ଇନ୍ଧନ ଅଭାବ ଏବଂ ଲୋକଙ୍କ ମଧ୍ୟରେ ଆତଙ୍କିତ କ୍ରୟ (Panic Buying) କାରଣରୁ ଆନ୍ଧ୍ରପ୍ରଦେଶରେ ଏବେ ଅଭାବନୀୟ ସ୍ଥିତି ସୃଷ୍ଟି ହୋଇଛି। ରାଜ୍ୟରେ ଏକାଥରକେ ୪୨୧ଟି ପେଟ୍ରୋଲ ପମ୍ପ ବନ୍ଦ ହୋଇଯିବା ପରେ ସାଧାରଣ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏହି ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ ଏକ ଜରୁରୀକାଳୀନ ବୈଠକ ଡାକିବା ସହ ତୁରନ୍ତ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି।

ପରିସ୍ଥିତିର ସମୀକ୍ଷା କଲେ ମୁଖ୍ୟମନ୍ତ୍ରୀ

ରବିବାର ସକାଳେ ମୁମ୍ବାଇରୁ ଅମରାବତୀ ଫେରିବା ପୂର୍ବରୁ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ମୁଖ୍ୟ ଶାସନ ସଚିବ ସାଇ ପ୍ରସାଦ ଏବଂ ଅନ୍ୟ ବରିଷ୍ଠ ଅଧିକାରୀଙ୍କ ସହ ଟେଲିଫୋନ୍ ଯୋଗେ ଆଲୋଚନା କରିଥିଲେ। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (CMO) ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଅଧିକାରୀମାନେ ଜିଲ୍ଲାୱାରୀ ଇନ୍ଧନ ସ୍ଥିତି ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଇଥିଲେ। ବର୍ତ୍ତମାନର ସଙ୍କଟକୁ ମୁକାବିଲା କରିବା ପାଇଁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମୁଖ୍ୟମନ୍ତ୍ରୀ ଜିଲ୍ଲାପାଳ ଏବଂ ସମ୍ପୃକ୍ତ ବିଭାଗୀୟ ଅଧିକାରୀମାନଙ୍କୁ କଡ଼ା ନିର୍ଦ୍ଦେଶ ଦେଇଛନ୍ତି।

ଚାହିଦା ବୃଦ୍ଧି ଓ ଆତଙ୍କିତ କ୍ରୟ

ପରିସଂଖ୍ୟାନ ଅନୁଯାୟୀ, ରାଜ୍ୟରେ ମୋଟ ୪,୫୧୦ଟି ପେଟ୍ରୋଲ ପମ୍ପ ଥିବା ବେଳେ ସେଥିମଧ୍ୟରୁ ୪୨୧ଟି ଇନ୍ଧନ ଅଭାବରୁ ସାମୟିକ ଭାବେ ବନ୍ଦ ହୋଇଯାଇଛି। ପୂର୍ବ ବର୍ଷ ତୁଳନାରେ ଇନ୍ଧନ ଯୋଗାଣ ପ୍ରାୟ ୧୦ ପ୍ରତିଶତ ବୃଦ୍ଧି ପାଇଥିଲେ ମଧ୍ୟ ସମ୍ଭାବ୍ୟ ଅଭାବକୁ ନେଇ ଲୋକେ ଆତଙ୍କିତ ହୋଇ ଅଧିକ ପରିମାଣରେ ତେଲ କିଣୁଛନ୍ତି, ଯାହା ଫଳରେ ଅନେକ ପେଟ୍ରୋଲ ପମ୍ପ ଖାଲି ହୋଇଯାଉଛି।

ସାଧାରଣ ଦିନରେ ଦୈନିକ ପ୍ରାୟ ୬,୩୩୦ କିଲୋଲିଟର ପେଟ୍ରୋଲ ଏବଂ ୯,୦୪୮ କିଲୋଲିଟର ଡିଜେଲ ବିକ୍ରି ହୋଇଥାଏ। କିନ୍ତୁ ଶନିବାର ଦିନ ଏହି ଚାହିଦା ଅଚାନକ ବୃଦ୍ଧି ପାଇ ପେଟ୍ରୋଲ ବିକ୍ରି ୧୦,୩୪୫ କିଲୋଲିଟର ଏବଂ ଡିଜେଲ ବିକ୍ରି ୧୪,୧୫୬ କିଲୋଲିଟରରେ ପହଞ୍ଚିଥିଲା। ଏହା ସ୍ୱାଭାବିକ ଚାହିଦା ଠାରୁ ପ୍ରାୟ ୫୦ ପ୍ରତିଶତ ଅଧିକ। ଏହାବ୍ୟତୀତ ମତ୍ସ୍ୟଚାଷ ସମ୍ପର୍କିତ ବ୍ୟବସାୟୀମାନେ ବହୁ ପରିମାଣରେ ଡ୍ରମ୍ ଜରିଆରେ ଇନ୍ଧନ କିଣୁଥିବାରୁ ଏହି ସମସ୍ୟା ଅଧିକ ଜଟିଳ ହୋଇଛି।

ସରକାରଙ୍କ କଡ଼ା ନିର୍ଦ୍ଦେଶ ଏବଂ ପଦକ୍ଷେପ

କୌଣସି ପ୍ରକାର କୃତ୍ରିମ ସଙ୍କଟ (Artificial Shortage) ସୃଷ୍ଟି ନକରିବା ପାଇଁ ରାଜ୍ୟ ଯୋଗାଣ ମନ୍ତ୍ରୀ ନାଦେନ୍ଦ୍ଲା ମନୋହର ଏବଂ କମିଶନର ତୈଳ କମ୍ପାନୀ ଏବଂ ଡିଲରମାନଙ୍କୁ ସତର୍କ କରାଇ ଦେଇଛନ୍ତି। ଏଥିସହିତ ସନ୍ଧ୍ୟା ସୁଦ୍ଧା ଏହି ସମସ୍ୟାର ସମାଧାନ ଦିଗରେ ନିଆଯାଇଥିବା ପଦକ୍ଷେପ ଉପରେ ଏକ ବିସ୍ତୃତ ରିପୋର୍ଟ ପ୍ରଦାନ କରିବାକୁ ଜିଲ୍ଲାପାଳ ଏବଂ ମତ୍ସ୍ୟ ବିଭାଗ ଅଧିକାରୀଙ୍କୁ ମୁଖ୍ୟମନ୍ତ୍ରୀ ଆଦେଶ ଦେଇଛନ୍ତି। ଇନ୍ଧନ ଯୋଗାଣ ଶୃଙ୍ଖଳାକୁ ସ୍ୱାଭାବିକ କରିବା ଦିଗରେ ତୈଳ କମ୍ପାନୀଗୁଡ଼ିକ ତୁରନ୍ତ ଧ୍ୟାନ ଦେବା ଆବଶ୍ୟକ ବୋଲି ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇଛି。

