ବେଦାନ୍ତ ଡିମର୍ଜର (Vedanta Demerger) ପରେ ଗ୍ରୁପର ଚେୟାରମ୍ୟାନ ଅନିଲ ଅଗ୍ରୱାଲ (Anil Agarwal) ଏକ ବଡ଼ ଘୋଷଣା କରିଛନ୍ତି। ସୋମବାର ଦିନ ଷ୍ଟକ୍ ମାର୍କେଟରେ ୪ଟି ନୂଆ କମ୍ପାନୀର ଲିଷ୍ଟିଂ ଅବସରରେ ଶ୍ରୀ ଅଗ୍ରୱାଲ କହିଛନ୍ତି ଯେ, ବେଦାନ୍ତର ପ୍ରତ୍ୟେକ ବ୍ୟବସାୟର ମୂଲ୍ୟ ଆଗାମୀ ଦିନରେ ଖୁବ୍‌ଶୀଘ୍ର ୧୦୦ ବିଲିୟନ ଡଲାର (100 Billion Dollar) ଛୁଇଁବାର କ୍ଷମତା ରଖିଛି। ଭାରତରେ ଥିବା ବିପୁଳ ସୁଯୋଗକୁ ଦୃଷ୍ଟିରେ ରଖି କମ୍ପାନୀ ଏହି ମାଇଲଖୁଣ୍ଟ ହାସଲ କରିବା ନେଇ ସେ ଆଶାବ୍ୟକ୍ତ କରିଛନ୍ତି।

୫ଟି ସ୍ୱାଧୀନ କମ୍ପାନୀରେ ବିଭକ୍ତ ହେଲା ବେଦାନ୍ତ

ଗତବର୍ଷ ଘୋଷଣା କରାଯାଇଥିବା ଡିମର୍ଜର ପ୍ରକ୍ରିୟା ଶେଷ ହେବା ପରେ ବେଦାନ୍ତ ଗ୍ରୁପ୍ ଏବେ ୫ଟି ସ୍ୱାଧୀନ ଏବଂ ଲିଷ୍ଟେଡ୍ କମ୍ପାନୀରେ ପରିଣତ ହୋଇଛି। ମୂଳ କମ୍ପାନୀ ବେଦାନ୍ତ ଲିମିଟେଡ୍ (Vedanta Limited) ବ୍ୟତୀତ ଅନ୍ୟ ୪ଟି କମ୍ପାନୀ ଯଥା- ବେଦାନ୍ତ ଆଲୁମିନିୟମ (Vedanta Aluminium), ବେଦାନ୍ତ ଆଇରନ୍ ଆଣ୍ଡ ଷ୍ଟିଲ୍ (Vedanta Iron & Steel), ବେଦାନ୍ତ ଅଏଲ୍ ଆଣ୍ଡ ଗ୍ୟାସ୍ (Vedanta Oil & Gas) ଏବଂ ବେଦାନ୍ତ ପାୱାର୍ (Vedanta Power) ସେୟାର ବଜାରରେ ଲିଷ୍ଟ୍ ହୋଇଛନ୍ତି। ଶ୍ରୀ ଅଗ୍ରୱାଲଙ୍କ ଅନୁଯାୟୀ, ଏହି ୫ଟି ଯାକ ସେକ୍ଟରରେ ବିପୁଳ ସମ୍ଭାବନା ରହିଛି ଏବଂ ସେଗୁଡିକ ଭବିଷ୍ୟତରେ ନିଜ ନିଜ କ୍ଷେତ୍ରରେ ବିଶ୍ୱସ୍ତରୀୟ ଲିଡର୍ ହେବାକୁ ଯାଉଛନ୍ତି।

ଭାରତରେ ୨୦ ବିଲିୟନ ଡଲାରର ବିଶାଳ ନିବେଶ

ଶେୟାରଧାରକମାନଙ୍କୁ ସମ୍ବୋଧିତ କରି ଶ୍ରୀ ଅଗ୍ରୱାଲ କହିଛନ୍ତି ଯେ, ଭାରତର ଅର୍ଥନୀତି ଦ୍ରୁତ ଗତିରେ ବୃଦ୍ଧି ପାଉଛି ଏବଂ ଆଗାମୀ ଦିନରେ ଏଆଇ (AI) ତଥା ଶକ୍ତି କ୍ଷେତ୍ର (Energy Transition) ପାଇଁ ଖଣିଜ ଦ୍ରବ୍ୟ ଓ ତୈଳର ଆବଶ୍ୟକତା ଯଥେଷ୍ଟ ବଢିବ। ଏହି ଚାହିଦାକୁ ପୂରଣ କରିବା ପାଇଁ ବେଦାନ୍ତ ଗ୍ରୁପ୍ ଆସନ୍ତା ୩ ରୁ ୫ ବର୍ଷ ମଧ୍ୟରେ ଭାରତରେ ପ୍ରାୟ ୨୦ ବିଲିୟନ ଡଲାର (୨୦୦୦ କୋଟି ଡଲାର) ନିବେଶ କରିବାକୁ ଲକ୍ଷ୍ୟ ରଖିଛି। ଭାରତ ନିଜର ପ୍ରାକୃତିକ ସମ୍ପଦ ଆବଶ୍ୟକତାର ୫୦% ଆମଦାନୀ କରୁଥିବା ବେଳେ, ଦେଶରେ ଥିବା ଥୋରିୟମର ବିପୁଳ ଭଣ୍ଡାର (Thorium deposits) କୁ ବ୍ୟବହାର କରି ଆଗାମୀ ଦିନରେ ଆତ୍ମନିର୍ଭରଶୀଳ ହେବାକୁ ପଡିବ ବୋଲି ସେ ମତ ଦେଇଛନ୍ତି। ପରମାଣୁ ଶକ୍ତି କ୍ଷେତ୍ରରେ ମଧ୍ୟ ବେଦାନ୍ତ ୨୦,୦୦୦ ମେଗାୱାଟ୍ (20,000 MW) ବିଦ୍ୟୁତ୍ ଉତ୍ପାଦନ କରିବାକୁ ଦୀର୍ଘକାଳୀନ ଯୋଜନା ପ୍ରସ୍ତୁତ କରିଛି।

ନିବେଶକଙ୍କ ପାଇଁ ଲାଭ ଏବଂ ବଜାର ସ୍ଥିତି

ଶ୍ରୀ ଅଗ୍ରୱାଲ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ କମ୍ପାନୀ ପାଇଁ ନିବେଶକମାନଙ୍କ ସ୍ୱାର୍ଥ ସର୍ବୋପରି। ଗତ ୫ ବର୍ଷ ମଧ୍ୟରେ ବେଦାନ୍ତ ଆପଣା ଶେୟାରଧାରକମାନଙ୍କୁ ୩୦୦% ରିଟର୍ଣ୍ଣ ଦେବାରେ ସଫଳ ହୋଇଛି। ଏଥିସହିତ କମ୍ପାନୀ ଲଗାତାର ବଡ଼ ଧରଣର ଡିଭିଡେଣ୍ଡ୍ (୫୫% ଡିଭିଡେଣ୍ଡ୍ ୟିଲ୍ଡ) ପ୍ରଦାନ କରିଆସୁଛି।

ଅନ୍ୟପକ୍ଷରେ ସୋମବାର ନୂଆ କମ୍ପାନୀଗୁଡ଼ିକର ସେୟାର ମାର୍କେଟରେ ମିଶ୍ରିତ ପ୍ରତିକ୍ରିୟା ଦେଖିବାକୁ ମିଳିଛି। ଲିଷ୍ଟିଂର ପ୍ରଥମ ଦିନରେ ବେଦାନ୍ତ ପାୱାର୍ (Vedanta Power) ର ସେୟାର ମୂଲ୍ୟ ୫% ବୃଦ୍ଧି ପାଇଥିବା ବେଳେ, ଅନ୍ୟ କମ୍ପାନୀଗୁଡ଼ିକ ଯଥା ଆଲୁମିନିୟମ୍, ଅଏଲ୍ ଆଣ୍ଡ ଗ୍ୟାସ୍ ଏବଂ ଆଇରନ୍ ଆଣ୍ଡ ଷ୍ଟିଲ୍ ର ସେୟାର ମୂଲ୍ୟରେ ପ୍ରାମ୍ଭିକ ହ୍ରାସ (Lower Circuit) ଦେଖିବାକୁ ମିଳିଥିଲା। ତଥାପି, ଦୀର୍ଘକାଳୀନ ଅବଧିରେ ଏହି ଡିମର୍ଜର ପ୍ରକ୍ରିୟା କମ୍ପାନୀ ଏବଂ ଶେୟାରଧାରକଙ୍କ ପାଇଁ ବିପୁଳ ମୂଲ୍ୟ ସୃଷ୍ଟି କରିବ ବୋଲି ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି।

ବିଶ୍ୱ ବଜାରରେ ଅଶୋଧିତ ତୈଳ (Crude Oil) ଦରରେ ଆଗାମୀ ଦିନରେ ବଡ଼ ଧରଣର ହ୍ରାସ ଘଟିପାରେ। ଗ୍ଲୋବାଲ୍ ରେଟିଂ ଏଜେନ୍ସି ଫିଚ୍ ରେଟିଂସ୍ (Fitch Ratings) ପକ୍ଷରୁ ଜାରି କରାଯାଇଥିବା ଏକ ନୂତନ ରିପୋର୍ଟରେ ଏହି ପୂର୍ବାନୁମାନ କରାଯାଇଛି। ରିପୋର୍ଟ ଅନୁଯାୟୀ, ଦୀର୍ଘ ଦିନ ଧରି ବନ୍ଦ ରହିଥିବା ହୋରମୁଜ୍ ପ୍ରଣାଳୀ (Strait of Hormuz) ଜୁଲାଇ ୨୦୨୬ ଶେଷ ସୁଦ୍ଧା ପୁଣିଥରେ ଖୋଲିବାର ସମ୍ଭାବନା ରହିଛି। ଏହା ଖୋଲିବା ମାତ୍ରେ ତୈଳ ଏବଂ ଗ୍ୟାସ୍ ଯୋଗାଣ ଶୃଙ୍ଖଳାରେ ଥିବା ବାଧା ଦୂର ହେବ ଏବଂ ତୈଳ ଦର ତୀବ୍ର ଗତିରେ ତଳକୁ ଖସିବ।

