ଛତିଶଗଡ଼ ସରକାର ନିଜ ରାଜ୍ୟର ସରକାରୀ ଅଧିକାରୀ ଏବଂ କର୍ମଚାରୀମାନଙ୍କ ମାନସିକ ସ୍ୱାସ୍ଥ୍ୟ ଏବଂ କାର୍ଯ୍ୟଦକ୍ଷତା ବୃଦ୍ଧି ପାଇଁ ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ସାଧାରଣ ପ୍ରଶାସନ ବିଭାଗ ପକ୍ଷରୁ ଜାରି କରାଯାଇଥିବା ନୂତନ ଆଦେଶ ଅନୁଯାୟୀ, ଏବେ ସରକାରୀ କର୍ମଚାରୀମାନେ ବିପଶ୍ୟନା ଧ୍ୟାନ ଶିବିର (Vipassana Meditation Camp) ରେ ଅଂଶଗ୍ରହଣ କରିବା ପାଇଁ ସ୍ୱତନ୍ତ୍ର ଆକସ୍ମିକ ଛୁଟି (Special Casual Leave) ପାଇପାରିବେ।

୧୨ ଦିନର ସ୍ୱତନ୍ତ୍ର ଛୁଟି ଏବଂ ପୂର୍ଣ୍ଣ ଦରମା

ନିୟମ ଅନୁଯାୟୀ, ମାନ୍ୟତାପ୍ରାପ୍ତ ବିପଶ୍ୟନା କେନ୍ଦ୍ରଗୁଡ଼ିକରେ ଆୟୋଜିତ ହେଉଥିବା ୧୦ ଦିନିଆ ଆବାସିକ ଧ୍ୟାନ ଶିବିରରେ ଯୋଗଦେବା ପାଇଁ କର୍ମଚାରୀମାନଙ୍କୁ ଯାତ୍ରା ସମୟ ସମେତ ସର୍ବାଧିକ ୧୨ ଦିନ ପର୍ଯ୍ୟନ୍ତ ଛୁଟି ପ୍ରଦାନ କରାଯିବ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ଛୁଟି ସମୟକୁ ଅନ୍ ଡ୍ୟୁଟି (On Duty) ଭାବରେ ବିବେଚନା କରାଯିବ ଏବଂ କର୍ମଚାରୀମାନଙ୍କୁ ସେମାନଙ୍କର ପୂର୍ଣ୍ଣ ଦରମା ମିଳିବ। ତେବେ କର୍ମଚାରୀମାନେ ସେମାନଙ୍କର ସମ୍ପୂର୍ଣ୍ଣ ଚାକିରି କାଳ ମଧ୍ୟରେ ସର୍ବାଧିକ ୬ ଥର ଏହି ସୁବିଧାର ଲାଭ ଉଠାଇପାରିବେ।

କାହିଁକି ଏହି ନିଷ୍ପତ୍ତି?

ସରକାରୀ କାର୍ଯ୍ୟର ଚାପ କାରଣରୁ କର୍ମଚାରୀମାନେ ଅନେକ ସମୟରେ ମାନସିକ ଅବସାଦ ଦେଇ ଗତି କରିଥାନ୍ତି। ତେଣୁ କର୍ମଚାରୀମାନଙ୍କ ମାନସିକ ଚାପ ହ୍ରାସ କରିବା, ସେମାନଙ୍କ ଉତ୍ପାଦନ କ୍ଷମତା (Productivity) ବୃଦ୍ଧି କରିବା ଏବଂ ନୈତିକ ମୂଲ୍ୟବୋଧକୁ ସୁଦୃଢ଼ କରିବା ଉଦ୍ଦେଶ୍ୟରେ ଛତିଶଗଡ଼ ସରକାର ଏହି ନିଷ୍ପତ୍ତି ନେଇଛନ୍ତି। ଅଖିଳ ଭାରତୀୟ ସେବା (All India Services) ର ଅଧିକାରୀଙ୍କ ସମେତ ରାଜ୍ୟ ସେବାର ଅଧିକାରୀ ଓ କର୍ମଚାରୀମାନେ ମଧ୍ୟ ଏହି ସୁବିଧା ପାଇବାକୁ ଯୋଗ୍ୟ ବିବେଚିତ ହେବେ।

