୨୦୨୦ ମସିହାର ଉତ୍ତର-ପୂର୍ବ ଦିଲ୍ଲୀ ଦଙ୍ଗା ମାମଲାରେ ଅଭିଯୁକ୍ତ ତଥା ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (JNU)ର ପୂର୍ବତନ ଛାତ୍ର ଶରଜିଲ୍ ଇମାମ (Sharjeel Imam)ଙ୍କୁ ଦିଲ୍ଲୀର କରକରଡୁମା କୋର୍ଟ ପକ୍ଷରୁ ୧୦ ଦିନର ଅନ୍ତରୀଣ ଜାମିନ ପ୍ରଦାନ କରାଯାଇଛି। ନିଜ ଭାଇଙ୍କ ବିବାହରେ ସାମିଲ ହେବା ଏବଂ ଅସୁସ୍ଥ ମା'ଙ୍କୁ ଭେଟିବା ପାଇଁ କୋର୍ଟ ତାଙ୍କୁ ଏହି ଅନୁମତି ଦେଇଛନ୍ତି। ଶୁକ୍ରବାର ଦିନ (ମାର୍ଚ୍ଚ ୨୦) ତିହାର ଜେଲରୁ ସେ ବାହାରିଛନ୍ତି। ପ୍ରାୟ ୬ ବର୍ଷ ଧରି ଜେଲରେ ରହିବା ପରେ ଶରଜିଲଙ୍କୁ ଏହି ସାମୟିକ ଆଶ୍ୱସ୍ତି ମିଳିଛି।

କଡ଼ା ସର୍ତ୍ତ ସହ ମିଳିଲା ଅନୁମତି

ଅତିରିକ୍ତ ଦୌରା ଜଜ୍ ସମୀର ବାଜପେୟୀ ଏହି ଜାମିନ ଆବେଦନର ଶୁଣାଣି କରି ମାର୍ଚ୍ଚ ୨୦ରୁ ମାର୍ଚ୍ଚ ୩୦ ତାରିଖ ପର୍ଯ୍ୟନ୍ତ ଜାମିନ ପ୍ରଦାନ କରିଛନ୍ତି। କୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ଶରଜିଲ୍ ଇମାମଙ୍କୁ ୫୦,୦୦୦ ଟଙ୍କାର ବ୍ୟକ୍ତିଗତ ମୁଚାଲିକା ଏବଂ ସମାନ ପରିମାଣର ଦୁଇଟି ସ୍ୟୁରିଟି ପ୍ରଦାନ କରିବାକୁ ପଡ଼ିବ। ଏହି ୧୦ ଦିନର ଅବଧି ମଧ୍ୟରେ ସେ କୌଣସି ସୋସିଆଲ ମିଡିଆ ପ୍ଲାଟଫର୍ମ ବ୍ୟବହାର କରିପାରିବେ ନାହିଁ କିମ୍ବା ଗଣମାଧ୍ୟମକୁ କୌଣସି ପ୍ରତିକ୍ରିୟା ଦେଇପାରିବେ ନାହିଁ। ଏହାଛଡ଼ା ମାମଲାର କୌଣସି ସାକ୍ଷୀଙ୍କ ସହ ଯୋଗାଯୋଗ ନକରିବାକୁ କୋର୍ଟ କଡ଼ା ନିର୍ଦ୍ଦେଶ ଦେଇଛନ୍ତି। ମାର୍ଚ୍ଚ ୩୦ ତାରିଖ ସନ୍ଧ୍ୟାରେ ତାଙ୍କୁ ପୁଣିଥରେ ଜେଲ୍ କର୍ତ୍ତୃପକ୍ଷଙ୍କ ନିକଟରେ ଆତ୍ମସମର୍ପଣ କରିବାକୁ ହେବ।

କାହିଁକି ଗିରଫ ହୋଇଥିଲେ ଶରଜିଲ୍?

