ମହାରାଷ୍ଟ୍ରର ନାସିକ୍ ସ୍ଥିତ ଟାଟା କନ୍ସଲଟାନ୍ସି ସର୍ଭିସେସ୍ (TCS) ର ଏକ ବିପିଓ (BPO) ୟୁନିଟରେ ଘଟିଥିବା ଯୌନ ନିର୍ଯାତନା ଏବଂ ଧର୍ମାନ୍ତରୀକରଣ ଅଭିଯୋଗକୁ ନେଇ ଚର୍ଚ୍ଚାରେ ଥିବା ନିଦା ଖାନ୍ଙ୍କୁ ନେଇ ଏକ ବଡ଼ ଖୁଲାସା ହୋଇଛି। ପ୍ରାଥମିକ ରିପୋର୍ଟ ଏବଂ ସୋସିଆଲ ମିଡିଆରେ ନିଦାଙ୍କୁ ଟିସିଏସ୍ ଏଚଆର (HR) ମୁଖ୍ୟ ବୋଲି ଦାବି କରାଯାଉଥିଲା, କିନ୍ତୁ ବର୍ତ୍ତମାନ କମ୍ପାନୀ ସୂତ୍ରରୁ ଏହାକୁ ଖଣ୍ଡନ କରାଯାଇଛି।

କମ୍ପାନୀ ପକ୍ଷରୁ ମିଳିଲା ବଡ଼ ଅପଡେଟ୍

ସୂତ୍ର ଅନୁଯାୟୀ, ଅଭିଯୁକ୍ତ ନିଦା ଖାନ୍ କୌଣସି ମାନବ ସମ୍ବଳ (HR) ମୁଖ୍ୟ କିମ୍ବା ମ୍ୟାନେଜର ନୁହଁନ୍ତି। ସେ କମ୍ପାନୀର ଉକ୍ତ ୟୁନିଟରେ ଜଣେ ସାଧାରଣ ଟେଲିକଲର ଭାବରେ କାର୍ଯ୍ୟ କରୁଥିଲେ ଏବଂ ସେଲ୍ସ ଟିମ୍‌ର ଅଂଶବିଶେଷ ଥିଲେ। ସୋସିଆଲ ମିଡିଆରେ ଭାଇରାଲ୍ ହେଉଥିବା ତାଙ୍କର ଫଟୋରେ ଏଚଆର ମୁଖ୍ୟ ଭାବରେ ଦିଆଯାଇଥିବା ପରିଚୟ ସମ୍ପୂର୍ଣ୍ଣ ମିଥ୍ୟା ଅଟେ। ଡିସେମ୍ବର ୨୦୨୧ ରେ ସେ ବିପିଓରେ ଯୋଗ ଦେଇଥିଲେ ଏବଂ ତାଙ୍କ ଉପରେ ଅତିକମରେ ତିନୋଟି ବରିଷ୍ଠ ପଦବୀ ରହିଛି।

କଣ ରହିଛି ପୂରା ମାମଲା?

ଟିସିଏସ୍‌ର ଏହି ୟୁନିଟରେ ମହିଳା କର୍ମଚାରୀମାନଙ୍କୁ ଯୌନ ନିର୍ଯାତନା ଦେବା, ହିନ୍ଦୁ ଦେବଦେବୀଙ୍କୁ ପରିହାସ କରିବା ଏବଂ ବାଧ୍ୟତାମୂଳକ ଭାବେ ଆମିଷ ଖୁଆଇ ଧର୍ମାନ୍ତରୀକରଣ କରିବା ଭଳି ସଙ୍ଗୀନ ଅଭିଯୋଗ ହୋଇଛି। ଏହି ଘଟଣାରେ ଏପର୍ଯ୍ୟନ୍ତ ୯ ଟି ଏଫଆଇଆର୍ (FIR) ରୁଜୁ ହୋଇଥିବା ବେଳେ ୭ ଜଣ ପୁରୁଷ ଅଭିଯୁକ୍ତଙ୍କୁ ଗିରଫ କରାଯାଇଛି। ପ୍ରଥମେ ଦାବି କରାଯାଉଥିଲା ଯେ ନିଦା ଖାନ୍ ଇଣ୍ଟରନାଲ୍ କମ୍ପ୍ଲେଣ୍ଟସ୍ କମିଟି (POSH) ର ସଦସ୍ୟା ଥାଇ ମଧ୍ୟ ଅଭିଯୋଗଗୁଡ଼ିକୁ ଲୁଚାଇବାକୁ ଚେଷ୍ଟା କରିଥିଲେ।

