“ଆପଣଙ୍କୁ ନିଜ ନାମ ଆଗରେ 'ଡାକ୍ତର' ଲେଖିବାର କୌଣସି ଅଧିକାର ନାହିଁ।” ଗାଜିଆବାଦର ଏକ ୪ ବର୍ଷର ଦୁଷ୍କର୍ମ ପୀଡ଼ିତାଙ୍କ ମୃତ୍ୟୁ ମାମଲାରେ ଘରୋଇ ଡାକ୍ତରଖାନା ଏବଂ ଡାକ୍ତରଙ୍କୁ ଏହିଭଳି କଡ଼ା ଭାଷାରେ ତାଗିଦ୍ କରିଛନ୍ତି ସର୍ବୋଚ୍ଚ ନ୍ୟାୟାଳୟ। ଠିକ୍ ସମୟରେ ଜରୁରୀକାଳୀନ ଚିକିତ୍ସା ନମିଳିବାରୁ ମାସୁମ ଝିଅଟିର ଜୀବନ ଯାଇଥିଲା, ଯାହାକୁ ନେଇ କୋର୍ଟ ତୀବ୍ର କ୍ଷୋଭ ପ୍ରକାଶ କରିଛନ୍ତି।

ଗରିବ ହୋଇଥିବାରୁ ମିଳିଲାନି ଚିକିତ୍ସା

ଜଷ୍ଟିସ୍ ସୂର୍ଯ୍ୟ କାନ୍ତଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଶୁକ୍ରବାର ଏହି ମାମଲାର ଶୁଣାଣି କରି ଡାକ୍ତରମାନଙ୍କ ଆଚରଣକୁ ଅତ୍ୟନ୍ତ ନିର୍ଦ୍ଦୟ, ନିଷ୍ଠୁର ଏବଂ ସମ୍ବେଦନହୀନ ବୋଲି ଦର୍ଶାଇଛନ୍ତି। କୋର୍ଟ କହିଛନ୍ତି ଯେ, କେବଳ ଗରିବ ହୋଇଥିବାରୁ ଏବଂ ହସ୍ପିଟାଲ୍ ଫିସ୍ ଦେବାକୁ ଅସମର୍ଥ ଥିବାରୁ ଝିଅଟିକୁ ଚିକିତ୍ସା ଯୋଗାଇ ଦିଆଯାଇନଥିଲା। ଯଦି ଆପଣମାନଙ୍କ ପାଖରେ ଜରୁରୀକାଳୀନ ସୁବିଧା ନଥିଲା, ତେବେ ଟିକିଏ ସମ୍ବେଦନଶୀଳତା ଦେଖାଇ ତାକୁ ଅନ୍ୟ ଏକ ହସ୍ପିଟାଲକୁ ସ୍ଥାନାନ୍ତର କରିବାରେ ବ୍ୟକ୍ତିଗତ ଭାବେ ସାହାଯ୍ୟ କରିବାର ଥିଲା ବୋଲି ଖଣ୍ଡପୀଠ କହିଛନ୍ତି। ନିଜ କର୍ତ୍ତବ୍ୟ ପାଳନରେ ବିଫଳ ହୋଇଥିବାରୁ ନିଜ ନାମ ଆଗରୁ 'ଡାକ୍ତର' ପଦବୀ ହଟାଇ ଦେବାକୁ କୋର୍ଟ ସିଧାସଳଖ ଶୁଣାଇଛନ୍ତି।

କ୍ଷତିପୂରଣ ଦେବାକୁ ନିର୍ଦ୍ଦେଶ

ଏହି ଘୋର ଅବହେଳା ପାଇଁ କୋର୍ଟ ସମ୍ପୃକ୍ତ ଡାକ୍ତରଖାନାଗୁଡ଼ିକ ଉପରେ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। ପୀଡ଼ିତାଙ୍କ ପରିବାରକୁ ଉପଯୁକ୍ତ କ୍ଷତିପୂରଣ ପ୍ରଦାନ କରିବାକୁ ହସ୍ପିଟାଲ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି। ଏହା ସହିତ କୋର୍ଟ ଚେତାବନୀ ଦେଇଛନ୍ତି ଯେ, ଏଭଳି ଦାୟିତ୍ୱହୀନତା ପାଇଁ ସେମାନଙ୍କ ଉପରେ ମୋଟା ଅଙ୍କର ଜୋରିମାନା ଲଗାଯିବ। ଆସନ୍ତା ଜୁଲାଇ ୨୨ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ହେବ।

କ'ଣ ଥିଲା ପୂରା ଘଟଣା?

ସୂଚନାଯୋଗ୍ୟ ଯେ, ଗତ ମାର୍ଚ୍ଚ ମାସରେ ଉତ୍ତରପ୍ରଦେଶର ଗାଜିଆବାଦ ଅନ୍ତର୍ଗତ ନନ୍ଦଗ୍ରାମ ଅଞ୍ଚଳରେ ଏହି ଅଭାବନୀୟ ଘଟଣା ଘଟିଥିଲା। ପଡ଼ୋଶୀ ଘରେ ରହୁଥିବା ଜଣେ ବ୍ୟକ୍ତି ୪ ବର୍ଷର ନିଷ୍ପାପ ବାଳିକାକୁ ଚକୋଲେଟ୍ ଦେବାର ପ୍ରଲୋଭନ ଦେଖାଇ ନିଜ ସହ ନେଇଯାଇଥିଲା। ପରେ ଝିଅଟି ରକ୍ତାକ୍ତ ଏବଂ ଅଚେତ ଅବସ୍ଥାରେ ଉଦ୍ଧାର ହୋଇଥିଲା। ପରିବାର ଲୋକେ ତାକୁ ତୁରନ୍ତ ସ୍ଥାନୀୟ ଦୁଇଟି ଘରୋଇ ଡାକ୍ତରଖାନା ଏବଂ ଜଣେ ଆୟୁର୍ବେଦିକ ଡାକ୍ତରଙ୍କ ନିକଟକୁ ନେଇଥିଲେ ମଧ୍ୟ ସେମାନେ ଆଡମିଶନ କରିବାକୁ ସିଧାସଳଖ ମନା କରିଦେଇଥିଲେ। ପୋଲିସର ପ୍ରାରମ୍ଭିକ ତଦନ୍ତ ପ୍ରକ୍ରିୟା ଏବଂ ଡାକ୍ତରଖାନା ଗୁଡ଼ିକର ଏଭଳି ଅବହେଳା ବିରୋଧରେ ପରିବାର ଲୋକେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏହା ପୂର୍ବରୁ ଗତ ଏପ୍ରିଲ ମାସରେ ସୁପ୍ରିମକୋର୍ଟ ଏହି ମାମଲାକୁ ଅତି ଗୁରୁତର ସହ ନେଇ ଏକ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଗଠନ କରିବାକୁ ନିର୍ଦ୍ଦେଶ ଦେଇଥିଲେ।

ନାବାଳିକା ଦୁଷ୍କର୍ମ ମାମଲାରେ ଆଜୀବନ କାରାଦଣ୍ଡ ଭୋଗୁଥିବା ବିବାଦୀୟ ଆଧ୍ୟାତ୍ମିକ ଗୁରୁ ଆସାରାମ ବାପୁଙ୍କ ଅନ୍ତରୀଣ ଜାମିନ ଆବେଦନ ଉପରେ ଶୁକ୍ରବାର ଦିନ ସୁପ୍ରିମକୋର୍ଟରେ ଗୁରୁତ୍ୱପୂର୍ଣ୍ଣ ଶୁଣାଣି ହୋଇଛି। ସ୍ୱାସ୍ଥ୍ୟଗତ ସମସ୍ୟା ଦର୍ଶାଇ ଆସାରାମ ଅନ୍ତରୀଣ ଜାମିନ ପାଇଁ ଆବେଦନ କରିଥିବା ବେଳେ ସର୍ବୋଚ୍ଚ ନ୍ୟାୟାଳୟ ଏହି ମାମଲାରେ ରାଜସ୍ଥାନ ସରକାରଙ୍କୁ ତାଙ୍କର ତାଜା ମେଡିକାଲ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ୨୧ ଜୁଲାଇରେ ଏହି ମାମଲାର ପରବର୍ତ୍ତୀ ଶୁଣାଣି ହେବ।

ସ୍ୱାସ୍ଥ୍ୟଗତ କାରଣରୁ ଜାମିନ ଆବେଦନ

ଆସାରାମଙ୍କ ଓକିଲ କୋର୍ଟରେ ଯୁକ୍ତି ବାଢ଼ିଥିଲେ ଯେ, ତାଙ୍କ ମହକିଲଙ୍କର ତୀବ୍ର ଆଭ୍ୟନ୍ତରୀଣ ରକ୍ତସ୍ରାବ (Internal Bleeding) ହେଉଛି ଏବଂ ସେ ଗୁରୁତର ଅବସ୍ଥାରେ ଏମ୍ସ ଯୋଧପୁର (AIIMS Jodhpur) ରେ ଭର୍ତ୍ତି ହୋଇଛନ୍ତି। ଏଭଳି ସ୍ଥିତିରେ ଜଣେ 'ହାଇ-ରିସ୍କ' ରୋଗୀ ଭାବେ ତାଙ୍କୁ ଉନ୍ନତ ଚିକିତ୍ସା ପାଇଁ ତୁରନ୍ତ ଅନ୍ତରୀଣ ଜାମିନ ପ୍ରଦାନ କରାଯିବା ଆବଶ୍ୟକ।

ରାଜସ୍ଥାନ ସରକାରଙ୍କ ଯୁକ୍ତି: 'ଆସାରାମ ସମ୍ପୂର୍ଣ୍ଣ ସୁସ୍ଥ ଅଛନ୍ତି'

ରାଜସ୍ଥାନ ସରକାରଙ୍କ ପକ୍ଷରୁ ହାଜର ହୋଇଥିବା ସଲିସିଟର ଜେନେରାଲ ତୁଷାର ମେହେଟ୍ଟା ଆସାରାମଙ୍କ ଜାମିନ ଆବେଦନକୁ କଡ଼ା ବିରୋଧ କରିଥିଲେ। ସେ ଅଦାଲତଙ୍କୁ ଜଣାଇଥିଲେ ଯେ, ଆସାରାମ ସମ୍ପୂର୍ଣ୍ଣ ସୁସ୍ଥ ଅଛନ୍ତି ଏବଂ ତାଙ୍କର ସ୍ୱାସ୍ଥ୍ୟବସ୍ଥା ନେଇ ଦିଆଯାଇଥିବା ତଥ୍ୟକୁ ବଢ଼ାଇଚଢ଼ାଇ କୁହାଯାଉଛି। ମାତ୍ର ତିନି ମାସ ପୂର୍ବେ ଆସାରାମ ଅଯୋଧ୍ୟା ଏବଂ କାଶୀ ବିଶ୍ୱନାଥ ଦର୍ଶନ କରିବାକୁ ଯାଇଥିଲେ ଏବଂ ସେଠାରେ ସେ ସବୁଆଡେ ଚାଲି ଚାଲି ବୁଲିଥିଲେ। ବର୍ତ୍ତମାନର ରକ୍ତସ୍ରାବ ସମସ୍ୟା କେବଳ ଏକ ସାଧାରଣ ଗ୍ୟାଷ୍ଟ୍ରୋ ସମସ୍ୟା ଯୋଗୁଁ ହୋଇଛି ଏବଂ ଏହା ସମ୍ପୂର୍ଣ୍ଣ ଅସ୍ଥାୟୀ ବୋଲି ସେ ଯୁକ୍ତି କରିଥିଲେ।

ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ

ବିଚାରପତି ଏମ୍.ଏମ୍ ସୁନ୍ଦରେଶ ଏବଂ ପି.ବି ବରାଳେଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି ସ୍ପଷ୍ଟ କରିଛନ୍ତି ଯେ, କେବଳ ରାଜ୍ୟ ସରକାରଙ୍କ ରିପୋର୍ଟ ଆଧାରରେ ହିଁ ଜାମିନ ଉପରେ ଚୂଡାନ୍ତ ନିଷ୍ପତ୍ତି ନିଆଯିବ। ତେବେ ଖଣ୍ଡପୀଠ ଏହା ମଧ୍ୟ ଚେତାବନୀ ଦେଇଛନ୍ତି ଯେ, ଯଦି ତାଙ୍କର ସ୍ୱାସ୍ଥ୍ୟବସ୍ଥା ପ୍ରକୃତରେ ଗୁରୁତର ଥାଏ, ତେବେ କୌଣସି ଅଘଟଣ ଘଟିଲେ କୋର୍ଟ କିମ୍ବା ସରକାର ନିନ୍ଦିତ ହେବାକୁ ଚାହିଁବେ ନାହିଁ। ତେଣୁ ସରକାର ସମ୍ପୃକ୍ତ ଅଧିକାରୀଙ୍କଠାରୁ ସଠିକ୍ ରିପୋର୍ଟ ସଂଗ୍ରହ କରନ୍ତୁ। ଯଦି ଆବଶ୍ୟକ ପଡ଼େ, ତେବେ କେବଳ ଚିକିତ୍ସା ଉଦ୍ଦେଶ୍ୟରେ ସୀମିତ ସମୟ ପାଇଁ ଅନ୍ତରୀଣ ଜାମିନ ପ୍ରଦାନ କରିବାକୁ ବିଚାର କରାଯିବ ବୋଲି ସର୍ବୋଚ୍ଚ ଅଦାଲତ କହିଛନ୍ତି। ମାମଲାର ପରବର୍ତ୍ତୀ ଶୁଣାଣି ପାଇଁ ୨୧ ଜୁଲାଇ ତାରିଖକୁ ଧାର୍ଯ୍ୟ କରାଯାଇଛି।

ନୂଆଦିଲ୍ଲୀ: ଆନିମେଟେଡ୍ ଫିଲ୍ମ 'ମହାପ୍ରଭୁ ଜଗନ୍ନାଥ' ର ରିଲିଜ୍ ଉପରେ ସୁପ୍ରିମକୋର୍ଟ ରୋକ ଲଗାଇଛନ୍ତି। ଆସନ୍ତା ଜୁଲାଇ ୨୭ ତାରିଖରେ ପବିତ୍ର ରଥଯାତ୍ରା ଶେଷ ହେବା ପର୍ଯ୍ୟନ୍ତ ଏହି ଚଳଚ୍ଚିତ୍ରକୁ ମୁକ୍ତିଲାଭ କରାଇବାକୁ ସର୍ବୋଚ୍ଚ ନ୍ୟାୟାଳୟ ବାରଣ କରିଛନ୍ତି। ଶୁକ୍ରବାର ଦିନ ଫିଲ୍ମର ନିର୍ମାତାଙ୍କ ପକ୍ଷରୁ କରାଯାଇଥିବା ଆବେଦନର ଶୁଣାଣି କରି ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି।

ସୂଚନାଯୋଗ୍ୟ, ଏହି ଆନିମେସନ ଫିଲ୍ମରେ ମହାପ୍ରଭୁଙ୍କ ସଂସ୍କୃତି, ରୀତିନୀତି ଓ ପରମ୍ପରାକୁ କଦର୍ଥ କରାଯାଇଥିବା ଅଭିଯୋଗ ହୋଇଛି । ଏନେଇ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ମହେଶ ସାହୁ ପିଟିସନ କରିଥିଲେ । ରାଜ୍ୟ ସରକାରଙ୍କ ପକ୍ଷରୁ ତୁଷାର ମେହେଟ୍ଟା ସୁପ୍ରିମକୋର୍ଟରେ ପକ୍ଷ ରଖିଥିଲେ । ଶ୍ରୀମନ୍ଦିର ପ୍ରଶାସନ ପକ୍ଷରୁ ଏଜି ପୀତାମ୍ବର ଆଚାର୍ଯ୍ୟ ପକ୍ଷ ରଖିଥିଲେ।

ସୁପ୍ରିମକୋର୍ଟର ବିଚାରପତି ଜଷ୍ଟିସ୍ ବି.ଭି. ନାଗରତ୍ନା ଏବଂ ଜଷ୍ଟିସ୍ ଆର୍. ମହାଦେବନଙ୍କୁ ନେଇ ଗଠିତ ଖଣ୍ଡପୀଠ ଓଡ଼ିଶା ହାଇକୋର୍ଟଙ୍କ ଆଦେଶ ଉପରେ ସ୍ଥଗିତାଦେଶ ଦେବାକୁ ମନା କରିଦେଇଛନ୍ତି। ଏହି ଫିଲ୍ମଟି ସ୍କନ୍ଦ ପୁରାଣ ଉପରେ ପର୍ଯ୍ୟବସିତ ନୁହେଁ ବୋଲି ଦର୍ଶାଇ ଓଡ଼ିଶା ହାଇକୋର୍ଟ ଏହାର ରିଲିଜ୍ ଉପରେ ରୋକ ଲଗାଇଥିଲେ। ସୁପ୍ରିମକୋର୍ଟ ଏହି ପ୍ରସଙ୍ଗରେ ହସ୍ତକ୍ଷେପ ନକରି ସ୍ପଷ୍ଟ କରିଛନ୍ତି ଯେ, ବର୍ତ୍ତମାନ ରଥଯାତ୍ରା ଚାଲିଥିବାରୁ ଏହି ସମୟ ମଧ୍ୟରେ ଫିଲ୍ମଟିକୁ ରିଲିଜ୍ କରାଯାଇପାରିବ ନାହିଁ। 

ଦିଲ୍ଲୀ-ଏନସିଆର ଏବଂ ଲକ୍ଷ୍ନୌ ଅଞ୍ଚଳରେ ବେଆଇନ ନିର୍ମାଣ, ଅଗ୍ନିକାଣ୍ଡ ଓ କୋଠା ଭୁସୁଡ଼ିବା ଘଟଣାକୁ ନେଇ ସର୍ବୋଚ୍ଚ ନ୍ୟାୟାଳୟ (ସୁପ୍ରିମକୋର୍ଟ) ସମ୍ପୃକ୍ତ କର୍ତ୍ତୃପକ୍ଷଙ୍କୁ କଡ଼ା ଭର୍ତ୍ସନା କରିଛନ୍ତି। କେବଳ ଦୋଷ ଲୁଚାଇବା ପାଇଁ ଅଧିକାରୀମାନେ 'ମୁହଁ ରକ୍ଷା' (Face-saving) ଭଳି ପଦକ୍ଷେପ ନେଉଛନ୍ତି ବୋଲି କୋର୍ଟ କ୍ଷୋଭ ପ୍ରକାଶ କରିଛନ୍ତି। ଦିଲ୍ଲୀର ସାକେତ କୋଠା ଭୁସୁଡ଼ିବା ଏବଂ ମାଲବୀୟ ନଗର ଓ ଲକ୍ଷ୍ନୌ ଅଗ୍ନିକାଣ୍ଡ ଭଳି ମର୍ମନ୍ତୁଦ ଘଟଣାର ଉଦାହରଣ ଦେଇ ଖାମଖିଆଲି ମନୋଭାବ ପୋଷଣ କରୁଥିବା ଅଧିକାରୀଙ୍କୁ କୋର୍ଟ ତାଗିଦ କରିଛନ୍ତି।

ବିଚାରପତି ଅହସାନୁଦ୍ଦିନ ଅମାନୁଲ୍ଲା ଏବଂ ବିଚାରପତି ଶୀଲ ନାଗୁଙ୍କୁ ନେଇ ଗଠିତ ଖଣ୍ଡପୀଠ ଶୁଣାଣି ସମୟରେ କହିଛନ୍ତି ଯେ, ଏଭଳି ଘଟଣାରେ କେବଳ ବିଲ୍ଡର ଏବଂ ଅନ୍ୟ ଲୋକଙ୍କୁ ଗିରଫ କରାଯାଉଛି, କିନ୍ତୁ ବ୍ୟାପକ ନିୟମ ଉଲ୍ଲଂଘନ ହୋଇଥିବା ଅଞ୍ଚଳର ଦାୟିତ୍ୱରେ ଥିବା ସରକାରୀ ଅଧିକାରୀଙ୍କୁ ଛାଡ଼ି ଦିଆଯାଉଛି। ପ୍ରକୃତ ଦୋଷୀମାନଙ୍କୁ ସୁରକ୍ଷା ଦେଇ ପ୍ରଶାସନ କେବଳ ଲୋକଦେଖାଣିଆ କାର୍ଯ୍ୟାନୁଷ୍ଠାନ ଗ୍ରହଣ କରୁଛି। ଗତ ମେ' ୨୦ ତାରିଖରେ ଦିଆଯାଇଥିବା ନିର୍ଦ୍ଦେଶ ସତ୍ତ୍ୱେ ଅଧିକାରୀମାନେ କୌଣସି ଆଖିଦୃଶିଆ ପଦକ୍ଷେପ ନେଇନଥିବାରୁ କୋର୍ଟ ଅସନ୍ତୋଷ ପ୍ରକାଶ କରିଛନ୍ତି।

ବିପଜ୍ଜନକ କୋଠା ଓ ପ୍ରଶାସନର ନିଷ୍କ୍ରିୟତା

ସୁପ୍ରିମକୋର୍ଟ ନିଜ ମେ' ୨୦ ଆଦେଶରେ ଦିଲ୍ଲୀର ଲାଜପତ ନଗର ଏବଂ ସରୋଜିନୀ ନଗର ଭଳି ଅଞ୍ଚଳରେ ଥିବା ବେଆଇନ ନିର୍ମାଣ ବିଷୟରେ ଚେତାବନୀ ଦେଇଥିଲେ। ଏହିସବୁ ଅସୁରକ୍ଷିତ ଢାଞ୍ଚା ଅତ୍ୟଧିକ ଭାର ସହିବାକୁ ସକ୍ଷମ ନୁହେଁ ଏବଂ ଯେକୌଣସି ମୁହୂର୍ତ୍ତରେ ବିପଦ ସୃଷ୍ଟି କରିପାରେ ବୋଲି ଦର୍ଶାଇଥିଲେ। କିନ୍ତୁ ଏହା ପରେ ମଧ୍ୟ ଲକ୍ଷ୍ନୌ ଅଲିଗଞ୍ଜ ଅଗ୍ନିକାଣ୍ଡ (ଯେଉଁଠି ୧୫ ଜଣଙ୍କ ମୃତ୍ୟୁ ଘଟିଥିଲା) ଏବଂ ସାକେତ କୋଠା ଭୁସୁଡ଼ିବା (୬ ଜଣଙ୍କ ମୃତ୍ୟୁ) ଭଳି ଘଟଣା ସାମ୍ନାକୁ ଆସିଥିଲା। ଏହିସବୁ ଘଟଣା ଅଞ୍ଚଳରେ ହୋଇଥିବା ନିୟମର ବ୍ୟାପକ ଉଲ୍ଲଂଘନକୁ ସ୍ପଷ୍ଟ କରୁଛି ବୋଲି କୋର୍ଟ ଦର୍ଶାଇଛନ୍ତି।

ପରବର୍ତ୍ତୀ କାର୍ଯ୍ୟାନୁଷ୍ଠାନ

ସମ୍ପୃକ୍ତ କର୍ତ୍ତୃପକ୍ଷଙ୍କୁ ମେ' ୨୦ ନିର୍ଦ୍ଦେଶ ଅନୁଯାୟୀ ନିଆଯାଇଥିବା ପଦକ୍ଷେପର ଏକ ବିସ୍ତୃତ ରିପୋର୍ଟ ଦାଖଲ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଆସନ୍ତା ଅଗଷ୍ଟ ୪ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ହେବ। ଏହି ଦିନ ବରିଷ୍ଠ MCD (ଦିଲ୍ଲୀ ମହାନଗର ନିଗମ) ଅଧିକାରୀମାନଙ୍କୁ କୋର୍ଟରେ ବ୍ୟକ୍ତିଗତ ଭାବେ ହାଜର ହେବାକୁ ସୁପ୍ରିମକୋର୍ଟ ସମନ ଜାରି କରିଛନ୍ତି। ନିୟମ ଉଲ୍ଲଂଘନ ପାଇଁ ଦାୟୀ ଅଧିକାରୀଙ୍କ ବିରୋଧରେ ଆଗାମୀ ଦିନରେ କଠୋର ଦଣ୍ଡବିଧାନ କରାଯିବ ବୋଲି ଖଣ୍ଡପୀଠ ସତର୍କ କରାଇ ଦେଇଛନ୍ତି。

ଦିଲ୍ଲୀ ସରକାରଙ୍କୁ ସୁପ୍ରିମକୋର୍ଟଙ୍କ ତରଫରୁ ଏକ ବଡ଼ ଝଟକା ଲାଗିଛି। ଦିଲ୍ଲୀର ତିନୋଟି ଘରୋଇ ବିଦ୍ୟୁତ୍ ବଣ୍ଟନ କମ୍ପାନୀ (ଡିସକମ୍) ର ଖାତାପତ୍ରର ସିଏଜି (CAG) ଅଡିଟ୍ କରିବା ନେଇ ଦିଲ୍ଲୀ ସରକାରଙ୍କ ଦ୍ୱାରା ଦିଆଯାଇଥିବା ଆଦେଶ ଉପରେ ଶୁକ୍ରବାର ଦିନ ସୁପ୍ରିମକୋର୍ଟ ଅନ୍ତରୀଣ ରୋକ୍ ଲଗାଇଛନ୍ତି।

ପ୍ରାୟ ୩୮,୫୦୦ କୋଟି ଟଙ୍କାର ମାମଲା

ଏହି ମାମଲା ବିଦ୍ୟୁତ୍ କମ୍ପାନୀଗୁଡ଼ିକ ଉପରେ ବାକି ଥିବା ପ୍ରାୟ ୩୮,୫୦୦ କୋଟି ଟଙ୍କାର ରେଗୁଲେଟୋରୀ ଆସେଟ୍ସ (Regulatory Assets) ସହ ଜଡ଼ିତ, ଯାହା ଆଗାମୀ ଦିନରେ ଗ୍ରାହକମାନଙ୍କଠାରୁ ଆଦାୟ ହେବାର ଥିଲା। ଏହି ବିପୁଳ ପରିମାଣର ଅର୍ଥ କିପରି ଜମା ହେଲା ଏବଂ କମ୍ପାନୀଗୁଡ଼ିକ କିପରି କାର୍ଯ୍ୟ କରୁଛନ୍ତି ତାହାର କଠୋର ତଦନ୍ତ କରିବା ଲାଗି ଗୁରୁବାର ଦିନ ଦିଲ୍ଲୀ ସରକାର ନିର୍ଦ୍ଦେଶ ଦେଇଥିଲେ। ଏଥିରେ ବିଏସଇଏସ ରାଜଧାନୀ ପାୱାର ଲିମିଟେଡ୍ (BRPL), ବିଏସଇଏସ ଯମୁନା ପାୱାର ଲିମିଟେଡ୍ (BYPL) ଏବଂ ଟାଟା ପାୱାର ଦିଲ୍ଲୀ ଡିଷ୍ଟ୍ରିବ୍ୟୁସନ୍ ଲିମିଟେଡ୍ (TPDDL) ଭଳି ତିନୋଟି ଘରୋଇ ଡିସକମ୍ କମ୍ପାନୀ ସାମିଲ ରହିଥିଲେ।

ସୁପ୍ରିମକୋର୍ଟଙ୍କ ନିର୍ଦ୍ଦେଶ ଓ ପରବର୍ତ୍ତୀ ଶୁଣାଣି

ଜଷ୍ଟିସ୍ କେଭି ବିଶ୍ୱନାଥନ ଏବଂ ଜଷ୍ଟିସ୍ ଶ୍ରୀ ଚନ୍ଦ୍ରଶେଖରଙ୍କୁ ନେଇ ଗଠିତ ସର୍ବୋଚ୍ଚ ନ୍ୟାୟାଳୟର ଖଣ୍ଡପୀଠ ଏହି ମାମଲାର ଶୁଣାଣି କରିବା ସହ ଉଭୟ ସିଏଜି (CAG) ଏବଂ ସ୍ୱାଧୀନ ଚାର୍ଟାର୍ଡ ଆକାଉଣ୍ଟାଣ୍ଟ୍ (CA) ଅଡିଟ୍ ଉପରେ ରୋକ୍ ଲଗାଇଛନ୍ତି। ପୂର୍ବରୁ ଆପ୍ଟେଲ୍ (APTEL) ଏକ ନିର୍ଦ୍ଦେଶରେ ଦିଲ୍ଲୀ ବିଦ୍ୟୁତ୍ ନିୟାମକ ଆୟୋଗ (DERC) କୁ ଏହି ଅଡିଟ୍ ଜଣେ ସ୍ୱାଧୀନ CAଙ୍କ ଦ୍ୱାରା କରାଇବା ପାଇଁ କହିଥିଲା, ଯାହାକୁ ବିରୋଧ କରି DERC ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା।

ସୁପ୍ରିମକୋର୍ଟ ବର୍ତ୍ତମାନର ସ୍ଥିତି ବଜାୟ ରଖିବାକୁ (Status Quo) ନିର୍ଦ୍ଦେଶ ଦେବା ସହ ଏହି ଆବେଦନ ଉପରେ ନୋଟିସ୍ ଜାରି କରିଛନ୍ତି। ଆସନ୍ତା ଜୁଲାଇ ୧୫ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ହେବ ବୋଲି ସ୍ଥିର କରାଯାଇଛି। କୋର୍ଟ ସ୍ପଷ୍ଟ କରିଛନ୍ତି ଯେ ପରବର୍ତ୍ତୀ ନିର୍ଦ୍ଦେଶ ନଆସିବା ପର୍ଯ୍ୟନ୍ତ କୌଣସି ପ୍ରକାରର ଅଡିଟ୍ ପ୍ରକ୍ରିୟା ଆଗକୁ ବଢ଼ିବ ନାହିଁ।

ମଧ୍ୟପ୍ରଦେଶରୁ ରାଜ୍ୟସଭା ନିର୍ବାଚନ ପାଇଁ କଂଗ୍ରେସ ନେତ୍ରୀ ମୀନାକ୍ଷୀ ନଟରାଜନଙ୍କ ନାମାଙ୍କନ ପତ୍ର ଖାରଜ ହେବା ମାମଲାରେ ସୁପ୍ରିମକୋର୍ଟ ଏକ ବଡ଼ ରାୟ ଶୁଣାଇଛନ୍ତି। ଶୁକ୍ରବାର ଦିନ ଏହି ମାମଲାର ଶୁଣାଣି କରି ସର୍ବୋଚ୍ଚ ନ୍ୟାୟାଳୟ ନିର୍ବାଚନ ପ୍ରକ୍ରିୟାରେ ହସ୍ତକ୍ଷେପ କରିବାକୁ ସ୍ପଷ୍ଟ ଭାବରେ ମନା କରିଦେଇଛନ୍ତି। କୋର୍ଟ କହିଛନ୍ତି ଯେ ଥରେ ନିର୍ବାଚନ ପ୍ରକ୍ରିୟା ଆରମ୍ଭ ହେବା ପରେ ଏଥିରେ ହସ୍ତକ୍ଷେପ କରିବାର କ୍ଷମତା ସୀମିତ ଅଟେ ଏବଂ ବର୍ତ୍ତମାନ ପରିସ୍ଥିତିରେ ଅଦାଲତ ଏଥିରେ ଦଖଲ ଦେଇପାରିବେ ନାହିଁ।

ମୀନାକ୍ଷୀ ନଟରାଜନଙ୍କୁ ଶକ୍ତ ଝଟକା

ଏହି ମାମଲାକୁ ବିଚାର କରି ବିଚାରପତି ପ୍ରଶାନ୍ତ କୁମାର ମିଶ୍ର ଏବଂ ବିଚାରପତି ଅତୁଲ ଏସ. ଚାନ୍ଦୁରକରଙ୍କୁ ନେଇ ଗଠିତ ଖଣ୍ଡପୀଠ ମୀନାକ୍ଷୀଙ୍କ ଆବେଦନକୁ ଖାରଜ କରିଦେଇଛନ୍ତି। ନାମାଙ୍କନ ପତ୍ର ଖାରଜ ହେବା ବିରୋଧରେ ସେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ତାଙ୍କ ପକ୍ଷରୁ ବରିଷ୍ଠ ଆଇନଜୀବୀ ଅଭିଷେକ ମନୁ ସିଙ୍ଘଭୀ ଯୁକ୍ତି ବାଢ଼ିଥିଲେ। କିନ୍ତୁ କୋର୍ଟ ସ୍ପଷ୍ଟ କରିଥିଲେ ଯେ ସମ୍ବିଧାନର ଧାରା ୩୨୯ ଅନୁଯାୟୀ ନିର୍ବାଚନ ପ୍ରକ୍ରିୟା ଚାଲିଥିବା ସମୟରେ ନ୍ୟାୟିକ ହସ୍ତକ୍ଷେପ କରାଯାଇପାରିବ ନାହିଁ। ନିର୍ବାଚନ ଶେଷ ହେବା ପରେ କେବଳ ନିର୍ବାଚନୀ ଆବେଦନ (ଇଲେକ୍ସନ୍ ପିଟିସନ୍) ମାଧ୍ୟମରେ ହିଁ ଏହାର ସମାଧାନ ପାଇଁ ନିର୍ବାଚନ କମିଶନଙ୍କ ନିକଟରେ ଅଭିଯୋଗ କରାଯାଇପାରିବ ବୋଲି କୋର୍ଟ ପରାମର୍ଶ ଦେଇଛନ୍ତି। ସୁପ୍ରିମକୋର୍ଟଙ୍କ ଏହି ନିଷ୍ପତ୍ତି କଂଗ୍ରେସ ଏବଂ ମୀନାକ୍ଷୀଙ୍କ ପାଇଁ ଏକ ବଡ଼ ରାଜନୈତିକ ଝଟକା ବୋଲି ବିବେଚନା କରାଯାଉଛି।

କାହିଁକି ଖାରଜ ହୋଇଥିଲା ନାମାଙ୍କନ?

ଗତ କିଛି ଦିନ ତଳେ ରିଟର୍ଣ୍ଣିଂ ଅଫିସର ମୀନାକ୍ଷୀ ନଟରାଜନଙ୍କ ନାମାଙ୍କନ ପତ୍ରକୁ ଖାରଜ କରିଦେଇଥିଲେ। ଅଭିଯୋଗ ଥିଲା ଯେ ସେ ନିଜ ନିର୍ବାଚନୀ ସତ୍ୟପାଠରେ (ଫର୍ମ ୨୬) ତାଙ୍କ ନାମରେ ତେଲେଙ୍ଗାନାରେ ପଡ଼ିରହିଥିବା ଏକ ଅପରାଧିକ ମାମଲାର ତଥ୍ୟ ଲୁଚାଇଥିଲେ। ତେବେ କଂଗ୍ରେସ ପକ୍ଷରୁ କୁହାଯାଇଥିଲା ଯେ କେବଳ ଦୁଇ ବର୍ଷ ବା ତଦୁର୍ଦ୍ଧ୍ୱ ଦଣ୍ଡ ବିଧାନ ଥିବା ମାମଲାର ତଥ୍ୟ ଦେବା ନିୟମ ରହିଛି ଏବଂ ମୀନାକ୍ଷୀଙ୍କୁ ଏହି ମାମଲାରେ କେବଳ ସମନ ଜାରି କରାଯାଇଥିଲା। ଏହି ଯୁକ୍ତିକୁ ନିର୍ବାଚନ ଅଧିକାରୀ ଗ୍ରହଣ ନକରି ଅସମ୍ପୂର୍ଣ୍ଣ ତଥ୍ୟ ଦେବା କାରଣ ଦର୍ଶାଇ ତାଙ୍କ ନାମାଙ୍କନ ରଦ୍ଦ କରିଥିଲେ।

ବଲିଉଡ୍ ଅଭିନେତ୍ରୀ ଜ୍ୟାକଲିନ ଫର୍ଣ୍ଣାଣ୍ଡିଜଙ୍କ ଆବେଦନ ଉପରେ ଗୁରୁବାର ସୁପ୍ରିମକୋର୍ଟରେ ହେବାକୁ ଥିବା ଶୁଣାଣିକୁ ସ୍ଥଗିତ ରଖାଯାଇଛି। ୨୦୦ କୋଟି ଟଙ୍କାର ମନି ଲଣ୍ଡରିଂ ମାମଲାରେ ତାଙ୍କ ବିରୋଧରେ ଚାର୍ଜଫ୍ରେମ୍ (ଦୋଷ ନିର୍ଦ୍ଧାରଣ) ପାଇଁ ଦିଲ୍ଲୀର ଏକ ଅଦାଲତ ଦେଇଥିବା ନିର୍ଦ୍ଦେଶକୁ ଚ୍ୟାଲେଞ୍ଜ କରି ଜ୍ୟାକଲିନ ସର୍ବୋଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଥିଲେ। ତେବେ ସୁପ୍ରିମକୋର୍ଟର ବିଚାରପତି ଜଷ୍ଟିସ ପ୍ରଶାନ୍ତ କୁମାର ମିଶ୍ର ଏହି ମାମଲାର ଶୁଣାଣିରୁ ନିଜକୁ ଅଲଗା କରିନେଇଛନ୍ତି।

ଶୁଣାଣିରୁ କାହିଁକି ଓହରିଲେ ବିଚାରପତି?