ବିଶାଖାପାଟନା: ଆନ୍ଧ୍ରପ୍ରଦେଶର ବିଶାଖାପାଟନାରୁ ଏକ ଶିହରଣକାରୀ ହତ୍ୟାକାଣ୍ଡ ସାମ୍‌ନାକୁ ଆସିଛି। ଜଣେ ବିବାହିତ ନୌସେନା କର୍ମଚାରୀ ନିଜ ପ୍ରେମିକାକୁ ଅତି ନିର୍ମମ ଭାବେ ହତ୍ୟା କରିବା ପରେ ତାଙ୍କ ଶରୀରକୁ ଖଣ୍ଡ ଖଣ୍ଡ ପରି କାଟି ଫ୍ରିଜ୍‌ରେ ଲୁଚାଇ ରଖିଥିବା ଅଭିଯୋଗ ହୋଇଛି। ଭାରତୀୟ ନୌସେନା ଜାହାଜ (ଆଇଏନଏସ୍‌) ଦେଗାରେ କାର୍ଯ୍ୟରତ ଜଣେ ନୌସେନା କର୍ମଚାରୀ ଚନ୍ତାଡ଼ା ରବୀନ୍ଦ୍ର, ନିଜ ପତ୍ନୀଙ୍କ ଅନୁପସ୍ଥିତିର ସୁଯୋଗ ନେଇ ପ୍ରେମିକା ପୋଲିପଲ୍ଲୀ ମୌନିକାଙ୍କୁ ହତ୍ୟା କରିବା ପରେ ତାଙ୍କ ଶରୀରକୁ ଅତି ନିର୍ମମ ଭାବେ ଖଣ୍ଡ ଖଣ୍ଡ କରି କାଟି ଦେଇଛନ୍ତି। 

ସୂଚନା ଅନୁସାରେ, ୩୦ ବର୍ଷୀୟ ରବୀନ୍ଦ୍ର ୨୦୨୧ରେ ‘ମିଙ୍ଗଲ’ ନାମକ ଏକ ଡେଟିଂ ଆପ୍‌ ଜରିଆରେ ୩୧ ବର୍ଷୀୟା ମୌନିକାଙ୍କ ସହ ପରିଚିତ ହୋଇଥିଲେ। ପରବର୍ତ୍ତୀ ସମୟରେ ସେମାନଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ିଉଠିଥିଲା। ୨୦୨୪ରେ ରବୀନ୍ଦ୍ର ଅନ୍ୟ ଜଣେ ମହିଳାଙ୍କୁ ବିବାହ କରିଥିଲେ। ପୁଲିସ ସୂଚନା ଅନୁଯାୟୀ, ମୌନିକା ରବୀନ୍ଦ୍ରଙ୍କଠାରୁ ୩.୫ ଲକ୍ଷ ଟଙ୍କା ନେଇଥିଲେ ଏବଂ ସେମାନଙ୍କ ସମ୍ପର୍କ ବିଷୟରେ ରବୀନ୍ଦ୍ରଙ୍କ ପତ୍ନୀଙ୍କୁ ଜଣାଇବାକୁ ବାରମ୍ବାର ଧମକ ଦେଉଥିଲେ। ଏହାକୁ ନେଇ ଦୁହିଁଙ୍କ ମଧ୍ୟରେ ପ୍ରାୟତଃ ଝଗଡ଼ା ହେଉଥିଲା। ଗତ ରବିବାର ରବୀନ୍ଦ୍ରଙ୍କ ପତ୍ନୀ ବାପଘରକୁ ଯାଇଥିବା ବେଳେ ସେ ମୌନିକାଙ୍କୁ ନିଜ ଘରକୁ ଡାକିଥିଲେ। ସେଠାରେ ଉଭୟଙ୍କର ପୁଣି ଯୁକ୍ତିତର୍କ ହୋଇଥିଲା, ଯାହା ପରେ ରବୀନ୍ଦ୍ର ଉତ୍ୟକ୍ତ ହୋଇ ମୌନିକାଙ୍କ ଗଳା ଚିପି ହତ୍ୟା କରିଥିଲେ। ହତ୍ୟା ପରେ ରବୀନ୍ଦ୍ର ଏକ ଅନଲାଇନ୍‌ ପ୍ଲାଟଫର୍ମରୁ ଛୁରୀ ମଗାଇ ମୌନିକାଙ୍କ ଶରୀରକୁ ଖଣ୍ଡ ଖଣ୍ଡ କରିଥିଲେ। ସେ ମୁଣ୍ଡ, ଗୋଡ଼, ହାତକୁ ଶରୀରରୁ ଅଲଗା କରି ଦେଇଥିଲେ। ଗୋଡ଼ ଏବଂ ଅଣ୍ଟା ଅଂଶକୁ ଏକ ଟ୍ରଲି ବ୍ୟାଗ୍‌ରେ ପ୍ୟାକ କରିଥିଲେ। ଶରୀର ମଧ୍ୟ ଭାଗକୁ ଫ୍ରିଜ୍‌ ଭିତରେ ଲୁଚାଇ ରଖିଥିଲେ। ମୁଣ୍ଡ ଓ ହାତକୁ ଅନ୍ୟ ଏକ ସ୍ଥାନକୁ ନେଇ ପୋଡ଼ି ଦେଇଥିଲେ। 

ଏହି ଜଘନ୍ୟ ହତ୍ୟାକାଣ୍ଡ ପରେ ରବୀନ୍ଦ୍ର ନିଜେ ଥାନକୁ ଯାଇ ନିଜ ଅପରାଧ ସ୍ୱୀକାର କରିଥିଲେ। ପୁଲିସ ଘଟଣାସ୍ଥଳରେ ପହଞ୍ଚି ଫ୍ରିଜ୍‌ ଓ ଘର ଭିତରୁ ଶରୀର ବିଭିନ୍ନ ଅଂଶ ଜବତ କରିଛି। ତେବେ ମୌନିକାଙ୍କ ମୁଣ୍ଡ ଏପର୍ଯ୍ୟନ୍ତ ମଳିନାହିଁ। ଏହି ଘଟଣା ଦିଲ୍ଳୀର ବହୁ ଚର୍ଚ୍ଚିତ ଶ୍ରଦ୍ଧା ୱାଲକର ହତ୍ୟାକାଣ୍ଡର ସ୍ମୃତି ଚାରଣ କରୁଛି, ଯେଉଁଠାରେ ଆଫତାବ ପୁନାୱାଲା ନିଜ ଲିଭ୍‌-ଇନ୍‌ ପାର୍ଟନରଙ୍କୁ ହତ୍ୟା କରି ଫ୍ରିଜ୍‌ରେ ରଖିଥିଲେ। ବର୍ତ୍ତମାନ ପୁଲିସର ଏକ ସ୍ୱତନ୍ତ୍ର ଟିମ୍‌ ଶରୀର ନିଖୋଜ ଅଂଶଗୁଡ଼ିକୁ ଖୋଜୁଛି ଓ ତଦନ୍ତ ଜାରି ରଖିଛି।

