ଗୁଜୁରାଟ ପୋଲିସର ସିଆଇଡି (CID) କ୍ରାଇମ ବ୍ରାଞ୍ଚ ଏକ ବଡ଼ ଅନ୍ତର୍ଜାତୀୟ ମାନବ ଚାଲାଣ ଏବଂ ସାଇବର ଠକେଇ ର୍ୟାକେଟର ପର୍ଦ୍ଦାଫାଶ କରିଛି। ବିଦେଶରେ ଉଚ୍ଚ ବେତନର ଚାକିରି ଲୋଭ ଦେଖାଇ ଭାରତୀୟ ଯୁବକମାନଙ୍କୁ ‘ସାଇବର ଦାସତ୍ୱ’ (Cyber Slavery) ପାଇଁ ବିକ୍ରି କରୁଥିବା ଅଭିଯୋଗରେ ପୋଲିସ ଦୁଇଜଣ ଏଜେଣ୍ଟଙ୍କୁ ଗିରଫ କରିଛି। ଏହି ଘଟଣା ସମଗ୍ର ଦେଶରେ ଚର୍ଚ୍ଚାର ବିଷୟ ପାଲଟିଛି।

କିଏ ଏହି ଦୁଇ ଅଭିଯୁକ୍ତ?

ଗିରଫ ହୋଇଥିବା ଦୁଇ ଅଭିଯୁକ୍ତ ହେଲେ କୌଶିକ ପେଥାନୀ (ଅମରେଲି) ଏବଂ ଧ୍ରୁବ ଡୋବାରିୟା (ସୁରତ)। ପୋଲିସ ସୂଚନା ଅନୁଯାୟୀ, କୌଶିକ ପେଥାନୀ ସାଇବର ଅପରାଧ ଜଗତରେ ‘ଅଲି ବାବା’ ନାମରେ ପରିଚିତ ଥିଲା। ଏମାନେ ମୁଖ୍ୟତଃ ଗୁଜୁରାଟ ଏବଂ ଭାରତର ଅନ୍ୟାନ୍ୟ ରାଜ୍ୟରୁ ବେକାର ଯୁବକମାନଙ୍କୁ ଟାର୍ଗେଟ କରୁଥିଲେ।

କିପରି ଚାଲୁଥିଲା ଠକେଇର ଜାଲ?

ଏହି ଦଲାଲମାନେ ସୋସିଆଲ ମିଡିଆ (ଯେପରିକି ହ୍ୱାଟ୍ସଆପ୍ ଏବଂ ଟେଲିଗ୍ରାମ) ଜରିଆରେ ଯୁବକମାନଙ୍କ ସହ ଯୋଗାଯୋଗ କରୁଥିଲେ। ସେମାନଙ୍କୁ କାମ୍ବୋଡିଆ, ମ୍ୟାନ୍ମାର ଏବଂ ଲାଓସ୍ ଭଳି ଦେଶରେ ‘ଡାଟା ଏଣ୍ଟ୍ରି’ କିମ୍ବା ଆଇଟି କମ୍ପାନୀରେ ଚାକିରି ଦେବା ନାଁରେ ପ୍ରଲୋଭିତ କରାଯାଉଥିଲା। ବିଶ୍ୱାସ ଜନ୍ମାଇବା ପାଇଁ ସେମାନେ ନକଲି ଇଣ୍ଟରଭ୍ୟୁ ଏବଂ ଟାଇପିଂ ଟେଷ୍ଟ ମଧ୍ୟ କରାଉଥିଲେ। ପ୍ରତ୍ୟେକ ଯୁବକଙ୍କଠାରୁ ବିଦେଶ ପଠାଇବା ପାଇଁ ୭୦ ହଜାରରୁ ୧.୫ ଲକ୍ଷ ଟଙ୍କା ପର୍ଯ୍ୟନ୍ତ ଆଦାୟ କରାଯାଉଥିଲା।