ସୂଚନାଯୋଗ୍ୟ ଯେ, ୨୦୧୯-୨୦୨୦ ମସିହାରେ ସିଏଏ (CAA) ଏବଂ ଏନଆରସି (NRC) ବିରୋଧୀ ଆନ୍ଦୋଳନ ସମୟରେ ଉତ୍ତେଜନାମୂଳକ ଭାଷଣ ଦେବା ଏବଂ ଦିଲ୍ଲୀ ଦଙ୍ଗା ପାଇଁ ଷଡ଼ଯନ୍ତ୍ର ରଚିବା ଅଭିଯୋଗରେ ଦିଲ୍ଲୀ ପୋଲିସ ଶରଜିଲଙ୍କ ବିରୋଧରେ ୟୁଏପିଏ (UAPA) ଆଇନ ଅଧୀନରେ ମାମଲା ରୁଜୁ କରିଥିଲା। ୨୦୨୦ ମସିହାରୁ ସେ ତିହାର ଜେଲରେ ବନ୍ଦୀ ଅଛନ୍ତି। ଚଳିତ ବର୍ଷ ଜାନୁଆରୀ ମାସରେ ସୁପ୍ରିମକୋର୍ଟ ଶରଜିଲ୍ ଇମାମ ଏବଂ ଅନ୍ୟତମ ଅଭିଯୁକ୍ତ ଉମର ଖାଲିଦଙ୍କ ନିୟମିତ ଜାମିନ ଆବେଦନକୁ ଖାରଜ କରିଦେଇଥିଲେ।

ମହାରାଷ୍ଟ୍ର ଆତଙ୍କବାଦ ନିରୋଧୀ ଦସ୍ତା (ATS) ଏକ ବଡ଼ ସଫଳତା ହାସଲ କରିଛି। ଆତଙ୍କବାଦୀ ସଙ୍ଗଠନ ଜୈଶ-ଇ-ମହମ୍ମଦ (JeM) ଏବଂ ISIS ସହିତ ସମ୍ପର୍କ ରଖିବା ଅଭିଯୋଗରେ ATS ମୁମ୍ବାଇରୁ ଜଣେ ୨୧ ବର୍ଷୀୟ ଇଞ୍ଜିନିୟରିଂ ଛାତ୍ରଙ୍କୁ ଗିରଫ କରିଛି। ଗିରଫ ଅଭିଯୁକ୍ତର ନାମ ଆୟାନ ଶେଖ ବୋଲି ଜଣାପଡିଛି। ଆୟାନ ଅନଲାଇନ୍ ମାଧ୍ୟମରେ ଆତଙ୍କବାଦୀ ଚିନ୍ତାଧାରା ପ୍ରଚାର କରୁଥିବା ନେଇ ଗୁରୁତର ଅଭିଯୋଗ ଆସିଛି।

ଅନଲାଇନ୍ ଆତଙ୍କବାଦୀ ପ୍ରଚାର ଅଭିଯୋଗ

ଅଧିକାରୀଙ୍କ ସୂଚନା ଅନୁଯାୟୀ, ଆୟାନଙ୍କ ବିରୋଧରେ ବେଆଇନ କାର୍ଯ୍ୟକଳାପ ନିବାରଣ ଆଇନ (UAPA)ର ଧାରା ୩୮ ଏବଂ ୩୯ ସହ ଭାରତୀୟ ନ୍ୟାୟ ସଂହିତା (BNS)ର ବିଭିନ୍ନ ଧାରା ଅଧୀନରେ ମାମଲା ରୁଜୁ କରାଯାଇଛି। ATS ଟିମ୍ ଗୁପ୍ତ ସୂଚନା ପାଇବା ପରେ କୁର୍ଲା, ଗୋୱାଣ୍ଡି ଏବଂ ଶିବାଜୀ ନଗର ଅଞ୍ଜଳରେ ଚଢ଼ାଉ କରିଥିଲା। ଏହି ସମୟରେ ପୋଲିସ୍ ଅନେକ ଇଲେକ୍ଟ୍ରୋନିକ୍ ଉପକରଣ ଜବତ କରିଛି।

