ଅହମ୍ମଦାବାଦ: ନ୍ୟାୟ ପାଇବା ପାଇଁ ଜଣେ ବ୍ୟକ୍ତିଙ୍କୁ ଦୀର୍ଘ ୩୦ ବର୍ଷ ଅପେକ୍ଷା କରିବାକୁ ପଡ଼ିଲା। ମାତ୍ର ୨୦ ଟଙ୍କାର ଲାଞ୍ଚ ଅଭିଯୋଗକୁ ଭୁଲ ପ୍ରମାଣିତ କରି ନିଜକୁ ନିର୍ଦ୍ଦୋଷ ସାବ୍ୟସ୍ତ କରିବାକୁ ଜୀବନର ଅଧା ସମୟ କୋର୍ଟ କଚେରୀରେ ବିତିଗଲା। କିନ୍ତୁ ବିଧିର ବିଧାନ ଥିଲା ବଡ଼ ବିଚିତ୍ର। ହାଇକୋର୍ଟରୁ ନିର୍ଦ୍ଦୋଷରେ ଖଲାସ ହେବାର ଠିକ୍ ପରଦିନ ହିଁ ବ୍ୟକ୍ତି ଜଣଙ୍କର ମୃତ୍ୟୁ ଘଟିଛି। ଗୁଜରାଟରୁ ଆସିଥିବା ଏହି ଖବର ଏବେ ସମସ୍ତଙ୍କୁ ସ୍ତବ୍ଧ କରିଦେଇଛି।

କ’ଣ ଥିଲା ପୂରା ଘଟଣା?

ସୂଚନା ଅନୁଯାୟୀ, ଗୁଜରାଟର ଜଗଦୀଶ ପ୍ରଜାପତି ନାମକ ଜଣେ ବ୍ୟକ୍ତିଙ୍କ ବିରୋଧରେ ୨୦ ଟଙ୍କା ଲାଞ୍ଚ ନେବା ନେଇ ଅଭିଯୋଗ ହୋଇଥିଲା। ଏହି ମାମଲାରେ ୧୯୯୭ ମସିହାରେ ଏକ ସେସନ୍ସ କୋର୍ଟରେ ଚାର୍ଜସିଟ୍ ଦାଖଲ କରାଯାଇଥିଲା। ୨୦୦୨ରେ ଚାର୍ଜ ଫ୍ରେମ୍ ହୋଇଥିଲା ଏବଂ ୨୦୦୩ରେ ସାକ୍ଷୀ ଶୁଣାଣି ଆରମ୍ଭ ହୋଇଥିଲା। ଶେଷରେ ୨୦୦୪ ମସିହାରେ ସେସନ୍ସ କୋର୍ଟ ପ୍ରଜାପତିଙ୍କୁ ଦୋଷୀ ସାବ୍ୟସ୍ତ କରି ୪ ବର୍ଷ ଜେଲ ଦଣ୍ଡ ଓ ୩,୦୦୦ ଟଙ୍କା ଜରିମାନା ଆଦେଶ ଦେଇଥିଲେ।

ହାଇକୋର୍ଟରେ ୨୨ ବର୍ଷ ଗଡ଼ିଲା ମାମଲା

ନିମ୍ନ ଅଦାଲତଙ୍କ ରାୟକୁ ଚ୍ୟାଲେଞ୍ଜ କରି ପ୍ରଜାପତି ଗୁଜରାଟ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ସେଠାରେ ତାଙ୍କ ଆବେଦନ ଦୀର୍ଘ ୨୨ ବର୍ଷ ଧରି ବିଚାରାଧୀନ ରହିଥିଲା। ଶେଷରେ ଚଳିତ ବର୍ଷ ଫେବୃଆରୀ ୪ ତାରିଖରେ ହାଇକୋର୍ଟ ତାଙ୍କୁ ନିର୍ଦ୍ଦୋଷ ବୋଲି ଘୋଷଣା କରିଥିଲେ। ସାକ୍ଷୀମାନଙ୍କ ବୟାନରେ ଗୁରୁତର ବିରୋଧାଭାସ ଥିବାରୁ ଏବଂ ଅଭିଯୋଜକ ପକ୍ଷ ଅଭିଯୋଗ ପ୍ରମାଣ କରିବାରେ ବିଫଳ ହୋଇଥିବାରୁ କୋର୍ଟ ଏହି ରାୟ ଦେଇଥିଲେ।

