ବିମାନ ଚଳାଚଳ କ୍ଷେତ୍ରରେ କାର୍ବନ ନିର୍ଗମନକୁ ହ୍ରାସ କରିବା ଉଦ୍ଦେଶ୍ୟରେ ଭାରତ ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ନିକଟରେ ଅନୁଷ୍ଠିତ ହୋଇଥିବା ଇଣ୍ଡିଆ ସଷ୍ଟେନେବଲ୍ ଆଭିଏସନ୍ ଫୁଏଲ୍ (SAF) ସମ୍ମିଳନୀ ୨୦୨୫ ରେ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁ କିଞ୍ଜାରାପୁ ଯୋଗ ଦେଇ ସ୍ପଷ୍ଟ କରିଛନ୍ତି ଯେ ବିମାନ ଇନ୍ଧନ ବା ଆଭିଏସନ୍ ଟର୍ବାଇନ୍ ଫୁଏଲ୍ (ATF) ରେ ଇଥାନଲ୍ ମିଶ୍ରଣ ଏକ ବିକଳ୍ପ ନୁହେଁ, ବରଂ ଏହା ବର୍ତ୍ତମାନର ଏକ ଜରୁରୀ ଆବଶ୍ୟକତା। ସବୁଜ ବିମାନ ଚଳାଚଳ (Green Aviation) କ୍ଷେତ୍ରରେ ଭାରତକୁ ବିଶ୍ୱସ୍ତରୀୟ ନେତୃତ୍ୱ ନେବାକୁ ସରକାର ପ୍ରସ୍ତୁତ ବୋଲି ସେ ପ୍ରକାଶ କରିଛନ୍ତି।

୨୦୩୦ ସୁଦ୍ଧା ୫% ମିଶ୍ରଣ ଲକ୍ଷ୍ୟ

କେନ୍ଦ୍ରମନ୍ତ୍ରୀ ରାମ ମୋହନ ନାଇଡୁ ସୂଚନା ଦେଇଛନ୍ତି ଯେ ସରକାର ଏକ ଶକ୍ତିଶାଳୀ ରାଷ୍ଟ୍ରୀୟ SAF ନୀତି ପ୍ରସ୍ତୁତ କରୁଛନ୍ତି। କର୍ସିଆ (CORSIA) ନିୟମାବଳୀ ଅନୁଯାୟୀ, ୨୦୩୦ ସୁଦ୍ଧା ବିମାନ ଇନ୍ଧନରେ ୫% ଇଥାନଲ୍ କିମ୍ବା ଜୈବ ଇନ୍ଧନ ମିଶ୍ରଣ କରିବାକୁ ଲକ୍ଷ୍ୟ ରଖାଯାଇଛି। କୃଷିକ୍ଷେତ୍ରରେ ସମୃଦ୍ଧ ଭାରତ ପାଖରେ ୭୫୦ ନିୟୁତ ଟନ୍ ବାୟୋମାସ୍ ରହିଛି, ଯାହା ଦେଶକୁ SAF ଉତ୍ପାଦନ କ୍ଷେତ୍ରରେ ଏକ ଗ୍ଲୋବାଲ୍ ହବ୍ ରେ ପରିଣତ କରିବାର କ୍ଷମତା ରଖୁଛି। କେବଳ ବେସାମରିକ ବିମାନ ନୁହେଁ, ବରଂ ଭାରତୀୟ ବାୟୁସେନା (IAF) ମଧ୍ୟ ନିଜର ଆଣ୍ଟୋନୋଭ-୩୨ (Antonov-32) ପରି ପରିବହନ ବିମାନରେ ଇଥାନଲ୍ ମିଶ୍ରିତ ଇନ୍ଧନ ବ୍ୟବହାର ଆରମ୍ଭ କରିବାକୁ ଯାଉଛି।

