ନୀଳଗିରି: ବନ୍ୟା ପାଣିରେ ବୁଡ଼ିଲା ଅସ୍ଥାୟୀ ପୋଲ । ବାଲେଶ୍ବର ଜିଲ୍ଲା ନୀଳଗିରି ଉପଖଣ୍ଡ ବେଗୁନିଆରେ ବନ୍ୟା ପାଣିରେ ବୁଡିଯାଇଛି ପୋଲ । ଫଳରେ ୧୦ଟିରୁ ଅଧିକ ଗାଁକୁ ଯୋଗାଯୋଗ ବିଛିନ୍ନ ହୋଇଛି । ନୀଳଗିରି ବ୍ଲକ୍ ବେଗୁନିଆ ପଞ୍ଚାୟତ ଦେଇ ବହି ଯାଇଥିବା ସୋନ ନଈ ଶାଖା ନଇ ଉପରେ ୪୦ ବର୍ଷ ତଳର ଏକ ପୁରୁଣା ପୋଲ ରହିଥିଲା । ତାହା ନଷ୍ଟ ହେବା ପରେ ଅସ୍ଥାୟୀ ଭାବରେ ରାସ୍ତା କରି ଗୋଟିଏ ଗାଁରୁ ଅନ୍ୟ ଗାଁକୁ ଯୋଗାଯୋଗ କରାଯାଉଥିଲା । କିନ୍ତୁ ବାତ୍ୟା ଦାନା ଯିବା ପରେ ସନ ନଈରେ ଜଳସ୍ଥର ବଢ଼ିଛି ଯାହା ଦ୍ୱାରା କି ଅସ୍ଥାୟୀ ପୋଲଟି ବୁଡି ଯାଇଛି। ଫଳରେ ବେଗୁନିଆ, ମିତ୍ରପୁର, କଲ୍ୟାଣୀ, ସିଙ୍ଗିରୀ, ତୋଟାପଡ଼ା, ଲଇଛଣପୁର, ଶଂଶାପାଳ, ନିଶଙ୍ଖପୁର, ଟିକିରାପାଳ, ପଥରଗଡ଼, ଦୁବାଟି ଆଦି ୧୦ରୁ ଅଧିକ ଗ୍ରାମ ମଧ୍ୟରେ ଯୋଗାଯୋଗ ସମ୍ପୂର୍ଣ୍ଣ ଠପ୍ ହୋଇଯାଇଛି । ତୁରନ୍ତ କିଛି ପଦକ୍ଷେପ ନେବା ପାଇଁ ପ୍ରସାଶନକୁ ଗୁହାରୀ କରିଛନ୍ତି ଅଞ୍ଚଳବାସୀ।

ସୋର: ସୋର ଥାନା ସରସଙ୍ଖ ପଞ୍ଚାୟତ ଅନ୍ତର୍ଗତ ହାତିଗଡ଼ିଆ ଗ୍ରାମର ଜଣେ ଝିଅ ତାଙ୍କ ବାପାମାଆଙ୍କୁ ପନିକିରେ ଆକ୍ରମଣ କରିଛି।  ଫଳରେ ଉଭୟ ବାପାମାଆ ଗୁରୁତର ଭାବେ ଆହତ ହୋଇଛନ୍ତି। ଝିଅର ଆକ୍ରମଣରେ ଗୁରୁତର ହୋଇ ବାପାମାଆ ଡାକ୍ତରଖାନାରେ ଭର୍ତ୍ତି ହୋଇଛନ୍ତି ।