ବିଦେଶ ମାଟିରେ ନର୍କ ଯନ୍ତ୍ରଣା

ଥରେ ଯୁବକମାନେ ବିଦେଶରେ ପହଞ୍ଚିବା ପରେ ସେମାନଙ୍କ ପାସପୋର୍ଟ ଏବଂ ମୋବାଇଲ୍ ଛଡ଼ାଇ ନିଆଯାଉଥିଲା। ସେମାନଙ୍କୁ ଏକ ବନ୍ଦ କୋଠରୀରେ ରଖି ଚୀନ ସାଇବର ମାଫିଆଙ୍କ ନିର୍ଦ୍ଦେଶରେ ସାଇବର ଠକେଇ କରିବାକୁ ବାଧ୍ୟ କରାଯାଉଥିଲା। ଯଦି କେହି ଏହି ଅପରାଧ କରିବାକୁ ମନା କରୁଥିଲେ, ତେବେ ସେମାନଙ୍କୁ ଶାରୀରିକ ଏବଂ ମାନସିକ ନିର୍ଯାତନା ଦିଆଯାଉଥିଲା। ଏହି ଯୁବକମାନଙ୍କୁ ବ୍ୟବହାର କରି ଭାରତୀୟ ନାଗରିକଙ୍କ ସହ କ୍ରିପ୍ଟୋକରେନ୍ସି ଠକେଇ ଏବଂ ଡିଜିଟାଲ ଆରେଷ୍ଟ ଭଳି ଅପରାଧ କରାଯାଉଥିଲା।

ପୋଲିସର କାର୍ଯ୍ୟାନୁଷ୍ଠାନ

ଗୁଜୁରାଟ ସାଇବର ସେଣ୍ଟର ଅଫ୍ ଏକ୍ସିଲେନ୍ସର ଏସପି ବିବେକ ଭେଡା କହିଛନ୍ତି ଯେ, ଗୁଇନ୍ଦା ସୂଚନା ଆଧାରରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହି ର୍ୟାକେଟର ଚେର ଆହୁରି ଗଭୀରକୁ ଯାଇଥିବା ଆଶଙ୍କା କରାଯାଉଛି ଏବଂ ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ତଦନ୍ତ ଜାରି ରହିଛି। ପୋଲିସ ଜନସାଧାରଣଙ୍କୁ ସତର୍କ କରାଇ କହିଛି ଯେ, ବିଦେଶରେ ଚାକିରି ନାଁରେ ଆସୁଥିବା ଏଭଳି ପ୍ରଲୋଭନରୁ ଦୂରେଇ ରୁହନ୍ତୁ।

ନୂଆଦିଲ୍ଲୀ: ଥାଇଲ୍ୟାଣ୍ଡ ଏବଂ କାମ୍ବୋଡିଆ ମଧ୍ୟରେ ଚାଲିଥିବା ସୀମା ବିବାଦ ମଧ୍ୟରେ ଏକ ପ୍ରାଚୀନ ହିନ୍ଦୁ ଦେବତାଙ୍କ ମୂର୍ତ୍ତି ଭାଙ୍ଗିବା ଘଟଣାକୁ ଭାରତ କଡ଼ା ନିନ୍ଦା କରିଛି। ଭାରତୀୟ ବୈଦେଶିକ ବ୍ୟାପାର ମନ୍ତ୍ରଣାଳୟ ସ୍ପଷ୍ଟ କରିଛି ଯେ, ସୀମା ଦାବି ସତ୍ତ୍ୱେ ଏଭଳି ଅପମାନଜନକ କାର୍ଯ୍ୟ ବିଶ୍ୱବ୍ୟାପୀ ଅନୁଗାମୀମାନଙ୍କ ଧାର୍ମିକ ଭାବନାକୁ ଆଘାତ ଦେଇଥାଏ ଏବଂ ଏଭଳି ଘଟଣା ଘଟିବା ଆଦୌ ଉଚିତ ନୁହେଁ।

ମନ୍ତ୍ରଣାଳୟ ଏକ ବିବୃତ୍ତି ଜାରି କରି କହିଛି ଯେ, "ହିନ୍ଦୁ ଏବଂ ବୌଦ୍ଧ ଦେବଦେବୀମାନେ ଏହି ଅଞ୍ଚଳର ଲୋକମାନଙ୍କ ଦ୍ୱାରା ଗଭୀର ଭାବରେ ପୂଜା ପାଆନ୍ତି। ଏହା ଆମର ସାଝା ସାଂସ୍କୃତିକ ଐତିହ୍ୟର ଏକ ଅବିଚ୍ଛେଦ୍ୟ ଅଙ୍ଗ।" ଏଭଳି ପରିସ୍ଥିତିରେ ଐତିହ୍ୟ ଉପରେ ଆକ୍ରମଣ ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ଭାରତ ଦର୍ଶାଇଛି।