ହୋରମୁଜ୍ ପ୍ରଣାଳୀ ଖୋଲିବା ଏବଂ ବଜାର ଉପରେ ପ୍ରଭାବ

ଫିଚ୍ ରେଟିଂସ୍ ଅନୁଯାୟୀ, ହୋରମୁଜ୍ ପ୍ରଣାଳୀ ବନ୍ଦ ରହିବା କାରଣରୁ ଯୋଗାଣ ବ୍ୟବସ୍ଥାରେ ଏକ ବଡ଼ ଧରଣର ଝଟକା ଲାଗିଥିଲା, ଯାହା ଫଳରେ ଅଶୋଧିତ ତୈଳ ଦର ବୃଦ୍ଧି ପାଇଥିଲା। ତେବେ ଏହା ଏକ ଅସ୍ଥାୟୀ ସମସ୍ୟା ଏବଂ ବଜାରର ଦୀର୍ଘକାଳୀନ ଦିଗକୁ ଏହା ବଦଳାଇ ପାରିବ ନାହିଁ ବୋଲି ଏଜେନ୍ସି କହିଛି। ଜୁଲାଇ ୨୦୨୬ ସୁଦ୍ଧା ଏହି ପ୍ରଣାଳୀ ଖୋଲିବା ନେଇ ଏଜେନ୍ସି ଦୃଢ଼ ଆଶାବ୍ୟକ୍ତ କରିଛି। ଏହା ଫଳରେ ମଧ୍ୟପ୍ରାଚ୍ୟରେ ତୈଳ ଉତ୍ପାଦନ ସ୍ୱାଭାବିକ ହେବା ସହ ବିଶ୍ୱ ବଜାରରେ ପୁଣିଥରେ ଆବଶ୍ୟକତା ଠାରୁ ଅଧିକ ତୈଳ ଉପଲବ୍ଧ (Oversupply) ହେବ।

ବ୍ୟାରେଲ୍ ପିଛା ୭୦ ଡଲାରକୁ ଖସିବ ଦର

ବର୍ତ୍ତମାନ ହୋରମୁଜ୍ ପ୍ରଣାଳୀ ବନ୍ଦ ଥିବା ସମୟରେ (ଜୁନ୍-ଜୁଲାଇ ମାସରେ) ବ୍ରେଣ୍ଟ୍ କ୍ରୁଡ୍ ଦର ବ୍ୟାରେଲ୍ ପିଛା ୧୦୦ ରୁ ୧୧୦ ଡଲାର ମଧ୍ୟରେ ରହିବାର ଅନୁମାନ କରାଯାଇଛି। କିନ୍ତୁ ପ୍ରଣାଳୀ ଖୋଲିବା ପରେ, ସେପ୍ଟେମ୍ବର ମାସ ସୁଦ୍ଧା ଏହି ଦର ଖସିଆସି ବ୍ୟାରେଲ୍ ପିଛା ୭୦ ଡଲାରରେ ପହଞ୍ଚିଯିବ ବୋଲି ଫିଚ୍ ରେଟିଂସ୍ ପୂର୍ବାନୁମାନ କରିଛି। ଏହା ସହିତ ୨୦୨୬ ବର୍ଷ ପାଇଁ ବ୍ରେଣ୍ଟ୍ କ୍ରୁଡର ହାରାହାରି ଦର ବ୍ୟାରେଲ୍ ପିଛା ୮୭ ଡଲାର ରହିବ ବୋଲି ଏଜେନ୍ସି ଆକଳନ କରିଛି।

ଉତ୍ପାଦନରେ ଆସିବ ତୀବ୍ରତା

ରିପୋର୍ଟରେ ଏହା ମଧ୍ୟ ଦର୍ଶାଯାଇଛି ଯେ, ଯୋଗାଣ ବାଧାପ୍ରାପ୍ତ ହୋଇଥିଲେ ମଧ୍ୟ ତୈଳ ଭିତ୍ତିଭୂମିର କୌଣସି ବିଶେଷ କ୍ଷତି ହୋଇନାହିଁ। ତେଣୁ ହୋରମୁଜ୍ ପ୍ରଣାଳୀ ଖୋଲିବାର କିଛି ସପ୍ତାହ ମଧ୍ୟରେ ଓପେକ୍ (OPEC) ଏବଂ ନନ୍-ଓପେକ୍ ଦେଶଗୁଡ଼ିକ ନିଜର ଉତ୍ପାଦନ କ୍ଷମତାକୁ ସମ୍ପୂର୍ଣ୍ଣ ସ୍ତରକୁ ନେଇଆସିବେ। ଏହାଦ୍ୱାରା ୨୦୨୬ ର ଚତୁର୍ଥ ତ୍ରୈମାସିକ ବେଳକୁ ବଜାରରେ ତୈଳର ବଳକା ସ୍ଥିତି ସୃଷ୍ଟି ହେବ ଏବଂ ଗ୍ରାହକଙ୍କୁ ଦରଦାମ୍ ହ୍ରାସର ବଡ଼ ଆଶ୍ୱସ୍ତି ମିଳିବ।

ଦେଶର ଜଣାଶୁଣା ଉଦ୍ୟୋଗପତି ତଥା 'ଶାଦି ଡଟ୍ କମ୍' (Shaadi.com) ର ପ୍ରତିଷ୍ଠାତା ଅନୁପମ ମିତ୍ତଲ କର୍ମଚାରୀମାନଙ୍କ ଦରମାକୁ ନେଇ ଏକ ବଡ଼ ପରାମର୍ଶ ଦେଇଛନ୍ତି। ସାର୍କ ଟ୍ୟାଙ୍କ ଇଣ୍ଡିଆ (Shark Tank India) ର ବିଚାରକ ଭାବେ ବେଶ୍ ଲୋକପ୍ରିୟତା ହାସଲ କରିଥିବା ଅନୁପମ, କମ୍ପାନୀଗୁଡ଼ିକୁ କର୍ମଚାରୀଙ୍କ ଦରମା ଦେବାର ପୁରୁଣା ପଦ୍ଧତିରେ ପରିବର୍ତ୍ତନ ଆଣିବାକୁ ଅପିଲ କରିଛନ୍ତି। ସେ କହିଛନ୍ତି ଯେ, କର୍ମଚାରୀଙ୍କୁ ମାସ ଶେଷରେ ନୁହେଁ, ବରଂ ମାସକୁ ଦୁଇଥର ଦରମା ଦିଆଯିବା ଉଚିତ୍।

ବ୍ରିଟିଶ୍ ଅମଳର ନିୟମ ବନ୍ଦ ହେଉ

ନିଜର ଏକ ଲିଙ୍କଡଇନ୍ (LinkedIn) ପୋଷ୍ଟରେ ଅନୁପମ ଉଲ୍ଲେଖ କରିଛନ୍ତି ଯେ, ବର୍ତ୍ତମାନ ସମୟରେ ଅନେକ କମ୍ପାନୀ କର୍ମଚାରୀମାନଙ୍କୁ ଆକୃଷ୍ଟ କରିବା ପାଇଁ ଅଧିକ ଛୁଟି, ମାଗଣା ଖାଦ୍ୟ ଏବଂ ରିମୋଟ୍ ୱାର୍କ ବା ୱାର୍କ ଫ୍ରମ୍ ହୋମ୍ (WFH) ଭଳି ସୁବିଧା ପ୍ରଦାନ କରୁଛନ୍ତି। କିନ୍ତୁ ସେମାନେ କର୍ମଚାରୀଙ୍କ ସବୁଠାରୁ ଗୁରୁତ୍ୱପୂର୍ଣ୍ଣ ଆବଶ୍ୟକତା 'ସମୟରେ ଦରମା'କୁ ଅଣଦେଖା କରିଦେଉଛନ୍ତି। ତାଙ୍କ ମତରେ ଏବେ ବି କମ୍ପାନୀଗୁଡ଼ିକ ବ୍ରିଟିଶ୍ ଅମଳର ଦରମା ବ୍ୟବସ୍ଥା ଆପଣାଉଛନ୍ତି, ଯେଉଁଠି ଗୋଟିଏ ମାସର ଦରମା ପରବର୍ତ୍ତୀ ମାସର ୭ ତାରିଖ କିମ୍ବା ୧ରୁ ୪ ତାରିଖ ମଧ୍ୟରେ ଦିଆଯାଉଛି। ଏହି ପୁରୁଣା ବ୍ୟବସ୍ଥାକୁ ତୁରନ୍ତ ବନ୍ଦ କରାଯିବା ଆବଶ୍ୟକ ବୋଲି ସେ ଯୁକ୍ତି ବାଢ଼ିଛନ୍ତି।

ମାସକୁ ଦୁଇଥର ମିଳୁ ଦରମା

ଅନୁପମ ପରାମର୍ଶ ଦେଇଛନ୍ତି ଯେ କର୍ମଚାରୀମାନଙ୍କୁ ପ୍ରତି ମାସର ୧୫ ତାରିଖ ଏବଂ ୩୦ ତାରିଖରେ ଦୁଇଟି କିସ୍ତିରେ ଦରମା ଦିଆଯିବା ଦରକାର। ଏହା ଦ୍ୱାରା କର୍ମଚାରୀମାନେ ନିଜର ଆର୍ଥିକ ସ୍ଥିତିକୁ ସୁଦୃଢ଼ କରିପାରିବେ ଏବଂ "କ୍ୟାସ୍ ଫ୍ଲୋ" (ନଗଦ ପ୍ରବାହ) ସେମାନଙ୍କର ସମ୍ମାନ ବଜାୟ ରଖିବାରେ ସାହାଯ୍ୟ କରିବ। ସେ ନିଜ କମ୍ପାନୀ ଶାଦି ଡଟ୍ କମ୍ ର ଉଦାହରଣ ଦେଇ କହିଛନ୍ତି ଯେ, କିଛି ବର୍ଷ ପୂର୍ବେ ତାଙ୍କ କମ୍ପାନୀରେ ଏହି ନିୟମ ଲାଗୁ କରାଯାଇଥିଲା ଯେ ଦରମା ପରବର୍ତ୍ତୀ ମାସରେ ନୁହେଁ, ବରଂ ଚାଲୁଥିବା ମାସର ଶେଷ ଦିନରେ ହିଁ ପ୍ରଦାନ କରାଯିବ। ସେ ଏହାକୁ କୌଣସି "ପର୍କ" (ବୋନସ୍ ସୁବିଧା) ନୁହେଁ, ବରଂ "କମନ୍ ସେନ୍ସ" ବା ସାଧାରଣ ଜ୍ଞାନ ବୋଲି ବର୍ଣ୍ଣନା କରିଛନ୍ତି।

କର୍ମଚାରୀଙ୍କ ଉପରେ କି ପ୍ରଭାବ ପଡ଼ିବ?