ସର୍ତ୍ତ ଏବଂ ନିୟମ

ଏହି ସ୍ୱତନ୍ତ୍ର ଛୁଟି ପାଇବାକୁ ହେଲେ କର୍ମଚାରୀମାନଙ୍କୁ କିଛି ନିର୍ଦ୍ଦିଷ୍ଟ ନିୟମ ପାଳନ କରିବାକୁ ପଡ଼ିବ। ଆବେଦନ କରିବା ସମୟରେ ବିପଶ୍ୟନା କେନ୍ଦ୍ରରୁ ମିଳିଥିବା ପ୍ରବେଶ ପତ୍ର (Admission Letter) ଦାଖଲ କରିବା ବାଧ୍ୟତାମୂଳକ କରାଯାଇଛି। ସେହିପରି ଶିବିର ଶେଷ ହେବା ପରେ କର୍ମଚାରୀଙ୍କୁ ନିଜ କାର୍ଯ୍ୟାଳୟରେ ପ୍ରମାଣପତ୍ର (Completion Certificate) ଦାଖଲ କରିବାକୁ ପଡ଼ିବ। ଯଦି ପ୍ରମାଣପତ୍ର ଦାଖଲ ନ କରାଯାଏ, ତେବେ ଏହି ଛୁଟିକୁ ସାଧାରଣ ଅର୍ଜିତ ଛୁଟି (Earned Leave) ରୁ କାଟି ଦିଆଯିବ। ସରକାର ସ୍ପଷ୍ଟ କରିଛନ୍ତି ଯେ, ଏହି ଶିବିରରେ ଯୋଗଦେବା ପାଇଁ କୌଣସି ଯାତ୍ରା ଭତ୍ତା (TA) ବା ଅନ୍ୟାନ୍ୟ ଖର୍ଚ୍ଚ ସରକାରଙ୍କ ପକ୍ଷରୁ ବହନ କରାଯିବ ନାହିଁ ଏବଂ ସମସ୍ତ ଖର୍ଚ୍ଚ କର୍ମଚାରୀଙ୍କୁ ନିଜେ ବହନ କରିବାକୁ ପଡ଼ିବ।

ଛତିଶଗଡ଼ର ମହାସମୁନ୍ଦ ଜିଲ୍ଲାରେ ଏକ ବଡ଼ ଧରଣର ଅଘଟଣ ଘଟିଛି। ରବିବାର ସକାଳେ ପ୍ରସିଦ୍ଧ ଖଲ୍ଲାରୀ ମାତା ମନ୍ଦିରରେ ରୋପୱେ କେବୁଲ ଛିଣ୍ଡିଯିବା କାରଣରୁ ଏକ ଟ୍ରଲି ଖସିପଡ଼ିଛି। ଏହି ମର୍ମନ୍ତୁଦ ଦୁର୍ଘଟଣାରେ ଜଣେ ମହିଳାଙ୍କର ମୃତ୍ୟୁ ହୋଇଥିବା ବେଳେ ପ୍ରାୟ ୧୬ ଜଣ ଶ୍ରଦ୍ଧାଳୁ ଆହତ ହୋଇଛନ୍ତି।

କିପରି ଘଟିଲା ଦୁର୍ଘଟଣା?

ସୂଚନା ଅନୁଯାୟୀ, ରବିବାର ସକାଳ ପ୍ରାୟ ୧୦:୩୦ ସମୟରେ ନବରାତ୍ରୀ ଉତ୍ସବ ପାଇଁ ମନ୍ଦିରରେ ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ଜମିଥିଲା। ଦର୍ଶନ ସାରି କିଛି ଶ୍ରଦ୍ଧାଳୁ ଏକ ଟ୍ରଲିରେ ତଳକୁ ଫେରୁଥିବା ସମୟରେ ହଠାତ୍ ରୋପୱେର ତାର ଛିଣ୍ଡିଯାଇଥିଲା। ଫଳରେ ଟ୍ରଲିଟି ଅନିୟନ୍ତ୍ରିତ ହୋଇ ପାହାଡ଼ ଉପରୁ ପ୍ରାୟ ୧୦୦ ଫୁଟ୍ ତଳକୁ ଖସି ପଡ଼ିଥିଲା ଏବଂ ବଡ଼ ପଥରରେ ପିଟି ହୋଇଯାଇଥିଲା। ଏହି ସମୟରେ ଉପରକୁ ଯାଉଥିବା ଆଉ ଏକ ଟ୍ରଲି ମଧ୍ୟ ନିୟନ୍ତ୍ରଣ ହରାଇ ତୀବ୍ର ବେଗରେ ବେସ୍ ଷ୍ଟେସନରେ ପିଟି ହୋଇଥିଲା।