ଓଡ଼ିଶା ପାଇଁ ଏକ ବଡ଼ ଝଟକା। ରାଜ୍ୟରେ ପ୍ରତିଷ୍ଠା ହେବାକୁ ଥିବା ଦୁନିଆର ସବୁଠାରୁ ବଡ଼ ଷ୍ଟିଲ୍ ପ୍ଲାଣ୍ଟ ବା ଇସ୍ପାତ କାରଖାନା ଏବେ ଆନ୍ଧ୍ରପ୍ରଦେଶକୁ ସ୍ଥାନାନ୍ତରିତ ହୋଇଛି। ଆର୍ସେଲର ମିତ୍ତଲ-ନିପ୍ପନ ଷ୍ଟିଲ୍ ଇଣ୍ଡିଆ (AM/NS India) ପକ୍ଷରୁ ଓଡ଼ିଶାରେ ଏହି ମେଗା ପ୍ରକଳ୍ପ ନିର୍ମାଣ ପାଇଁ ଯୋଜନା କରାଯାଇଥିଲା। କିନ୍ତୁ ବିଭିନ୍ନ ପ୍ରଶାସନିକ ଏବଂ ବ୍ୟବସାୟିକ ଅସୁବିଧା କାରଣରୁ କମ୍ପାନୀ ନିଜ ନିଷ୍ପତ୍ତି ବଦଳାଇ ଏବେ ଆନ୍ଧ୍ରପ୍ରଦେଶରେ ଏହି କାରଖାନା ପ୍ରତିଷ୍ଠା କରିବାକୁ ଯାଉଛି। ଗତ ୨୩ ମାର୍ଚ୍ଚ ୨୦୨୬ ତାରିଖରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ ଏବଂ ଶିଳ୍ପପତି ଲକ୍ଷ୍ମୀ ମିତ୍ତଲ ଏହି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଛନ୍ତି।

ଓଡ଼ିଶାରୁ କାହିଁକି ହଟିଲା ପ୍ରକଳ୍ପ?

ଏପ୍ରିଲ ୨୦୨୩ରେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମୟରେ ଏହି ପ୍ରକଳ୍ପ ପାଇଁ ୧.୨୪ ଲକ୍ଷ କୋଟି ଟଙ୍କାର ବୁଝାମଣାପତ୍ର (MoU) ସ୍ୱାକ୍ଷରିତ ହୋଇଥିଲା। ଏହି ୨.୪ କୋଟି ଟନ୍ କ୍ଷମତା ବିଶିଷ୍ଟ ଇସ୍ପାତ ପ୍ରକଳ୍ପ ଓଡ଼ିଶାର ଶିଳ୍ପାୟନ ଆକାଂକ୍ଷାର ଏକ ପ୍ରମୁଖ ଆଧାର ଥିଲା। ତେବେ ଜମି ଅଧିଗ୍ରହଣରେ ଲଗାତାର ବିଳମ୍ବ ଏବଂ ପ୍ରଶାସନିକ ବାଧାବିଘ୍ନ କାରଣରୁ ଏହା ରାଜ୍ୟ ହାତରୁ ଖସିଯାଇଛି। ୨୦୨୪ ଶେଷ ଆଡ଼କୁ ବାଦାତୁବି ଗାଁରେ ୩୮୩ ଏକର ଜମି ପାଇଁ ନୋଟିସ୍ ଜାରି କରାଯାଇଥିଲେ ସୁଦ୍ଧା ଅଧିକାର ଯାଞ୍ଚ ପ୍ରକ୍ରିୟା ସମ୍ପୂର୍ଣ୍ଣ ହୋଇପାରିନଥିଲା। ଏହାବ୍ୟତୀତ ଥଇଥାନ ଓ ପୁନର୍ବାସ (R&R) ପ୍ରକ୍ରିୟା ମଧ୍ୟ ଅସମ୍ପୂର୍ଣ୍ଣ ରହିଥିଲା।

ଆନ୍ଧ୍ରପ୍ରଦେଶର ତ୍ୱରିତ ପଦକ୍ଷେପ

ଓଡ଼ିଶା ସରକାରଙ୍କ ବିଳମ୍ବ ନୀତିର ଫାଇଦା ଉଠାଇ ଆନ୍ଧ୍ରପ୍ରଦେଶ ସରକାର ମାତ୍ର ୪ ମାସ ମଧ୍ୟରେ ରେକର୍ଡ ବେଗରେ ଜମି ଆବଣ୍ଟନ ପ୍ରକ୍ରିୟା ଶେଷ କରିଥିଲେ। ଆନ୍ଧ୍ରପ୍ରଦେଶର ଅନକାପଲ୍ଲୀ ଜିଲ୍ଲାର ରାଜାୟାପେଟାଠାରେ ଏହି ପ୍ରକଳ୍ପ ପାଇଁ ୫,୪୦୦ ଏକରରୁ ଅଧିକ ଜମି ଯୋଗାଇ ଦିଆଯାଇଛି। ପ୍ରାୟ ୧.୩୬ ରୁ ୧.୪୭ ଲକ୍ଷ କୋଟି ଟଙ୍କାର ପୁଞ୍ଜିନିବେଶରେ ଏହି ପ୍ରକଳ୍ପ ଦୁଇଟି ପର୍ଯ୍ୟାୟରେ ବିକଶିତ ହେବ। ଏହାଦ୍ୱାରା ପ୍ରତ୍ୟକ୍ଷ ଏବଂ ପରୋକ୍ଷ ଭାବରେ ପ୍ରାୟ ୧ ଲକ୍ଷ ଲୋକଙ୍କୁ ନିଯୁକ୍ତି ମିଳିବ ବୋଲି ସରକାର ଦାବି କରିଛନ୍ତି। ଡିସେମ୍ବର ୨୦୨୮ ସୁଦ୍ଧା ଏଠାରେ ଉତ୍ପାଦନ ଆରମ୍ଭ ହେବାର ଲକ୍ଷ୍ୟ ରଖାଯାଇଛି।

ଆରମ୍ଭ ହେଲା ରାଜନୈତିକ ବୟାନବାଜି

ଏହି ମେଗା ପ୍ରକଳ୍ପ ଓଡ଼ିଶା ହାତରୁ ଖସିଯିବା ପରେ ରାଜ୍ୟ ରାଜନୀତି ସରଗରମ ହୋଇଛି। ପ୍ରମୁଖ ବିରୋଧୀ ଦଳ ବିଜୁ ଜନତା ଦଳ (BJD) ରାଜ୍ୟରେ କ୍ଷମତାସୀନ ବିଜେପି ସରକାରଙ୍କୁ ତୀବ୍ର ସମାଲୋଚନା କରିଛି। ବିଜେଡି ନେତା ତଥା ସାଂସଦ ସସ୍ମିତ ପାତ୍ର ଏବଂ ପୂର୍ବତନ ମନ୍ତ୍ରୀ ଅତନୁ ସବ୍ୟସାଚୀ ନାୟକ କହିଛନ୍ତି ଯେ ବିଜେପି ସରକାରଙ୍କ ଖାମଖିଆଲି ମନୋଭାବ ଯୋଗୁଁ ଓଡ଼ିଶା ଏକ ବଡ଼ ନିଯୁକ୍ତି ସୁଯୋଗ ହରାଇଛି। ରାଜ୍ୟ ସରକାରଙ୍କୁ ଟାର୍ଗେଟ୍ କରି ସେମାନେ କହିଛନ୍ତି ଯେ, ଏହା 'ଡବଲ୍ ଇଞ୍ଜିନ୍' ସରକାର ନୁହେଁ, ବରଂ ଓଡ଼ିଶାର ବିକାଶ ଉପରେ ଏହା ଏକ 'ଡବଲ୍ ବ୍ରେକ୍' ଲଗାଇଛି।