ପରିବାରର ଦାବି

ପୋଲିସ କହୁଛି ଯେ ନିଦା ଖାନ୍ ଫେରାର ଅଛନ୍ତି। କିନ୍ତୁ ଅନ୍ୟପଟେ ତାଙ୍କ ପରିବାର ଲୋକେ ଦାବି କରିଛନ୍ତି ଯେ ୨୬ ବର୍ଷୀୟା ନିଦା ମୁମ୍ବାଇରେ ଅଛନ୍ତି ଏବଂ ସେ ଗର୍ଭବତୀ ଅଛନ୍ତି। ପରିବାର ଅନୁଯାୟୀ କୌଣସି ପୋଲିସ ତାଙ୍କ ଘରକୁ ଆସିନାହାଁନ୍ତି କିମ୍ବା ସେ ଫେରାର୍ ନାହାଁନ୍ତି। ଏହା ସହିତ ନିଦାଙ୍କୁ ଉଦ୍ଦେଶ୍ୟମୂଳକ ଭାବେ ଟାର୍ଗେଟ୍ କରାଯାଇ ତାଙ୍କର ମିଥ୍ୟା ପରିଚୟ ଭାଇରାଲ୍ କରାଯାଇଥିବା ତାଙ୍କ ଭାଇ ଅଭିଯୋଗ କରିଛନ୍ତି। ବର୍ତ୍ତମାନ ପୋଲିସର ସ୍ୱତନ୍ତ୍ର ତଦନ୍ତକାରୀ ଦଳ (SIT) ଏହି ମାମଲାର ପୁଙ୍ଖାନୁପୁଙ୍ଖ ତଦନ୍ତ ଜାରି ରଖିଛି |

ମହାରାଷ୍ଟ୍ରର ନାସିକ ସ୍ଥିତ ଆଇଟି କମ୍ପାନୀ ଟାଟା କନସଲଟାନ୍ସି ସର୍ଭିସେସ୍ (TCS) ଅଫିସରେ ମହିଳା କର୍ମଚାରୀଙ୍କ ଯୌନ ଶୋଷଣ ଏବଂ ବାଧ୍ୟତାମୂଳକ ଧର୍ମାନ୍ତରୀକରଣ ଅଭିଯୋଗ ସାମ୍ନାକୁ ଆସିବା ପରେ ଏକ ଚାଞ୍ଚଲ୍ୟକର ତଥ୍ୟ ପଦାକୁ ଆସିଛି। ପୋଲିସର ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ଏହି ମାମଲାରେ ସମ୍ପୃକ୍ତ ସାତ ଜଣ ପୁରୁଷ ଅଭିଯୁକ୍ତ ଏକ ସଂଗଠିତ ଗ୍ୟାଙ୍ଗ୍ ଭଳି କାମ କରୁଥିଲେ, ଯେଉଁମାନଙ୍କର ମୁଖ୍ୟ ଲକ୍ଷ୍ୟ ଥିଲା ମହିଳା ସହକର୍ମୀମାନଙ୍କୁ ଟାର୍ଗେଟ୍ କରିବା। ଏହି ଘଟଣାରେ ପୋଲିସ ବର୍ତ୍ତମାନ ସୁଦ୍ଧା ୯ଟି ଏଫଆଇଆର୍ ରୁଜୁ କରିଥିବା ବେଳେ ଏକ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଗଠନ କରି ତଦନ୍ତ ଚଳାଇଛି।

ସଂଗଠିତ ଗ୍ୟାଙ୍ଗ୍ ଓ ଧର୍ମାନ୍ତରୀକରଣ ଉଦ୍ୟମ

ପୋଲିସ ଅଧିକାରୀଙ୍କ କହିବା ଅନୁଯାୟୀ, ଅଭିଯୁକ୍ତମାନେ ମହିଳା କର୍ମଚାରୀମାନଙ୍କ ଦୁର୍ବଳତାର ସୁଯୋଗ ନେଇ ସେମାନଙ୍କ ସହ ବନ୍ଧୁତା ସ୍ଥାପନ କରୁଥିଲେ ଏବଂ ମାନସିକ ଓ ଯୌନ ନିର୍ଯାତନା ଦେବା ସହ ଇସଲାମ ଧର୍ମ ଗ୍ରହଣ କରିବାକୁ ବାଧ୍ୟ କରୁଥିଲେ। ପୀଡ଼ିତାମାନଙ୍କୁ ନମାଜ ପଢ଼ିବା, ରୋଜା ରଖିବା ଏବଂ ଇସଲାମୀୟ ରୀତିନୀତି ପାଳନ କରିବା ପାଇଁ ଚାପ ପକାଯାଉଥିଲା ବୋଲି ଅଭିଯୋଗ ହୋଇଛି। ପ୍ରାୟ ୨୦୨୨ ମସିହାରୁ ଆରମ୍ଭ ହୋଇଥିବା ଏହି କାର୍ଯ୍ୟକଳାପ ନିକଟ ଅତୀତ ପର୍ଯ୍ୟନ୍ତ ଚାଲିଥିଲା।