ସୁରକ୍ଷା ଚିନ୍ତା ଏବଂ E20 ବିବାଦ

ସରକାରଙ୍କ ଏହି ସବୁଜ ପଦକ୍ଷେପକୁ ବହୁ ସ୍ତରରେ ପ୍ରଶଂସା କରାଯାଉଥିବା ବେଳେ, ଅନ୍ୟପଟେ କିଛି ବିଶେଷଜ୍ଞ ବିମାନ ଚଳାଚଳ ସୁରକ୍ଷାକୁ ନେଇ ଚିନ୍ତା ବ୍ୟକ୍ତ କରିଛନ୍ତି। ଆଭିଏସନ୍ ଟର୍ବାଇନ୍ ଫୁଏଲ୍‌ରେ ଇଥାନଲ୍ ମିଶ୍ରଣ ବିମାନର ଇଞ୍ଜିନ୍ ଏବଂ ଯାତ୍ରୀଙ୍କ ସୁରକ୍ଷା ପ୍ରତି ବିପଦ ସୃଷ୍ଟି କରିପାରେ ବୋଲି ବିଶେଷଜ୍ଞମାନେ ଆଶଙ୍କା ପ୍ରକାଶ କରିଛନ୍ତି। ଏହା ସହିତ, ସାଧାରଣ ଯାନବାହନ କ୍ଷେତ୍ରରେ E20 (୨୦ ପ୍ରତିଶତ ଇଥାନଲ୍ ମିଶ୍ରଣ) ଇନ୍ଧନ ବ୍ୟବହାର ନେଇ ମଧ୍ୟ ଅନେକ ପୁରୁଣା ପେଟ୍ରୋଲ୍ ଇଞ୍ଜିନ୍ ପ୍ରସ୍ତୁତ ନଥିବା ଜଣାପଡିଛି। ଏହି ପ୍ରସଙ୍ଗରେ ଆପ୍ ନେତା ଅରବିନ୍ଦ କେଜ୍ରିୱାଲ ଙ୍କ ନାମକୁ ଯୋଡ଼ି ସୋସିଆଲ୍ ମିଡିଆ ଏବଂ ରାଜନୈତିକ ମହଲରେ ଚର୍ଚ୍ଚା ମଧ୍ୟ ଜୋର ଧରିଛି। ତେବେ ବିମାନ ଯାତ୍ରା ସୁରକ୍ଷା ସହ କୌଣସି ଆପୋଷ ବୁଝାମଣା ନକରି ସରକାର ଏହି ମିଶ୍ରଣ ପ୍ରକ୍ରିୟାକୁ କିପରି ସୁରକ୍ଷିତ ଢଙ୍ଗରେ ଆଗକୁ ନେବେ, ତାହା ଉପରେ ସମସ୍ତଙ୍କ ନଜର ରହିଛି।

ନୂଆଦିଲ୍ଲୀ: ଦେଶରେ ଉଡ଼ିବ ଆଉ ୩ ନୂଆ ଏୟାରଲାଇନ୍ସ । ଦେଶର ବୃହତ୍ତମ ବିମାନ ସେବା ପ୍ରଦାନକାରୀ ସଂସ୍ଥା ଇଣ୍ଡିଗୋରେ ଦେଖାଦେଇଥିବା ଗୁରୁତର ସଙ୍କଟ ପରେ କେନ୍ଦ୍ର ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ଭାରତୀୟ ଆକାଶରେ ଉଡ଼ାଣ ଭରିବା ପାଇଁ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ତିନୋଟି ନୂତନ ଏୟାରଲାଇନ୍ସକୁ ଅନୁମତି ପ୍ରଦାନ କରିଛି। କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ଶଙ୍ଖ ଏୟାର, ଅଲ୍ ହିନ୍ଦ୍ ଏୟାର ଓ ଏବଂ ଫ୍ଲାଏ ଏକ୍ସପ୍ରେସକୁ ଅନୁମତି ମିଳିଛି । ଏହି ପଦକ୍ଷେପ ଦ୍ୱାରା ଯାତ୍ରୀମାନଙ୍କ ପାଇଁ ବିକଳ୍ପ ବଢିବା ସହ ବଜାରରେ ଏକାଧିପତ୍ୟ ହ୍ରାସ ପାଇବ ବୋଲି ଆଶା କରାଯାଉଛି। ନୂତନ ଏୟାରଲାଇନ୍ସଗୁଡ଼ିକ ବଜାରକୁ ଆସିବା ପରେ ପ୍ରତିଯୋଗିତା ବୃଦ୍ଧି ପାଇବ ଏବଂ ଯାତ୍ରୀମାନେ ଉନ୍ନତ ସେବା ପାଇପାରିବେ ବୋଲି ଆଶା କରାଯାଉଛି।

କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ସୋସିଆଲ ମିଡିଆରେ ସୂଚନା ଦେଇଛନ୍ତି ଯେ, ଅଲ୍ ହିନ୍ଦ ଏୟାର (Al Hind Air) ଏବଂ ଫ୍ଲାଏ ଏକ୍ସପ୍ରେସ (FlyExpress) କୁ ଉଡ଼ାଣ ଆରମ୍ଭ କରିବା ପାଇଁ ଏନଓସି ପ୍ରମାଣପତ୍ର (NOC) ପ୍ରଦାନ କରାଯାଇଛି। ଏହା ବ୍ୟତୀତ ଉତ୍ତରପ୍ରଦେଶ ଭିତ୍ତିକ ଶଙ୍ଖ ଏୟାର (Shankh Air) ପୂର୍ବରୁ ଏନଓସି ପାଇସାରିଛି ଏବଂ ୨୦୨୬ ମସିହାରେ ଏହାର ସେବା ଆରମ୍ଭ କରିବାକୁ ଯାଉଛି। ମନ୍ତ୍ରୀ କହିଛନ୍ତି ଯେ, ଉଡାନ୍ (UDAN) ଯୋଜନା ମାଧ୍ୟମରେ ଷ୍ଟାର ଏୟାର ଏବଂ ଫ୍ଲାଏ-୯୧ ଭଳି ଛୋଟ କମ୍ପାନୀଗୁଡ଼ିକ ଆଞ୍ଚଳିକ ଯୋଗାଯୋଗରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି।