ଭୁବନେଶ୍ୱର: ପର୍ଯ୍ୟଟକଙ୍କ ପାଇଁ ଖୁସି ଖବର । ଖୋଲିଲା ଶିଖରଚଣ୍ଡୀ ପୀଠ । ହାତୀ ଫେରିବା ପରେ ବଣଭୋଜି କରିବାକୁ ପର୍ଯ୍ୟଟକଙ୍କ ପାଇଁ ଖୋଲିଲା ଶିଖରଚଣ୍ଡୀ । ଗତ କିଛି ଦିନ ଧରି ଶିଖରଚଣ୍ଡୀ ପାହାଡ଼ ଉପରେ ଆତଙ୍କ ଖେଳାଇଥିଲେ ୨ଟି ଦନ୍ତା ହାତୀ । ପାହାଡ଼ରୁ ଜଙ୍ଗଲ ଭିତରକୁ ଦନ୍ତା ଯିବା ପରେ ମା'ଙ୍କ ଦର୍ଶନ ସହ ଭୋଜି ପାଇଁ ପର୍ଯ୍ୟଟକଙ୍କୁ ମିଳିଲା ଅନୁମତି । ପଥରଗାଡ଼ିଆ, ଶ୍ରୀବିହାର, ଗଣେଶ ବିହାର ଦେଇ ଭରତପୁର ଜଙ୍ଗଲକୁ ଫେରିଛନ୍ତି ହାତୀ । ବନ ବିଭାଗ ପକ୍ଷରୁ ସ୍ପେଶାଲ ନାଇଟ ଟ୍ରାକିଂ ଟିମ ହାତୀକୁ ଘଉଡାବାରେ ଲାଗିଥିଲେ । ହାତୀ ଘଉଡାଇବାରେ ପାଖାପାଖି ୨୭ ଜଣ ବନ କର୍ମଚାରୀ ଟିମରେ ନିୟୋଜିତ ଥିଲେ । 

ହାତୀ ଜଙ୍ଗଲକୁ ଯିବା ପରେ ସ୍ଥାନୀୟ ଗ୍ରାମବାସୀ ଓ ପର୍ଯ୍ୟଟକ ଆଶ୍ୱସ୍ତି ଅନୁଭବ କରିଛନ୍ତି । ଶିଖରଚଣ୍ଡୀ ପାହାଡକୁ ଯିବାକୁ ବାରଣ ଥିବାବେଳେ ମୁଖ୍ୟ ଫାଟକ ବନ୍ଦ କରାଯାଇଥିଲା। ଆଜି ଖୋଲିଛି ଶିଖରଚଣ୍ଡୀ ମୁଖ୍ୟ ଫାଟକ । ପର୍ଯ୍ୟଟକ ହୁଅନ୍ତୁ କିମ୍ବା ଭକ୍ତ ସମସ୍ତେ ପାହାଡ଼ ଉପରକୁ ଯାଇ ବଣଭୋଜି କରିବା ସହ ମାଆଙ୍କ ଦର୍ଶନ କରିପାରିବେ ବୋଲି ସୂଚନା ମିଳିଛି l

ଭୁବନେଶ୍ୱର: ହାତୀ ପାଇଁ ଶିଖରଚଣ୍ଡୀ ବନ୍ଦ । ଶିଖରଚଣ୍ଡୀ ମନ୍ଦିର ପାହାଡ଼ ଉପରକୁ ପ୍ରବେଶ ମନା। ପ୍ରବେଶ ଉପରେ ଅଙ୍କୁଶ ଲଗାଇଲା ବନ ବିଭାଗ। ଗତ ୩ ଦିନ ହେବ ଦୁଇଟି ବଡ଼ ଦନ୍ତା ହାତୀ ଶିଖରଚଣ୍ଡୀ ପାହାଡ ଉପରେ ଡେରା ପକାଇଛନ୍ତି। ପାହାଡ଼ ଉପରେ ରହି ଗଛ ଡାଳ ପତ୍ର ଖାଇ ଘୁରି ବୁଲୁଛନ୍ତି। ସେପଟେ ହାତୀ ଦୁଇଟି ଉପରେ ନଜର ରଖିବା ପାଇଁ ଚନ୍ଦକା ଏସିଏଫ ସଂଗ୍ରାମ ମହାନ୍ତିଙ୍କ ନେତୃତ୍ୱରେ ଦୁଇଟି ଟିମ୍ ଗଠନ କରାଯାଇ ହାତୀଙ୍କ ଗତିବିଧି ଉପରେ ସତର୍କ ନଜର ଦିଆଯାଉଛି। 

ଅନ୍ୟପଟେ ଡ଼ାକବାଜି ଯନ୍ତ୍ର ସାହାଯ୍ୟରେ ଲୋକଙ୍କୁ ସଚେତନ କରାଯାଉଛି। ବର୍ତମାନ ପର୍ଯ୍ୟଟନ ଋତୁ ଚାଲିଥିବାରୁ ପାହାଡ଼ ଉପରେ ବଣଭୋଜି ଚାଲୁଛି। ତେବେ ପାହାଡ଼ ଉପରେ ହାତୀଙ୍କ ଉପସ୍ଥିତି ଯୋଗୁଁ ଆଜି ଠାରୁ ଅନିର୍ଦ୍ଧିଷ୍ଟ କାଳ ଯାଏ ପାହାଡ ଉପରକୁ ପର୍ଯ୍ୟଟକଙ୍କୁ ବାରଣ କରାଯାଇଛି। ମୁଖ୍ୟ ଫାଟକ ବନ୍ଦ କରାଯାଇଥିବା ବେଳେ ସମ୍ମୁଖରେ ବନ କର୍ମଚାରୀ ଓ ଇନଫୋସିଟି ଥାନା ପୁଲିସ ପକ୍ଷରୁ ଲୋକଙ୍କୁ ସଚେତନ କରଯାଉଛି। ପାହାଡ଼ ଉପରକୁ କାହାରିକୁ ଯିବାକୁ ବାରଣ କରାଯାଉଛି ।