ସୂଚନା ଅନୁଯାୟୀ, ରଞ୍ଜିତ ସିଂଙ୍କ ଝିଅ କୁନି ସିଂ ବିବାହ ପରେ କୌଣସି କାରଣରୁ ୨ ବର୍ଷ ହେଲା ବାପଘରେ ରହୁଛନ୍ତି । ମୋବାଇଲରେ ଲଗାତାର କଥା ହେଉଥିବାରୁ ଝିଅ ଉପରେ ବିରକ୍ତି ପ୍ରକାଶ କରିଥିଲେ ମାଆ ।  ଏଥିରେ ଉତକ୍ଷିପ୍ତ ହୋଇ ପ୍ରଥମେ ମାଆଙ୍କୁ ପନିକିରେ ଆକ୍ରମଣ କରିଥିଲେ ଝିଅ କୁନି ।  ସ୍ତ୍ରୀଙ୍କୁ ବଞ୍ଚାଇବାକୁ ଯାଇ ରଞ୍ଜିତ ମଧ୍ୟ ଝିଅ ଆକ୍ରୋଶର ଶିକାର ହୋଇଥିଲେ । ଝିଅର ଆକ୍ରମଣରେ ରଞ୍ଜିତଙ୍କ ପେଟ ଓ ହାତରେ ଗଭୀର ଆଘାତ ଲାଗିଛି । ସ୍ଥାନୀୟ ଲୋକ ଉଭୟଙ୍କୁ ଉଦ୍ଧାର କରି ସୋର ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରୁ ତାଙ୍କୁ ବାଲେଶ୍ବର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ଝିଅକୁ ଅଟକ ରଖି ପୁଲିସ ତଦନ୍ତ କରୁଛି ।

ବାଲେଶ୍ଵର : ବାଲେଶ୍ଵର ମ୍ୟୁନିସିପାଲିଟି ଦ୍ଵାରା ଗଠିତ ୱେଲଥ ସେଣ୍ଟର ପକ୍ଷରୁ ସହରରୁ ବାହାରୁଥିବା ଆବର୍ଜନା ରୁ ପ୍ରସ୍ତୁତ ହେଉଥିବା “ମୋ ଖତ” କୁ ମାତ୍ର ୨୦ ଟଙ୍କା ମୂଲ୍ୟରେ ବିକ୍ରୟ ଆରମ୍ଭ ହୋଇଛି। ବାଲେଶ୍ବର ସଦର ବିଧାୟକ ସ୍ଵରୂପ କୁମାର ଦାସ ଓ ଜିଲ୍ଲାପାଳ ଶ୍ରୀ କେ.ସୁଦର୍ଶନ ଚକ୍ରବର୍ତୀ ୧୦ କେଜି ଲେଖାଏଁ ଜୈବିକ ଖତ କିଣି ଏହି ବିକ୍ରୟ କାର୍ଯ୍ୟର ଶୁଭାରମ୍ଭ କରିଥିଲେ। ପୌରପାଳିକା ପକ୍ଷରୁ ପୌର କାର୍ଯ୍ୟନିର୍ବାହୀ ଅଧିକାରୀ ତଥା ଉପଜିଲ୍ଲାପାଳ ଶ୍ରୀ ଆଶିଷ ଇଶ୍ବର ପାଟିଲଙ୍କ ତତ୍ବାବଧାନରେ ବର୍ଜ୍ୟବସ୍ତୁ ପରିଚାଳନା ପାଇଁ ସହରରେ ୪ଟି ୱେଲଥ ସେଣ୍ଟର ବା କେନ୍ଦ୍ର ପ୍ରତିଷ୍ଠା କରାଯାଇଛି । ବର୍ତମାନ ଚାନ୍ଦମାରି ପଡିଆ ଓ ପୁରୁଣା ବାଲେଶ୍ଵରଠାରେ ଦୁଇଟି ୱେଲଥ ସେଣ୍ଟର କାର୍ଯ୍ୟକ୍ଷମ ହୋଇଥିବା ବେଳେ ଚୂନଭାଟି ଓ ସୁନହଟ ୱେଲଥ ସେଣ୍ଟର ଚୁଡାନ୍ତ ପର୍ଯ୍ୟାୟରେ ଅଛି ।