ଏହି ବିବାଦର ସମାଧାନ ପାଇଁ ଭାରତ ଉଭୟ ଥାଇଲ୍ୟାଣ୍ଡ ଏବଂ କାମ୍ବୋଡିଆକୁ ପୁନର୍ବାର ଆଲୋଚନା ଏବଂ କୂଟନୈତିକ ମାର୍ଗ ଆପଣାଇବାକୁ ଅନୁରୋଧ କରିଛି। ଶାନ୍ତି ଫେରାଇ ଆଣିବା ସହ ଜୀବନ, ସମ୍ପତ୍ତି ଏବଂ ଐତିହ୍ୟର ଆଉ ଯେପରି କୌଣସି କ୍ଷତି ନହୁଏ, ସେଥିପାଇଁ ଉଭୟ ପକ୍ଷ ଯତ୍ନବାନ ହେବା ଆବଶ୍ୟକ ବୋଲି ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ କୁହାଯାଇଛି।

ମୁମ୍ବଇ: ଭାରତରେ ବ୍ୟବସାୟୀଙ୍କୁ ସହଜରେ କୋଟି କୋଟି ଟଙ୍କା ଋଣ ମିଳିଯାଉଛି। ଆଉ କିଛି ବ୍ୟବସାୟୀ ଅନେକ ବ୍ୟାଙ୍କରୁ ହଜାର ହଜାର କୋଟି ଟଙ୍କା ଧରି ବିଦେଶ ପଳାଉ ଥିବା ନଜିର ରହିଛି। ମାତ୍ର ଦେଶରେ ଗରିବ ଚାଷୀଙ୍କୁ ଲକ୍ଷେ ଟଙ୍କା ଋଣ ମିଳିବା ବି କଷ୍ଟ ହେଇଯାଉଛି। ଆଉ ଚାଷ ପାଇଁ  ହାତ ଉଧାରି କରି ସାହୁକାରଙ୍କଠୁ ଟଙ୍କା ଆଣିଲେ ତାର ସୁଧ ଦେଇ ଦେଇ ଚାଷୀର ଆର୍ଥିକ ସ୍ଥିତି ବିଗିଡ଼ି ଯାଉଛି। ଶେଷରେ ଚାଷୀ ନିଜ ଭିଟାମାଟି ସହିତ ଅଙ୍ଗପ୍ରତ୍ୟଙ୍ଗ ବିକିଲେ ବି ଏହି ଋଣ ପରିଶୋଧ କରିପାରୁନି। ମହାରାଷ୍ଟ୍ରର ଚନ୍ଦ୍ରପୁର ଜିଲ୍ଲାର ଚାଷୀ ରୋଶନ ସଦାଶିବ କୁଡେଙ୍କ କ୍ଷେତ୍ରରେ ଏଭଳି ଘଟଣା ଘଟିଛି। କିଛି ବର୍ଷ ହେଲା ଚାଷରେ କ୍ଷତି ହେବାରୁ ସେ ଗୋପାଳନ କରି ଡାଏରୀ ବେପାର କରିବାକୁ ଚାହୁଁଥିଲେ। ମାତ୍ର ବ୍ୟାଙ୍କ ଋଣ ନ ଦେବାରୁ ସେ ଅନେକ ସାହୁକାରଙ୍କଠାରୁ ଲକ୍ଷେ ଟଙ୍କା ଆଣିଥିଲେ। କିନ୍ତୁ ଏ ବାବଦ ସୁଧ ତାଙ୍କ ଉପରେ ଦାଉ ସାଧିଥିଲା।  ଦିନକୁ ୧୦ ହଜାର ଟଙ୍କାର ସୁଧ ପାଇଁ ଋଣ ରାଶି ୭୪ ଲକ୍ଷ ଟଙ୍କାରେ ପହଞ୍ଚି ଯାଇଥିଲା। ଏଥିପାଇଁ ସେ କିଡ୍‌ନୀ ବିକିବାକୁ ବାଧ୍ୟ ହୋଇଥିଲେ। ସଦାଶିବ କୋଲକାତାରୁ କାମ୍ବୋଡିଆ ଯାଇ ନିଜ କିଡନୀ ବିକ୍ରି କରିଥିଲେ। 

