ପଶ୍ଚିମବଙ୍ଗ ବିଧାନସଭା ନିର୍ବାଚନ ୨୦୨୬ ର ପ୍ରଥମ ପର୍ଯ୍ୟାୟ ମତଦାନ ଏକ ନୂଆ ଇତିହାସ ସୃଷ୍ଟି କରିଛି। ଗୁରୁବାର ଦିନ ୧୫୨ଟି ଆସନ ପାଇଁ ହୋଇଥିବା ମତଦାନରେ ପ୍ରାୟ ୯୨.୮୮% ରୁ ଅଧିକ ଭୋଟର ନିଜର ମତାଧିକାର ସାବ୍ୟସ୍ତ କରିଛନ୍ତି। ଏହି ବିପୁଳ ମତଦାନ ଉଭୟ ଶାସକ ଦଳ ତୃଣମୂଳ କଂଗ୍ରେସ (TMC) ଏବଂ ବିରୋଧୀ ଭାରତୀୟ ଜନତା ପାର୍ଟି (BJP) ର ହୃଦସ୍ପନ୍ଦନ ବଢ଼ାଇ ଦେଇଛି। ଏତେ ବଡ଼ ସଂଖ୍ୟାରେ ଲୋକେ ଘରୁ ବାହାରି ଭୋଟ୍ ଦେବା ରାଜ୍ୟ ରାଜନୀତିରେ କୌଣସି ବଡ଼ ପରିବର୍ତ୍ତନର ସଙ୍କେତ ନା ସରକାରଙ୍କ ସପକ୍ଷରେ ଜନମତ, ତାହାକୁ ନେଇ ଚର୍ଚ୍ଚା ଜୋର ଧରିଛି।

ରେକର୍ଡ ମତଦାନ କାହା ସପକ୍ଷରେ ଯିବ?

ରାଜନୈତିକ ବିଶେଷଜ୍ଞଙ୍କ ମତରେ, ଭୋଟ୍ ହାରରେ ଏଭଳି ଅଚାନକ ବୃଦ୍ଧି ଅନେକ ସମୟରେ ସତ୍ତା ପରିବର୍ତ୍ତନର ଇଙ୍ଗିତ ଦେଇଥାଏ। ଉଲ୍ଲେଖଯୋଗ୍ୟ ଯେ, ୨୦୧୧ ମସିହାରେ ପଶ୍ଚିମବଙ୍ଗରେ ମାତ୍ର ୩ ପ୍ରତିଶତ ଅଧିକ ମତଦାନ ହେବା ଫଳରେ ୩୪ ବର୍ଷର ବାମଫଣ୍ଟ ସରକାରର ପତନ ଘଟିଥିଲା। ଚଳିତ ଥର ଗତ ନିର୍ବାଚନ ତୁଳନାରେ ପ୍ରାୟ ୧୦ ପ୍ରତିଶତ ଅଧିକ ଭୋଟ୍ ପଡ଼ିଛି। ମୁଖ୍ୟ ନିର୍ବାଚନ କମିଶନରଙ୍କ ସୂଚନା ଅନୁଯାୟୀ, ସ୍ୱାଧୀନତା ପରେ ପଶ୍ଚିମବଙ୍ଗରେ ଏହା ସର୍ବାଧିକ ମତଦାନ। ତେଣୁ ଏହି ଭୋଟ୍ ସୁନାମି କାହା ସପକ୍ଷରେ ଯିବ, ତାହା ଆକଳନ କରିବା କଷ୍ଟକର ହୋଇପଡ଼ିଛି।

ବିଜେପି ଏବଂ ଟିଏମସିର ନିଜସ୍ୱ ଦାବି

ଏହି ରେକର୍ଡ ମତଦାନକୁ ନେଇ ଉଭୟ ଦଳ ନିଜ ନିଜର ବିଜୟ ଦାବି କରିଛନ୍ତି। ମୁଖ୍ୟମନ୍ତ୍ରୀ ମମତା ବାନାର୍ଜୀ ଦାବି କରିଛନ୍ତି ଯେ, ଏହି ଉଚ୍ଚ ମତଦାନ ହାର ପ୍ରମାଣ କରୁଛି ଯେ ଲୋକମାନେ ଟିଏମସି ସରକାରଙ୍କ ଜନକଲ୍ୟାଣକାରୀ ଯୋଜନାକୁ ସମର୍ଥନ କରୁଛନ୍ତି ଏବଂ ଦଳ ଏକ ବଡ଼ ବିଜୟ ଦିଗରେ ଅଗ୍ରସର ହେଉଛି। ଅନ୍ୟପଟେ ବିଜେପି ନେତା ତଥା ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ଏହାକୁ ସରକାର ବିରୋଧୀ ଜନମତ ବୋଲି ଅଭିହିତ କରିଛନ୍ତି। ତାଙ୍କ ମତରେ କେବଳ ପ୍ରଥମ ପର୍ଯ୍ୟାୟର ୧୫୨ଟି ଆସନରୁ ବିଜେପି ପ୍ରାୟ ୧୨୫ଟି ଆସନ ଜିତିବାକୁ ଯାଉଛି।