ଏଚଆରଙ୍କ ସମ୍ପୃକ୍ତି ଓ ପୋଲିସ କାର୍ଯ୍ୟାନୁଷ୍ଠାନ

ଏହି ମାମଲାରେ ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି କମ୍ପାନୀର ମାନବ ସମ୍ବଳ (HR) ବିଭାଗର ମୁଖ୍ୟଙ୍କ ଭୂମିକା। ପୀଡ଼ିତାମାନେ ଯେତେବେଳେ ଏଚଆରଙ୍କ ନିକଟରେ ଅଭିଯୋଗ କରିଥିଲେ, ସେତେବେଳେ ସେମାନଙ୍କ କଥା ଶୁଣିବା ପରିବର୍ତ୍ତେ ଅଭିଯୁକ୍ତମାନଙ୍କୁ ସୁରକ୍ଷା ଦିଆଯାଇଥିଲା। ଅଭିଯୋଗ କଲେ ଚାକିରିରୁ ବାହାର କରିଦେବାର ଧମକ ମଧ୍ୟ ଦିଆଯାଇଥିଲା। ପୋଲିସ ଏହି ମାମଲାରେ ଏପର୍ଯ୍ୟନ୍ତ ଏଚଆର ମ୍ୟାନେଜରଙ୍କ ସମେତ ୮ ଜଣଙ୍କୁ ଗିରଫ କରିଛି ଏବଂ ଆଉ ଜଣେ ମହିଳା ଅଭିଯୁକ୍ତ ଫେରାର ଅଛନ୍ତି। ଗିରଫ ହୋଇଥିବା ପୁରୁଷ ଅଭିଯୁକ୍ତଙ୍କ ମଧ୍ୟରେ ଟିମ୍ ଲିଡର ଓ ଇଞ୍ଜିନିୟର ସାମିଲ ଅଛନ୍ତି।

କମ୍ପାନୀର ଦୃଢ଼ କାର୍ଯ୍ୟାନୁଷ୍ଠାନ

ଏହି ଘଟଣା ସାମ୍ନାକୁ ଆସିବା ପରେ ଟିସିଏସ୍ ପକ୍ଷରୁ କଡ଼ା ପଦକ୍ଷେପ ନିଆଯାଇଛି। ଟାଟା ସନ୍ସର ଅଧ୍ୟକ୍ଷ ଏନ୍. ଚନ୍ଦ୍ରଶେଖରନ୍ ଏହି ଘଟଣାକୁ ନିନ୍ଦା କରିବା ସହ ଏହା ଏକ ଅତ୍ୟନ୍ତ ଚିନ୍ତାଜନକ ବିଷୟ ବୋଲି କହିଛନ୍ତି। କମ୍ପାନୀ ନିଜର 'ଜିରୋ ଟୋଲରାନ୍ସ' ନୀତି ଅବଲମ୍ବନ କରି ଅଭିଯୁକ୍ତମାନଙ୍କୁ ତୁରନ୍ତ କାର୍ଯ୍ୟରୁ ନିଲମ୍ବିତ କରିଛି। ଏଥିସହ ପୋଲିସ ତଦନ୍ତରେ ସମ୍ପୂର୍ଣ୍ଣ ସହଯୋଗ କରିବାକୁ କମ୍ପାନୀ ପକ୍ଷରୁ ପ୍ରତିଶ୍ରୁତି ଦିଆଯାଇଛି। ସେପଟେ ମହାରାଷ୍ଟ୍ର ସରକାର ଏବଂ ବିଭିନ୍ନ ରାଜନୈତିକ ଦଳ ଏହି ଘଟଣାକୁ ଗମ୍ଭୀରତାର ସହ ନେଇ ଉଚିତ୍ କାର୍ଯ୍ୟାନୁଷ୍ଠାନ ଦାବି କରିଛନ୍ତି।

ନୂଆଦିଲ୍ଲୀ: ସୁପ୍ରିମକୋର୍ଟ ମଙ୍ଗଳବାର ଦିନ ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ସର୍ବୋଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ଅନୁଯାୟୀ, ଯଦି କୌଣସି ବ୍ୟକ୍ତି ହିନ୍ଦୁ, ଶିଖ୍ କିମ୍ବା ବୌଦ୍ଧ ଧର୍ମ ବ୍ୟତୀତ ଅନ୍ୟ କୌଣସି ଧର୍ମ ଗ୍ରହଣ କରନ୍ତି, ତେବେ ତାଙ୍କୁ ଅନୁସୂଚିତ ଜାତି (Scheduled Caste ବା SC) ର ମାନ୍ୟତା ମିଳିପାରିବ ନାହିଁ। ଅନ୍ୟ ଧର୍ମକୁ ଧର୍ମାନ୍ତରିତ ହେଲେ ଏହି ମାନ୍ୟତା ସ୍ୱତଃ ରଦ୍ଦ ହୋଇଯିବ ବୋଲି କୋର୍ଟ ସ୍ପଷ୍ଟ କରିଛନ୍ତି। 