ମୃତାହତଙ୍କ ସୂଚନା

ଏହି ଭୟଙ୍କର ଦୁର୍ଘଟଣାରେ ରାୟପୁରର ରାଜା ତାଲାବ ଅଞ୍ଚଳର ବାସିନ୍ଦା ଆୟୁଷୀ ସାଠକର (୨୮ ବର୍ଷ) ନାମକ ଜଣେ ମହିଳାଙ୍କର ମୃତ୍ୟୁ ଘଟିଛି। ତାଙ୍କ ସ୍ୱାମୀ ଋଷଭ ଧାବରେଙ୍କ ସମେତ ଅନ୍ୟ ୧୬ ଜଣ ଗୁରୁତର ଆହତ ହୋଇଛନ୍ତି। ଆହତମାନଙ୍କୁ ତୁରନ୍ତ ଉଦ୍ଧାର କରାଯାଇ ମହାସମୁନ୍ଦ ଏବଂ ରାୟପୁରର ବିଭିନ୍ନ ଡାକ୍ତରଖାନାରେ ଭର୍ତ୍ତି କରାଯାଇଛି। ସୂଚନାଯୋଗ୍ୟ ଯେ, ଗତବର୍ଷ ନଭେମ୍ବର ମାସରେ ଆୟୁଷୀ ଏବଂ ଋଷଭଙ୍କର ବିବାହ ହୋଇଥିଲା ଏବଂ ସେମାନେ ମାନସିକ ପୂରଣ ପାଇଁ ପରିବାର ସହ ଖଲ୍ଲାରୀ ମାତାଙ୍କ ଦର୍ଶନ କରିବାକୁ ଆସିଥିଲେ।

ମୁଖ୍ୟମନ୍ତ୍ରୀଙ୍କ ଶୋକ ପ୍ରକାଶ ଓ ତଦନ୍ତ ନିର୍ଦ୍ଦେଶ

ଏହି ଘଟଣାକୁ ନେଇ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାୟ ଗଭୀର ଶୋକ ପ୍ରକାଶ କରିଛନ୍ତି। ସେ ମୃତକଙ୍କ ପରିବାର ପ୍ରତି ସମବେଦନା ଜଣାଇବା ସହ ଆହତମାନଙ୍କର ଉପଯୁକ୍ତ ଚିକିତ୍ସା ପାଇଁ ପ୍ରଶାସନକୁ କଡ଼ା ନିର୍ଦ୍ଦେଶ ଦେଇଛନ୍ତି। ଦୁର୍ଘଟଣାର କାରଣ ଜାଣିବା ପାଇଁ ପୋଲିସ ଓ ପ୍ରଶାସନ ପକ୍ଷରୁ ଏକ ଉଚ୍ଚସ୍ତରୀୟ ତଦନ୍ତ ଆରମ୍ଭ କରାଯାଇଛି। ତଦନ୍ତ ରିପୋର୍ଟ ଆସିବା ପରେ ରୋପୱେ ରକ୍ଷଣାବେକ୍ଷଣ କରୁଥିବା କମ୍ପାନୀ ବିରୋଧରେ ଏଫଆଇଆର (FIR) ରୁଜୁ କରାଯାଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ ଅଧୀକ୍ଷକ ସୂଚନା ଦେଇଛନ୍ତି।

ସୋସିଆଲ ମିଡିଆରେ ବର୍ତ୍ତମାନ ଏକ ଆଶ୍ଚର୍ଯ୍ୟଜନକ ଭିଡିଓ ଭାଇରାଲ ହେବାରେ ଲାଗିଛି, ଯାହାକୁ ଦେଖିଲେ ଆପଣଙ୍କୁ ନିଉଟନଙ୍କ ତୃତୀୟ ନିୟମ (କ୍ରିୟା ଓ ପ୍ରତିକ୍ରିୟା) ମନେ ପଡିଯିବ। ଛତିଶଗଡ଼ର ବିଳାସପୁରରୁ ଏହି ଘଟଣା ସାମ୍ନାକୁ ଆସିଛି, ଯେଉଁଠାରେ ମାଟି ତଳୁ ହଠାତ୍ ସୁନାମି ଭଳି ପାଣି ବାହାରିବାର ଦୃଶ୍ୟ ସମସ୍ତଙ୍କୁ ଚକିତ କରିଦେଇଛି। ଘଟଣାଟି ଜାନୁଆରୀ ୨୯ ତାରିଖ ରାତି ପ୍ରାୟ ୮ଟା ୨୫ ମିନିଟ୍ ସମୟରେ ଘଟିଥିବା କୁହାଯାଉଛି।

ସୂଚନା ଅନୁଯାୟୀ, ଏକ ଖାଲି ପ୍ଲଟରେ ଭାରୀ ମେସିନ୍ ସାହାଯ୍ୟରେ ବୋରିଂ କାମ ଚାଲିଥିଲା। ବୋରିଂ ପାଇଁ ବଡ଼ ଓ ଶକ୍ତିଶାଳୀ ମେସିନ୍ ବ୍ୟବହାର କରାଯାଉଥିବାରୁ ମାଟି ତଳେ ପ୍ରବଳ ଚାପ ସୃଷ୍ଟି ହୋଇଥିଲା। ଏହି ଚାପ ପାଖରେ ଥିବା ଏକ ଘର ପାଇଁ ବିପଦ ପାଲଟିଥିଲା। କୁହାଯାଉଛି ଯେ, ପଡ଼ୋଶୀଙ୍କ ଘରେ ପୂର୍ବରୁ ଲାଗିଥିବା ବୋରିଂ ପାଇପ୍ ଏହି ‘ହାଇ ପ୍ରେସର’ (High Pressure) ସହ୍ୟ କରିପାରିଲାନାହିଁ ଏବଂ ହଠାତ୍ ଫାଟି ଯାଇଥିଲା।

ସିସିଟିଭିରେ କଏଦ ହେଲା ଭୟଙ୍କର ଦୃଶ୍ୟ

छत्तीसगढ़ | बिलासपुर में एक प्लॉट में हैवी मशीन से बोरिंग करने का काम हो रहा था। हाईप्रेशर बनने से पड़ोसी के मकान का बोरिंग पाइप फट गया। एकदम जमीन फट गई और पानी की धार फूट पड़ी। pic.twitter.com/ClVFNwoGh2

— Sachin Gupta (@SachinGuptaUP) January 31, 2026

ଏହି ଘଟଣାର ଦୃଶ୍ୟ ପାଖରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଛି। ଭିଡିଓରେ ଦେଖାଯାଉଛି ଯେ, ପ୍ରଥମେ ଗେଟ୍ ଭିତରୁ ଧୀରେ ଧୀରେ ପାଣି ବାହାରୁଛି। କିନ୍ତୁ କିଛି ସେକେଣ୍ଡ ମଧ୍ୟରେ ପରିସ୍ଥିତି ସମ୍ପୂର୍ଣ୍ଣ ବଦଳିଯାଉଛି। ହଠାତ୍ ଜମିରେ ଫାଟ ସୃଷ୍ଟି ହୋଇ ପାଣିର ଏକ ଶକ୍ତିଶାଳୀ ଧାର ଉପରକୁ ଉଠୁଛି। ଦୃଶ୍ୟଟି ଏପରି ଥିଲା ଯେମିତି ପାଣି ନିଜେ ମାଟି ଚିରି ରାସ୍ତା ବନାଇ ବାହାରକୁ ଆସୁଛି। ସେଠାରେ ଉପସ୍ଥିତ ଜଣେ ବ୍ୟକ୍ତି ଭୟରେ ଦୌଡ଼ି ପଳାଉଥିବା ମଧ୍ୟ ଦେଖିବାକୁ ମିଳିଛି।

ଏହି ଘଟଣା ପରେ ବୋରିଂ କାମ ସମୟରେ ସୁରକ୍ଷା ନିୟମ ପାଳନ ଉପରେ ପ୍ରଶ୍ନ ଉଠିଛି। ବିଶେଷଜ୍ଞଙ୍କ ମତରେ, ବୋରିଂ କରିବା ପୂର୍ବରୁ ଆଖପାଖ ଅଞ୍ଚଳର ସର୍ଭେ କରିବା ନିହାତି ଜରୁରୀ। ଯଦି ପାଖରେ ପୁରୁଣା ବୋରିଂ, ପାଣି ପାଇପଲାଇନ୍ କିମ୍ବା ଦୁର୍ବଳ ମାଟି ଥାଏ, ତେବେ ସତର୍କତା ଅବଲମ୍ବନ କରାଯିବା ଉଚିତ୍। ଏହି ଭିଡିଓ ଏବେ ଇଣ୍ଟରନେଟରେ ଚର୍ଚ୍ଚାର ବିଷୟ ପାଲଟିଛି।

ଛତିଶଗଡ଼ର ରାୟପୁର ସେଣ୍ଟ୍ରାଲ ଜେଲରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି, ଯାହା ଜେଲ୍‌ର ସୁରକ୍ଷା ବ୍ୟବସ୍ଥା ଉପରେ ଗମ୍ଭୀର ପ୍ରଶ୍ନବାଚୀ ସୃଷ୍ଟି କରିଛି। ଜଣେ ଯୁବତୀ ନିଜ ପ୍ରେମିକର ଜନ୍ମଦିନରେ ତାଙ୍କୁ ଭେଟିବାକୁ ଯାଇ ଜେଲ୍‌ର ଭିଜିଟର୍ସ ରୁମ୍‌ରେ ମୋବାଇଲ୍‌ରେ ଭିଡିଓ ତିଆରି କରିଛନ୍ତି, ଯାହା ବର୍ତ୍ତମାନ ସୋସିଆଲ ମିଡିଆରେ ଜୋରଦାର ଭାଇରାଲ ହେବାରେ ଲାଗିଛି।

रायपुर सेंट्रल जेल में एक लड़की अपने बॉयफ्रेंड से मिलने आई और मोबाइल से वीडियो बनाकर सोशल मीडिया पर वायरल कर दिया, जिसके बाद जेल की सुरक्षा व्यवस्था पर सवाल खड़े किए जा रहे हैं. pic.twitter.com/w6YckByiIN

— Shelja Pandey (@Sheljapandey21) January 30, 2026

ଜେଲରେ ପ୍ରେମିକାଙ୍କ 'ବର୍ଥ-ଡେ' ରିଲ୍

ନିୟମ ଅନୁଯାୟୀ, ଜେଲ୍‌ର ସାକ୍ଷାତ କକ୍ଷ କିମ୍ବା ଭିଜିଟର୍ସ ରୁମ୍‌କୁ ମୋବାଇଲ୍ ଫୋନ୍ ନେବା ସମ୍ପୂର୍ଣ୍ଣ ନିଷେଧ। କିନ୍ତୁ ଏହି ଯୁବତୀ ଜଣକ ନିର୍ଭୟରେ ଫୋନ୍ ନେଇ ଭିତରକୁ ପ୍ରବେଶ କରିଥିଲେ ଏବଂ ସେଠାରେ ଏକ ଭିଡିଓ ରେକର୍ଡ କରିଥିଲେ। ଭାଇରାଲ ଭିଡିଓରେ ଯୁବତୀ ଜଣକ କହୁଛନ୍ତି, "ଆଜି ମୋ ଜାନର ଜନ୍ମଦିନ। ମୁଁ ସେଣ୍ଟ୍ରାଲ ଜେଲରେ ତାଙ୍କୁ ଭେଟିବାକୁ ଆସିଛି। ଦୁଃଖର ବିଷୟ ସେ ମୋ ସାଥିରେ ନାହାନ୍ତି, କିନ୍ତୁ ମୁଁ ଦେଖା କରିବାକୁ ଆସିଛି।"