ଆନ୍ଧ୍ରପ୍ରଦେଶର ଚିତ୍ତୁର ଜିଲ୍ଲାରେ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ଏଠାରେ ଏକ ବନ୍ଦ କୋଠରୀ ଭିତରେ ରାତିସାରା ବାଇକ୍ ଇଞ୍ଜିନ୍ ଷ୍ଟାର୍ଟ ରହିବା କାରଣରୁ ନିର୍ଗତ ବିଷାକ୍ତ ଗ୍ୟାସ୍‌ରେ ଶ୍ୱାସରୁଦ୍ଧ ହୋଇ ଗୋଟିଏ ପରିବାରର ୪ ଜଣଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ସ୍ୱାମୀ, ସ୍ତ୍ରୀ ଏବଂ ସେମାନଙ୍କର ଦୁଇ ପିଲା ଅଛନ୍ତି। ବିଶ୍ୱାସ କରାଯାଏ ଯେ ଏହି ମୃତ୍ୟୁ କୌଣସି ଆକ୍ରମଣ କିମ୍ବା ରୋଗ ଯୋଗୁଁ ନୁହେଁ, ବରଂ ଅଦୃଶ୍ୟ ଏବଂ ଗନ୍ଧହୀନ କାର୍ବନ ମୋନୋକ୍ସାଇଡ୍ ଗ୍ୟାସ୍ କାରଣରୁ ହୋଇଛି।

ମେକାନିକ୍‌ଙ୍କ ପରାମର୍ଶ ପଡ଼ିଲା ମହଙ୍ଗା

ସୂଚନା ଅନୁଯାୟୀ, ଏହି ଘଟଣାଟି ପୁଙ୍ଗାନୁର ଅଞ୍ଚଳର ତ୍ୟାଗରାଜୁ ଷ୍ଟ୍ରିଟ୍ରେ ଘଟିଛି। ସେଠାରେ ରହୁଥିବା ଜଣେ ବ୍ୟକ୍ତି ନିକଟରେ ନିଜ ବାଇକ୍ ଇଞ୍ଜିନ୍‌ର ମରାମତି (ବୋରିଂ) କରାଇଥିଲେ। ବାଇକ୍‌କୁ ନୂଆ ରୂପ ଦେବା ପରେ ମେକାନିକ୍ ତାଙ୍କୁ ପରାମର୍ଶ ଦେଇଥିଲେ ଯେ ନୂତନ ଯନ୍ତ୍ରାଂଶଗୁଡ଼ିକ ଠିକ୍ ଭାବରେ ସେଟ୍ ହେବା ପାଇଁ ଇଞ୍ଜିନ୍‌କୁ ଦୀର୍ଘ ସମୟ ପର୍ଯ୍ୟନ୍ତ ଷ୍ଟାର୍ଟ କରି ରଖିବାକୁ ପଡ଼ିବ। ଏହି ପରାମର୍ଶକୁ ମାନି ବ୍ୟକ୍ତି ଜଣକ ରାତିରେ ବାଇକ୍‌କୁ ନିଜ ଘର ଭିତରେ ରଖି ଇଞ୍ଜିନ୍ ଅନ୍ କରି ଛାଡ଼ିଦେଇଥିଲେ।

 ରାତିରେ ପ୍ରବଳ ଥଣ୍ଡା ଅନୁଭୂତ ହେଉଥିବାରୁ ପରିବାର ଲୋକେ ଘରର ସମସ୍ତ କବାଟ ଏବଂ ଝରକାକୁ ଭଲଭାବେ ବନ୍ଦ କରି ଶୋଇବାକୁ ଯାଇଥିଲେ। ତେବେ ଘର ଭିତରେ ଚାଲୁଥିବା ବାଇକ୍ ଇଞ୍ଜିନ୍‌ରୁ ବାହାରୁଥିବା ଧୂଆଁ ବାହାରକୁ ଯାଇନପାରି କୋଠରୀ ଭିତରେ ଜମା ହେବାରେ ଲାଗିଥିଲା। ଧୀରେ ଧୀରେ ପୂରା ଘର କାର୍ବନ ମୋନୋକ୍ସାଇଡ୍ ଭଳି ମାରାତ୍ମକ ଗ୍ୟାସ୍‌ରେ ଭରିଯାଇଥିଲା। ଗଭୀର ନିଦରେ ଶୋଇଥିବା ଅବସ୍ଥାରେ ଅମ୍ଳଜାନ ଅଭାବରୁ ସ୍ୱାମୀ, ସ୍ତ୍ରୀ ଏବଂ ଦୁଇ ନିଷ୍ପାପ ପିଲାଙ୍କର ପ୍ରାଣବାୟୁ ଉଡ଼ିଯାଇଥିଲା।

ଆନ୍ଧ୍ରପ୍ରଦେଶର ଗୁଣ୍ଟୁର ଜିଲ୍ଲାରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ସାମାନ୍ୟ ଟିଭି ଭଲ୍ୟୁମକୁ ନେଇ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ଆରମ୍ଭ ହୋଇଥିବା ଝଗଡ଼ା ଶେଷରେ ହତ୍ୟାକାଣ୍ଡର ରୂପ ନେଇଛି। ଟିଭିର ଶବ୍ଦ କମାଇବାକୁ କହିବାରୁ ଉତ୍ତ୍ୟକ୍ତ ହୋଇ ସ୍ତ୍ରୀ ନିଜ ସ୍ୱାମୀଙ୍କୁ ଛୁରୀ ଭୁଷି ହତ୍ୟା କରିଥିବା ଅଭିଯୋଗ ହୋଇଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି।

ସାମାନ୍ୟ କଥାରୁ ଭୟଙ୍କର ପରିଣାମ

ପୋଲିସ ସୂଚନା ଅନୁଯାୟୀ, ମୃତକ ଜଣକ ହେଲେ ଶେଖ ଅହମ୍ମଦ (୨୭), ଯିଏକି ପେଶାରେ ଜଣେ ଏସି ମେକାନିକ ଥିଲେ। ସେ ତାଙ୍କ ପତ୍ନୀ କ୍ରାନ୍ତିଙ୍କ ସହ ମଙ୍ଗଳଗିରି ସ୍ଥିତ ଟିଡକୋ ହାଉସିଂ କଲୋନୀରେ ରହୁଥିଲେ। ରିପୋର୍ଟ ଅନୁସାରେ, ଅହମ୍ମଦ ରମଜାନ ଉପବାସରେ ଥିଲେ ଏବଂ କାମ ସାରି ଘରକୁ ଫେରିବା ପରେ ବିଶ୍ରାମ ନେଉଥିଲେ। ଏହି ସମୟରେ ତାଙ୍କ ପତ୍ନୀ ଜୋରରେ ଟିଭି ଚଳାଇଥିଲେ। ଅହମ୍ମଦ ଟିଭିର ସାଉଣ୍ଡ କମାଇବାକୁ କହିବାରୁ ଉଭୟଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା।