ଟେଲିଗ୍ରାମରେ ଚାଲିଥିଲା ଷଡଯନ୍ତ୍ର

ତଦନ୍ତରୁ ଜଣାପଡିଛି ଯେ, ଆୟାନ ଟେଲିଗ୍ରାମ ଗ୍ରୁପ୍ ମାଧ୍ୟମରେ JeM ଏବଂ ISISର ପ୍ରୋପାଗାଣ୍ଡା ଭିଡିଓ ଏବଂ ବାର୍ତ୍ତା ସେୟାର କରୁଥିଲେ। ସେ ନିଜର ଦୁଇଜଣ ସହପାଠୀଙ୍କୁ ମଧ୍ୟ ଏହି ଗ୍ରୁପରେ ଯୋଡିଥିଲେ ଏବଂ ସେମାନଙ୍କୁ ଉଗ୍ରବାଦୀ ଚିନ୍ତାଧାରାରେ ପ୍ରଭାବିତ କରିବାକୁ ଚେଷ୍ଟା କରୁଥିଲେ। ତେବେ ତଦନ୍ତ ପରେ ଅନ୍ୟ ଦୁଇ ଛାତ୍ରଙ୍କର ଏଥିରେ କୌଣସି ସକ୍ରିୟ ଭୂମିକା ନଥିବା ଜଣାପଡିଛି ଏବଂ ସେମାନଙ୍କୁ ସାକ୍ଷୀ ଭାବରେ ଗ୍ରହଣ କରାଯାଇଛି।

ବିଦେଶୀ ହ୍ୟାଣ୍ଡଲରଙ୍କ ସହ ସମ୍ପର୍କ

ଆୟାନଙ୍କ ନିକଟରୁ ଜବତ ହୋଇଥିବା ଲାପଟପ୍ ଏବଂ ମୋବାଇଲରୁ ଆତଙ୍କବାଦୀ ମାସୁଦ୍ ଅଜହରର ଭାଷଣ ସମେତ ଅନେକ ଆପତ୍ତିଜନକ ସାମଗ୍ରୀ ମିଳିଛି। ସେ ଏନକ୍ରିପ୍ଟେଡ୍ ଆପ୍ ବ୍ୟବହାର କରି ବିଦେଶୀ ହ୍ୟାଣ୍ଡଲରଙ୍କ ସହ ଯୋଗାଯୋଗରେ ଥିଲେ ବୋଲି ATS ଦାବି କରିଛି। ବର୍ତ୍ତମାନ ଏହି ନେଟୱାର୍କର ଅନ୍ୟ ସଦସ୍ୟମାନଙ୍କୁ ଖୋଜିବା ପାଇଁ ତଦନ୍ତ ଜାରି ରହିଛି।

ନୂଆଦିଲ୍ଲୀ: ଦିଲ୍ଲୀ ଦଙ୍ଗା ମାମଲାରେ ସୁପ୍ରିମକୋର୍ଟ ସୋମବାର ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ସର୍ବୋଚ୍ଚ ନ୍ୟାୟାଳୟ ଜେଏନୟୁର ପୂର୍ବତନ ଛାତ୍ରନେତା ଉମର ଖାଲିଦ ଏବଂ ଶାର୍ଜିଲ ଇମାମଙ୍କ ଜାମିନ ଆବେଦନକୁ ଖାରଜ କରିଦେଇଛନ୍ତି। ତେବେ ଏହି ମାମଲାରେ ଅନ୍ୟ ୫ ଜଣ ଅଭିଯୁକ୍ତଙ୍କୁ କୋର୍ଟ ଜାମିନ ପ୍ରଦାନ କରିଛନ୍ତି। ଜାମିନ ନାମଞ୍ଜୁର ହେବା ପରେ ଉମର ଖାଲିଦ ନିଜର ପ୍ରତିକ୍ରିୟାରେ କହିଛନ୍ତି ଯେ, "ଜେଲ୍‌ ହିଁ ଏବେ ମୋର ଜୀବନ।"

ଉମର ଖାଲିଦଙ୍କ ସହଯୋଗୀ ବନଜ୍ୟୋତ୍ସ୍ନା ଲାହିରି ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ଉମରଙ୍କ ସହ ହୋଇଥିବା କଥାବାର୍ତ୍ତା ବିଷୟରେ ଉଲ୍ଲେଖ କରିଛନ୍ତି। ସେ କହିଛନ୍ତି ଯେ କୋର୍ଟଙ୍କ ରାୟ ଶୁଣିବା ପରେ ଉମର ବିଚଳିତ ନହୋଇ ବରଂ ଅନ୍ୟ ସାଥୀମାନେ ଜାମିନ ପାଇଥିବାରୁ ଖୁସି ବ୍ୟକ୍ତ କରିଥିଲେ। ଉମର କହିଥିଲେ, "ମୁଁ ଅନ୍ୟମାନଙ୍କ ପାଇଁ ବହୁତ ଖୁସି ଯେ ସେମାନେ ଜାମିନ ପାଇଲେ। ଏହା ବହୁତ ବଡ଼ ଆଶ୍ୱସ୍ତିର ବିଷୟ।"

ଯେତେବେଳେ ଲାହିରି ମଙ୍ଗଳବାର ଜେଲରେ ତାଙ୍କୁ ଭେଟିବାକୁ କହିଥିଲେ, ଉମର ଉତ୍ତର ଦେଇଥିଲେ, "ଭଲ କଥା, ଆସିଯାଅ। ଏବେ ତ ଏହି ଜେଲ୍‌ ହିଁ ମୋର ଜୀବନ ।"

ସୁପ୍ରିମକୋର୍ଟ ଗୁଲଫିଶା ଫାତିମା, ମୀରାନ ହାଇଦର, ଶିଫା ଉର ରହମାନ, ମହମ୍ମଦ ସଲିମ ଖାନ ଏବଂ ଶାଦବ ଅହମ୍ମଦଙ୍କୁ ଜାମିନ ପ୍ରଦାନ କରିଛନ୍ତି। କିନ୍ତୁ କୋର୍ଟ ପର୍ଯ୍ୟବେକ୍ଷଣ କରିଛନ୍ତି ଯେ ଉମର ଖାଲିଦ ଏବଂ ଶାର୍ଜିଲ ଇମାମଙ୍କ ବିରୋଧରେ ବେଆଇନ କାର୍ଯ୍ୟକଳାପ ନିବାରଣ ଆଇନ (UAPA) ଅଧୀନରେ ପ୍ରାଥମିକ ପ୍ରମାଣ ରହିଛି, ତେଣୁ ସେମାନଙ୍କୁ ଜାମିନ ଦିଆଯାଇପାରିବ ନାହିଁ। କୋର୍ଟ ଆହୁରି ମଧ୍ୟ କହିଛନ୍ତି ଯେ ବିଚାର ପ୍ରକ୍ରିୟାରେ ବିଳମ୍ବକୁ ଜାମିନ ପାଇଁ ଏକ ମୁଖ୍ୟ ଆଧାର ଭାବେ ଗ୍ରହଣ କରାଯାଇପାରିବ ନାହିଁ।

୨୦୨୦ ଫେବୃଆରୀ ମାସରେ ଉତ୍ତର-ପୂର୍ବ ଦିଲ୍ଲୀରେ ହୋଇଥିବା ଦଙ୍ଗାରେ ୫୩ ଜଣଙ୍କର ମୃତ୍ୟୁ ଘଟିଥିବା ବେଳେ ୭୦୦ରୁ ଊର୍ଦ୍ଧ୍ୱ ଆହତ ହୋଇଥିଲେ। ପୋଲିସର ଅଭିଯୋଗ ଅନୁଯାୟୀ, ଏହି ଦଙ୍ଗା ପଛରେ ଏକ ବଡ଼ ଷଡ଼ଯନ୍ତ୍ର ଥିଲା ଏବଂ ଉମର ଖାଲିଦ ଏହାର ଅନ୍ୟତମ ମୁଖ୍ୟ ଷଡ଼ଯନ୍ତ୍ରକାରୀ ଥିଲେ। ଗତ ପ୍ରାୟ ୫ ବର୍ଷ ଧରି ଉମର ଜେଲରେ ବିଚାରାଧୀନ କଏଦୀ ଭାବେ ରହିଛନ୍ତି। ଏହି ରାୟ ଉପରେ ପ୍ରତିକ୍ରିୟା ଦେଇ ଉମରଙ୍କ ବାପା ସୟଦ କାସିମ ରସୁଲ ଇଲିୟାସ ଅତ୍ୟନ୍ତ ନିରାଶା ପ୍ରକାଶ କରିଛନ୍ତି।