ଦରମା ମିଳିବାରେ ବିଳମ୍ବ ହେଲେ କର୍ମଚାରୀଙ୍କ ଉପରେ କି ପ୍ରକାର ପ୍ରଭାବ ପଡ଼େ, ସେ ବିଷୟରେ ମଧ୍ୟ ଅନୁପମ ବୁଝାଇଛନ୍ତି। ତାଙ୍କ ମତରେ, ଆକାଉଣ୍ଟିଂ ବିଭାଗ ପାଇଁ ହୁଏତ ଦରମା ଗୋଟିଏ ସପ୍ତାହ ବିଳମ୍ବ ହେବା ସାଧାରଣ କଥା ହୋଇପାରେ, କିନ୍ତୁ ଜଣେ କର୍ମଚାରୀ ପାଇଁ ଏହା ଏକ ବଡ଼ ସମସ୍ୟା ସୃଷ୍ଟି କରିଥାଏ। ଦରମା ବିଳମ୍ବ ହେଲେ କର୍ମଚାରୀଙ୍କର ଇଏମ୍ଆଇ (EMI) ବାଉନ୍ସ ହେବାର ଆଶଙ୍କା ଥାଏ ଏବଂ ଘରଭଡ଼ା ଦେବାରେ ସମସ୍ୟା ଉପୁଜିଥାଏ। ମାସକୁ ଦୁଇଥର ଦରମା ମିଳିଲେ ଲୋକଙ୍କୁ ଧାରକରଜ କରିବାକୁ ପଡ଼ିବ ନାହିଁ ଏବଂ ଅର୍ଥନୈତିକ କାର୍ଯ୍ୟକଳାପ ମଧ୍ୟ ବୃଦ୍ଧି ପାଇବ ବୋଲି ସେ ଆଶାବ୍ୟକ୍ତ କରିଛନ୍ତି। ଆଧୁନିକ ଜ୍ଞାନକୌଶଳ ଯୁଗରେ ପେ-ରୋଲ୍ ପ୍ରକ୍ରିୟାରେ ଏଭଳି ପରିବର୍ତ୍ତନ କରିବା କୌଣସି ରକେଟ୍ ସାଇନ୍ସ ନୁହେଁ ବୋଲି ଅନୁପମ ଦୃଢ଼ୋକ୍ତି ପ୍ରକାଶ କରିଛନ୍ତି।

ଜୁନ୍ ମାସର ଆରମ୍ଭରୁ ସାଧାରଣ ଜନତାଙ୍କ ଉପରେ ପୁଣି ଥରେ ମହଙ୍ଗା ମାଡ଼ ହୋଇଛି। ତୈଳ କମ୍ପାନୀଗୁଡ଼ିକ ୧ ଜୁନ୍ ୨୦୨୬ ରୁ ୧୯ କେଜି ବ୍ୟବସାୟିକ ଏଲପିଜି ସିଲିଣ୍ଡର (Commercial LPG Cylinder) ର ଦରରେ ବୃଦ୍ଧି କରିଛନ୍ତି। ନୂଆ ଦର ଲାଗୁ ହେବା ପରେ ଦିଲ୍ଲୀରେ ଗୋଟିଏ ବ୍ୟବସାୟିକ ସିଲିଣ୍ଡର ପିଛା ଦର ୪୨ ଟଙ୍କା ବୃଦ୍ଧି ପାଇଛି।

ମିଳିଥିବା ସୂଚନା ଅନୁଯାୟୀ, ଦିଲ୍ଲୀରେ ବ୍ୟବସାୟିକ ସିଲିଣ୍ଡରର ନୂତନ ଦର ଏବେ ୩୧୧୩.୫୦ ଟଙ୍କା ରେ ପହଞ୍ଚିଛି। ସେହିପରି କୋଲକାତାରେ ଏହା ୫୩.୫୦ ଟଙ୍କା ବଢ଼ି ୩୨୫୫.୫୦ ଟଙ୍କା ହୋଇଛି। ଅନ୍ୟ ମହାନଗର ଗୁଡ଼ିକରେ ମଧ୍ୟ ଏହି ବୃଦ୍ଧି ଦେଖିବାକୁ ମିଳିଛି। ମୁମ୍ବାଇରେ ଏବେ ଏହା ୩୦୨୪.୫୦ ଟଙ୍କା ଏବଂ ଚେନ୍ନାଇରେ ୩୨୩୨ ଟଙ୍କା ରହିଛି। ଏହା ବ୍ୟତୀତ ୫ କେଜି (FTL) ଛୋଟ ସିଲିଣ୍ଡର ଦର ମଧ୍ୟ ୧୧ ଟଙ୍କା ବଢ଼ି ଦିଲ୍ଲୀରେ ୮୨୧.୫୦ ଟଙ୍କା ହୋଇଛି।

ଲଗାତାର ସପ୍ତମ ଥର ପାଇଁ ବୃଦ୍ଧି

ଚଳିତ ବର୍ଷ ଜାନୁଆରୀ ମାସରୁ ବ୍ୟବସାୟିକ ଗ୍ୟାସ ସିଲିଣ୍ଡର ଦର ଲଗାତାର ବଢ଼ିବାରେ ଲାଗିଛି। ଏହି ବର୍ଷ ଏହା ହେଉଛି ସପ୍ତମ ବୃଦ୍ଧି। ଗତ ବର୍ଷ ଶେଷ ଆଡ଼କୁ ଡିସେମ୍ବର ମାସରେ ଦିଲ୍ଲୀରେ ଏହାର ଦାମ୍ ୧୫୮୦.୫୦ ଟଙ୍କା ଥିବା ବେଳେ ମାତ୍ର କିଛି ମାସ ମଧ୍ୟରେ ଏହା ପ୍ରାୟ ଦ୍ୱିଗୁଣିତ ହୋଇସାରିଲାଣି। ବିଶ୍ୱ ବଜାରରେ ତୈଳ ସଙ୍କଟ ଏବଂ ଆମେରିକା-ଇରାନ ମଧ୍ୟରେ ଉତ୍ତେଜନା କାରଣରୁ ଏହି ଦର ବୃଦ୍ଧି ଘଟୁଥିବା କୁହାଯାଉଛି। ଏହି ବୃଦ୍ଧି ଫଳରେ ହୋଟେଲ, ରେଷ୍ଟୁରାଣ୍ଟ ଏବଂ ଛୋଟ ବ୍ୟବସାୟୀଙ୍କ ଉପରେ ଆର୍ଥିକ ବୋଝ ଆହୁରି ବଢ଼ିଯିବ।

ଘରୋଇ ସିଲିଣ୍ଡର ଦରରେ ପରିବର୍ତ୍ତନ ନାହିଁ

ବ୍ୟବସାୟିକ ଗ୍ୟାସ ସିଲିଣ୍ଡର ମହଙ୍ଗା ହୋଇଥିଲେ ମଧ୍ୟ ସାଧାରଣ ଗ୍ରାହକଙ୍କ ପାଇଁ ଆଶ୍ୱସ୍ତିର ବିଷୟ ଯେ ୧୪.୨ କେଜି ବିଶିଷ୍ଟ ଘରୋଇ ଏଲପିଜି ସିଲିଣ୍ଡର (Domestic LPG Cylinder) ଦରରେ କୌଣସି ପରିବର୍ତ୍ତନ କରାଯାଇ ନାହିଁ। ଶେଷ ଥର ପାଇଁ ଘରୋଇ ସିଲିଣ୍ଡର ଦର ମାର୍ଚ୍ଚ ମାସରେ ପରିବର୍ତ୍ତନ କରାଯାଇଥିଲା ଏବଂ ସେବେଠାରୁ ଏହା ସ୍ଥିର ରହିଛି।

ଆର୍ଥିକ ସଙ୍କଟ ଦେଇ ଗତି କରୁଥିବା ଏଡ୍‌ଟେକ୍ କମ୍ପାନୀ ବାଇଜୁସ୍ (Byju's) ର ପ୍ରତିଷ୍ଠାତା ବାଇଜୁ ରବୀନ୍ଦ୍ରନ୍ (Byju Raveendran) ଙ୍କ ଅଡ଼ୁଆ ବଢ଼ିବାରେ ଲାଗିଛି। ଅଦାଲତ ଅବମାନନା (Contempt of Court) ମାମଲାରେ ସିଙ୍ଗାପୁରର ଏକ ଅଦାଲତ ତାଙ୍କୁ ୬ ମାସର ଜେଲ୍ ଦଣ୍ଡାଦେଶ ଶୁଣାଇଛନ୍ତି। ସମ୍ପତ୍ତି ସମ୍ବନ୍ଧୀୟ ତଥ୍ୟ ଲୁଚାଇବା ଏବଂ କୋର୍ଟଙ୍କ ନିର୍ଦ୍ଦେଶକୁ ବାରମ୍ବାର ଉଲ୍ଲଂଘନ କରିବା ଅଭିଯୋଗରେ ତାଙ୍କ ବିରୋଧରେ ଏହି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

କୋର୍ଟଙ୍କ କଡ଼ା ନିର୍ଦ୍ଦେଶ ଏବଂ ଜୋରିମାନା

ଗଣମାଧ୍ୟମ ରିପୋର୍ଟ ଅନୁଯାୟୀ, ଗତ ଏପ୍ରିଲ୍ ୨୦୨୪ ଠାରୁ ରବୀନ୍ଦ୍ରନ୍ ନିଜର ସମ୍ପତ୍ତି ସମ୍ବନ୍ଧୀୟ ଏକାଧିକ କୋର୍ଟ ନିର୍ଦ୍ଦେଶକୁ ପାଳନ କରିନଥିଲେ। ଏଥିପାଇଁ କୋର୍ଟ ତାଙ୍କୁ ଜେଲ୍ ଦଣ୍ଡ ଭୋଗିବା ସହ ତୁରନ୍ତ ଅଧିକାରୀଙ୍କ ନିକଟରେ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ସହିତ ଆଇନଗତ ଖର୍ଚ୍ଚ ବାବଦକୁ ତାଙ୍କୁ ୯୦,୦୦୦ ସିଙ୍ଗାପୁର ଡଲାର୍ ଅର୍ଥାତ୍ ପ୍ରାୟ ୭୦,୫୦୦ ଆମେରିକୀୟ ଡଲାର (ପାଖାପାଖି ୬୭.୫୦ ଲକ୍ଷ ଟଙ୍କା) ଦେବାକୁ ନିର୍ଦ୍ଦେଶ ଦିଆଯାଇଛି। କୋର୍ଟ ମଧ୍ୟ ରବୀନ୍ଦ୍ରନ୍‌ଙ୍କୁ ବିଆର୍ ଇନଭେଷ୍ଟକୋ ପ୍ରାଇଭେଟ୍ ଲିମିଟେଡ୍ (Beeaar Investco Pte) କମ୍ପାନୀ ଉପରେ ତାଙ୍କର ଆଇନଗତ ମାଲିକାନା ପ୍ରମାଣିତ କରିବା ପାଇଁ ଆବଶ୍ୟକୀୟ କାଗଜପତ୍ର ଦାଖଲ କରିବାକୁ କହିଛନ୍ତି।

ବଢୁଛି ଆଇନଗତ ବିବାଦ

ଏହି ରାୟ ଏପରି ଏକ ସମୟରେ ଆସିଛି, ଯେତେବେଳେ ବାଇଜୁସ୍ ଅନ୍ତର୍ଜାତୀୟ ସ୍ତରରେ ଅନେକ ଆଇନଗତ ଆହ୍ୱାନର ସମ୍ମୁଖୀନ ହେଉଛି। ଯୁକ୍ତରାଷ୍ଟ୍ର ଆମେରିକାରେ ବିଦେଶୀ ନିବେଶକମାନେ ୧.୨ ବିଲିୟନ ଡଲାର୍ ର ଏକ ଋଣ ଅସୁଲି ପାଇଁ ତାଙ୍କ ବିରୋଧରେ ସଂଘର୍ଷ କରୁଛନ୍ତି। ବର୍ତ୍ତମାନ ସିଙ୍ଗାପୁରରେ କାତାର ଇନଭେଷ୍ଟମେଣ୍ଟ୍ ଅଥରିଟିର ଏକ ସହଯୋଗୀ ସଂସ୍ଥା ଦ୍ୱାରା ରବୀନ୍ଦ୍ରନ୍ ଆଇନଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହୋଇଛନ୍ତି। ଅନ୍ୟପକ୍ଷରେ ଏହି ଦଣ୍ଡାଦେଶ ପ୍ରସଙ୍ଗରେ ବାଇଜୁ ରବୀନ୍ଦ୍ରନ୍‌ଙ୍କ ପକ୍ଷରୁ କୌଣସି ସର୍ବସାଧାରଣ ପ୍ରତିକ୍ରିୟା ମିଳିପାରିନାହିଁ ଏବଂ ସେ ବର୍ତ୍ତମାନ ସିଙ୍ଗାପୁରରେ ଅଛନ୍ତି ନା ଅନ୍ୟ କୌଣସି ସ୍ଥାନରେ, ତାହା ସ୍ପଷ୍ଟ ହୋଇନାହିଁ।

୧୯୯୭ ମସିହାରେ ମାସିକ ମାତ୍ର ୫,୦୦୦ ଟଙ୍କା ଦରମାରେ କାମ କରୁଥିବା ଜଣେ ମହିଳା ଆଜି ୪୮ କୋଟି ଟଙ୍କା ବ୍ୟବସାୟର ମାଲିକାଣୀ ହୋଇପାରିଛନ୍ତି। ଏହି ସଫଳ ମହିଳା ଜଣଙ୍କ ହେଉଛନ୍ତି ଓମ୍‌ ସାଇ ସର୍ଜିକାଲ୍ସ (Om Sai Surgicals) ର ପ୍ରତିଷ୍ଠାତା ନୟନା ବୈଦ୍ୟ। ନିକଟରେ କ୍ରୋର୍ କ୍ଲବ୍ (Crore Club) ନାମକ ଏକ ପଡ୍‌କାଷ୍ଟ୍‌ରେ ସେ ନିଜର ଏହି ପ୍ରେରଣାଦାୟକ ଯାତ୍ରା ବିଷୟରେ ବିସ୍ତୃତ ଭାବରେ ଆଲୋଚନା କରିଛନ୍ତି।

୫,୦୦୦ ରୁ ୪୮ କୋଟି ଟଙ୍କା ପର୍ଯ୍ୟନ୍ତ ଯାତ୍ରା

୧୯୯୭ ମସିହାରେ ନୟନା ଏକ ଫାର୍ମା କମ୍ପାନୀରେ ସେଲ୍ସ ରିପ୍ରେଜେଣ୍ଟେଟିଭ୍ ଭାବରେ କାମ ଆରମ୍ଭ କରିଥିଲେ। ସେତେବେଳେ ତାଙ୍କର ମାସିକ ଦରମା ଥିଲା ମାତ୍ର ୫,୦୦୦ ଟଙ୍କା। ସେହି ସମୟରେ ତାଙ୍କ ସ୍ୱାମୀ ବିଶ୍ୱସ୍ତରୀୟ କମ୍ପାନୀ ଜନସନ୍‌ ଆଣ୍ଡ ଜନସନ୍‌ (Johnson & Johnson) ର ଅଙ୍କୋଲୋଜି ବିଭାଗରେ କାର୍ଯ୍ୟରତ ଥିଲେ। ଯେତେବେଳେ କମ୍ପାନୀ ତାଙ୍କ ସ୍ୱାମୀଙ୍କୁ ଏକ ଡିଲରସିପ୍ ନେବାକୁ ପ୍ରସ୍ତାବ ଦେଲା, ସେତେବେଳେ ଫାର୍ମାସୀ ପଢ଼ିଥିବା ନୟନା ନିଜର ଯୋଗ୍ୟତା ଏବଂ ଲାଇସେନ୍ସ ବ୍ୟବହାର କରି ଏହି ସୁଯୋଗକୁ ହାତଛଡ଼ା କରିନଥିଲେ। ପ୍ରାରମ୍ଭିକ ପର୍ଯ୍ୟାୟରେ ସ୍ୱାମୀ-ସ୍ତ୍ରୀ ମିଶି ଏହି ଡିଲରସିପ୍ ବ୍ୟବସାୟ ଆରମ୍ଭ କରିଥିଲେ। ତେବେ କିଛି ବର୍ଷ ପରେ ତାଙ୍କ ସ୍ୱାମୀ ନିଜର ଏକ ଅଲଗା ବ୍ୟବସାୟ ଆରମ୍ଭ କରିବାରୁ ନୟନା ଏହି ଡିଲରସିପ୍ ର ସମ୍ପୂର୍ଣ୍ଣ ଦାୟିତ୍ୱ ନିଜ କାନ୍ଧକୁ ନେଇଥିଲେ।

ଓମ୍‌ ସାଇ ସର୍ଜିକାଲ୍ସ ଏବଂ ବ୍ୟବସାୟିକ ସଫଳତା

ନୟନାଙ୍କ କଠିନ ପରିଶ୍ରମ ଯୋଗୁଁ ବର୍ତ୍ତମାନ ଓମ୍‌ ସାଇ ସର୍ଜିକାଲ୍ସ ସ୍ୱାସ୍ଥ୍ୟସେବା ଉପକରଣ, ବିଶେଷକରି ଅଙ୍କୋଲୋଜି ଏବଂ ସର୍ଜିକାଲ୍ ପ୍ରଡକ୍ଟ ବଣ୍ଟନ କ୍ଷେତ୍ରରେ ଏକ ପ୍ରମୁଖ ନାମ ପାଲଟିଛି। ଡାକ୍ତରଖାନାଗୁଡ଼ିକୁ ସର୍ବୋତ୍ତମ ସ୍ୱାସ୍ଥ୍ୟସେବା ଉପକରଣ ଯୋଗାଇଦେବା ଲକ୍ଷ୍ୟ ନେଇ କମ୍ପାନୀ ଅନେକ ବହୁରାଷ୍ଟ୍ରୀୟ କମ୍ପାନୀଗୁଡ଼ିକର ଏକ ବିଶ୍ୱସ୍ତ ପାର୍ଟନର ହୋଇପାରିଛି। ପଡ୍‌କାଷ୍ଟ୍‌ରେ କଥାବାର୍ତ୍ତା ବେଳେ ନୟନା ପ୍ରକାଶ କରିଛନ୍ତି ଯେ ୨୦୨୬ ଆର୍ଥିକ ବର୍ଷରେ ମାର୍ଚ୍ଚ ସୁଦ୍ଧା ତାଙ୍କ କମ୍ପାନୀର ବାର୍ଷିକ କାରବାର ବା ଟର୍ଣ୍ଣଓଭର୍ ପ୍ରାୟ ୪୮ କୋଟି ଟଙ୍କା ଛୁଇଁଛି।

'ଖୁସି କେବଳ ଟଙ୍କାରୁ ମିଳେନାହିଁ'

ନିଜର ଏତେ ବଡ଼ ବ୍ୟବସାୟିକ ସଫଳତା ସତ୍ତ୍ୱେ ନୟନା ଅତ୍ୟନ୍ତ ସାଧାରଣ ଚିନ୍ତାଧାରା ରଖନ୍ତି। ସେ କୁହନ୍ତି, 'ବ୍ୟବସାୟ ୪୮ କୋଟି ଟଙ୍କାରେ ପହଞ୍ଚିଥିଲେ ମଧ୍ୟ ମୋତେ କୌଣସି ଅସାଧାରଣ ଅନୁଭବ ହେଉନାହିଁ, କାରଣ ଏହି ଯାତ୍ରା ଏବେ ବି ଜାରି ରହିଛି। ପ୍ରକୃତ ଖୁସି କାମ କରିବାରେ ଅଛି, କେବଳ ଟଙ୍କାରେ ନୁହେଁ।' ଏହାଛଡ଼ା ସେ ସୂଚନା ଦେଇଛନ୍ତି ଯେ ୨୦୦୦ ମସିହାରେ ବ୍ୟବସାୟ ଆରମ୍ଭ କରିବା ପରେ ପ୍ରାୟ ୨୦୧୦ ମସିହାରେ ସେ ନିଜର ପ୍ରଥମ କୋଟି ଟଙ୍କା ରୋଜଗାର କରିଥିଲେ। ବର୍ତ୍ତମାନ ତାଙ୍କର ଅନେକ ସମ୍ପତ୍ତି ରହିଛି ଯେଉଁଥିରୁ ଭଡ଼ା ଆକାରରେ ନିୟମିତ ଆୟ ମଧ୍ୟ ଆସୁଛି। ୨୦୧୯ ମସିହାରେ ସେ ଲୋନ୍ କରି ଏକ ଘର କିଣିଥିଲେ, ଯାହାର ବର୍ତ୍ତମାନ ମୂଲ୍ୟ ପ୍ରାୟ ୪ କୋଟି ଟଙ୍କା ହେବ। କମ୍ ଦରମା ପାଉଥିବା ଜଣେ ସାଧାରଣ କର୍ମଚାରୀରୁ ଏକ ବିଶାଳ ବ୍ୟବସାୟର ମାଲିକାଣୀ ହେବା ପର୍ଯ୍ୟନ୍ତ ନୟନା ବୈଦ୍ୟଙ୍କ ଏହି ଯାତ୍ରା ଯେକୌଣସି ଯୁବ ଉଦ୍ୟୋଗୀଙ୍କ ପାଇଁ ଏକ ବଡ଼ ପ୍ରେରଣା।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସମ୍ପତ୍ତି ଏବଂ ସେୟାର ବଜାର କାରବାରକୁ ନେଇ ଏକ ବଡ଼ ଖୁଲାସା ହୋଇଛି, ଯାହା ପୂରା ବିଶ୍ୱର ଅର୍ଥନୈତିକ ଜଗତରେ ହଲଚଲ ସୃଷ୍ଟି କରିଛି। ସଦ୍ୟତମ ଆର୍ଥିକ ରିପୋର୍ଟରୁ ଜଣାପଡିଛି ଯେ, ଟ୍ରମ୍ପ କିମ୍ବା ତାଙ୍କ ଆର୍ଥିକ ପରାମର୍ଶଦାତାମାନେ ଚଳିତ ବର୍ଷ ମାତ୍ର ୯୦ ଦିନ ମଧ୍ୟରେ ୩,୭୦୦ରୁ ଅଧିକ ଷ୍ଟକ୍ ଟ୍ରେଡ୍ କରିଛନ୍ତି।

ୱାଲ୍ ଷ୍ଟ୍ରିଟ୍‌ରେ ହଡ଼କମ୍ପ

ଏତେ କମ୍ ସମୟ ମଧ୍ୟରେ ଏତେ ବିପୁଳ ପରିମାଣର ସେୟାର କିଣାବିକା ଦେଖି ଆମେରିକୀୟ ସେୟାର ବଜାର ତଥା ୱାଲ୍ ଷ୍ଟ୍ରିଟ୍ ଆଶ୍ଚର୍ଯ୍ୟ ପ୍ରକଟ କରିଛି। ଆର୍ଥିକ ବିଶେଷଜ୍ଞମାନେ ଏହି କାରବାରର ପରିମାଣ ଏବଂ ସମୟକୁ ନେଇ ଗଭୀର ଉଦ୍‌ବେଗ ପ୍ରକାଶ କରିଛନ୍ତି। ଜଣେ କ୍ଷମତାସୀନ ରାଷ୍ଟ୍ରପତିଙ୍କ ଆକାଉଣ୍ଟରୁ ଏଭଳି ବ୍ୟାପକ କାରବାର ହେବା ସାଧାରଣତଃ ଦେଖାଯାଏ ନାହିଁ ବୋଲି ବଜାର ବିଶ୍ଳେଷକମାନେ କହିଛନ୍ତି।

ସ୍ୱାର୍ଥର ସଂଘାତ ନେଇ ଚିନ୍ତା

ଏହି ରିପୋର୍ଟ ସାମ୍ନାକୁ ଆସିବା ପରେ ସ୍ୱାର୍ଥର ସଂଘାତ ନେଇ ବିବାଦ ଦେଖାଦେଇଛି। ରାଷ୍ଟ୍ରପତି ପଦରେ ଥାଇ ଅର୍ଥନୈତିକ ନୀତି ନିର୍ଦ୍ଧାରଣ କରୁଥିବା ବ୍ୟକ୍ତି ସେୟାର ବଜାରରେ ଏତେ ସକ୍ରିୟ ରହିବା ଫଳରେ ଗୁପ୍ତ ତଥ୍ୟ ଆଧାରରେ ଟ୍ରେଡିଂ (insider trading) କରାଯାଇଥିବା ନେଇ ବଜାରରେ ଆଶଙ୍କା ସୃଷ୍ଟି ହୋଇଛି। ବର୍ତ୍ତମାନ ସୁଦ୍ଧା ହ୍ୱାଇଟ୍ ହାଉସ୍ କିମ୍ବା ଟ୍ରମ୍ପଙ୍କ ପକ୍ଷରୁ ଏହି ପ୍ରସଙ୍ଗରେ କୌଣସି ଆଧିକାରିକ ପ୍ରତିକ୍ରିୟା ମିଳିପାରିନାହିଁ। ତେବେ ଏହି ଘଟଣା ଆଗାମୀ ଦିନରେ ଆମେରିକାର ରାଜନୈତିକ ଏବଂ ଅର୍ଥନୈତିକ ସ୍ତରରେ ବଡ଼ ଚର୍ଚ୍ଚାର ବିଷୟ ପାଲଟିବାକୁ ଯାଉଛି।

ରାଞ୍ଚି: ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ ତଥା ଲୋକପ୍ରିୟ ଖେଳାଳି ମହେନ୍ଦ୍ର ସିଂହ ଧୋନି (MS Dhoni) ପୁଣି ଥରେ ନିଜ ରାଜ୍ୟରେ ଏକ ବଡ଼ ରେକର୍ଡ ସୃଷ୍ଟି କରିଛନ୍ତି। କ୍ରିକେଟ୍ ପଡ଼ିଆ ବାହାରେ ମଧ୍ୟ ତାଙ୍କର ଦବଦବା ଜାରି ରହିଛି। ଗତ ଆର୍ଥିକ ବର୍ଷ (୨୦୨୫-୨୬) ପାଇଁ ବିହାର ଏବଂ ଝାଡ଼ଖଣ୍ଡ କ୍ଷେତ୍ରରେ ଧୋନି ସର୍ବାଧିକ ବ୍ୟକ୍ତିଗତ ଆୟକରଦାତା (Highest Individual Taxpayer) ଭାବରେ ଉଭା ହୋଇଛନ୍ତି।

ବିହାର ଏବଂ ଝାଡ଼ଖଣ୍ଡର ପ୍ରଧାନ ମୁଖ୍ୟ ଆୟକର କମିଶନର (Principal Chief Commissioner of Income Tax) ଡ. ଡି ସୁଧାକର ରାଓ (Dr. D Sudhakara Rao) ଗୁରୁବାର ଦିନ ଏକ ସାମ୍ବାଦିକ ସମ୍ମିଳନୀରେ ଏହି ସୂଚନା ପ୍ରଦାନ କରିଛନ୍ତି। କ୍ରମାଗତ ଭାବରେ ଧୋନି ଏହି ତାଲିକାର ଶୀର୍ଷରେ ରହିଆସିଛନ୍ତି, ଯାହାକି ତାଙ୍କର କ୍ରିକେଟ୍ ଏବଂ ବିଭିନ୍ନ ବ୍ୟବସାୟିକ ସଫଳତାକୁ ଦର୍ଶାଉଛି।

ଆୟକର ସଂଗ୍ରହରେ ନୂଆ ରେକର୍ଡ

ସାମ୍ବାଦିକ ସମ୍ମିଳନୀରେ ସୂଚନା ଦେଇ ଡ. ରାଓ କହିଛନ୍ତି ଯେ, ଆର୍ଥିକ ବର୍ଷ ୨୦୨୫-୨୬ରେ ବିହାର ଏବଂ ଝାଡ଼ଖଣ୍ଡରୁ ମୋଟ ଆୟକର ସଂଗ୍ରହ ପ୍ରାୟ ୨୦,୦୦୦ କୋଟି ଟଙ୍କାରେ ପହଞ୍ଚିଛି। ଏହା ମଧ୍ୟରୁ କେବଳ ଝାଡ଼ଖଣ୍ଡ ରାଜ୍ୟର ଅବଦାନ ପ୍ରାୟ ୧୨,୦୦୦ କୋଟି ଟଙ୍କା ରହିଛି। ଅବଶିଷ୍ଟ ୮,୦୦୦ କୋଟି ଟଙ୍କା ବିହାରରୁ ଆସିଛି।

ସମୁଦାୟ ଆୟକର ସଂଗ୍ରହର ପ୍ରାୟ ୭୦ ପ୍ରତିଶତ କେବଳ ଉତ୍ସରେ ଟିକସ କାଟ ବା ଟିଡିଏସ୍ (TDS) ମାଧ୍ୟମରେ ମିଳିଛି ବୋଲି ସେ ସ୍ପଷ୍ଟ କରିଛନ୍ତି। ଖଣି ଏବଂ ଶିଳ୍ପ କ୍ଷେତ୍ରରେ ଝାଡ଼ଖଣ୍ଡ ଅଧିକ ସକ୍ରିୟ ଥିବାରୁ ଏଠାରୁ ଟିକସ ଆଦାୟ ବିହାର ତୁଳନାରେ ଯଥେଷ୍ଟ ଅଧିକ ରହିଛି।

କମ୍ପାନୀଗୁଡ଼ିକ ମଧ୍ୟରେ କିଏ ଆଗରେ?

ବ୍ୟକ୍ତିଗତ କ୍ଷେତ୍ରରେ ମହେନ୍ଦ୍ର ସିଂହ ଧୋନି ସବୁଠାରୁ ଆଗରେ ଥିବା ବେଳେ କର୍ପୋରେଟ୍ ବା କମ୍ପାନୀ କ୍ଷେତ୍ରରେ ଖଣି ଏବଂ ଊର୍ଜା କମ୍ପାନୀଗୁଡ଼ିକ ଶୀର୍ଷରେ ଅଛନ୍ତି। ବିଭାଗୀୟ ଅଧିକାରୀଙ୍କ ସୂଚନା ଅନୁଯାୟୀ, କେନ୍ଦ୍ରୀୟ କୋଲଫିଲ୍ଡସ୍ ଲିମିଟେଡ୍ (CCL), ଭାରତ କୋକିଂ କୋଲ୍ ଲିମିଟେଡ୍ (BCCL) ଏବଂ ସିଏମ୍ପିଡିଆଇ (CMPDI) ଭଳି ପବ୍ଲିକ୍ ସେକ୍ଟର ଖଣି କମ୍ପାନୀଗୁଡ଼ିକ ଏହି କ୍ଷେତ୍ରର ସବୁଠାରୁ ବଡ଼ କର୍ପୋରେଟ୍ ଆୟକରଦାତା ଅଟନ୍ତି।

ଧୋନିଙ୍କ ବ୍ୟବସାୟିକ ସାମ୍ରାଜ୍ୟ

ଆୟକର ବିଭାଗ ନିୟମ ଅନୁଯାୟୀ ଧୋନି କେତେ ଟଙ୍କା ଟିକସ ଦେଇଛନ୍ତି, ତାର ପ୍ରକୃତ ପରିମାଣ ସାର୍ବଜନୀନ କରାଯାଇନାହିଁ। ତେବେ ଏହା ସ୍ପଷ୍ଟ ଯେ କେବଳ ଆଇପିଏଲ୍ (IPL) କିମ୍ବା ଚେନ୍ନାଇ ସୁପର କିଙ୍ଗସ୍‌ର ଦରମା ଉପରେ ତାଙ୍କର ରୋଜଗାର ସୀମିତ ନୁହେଁ। ଅନ୍ତର୍ଜାତୀୟ କ୍ରିକେଟ୍‌ରୁ ଅବସର ନେବା ପରେ ମଧ୍ୟ ଧୋନି ବହୁ ନାମୀଦାମୀ ବ୍ରାଣ୍ଡର ବିଜ୍ଞାପନ, କୃଷି କ୍ଷେତ୍ର, ଫିଟନେସ୍ ସେଣ୍ଟର, ଡ୍ରୋନ୍ ଟେକ୍ନୋଲୋଜି ଏବଂ ନିଜସ୍ୱ ପ୍ରଡକ୍ସନ୍ ହାଉସ୍ (Dhoni Entertainment) ଭଳି ଅନେକ ବ୍ୟବସାୟରେ ବିପୁଳ ପରିମାଣର ନିବେଶ କରିଛନ୍ତି। ଏହି ସବୁ କ୍ଷେତ୍ରରୁ ଆସୁଥିବା ଆୟ ଯୋଗୁଁ ସେ ନିରନ୍ତର ଭାବରେ ସର୍ବାଧିକ ଆୟକରଦାତାଙ୍କ ତାଲିକାରେ ନିଜର ସ୍ଥାନ ବଜାୟ ରଖିପାରିଛନ୍ତି।

ଆଗାମୀ ଦିନରେ ଟିକସଦାତାଙ୍କ ସଂଖ୍ୟା ବୃଦ୍ଧି କରିବା ଏବଂ ରିଟର୍ଣ୍ଣ ଦାଖଲ ପ୍ରକ୍ରିୟାକୁ ଆହୁରି ସହଜ କରିବା ଉପରେ ଆୟକର ବିଭାଗ ଗୁରୁତ୍ୱ ଦେଉଥିବା ମୁଖ୍ୟ କମିଶନର ପ୍ରକାଶ କରିଛନ୍ତି।

ଆମେରିକା-ଇରାନ-ଇସ୍ରାଏଲ ବିବାଦ (US-Iran-Israel conflict) ଏବଂ ବିଶ୍ୱସ୍ତରୀୟ ଇନ୍ଧନ ସଙ୍କଟର ପ୍ରଭାବ ଏବେ ସିଧାସଳଖ ଭାରତୀୟ ବଜାର ଉପରେ ପଡ଼ିଛି। କେନ୍ଦ୍ର ସରକାର ଏବଂ ତୈଳ ବିପଣନ କମ୍ପାନୀ (OMCs) ଗୁଡ଼ିକ ପକ୍ଷରୁ ମଇ ୧, ୨୦୨୬ ଠାରୁ ୧୯ କେଜିଆ ବ୍ୟବସାୟିକ (Commercial) ଏଲପିଜି ସିଲିଣ୍ଡର ମୂଲ୍ୟରେ ଐତିହାସିକ ୯୯୩ ଟଙ୍କା ବୃଦ୍ଧି କରାଯାଇଛି। ଏହି ବୃଦ୍ଧି ପରେ ରାଜଧାନୀ ଦିଲ୍ଲୀରେ ଗୋଟିଏ ବ୍ୟବସାୟିକ ସିଲିଣ୍ଡରର ମୂଲ୍ୟ ପୂର୍ବର ୨୦୭୮.୫୦ ଟଙ୍କାରୁ ବୃଦ୍ଧି ପାଇ ୩୦୭୧.୫୦ ଟଙ୍କାରେ ପହଞ୍ଚିଛି।

ଘରୋଇ ଗ୍ରାହକଙ୍କୁ ଆଶ୍ୱସ୍ତି

ଏତେ ବଡ଼ ଧରଣର ଦର ବୃଦ୍ଧି ସତ୍ତ୍ୱେ ସାଧାରଣ ଲୋକଙ୍କୁ ଆଶ୍ୱସ୍ତି ମିଳିଛି। ୧୪.୨ କେଜିଆ ଘରୋଇ ଏଲପିଜି ସିଲିଣ୍ଡରର ମୂଲ୍ୟରେ କୌଣସି ପରିବର୍ତ୍ତନ କରାଯାଇ ନାହିଁ। ଦିଲ୍ଲୀରେ ଘରୋଇ ସିଲିଣ୍ଡର ମୂଲ୍ୟ ପୂର୍ବଭଳି ୯୧୩ ଟଙ୍କା ସ୍ଥିର ରହିଛି ବୋଲି ଇଣ୍ଡିଆନ୍ ଅଏଲ୍ (Indian Oil) ପକ୍ଷରୁ ସ୍ପଷ୍ଟ କରାଯାଇଛି। ଏହା ବ୍ୟତୀତ ସାଧାରଣ ଲୋକ ବ୍ୟବହାର କରୁଥିବା ପେଟ୍ରୋଲ, ଡିଜେଲ ଏବଂ ଘରୋଇ ବିମାନ ଉଡ଼ାଣ ପାଇଁ ବ୍ୟବହୃତ ଏଟିଏଫ୍ (ATF) ଦର ମଧ୍ୟ ଅପରିବର୍ତ୍ତିତ ରହିଛି, ଯାହାଦ୍ୱାରା ଦେଶର ୩୩ କୋଟି ଘରୋଇ ଗ୍ରାହକ ଏହି ବିଶ୍ୱସ୍ତରୀୟ ଦର ବୃଦ୍ଧିର ପ୍ରଭାବରୁ ବର୍ତ୍ତି ପାରିଛନ୍ତି।

ହୋଟେଲ ଓ ରେଷ୍ଟୁରାଣ୍ଟ ଶିଳ୍ପ ଉପରେ ପ୍ରଭାବ

କମର୍ସିଆଲ୍ ଗ୍ୟାସ୍ ସିଲିଣ୍ଡର ମୂଲ୍ୟ ଏକାଥରକେ ୯୯୩ ଟଙ୍କା ବଢ଼ିବା ଦ୍ୱାରା ହୋଟେଲ, ରେଷ୍ଟୁରାଣ୍ଟ ଏବଂ ଅନ୍ୟାନ୍ୟ କ୍ଷୁଦ୍ର ବ୍ୟବସାୟୀଙ୍କ ଉପରେ ଏହାର ଗଭୀର ଆର୍ଥିକ ବୋଝ ପଡ଼ିବ। ରିପୋର୍ଟ ଅନୁଯାୟୀ, ଗତ ତିନି ମାସ ମଧ୍ୟରେ ଏହା ହେଉଛି କ୍ରମାଗତ ତୃତୀୟ ବୃଦ୍ଧି। ଫେବୃଆରୀ ମାସରେ ଆରମ୍ଭ ହୋଇଥିବା ବିଶ୍ୱସ୍ତରୀୟ ଅସ୍ଥିରତା କାରଣରୁ ଏପର୍ଯ୍ୟନ୍ତ ବ୍ୟବସାୟିକ ଗ୍ୟାସ୍ ଦରରେ ସମୁଦାୟ ୧୩୦୩ ଟଙ୍କା ବୃଦ୍ଧି ଘଟିସାରିଲାଣି। ଏହା ଫଳରେ ଆଗାମୀ ଦିନରେ ବାହାରେ ଖାଦ୍ୟପେୟ ତଥା କ୍ୟାଟରିଂ ସେବା ମହଙ୍ଗା ହେବାର ଆଶଙ୍କା ଦେଖାଦେଇଛି।

ଦର ବୃଦ୍ଧିର ମୁଖ୍ୟ କାରଣ

ପଶ୍ଚିମ ଏସିଆରେ ବଢ଼ୁଥିବା ଯୁଦ୍ଧ ପରିସ୍ଥିତି ଏବଂ ବିଶେଷ କରି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହରମୁଜ୍ ପ୍ରଣାଳୀ (Strait of Hormuz) ଅବରୋଧ କାରଣରୁ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ (Crude Oil) ଦରରେ ଅହେତୁକ ବୃଦ୍ଧି ଘଟିଛି। ବିଶ୍ୱର ପ୍ରାୟ ୨୦ ପ୍ରତିଶତ ତୈଳ ଏବଂ ପ୍ରାକୃତିକ ଗ୍ୟାସ ପରିବହନ ଏହି ପ୍ରଣାଳୀ ଦେଇ ହୋଇଥାଏ। ଭାରତ ନିଜ ଆବଶ୍ୟକତାର ପ୍ରାୟ ୮୮ ପ୍ରତିଶତ ଅଶୋଧିତ ତୈଳ ଆମଦାନୀ କରୁଥିବାରୁ, ବିଶ୍ୱସ୍ତରୀୟ ଯୋଗାଣ ଶୃଙ୍ଖଳାରେ ବାଧା ଉପୁଜିବା କାରଣରୁ ତୈଳ ବିପଣନ କମ୍ପାନୀଗୁଡ଼ିକ ବ୍ୟବସାୟିକ ଏଲପିଜି ଗ୍ୟାସ୍ ଦର ବଢ଼ାଇବାକୁ ବାଧ୍ୟ ହୋଇଛନ୍ତି।

ନୂଆଦିଲ୍ଲୀ: ଦେଶର ଅଗ୍ରଣୀ ସ୍ନାକ୍ସ ବ୍ରାଣ୍ଡ୍ ବିକାଜୀ ଫୁଡ୍ସ ଇଣ୍ଟରନ୍ୟାସନାଲ୍ (Bikaji Foods International) ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ଶିବ ରତନ ଅଗ୍ରୱାଲ ଙ୍କର ଗୁରୁବାର ଦିନ ଚେନ୍ନାଇଠାରେ ଦେହାନ୍ତ ହୋଇଛି। ମୃତ୍ୟୁ ବେଳକୁ ତାଙ୍କୁ ୭୪ ବର୍ଷ ବୟସ ହୋଇଥିଲା। ଏକ ହୃଦଘାତ କାରଣରୁ ତାଙ୍କର ପରଲୋକ ଘଟିଥିବା ସୂଚନା ମିଳିଛି। ସେ ନିଜ ପତ୍ନୀଙ୍କ ଚିକିତ୍ସା ପାଇଁ ପରିବାର ସହ ଚେନ୍ନାଇ ଯାଇଥିଲେ।

ସୂତ୍ରରୁ ପ୍ରକାଶ ଯେ, ନିକଟରେ ଶିବ ରତନ ଅଗ୍ରୱାଲଙ୍କ ପତ୍ନୀଙ୍କର ହାର୍ଟ ବାଇପାସ୍ ସର୍ଜରୀ ହୋଇଥିଲା ଏବଂ ଡାକ୍ତର ତାଙ୍କୁ ବିଶ୍ରାମ ନେବାକୁ ପରାମର୍ଶ ଦେଇଥିଲେ। ପତ୍ନୀଙ୍କ ସୁସ୍ଥତା ସମୟରେ ପରିବାର ଲୋକେ ଚେନ୍ନାଇର ଏକ ହୋଟେଲରେ ରହୁଥିଲେ। ଗୁରୁବାର ସକାଳ ପ୍ରାୟ ୭:୩୦ ମିନିଟ୍ ସମୟରେ ଅଗ୍ରୱାଲ ଅସୁସ୍ଥ ଅନୁଭବ କରିଥିଲେ। ତାଙ୍କ ସ୍ୱାସ୍ଥ୍ୟବସ୍ଥା ବିଗିଡ଼ିବାରୁ ତୁରନ୍ତ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା, ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

ବିକାନେରଠାରେ ବିକାଜୀ ବ୍ରାଣ୍ଡର ମୂଳଦୁଆ ପକାଇଥିଲେ ଶିବ ରତନ ଅଗ୍ରୱାଲ। ହଳଦିରାମ (Haldiram's) ସହ ଜଡ଼ିତ ପାରିବାରିକ ବ୍ୟବସାୟରୁ ଅଲଗା ହେବା ପରେ ସେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିବାକୁ ନିଷ୍ପତ୍ତି ନେଇଥିଲେ। ପ୍ରଥମେ ସେ ନିଜ ପୁଅ ଦୀପକ ଅଗ୍ରୱାଲଙ୍କ ନାମରେ 'ଶିବଦୀପ ଫୁଡ୍ସ ପ୍ରୋଡକ୍ଟସ୍' ଆରମ୍ଭ କରି ଭୁଜିଆ ଉତ୍ପାଦନ କ୍ଷେତ୍ରରେ ପାଦ ଦେଇଥିଲେ। ପରେ ୧୯୯୩ ମସିହାରେ ବିକାନେରର ପ୍ରତିଷ୍ଠାତା ରାଓ ବିକାଙ୍କ ନାମ ଅନୁସାରେ ଏହି କମ୍ପାନୀର ନାମକରଣ 'ବିକାଜୀ' ରଖାଯାଇଥିଲା। ଏହି ବ୍ରାଣ୍ଡ ଆଜି ଭାରତ ତଥା ବିଦେଶରେ ଏକ ପରିଚିତ ନାମ ପାଲଟିଛି।

ଶିବ ରତନ ଅଗ୍ରୱାଲଙ୍କ ବିୟୋଗରେ ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ ଗଭୀର ଶୋକ ପ୍ରକାଶ କରିଛନ୍ତି। ସାମାଜିକ ଗଣମାଧ୍ୟମ ଏକ୍ସ (X) ରେ ସେ ଲେଖିଛନ୍ତି ଯେ, ବିକାଜୀ ବ୍ରାଣ୍ଡ ମାଧ୍ୟମରେ ବିକାନେରର ଭୁଜିଆକୁ ଦେଶ ଓ ବିଦେଶରେ ପ୍ରସିଦ୍ଧି କରାଇଥିବା ଶିବ ରତନ ଅଗ୍ରୱାଲଙ୍କ ଦେହାନ୍ତ ଏକ ଅପୂରଣୀୟ କ୍ଷତି। ଏହି ଦୁଃଖଦ ସମୟରେ ସେ ଶୋକସନ୍ତପ୍ତ ପରିବାରକୁ ସମବେଦନା ଜଣାଇବା ସହ ଅମର ଆତ୍ମାର ସଦଗତି କାମନା କରିଛନ୍ତି।

ଯଦି ଆପଣ ଏଟିଏମ୍ (ATM) ରୁ ଟଙ୍କା ଉଠାଇବା ପାଇଁ ଯାଉଛନ୍ତି, ତେବେ ଏହି ଖବର ଆପଣଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଆସନ୍ତା ଏପ୍ରିଲ୍ ୧, ୨୦୨୬ ରୁ ଦେଶର ଅନେକ ପ୍ରମୁଖ ବ୍ୟାଙ୍କ ନିଜର ଏଟିଏମ୍ ନିୟମରେ ବଡ଼ ଧରଣର ପରିବର୍ତ୍ତନ କରିବାକୁ ଯାଉଛନ୍ତି । ଏହି ପରିବର୍ତ୍ତନଗୁଡ଼ିକ ବିଶେଷ କରି ଡେବିଟ୍ କାର୍ଡ ଏବଂ ୟୁପିଆଇ (UPI) ଜରିଆରେ କରାଯାଉଥିବା ନଗଦ ଉଠାଣ ଉପରେ ଲାଗୁ ହେବ । ନୂଆ ନିୟମ ଅନୁଯାୟୀ, ଗ୍ରାହକମାନଙ୍କୁ ଏବେ ଅଧିକ ଦେୟ ଦେବାକୁ ପଡ଼ିପାରେ ଏବଂ ଟଙ୍କା ଉଠାଣ ସୀମାରେ ମଧ୍ୟ ହ୍ରାସ କରାଯାଇଛି।

ଏଚଡିଏଫସି (HDFC) ବ୍ୟାଙ୍କର ନୂଆ ନିୟମ

ଏଚଡିଏଫସି ବ୍ୟାଙ୍କ ନିଜ ଗ୍ରାହକମାନଙ୍କ ପାଇଁ ଏକ ବଡ଼ ନିଷ୍ପତ୍ତି ନେଇଛି । ବର୍ତ୍ତମାନଠାରୁ ୟୁପିଆଇ (UPI) ଆଧାରିତ ଏଟିଏମ୍ ନଗଦ ଉଠାଣ ମଧ୍ୟ ଗ୍ରାହକଙ୍କ ମାସିକ ମାଗଣା ନେଣଦେଣ ସୀମା ମଧ୍ୟରେ ଗଣାଯିବ । ପୂର୍ବରୁ ଏହାକୁ ଏକ ଭିନ୍ନ ଶ୍ରେଣୀରେ ରଖାଯାଉଥିଲା । ନୂତନ ନିୟମ ଅନୁଯାୟୀ, ଗ୍ରାହକମାନେ ନିଜ ବ୍ୟାଙ୍କ ଏଟିଏମ୍‌ରୁ ମାସକୁ ୫ଟି ମାଗଣା ନେଣଦେଣ କରିପାରିବେ । ସେହିପରି ଅନ୍ୟ ବ୍ୟାଙ୍କର ଏଟିଏମ୍ ବ୍ୟବହାର କଲେ, ମେଟ୍ରୋ ସହରଗୁଡ଼ିକରେ ୩ଟି ଏବଂ ଅଣ-ମେଟ୍ରୋ ସହରଗୁଡ଼ିକରେ ୫ଟି ମାଗଣା ନେଣଦେଣର ସୁବିଧା ମିଳିବ । ଏହି ମାଗଣା ସୀମା ଅତିକ୍ରମ କରିବା ପରେ, ପ୍ରତି ନେଣଦେଣ ପିଛା ଗ୍ରାହକଙ୍କୁ ୨୩ ଟଙ୍କା ସହ ଅତିରିକ୍ତ ଟିକସ ଦେବାକୁ ପଡ଼ିବ । ଏହାବ୍ୟତୀତ, ସନ୍ଧ୍ୟା ୭:୩୦ ମିନିଟ୍ ପରେ କରାଯାଉଥିବା ଏଟିଏମ୍ ନେଣଦେଣକୁ ପରବର୍ତ୍ତୀ ଦିନର ନେଣଦେଣ ଭାବରେ ଗଣନା କରାଯିବ ବୋଲି ବ୍ୟାଙ୍କ ପକ୍ଷରୁ ସ୍ପଷ୍ଟ କରାଯାଇଛି । ମାସର ଶେଷ ଦିନରେ କରାଯାଇଥିବା ନେଣଦେଣ ପରବର୍ତ୍ତୀ ମାସର କୋଟାରେ ସାମିଲ ହେବ।

ପଞ୍ଜାବ ନ୍ୟାସନାଲ୍ ବ୍ୟାଙ୍କ (PNB) ର ଦୈନିକ ଉଠାଣ ସୀମାରେ ହ୍ରାସ

ସରକାରୀ କ୍ଷେତ୍ରର ପ୍ରମୁଖ ବ୍ୟାଙ୍କ, ପଞ୍ଜାବ ନ୍ୟାସନାଲ୍ ବ୍ୟାଙ୍କ (PNB) ନିଜର କିଛି ନିର୍ଦ୍ଦିଷ୍ଟ ଡେବିଟ୍ କାର୍ଡ ପାଇଁ ଦୈନିକ ନଗଦ ଉଠାଣ ସୀମାରେ ପରିବର୍ତ୍ତନ କରିଛି । ଏପ୍ରିଲ୍ ୧ ରୁ କାର୍ଯ୍ୟକାରୀ ହେବାକୁ ଥିବା ଏହି ନିୟମ ଅନୁଯାୟୀ, କେତେକ କାର୍ଡର ସର୍ବାଧିକ ଦୈନିକ ଉଠାଣ ସୀମା ୧ ଲକ୍ଷ ଟଙ୍କାରୁ ୫୦,୦୦୦ ଟଙ୍କାକୁ ହ୍ରାସ କରାଯାଇଛି । ଗ୍ରାହକଙ୍କ କାର୍ଡର ବର୍ଗ ଉପରେ ଭିତ୍ତି କରି ଏହି ଦୈନିକ ଉଠାଣ ସୀମା ୫୦,୦୦୦ ରୁ ୭୫,୦୦୦ ଟଙ୍କା ମଧ୍ୟରେ ରହିବ।

ଡିଜିଟାଲ୍ ନେଣଦେଣକୁ ପ୍ରୋତ୍ସାହନ

ବ୍ୟାଙ୍କଗୁଡ଼ିକ ଦ୍ୱାରା ନିଆଯାଇଥିବା ଏହି ପଦକ୍ଷେପଗୁଡ଼ିକର ମୂଳ ଉଦ୍ଦେଶ୍ୟ ହେଉଛି ଗ୍ରାହକମାନଙ୍କୁ ନଗଦ ଅର୍ଥ ଉଠାଣ ପରିବର୍ତ୍ତେ ଅଧିକରୁ ଅଧିକ ଡିଜିଟାଲ୍ ପେମେଣ୍ଟ (Digital Payment) ବ୍ୟବହାର କରିବାକୁ ପ୍ରୋତ୍ସାହିତ କରିବା । ଏହାଦ୍ୱାରା ନେଣଦେଣରେ ସୁରକ୍ଷା ବଢ଼ିବା ସହିତ ବ୍ୟାଙ୍କଗୁଡ଼ିକ ଉପରେ କ୍ୟାସ୍ ମ୍ୟାନେଜମେଣ୍ଟ (Cash Management) ର ଭାର ମଧ୍ୟ କମିବ ବୋଲି ଆଶା କରାଯାଉଛି। ଅତିରିକ୍ତ ଦେୟରୁ ବର୍ତ୍ତିବା ପାଇଁ ଗ୍ରାହକମାନେ ନିଜ ବ୍ୟାଙ୍କର ନୂତନ ନିୟମ ଏବଂ ସୀମା ବିଷୟରେ ଜାଣିରଖିବା ନିତାନ୍ତ ଆବଶ୍ୟକ ।

ସରକାରୀ ପ୍ରତିରକ୍ଷା କମ୍ପାନୀ କୋଚିନ୍ ସିପିୟାର୍ଡ (Cochin Shipyard) ପାଇଁ ମଙ୍ଗଳବାର ଦିନଟି ବେଶ୍ ଲାଭଦାୟକ ସାବ୍ୟସ୍ତ ହୋଇଛି। କମ୍ପାନୀକୁ ଭାରତୀୟ ନୌସେନା ପକ୍ଷରୁ ଏକ ବିଶାଳ ଅର୍ଡର ମିଳିବା ପରେ ଏହାର ସେୟାର ମୂଲ୍ୟରେ ବଡ଼ ଧରଣର ବୃଦ୍ଧି ଘଟିଛି। ଷ୍ଟକ୍ ମାର୍କେଟରେ କମ୍ପାନୀର ସେୟାର ପ୍ରାୟ ୭% ପର୍ଯ୍ୟନ୍ତ ବୃଦ୍ଧି ପାଇଛି।

୫,୦୦୦ କୋଟି ଟଙ୍କାର ଅର୍ଡର

କୋଚିନ୍ ସିପିୟାର୍ଡ ଲିମିଟେଡ୍ ପ୍ରତିରକ୍ଷା ମନ୍ତ୍ରଣାଳୟର ଏକ ଟେଣ୍ଡରରେ ସର୍ବନିମ୍ନ ବିଡର ବା L1 ଭାବରେ ଉଭା ହୋଇଛି। ଏହି ଅର୍ଡର ଅଧୀନରେ କମ୍ପାନୀ ଭାରତୀୟ ନୌସେନା ପାଇଁ ୫ଟି 'ନେକ୍ସଟ୍ ଜେନେରେସନ୍ ସର୍ଭେ ଭେସେଲ୍' (NGSV) ନିର୍ମାଣ କରିବ। କମ୍ପାନୀ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ଏହି ପ୍ରକଳ୍ପର ଆନୁମାନିକ ମୂଲ୍ୟ ପ୍ରାୟ ୫,୦୦୦ କୋଟି ଟଙ୍କା ରହିଛି। ଆବଶ୍ୟକୀୟ ଔପଚାରିକତା ଶେଷ ହେବା ପରେ ଚୂଡ଼ାନ୍ତ ଚୁକ୍ତିନାମା ସ୍ୱାକ୍ଷରିତ ହେବ ବୋଲି କମ୍ପାନୀ କହିଛି।

ସେୟାର ବଜାରରେ ଉତ୍ସାହ

ଗତ ଚାରି ଦିନ ଧରି କୋଚିନ୍ ସିପିୟାର୍ଡର ସେୟାର ମୂଲ୍ୟରେ ହ୍ରାସ ଦେଖାଦେଇଥିଲା, କିନ୍ତୁ ଏହି ଖବର ଆସିବା ପରେ ସେୟାରରେ ଜବରଦସ୍ତ ଉତ୍ସାହ ଦେଖିବାକୁ ମିଳିଛି। ମଙ୍ଗଳବାର ସକାଳେ ବଜାର ଖୋଲିବା ମାତ୍ରେ ଷ୍ଟକ୍ ମୂଲ୍ୟ ବୃଦ୍ଧି ପାଇ ୧୫୭୫ ଟଙ୍କାର ଇଣ୍ଟ୍ରାଡେ ହାଇ (Intraday High) ସ୍ତରକୁ ଛୁଇଁଥିଲା। ଏହି ବୃଦ୍ଧି ନିବେଶକଙ୍କ ପାଇଁ ଏକ ବଡ଼ ଆଶ୍ୱସ୍ତି ଆଣିଦେଇଛି।

କମ୍ପାନୀର ବୟାନ

କମ୍ପାନୀ ସ୍ପଷ୍ଟ କରିଛି ଯେ ଏହି ଅର୍ଡର ପ୍ରଦାନ କରୁଥିବା ସଂସ୍ଥାରେ କୋଚିନ୍ ସିପିୟାର୍ଡର ପ୍ରମୋଟର କିମ୍ବା ଗ୍ରୁପ୍ କମ୍ପାନୀର କୌଣସି ସ୍ୱାର୍ଥ ଜଡ଼ିତ ନାହିଁ। ଏହା ସମ୍ପୂର୍ଣ୍ଣ ରୂପେ ଏକ ସ୍ୱଚ୍ଛ ଟେଣ୍ଡର ପ୍ରକ୍ରିୟା ମାଧ୍ୟମରେ ମିଳିଛି। ଏହି ନୂତନ ଅର୍ଡର କମ୍ପାନୀର ଅର୍ଡର ବୁକକୁ ଆହୁରି ମଜବୁତ କରିବ ଏବଂ ଆଗାମୀ ଦିନରେ କମ୍ପାନୀର ରାଜସ୍ୱ ବୃଦ୍ଧିରେ ସହାୟକ ହେବ।