ରାୟ ଆସିବାର ପରଦିନ ହୃଦଘାତରେ ମୃତ୍ୟୁ

ପ୍ରଜାପତିଙ୍କ ଓକିଲ ନିତିନ ଗାନ୍ଧୀ କହିଛନ୍ତି ଯେ, ରାୟ ଆସିବା ପରେ ପ୍ରଜାପତି ବହୁତ ଖୁସି ଥିଲେ। ସେ ଓକିଲଙ୍କ ଅଫିସକୁ ଆସି କୃତଜ୍ଞତା ଜଣାଇ ଘରକୁ ଫେରିଥିଲେ। ଓକିଲ ତାଙ୍କୁ ସରକାରଙ୍କ ପକ୍ଷରୁ ମିଳିବାକୁ ଥିବା ସମସ୍ତ ବକେୟା ସୁବିଧା ପାଇଁ ଆବେଦନ କରିବାକୁ ପରାମର୍ଶ ଦେଇଥିଲେ। କିନ୍ତୁ ଦୁର୍ଭାଗ୍ୟବଶତଃ, ତା’ ପରଦିନ ଯେତେବେଳେ ଓକିଲ ତାଙ୍କୁ ଫୋନ କଲେ, ସେ ଜାଣିବାକୁ ପାଇଲେ ଯେ ହୃଦଘାତରେ ପ୍ରଜାପତିଙ୍କର ମୃତ୍ୟୁ ଘଟିଛି। ଦୀର୍ଘ ବର୍ଷର ଲଢେଇ ପରେ ମିଳିଥିବା ନ୍ୟାୟକୁ ଉପଭୋଗ କରିବା ପାଇଁ ସେ ଆଉ ଦୁନିଆରେ ନାହାନ୍ତି।

ଛତିଶଗଡ଼ର ଭିଲାଇରୁ ଏକ ଅତ୍ୟନ୍ତ ହୃଦୟବିଦାରକ ଘଟଣା ସାମ୍ନାକୁ ଆସିଛି। ଜଣେ ଯୁବକ ନିଜର ମୂର୍ତ ବାପାଙ୍କୁ ମନେ ପକାଇ ଇନଷ୍ଟାଗ୍ରାମରେ ଏକ ଭାବପ୍ରବଣ ଷ୍ଟାଟସ ଦେବାର ମାତ୍ର ୨୧ ଘଣ୍ଟା ମଧ୍ୟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ପ୍ରାଣ ହରାଇଛନ୍ତି। ଯୁବକ ଜଣକ ଷ୍ଟାଟସରେ ଲେଖିଥିଲେ, "ମିସ୍ ୟୁ ପାପା... ଆସି ମୋତେ ବି ତୁମ ସାଥୀରେ ନେଇଯାଅ।" ଏହି ଘଟଣା ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।

ଦୁର୍ଗ ଜିଲ୍ଲା ଅନ୍ତର୍ଗତ ଜାମୁଲ ଥାନା ଅଧୀନସ୍ଥ ନନ୍ଦିନୀ ରୋଡରେ ଏହି ଦୁର୍ଘଟଣା ଘଟିଛି। ମୃତ ଯୁବକଙ୍କ ନାମ ପ୍ରବୀଣ କୁମାର ଧୃତଲହରେ (୨୬) ବୋଲି ଜଣାପଡିଛି, ଯିଏକି ସୁପେଲାର ବାସିନ୍ଦା ଥିଲେ। ସୂଚନା ଅନୁଯାୟୀ, ପ୍ରବୀଣ ନିଜର ତିନିଜଣ ସାଙ୍ଗଙ୍କୁ କାରରେ ଘର ଛାଡିବାକୁ ଯାଉଥିବା ସମୟରେ ବିଳମ୍ବିତ ରାତିରେ କାରଟି ଭାରସାମ୍ୟ ହରାଇ ରାସ୍ତା କଡ଼ରେ ଥିବା ଏକ ଖୁଣ୍ଟରେ ପିଟି ହୋଇ ଓଲଟି ପଡିଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ କାରର ଏୟାରବ୍ୟାଗ ଖୋଲିଯାଇଥିଲେ ମଧ୍ୟ ପ୍ରବୀଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା।

ଏହି ଦୁର୍ଘଟଣାରେ କାରରେ ବସିଥିବା ଅନ୍ୟ ତିନିଜଣ ସାଙ୍ଗ ଦୁର୍ଗେଶ ମାଡଲେ, ଆକାଶ କେଶରୱାନୀ ଏବଂ ରାହୁଲ ସାହୁ ଗୁରୁତର ଆହତ ହୋଇଛନ୍ତି। ସ୍ଥାନୀୟ ଲୋକେ ଶବ୍ଦ ଶୁଣି ତୁରନ୍ତ ପୋଲିସ ଓ ଆମ୍ବୁଲାନ୍ସକୁ ଖବର ଦେଇଥିଲେ। ପୋଲିସ ପହଞ୍ଚି ଆହତମାନଙ୍କୁ ଦୁର୍ଗ ସରକାରୀ ଡାକ୍ତରଖାନାରେ ଭର୍ତ୍ତି କରିଥିଲା। ଡାକ୍ତରମାନେ ପ୍ରବୀଣଙ୍କୁ ମୃତ ଘୋଷଣା କରିବା ପରେ ବ୍ୟବଚ୍ଛେଦ ପାଇଁ ଶବକୁ ସୁପେଲା ସରକାରୀ ଡାକ୍ତରଖାନାକୁ ପଠାଯାଇଥିଲା।