ନୂଆଦିଲ୍ଲୀ: ଦୀର୍ଘ ୫ ବର୍ଷରୁ ଉର୍ଦ୍ଧ୍ୱ ସମୟ ଧରି ଜେଲରେ ଥିବା ଛାତ୍ର ନେତା ଉମର ଖାଲିଦଙ୍କ ସମର୍ଥନରେ ଏବେ ଆମେରିକାରୁ ସ୍ୱର ଉଠିବା ଆରମ୍ଭ ହୋଇଛି। ନିକଟରେ ନ୍ୟୁୟର୍କ ସିଟିର ନୂତନ ମେୟର ଭାବେ ଶପଥ ଗ୍ରହଣ କରିଥିବା ଜୋହରାନ ମମଦାନୀ ଉମରଙ୍କ ଉଦ୍ଦେଶ୍ୟରେ ଏକ ସମବେଦନାପୂର୍ଣ୍ଣ ଚିଠି ପଠାଇବା ପରେ, ବର୍ତ୍ତମାନ ଆମେରିକାର ୮ ଜଣ ପ୍ରମୁଖ ସାଂସଦ ଭାରତ ସରକାରଙ୍କୁ ଚିଠି ଲେଖି ଉମରଙ୍କ ପାଇଁ ନିରପେକ୍ଷ ବିଚାର ଦାବି କରିଛନ୍ତି।

ନ୍ୟୁୟର୍କ ସିଟିର ମେୟର ଜୋହରାନ ମମଦାନୀ ଶପଥ ଗ୍ରହଣ କରିବାର ଠିକ୍ ପରେ ପରେ ଉମର ଖାଲିଦଙ୍କ ପାଇଁ ଏକ ହାତ ଲେଖା ଚିଠି ପଠାଇଥିଲେ। ଉମରଙ୍କ ସହଯୋଗୀ ବନଜ୍ୟୋତ୍ସ୍ନା ଲାହିରି ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ଏହି ଚିଠିକୁ ସେୟାର କରିଛନ୍ତି। ମମଦାନୀ ତାଙ୍କ ଚିଠିରେ ଉଲ୍ଲେଖ କରିଛନ୍ତି ଯେ, ସେ ପ୍ରାୟତଃ ଉମରଙ୍କ ଲେଖା ଏବଂ ଜେଲ ଜୀବନର ସଂଘର୍ଷ ବିଷୟରେ ଚିନ୍ତା କରନ୍ତି। ବିଶେଷକରି "ତିକ୍ତତାକୁ ନିଜ ଭିତରେ ଘର କରିବାକୁ ନ ଦେବା" ସମ୍ପର୍କରେ ଉମରଙ୍କ ଚିନ୍ତାଧାରାକୁ ସେ ପ୍ରଶଂସା କରିଛନ୍ତି। ସେ ଆହୁରି ମଧ୍ୟ ଲେଖିଛନ୍ତି, "ଆମେ ସମସ୍ତେ ତୁମ କଥା ଭାବୁଛୁ।"

ମମଦାନୀଙ୍କ ଏହି ବାର୍ତ୍ତା ପରେ ଉମର ଖାଲିଦଙ୍କ ମାମଲା ଉପରେ ଆନ୍ତର୍ଜାତୀୟ ଦୃଷ୍ଟି ଆକର୍ଷିତ ହୋଇଛି। ଆମେରିକାର ୮ ଜଣ ସାଂସଦ ଭାରତୀୟ ରାଷ୍ଟ୍ରଦୂତ ବିନୟ ମୋହନ କ୍ୱାତ୍ରାଙ୍କୁ ଏକ ଚିଠି ଲେଖି ଆନ୍ତର୍ଜାତୀୟ ଆଇନ ଅନୁଯାୟୀ ଉମରଙ୍କୁ ଏକ ନିରପେକ୍ଷ ଏବଂ ସମୟୋଚିତ ବିଚାର ପ୍ରଦାନ କରିବାକୁ ଅନୁରୋଧ କରିଛନ୍ତି। ଏହି ଚିଠିର ନେତୃତ୍ୱ ନେଇଥିଲେ ଆମେରିକା ହାଉସ୍ ରୁଲ୍ସ କମିଟିର ବରିଷ୍ଠ ସଦସ୍ୟ ଜିମ୍ ମ୍ୟାକଗଭର୍ନ।

ସାଂସଦ ଜିମ୍ ମ୍ୟାକଗଭର୍ନ ଏକ ସାର୍ବଜନୀନ ପୋଷ୍ଟରେ କହିଛନ୍ତି ଯେ, ସେ ଏବଂ ଅନ୍ୟ ସାଂସଦମାନେ ଚଳିତ ମାସ ଆରମ୍ଭରେ ଉମରଙ୍କ ପିତାମାତାଙ୍କୁ ଭେଟିଥିଲେ। ୫ ବର୍ଷରୁ ଅଧିକ ସମୟ ଧରି ବିନା ବିଚାରରେ ଉମରଙ୍କୁ ଜେଲରେ ରଖାଯାଇଥିବାରୁ ସେମାନେ ଉଦବେଗ ପ୍ରକାଶ କରିଛନ୍ତି। ୟୁଏପିଏ ଅଧୀନରେ ଦୀର୍ଘ ଦିନର ଅଟକ ରଖିବା ନ୍ୟାୟିକ ପ୍ରକ୍ରିୟା ଏବଂ ନିର୍ଦ୍ଦୋଷତାର ଅନୁମାନ ଉପରେ ପ୍ରଶ୍ନବାଚୀ ସୃଷ୍ଟି କରୁଛି ବୋଲି ସେମାନେ ମତ ଦେଇଛନ୍ତି। ଏହି ଚିଠିରେ ସ୍ୱାକ୍ଷର କରିଥିବା ଅନ୍ୟ ସାଂସଦମାନଙ୍କ ମଧ୍ୟରେ ଜେମି ରାସ୍କିନ୍, କ୍ରିସ୍ ଭାନ୍ ହୋଲେନ୍, ପିଟର ୱେଲ୍ଚ, ପ୍ରମିଳା ଜୟପାଲ ଏବଂ ରସିଦା ତଲିବ ପ୍ରମୁଖ ସାମିଲ ଅଛନ୍ତି।

ଜେଏନୟୁ (JNU)ର ପୂର୍ବତନ ଛାତ୍ର ଉମର ଖାଲିଦଙ୍କୁ ସେପ୍ଟେମ୍ବର ୨୦୨୦ରେ ଦିଲ୍ଲୀ ଦଙ୍ଗା ମାମଲାରେ ଷଡ଼ଯନ୍ତ୍ର ଅଭିଯୋଗରେ ଗିରଫ କରାଯାଇଥିଲା। ତାଙ୍କ ବିରୋଧରେ ବେଆଇନ କାର୍ଯ୍ୟକଳାପ ନିବାରଣ ଆଇନ ଲଗାଯାଇଛି। ତେବେ ଉମର ଏହି ସମସ୍ତ ଅଭିଯୋଗକୁ ଖଣ୍ଡନ କରିଆସୁଛନ୍ତି। ବର୍ତ୍ତମାନ ତାଙ୍କର ଜାମିନ ଆବେଦନ ସୁପ୍ରିମକୋର୍ଟରେ ବିଚାରାଧୀନ ରହିଛି।