ବିଚାରପତି ପି.କେ. ମିଶ୍ର ଏବଂ ଏନ୍.ଭି. ଅଞ୍ଜାରିଆଙ୍କୁ ନେଇ ଗଠିତ ଖଣ୍ଡପୀଠ ଆନ୍ଧ୍ରପ୍ରଦେଶ ହାଇକୋର୍ଟଙ୍କ ଏକ ରାୟକୁ କାଏମ ରଖିଛନ୍ତି। ହାଇକୋର୍ଟ ନିଜ ରାୟରେ କହିଥିଲେ ଯେ ଖ୍ରୀଷ୍ଟିଆନ ଧର୍ମ ଗ୍ରହଣ କରିଥିବା ଏବଂ ସକ୍ରିୟ ଭାବରେ ସେହି ଧର୍ମ ପାଳନ କରୁଥିବା ବ୍ୟକ୍ତିମାନେ ନିଜର ଏସସି ମାନ୍ୟତା ବଜାୟ ରଖିପାରିବେ ନାହିଁ। ଏହି ପ୍ରସଙ୍ଗରେ ସୁପ୍ରିମକୋର୍ଟ କହିଛନ୍ତି ଯେ ସମ୍ବିଧାନ (ଅନୁସୂଚିତ ଜାତି) ଆଦେଶ, ୧୯୫୦ ରେ ଏହି ବ୍ୟବସ୍ଥା ସ୍ପଷ୍ଟ ଭାବରେ ଉଲ୍ଲେଖ କରାଯାଇଛି। ଯେକୌଣସି ବ୍ୟକ୍ତି ୧୯୫୦ ଆଦେଶର ଧାରା ୩ ଅଧୀନରେ ଥିବା ଧର୍ମ ବ୍ୟତୀତ ଅନ୍ୟ ଧର୍ମ ପାଳନ କରନ୍ତି, ସେ ଜନ୍ମରୁ ଯାହା ବି ହୋଇଥାନ୍ତୁ ନା କାହିଁକି, ଅନୁସୂଚିତ ଜାତିର ସଦସ୍ୟ ହୋଇ ରହିବେ ନାହିଁ।

କୋର୍ଟ ଦର୍ଶାଇଛନ୍ତି ଯେ ଏଭଳି ବ୍ୟକ୍ତିମାନେ ସମ୍ବିଧାନ କିମ୍ବା ସଂସଦ କିମ୍ବା ରାଜ୍ୟ ବିଧାନସଭା ଦ୍ୱାରା ପ୍ରଣୀତ କୌଣସି ଆଇନ ଅଧୀନରେ ଅନୁସୂଚିତ ଜାତି ପାଇଁ ଉଦ୍ଦିଷ୍ଟ କୌଣସି ସାମ୍ବିଧାନିକ ସୁବିଧା, ସୁରକ୍ଷା, ସଂରକ୍ଷଣ କିମ୍ବା ଅଧିକାର ଦାବି କରିପାରିବେ ନାହିଁ। ଏହି ବାରଣ ସମ୍ପୂର୍ଣ୍ଣ ରୂପେ ଲାଗୁ ହେବ ଏବଂ ଏଥିରେ କୌଣସି ବ୍ୟତିକ୍ରମ ଗ୍ରହଣଯୋଗ୍ୟ ନୁହେଁ।

ଏହି ରାୟ ଏକ ଏପରି ମାମଲାରେ ଆସିଛି, ଯେଉଁଥିରେ ଜଣେ ବ୍ୟକ୍ତି ଖ୍ରୀଷ୍ଟିଆନ ଧର୍ମ ଗ୍ରହଣ କରିବା ସହ ପାଦ୍ରୀ ଭାବରେ କାମ କରୁଥିଲେ। ସେ ଅନୁସୂଚିତ ଜାତି ଏବଂ ଜନଜାତି (ଅତ୍ୟାଚାର ନିବାରଣ) ଆଇନ (SC/ST Act) ଅଧୀନରେ ନିଜ ଉପରେ ଆକ୍ରମଣ ଏବଂ ଜାତିଗତ ଅପମାନ ଅଭିଯୋଗ ଆଣି ଏକ ମାମଲା ରୁଜୁ କରିଥିଲେ। ଅଭିଯୁକ୍ତ ପକ୍ଷ ଏହାକୁ ଚ୍ୟାଲେଞ୍ଜ କରି ଯୁକ୍ତି ବାଢ଼ିଥିଲେ ଯେ ଧର୍ମାନ୍ତରୀକରଣ ପରେ ଅଭିଯୋଗକାରୀ ଆଉ ଏହି ଆଇନ ଅଧୀନରେ ସୁରକ୍ଷା ପାଇବାକୁ ହକଦାର ନୁହଁନ୍ତି। ପ୍ରମାଣରୁ ସ୍ପଷ୍ଟ ହୋଇଥିଲା ଯେ ଅଭିଯୋଗକାରୀ ଦଶନ୍ଧିରୁ ଅଧିକ ସମୟ ଧରି ଖ୍ରୀଷ୍ଟିଆନ ଧର୍ମ ପାଳନ କରିଆସୁଛନ୍ତି ଏବଂ ତାଙ୍କ ନିକଟରେ କେବଳ ଏକ ଜାତି ପ୍ରମାଣପତ୍ର ରହିବା ତାଙ୍କୁ ସୁବିଧା ପ୍ରଦାନ କରିବାକୁ ଯଥେଷ୍ଟ ନୁହେଁ।

ଲକ୍ଷ୍ନୌ: ଉତ୍ତରପ୍ରଦେଶର ରାଜଧାନୀ ଲକ୍ଷ୍ନୌରେ ଏକ ସାଂଘାତିକ ଘଟଣା ସାମ୍ନାକୁ ଆସିଛି। ଜଣେ ୨୩ ବର୍ଷୀୟା ଯୁବତୀଙ୍କୁ ବିବାହର ପ୍ରତିଶ୍ରୁତି ଦେଇ ଯୌନ ଶୋଷଣ କରିବା, ଧର୍ମ ପରିବର୍ତ୍ତନ ପାଇଁ ଚାପ ପକାଇବା ଏବଂ ମାଡ଼ ମାରି ଗର୍ଭପାତ କରାଇଥିବା ନେଇ ଅଭିଯୋଗ ହୋଇଛି। ପୀଡ଼ିତାଙ୍କ ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ପ୍ରେମ ଜାଲରେ ଫସାଇ ଶାରୀରିକ ଶୋଷଣ

