ହରିୟାଣାର ରୋହତକ ସ୍ଥିତ ସୁନାରିଆ ଜେଲରେ ବନ୍ଦୀ ଥିବା ଡେରା ସଚ୍ଚା ସୌଦା ମୁଖ୍ୟ ଗୁରମିତ ରାମ ରହିମ ସିଂହଙ୍କୁ ପୁଣିଥରେ ୩୦ ଦିନର ପାରୋଲ ମିଳିଛି। ସକ୍ଷମ ରାଜ୍ୟ କର୍ତ୍ତୃପକ୍ଷଙ୍କ ଅନୁମୋଦନ କ୍ରମେ ମଙ୍ଗଳବାର ସକାଳେ ସେ ଜେଲରୁ ବାହାରିଛନ୍ତି। ନିଜର ୨୦ ବର୍ଷର ଜେଲ୍ ଦଣ୍ଡାଦେଶ ଭୋଗୁଥିବା ବେଳେ ଏହା ହେଉଛି ତାଙ୍କର ୧୬ତମ ଅସ୍ଥାୟୀ ମୁକ୍ତି। ତାଙ୍କ ଓକିଲ ଜିତେନ୍ଦ୍ର ଖୁରାନାଙ୍କ ସୂଚନା ଅନୁଯାୟୀ, ପାରୋଲ ଅବଧିରେ ସେ ସିରସା ସ୍ଥିତ ନିଜ ଡେରା ସଚ୍ଚା ସୌଦାରେ ରହିବେ।

ଜେଲ୍ ବାହାରେ ବିତାଇସାରିଲେଣି ୪୦୬ ଦିନ

୨୦୧୭ ଅଗଷ୍ଟରେ ଦୋଷୀ ସାବ୍ୟସ୍ତ ହେବା ପରଠାରୁ ଗୁରମିତ ରାମ ରହିମଙ୍କୁ ବାରମ୍ବାର ପାରୋଲ ଏବଂ ଫର୍ଲୋ ମିଳୁଛି। ଜେଲ୍ ରେକର୍ଡ ଅନୁଯାୟୀ ତାଙ୍କ କଏଦୀ ନମ୍ବର ହେଉଛି ୮୬୪୭/C। ବର୍ତ୍ତମାନର ଏହି ମୁକ୍ତି ପୂର୍ବରୁ ସେ ପ୍ରାୟ ୯ ବର୍ଷର ଜେଲ୍ ଜୀବନ ମଧ୍ୟରୁ ୪୦୬ ଦିନ ଜେଲ୍ ବାହାରେ ବିତାଇସାରିଛନ୍ତି। ଏହି ୩୦ ଦିନର ପାରୋଲ ଶେଷ ହେବା ବେଳକୁ ସେ ମୋଟ ଉପରେ ୪୩୬ ଦିନ ଜେଲରୁ ବାହାରେ ରହିବେ ବୋଲି ହିସାବ କରାଯାଇଛି। ଚଳିତ ବର୍ଷ ଜାନୁଆରୀ ମାସରେ ମଧ୍ୟ ତାଙ୍କୁ ପାରୋଲ ମିଳିଥିଲା।

କେଉଁ ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି ରାମ ରହିମ?

୨୦୧୭ ମସିହାରେ ଏକ ସ୍ୱତନ୍ତ୍ର ସିବିଆଇ ଅଦାଲତ ଗୁରମିତ ରାମ ରହିମଙ୍କୁ ଦୁଇ ଜଣ ମହିଳା ଅନୁଗାମୀଙ୍କ ସହ ଦୁଷ୍କର୍ମ ମାମଲାରେ ଦୋଷୀ ସାବ୍ୟସ୍ତ କରି ୨୦ ବର୍ଷର ଜେଲ୍ ଦଣ୍ଡାଦେଶ ଶୁଣାଇଥିଲେ। ଏହା ବ୍ୟତୀତ ସାମ୍ବାଦିକ ରାମ ଚନ୍ଦ୍ର ଛତ୍ରପତିଙ୍କ ହତ୍ୟା (୨୦୧୯) ଏବଂ ଡେରା ମ୍ୟାନେଜର ରଣଜିତ ସିଂହଙ୍କ ହତ୍ୟା ଷଡ଼ଯନ୍ତ୍ର (୨୦୨୧) ମାମଲାରେ ତାଙ୍କୁ ଆଜୀବନ କାରାଦଣ୍ଡ ଦିଆଯାଇଥିଲା। ତେବେ ପରବର୍ତ୍ତୀ ସମୟରେ ପଞ୍ଜାବ ଏବଂ ହରିୟାଣା ହାଇକୋର୍ଟ ଉଭୟ ରଣଜିତ ସିଂହ ଏବଂ ରାମ ଚନ୍ଦ୍ର ଛତ୍ରପତି ହତ୍ୟା ମାମଲାରେ ତାଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି।