ଘଟଣାର ସମ୍ପୂର୍ଣ୍ଣ ବିବରଣୀ

ଝଗଡ଼ା ବଢିବାରୁ ରାଗିଯାଇ କ୍ରାନ୍ତି ଘରେ ଥିବା ଏକ ଛୁରୀ ଆଣି ଅହମ୍ମଦଙ୍କ ଉପରେ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ପଡ଼ୋଶୀମାନେ ତାଙ୍କୁ ତୁରନ୍ତ ବିଜୟୱାଡା ସରକାରୀ ଡାକ୍ତରଖାନାକୁ ନେଇଥିଲେ ମଧ୍ୟ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସୂଚନାଯୋଗ୍ୟ ଯେ, କ୍ରାନ୍ତିଙ୍କର ଏହା ଦ୍ୱିତୀୟ ବିବାହ ଥିଲା ଏବଂ ତାଙ୍କ ପ୍ରଥମ ସ୍ୱାମୀ ବର୍ତ୍ତମାନ ଜେଲରେ ଅଛନ୍ତି। ପ୍ରାୟ ଦେଢ଼ ବର୍ଷ ତଳେ ଅହମ୍ମଦ ଏବଂ କ୍ରାନ୍ତିଙ୍କ ବିବାହ ହୋଇଥିଲା।

ପୋଲିସର ତଦନ୍ତ ଜାରି

ଘଟଣା ସମ୍ପର୍କରେ ଖବର ପାଇ ମଙ୍ଗଳଗିରି ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି। ମୃତକଙ୍କ ମା’ଙ୍କ ଅଭିଯୋଗ ଆଧାରରେ ପୋଲିସ ଏକ ହତ୍ୟା ମାମଲା ରୁଜୁ କରି ଅଭିଯୁକ୍ତ ପତ୍ନୀ କ୍ରାନ୍ତିଙ୍କୁ ଅଟକ ରଖି ପଚରାଉଚରା କରୁଛି।

ପଟ୍ଟାଙ୍ଗି: ଆନ୍ଧ୍ରକୁ ଛାଡ଼ୁନି କୋଟିଆ ଲୋଭ। ପୁଣି କୋଟିଆରେ ପଶି ଆନ୍ଧ୍ର ସରକାରୀ କର୍ମଚାରୀଙ୍କ ଦାଦାଗିରି। କୋଟିଆ ସେମ୍ବୀ ଗାଁର ଆନ୍ଧ୍ର ପ୍ରଶାସନର ଏକ ଟିମ୍ ରାସନ୍ ଓ ଆଧାର କାର୍ଡ ଇ-ସର୍ଭେ କରିବା ବେଳେ ଜୋରଦାର ବିରୋଧର ସମ୍ମୁଖୀନ ହୋଇଛି। ସୂଚନା ଅନୁସାରେ, ଆନ୍ଧ୍ର ପକ୍ଷରୁ ରାସନ୍‌କାର୍ଡ ପ୍ରଦାନ କରିବା ନିମନ୍ତେ ବିବାଦୀୟ କୋଟିଆକୁ ସର୍ଭେ କରିବାକୁ ଆସିଥିବା ଆନ୍ଧ୍ର ନେତା ଓ ଅଧିକାରୀଙ୍କୁ କୋଟିଆ ପୁଲିସ ତଡ଼ି ଦେଇଛି। ସୂଚନାନୁଯାୟୀ, ଆଜି ଆନ୍ଧ୍ରପ୍ରଦେଶର ପଞ୍ଚାୟତ ତଥା ସଚିବାଳୟର ଅଧିକାରୀ ଓ ନେତାମାନେ ଉପର ସେମ୍ୱି ଗ୍ରାମରେ ଅନୁପ୍ରବେଶ କରିଥିଲେ। ସେଠାରେ ଗ୍ରାମବାସୀଙ୍କୁ ଏକତ୍ରିତ କରିଥିଲେ। ଲୋକଙ୍କୁ ଆନ୍ଧ୍ର ସରକାରଙ୍କ ରାସନ କାର୍ଡ ପ୍ରଦାନ ଲାଗି ସର୍ଭେ ଆରମ୍ଭ କରିଥିଲେ। ଏ ବାବଦରେ ସୂଚନା ପାଇ କୋଟିଆ ପୁଲିସ ସେଠାରେ ପହଞ୍ଚି ବିରୋଧ କରିବାରୁ ସେମାନେ ସେଠାରୁ ପଳାଇଥିଲେ।

ଆନ୍ଧ୍ରପ୍ରଦେଶର ଜଣେ ବସ୍ ଡ୍ରାଇଭର ନିଜର ଶେଷ ନିଶ୍ୱାସ ତ୍ୟାଗ କରିବା ପୂର୍ବରୁ ୧୮ ଜଣ ଯାତ୍ରୀଙ୍କ ଜୀବନ ବଞ୍ଚାଇ ମହାନତାର ପରିଚୟ ଦେଇଛନ୍ତି। ଚଳନ୍ତା ବସରେ ହଠାତ୍ ଛାତିରେ ଯନ୍ତ୍ରଣା ଅନୁଭବ କରିବା ସତ୍ତ୍ୱେ, ସେ ବିଚଳିତ ନହୋଇ ବସଟିକୁ ସୁରକ୍ଷିତ ଭାବେ ରାସ୍ତା କଡ଼ରେ ଅଟକାଇ ଦେଇଥିଲେ। ଏହି ଘଟଣା ସମସ୍ତଙ୍କୁ ଭାବବିହ୍ୱଳ କରିଦେଇଛି।

ମୃତ ଡ୍ରାଇଭରଙ୍କ ନାମ କାତ୍ରାପୁ ନାଗରାଜୁ (୩୯) ବୋଲି ଜଣାପଡ଼ିଛି। ସେ ଆନ୍ଧ୍ରପ୍ରଦେଶ ରାଜ୍ୟ ସଡ଼କ ପରିବହନ ନିଗମ (APSRTC)ର ଜଣେ ଡ୍ରାଇଭର ଥିଲେ। ସୋମବାର ଦିନ ସେ ହାଇଦ୍ରାବାଦରୁ ବିଜୟୱାଡା ଅଭିମୁଖେ ଯାଉଥିବା ଏକ "ଅମରାବତୀ" ଏସି ବସ୍ ଚଳାଉଥିଲେ। ହାଇଦ୍ରାବାଦ-ବିଜୟୱାଡା ଜାତୀୟ ରାଜପଥରେ ଯାଉଥିବା ସମୟରେ ହଠାତ୍ ତାଙ୍କ ଛାତିରେ ପ୍ରବଳ ଯନ୍ତ୍ରଣା ଆରମ୍ଭ ହୋଇଥିଲା।

ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଅସହ୍ୟ ଯନ୍ତ୍ରଣା ସତ୍ତ୍ୱେ ନାଗରାଜୁ ନିୟନ୍ତ୍ରଣ ହରାଇ ନଥିଲେ। ସେ ତୁରନ୍ତ ବସଟିକୁ ମୁଖ୍ୟ ରାସ୍ତାରୁ ସର୍ଭିସ ରୋଡକୁ ନେଇ ସୁରକ୍ଷିତ ଭାବେ ଅଟକାଇ ଦେଇଥିଲେ। ବସ୍ ରୋକିବା ପରେ ସେ ସାହାଯ୍ୟ ପାଇଁ ତଳକୁ ଓହ୍ଲାଇଥିଲେ, କିନ୍ତୁ କିଛି କ୍ଷଣ ମଧ୍ୟରେ ସେଠାରେ ଟଳି ପଡ଼ିଥିଲେ।

ଯାତ୍ରୀ ଏବଂ ସ୍ଥାନୀୟ ଲୋକେ ତୁରନ୍ତ ତାଙ୍କୁ ଉଦ୍ଧାର କରି ଏକ ଅଟୋ-ରିକ୍ସା ଯୋଗେ ନିକଟସ୍ଥ ଘରୋଇ ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ଉପଲବ୍ଧ ନଥିବାରୁ ତାଙ୍କୁ ୟାଦାଦ୍ରି ଭୁବନଗିରି ଜିଲ୍ଲା ଚୌତୁପଲ ସରକାରୀ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତରମାନେ ଇସିଜି (ECG) କରିବା ପରେ ତାଙ୍କୁ ମୃତ ଘୋଷଣା କରିଥିଲେ।

ବସରେ ଥିବା ଜଣେ ଯାତ୍ରୀ କହିଛନ୍ତି, "ସେ ଶେଷ ମୁହୂର୍ତ୍ତରେ ଜଣେ ହିରୋ ସାଜିଥିଲେ। ସେ ଚାହିଁଥିଲେ ନିଜ ଚିକିତ୍ସା ପାଇଁ ବସକୁ ଦ୍ରୁତ ଗତିରେ ନେଇପାରିଥାନ୍ତେ, କିନ୍ତୁ ସେ ଯାତ୍ରୀଙ୍କ ସୁରକ୍ଷାକୁ ପ୍ରାଥମିକତା ଦେଇଥିଲେ।" ନାଗରାଜୁଙ୍କ ପରିବାରରେ ତାଙ୍କ ପତ୍ନୀ ଏବଂ ଦୁଇଟି ଛୋଟ ଛୁଆ ଅଛନ୍ତି।

ଏହି ଘଟଣା ଚଳିତ ମାସରେ ଦ୍ୱିତୀୟ ଥର ପାଇଁ ଘଟିଛି। ଏହାପୂର୍ବରୁ ଜାନୁଆରୀ ୧୮ରେ ତେଲେଙ୍ଗାନାରେ ଅନ୍ୟ ଜଣେ ଡ୍ରାଇଭର ଜନାର୍ଦ୍ଦନ ହୃଦଘାତରେ ପ୍ରାଣ ହରାଇବା ପୂର୍ବରୁ ୪୦ ଜଣ ଯାତ୍ରୀଙ୍କ ଜୀବନ ରକ୍ଷା କରିଥିଲେ।

ହାଇଦରାବାଦ୍‌‌: ନାବାଳକଙ୍କ ଉପରେ ଇଣ୍ଟରନେଟ୍‌‌ ଓ ସାମାଜିକ ଗଣମାଧ୍ୟମର ନକରାତ୍ମକ ପ୍ରଭାବକୁ ଦୃଷ୍ଟିରେ ରଖି ଅଷ୍ଟ୍ରେଲିଆ ଏକ ଦୃଷ୍ଟାନ୍ତମୂଳକ ଆଇନ୍‌‌ ପ୍ରଣୟନ କରିଥିଲା। ଏହା ଦ୍ୱାରା ନାବାଳକଙ୍କ ପାଇଁ ସାମାଜିକ ଗଣମାଧ୍ୟମକୁ ନିଷିଦ୍ଧ କରାଯାଇଥିଲା। ଅଷ୍ଟ୍ରେଲିଆର ଏହି ପଦକ୍ଷେପଠାରୁ ପ୍ରେରଣା ନେଇ ଏବେ ଆନ୍ଧ୍ରପ୍ରଦେଶ ସରକାର ଏହି ଭଳି ନୀତି ଆପଣାଇବାକୁ ଯାଉଛନ୍ତି। ଆନ୍ଧ୍ର ସରକାର ୧୬ ବର୍ଷରୁ କମ୍‌‌ ବୟସର ପିଲାମାନଙ୍କ ପାଇଁ ସାମାଜିକ ଗଣମାଧ୍ୟମ ଉପରେ ପ୍ରତିବନ୍ଧକ ଲଗାଇବାକୁ ବିଚାର କରୁଛି। 

ଡାଭୋସରେ ଚାଲିଥିବା ବିଶ୍ୱ ଅର୍ଥନୈତିକ ମଞ୍ଚରେ ଭାଷଣ ଦେଇ ଆନ୍ଧ୍ର ଆଇଟି ମନ୍ତ୍ରୀ ନାରା ଲୋକେଶ କହିଛନ୍ତି ଯେ, ସରକାର ଅଷ୍ଟ୍ରେଲିଆର ଏହି ପଦକ୍ଷେପ ତଥା ଅଭିମୁଖ୍ୟକୁ ନିକଟରୁ ଅଧ୍ୟୟନ କରୁଛନ୍ତି। ପିଲାମାନଙ୍କ ପାଇଁ ଆମକୁ ଏକ ଦୃଢ଼ ଆଇନଗତ ଢାଞ୍ଚା ସୃଷ୍ଟି କରିବାକୁ ପଡ଼ିବ ବୋଲି ସେ କହିଛନ୍ତି। ଉଲ୍ଲେଖଥାଉ କି, ଅଷ୍ଟ୍ରେଲିଆ ୨୦୨୪ରେ ମାନସିକ ସ୍ୱାସ୍ଥ୍ୟ, ଅନଲାଇନ୍‌‌ କ୍ଷତି, ସାଇବର ଧମକ ଓ ନିଶା ଆଲଗାରିଦିମ ସଂକ୍ରାନ୍ତରେ ବଢ଼଼ୁଥିବା ଚିନ୍ତାକୁ ଦୃଷ୍ଟିରେ ରଖି ୧୬ ବର୍ଷରୁ କମ୍‌‌ ବୟସର ପିଲାମାନଙ୍କ ପାଇଁ ସାମାଜିକ ଗଣମାଧ୍ୟମ ପ୍ଲାଟଫର୍ମକୁ ନିଷିଦ୍ଧ କରିଥିଲା ଓ ଏ ନେଇ ଆଇନ ପ୍ରଣୟନ କରିଥିଲା। ତେଲଗୁ ଦେଶମ ପାର୍ଟି (ଟିଡିପି)ର ଜାତୀୟ ମୁଖପାତ୍ର ଦୀପକ ରେଡ୍ଡୀ କହିଛନ୍ତି ଯେ, ମନ୍ତ୍ରୀ ନାରା ଲୋକେଶ ଛୋଟ ପିଲାଙ୍କ ମାନସିକ ସ୍ୱାସ୍ଥ୍ୟ ଓ ସୁରକ୍ଷା ଉପରେ ସାମାଜିକ ଗଣମାଧ୍ୟମର ପ୍ରଭାବ ସମ୍ପର୍କରେ ଗମ୍ଭୀର ଚିନ୍ତାଧାରାକୁ ଠିକ୍‌‌ ଭାବେ ଉଜାଗର କରିଛନ୍ତି। ଆନ୍ଧ୍ର ସରକାର ଏବେ ଅଷ୍ଟ୍ରେଲିଆର ଏହି ଆଇନ୍‌‌ର ଯାଞ୍ଚ କରୁଛନ୍ତି ବୋଲି ସେ କହିଛନ୍ତି। ଯଦି ଏହା କାର୍ଯ୍ୟକାରୀ ହୁଏ, ତେବେ ଆନ୍ଧ୍ର ଭାରତର ପ୍ରଥମ ରାଜ୍ୟ ଭାବେ ନାବାଳଙ୍କ ପାଇଁ ସାମାଜିକ ଗଣମାଧ୍ୟମ ନିଷିଦ୍ଧ କରିବା ନେଇ ଆଇନ୍‌‌ ଲାଗୁ କରିବ।

