟିକା) ନେଇ ଆସିବା ଉଚିତ୍।" ଏହି ବୟାନ ରାଜ୍ୟ ରାଜନୀତିରେ ହଇଚଇ ସୃଷ୍ଟି କରିଛି। ବିଜୟଙ୍କ ରାଲିରେ ବାରମ୍ବାର ଅବ୍ୟବସ୍ଥା ଏବଂ ସୁରକ୍ଷା ଅଭାବକୁ ନେଇ ବିରୋଧୀ ଦଳ ପ୍ରଶ୍ନ ଉଠାଇଛି।

କିପରି ଘଟିଲା ଅଘଟଣ?

ରିପୋର୍ଟ ଅନୁଯାୟୀ, ମୃତକଙ୍କ ନାମ ସୁରଜ ଏବଂ ତାଙ୍କ ଘର ମହାରାଷ୍ଟ୍ରରେ। ସେଲମରେ ଆୟୋଜିତ TVKର ଏହି ବିଶାଳ ଜନସଭାରେ ପ୍ରବଳ ଭିଡ଼ ହୋଇଥିଲା। ଅତ୍ୟଧିକ ଗରମ ଏବଂ ଭିଡ଼ କାରଣରୁ ସୁରଜ ହଠାତ୍ ଅସୁସ୍ଥ ହୋଇପଡିଥିଲେ। ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା, କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ୍ ସୂତ୍ରରୁ ମିଳିଥିବା ସୂଚନା ମୁତାବକ, ହୃଦଘାତ କାରଣରୁ ତାଙ୍କର ମୃତ୍ୟୁ ହୋଇଥାଇପାରେ ବୋଲି ଅନୁମାନ କରାଯାଉଛି।

ପୂର୍ବରୁ ମଧ୍ୟ ଘଟିଛି ଅଘଟଣ

ଉଲ୍ଲେଖଯୋଗ୍ୟ ଯେ, ବିଜୟ ରାଜନୀତିରେ ପ୍ରବେଶ କରିବା ପରେ ତାଙ୍କ ରାଲିରେ ପ୍ରବଳ ଜନସମାଗମ ହେଉଛି। ତେବେ ଏହା ପ୍ରଥମ ଘଟଣା ନୁହେଁ; ପୂର୍ବରୁ ମଧ୍ୟ ବିଜୟଙ୍କ ଏକ ରାଲିରେ ଅବ୍ୟବସ୍ଥା ଯୋଗୁଁ ଅନେକ ଲୋକ ଅସୁସ୍ଥ ହୋଇପଡିଥିଲେ ଏବଂ କିଛି ଦୁର୍ଘଟଣା ଘଟିଥିଲା। ଏବେ ନିର୍ବାଚନ ପାଖେଇ ଆସୁଥିବା ବେଳେ ବିରୋଧୀ ଦଳମାନେ ଏହି ପ୍ରସଙ୍ଗକୁ ନେଇ ବିଜୟଙ୍କ ନେତୃତ୍ୱ ଏବଂ ଆୟୋଜନ ଶୈଳୀ ଉପରେ ପ୍ରଶ୍ନବାଚୀ ସୃଷ୍ଟି କରୁଛନ୍ତି।

ତାମିଲନାଡୁ: ତାମିଲନାଡ଼ୁ ବିଧାନସଭା ଅଧିବେସନରେ ହାଇଡ୍ରାମା । ବଜେଟ ଅଧିବେଶନର ଶୁଭାରମ୍ଭ ସମୟରେ ରାଜ୍ୟପାଳ ଆର.ଏନ. ରବି (RN Ravi) ନିଜର ପାରମ୍ପରିକ ଅଭିଭାଷଣ ରଖିବା ପୂର୍ବରୁ ଗୃହ ତ୍ୟାଗ କରି ଚାଲିଯାଇଛନ୍ତି। ଜାତୀୟ ସଙ୍ଗୀତକୁ ଉପଯୁକ୍ତ ସମ୍ମାନ ଦିଆଯାଇ ନଥିବା ଏବଂ ଅଭିଭାଷଣ ସମୟରେ ତାଙ୍କ ମାଇକ୍ ବନ୍ଦ କରିଦିଆଯାଇଥିବା ସେ ଗୁରୁତର ଅଭିଯୋଗ ଆଣିଛନ୍ତି।