ପାରୋଲର ଆଇନଗତ ନିୟମ

ଏହି ନୂତନ ୩୦ ଦିନିଆ ପାରୋଲ ସହିତ ଡେରା ମୁଖ୍ୟ ୨୦୨୬ ବର୍ଷ ପାଇଁ ହରିୟାଣା ଗୁଡ୍ କଣ୍ଡକ୍ଟ ପ୍ରିଜନର୍ସ ଆକ୍ଟ, ୨୦୨୨ ଅଧୀନରେ ଥିବା ସର୍ବାଧିକ ୧୦ ସପ୍ତାହର ପାରୋଲ ସୀମା ପୂରଣ କରିସାରିଛନ୍ତି। ଏହି ଆଇନ ଅନୁଯାୟୀ, ଜଣେ କଏଦୀ ଗୋଟିଏ କ୍ୟାଲେଣ୍ଡର ବର୍ଷରେ ମୋଟ ୧୦ ସପ୍ତାହ ପର୍ଯ୍ୟନ୍ତ ପାରୋଲ ନେଇପାରିବେ। ତେବେ ସେ ଚଳିତ ବର୍ଷ ଆହୁରି ୩ ସପ୍ତାହର ଫର୍ଲୋ ପାଇଁ ଆବେଦନ କରିପାରିବେ ବୋଲି ଜଣାପଡ଼ିଛି। ବାରମ୍ବାର ତାଙ୍କର ଏହି ଅସ୍ଥାୟୀ ମୁକ୍ତିକୁ ନେଇ ବିଭିନ୍ନ ସମୟରେ ରାଜନୈତିକ ଏବଂ ଆଇନଗତ ବିବାଦ ସୃଷ୍ଟି ହେଉଛି।

ପଞ୍ଜାବ: ପଞ୍ଜାବ ଏବଂ ହରିୟାଣା ହାଇକୋର୍ଟ ଡେରା ସଚ୍ଚା ସୌଦା ମୁଖ୍ୟ ଗୁରମିତ ରାମ ରହିମ ସିଂଙ୍କୁ ଏକ ବଡ଼ ଆଶ୍ୱସ୍ତି ପ୍ରଦାନ କରିଛନ୍ତି। ୨୦୦୨ ମସିହାର ବହୁ ଚର୍ଚ୍ଚିତ ସାମ୍ବାଦିକ ରାମ ଚନ୍ଦର ଛତ୍ରପତି ହତ୍ୟା ମାମଲାରେ ହାଇକୋର୍ଟ ତାଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ଉପଯୁକ୍ତ ପ୍ରମାଣ ଅଭାବରୁ ଅଦାଲତ ଏହି ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ତେବେ କୋର୍ଟ ମାମଲାରେ ଦୋଷୀ ସାବ୍ୟସ୍ତ ଅନ୍ୟ ତିନି ଅଭିଯୁକ୍ତ କୁଲଦୀପ, ନିର୍ମଳ ଓ କିଶନ ଲାଲଙ୍କ ଆଜୀବନ କାରାଦଣ୍ଡାଦେଶକୁ କାଏମ୍ ରଖିଛନ୍ତି।

ଏହି ହତ୍ୟା ମାମଲାରୁ ଦୋଷମୁକ୍ତ ହୋଇଥିଲେ ମଧ୍ୟ ରାମ ରହିମ ଜେଲରୁ ବାହାରି ପାରିବେ ନାହିଁ। କାରଣ, ସାଧ୍ୱୀ ଯୌନ ଶୋଷଣ ମାମଲାରେ ସେ ପୂର୍ବରୁ ଦୋଷୀ ସାବ୍ୟସ୍ତ ହୋଇ ୨୦ ବର୍ଷର ଜେଲ ଦଣ୍ଡ ଭୋଗୁଛନ୍ତି। ତେଣୁ ସେ ବର୍ତ୍ତମାନ ରୋହତକର ସୁନାରିଆ ଜେଲରେ ହିଁ ରହିବେ ବୋଲି ସ୍ପଷ୍ଟ ହୋଇଛି।

ହାଇକୋର୍ଟର ମୁଖ୍ୟ ବିଚାରପତି ଶୀଲ ନାଗୁ ଏବଂ ବିଚାରପତି ବିକ୍ରମ ଅଗ୍ରୱାଲଙ୍କ ଖଣ୍ଡପୀଠ ରାମ ରହିମଙ୍କୁ ଖଲାସ କରିଥିବାବେଳେ ଅନ୍ୟ ଅଭିଯୁକ୍ତଙ୍କ ଦଣ୍ଡକୁ କାଏମ ରଖିଛନ୍ତି। ଏହି ମାମଲାରେ ସମ୍ପୃକ୍ତ ଥିବା କୁଲଦୀପ ସିଂ, ନିର୍ମଳ ସିଂ ଏବଂ କୃଷ୍ଣ ଲାଲଙ୍କ ଦୋଷକୁ କୋର୍ଟ ବଜାୟ ରଖିଛନ୍ତି। ୨୦୧୯ ମସିହାରେ ସିବିଆଇର ଏକ ସ୍ୱତନ୍ତ୍ର ଅଦାଲତ ଏମାନଙ୍କ ସହ ରାମ ରହିମଙ୍କୁ ମଧ୍ୟ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ।