ପଟ୍ଟାଙ୍ଗି: ବିବାଦୀୟ କୋଟିଆ ପଞ୍ଚାୟତରେ ପୁଣି ଓଡ଼ିଶା ବିରୋଧରେ ଷଡ଼୍‌ଯନ୍ତ୍ର ଆରମ୍ଭ ହୋଇଯାଇଛି। ଆନ୍ଧ୍ରର କିଛି ଜନପ୍ରତିନିଧି ଗରିବ, ନିରୀହ ଲୋକଙ୍କୁ ମତେଇ ଫାଟୁସିନେରି ଅଞ୍ଚଳରେ ଲାଗିଥିବା ଓଡ଼ିଶା ସରକାରଙ୍କ ନାମ ଫଳକଗୁଡ଼ିକୁ ଭାଙ୍ଗି ଦେଇଛନ୍ତି। 

ସୂଚନାନୁଯାୟୀ, ଆନ୍ଧ୍ରପ୍ରଦେଶ କରିଥିବା ପଞ୍ଚାୟତ ତଥା ଫଗୁଣସିନେରି ଏବଂ ଫାଟୁସିନେରି ପଞ୍ଚାୟତର ଜନପ୍ରତିନିଧି ବେଶୁ ପାଙ୍ଗି ଏବଂ ସେମି ହିମେରିକଙ୍କ ନେତୃତ୍ୱରେ ରବିବାର ଏକ ବୈଠକ ବସିଥିଲା। ଏଥିରେ ଡୋଲିଆମ୍ୱା, ଫଗୁଣସିନେରି, ଫାଟୁସିନେରି, ହରମାଣ୍ଡେଙ୍ଗି, ମାଡକାର, ଡୋଲିଆମ୍ୱା ଆଦି ଗ୍ରାମବାସୀମାନେ ଯୋଗ ଦେଇଥିଲେ। ପରେ ସେମାନେ ଓଡ଼ିଶା ସରକାରଙ୍କ ଦ୍ୱାରା ହରମାଣ୍ଡେଙ୍ଗି ଛକ, ଡୋଲିଆମ୍ୱା ଛକ ଆଦି ସ୍ଥାନର ଲଗାଯାଇଥିବା ନାମ ଫଳକଗୁଡ଼ିକୁ ଚିରିବା ସହ ଭାଙ୍ଗି ଦେଇଥିବା ଅଭିଯୋଗ ହୋଇଛି। ଆଜି ପୁଣି ହରମାଣ୍ଡେଙ୍ଗି ଛକରେ ଆନ୍ଧ୍ର ଜନପ୍ରତିନିଧି ତଥା ବେଶୁ ପାଙ୍ଗି ଏବଂ ସେମି ହିମେରିକଙ୍କ ନେତୃତ୍ୱରେ ବିଭିନ୍ନ ଗ୍ରାମବାସୀ ଏକତ୍ରିତ ହୋଇ ପୁଣିଥରେ ବୈଠକ କରିଥିଲେ। ଆଗାମୀ ଦିନରେ ଓଡ଼ିଶା ସରକାରଙ୍କ ସମସ୍ତ ଯୋଜନାଗୁଡ଼ିକୁ ବିରୋଧ କରିବା ନିମନ୍ତେ ଏହି ବୈଠକରେ ନିଷ୍ପତ୍ତି ନିଆଯାଇଥିବା ସୂଚନା ମିଳିଛି। ଓଡ଼ିଶା ସରକାର ଏହି ଷଡ଼ଯନ୍ତ୍ରକୁ ଭଣ୍ଡୁର ନକଲେ ଆଗାମୀ ଦିନରେ କୋଟିଆ ଉପରେ ଆନ୍ଧ୍ରର କର୍ତ୍ତୃତ୍ବ ବଢ଼ିବାର ଆଶଙ୍କା ରହିଛି ବୋଲି କୁହାଯାଉଛି।

ନୂଆଦିଲ୍ଲୀ: ଆନ୍ଧ୍ରପ୍ରଦେଶରେ ନିର୍ମାଣ ହେବ ଦେଶର ପ୍ରଥମ ଇଲେକ୍ଟ୍ରିକ୍ ‘ଏୟାର ଟ୍ୟାକ୍ସି କ୍ଲଷ୍ଟର’। ଏଥିପାଇଁ ଆନ୍ଧ୍ର ସରକାର ସରଲା ଆଭିଏସନ ସହ ଏକ ଚୁକ୍ତି ସ୍ବାକ୍ଷର କରିଛନ୍ତି। ଏହି ଚୁକ୍ତି ଅନୁଯାୟୀ, ରାଜ୍ୟରେ ଇଭିଟଲ୍‌ (ଇଲେକ୍ଟ୍ରିକ୍ ଭର୍ଟିକାଲ୍ ଟେକ୍-ଅଫ୍ ଏବଂ ଲ୍ୟାଣ୍ଡିଂ) ଉତ୍ପାଦନ କାରଖାନା ପ୍ରତିଷ୍ଠା କରାଯିବ। ଏହି ପ୍ରକଳ୍ପର ନାମ ‘ସ୍କାଏ ଫ୍ୟାକ୍ଟ୍ରି’ ରଖାଯାଇଛି। ଅନନ୍ତପୁର ଜିଲ୍ଲାରେ ଏହି କ୍ଲଷ୍ଟର ନିର୍ମାଣ କରାଯିବ, ଯେଉଁଠାରେ ଇଲେକ୍ଟ୍ରିକ୍ ଏୟାର ଟ୍ୟାକ୍ସି ଭଳି ବିମାନ ନିର୍ମାଣ ହେବ। କମ୍ପାନୀ ପ୍ରଥମ ପର୍ଯ୍ୟାୟରେ ଏହି ପ୍ରକଳ୍ପରେ ୩୩୦ କୋଟି ଟଙ୍କା ନିବେଶ ଯୋଜନା ରଖିଛି। ୨୦୨୯ ସୁଦ୍ଧା ବାଣିଜ୍ୟିକ ବିମାନ ଉଡ଼ାଣ ଆରମ୍ଭ କରିବାକୁ ଲକ୍ଷ୍ୟ ରଖାଯାଇଛି। 