ମିଳିଥିବା ସୂଚନା ଅନୁଯାୟୀ, ପୀଡ଼ିତା ମୂଳ ରୂପେ ବିହାରର ଗୋପାଳଗଞ୍ଜ ଜିଲ୍ଲାର ବାସିନ୍ଦା ଏବଂ ସେ ବିଗତ ତିନି ବର୍ଷ ହେବ ନିଜ ମା'ଙ୍କ ସହ ଲକ୍ଷ୍ନୌର ଆଲମନଗର ଅଞ୍ଚଳରେ ରହୁଛନ୍ତି। ପୀଡ଼ିତାଙ୍କ କହିବା ଅନୁଯାୟୀ, କାଶ୍ମୀରୀ ବାଗ ଅଞ୍ଚଳର ବାସିନ୍ଦା ଫରଦିନ ଖାନ ନାମକ ଜଣେ ଯୁବକ ତାଙ୍କୁ ପ୍ରଥମେ ପ୍ରେମ ଜାଲରେ ଫସାଇଥିଲେ। ପରେ ବିବାହର ପ୍ରତିଶ୍ରୁତି ଦେଇ ତାଙ୍କ ସହ ଶାରୀରିକ ସମ୍ପର୍କ ସ୍ଥାପନ କରିଥିଲେ।

ଧୋକାରେ ନିକାହ ଏବଂ ଧର୍ମାନ୍ତରଣ ପାଇଁ ଚାପ

ଅଭିଯୋଗ ଅନୁସାରେ, ୨୦ ଅକ୍ଟୋବର ୨୦୨୪ରେ ଅଭିଯୁକ୍ତ ଫରଦିନ ଏକ ନିକାହ କରିଥିଲେ ଏବଂ ପ୍ରତିଶ୍ରୁତି ଦେଇଥିଲେ ଯେ ପରେ ସେ ହିନ୍ଦୁ ଧର୍ମ ଗ୍ରହଣ କରି ହିନ୍ଦୁ ରୀତିନୀତିରେ ମଧ୍ୟ ବିବାହ କରିବେ। କିନ୍ତୁ ନିକାହନାମାରେ ଧୋକାରେ ଦସ୍ତଖତ କରାଇ ନିଆଯାଇଥିଲା ବୋଲି ଯୁବତୀ ଜଣକ ଅଭିଯୋଗ କରିଛନ୍ତି। ବିବାହ ପରେ ଫରଦିନ ତାଙ୍କୁ ନିଜ ଘରକୁ ନନେଇ ଏକ ଭଡ଼ା ଘରେ ରଖିଥିଲେ ଏବଂ ତାଙ୍କୁ ଇସଲାମ ଧର୍ମ ଗ୍ରହଣ କରିବା ସହ 'କଲମା' ପଢ଼ିବାକୁ ବାଧ୍ୟ କରୁଥିଲେ। ଏହାକୁ ବିରୋଧ କରିବାରୁ ପୀଡ଼ିତାଙ୍କୁ ଶାରୀରିକ ଓ ମାନସିକ ନିର୍ଯାତନା ଦିଆଯାଉଥିଲା।

ଗର୍ଭବତୀ ଅବସ୍ଥାରେ ମାଡ଼ ଓ ଗର୍ଭପାତ

ପୀଡ଼ିତାଙ୍କ ଅଭିଯୋଗ ଅନୁଯାୟୀ, ସେ ୩ ମାସର ଗର୍ଭବତୀ ଥିବା ବେଳେ ଫରଦିନଙ୍କୁ ତାଙ୍କର ପ୍ରତିଶ୍ରୁତି ବିଷୟରେ ପଚାରିଥିଲେ। ଏଥିରେ ଉତକ୍ଷିପ୍ତ ହୋଇ ଫରଦିନ ତାଙ୍କ ପେଟକୁ ଗୋଇଠା ମାରିଥିଲେ, ଯାହା ଫଳରେ ତାଙ୍କର ଗର୍ଭପାତ (ମିସକ୍ୟାରେଜ୍) ହୋଇଯାଇଥିଲା। ଏହି ଘଟଣା ପରେ ଅଭିଯୁକ୍ତ ତାଙ୍କୁ ସେହି ଅବସ୍ଥାରେ ଛାଡ଼ି ଫେରାର ହୋଇଯାଇଥିଲେ।