ପରିବାର ଲୋକଙ୍କ କହିବା ଅନୁଯାୟୀ, ପ୍ରାୟ ତିନି ମାସ ପୂର୍ବରୁ ପ୍ରବୀଣଙ୍କ ବାପାଙ୍କର ରୋଗାକ୍ରାନ୍ତ ହୋଇ ଦେହାନ୍ତ ହୋଇଥିଲା। ବାପାଙ୍କ ମୃତ୍ୟୁ ପରେ ପ୍ରବୀଣ ମାନସିକ ସ୍ତରରେ ଭାଙ୍ଗି ପଡିଥିଲେ ଏବଂ ଅଧିକାଂଶ ସମୟ ଭାବପ୍ରବଣ ରହୁଥିଲେ। ଦୁର୍ଘଟଣାର କିଛି ଘଣ୍ଟା ପୂର୍ବରୁ ସେ ଇନଷ୍ଟାଗ୍ରାମରେ ବାପାଙ୍କ ଉଦ୍ଦେଶ୍ୟରେ ଲେଖିଥିଲେ, "ଆଜି ତୁମ କଥା ବହୁତ ମନେ ପଡୁଛି... ଆସି ମୋତେ ବି ନିଜ ସାଥୀରେ ନେଇଯାଅ।" କେହି ଭାବି ନଥିଲେ ଯେ ଏହି ଷ୍ଟାଟସ ତାଙ୍କ ଜୀବନର ଶେଷ ବାର୍ତ୍ତା ହେବ।

ଏହି ଦୁର୍ଘଟଣାର ସିସିଟିଭି ଫୁଟେଜ୍ ମଧ୍ୟ ସାମ୍ନାକୁ ଆସିଛି, ଯାହାକୁ ପୋଲିସ ଜବତ କରିଛି। ଏଏସପି (ସିଟି) ସୁଖନନ୍ଦନ ରାଠୋର କହିଛନ୍ତି ଯେ ଦ୍ରୁତ ଗତି ଯୋଗୁଁ ଏହି ଦୁର୍ଘଟଣା ଘଟିଥିବା ପ୍ରାଥମିକ ତଦନ୍ତରୁ ଜଣାପଡିଛି। ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି। ପୁଅର ମୃତ୍ୟୁ ଖବର ପାଇବା ପରେ ପରିବାରରେ କାନ୍ଦବୋବାଳି ପଡିଯାଇଛି।

ଅନୁଗୁଳ: ଗୋଟିଏ ପରିବାରର ତିନି ଜଣ ସଦସ୍ୟଙ୍କର ଅକାଳ ବିୟୋଗ ଘଟିଛି। ଢେଙ୍କାନାଳ ଜିଲ୍ଲା କଣ୍ଟାବଣିଆ ଥାନା ଅନ୍ତର୍ଗତ ଅସନବଣି ଗାଁରେ ଏହି ଅଘଟଣ ଘଟିଥିବା ବେଳେ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ତିନି ଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ମା’ ଏବଂ ତାଙ୍କର ଦୁଇ ପୁଅ ରହିଛନ୍ତି। ସମସ୍ତେ ଗୁରୁତର ଅବସ୍ଥାରେ ଚିକିତ୍ସାଧୀନ ଥିଲେ।

ସୂଚନା ଅନୁଯାୟୀ, ଗତକାଲି ରାତିରେ ପରିବାର ଲୋକେ ଖାଇପିଇ ଶୋଇଥିଲେ। ରାତ୍ରି ଭୋଜନରେ ସେମାନେ ଚିକେନ୍, ଭାତ ଏବଂ ପାଳଙ୍ଗ ଶାଗ ଖାଇଥିଲେ। ତେବେ ଖାଇ ସାରିବା ପରେ ସେମାନେ ହଠାତ୍ ଅସୁସ୍ଥ ଅନୁଭବ କରିଥିଲେ। ଅବସ୍ଥା ଅଧିକ ଗୁରୁତର ହେବାରୁ ଆଜି ସକାଳେ ସେମାନଙ୍କୁ ତୁରନ୍ତ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ହେଲେ ସେଠାରେ ଡାକ୍ତରଙ୍କ ଶତ ଚେଷ୍ଟା ସତ୍ତ୍ୱେ ମା’ ଓ ଦୁଇ ପୁଅଙ୍କର ମୃତ୍ୟୁ ଘଟିଛି। ଏହା ଖାଦ୍ୟ ବିଷାକ୍ତ (ଫୁଡ୍ ପଏଜନିଂ) ଯୋଗୁଁ ହୋଇଛି ନା ଅନ୍ୟ କିଛି କାରଣ ରହିଛି, ସେ ନେଇ ସନ୍ଦେହ ସୃଷ୍ଟି ହୋଇଛି।