କଡ଼ା ସୁରକ୍ଷା ମଧ୍ୟରେ ଶାନ୍ତିପୂର୍ଣ୍ଣ ମତଦାନ

ପ୍ରଥମ ପର୍ଯ୍ୟାୟ ନିର୍ବାଚନକୁ ଶାନ୍ତିପୂର୍ଣ୍ଣ କରିବା ପାଇଁ ନିର୍ବାଚନ କମିଶନଙ୍କ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଥିଲା। ପ୍ରାୟ ୨.୫ ଲକ୍ଷ କେନ୍ଦ୍ରୀୟ ଅର୍ଦ୍ଧସାମରିକ ବଳ ମୁତୟନ କରାଯାଇଥିଲା। କିଛି ଛୋଟମୋଟ ଘଟଣାକୁ ବାଦ୍ ଦେଲେ ମତଦାନ ଶାନ୍ତିପୂର୍ଣ୍ଣ ରହିଥିଲା। ଆସନ୍ତା ଏପ୍ରିଲ ୨୯ ତାରିଖରେ ରାଜ୍ୟରେ ଦ୍ୱିତୀୟ ତଥା ଅନ୍ତିମ ପର୍ଯ୍ୟାୟ ମତଦାନ ଅନୁଷ୍ଠିତ ହେବ ଏବଂ ମେ ୪ ତାରିଖରେ ନିର୍ବାଚନ ଫଳାଫଳ ଘୋଷଣା କରାଯିବ।

ଆସନ୍ତା ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ ଭୋଟର ତାଲିକାକୁ ନେଇ ଆରମ୍ଭ ହୋଇଛି ବଡ଼ ବିବାଦ। ନିର୍ବାଚନ କମିଶନ (EC) ଦ୍ୱାରା ଜାରି କରାଯାଇଥିବା ସଦ୍ୟତମ ତଥ୍ୟ ଅନୁଯାୟୀ ରାଜ୍ୟରେ ଏକ ସ୍ୱତନ୍ତ୍ର ସଂଶୋଧନ ପ୍ରକ୍ରିୟା (SIR) ମାଧ୍ୟମରେ ଲକ୍ଷ ଲକ୍ଷ ଭୋଟରଙ୍କ ନାମ ତାଲିକାରୁ ବାଦ୍ ଦିଆଯାଇଛି। ତେବେ ଏହି ଘଟଣାକୁ ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀ ତୀବ୍ର ପ୍ରତିକ୍ରିୟା ପ୍ରକାଶ କରିବା ସହ ନିର୍ବାଚନ କମିଶନଙ୍କ ଉପରେ ସଙ୍ଗୀନ ଅଭିଯୋଗ ଆଣିଛନ୍ତି।

ଭୋଟର ତାଲିକାରୁ ବାଦ ପଡିଲେ ଲକ୍ଷ ଲକ୍ଷ ଭୋଟର

ନିର୍ବାଚନ କମିଶନଙ୍କ ସୂଚନା ଅନୁଯାୟୀ, ସ୍ପେଶାଲ ଇଣ୍ଟେନସିଭ ରିଭିଜନ (SIR) ଅଧୀନରେ ପଶ୍ଚିମବଙ୍ଗରେ ପାଖାପାଖି ୯୧ ଲକ୍ଷ (୯.୦୮ ନିୟୁତ) ଭୋଟରଙ୍କ ନାମ କଟାଯାଇଛି। ଏହାବ୍ୟତୀତ ବିଚାରାଧୀନ ଥିବା ୬୦ ଲକ୍ଷ (୬.୦୦୬ ନିୟୁତ) ମାମଲା ମଧ୍ୟରୁ ଅଧିକାଂଶର ସମାଧାନ କରାଯାଇ ସାରିଛି ବୋଲି କମିଶନ କହିଛନ୍ତି। ଏହି ପ୍ରକ୍ରିୟାରେ ନ୍ୟାୟିକ ଅଧିକାରୀମାନେ ଭୋଟରଙ୍କ ଯୋଗ୍ୟତା ଉପରେ ଯାଞ୍ଚ କରିଥିଲେ।

ମମତା ବାନାର୍ଜୀଙ୍କ ସଙ୍ଗୀନ ଅଭିଯୋଗ

ଏହି ବ୍ୟାପକ ଛଟେଇକୁ ନେଇ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ନିର୍ବାଚନ କମିଶନଙ୍କୁ କଡ଼ା ସମାଲୋଚନା କରିଛନ୍ତି। ପୁରୁଲିଆରେ ଆୟୋଜିତ ଏକ ନିର୍ବାଚନୀ ସଭାରେ ସେ ଅଭିଯୋଗ କରିଛନ୍ତି ଯେ, କମିଶନ ଜାଣିଶୁଣି ରାଜ୍ୟର ୧.୨ କୋଟି ଭୋଟରଙ୍କ ନାମ ତାଲିକାରୁ କାଟି ଦେଇଛନ୍ତି। ଏହାକୁ ସେ 'ଗଣତନ୍ତ୍ରର ହତ୍ୟା' ବୋଲି ଆଖ୍ୟା ଦେଇଛନ୍ତି। ତାଙ୍କ ଅନୁଯାୟୀ, ଗୋଟିଏ ପରିବାରର କିଛି ସଦସ୍ୟଙ୍କ ନାମ ରହିଥିବା ବେଳେ ଅନ୍ୟମାନଙ୍କ ନାମକୁ ମନଇଚ୍ଛା କାଟି ଦିଆଯାଇଛି।

କାହିଁକି କଟାଗଲା ନାମ?

ନିର୍ବାଚନ କମିଶନଙ୍କ ଅଧିକାରୀମାନେ ସ୍ପଷ୍ଟ କରିଛନ୍ତି ଯେ ଏହି ଛଟେଇ ପ୍ରକ୍ରିୟା ସମ୍ପୂର୍ଣ୍ଣ ସ୍ୱଚ୍ଛତାର ସହ କରାଯାଇଛି। ଭୋଟରଙ୍କ ମୃତ୍ୟୁ, ସ୍ଥାନାନ୍ତର, ନକଲି ନାମ ଏବଂ ଠିକଣା ନ ମିଳିବା କାରଣରୁ ନିୟମ ଅନୁଯାୟୀ ଏହି ନାମଗୁଡ଼ିକୁ ବାଦ୍ ଦିଆଯାଇଛି। ତେବେ ଇ-ଦସ୍ତଖତ ନଥିବା କାରଣରୁ ଏବେ ବି ପ୍ରାୟ ୧୫ ଲକ୍ଷ ଭୋଟରଙ୍କ ଭାଗ୍ୟ ଅନିଶ୍ଚିତତାରେ ରହିଛି।

ଆଗକୁ ଅଛି ବିଧାନସଭା ନିର୍ବାଚନ

ସୂଚନାଯୋଗ୍ୟ ଯେ, ପଶ୍ଚିମବଙ୍ଗର ୨୯୪ ଆସନ ବିଶିଷ୍ଟ ବିଧାନସଭା ନିର୍ବାଚନ ପାଇଁ ଆସନ୍ତା ଏପ୍ରିଲ ୨୩ ଏବଂ ଏପ୍ରିଲ ୨୯ ତାରିଖରେ ମତଦାନ ଅନୁଷ୍ଠିତ ହେବ। ନିର୍ବାଚନର ଫଳାଫଳ ମେ ୪ ତାରିଖରେ ଘୋଷଣା କରାଯିବ। ନିର୍ବାଚନ ତାରିଖ ପାଖେଇ ଆସୁଥିବା ବେଳେ ଭୋଟର ତାଲିକାରୁ ଏତେ ବଡ଼ ସଂଖ୍ୟାରେ ନାମ କାଟିବା ଘଟଣା ରାଜନୈତିକ ବାତାବରଣକୁ ଅଧିକ ସରଗରମ କରିଛି।

ପଶ୍ଚିମବଙ୍ଗ: ନିର୍ବାଚନ ପୂର୍ବରୁ କୋଲକାତାରେ ଅମିତ ଶାହଙ୍କ ରଣହୁଁକାର । ୨୦୨୬ରେ ପଶ୍ଚିମବଙ୍ଗରେ ବିଜେପି ସରକାର ଗଠନ କରିବ । ଆଉ ସରକାର ହେଲା ପରେ ପଶ୍ଚିମବଙ୍ଗରୁ ଖୋଜି ଖୋଜି ଅନୁପ୍ରବେଶକାରୀଙ୍କୁ ବାହାର କରାଯିବ । ପଶ୍ଚିମବଙ୍ଗରେ କିଛି ଏମିତି କହି ଟିଏମସି ସରକାର ଉପରେ ହମଲା କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ପଶ୍ଚିମବଙ୍ଗ ଗସ୍ତରେ ଆସି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ନେତୃତ୍ୱାଧୀନ ତୃଣମୂଳ କଂଗ୍ରେସ ସରକାର ଉପରେ ବର୍ଷିଛନ୍ତି ଅମିତ ଶାହ । ୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ଶାହ ରାଜ୍ୟରେ ବ୍ୟାପିଥିବା ଭୟ, ଦୁର୍ନୀତି ଏବଂ ଅପଶାସନକୁ ନେଇ ଶାସକ ଦଳକୁ କଡ଼ା ସମାଲୋଚନା କରିଛନ୍ତି।

କୋଲକାତାରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ଶାହ ଏକ ବଡ଼ ଘୋଷଣା କରିଛନ୍ତି। ସେ କହିଛନ୍ତି ଯେ, ଯଦି ୨୦୨୬ ନିର୍ବାଚନରେ ବିଜେପି କ୍ଷମତାକୁ ଆସେ, ତେବେ ରାଜ୍ୟରେ ଅନୁପ୍ରବେଶ ରୋକିବା ପାଇଁ ଏକ ‘ନ୍ୟାସନାଲ ଗ୍ରୀଡ୍’ ନିର୍ମାଣ କରାଯିବ। ସେ ଅଭିଯୋଗ କରିଛନ୍ତି ଯେ ଗତ ୧୫ ବର୍ଷ ଧରି ଟିଏମସି ଶାସନରେ ରାଜ୍ୟରେ ଅନୁପ୍ରବେଶ ବୃଦ୍ଧି ପାଇଛି, ଯାହା ନାଗରିକଙ୍କ ମଧ୍ୟରେ ଚିନ୍ତା ସୃଷ୍ଟି କରିଛି। ବିଜେପି ସରକାର ଗଠନ ହେବା ମାତ୍ରେ ବଙ୍ଗଳାର ଐତିହ୍ୟକୁ ପୁନରୁଦ୍ଧାର କରାଯିବ ଏବଂ ବିକାଶର ଧାରା ତ୍ୱରାନ୍ୱିତ ହେବ।

ଶାହ ଆହୁରି ମଧ୍ୟ କହିଛନ୍ତି ଯେ, ମମତା ସରକାରଙ୍କ ଦୁର୍ନୀତି କାରଣରୁ ପଶ୍ଚିମବଙ୍ଗର ବିକାଶ ଠପ୍ ହୋଇଯାଇଛି। ପ୍ରଧାନମନ୍ତ୍ରୀ ମୋଦୀଙ୍କ ଦ୍ୱାରା ଆରମ୍ଭ ହୋଇଥିବା ଜନକଲ୍ୟାଣକାରୀ ଯୋଜନାଗୁଡ଼ିକ ଏଠାରେ ‘ଟୋଲ୍ ସିଣ୍ଡିକେଟ୍’ର ଶିକାର ହୋଇଛି। ଗତ ୧୪ ବର୍ଷ ଧରି ଭୟ ଏବଂ ଦୁର୍ନୀତି ପଶ୍ଚିମବଙ୍ଗର ପରିଚୟ ପାଲଟିଛି। ଏହି ‘ବଙ୍ଗ ଭୂମି’ ବିଜେପି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ କାରଣ ଦଳର ପ୍ରତିଷ୍ଠାତା ଡଃ ଶ୍ୟାମା ପ୍ରସାଦ ମୁଖାର୍ଜୀ ଏହି ମାଟିର ବଡ଼ ନେତା ଥିଲେ।

୨୦୨୬ ନିର୍ବାଚନ ପ୍ରସ୍ତୁତି ନେଇ ଶାହ ରାଜ୍ୟ ବିଜେପିର କୋର କମିଟି ସହ ବୈଠକ କରିଥିଲେ। ଜନସମ୍ପର୍କ ଅଭିଯାନ ସମୟରେ ସକାରାତ୍ମକ ଭାଷା ବ୍ୟବହାର କରିବାକୁ ସେ ନେତାମାନଙ୍କୁ ନିର୍ଦ୍ଦେଶ ଦେଇଛନ୍ତି। ୧୫ ବର୍ଷର ଟିଏମସି ଶାସନର ଅନ୍ତ ଘଟାଇ ଲୋକଙ୍କ ଆଶା ପୂରଣ କରିବାକୁ ବିଜେପି ପ୍ରସ୍ତୁତ ବୋଲି ବାର୍ତ୍ତା ଦେବାକୁ ଶାହ ଦଳୀୟ କର୍ମୀଙ୍କୁ ଆହ୍ୱାନ ଦେଇଛନ୍ତି।