ରାଜସ୍ଥାନ: ଦେଶ ପାଳୁଛି ଗୌରବମୟ ୭୮ତମ ସ୍ଥଳସେନା ଦିବସ । ବୀର ଯବାନଙ୍କ ବୀରତ୍ବ, ଶୌର୍ଯ୍ୟ, ପରାକ୍ରମ, ସେବା, ତ୍ୟାଗ ଓ ବଳିଦାନକୁ ସମ୍ମାନ । ଭାରତୀୟ ସେନାର ସାହସ, ନିସ୍ୱାର୍ଥପରତା, ଆଉ ବଳିଦାନକୁ ସମ୍ମାନ ଦେବାକୁ ଯାଇ ଆଜି ଦେଶ ପାଳୁଛି ଇଣ୍ଡିଆନ ଆର୍ମି ଡେ । ପ୍ରତି ବର୍ଷ ଜାନୁଆରୀ ୧୫ ତାରିଖରେ ଭବ୍ୟ ସମାରୋହ, ସୈନ୍ୟ ପରେଡର ସମାରୋହ ସହ ସେନା ଦିବସ ପାଳନ ହୁଏ । ଆଉ ଚଳିତ ବର୍ଷ ଜୟପୁରରେ ସେନା ଦିବସ ପାଳନ ହେଉଛି । ରାଜସ୍ଥାନ ଜୟପୁରରେ ସ୍ୱତନ୍ତ୍ର କାର୍ଯ୍ୟକ୍ରମରେ ଭାରତୀୟ ସେନା କରୁଛନ୍ତି ଶୌର୍ଯ୍ୟ ପ୍ରଦର୍ଶନ । 

ରାଜସ୍ଥାନର ଜୟପୁର ଠାରେ ଆଜି ୭୮ତମ ସେନା ଦିବସ ଅବସରରେ ଏକ ଐତିହାସିକ ମୁହୂର୍ତ୍ତ ଦେଖିବାକୁ ମିଳିଛି। ଇତିହାସରେ ପ୍ରଥମ ଥର ପାଇଁ ସେନା ଛାଉଣୀ ବାହାରେ ଏବଂ ସର୍ବସାଧାରଣଙ୍କ ପାଇଁ ଖୋଲା ସ୍ଥାନରେ ସେନା ଦିବସ ପରେଡ୍ ଅନୁଷ୍ଠିତ ହୋଇଛି। ଏହି ଭବ୍ୟ ସମାରୋହରେ ଭାରତୀୟ ସେନାର ଶୌର୍ଯ୍ୟ ଓ ପରାକ୍ରମ ପ୍ରଦର୍ଶିତ ହୋଇଛି।

ସେନା ଦିବସ ପାଳନର ଅଂଶବିଶେଷ ଭାବରେ ଆୟୋଜିତ ‘ଶୌର୍ଯ୍ୟ ସନ୍ଧ୍ୟା’ କାର୍ଯ୍ୟକ୍ରମରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମୁଖ୍ୟ ଅତିଥି ଭାବେ ଯୋଗଦେବାର କାର୍ଯ୍ୟକ୍ରମ ରହିଛି।

ସେନା ଦିବସର ପୂର୍ବଦିନ, ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ ଏକ ସ୍ୱତନ୍ତ୍ର ଅଳଙ୍କରଣ ସମାରୋହରେ ବୀର ଯବାନ ଓ ୟୁନିଟ୍ ଗୁଡିକୁ ସମ୍ମାନିତ କରିଥିଲେ। ଏହି ଅବସରରେ:
*   ୧୦ ଜଣଙ୍କୁ ସେନା ପଦକ (ବୀରତା) ପ୍ରଦାନ କରାଯାଇଛି।
*   ୪୯ଟି ସିଓଏଏସ୍ (COAS) ୟୁନିଟ୍ ସାଇଟେସନ୍ ପ୍ରଦାନ କରାଯାଇଛି।
*   ‘ଅପରେସନ୍ ସିନ୍ଦୂର’ ପାଇଁ ୨୬ଟି ୟୁନିଟ୍ ସମେତ ମୋଟ ୬୦ଟି ୟୁନିଟ୍‌କୁ ପ୍ରଶଂସା ପତ୍ର ଦିଆଯାଇଛି।