ଏହି ଘଟଣା ପରେ ରାଜଭବନ ପକ୍ଷରୁ ଜାରି ଏକ ପ୍ରେସ ବିଜ୍ଞପ୍ତିରେ କୁହାଯାଇଛି ଯେ, ରାଜ୍ୟପାଳଙ୍କ ମାଇକକୁ ବାରମ୍ବାର ବନ୍ଦ କରାଯାଇଥିଲା ଏବଂ ତାଙ୍କୁ କହିବାକୁ ସୁଯୋଗ ଦିଆଯାଇ ନଥିଲା। ରାଜ୍ୟରେ ଦଳିତ ଓ ମହିଳାଙ୍କ ପ୍ରତି ବଢୁଥିବା ଅତ୍ୟାଚାର ପ୍ରସଙ୍ଗକୁ ସରକାରଙ୍କ ପ୍ରସ୍ତୁତ ଅଭିଭାଷଣରେ ସମ୍ପୂର୍ଣ୍ଣ ଏଡାଇ ଦିଆଯାଇଥିବାରୁ ରାଜ୍ୟପାଳ ଅସନ୍ତୋଷ ପ୍ରକାଶ କରିଛନ୍ତି। ବିଜ୍ଞପ୍ତିରେ ଆହୁରି ମଧ୍ୟ କୁହାଯାଇଛି ଯେ, 'ଜାତୀୟ ସଙ୍ଗୀତକୁ ଅପମାନିତ କରାଯାଇଛି ଏବଂ ମୌଳିକ ସାମ୍ବିଧାନିକ କର୍ତ୍ତବ୍ୟକୁ ଅଣଦେଖା କରାଯାଇଛି।'

ବିଧାନସଭା ଆରମ୍ଭରୁ ଗୃହ ଭିତରେ ଉତ୍ତେଜନାପୂର୍ଣ୍ଣ ପରିସ୍ଥିତି ସୃଷ୍ଟି ହୋଇଥିଲା। ବାଚସ୍ପତି ଏମ. ଆପାଭୁ ରାଜ୍ୟପାଳଙ୍କୁ ଗୃହର ନିୟମ ଓ ପରମ୍ପରା ପାଳନ କରିବାକୁ ଅନୁରୋଧ କରିଥିଲେ। ଅନ୍ୟପକ୍ଷରେ, ରାଜ୍ୟର ଆଇନ ଶୃଙ୍ଖଳା ପରିସ୍ଥିତିକୁ ନେଇ ବିରୋଧୀ ଦଳ ନେତା ଇଡାପ୍ପାଡି ପାଲାନିସ୍ୱାମୀ ଏବଂ ଏଆଇଏଡିଏମକେ ବିଧାୟକମାନେ ମଧ୍ୟ ଗୃହ ତ୍ୟାଗ କରିବା ସହ ବିଧାନସଭା ପ୍ରବେଶ ପଥରେ ସ୍ଲୋଗାନ ଦେଇଥିଲେ।

ଉଲ୍ଲେଖଯୋଗ୍ୟ ଯେ, ଏହା ପ୍ରଥମ ଘଟଣା ନୁହେଁ। ଗତବର୍ଷ ମଧ୍ୟ ରାଜ୍ୟପାଳ ରବି ସମାନ ଢଙ୍ଗରେ ଗଭୀର ମର୍ମାହତ ହୋଇ ଗୃହ ତ୍ୟାଗ କରିଥିଲେ ଏବଂ ଭାରତର ସମ୍ବିଧାନ ତଥା ଜାତୀୟ ସଙ୍ଗୀତର ଅପମାନ ହୋଇଥିବା ଦର୍ଶାଇଥିଲେ। ଆଗକୁ ବିଧାନସଭା ନିର୍ବାଚନ ଆସୁଥିବାରୁ ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନ ଏବଂ ତାଙ୍କ ସରକାର ପାଇଁ ଏହି ଅଧିବେଶନ ରାଜନୈତିକ ଦୃଷ୍ଟିରୁ ବେଶ ଗୁରୁତ୍ୱପୂର୍ଣ୍ଣ ରହିବ।