ଚାନ୍ଦମାରି ପଡିଆରେ ସାଇବାବା ସ୍ଵୟଂ ସହାୟକ ଗୋଷ୍ଠୀର ୧୦ ଜଣ ମହିଳା ଏବଂ ପୁରୁଣା ବାଲେଶ୍ଵର ସେଣ୍ଟରରେ ମା’ ଶୀତଳା ସ୍ଵୟଂ ସହାୟକ ଗୋଷ୍ଠୀର ୧୪ଜଣ ମହିଳା କାମ କରୁଛନ୍ତି । ସହରର ପ୍ରତି ଘରକୁ ଘର ବୁଲି ଓଦା ଓ ଶୁଖିଲା ବର୍ଜ୍ୟବସ୍ତୁ ସଂଗ୍ରହ କରିବା ପାଇଁ ୪ଟି ଏସଏଚଜି ଗ୍ରୁପର ୮ଜଣ ମହିଳାଙ୍କୁ ନିୟୋଜିତ କରାଯାଇଛି । ଏହି ମହିଳା ମାନେ ମ୍ୟୁନିସିପାଲିଟି ପକ୍ଷରୁ ଦିଆଯାଇଥିବା ୪ଟି ବ୍ୟାଟେରୀ ଗାଡିକୁ ଚଲାଇ ବର୍ଜ୍ୟବସ୍ତୁ ସଂଗ୍ରହ କରି ସେଣ୍ଟର ରେ ପହଂଚାଉଛନ୍ତି । ଆଉ ଏହି ଦୁଇ କେନ୍ଦ୍ର ର ଓଦା ବର୍ଜ୍ୟବସ୍ତୁରେ ଖତ ପ୍ରସ୍ତୁତ କରାଯାଉଛି । ୪୫ ଦିନ ପରେ ଓଦା ବର୍ଜ୍ୟବସ୍ତୁରୁ ବାହାରୁଥିବା ଖତକୁ ସହରର ବିଭିନ୍ନ ସ୍ଥାନରେ ବିକ୍ରି କରିବା ପାଇଁଁ ମଧ୍ୟ ବ୍ୟବସ୍ଥା କରାଯାଇଅଛି‌।

ସେହିପରି ଶୁଖିଲା ନନ ରିସାଇକଲ ବର୍ଜ୍ୟବସ୍ତୁ ଗୁଡିକୁ ସିମେଟ କମ୍ପାନୀକୁ ରପ୍ତାନୀ କରିବା ପାଇଁ ବ୍ୟବସ୍ଥା ହୋଇଥିବା ବେଳେ ଅବଶିଷ୍ଟ ଶୁଖିଲା ବର୍ଜ୍ୟବସ୍ତୁ ଗୁଡିକୁ ବିଭିନ୍ନ ପଦ୍ଧତିରେ ରିସାଇକିଲ କରାଯିବା ପାଇଁ ପଦକ୍ଷେପ ନିଆଯାଇଛି।ଶୁକ୍ରବାର ଦିନ ପ୍ରଥମ କରି ଚାନ୍ଦମାରି ପଡିଆଠାରେ ଥିବା କେନ୍ଦ୍ରରୁ ଖତ ବିକ୍ରୟ ପାଇଁ ପ୍ରସ୍ତୁତି ଆରମ୍ଭ ହୋଇଛି ।ଏହାର ମୂଲ୍ୟ କିଲୋ ପିଛା ୨୦ ଟଙ୍କା ରହିଛି। ଅନୁରୂପ ଭାବେ ଖୁବଶୀଘ୍ର ପୁରୁଣା ବାଲେଶ୍ଵର କେନ୍ଦ୍ରରୁ ମଧ୍ୟ ଖତ ବାହାରିବ।ବର୍ତମାନ ସହରର ୧୨ ଟି ୱାର୍ଡରୁ ବର୍ଜ୍ୟବସ୍ତୁ ସଂଗୃହିତ ହୋଇ ଏହି ଦୁଇ ସେଣ୍ଟର କୁ ଯାଉଛି।ଚାନ୍ଦମାରି ପଡିଆ କେନ୍ଦ୍ରରୁ ମାସକୁ ୧୨ ଟନ ଖତ ବାହାରିବାକୁ ଥିବାବେଳେ ଅଳ୍ପ ଦିନ ମଧ୍ୟରେ ସହର ମଧ୍ୟରେ ସବୁ ସେଣ୍ଟର କାର୍ଯ୍ୟକ୍ଷମ କରାଯିବା ସହ ଖତ ଉତ୍ପାଦନ ଚାରିଗୁଣା ବୃଦ୍ଧି ହେବ ବୋଲି ଦାୟିତ୍ଵରେ ଥିବା ପରିମଳ ବିଶେଷଜ୍ଞ ବିସ୍ମିତ ବେହୁରା,ଉତ୍ସବ ଭଦ୍ର ଏବଂ ଶୁଭକାନ୍ତ ନାୟକ ପ୍ରମୁଖ ସୂଚନା ଦେଇଛନ୍ତି ।