ନୂଆଦିଲ୍ଲୀ: ଆସନ୍ତା ଜାନୁଆରୀ ୧୫ ତାରିଖରେ ଅନୁଷ୍ଠିତ ହେବାକୁ ଥିବା ସେନା ଦିବସ ପୂର୍ବରୁ ସେନାଧ୍ୟକ୍ଷ ଜେନେରାଲ ଉପେନ୍ଦ୍ର ଦ୍ୱିବେଦୀ ମଙ୍ଗଳବାର ଦିନ ଏକ ସାମ୍ବାଦିକ ସମ୍ମିଳନୀରେ ‘ଅପରେସନ ସିନ୍ଦୂର’ ସମ୍ପର୍କରେ ବଡ଼ ଖୁଲାସା କରିଛନ୍ତି। ସେ କହିଛନ୍ତି ଯେ ଭାରତୀୟ ସେନାର ଏହି ସାହସିକ ପଦକ୍ଷେପ ପାକିସ୍ତାନର ଦୀର୍ଘ ଦିନର ‘ଆଣବିକ ଧମକ’ ବା ନ୍ୟୁକ୍ଲିୟର ବ୍ଲଫକୁ ଭାଙ୍ଗି ଚୁରମାର କରିଦେଇଛି।

ସେନାଧ୍ୟକ୍ଷଙ୍କ ସୂଚନା ଅନୁଯାୟୀ, ପାହଲଗାମ ଆତଙ୍କବାଦୀ ଆକ୍ରମଣ ପରେ ଭାରତୀୟ ସେନା ପକ୍ଷରୁ ଏକ ଦୃଢ଼ ନିଷ୍ପତ୍ତି ନିଆଯାଇଥିଲା। ଏହାର ଜବାବରେ ‘ଅପରେସନ ସିନ୍ଦୂର’ର ପରିକଳ୍ପନା କରାଯାଇଥିଲା। ଗତ ବର୍ଷ ମେ ୭ ତାରିଖରେ ମାତ୍ର ୨୨ ମିନିଟ୍‌ରେ ଆତଙ୍କୀ ଆଡ୍ଡା ଧ୍ବଂସ କରିଥିଲା ଭାରତ । ଏହି ସମୟ ମଧ୍ୟରେ ଭାରତୀୟ ସେନା ପାକିସ୍ତାନ ସୀମା ଭିତରକୁ ପଶି ଆତଙ୍କବାଦୀଙ୍କ ଭିତ୍ତିଭୂମି ଉପରେ ଜୋରଦାର ଆକ୍ରମଣ କରିଥିଲା।

ଜେନେରାଲ ଦ୍ୱିବେଦୀ କହିଛନ୍ତି ଯେ, ଏହି ଅପରେସନ ଅତ୍ୟନ୍ତ ସଠିକତାର ସହ ପରିଚାଳିତ ହୋଇଥିଲା। ସେନା ପକ୍ଷରୁ ଚିହ୍ନଟ କରାଯାଇଥିବା ୯ଟି ଆତଙ୍କବାଦୀ ଟାର୍ଗେଟ ମଧ୍ୟରୁ ୭ଟିକୁ ସମ୍ପୂର୍ଣ୍ଣ ରୂପେ ଧ୍ୱଂସ କରାଯାଇଛି। ପାକିସ୍ତାନର ଆଣବିକ ଶକ୍ତିର ଭୟ ଦେଖାଇବା ରଣନୀତିକୁ ଏହି ଅପରେସନ ସମ୍ପୂର୍ଣ୍ଣ ରୂପେ ବିଫଳ କରିଦେଇଛି।

‘ଅପରେସନ ସିନ୍ଦୂର’କୁ ସେନାଧ୍ୟକ୍ଷ ତିନି ସେନାର ସମନ୍ୱୟ ବା 'ଟ୍ରାଇ-ସର୍ଭିସ ସିନର୍ଜି'ର ଶ୍ରେଷ୍ଠ ଉଦାହରଣ ବୋଲି ଅଭିହିତ କରିଛନ୍ତି। ସେ କହିଛନ୍ତି ଯେ ସରକାରଙ୍କ ଠାରୁ ମିଳିଥିବା ସ୍ପଷ୍ଟ ରାଜନୈତିକ ନିର୍ଦ୍ଦେଶ ଏବଂ କାର୍ଯ୍ୟାନୁଷ୍ଠାନ ପାଇଁ ମିଳିଥିବା ପୂର୍ଣ୍ଣ ସ୍ୱାଧୀନତା ଯୋଗୁଁ ଏହା ସମ୍ଭବ ହୋଇପାରିଛି। ଏହି ସଫଳତା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସେପ୍ଟେମ୍ବର ୨୦୨୫ର ‘ଜୟ’ (JAI - Jointness, Atmanirbharta, Innovation) ଲକ୍ଷ୍ୟ ଏବଂ ପ୍ରତିରକ୍ଷା ମନ୍ତ୍ରୀଙ୍କ ସଂସ୍କାରକୁ ପ୍ରତିଫଳିତ କରୁଛି ବୋଲି ସେ ମତବ୍ୟକ୍ତ କରିଛନ୍ତି।