ପୋଲିସର କାର୍ଯ୍ୟାନୁଷ୍ଠାନ

ଏହି ଘଟଣାକୁ ନେଇ ପୀଡ଼ିତା ତାଲକଟୋରା ଥାନାରେ ଏଫଆଇଆର (FIR) ରୁଜୁ କରିଛନ୍ତି। ୱେଷ୍ଟ ଜୋନର ଡିସିପି ବିଶ୍ୱଜିତ ଶ୍ରୀବାସ୍ତବ କହିଛନ୍ତି ଯେ, ଯୁବତୀଙ୍କ ଅଭିଯୋଗ ଭିତ୍ତିରେ ଅଭିଯୁକ୍ତଙ୍କ ବିରୋଧରେ ମାମଲା ଦାୟର କରାଯାଇଛି। ପୋଲିସ ସମସ୍ତ ଦିଗରୁ ଏହି ଘଟଣାର ତଦନ୍ତ କରୁଛି ଏବଂ ପ୍ରମାଣ ଆଧାରରେ ଆଗାମୀ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦିଆଯାଇଛି।

ମଧ୍ୟପ୍ରଦେଶର ରାଜଧାନୀ ଭୋପାଳରେ ପୁଣି ଏକ ଲଜ୍ଜାଜନକ ଘଟଣା ସାମ୍ନାକୁ ଆସିଛି। ଜଣେ ବ୍ୟୁଟିସିଆନ୍ ଯୁବତୀଙ୍କୁ 'ଲଭ୍ ଜିହାଦ୍' ଜାଲରେ ଫସାଇ ଦୁଷ୍କର୍ମ ଓ ଧର୍ମ ପରିବର୍ତ୍ତନ ପାଇଁ ଚାପ ପକାଯାଇଥିବା ଅଭିଯୋଗ ହୋଇଛି। ଏହି ଷଡଯନ୍ତ୍ରରେ ପୀଡ଼ିତାଙ୍କ ନିଜ ରୁମ୍ ପାର୍ଟନର ଅମରୀନ୍ ମୁଖ୍ୟ ଭୂମିକା ଗ୍ରହଣ କରିଥିବା ଜଣାପଡ଼ିଛି।

ବାନ୍ଧବୀ ସାଜି ବିଶ୍ୱାସଘାତକତା

ପୋଲିସ୍ ସୂଚନା ଅନୁଯାୟୀ, ଛତିଶଗଡ଼ର ଜଣେ ୩୦ ବର୍ଷୀୟା ବ୍ୟୁଟିସିଆନ୍ ଭୋପାଳରେ ରହି କାମ କରୁଥିଲେ। ଡିସେମ୍ବର ୨୦୨୪ରେ ଏକ ଜନ୍ମଦିନ ପାର୍ଟିରେ ତାଙ୍କର ଅମରୀନ୍ ଓରଫ୍ ମାହିରା ନାମକ ଜଣେ ଯୁବତୀଙ୍କ ସହ ବନ୍ଧୁତା ହୋଇଥିଲା। ପରେ ଉଭୟ ବାଗସେବନିଆ ଅଞ୍ଚଳରେ ଏକାଠି ରହିବା ଆରମ୍ଭ କରିଥିଲେ। ଅଭିଯୋଗ ଅନୁସାରେ, କିଛି ଦିନ ପରେ ଅମରୀନ୍ ପୀଡ଼ିତାଙ୍କ ଉପରେ ଇସଲାମ୍ ଧର୍ମ ଗ୍ରହଣ କରିବା ପାଇଁ ଚାପ ପକାଇବା ଆରମ୍ଭ କରିଦେଇଥିଲେ।

ନିଶା ଦେଇ ଦୁଷ୍କର୍ମ ଅଭିଯୋଗ

ନଭେମ୍ବର ୨୦୨୫ରେ ଅମରୀନ୍ ପୀଡ଼ିତାଙ୍କୁ ଗାନ୍ଧୀ ନଗର ସ୍ଥିତ ଆବାସ୍ ନଗରକୁ ନେଇଯାଇଥିଲେ। ସେଠାରେ ଅମରୀନ୍‌ଙ୍କ ଭାଇ ବିଲାଲ୍ ଚା’ରେ ନିଶା ଦ୍ରବ୍ୟ ମିଶାଇ ପୀଡ଼ିତାଙ୍କୁ ପିଇବାକୁ ଦେଇଥିଲେ। ଯୁବତୀ ଜଣକ ଅଚେତ ହୋଇପଡ଼ିବା ପରେ ବିଲାଲ୍ ତାଙ୍କ ସହ ଦୁଷ୍କର୍ମ କରିଥିବା ଅଭିଯୋଗ ହୋଇଛି। କେବଳ ସେତିକି ନୁହେଁ, ଡିସେମ୍ବର ମାସରେ ଅମରୀନ୍ ତାଙ୍କୁ ଅହମ୍ମଦାବାଦ ନେଇଯାଇଥିଲେ, ଯେଉଁଠାରେ ୟାସିର୍ ନାମକ ଅନ୍ୟ ଜଣେ ଯୁବକ ମଧ୍ୟ ତାଙ୍କ ସହ ଦୁଷ୍କର୍ମ କରିଥିଲେ।