୨୦୦୨ ମସିହାରେ ସାମ୍ବାଦିକ ରାମ ଚନ୍ଦର ଛତ୍ରପତି ତାଙ୍କ ଖବରକାଗଜ 'ପୁରା ସଚ୍' (Poora Sach) ଜରିଆରେ ଡେରା ସଚ୍ଚା ସୌଦାର ମୁଖ୍ୟାଳୟରେ ଚାଲିଥିବା ଅନୈତିକ କାର୍ଯ୍ୟକଳାପକୁ ଲୋକଲୋଚନକୁ ଆଣିଥିଲେ। ଏହା ପରେ ତାଙ୍କୁ ସିର୍ସା ଠାରେ ଗୁଳି କରି ହତ୍ୟା କରାଯାଇଥିଲା। ଦୀର୍ଘ ଦିନର ଶୁଣାଣି ପରେ, ଘଟଣାରେ ବ୍ୟବହୃତ ଗୁଳି ଏବଂ ଅନ୍ୟାନ୍ୟ ତଥ୍ୟକୁ ସୂକ୍ଷ୍ମ ଭାବେ ଯାଞ୍ଚ କରି ହାଇକୋର୍ଟ ରାମ ରହିମଙ୍କୁ ସନ୍ଦେହର ଲାଭ ଦେଇ ଦୋଷମୁକ୍ତ କରିଛନ୍ତି।

ରାମ ରହିମ ୨୦୧୭ ମସିହାରୁ ଜେଲରେ ଥିଲେ ମଧ୍ୟ ସେ ବାରମ୍ବାର ପାରୋଲରେ ବାହାରକୁ ଆସିଛନ୍ତି। ବର୍ତ୍ତମାନ ସୁଦ୍ଧା ସେ ପ୍ରାୟ ୧୪ ଥର ଜେଲରୁ ଅସ୍ଥାୟୀ ମୁକ୍ତି ପାଇସାରିଛନ୍ତି। ହରିୟାଣା, ପଞ୍ଜାବ ଏବଂ ରାଜସ୍ଥାନରେ ଡେରା ସଚ୍ଚା ସୌଦାର ବ୍ୟାପକ ପ୍ରଭାବ ରହିଥିବାରୁ ତାଙ୍କ ମୁକ୍ତିକୁ ନେଇ ସାଧାରଣରେ ଚର୍ଚ୍ଚା ଜୋର ଧରିଛି।

ନୂଆଦିଲ୍ଲୀ: ଅସୁସ୍ଥ ମା’ଙ୍କ ଯତ୍ନ ନେବା ପାଇଁ ଡେରା ସଚ୍ଚା ସୌଦା ମୁଖ୍ୟ ଗୁରୁମିତ ରାମ ରହୀମ ସିଂଙ୍କୁ ପାରୋଲ ପ୍ରଦାନ କରାଯାଇଛି । । ରୋହତକ ସୁନାରିଆ ଜେଲରେ ରହିଥିବା ଗୁରୁମିତ ରାମ ରହୀମ ତାଙ୍କ ଅସୁସ୍ଥ ମା’ଙ୍କ ଯତ୍ନ ନେବା ପାଇଁ ମେ ୧୮ରେ ‘ଜରୁରୀକାଳୀନ ପାରୋଲ’ ମାଗିଥିଲେ । ଦୁଇ ଅନୁଗାମୀଙ୍କୁ ବଳାତ୍କାର ଅଭିଯୋଗରେ ୨୦ ବର୍ଷ ଜେଲ ଦଣ୍ଡ ଭୋଗୁଛନ୍ତି ରାମ୍ ରହୀମ୍‌ ।

ରାଜ୍ୟ ଜେଲ ମନ୍ତ୍ରୀ ରଞ୍ଜିତ ସିଂ କହିଛନ୍ତି ଯେ ଆଇନ ଅନୁଯାୟୀ ଏକ ବ୍ୟବସ୍ଥା ଅଛି ଯେ ଯଦି ଦୋଷୀ ପରିବାରରେ ଜରୁରୀକାଳୀନ ପରିସ୍ଥିତି ଉପୁଜେ ତେବେ ପୋଲିସ ସୁରକ୍ଷା ଅଧୀନରେ ତାଙ୍କ ପରିବାରକୁ ଭେଟିବାକୁ ଅନୁମତି ଦିଆଯିବ ।