ସୂଚନା ଅନୁଯାୟୀ, ବର୍ଷା ନ ହେବାରୁ ଡାଏରୀ ବ୍ୟବସାୟୀ ପାଇଁ ସଦାଶିବ ଅଣ୍ଟା ଭିଡ଼ିଥିଲେ। ମାତ୍ର ବ୍ୟବସାୟ ଆରମ୍ଭ ହେଉ ହେଉ ସେ କିଣିଥିବା ଗାଈ ମରି ଯାଇଥିଲା। ଯେଉଁ ଫସଲ କରିଥିଲେ ତାହା ନଷ୍ଟ ହୋଇ ଯାଇଥିଲା। ଋଣ ଭାର ବଢ଼ିବାରେ ଲାଗିଥିଲା ଏବଂ ଋଣଦାତା ଚାପ ପକାଇବାରେ ଲାଗିଥିଲେ। ଜମି, ଟ୍ରାକ୍ଟର ଏବଂ ଘରବାଡ଼ି ବିକିବା ସତ୍ତ୍ବେ ଟଙ୍କା ସୁଝି ପାରି ନ ଥିଲେ। ଏହି ସମୟରେ ଜଣେ ଋଣଦାତା ତାଙ୍କୁ କିଡନୀ ବିକିବାକୁ ପରାମର୍ଶ ଦେଇଥିଲେ। ପରେ ସେ ଜଣେ ଏଜେଣ୍ଟଙ୍କ ମାଧ୍ୟମରେ କୋଲକାତାରେ ବିଭିନ୍ନ ପରୀକ୍ଷାନିରୀକ୍ଷା କରି କାମ୍ବୋଡିଆ ଯାଇ କିଡ୍‌ନୀ ଦେଇଥିଲେ। ଏହି କିଡ୍‌ନୀକୁ ୮ ଲକ୍ଷ ଟଙ୍କାରେ ବିକ୍ରି କରାଯାଇଥିଲା। ଋଣ ପରିମାଣ ସୁଝିବା ସତ୍ତ୍ବେ ଚଢ଼ା ସୁଧ ନେବା ପାଇଁ ବ୍ରହ୍ମପୁର ସହରର କିଶୋର ବାୱାନକୁଲେ, ମନୀଷ କଲବାନ୍ଦେ, ଲକ୍ଷ୍ମଣ ଉରୁକୁଡେ, ପ୍ରଦୀପ ବାୱାନକୁଲେ, ସଞ୍ଜୟ ବାଲାପୁରେ ଏବଂ ଲକ୍ଷ୍ମଣ ବୋର୍କାର ତାଙ୍କ ଉପରେ ଚାପ ପକାଇ ଥିଲେ। 

କୁଡେ ଦାବି କରିଛନ୍ତି ଯେ ଅଭିଯୋଗ ସତ୍ତ୍ୱେ ପୁଲିସ କୌଣସି କାର୍ଯ୍ୟାନୁଷ୍ଠାନ ନେଇନାହିଁ। ଏହା ତାଙ୍କ ମାନସିକ ଏବଂ ଶାରୀରିକ ଯନ୍ତ୍ରଣାକୁ ଆହୁରି ବଢ଼ାଇ ଦେଇଛି। ଯଦି ନ୍ୟାୟ ନ ମିଳେ ତେବେ ସେ ଏବଂ ତାଙ୍କ ପରିବାର ରାଜ୍ୟ ସରକାରଙ୍କ ମୁଖ୍ୟାଳୟ ମୁମ୍ବଇର ମନ୍ତ୍ରଣାଳୟ ସମ୍ମୁଖରେ ଆତ୍ମଦାହ କରିବେ ବୋଲି ସଦାଶିବ ଧମକ ଦେଇଛନ୍ତି।