ସୁରକ୍ଷା ବ୍ୟବସ୍ଥା ଉପରେ ଉଠିଲା ପ୍ରଶ୍ନ

ଭିଡିଓରେ ଦେଖାଯାଉଥିବା ଯୁବକଙ୍କ ନାମ ତାରକେଶ୍ୱର ବୋଲି ଜଣାପଡିଛି, ଯିଏ ବର୍ତ୍ତମାନ ଏନଡିପିଏସ (NDPS Act) ମାମଲାରେ ଜେଲରେ ବନ୍ଦୀ ଅଛନ୍ତି। ଜେଲ ଅଧିକାରୀଙ୍କ ଉପସ୍ଥିତି ସତ୍ତ୍ୱେ ଯୁବତୀ କିପରି ଫୋନ୍ ନେଇ ଭିତରକୁ ଗଲେ ଏବଂ ଭିଡିଓ ବନାଇଲେ, ତାହା ବର୍ତ୍ତମାନ ତଦନ୍ତ ସାପେକ୍ଷ। ଉଲ୍ଲେଖଯୋଗ୍ୟ ଯେ, ଗତ କିଛି ମାସ ମଧ୍ୟରେ ରାୟପୁର ଜେଲରୁ ଏଭଳି ଅନେକ ଭିଡିଓ ସାମ୍ନାକୁ ଆସିଛି, ଯାହା ପ୍ରଶାସନର କାର୍ଯ୍ୟଦକ୍ଷତା ଉପରେ ଅଙ୍ଗୁଳି ନିର୍ଦ୍ଦେଶ କରୁଛି।

ମାଲକାନଗିରି: ମାଲକାନଗିରି ସୀମାନ୍ତ ଲାଗି ରହିଥିବା ଛତିଶଗଡ଼ର ବିଜାପୁର ଜିଲ୍ଲା ଅନ୍ତର୍ଗତ ଜାତୀୟ ଉଦ୍ୟାନ ଅଞ୍ଚଳରେ ଆଜି ସକାଳେ ସୁରକ୍ଷାକର୍ମୀ ଓ ମାଓବାଦୀଙ୍କ ମଧ୍ୟରେ ଜୋରଦାର ଗୁଳିବିନିମୟ ଘଟିଛି। ଏହି ଏନକାଉଣ୍ଟରରେ ୨ ଜଣ ମାଓବାଦୀ ନିହତ ହୋଇଥିବା ପ୍ରାଥମିକ ସୂଚନା ମିଳିଛି। ଘଟଣାସ୍ଥଳରୁ ବହୁ ମାଓ ସାମଗ୍ରୀ ସହ ଗୋଟିଏ ଏକେ-୪୭ ବନ୍ଧୁକ ଜବତ କରାଯାଇଛି।

ବିଶେଷ ସୂତ୍ରରୁ ଖବର ପାଇ ଜିଲ୍ଲା ପୁଲିସ ଏବଂ ଡିଆରଜି (DRG) ଯବାନଙ୍କ ପକ୍ଷରୁ ଜାତୀୟ ଉଦ୍ୟାନରେ କମ୍ବିଂ ଅପରେସନ୍ ଆରମ୍ଭ କରାଯାଇଥିଲା। ଆଜି ସକାଳେ ଯବାନଙ୍କୁ ଦେଖି ମାଓବାଦୀମାନେ ଅତର୍କିତ ଗୁଳି ଚାଳନା କରିଥିଲେ, ଯାହାର ପାଲଟା ଜବାବ ଦେଇଥିଲେ ସୁରକ୍ଷାକର୍ମୀ। ଦୀର୍ଘ ସମୟ ଧରି ଉଭୟ ପକ୍ଷ ମଧ୍ୟରେ ଗୁଳିବିନିମୟ ଜାରି ରହିଥିଲା। ଶେଷରେ ଘଟଣାସ୍ଥଳରୁ ୨ ଜଣଙ୍କ ମୃତଦେହ ଉଦ୍ଧାର କରାଯାଇଛି।

ନିହତ ମାଓବାଦୀଙ୍କ ମଧ୍ୟରେ ଶୀର୍ଷ ମାଓ ନେତା ପାପା ରାଓ ଥିବା ନେଇ ଚର୍ଚ୍ଚା ଜୋର ଧରିଛି। ତେବେ ପୁଲିସ ପକ୍ଷରୁ ଏନେଇ ବର୍ତ୍ତମାନ ସୁଦ୍ଧା କୌଣସି ଆନୁଷ୍ଠାନିକ ସ୍ପଷ୍ଟିକରଣ ଦିଆଯାଇନାହିଁ। ଜଙ୍ଗଲରୁ ଯବାନ ଫେରିବା ପରେ ଏବଂ ମୃତଦେହ ଶନାକ୍ତ ହେବା ପରେ ସ୍ପଷ୍ଟ ଚିତ୍ର ସାମ୍ନାକୁ ଆସିବ ବୋଲି ପୁଲିସ କହିଛି। ବର୍ତ୍ତମାନ ସେହି ଅଞ୍ଚଳରେ ସର୍ଚ୍ଚ ଅପରେସନକୁ ଅଧିକ ଜୋରଦାର କରାଯାଇଛି।