ପୋଲିସ୍ ତଦନ୍ତ ଆରମ୍ଭ

ପୀଡ଼ିତାଙ୍କ ଅଭିଯୋଗ କ୍ରମେ ବାଗସେବନିଆ ପୋଲିସ୍ ଏକ ମାମଲା ରୁଜୁ କରିଛି। ଏହି ମାମଲାରେ ଅମରୀନ୍, ବିଲାଲ୍, ୟାସିର୍ ଏବଂ ଚନ୍ଦନ ଯାଦବଙ୍କ ନାମରେ ଏଫ୍ଆଇଆର୍ (FIR) ଦାୟର କରାଯାଇଛି। ଘଟଣା ପରେ ସମସ୍ତ ଅଭିଯୁକ୍ତ ଫେରାର୍ ଥିବାବେଳେ ପୋଲିସ୍ ସେମାନଙ୍କୁ ଧରିବା ପାଇଁ ତଲାସି ଅଭିଯାନ ଜାରି ରଖିଛି।

ଫିଲ୍ମ ‘ଦ କେରଳ ଷ୍ଟୋରୀ’ର ଅପାର ସଫଳତା ପରେ ଏବେ ଏହାର ସିକ୍ୱେଲ ‘ଦ କେରଳ ଷ୍ଟୋରୀ ୨ - ଗୋଜ୍ ବିୟଣ୍ଡ’ର ଟ୍ରେଲର ମୁକ୍ତିଲାଭ କରିଛି। ନିର୍ମାତାମାନେ ଏହି ନୂତନ ଭାଗରେ ପୂର୍ବ ଅପେକ୍ଷା ଅଧିକ ଗମ୍ଭୀର ଏବଂ ସମ୍ବେଦନଶୀଳ ପ୍ରସଙ୍ଗକୁ ଉପସ୍ଥାପନ କରିଛନ୍ତି। ଭଲପାଇବା, ବିଶ୍ୱାସ ଏବଂ ପରିଚୟକୁ ନେଇ ଭାରତର ବିଭିନ୍ନ ପ୍ରାନ୍ତରେ ଘଟୁଥିବା ଘଟଣାବଳୀକୁ ଏଥିରେ ସ୍ଥାନ ଦିଆଯାଇଛି। କାମାକ୍ଷା ନାରାୟଣ ସିଂହଙ୍କ ନିର୍ଦ୍ଦେଶିତ ଏହି ଚଳଚ୍ଚିତ୍ରଟି ଆସନ୍ତା ୨୦୨୬ ମସିହା ଫେବୃଆରୀ ୨୭ ତାରିଖରେ ପ୍ରେକ୍ଷାଳୟକୁ ଆସିବ।

ଟ୍ରେଲରରେ ରହିଛି ଚେତାବନୀ ଓ ସଂଘର୍ଷର କାହାଣୀ

ଟ୍ରେଲରର ଆରମ୍ଭରେ ଏକ ଶକ୍ତ ଚେତାବନୀ ଦିଆଯାଇଛି ଯେ, ଆସନ୍ତା ୨୫ ବର୍ଷ ମଧ୍ୟରେ ଭାରତ ଏକ ଇସଲାମିକ ରାଷ୍ଟ୍ରରେ ପରିଣତ ହୋଇପାରେ। ଏହାପରେ କାହାଣୀଟି ରାଜସ୍ଥାନ, ମଧ୍ୟପ୍ରଦେଶ ଏବଂ କେରଳର ଘଟଣାବଳୀକୁ ଦେଖାଇଥାଏ। ରାଜସ୍ଥାନରେ ଜଣେ ୧୬ ବର୍ଷୀୟା ନାବାଳିକାକୁ ଜବରଦସ୍ତି ଧର୍ମ ପରିବର୍ତ୍ତନ କରାଯିବା ଏବଂ ମଧ୍ୟପ୍ରଦେଶରେ ବିବାହ ପରେ ଜଣେ ଯୁବତୀଙ୍କୁ ପ୍ରତାରଣା କରି ଧର୍ମାନ୍ତରୀକରଣ କରିବା ଭଳି ଦୃଶ୍ୟ ଟ୍ରେଲରରେ ସ୍ଥାନ ପାଇଛି। କେରଳରେ ଜଣେ ହିନ୍ଦୁ ଯୁବତୀ ନିଜ ଧର୍ମ ତ୍ୟାଗ କରିବାକୁ ମନା କରିବା ପରେ ସୃଷ୍ଟି ହୋଇଥିବା ପାରିବାରିକ ଏବଂ ବ୍ୟକ୍ତିଗତ ସଂଘର୍ଷକୁ ଏଥିରେ ଖୁବ୍ ନିଖୁଣ ଭାବେ ଚିତ୍ରଣ କରାଯାଇଛି।