୧୫୦ ଏକର ଜମିରେ ପ୍ରତିଷ୍ଠା ହେବାକୁ ଥିବା ଏହି ପଦକ୍ଷେପ ଦେଶର ଗ୍ରୀନ ମୋବିଲିଟିକୁ ଆଗକୁ ବଢ଼ାଇବା ସହ ଏ କ୍ଷେତ୍ରରେ ଏହା ଏକ ଗେମ୍ ଚେଞ୍ଜର ହୋଇପାରେ। ଏଥିରେ ପ୍ରଡକ୍ସନ ଲାଇନ, ଗବେଷଣା ଏବଂ ବିକାଶ କେନ୍ଦ୍ର, କମ୍ପୋଜିଟ୍ ଲ୍ୟାବ୍ ଏବଂ ୨ କି.ମିର ରନୱେ ରହିବ, ଯେଉଁଠାରେ ଡିଜିସିଏ ପ୍ରମାଣପତ୍ର ସହ ପରୀକ୍ଷଣ କରାଯିବ। ଦ୍ୱିତୀୟ ପର୍ଯ୍ୟାୟରେ ଏଥିରେ ୧,୩୦୦ କୋଟି ଟଙ୍କା ନିବେଶ ହେବ। ଏହି ୟୁନିଟ୍‌ରେ ‘ସରଲା’ର ଫ୍ଲାଗସିପ୍ ଶୂନ୍ୟ ହାଇବ୍ରିଡ୍ ‘ଭିଟଲ୍‌’ ବିମାନ ସହ ଇଲେକ୍ଟ୍ରିକାଲ ହାର୍ନେସ୍ ସିଷ୍ଟମ୍, ଲ୍ୟାଣ୍ଡିଂ ଗିୟର୍ ଏବଂ ଉନ୍ନତ କମ୍ପୋଜିଟ୍ ଷ୍ଟ୍ରକଚର ତିଆରି କରାଯିବ। ସମ୍ପୂର୍ଣ୍ଣ କାର୍ଯ୍ୟକ୍ଷମ ହେବା ପରେ ଏହି କ୍ଲଷ୍ଟରରୁ ବାର୍ଷିକ ୧୦୦୦ଟି ପରବର୍ତ୍ତୀ ପିଢ଼ିର ବିମାନ ଉତ୍ପାଦନ କରାଯାଇପାରିବ। ଘୋଷଣାର ଦୁଇ ବର୍ଷ ମଧ୍ୟରେ ଆନ୍ଧ୍ରପ୍ରଦେଶରେ ପ୍ରଥମ ଡ୍ରୋନ୍ ଟ୍ୟାକ୍ସି ଆରମ୍ଭ ହେବ। 

ଏହି ପ୍ରକଳ୍ପ ୨୦୨୭ ସୁଦ୍ଧା ୪୦ଟି ସ୍ୱତନ୍ତ୍ର ନିଯୁକ୍ତି ଏବଂ ୧୪୦ଟି ପରୋକ୍ଷ ନିଯୁକ୍ତି ସୃଷ୍ଟି କରିବ। ଏହା ଉନ୍ନତ ଉତ୍ପାଦନ, ମହାକାଶ କ୍ଷେତ୍ରରେ ନବସୃଜନ ଏବଂ ଗ୍ରୀନ ଟେକ୍ନୋଲୋଜି କ୍ଷେତ୍ରରେ ଉଚ୍ଚ-ମୂଲ୍ୟର ନିଯୁକ୍ତି ସୃଷ୍ଟି କରିବ। ଏହି ପ୍ରକଳ୍ପ ଦ୍ବାରା ଆନ୍ଧ୍ରପ୍ରଦେଶ ଏୟାର ଟ୍ୟାକ୍ସିର ଉତ୍ପାଦନର ରାଜଧାନୀ ହେବ। ଦୀର୍ଘକାଳୀନ ହିସାବରେ ଦେଖିଲେ ବିଶାଳ ଫ୍ରାକ୍ଟ୍ରି ହଜାର ହଜାର ନିଯୁକ୍ତି ସୃଷ୍ଟି କରିବ। ଆଉ ଏହା ସ୍ଥାନୀୟ ଅର୍ଥନୀତିକୁ ବୃଦ୍ଧି କରିବ।

ଆନ୍ଧ୍ରପ୍ରଦେଶ: ଆନ୍ଧ୍ର ପ୍ରଦେଶରେ ସୁରକ୍ଷାକର୍ମୀଙ୍କ ବଡ଼ଧରଣର ଏନ୍‌କାଉଣ୍ଟର । ସୁରକ୍ଷାକର୍ମୀଙ୍କ ଏନ୍‌କାଉଣ୍ଟରରେ ୬ ମାଓବାଦୀ ନିହତ ହୋଇଛନ୍ତି । ନିହତଙ୍କ ମଧ୍ୟରେ ଜଣେ ଟପ୍ ମାଓନେତା ଥିବା ସୂଚନା । ଆଲୁରି ସୀତାରାମ ରାଜୁ ଜିଲ୍ଲା ମେରେଡୁମୁଲିରେ ସୁରକ୍ଷାକର୍ମୀ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟବେଳେ ୬ ମାଓବାଦୀ ମୃତ୍ୟୁବରଣ କରିଥିବା ସୂଚନା । ସୁରକ୍ଷାକର୍ମୀଙ୍କ ଏନ୍‌କାଉଣ୍ଟରରେ ଟପ୍ ମାଓନେତା ମାଡଭି ହିଡମାର ମୃତ୍ୟୁ ହୋଇଥିବା ନେଇ ମିଳିଛି ସୂଚନା । ବର୍ତ୍ତମାନ ବି ସେଠାରେ ବଡ଼ କମ୍ବିଂ ଅପରେସନ ଚାଲିଛି ବୋଲି କହିଛନ୍ତି ଡିଜିପି ହରିଶ କୁମାର ଗୁପ୍ତା । 

ଆନ୍ଧ୍ର ପ୍ରଦେଶ: ଆନ୍ଧ୍ର ପ୍ରଦେଶ ଶ୍ରୀକାକୁଲମରେ ଦଳାଚକଟା । ଏହି ଦଳାଚକଟାରେ ୯ ଜଣଙ୍କର ମୃତ୍ୟୁ ଘଟିଥିବା ଜଣାପଡ଼ିଛି। ଭେଙ୍କେଟେଶ୍ବର ସ୍ବାମୀ ମନ୍ଦିର ଭିତରେ ଦଳାଚକଟା ଘଟି ୯ ଜଣଙ୍କର ମୃତ୍ୟୁ ଘଟିଛି। ଏକାଦଶୀ ପର୍ବ ପାଇଁ ପ୍ରବଳ ଭିଡ଼ ଯୋଗୁଁ ଏଭଳି ଅଘଟଣ ଘଟିଛି। ଅନେକ ଶ୍ରଦ୍ଧାଳୁ ଆହତ ହୋଇଛନ୍ତି। ସେମାନଙ୍କୁ ଉଦ୍ଧାର କରାଯାଇ ସ୍ଥାନୀୟ ମେଡିକାଲ୍‌ରେ ଭର୍ତ୍ତି କରାଯାଇଛି। ଘଟଣାକୁ ନେଇ ଦୁଃଖ ପ୍ରକାଶ କଲେ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ। ଆହତଙ୍କୁ ତ୍ବରିତ ଚିକିତ୍ସା ସେବା ଯୋଗାଇବାକୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଦେଇଛନ୍ତି।