ବିପୁଲ ଅମୃତଲାଲ ଶାହଙ୍କ ପ୍ରଯୋଜିତ ଏହି ଚଳଚ୍ଚିତ୍ରରେ ଉଲ୍କା ଗୁପ୍ତା, ଅଦିତି ଭାଟିଆ ଏବଂ ଐଶ୍ୱର୍ଯ୍ୟା ଓଝା ମୁଖ୍ୟ ଭୂମିକାରେ ଅଭିନୟ କରିଛନ୍ତି। ତିନିଜଣ ହିନ୍ଦୁ ଯୁବତୀ କିଭଳି ଭଲପାଇବା ଜାଲରେ ପଡ଼ି ଧର୍ମ ପରିବର୍ତ୍ତନ କରିବାକୁ ବାଧ୍ୟ ହେଉଛନ୍ତି, ତାହାକୁ ନେଇ ଫିଲ୍ମର କାହାଣୀ ଗତିଶୀଳ ହୋଇଛି। ଫିଲ୍ମର ଟ୍ୟାଗଲାଇନ୍ ‘ଇସ୍ ବାର ସହେଙ୍ଗେ ନେହିଁ... ଲଢେଙ୍ଗେ’ ଅର୍ଥାତ୍ ଏଥର ସହିବୁ ନାହିଁ... ଲଢିବୁ, ଦର୍ଶକଙ୍କ ମଧ୍ୟରେ ଏକ ଭିନ୍ନ ଉନ୍ମାଦନା ସୃଷ୍ଟି କରିଛି। ପୂର୍ବ ଭାଗ ଭଳି ଏହି ସିକ୍ୱେଲଟି ମଧ୍ୟ ସାମାଜିକ ସ୍ତରରେ ବ୍ୟାପକ ପ୍ରଭାବ ପକାଇବ ବୋଲି ଆଶା କରାଯାଉଛି।

ଜଳେଶ୍ୱର: ଧର୍ମାନ୍ତରୀକରଣ ଯୋଗୁଁ ଉଠିପାରୁନି ଶବ । ମୃତ୍ୟୁର ୨୫ ଘଣ୍ଟା ପରେ ମଧ୍ୟ ପଡିରହିଛି ମୃତଦେହ । ଶବ ପୋତାହେବ ନା ପୋଡାହବ, ଏନେଇ ଉପୁଜିଛି ଦ୍ୱନ୍ଦ । ଧର୍ମାନ୍ତୀକରଣକୁ ବିରୋଧ ଯୋଗୁ ହୋଇ ପାରୁନି ଶବ ସତ୍କାର । ବାଲେଶ୍ବର ଜିଲ୍ଲା ରାଇବଣିଆ ଥାନା ରଙ୍ଗାମାଟିଆରେ ଦେଖିବାକୁ ମିଳିଛ ଏପରି ଘଟଣା । ସୂଚନା ଅନୁସାରେ, କାଳିକ ଗ୍ରାମ ପଞ୍ଚାୟତର ରଙ୍ଗାମାଠିଆ ଗ୍ରାମର ଚଇନା ହାଁସଦାଙ୍କ ପୁତ୍ର ଛୁଟା ହାଁସଦାଙ୍କ ବାର୍ଦ୍ଧକ୍ୟ ଜନିତ ମୃତ୍ୟୁ ବୁଧବାର ରାତିରେ ଘଟିଥିଲା। ସେ ପାରମ୍ପରିକ ଆଦିବାସୀ ସଂପ୍ରଦାୟର ହୋଇ ମଧ୍ୟ ବିଗତ ୧୫ ବର୍ଷରୁ ଅଧିକ ଦିନ ହେବ ନିଜର ଧର୍ମ ପରିବର୍ତ୍ତନ କରିଥିଲେ। ଆଦିବାସୀ ପରମ୍ପରାର ବିଧି ବିଧାନ କ୍ଷୁର୍ଣ୍ଣ ହେବାରୁ ପାରମ୍ପରିକ ଗ୍ରାମସଭା ମୁଖ୍ୟ ମାସାଙ୍ଗ ହାଁସଦା, ମୋହନ ମାରାଣ୍ଡି, ମଣ୍ଡଳ ହାଁସଦା ଧିରାନ ସୋରେନ, ରାଜୁ ହେମରମ, ପାରିଆର ହାଁସଦା, ନାରାୟଣ ମୁର୍ମୁ ପ୍ରମୁଖ ଗ୍ରାମ ମଶାଣିରେ ଶବ ସକ୍ରାର କରାଯିବାକୁ ବାରଣ କରିଥିଲେ। 

ଏନେଇ ଥାନାର ଦ୍ବାରସ୍ଥ ହୋଇଥିଲେ ମୃତକଙ୍କ ପୁଅ । ତେବେ ଥାନାରୁ ଫେରି ନିଜ ବାଡିରେ କବର ଦେବା ପାଇଁ ପ୍ରଶାସନଠୁ ଅନୁମତି ପାଇଁ ଘରବାଡି ପ୍ରମାଣପତ୍ର ନକଲ ରାଜସ୍ବ ଅଧିକାରୀ ଓଲମରାକୁ ମଧ୍ୟ ପଠାଇ ଥିଲେ । ତଥାପି ଏବେ ଯାଏ ମଧ୍ୟ ଶବ ସତ୍କାର ହୋଇନଥିବା ଜଣାପଡିଛି । ସେପଟେ ଗ୍ରାମବାସୀଙ୍କ ଅଭିଯୋଗ, ଧର୍ମାାନ୍ତୀକରଣ ଯୋଗୁ ଆଦିବାସୀ ସମ୍ପ୍ରଦାୟର ସଂସ୍କାର, ଧର୍ମ, ପରମ୍ପରା ନଷ୍ଟ ହେବାରେ ଲାଗିଛି ।