ଗୁରୁବାର ଜଷ୍ଟିସ ପ୍ରଶାନ୍ତ କୁମାର ମିଶ୍ର ଏବଂ ଜଷ୍ଟିସ ଏ.ଏସ. ଚାନ୍ଦୁରକରଙ୍କ ଖଣ୍ଡପୀଠରେ ଏହି ମାମଲାର ଶୁଣାଣି ହେବାର ଥିଲା। ମାତ୍ର ଶୁଣାଣି ଆରମ୍ଭରୁ ଜଷ୍ଟିସ ମିଶ୍ର ଏହି ମାମଲାର ଶୁଣାଣି କରିବେ ନାହିଁ ବୋଲି ସ୍ପଷ୍ଟ କରିଥିଲେ। ସେ କହିଥିଲେ ଯେ, ଏହା ସହ ଜଡିତ ଅନ୍ୟ ଏକ ମାମଲାରେ ତାଙ୍କ ପୁଅ ସରକାରଙ୍କ ପକ୍ଷରୁ ଓକିଲାତି କରିଥିଲେ। ତେଣୁ ସେ ଏହି ମାମଲାର ଶୁଣାଣି କରିବା ଠିକ୍ ହେବନାହିଁ।

ଜୁନ ୨୫ରେ ହେବ ପରବର୍ତ୍ତୀ ଶୁଣାଣି

ବିଚାରପତି ଶୁଣାଣିରୁ ଓହରିବା ପରେ, ଖଣ୍ଡପୀଠ ଏହି ମାମଲାକୁ ଅନ୍ୟ ଏକ ବେଞ୍ଚକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ଜୁନ ୨୫ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ଅନ୍ୟ ଏକ ଖଣ୍ଡପୀଠରେ ହେବ ବୋଲି ସର୍ବୋଚ୍ଚ ନ୍ୟାୟାଳୟଙ୍କ ପକ୍ଷରୁ କୁହାଯାଇଛି। ଏହି ସମୟରେ ତଦନ୍ତକାରୀ ସଂସ୍ଥା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା ମଧ୍ୟ ଉପସ୍ଥିତ ଥିଲେ।

କ'ଣ ରହିଛି ମାମଲା?

ଗତ ମେ ୩୦ ତାରିଖରେ ଦିଲ୍ଲୀର ପଟିଆଲା ହାଉସ କୋର୍ଟ ୨୦୦ କୋଟି ଟଙ୍କାର ଠକେଇ ଏବଂ ମନି ଲଣ୍ଡରିଂ ମାମଲାରେ ମହାଠକ ସୁକେଶ ଚନ୍ଦ୍ରଶେଖର, ଅଭିନେତ୍ରୀ ଜ୍ୟାକଲିନ ଫର୍ଣ୍ଣାଣ୍ଡିଜ ଏବଂ ଅନ୍ୟ ୧୫ ଜଣଙ୍କ ବିରୋଧରେ ଚାର୍ଜଫ୍ରେମ କରିବାକୁ ନିର୍ଦ୍ଦେଶ ଦେଇଥିଲେ। ଇଡିର ଅଭିଯୋଗ ଅନୁଯାୟୀ, ଜ୍ୟାକଲିନ ମହାଠକ ସୁକେଶଙ୍କ ସହ ନିୟମିତ ଯୋଗାଯୋଗରେ ଥିଲେ ଏବଂ ତାଙ୍କଠାରୁ ଦାମୀ ଉପହାର ମଧ୍ୟ ଗ୍ରହଣ କରିଥିଲେ। ତେବେ ଏହି ଚାର୍ଜଫ୍ରେମ୍ ନିର୍ଦ୍ଦେଶକୁ ରଦ୍ଦ କରିବା ପାଇଁ ଅଭିନେତ୍ରୀ ଜ୍ୟାକଲିନ ସୁପ୍ରିମକୋର୍ଟରେ ଆବେଦନ କରିଥିଲେ。

ନୂଆଦିଲ୍ଲୀ: ଗୃହିଣୀମାନଙ୍କ ପାଇଁ ସର୍ବୋଚ୍ଚ ନ୍ୟାୟାଳୟ ଗୁରୁବାର ଦିନ ଏକ ବଡ଼ ରାୟ ଶୁଣାଇଛନ୍ତି। ସଡ଼କ ଦୁର୍ଘଟଣାରେ ପ୍ରାଣ ହରାଉଥିବା ଗୃହିଣୀମାନଙ୍କ ପାଇଁ କ୍ଷତିପୂରଣ ଆକଳନ କରିବା ସମୟରେ, ସେମାନଙ୍କର ବିନା ଦରମାରେ କରୁଥିବା ଘରୋଇ କାର୍ଯ୍ୟର ମୂଲ୍ୟ ମାସିକ ସର୍ବନିମ୍ନ ୩୦,୦୦୦ ଟଙ୍କା ଭାବରେ ଗଣନା କରାଯିବା ଉଚିତ୍ ବୋଲି କୋର୍ଟ କହିଛନ୍ତି। ଏଥିସହ ପରିବାର ଏବଂ ସମାଜରେ ମହିଳାମାନଙ୍କର କେନ୍ଦ୍ରୀୟ ଭୂମିକାକୁ ଗୁରୁତ୍ୱ ଦେଇ ଗୃହିଣୀମାନଙ୍କୁ 'ରାଷ୍ଟ୍ର ନିର୍ମାତା' ଭାବରେ ସ୍ୱୀକୃତି ମିଳିବା ଉଚିତ୍ ବୋଲି ଖଣ୍ଡପୀଠ ଘୋଷଣା କରିଛନ୍ତି।

ବିଚାରପତି ସଞ୍ଜୟ କାରୋଲ ଏବଂ ଏନ୍ କୋଟିଶ୍ୱର ସିଂଙ୍କୁ ନେଇ ଗଠିତ ଖଣ୍ଡପୀଠ ଏହି ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ପୂର୍ବରୁ ଦେଶରେ ଗୃହିଣୀମାନଙ୍କ ଆୟକୁ କୁଶଳୀ ଶ୍ରମିକଙ୍କ ମଜୁରୀ ସହିତ ସମାନ ଭାବେ ଗଣନା କରାଯିବାର ନ୍ୟାୟିକ ପ୍ରଥା ରହିଥିଲା। ତେବେ ଏହି ପୁରୁଣା ନିୟମକୁ ଖଣ୍ଡପୀଠ ପ୍ରତ୍ୟାଖ୍ୟାନ କରିଛନ୍ତି। କୋର୍ଟ ଦର୍ଶାଇଛନ୍ତି ଯେ ଏପରି ଆଭିମୁଖ୍ୟ ଘରୋଇ କାର୍ଯ୍ୟର ପ୍ରକୃତ ଅର୍ଥନୈତିକ ଏବଂ ସାମାଜିକ ମୂଲ୍ୟକୁ ଠିକ୍‌ ଭାବେ ଆକଳନ କରିବାରେ ବିଫଳ ହୋଇଥାଏ। ବିଚାରପତି କାରୋଲ କହିଛନ୍ତି ଯେ, କୋର୍ଟ ଏକ ନୂତନ ନିୟମ ଲାଗୁ କରିଛନ୍ତି, ଯାହା ଅନୁଯାୟୀ ଘରୋଇ ଯତ୍ନର କ୍ଷତି ପାଇଁ ମାସିକ ସର୍ବନିମ୍ନ ୩୦,୦୦୦ ଟଙ୍କା କ୍ଷତିପୂରଣ ଭାବେ ଆକଳନ କରାଯିବ।

ପଞ୍ଜାବର ଏକ ମୋଟର ଦୁର୍ଘଟଣା ଜନିତ କ୍ଷତିପୂରଣ ଆବେଦନର ଶୁଣାଣି ବେଳେ ଏହି ରାୟ ଆସିଛି। ନଭେମ୍ବର ୨୦୦୧ ମସିହାରେ ପଞ୍ଜାବର ରେଶମା ନାମକ ଜଣେ ମହିଳାଙ୍କର ସଡ଼କ ଦୁର୍ଘଟଣାରେ ମୃତ୍ୟୁ ହୋଇଥିଲା। ତାଙ୍କ ସ୍ୱାମୀ ଏବଂ ତିନି ପିଲା କ୍ଷତିପୂରଣ ଦାବି କରି ମୋଟର ଦୁର୍ଘଟଣା ଦାବି ଟ୍ରିବ୍ୟୁନାଲଙ୍କ ଦ୍ୱାରସ୍ଥ ହୋଇଥିଲେ। ୨୦୦୩ ରେ ଟ୍ରିବ୍ୟୁନାଲ କ୍ଷତିପୂରଣ ପ୍ରଦାନ କରିଥିଲେ ମଧ୍ୟ ଏହି ମାମଲା ବର୍ଷ ବର୍ଷ ଧରି ନ୍ୟାୟାଳୟରେ ପଡ଼ିରହିଥିଲା। ଶେଷରେ ଡିସେମ୍ବର ୨୦୨୪ ରେ, ଅର୍ଥାତ୍ ଦୁର୍ଘଟଣାର ଦୁଇ ଦଶନ୍ଧିରୁ ଅଧିକ ସମୟ ପରେ, ପଞ୍ଜାବ ଏବଂ ହରିୟାଣା ହାଇକୋର୍ଟ ଏହି ଆବେଦନ ଉପରେ ନିଷ୍ପତ୍ତି ନେଇଥିଲେ।

କ୍ଷତିପୂରଣ ମାମଲାରେ ଏତେ ବର୍ଷର ବିଳମ୍ବକୁ ନେଇ ସୁପ୍ରିମକୋର୍ଟ ଉଦ୍‌ବେଗ ପ୍ରକାଶ କରିଛନ୍ତି। ସାଧାରଣତଃ ମୋଟର ଯାନ ଦୁର୍ଘଟଣା ଜନିତ କ୍ଷତିପୂରଣ ଦାବିର ଶୁଣାଣି ସାଧାରଣତଃ ଗୋଟିଏ ବର୍ଷ ମଧ୍ୟରେ ଶେଷ ହେବା ଉଚିତ୍ ବୋଲି ସୁପ୍ରିମକୋର୍ଟ କହିଛନ୍ତି। ଏଥିପାଇଁ ସମସ୍ତ ହାଇକୋର୍ଟର ମୁଖ୍ୟ ବିଚାରପତିମାନଙ୍କୁ ଏଭଳି ମାମଲା ଉପରେ ନଜର ରଖିବାକୁ ଏବଂ ନିର୍ଦ୍ଧାରିତ ସମୟ ମଧ୍ୟରେ ଯେପରି ଶୁଣାଣି ଶେଷ ହେବ, ସେଥିପାଇଁ ଉପଯୁକ୍ତ ପ୍ରଶାସନିକ ନିର୍ଦ୍ଦେଶ ଜାରି କରିବାକୁ କୋର୍ଟ ଅନୁରୋଧ କରିଛନ୍ତି। ଯଦି ପୀଡ଼ିତ ପରିବାରକୁ ନ୍ୟାୟ ପାଇଁ ଦଶନ୍ଧି ଦଶନ୍ଧି ଅପେକ୍ଷା କରିବାକୁ ପଡ଼େ, ତେବେ ମୋଟର ଯାନ ଆଇନର କଲ୍ୟାଣକାରୀ ଉଦ୍ଦେଶ୍ୟ ବିଫଳ ହେବ ବୋଲି ଖଣ୍ଡପୀଠ ମତ ଦେଇଛନ୍ତି।

ସୁପ୍ରିମକୋର୍ଟ ନିର୍ଦ୍ଧାରଣ କରିଥିବା ଏହି ନୂତନ ମାନଦଣ୍ଡଟି ୨୦୧୭ ମସିହାରେ କୋର୍ଟଙ୍କ ସାମ୍ବିଧାନିକ ପୀଠ ଦ୍ୱାରା ଦିଆଯାଇଥିବା ପ୍ରଣୟ ସେଠୀ ମାମଲାର ରାୟ ସହିତ ମିଳିତ ଭାବେ କାର୍ଯ୍ୟକାରୀ ହେବ। ପୂର୍ବରୁ ମଧ୍ୟ କୋର୍ଟ ସ୍ପଷ୍ଟ କରିଥିଲେ ଯେ ଗୃହିଣୀମାନେ ମାସିକ ଦରମା ପାଉନଥିବାରୁ ସେମାନଙ୍କ ସେବାକୁ କେବେ ମଧ୍ୟ ମୂଲ୍ୟହୀନ ବୋଲି ବିବେଚନା କରାଯାଇପାରିବ ନାହିଁ। ବର୍ତ୍ତମାନର ଏହି ନୂଆ ଐତିହାସିକ ରାୟ ଦ୍ୱାରା ଦେଶବ୍ୟାପୀ ମୋଟର ଦୁର୍ଘଟଣା ମାମଲାରେ ଗୃହିଣୀମାନଙ୍କ ମୃତ୍ୟୁ ହେଲେ, ମିଳିବାକୁ ଥିବା କ୍ଷତିପୂରଣ ରାଶି ଯଥେଷ୍ଟ ବୃଦ୍ଧି ପାଇବ ବୋଲି ଆଶା କରାଯାଉଛି। 

ନୂଆଦିଲ୍ଲୀ: ଦେଶର ବିଭିନ୍ନ ନ୍ୟାୟାଳୟରେ ନ୍ୟାୟିକ ପ୍ରକ୍ରିୟା ବିଳମ୍ବକୁ ନେଇ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଜାରି କରିଛନ୍ତି। ଶୁକ୍ରବାର ଦିନ ଦେଶର ସମସ୍ତ ହାଇକୋର୍ଟଙ୍କୁ ସର୍ବୋଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି ଯେ ରାୟ ସଂରକ୍ଷିତ ରଖିବାର ୩ ମାସ ମଧ୍ୟରେ ଚୂଡ଼ାନ୍ତ ରାୟ ଶୁଣାଇବା ବାଧ୍ୟତାମୂଳକ। ବିଚାର ପ୍ରକ୍ରିୟାରେ ବିଳମ୍ବ ଯୋଗୁଁ ମାମଲାକାରୀମାନଙ୍କର ଅପୂରଣୀୟ କ୍ଷତି ଘଟୁଛି ବୋଲି ଅଦାଲତ ଦର୍ଶାଇଛନ୍ତି।

ପ୍ରଧାନ ବିଚାରପତି ସୂର୍ଯ୍ୟ କାନ୍ତ ଏବଂ ବିଚାରପତି ଜୟମାଲ୍ୟ ବାଗ୍‌ଚୀଙ୍କୁ ନେଇ ଗଠିତ ଖଣ୍ଡପୀଠ ବ୍ୟକ୍ତିଗତ ସ୍ୱାଧୀନତା ସହ ଜଡିତ ମାମଲାଗୁଡ଼ିକରେ ତ୍ୱରିତ ନିଷ୍ପତ୍ତିର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି। ବିଶେଷକରି ଜାମିନ ଆବେଦନଗୁଡ଼ିକୁ ଯଥାସମ୍ଭବ ସେହି ଦିନ ହିଁ ବିଚାର କରାଯିବା ଉଚିତ ବୋଲି ଖଣ୍ଡପୀଠ ମତ ଦେଇଛନ୍ତି। ଯଦି କୌଣସି କାରଣରୁ ରାୟ ସଂରକ୍ଷିତ ରଖାଯାଏ, ତେବେ ତାହା ପରଦିନ ସୁଦ୍ଧା ଶୁଣାଇବା ସହ ୱେବସାଇଟରେ ଅପଲୋଡ୍ କରାଯିବା ଆବଶ୍ୟକ।

ସର୍ବୋଚ୍ଚ ନ୍ୟାୟାଳୟ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ଜାମିନ ପ୍ରଦାନ କିମ୍ବା ଦଣ୍ଡବିଧାନ ସ୍ଥଗିତ ରଖିବା ଆଦେଶ ତୁରନ୍ତ ଜେଲ କର୍ତ୍ତୃପକ୍ଷଙ୍କୁ ଜଣାଇବା ଉଚିତ। ଏହି ଆଦେଶ ପାଇବା ପରେ ବିଚାରାଧୀନ ବନ୍ଦୀ କିମ୍ବା ଦୋଷୀଙ୍କୁ ଯଥାସମ୍ଭବ ସେହି ଦିନ କିମ୍ବା ସର୍ବଶେଷରେ ପରଦିନ ଜେଲରୁ ମୁକ୍ତ କରାଯିବା ଉଚିତ।

ସମ୍ବିଧାନର ଧାରା ୧୪୨ ଅଧୀନରେ ଥିବା ସ୍ୱତନ୍ତ୍ର କ୍ଷମତାର ପ୍ରୟୋଗ କରି ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ଯେ, ଯଦି କେବଳ ରାୟର କାର୍ଯ୍ୟକାରୀ ଅଂଶ (operative portion) ଘୋଷଣା କରାଯାଏ, ତେବେ ସମ୍ପୂର୍ଣ୍ଣ କାରଣ ସହିତ ଥିବା ରାୟକୁ ୧୫ ଦିନ ମଧ୍ୟରେ ଅପଲୋଡ୍ କରାଯିବା ବାଧ୍ୟତାମୂଳକ। ଯଦି ରାୟ ସଂରକ୍ଷିତ ରଖିବାର ୪ ମାସ ମଧ୍ୟରେ ରାୟ ପ୍ରକାଶ ନପାଏ, ତେବେ ସମ୍ପୃକ୍ତ ପକ୍ଷ ଏହି ମାମଲାକୁ ଅନ୍ୟ ଏକ ଖଣ୍ଡପୀଠଙ୍କୁ ହସ୍ତାନ୍ତର କରିବା ପାଇଁ ହାଇକୋର୍ଟର ମୁଖ୍ୟ ବିଚାରପତିଙ୍କ ନିକଟରେ ଆବେଦନ କରିପାରିବେ। ଏହାସହ ଖୋଲା ଅଦାଲତରେ ରାୟ ଶୁଣାଣି ହେଲେ, ୨୪ ଘଣ୍ଟା ମଧ୍ୟରେ ଏହା ୱେବସାଇଟରେ ଉପଲବ୍ଧ ହେବା ଜରୁରୀ। ତେବେ ଏହି ନିର୍ଦ୍ଦେଶାବଳୀ କୌଣସି ନିର୍ଦ୍ଦିଷ୍ଟ ବିଚାରପତି କିମ୍ବା ହାଇକୋର୍ଟଙ୍କ ଉଦ୍ଦେଶ୍ୟରେ ଦିଆଯାଇନାହିଁ ବୋଲି ସର୍ବୋଚ୍ଚ ଅଦାଲତ ସ୍ପଷ୍ଟ କରିଛନ୍ତି।

ଭାରତୀୟ ମହିଳା କୁସ୍ତିବିତ୍ ଭିନେଶ ଫୋଗାଟ (Vinesh Phogat)ଙ୍କୁ ସୁପ୍ରିମକୋର୍ଟ (Supreme Court)ରୁ ଏକ ବଡ଼ ଆଶ୍ୱସ୍ତି ମିଳିଛି। ଆଗାମୀ ଏସିଆନ ଗେମ୍ସ ୨୦୨୬ (Asian Games 2026) ପାଇଁ ହେବାକୁ ଥିବା ଚୟନ ଟ୍ରାଏଲ୍ସରେ ଭାଗ ନେବାକୁ ସର୍ବୋଚ୍ଚ ନ୍ୟାୟାଳୟ ତାଙ୍କୁ ଅନୁମତି ପ୍ରଦାନ କରିଛନ୍ତି। ଏହି ନିଷ୍ପତ୍ତି ପରେ ଭିନେଶଙ୍କ ପାଇଁ ପୁଣିଥରେ ମ୍ୟାଟ୍‌କୁ ଫେରିବାର ବାଟ ଫିଟିଯାଇଛି।

ହାଇକୋର୍ଟଙ୍କ ରାୟ ଉପରେ ରୋକ୍ ଲଗାଇବାକୁ ମନା

ଏହା ପୂର୍ବରୁ ଦିଲ୍ଲୀ ହାଇକୋର୍ଟ ଭିନେଶଙ୍କ ସପକ୍ଷରେ ରାୟ ଶୁଣାଇ ତାଙ୍କୁ ଟ୍ରାଏଲ୍ସରେ ସାମିଲ ହେବାକୁ ଅନୁମତି ଦେଇଥିଲେ। ହାଇକୋର୍ଟଙ୍କ ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରି ଭାରତୀୟ କୁସ୍ତି ମହାସଂଘ (WFI) ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା। କିନ୍ତୁ ଜଷ୍ଟିସ୍ ପି.ଏସ୍. ନରସିଂହ ଏବଂ ଜଷ୍ଟିସ୍ ଆଲୋକ ଅରାଧେଙ୍କୁ ନେଇ ଗଠିତ ଖଣ୍ଡପୀଠ ହାଇକୋର୍ଟଙ୍କ ରାୟ ଉପରେ ରୋକ୍ ଲଗାଇବାକୁ ମନା କରିଦେଇଛନ୍ତି। ଫଳରେ ମେ' ୩୦ ଏବଂ ୩୧ ତାରିଖରେ ହେବାକୁ ଥିବା ଚୟନ ପ୍ରକ୍ରିୟାରେ ଭାଗ ନେବା ପାଇଁ ଭିନେଶଙ୍କ ରାସ୍ତା ସଫା ହୋଇଯାଇଛି। ଏହି ଅବସରରେ ସୁପ୍ରିମକୋର୍ଟ କହିଛନ୍ତି ଯେ, "ଆମେ ଆପଣଙ୍କୁ ଅଟକାଉ ନାହୁଁ, ଆପଣ ଯାଇ ଅଂଶଗ୍ରହଣ କରନ୍ତୁ"।

ଡୋପିଂ ଟେଷ୍ଟକୁ ନେଇ କୋର୍ଟଙ୍କ ଚିନ୍ତା

ଯଦିଓ ଟ୍ରାଏଲ୍ସରେ ଭାଗ ନେବାକୁ ତୁରନ୍ତ ଅନୁମତି ମିଳିଛି, ତଥାପି ଦିଲ୍ଲୀ ହାଇକୋର୍ଟଙ୍କ କାର୍ଯ୍ୟଶୈଳୀ ଏବଂ କିଛି ଆପତ୍ତିଜନକ ପ୍ରସଙ୍ଗରେ ସୁପ୍ରିମକୋର୍ଟ ନିଜର ଉଦ୍‌ବେଗ ପ୍ରକାଶ କରିଛନ୍ତି। ଖେଳାଳିଙ୍କ ଦ୍ୱାରା ଡୋପିଂ ଟେଷ୍ଟ ଏଡ଼ାଇବା ଘଟଣାକୁ କୋର୍ଟ ଏକ 'ଗମ୍ଭୀର ତ୍ରୁଟି' ବୋଲି ଦର୍ଶାଇଛନ୍ତି। ଖେଳର ସ୍ୱଚ୍ଛତା ଏବଂ ନିୟମାବଳୀ ସହିତ କୌଣସି ଆପୋଷ ବୁଝାମଣା କରାଯାଇପାରିବ ନାହିଁ ବୋଲି ଖଣ୍ଡପୀଠ ସ୍ପଷ୍ଟ କରିଛନ୍ତି। ଏହି ପ୍ରସଙ୍ଗରେ ନ୍ୟାୟାଳୟ ଡବ୍ଲ୍ୟୁଏଫ୍‌ଆଇର ଆବେଦନ ଉପରେ ନୋଟିସ୍ ଜାରି କରି ପରବର୍ତ୍ତୀ ସମୟରେ ବିସ୍ତୃତ ଶୁଣାଣି କରିବେ ବୋଲି ଜଣାଇଛନ୍ତି।

ମାତୃତ୍ୱ ଓ ଖେଳାଳିଙ୍କ ଅଧିକାର ବିବାଦ

ଏହି ଆଇନଗତ ଲଢ଼େଇଟି ମୁଖ୍ୟତଃ ଭିନେଶଙ୍କ ମାତୃତ୍ୱକାଳୀନ ଛୁଟି ଏବଂ ପରବର୍ତ୍ତୀ ସମୟରେ ତାଙ୍କର ଖେଳକୁ ପ୍ରତ୍ୟାବର୍ତ୍ତନ ସହ ଜଡ଼ିତ। ୨୦୨୫ ମସିହାରେ ମାଆ ହେବା ପରେ ଭିନେଶ କିଛି ସମୟ ପାଇଁ କୁସ୍ତି ମ୍ୟାଟ୍‌ରୁ ଦୂରେଇ ରହିଥିଲେ। ତେବେ ମ୍ୟାଚ୍ ଖେଳିନଥିବା କାରଣ ଦର୍ଶାଇ ଡବ୍ଲ୍ୟୁଏଫ୍‌ଆଇ ତାଙ୍କୁ ଟ୍ରାଏଲ୍ସରୁ ବାଦ୍ ଦେଇଥିଲା, ଯାହାକୁ ଦିଲ୍ଲୀ ହାଇକୋର୍ଟ ସମ୍ପୂର୍ଣ୍ଣ ଭେଦଭାବମୂଳକ ଏବଂ ଅଗ୍ରହଣୀୟ ବୋଲି ଦର୍ଶାଇଥିଲେ। ସୁପ୍ରିମକୋର୍ଟଙ୍କ ସଦ୍ୟତମ ଅନୁମତି ଭିନେଶଙ୍କ ପରି ଅନ୍ତର୍ଜାତୀୟସ୍ତରରେ ଦେଶ ପାଇଁ ଗୌରବ ଆଣିଥିବା ମହିଳା ଆଥଲେଟ୍‌ମାନଙ୍କ ପାଇଁ ଏକ ବଡ଼ ବିଜୟ ବୋଲି ବିବେଚନା କରାଯାଉଛି।

ଭାରତୀୟ ନିର୍ବାଚନ ଆୟୋଗ (ECI) ଦ୍ୱାରା ପରିଚାଳିତ ଭୋଟର ତାଲିକାର 'ସ୍ୱତନ୍ତ୍ର ସଘନ ସଂଶୋଧନ' (SIR) ପ୍ରକ୍ରିୟାକୁ ସୁପ୍ରିମକୋର୍ଟ ବୈଧ ବୋଲି ଘୋଷଣା କରିଛନ୍ତି। ବୁଧବାର ଦିନ ପ୍ରକାଶ ପାଇଥିବା ଏହି ରାୟରେ ସର୍ବୋଚ୍ଚ ନ୍ୟାୟାଳୟ ସ୍ପଷ୍ଟ କରିଛନ୍ତି ଯେ ଏହି ପ୍ରକ୍ରିୟା କରିବା ପାଇଁ ନିର୍ବାଚନ ଆୟୋଗଙ୍କର ପୂର୍ଣ୍ଣ କ୍ଷମତା ରହିଛି ଏବଂ ସେମାନେ କୌଣସି ସାମ୍ବିଧାନିକ କିମ୍ବା ଆଇନଗତ ବ୍ୟବସ୍ଥାର ଉଲ୍ଲଂଘନ କରିନାହାନ୍ତି।

ନିର୍ବାଚନ ଆୟୋଗଙ୍କ କ୍ଷମତାକୁ ସୁପ୍ରିମକୋର୍ଟଙ୍କ ସମର୍ଥନ

ସୁପ୍ରିମକୋର୍ଟର ମୁଖ୍ୟ ବିଚାରପତି ସୂର୍ଯ୍ୟକାନ୍ତ ଏବଂ ବିଚାରପତି ଜୟମାଲ୍ୟ ବାଗଚିଙ୍କୁ ନେଇ ଗଠିତ ଖଣ୍ଡପୀଠ ଏହି ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। କୋର୍ଟ କହିଛନ୍ତି ଯେ ନିର୍ବାଚନ ଆୟୋଗ ନିଜର ଆଇନଗତ କ୍ଷମତା ବାହାରକୁ ଯାଇ କୌଣସି ପଦକ୍ଷେପ ନେଇନାହାନ୍ତି। ଏହାସହ, 'ସ୍ୱତନ୍ତ୍ର ସଘନ ସଂଶୋଧନ' (SIR) ଅଭିଯାନର ଅବାଧ ଓ ନିରପେକ୍ଷ ନିର୍ବାଚନ ସହ ସିଧାସଳଖ ସମ୍ପର୍କ ରହିଛି ବୋଲି କୋର୍ଟ ଉଲ୍ଲେଖ କରିଛନ୍ତି। ଭୋଟର ତାଲିକାରେ ସ୍ୱଚ୍ଛତା ଆଣିବା ନିର୍ବାଚନ ଆୟୋଗଙ୍କ ସାମ୍ବିଧାନିକ ଦାୟିତ୍ୱ ଅଟେ।

କ'ଣ ଥିଲା ବିବାଦ?

ଗତ କିଛି ମାସ ଧରି ବିହାର ଏବଂ ପଶ୍ଚିମବଙ୍ଗ ସମେତ ବିଭିନ୍ନ ରାଜ୍ୟରେ ଏହି SIR ଅଭିଯାନକୁ ନେଇ ବ୍ୟାପକ ବିବାଦ ଦେଖାଦେଇଥିଲା। ଆବେଦନକାରୀମାନେ ଅଭିଯୋଗ କରିଥିଲେ ଯେ, ନିର୍ବାଚନ ଆୟୋଗ ଏହି ପ୍ରକ୍ରିୟା ମାଧ୍ୟମରେ ସାଧାରଣ ଭୋଟର ଏବଂ ବିଶେଷ କରି ସୀମାନ୍ତବର୍ତ୍ତୀ ପ୍ରବାସୀମାନଙ୍କୁ ଭୋଟଦାନ ଅଧିକାରରୁ ବଞ୍ଚିତ କରିବାକୁ ପ୍ରୟାସ କରୁଛନ୍ତି। ଏହା ସମ୍ବିଧାନର ଧାରା ୩୨୬ ଏବଂ ଲୋକପ୍ରତିନିଧି ଆଇନ, ୧୯୫୦ ର ଉଲ୍ଲଂଘନ କରୁଛି ବୋଲି ସେମାନେ ନିଜ ଯୁକ୍ତି ବାଢ଼ିଥିଲେ। ଭୋଟର ତାଲିକାରେ ନାମ ଯାଞ୍ଚ କରିବା ଆଳରେ ନାଗରିକତ୍ୱ ପ୍ରମାଣ ମାଗିବା ବେଆଇନ ବୋଲି ମଧ୍ୟ ଦର୍ଶାଯାଇଥିଲା।

ସ୍ୱଚ୍ଛ ନିର୍ବାଚନ ପାଇଁ ଗୁରୁତ୍ୱପୂର୍ଣ୍ଣ

ସମସ୍ତ ପକ୍ଷର ଯୁକ୍ତି ଶୁଣିବା ପରେ ସୁପ୍ରିମକୋର୍ଟ ଏହି ଆବେଦନଗୁଡ଼ିକୁ ଖାରଜ କରିଦେଇଛନ୍ତି। କୋର୍ଟ ସ୍ପଷ୍ଟ କରିଛନ୍ତି ଯେ, ନିର୍ବାଚନ ଆୟୋଗ ଗ୍ରହଣ କରିଥିବା ପଦକ୍ଷେପଗୁଡ଼ିକ ଆନୁପାତିକ ଅଟେ ଏବଂ ଏହାକୁ ଅତ୍ୟଧିକ କିମ୍ବା ବେଆଇନ କୁହାଯାଇପାରିବ ନାହିଁ। ତ୍ରୁଟିମୁକ୍ତ ଭୋଟର ତାଲିକା ଏକ ସୁସ୍ଥ ଗଣତାନ୍ତ୍ରିକ ବ୍ୟବସ୍ଥାର ମୂଳଦୁଆ ହୋଇଥିବାରୁ ଏହି ଯାଞ୍ଚ ପ୍ରକ୍ରିୟା ଆଗାମୀ ନିର୍ବାଚନଗୁଡ଼ିକୁ ଅଧିକ ସ୍ୱଚ୍ଛ ଏବଂ ନିରପେକ୍ଷ କରିବାରେ ବେଶ୍ ସାହାଯ୍ୟ କରିବ ବୋଲି ସର୍ବୋଚ୍ଚ ନ୍ୟାୟାଳୟ ମତବ୍ୟକ୍ତ କରିଛନ୍ତି।

ବହୁ ଚର୍ଚ୍ଚିତ ତ୍ୱିଷା ଶର୍ମା ମୃତ୍ୟୁ ମାମଲାରେ ସୁପ୍ରିମକୋର୍ଟଙ୍କ ହସ୍ତକ୍ଷେପ ପରେ ଏବେ ତଦନ୍ତ ଭାର କେନ୍ଦ୍ରୀୟ ତଦନ୍ତ ବ୍ୟୁରୋ ବା ସିବିଆଇ (CBI) ହାତକୁ ଯାଇଛି। ମୃତକଙ୍କ ଶାଶୁଘର ପକ୍ଷର ପ୍ରଭାବଶାଳୀ ପୃଷ୍ଠଭୂମି ଯୋଗୁଁ ତଦନ୍ତ ପ୍ରକ୍ରିୟାରେ ପକ୍ଷପାତିତା ହେବାର ଆଶଙ୍କା କରି ସର୍ବୋଚ୍ଚ ନ୍ୟାୟାଳୟ ନିଜ ଆଡୁ ଏହି ମାମଲାର ବିଚାର କରିଥିଲେ।

ଗତ ମେ ୧୨, ୨୦୨୬ ତାରିଖ ଦିନ ମଧ୍ୟପ୍ରଦେଶର ଭୋପାଳ ସ୍ଥିତ କାଟାରା ହିଲ୍ସ ଅଞ୍ଚଳରେ ଥିବା ନିଜ ଶାଶୁଘରୁ ୩୩ ବର୍ଷୀୟା ପୂର୍ବତନ ଅଭିନେତ୍ରୀ ତଥା ମଡେଲ ତ୍ୱିଷା ଶର୍ମାଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଥିଲା। ଏହି ଘଟଣାରେ ତାଙ୍କ ସ୍ୱାମୀ ତଥା ଆଇନଜୀବୀ ସମର୍ଥ ସିଂହ ଏବଂ ଶାଶୁ ତଥା ଅବସରପ୍ରାପ୍ତ ଜିଲ୍ଲା ଜଜ୍ ଗିରିବାଳା ସିଂହଙ୍କ ନାମରେ ଯୌତୁକ ନିର୍ଯାତନା ଓ ହତ୍ୟା ଅଭିଯୋଗ ଆଣିଥିଲେ ତ୍ୱିଷାଙ୍କ ପରିବାର।

ସିବିଆଇର ତଦନ୍ତ ଆରମ୍ଭ

ସୋମବାର ଦିନ ସିବିଆଇ ପକ୍ଷରୁ ଭୋପାଳର କାଟାରା ହିଲ୍ସ ପୋଲିସ ଷ୍ଟେସନରେ ରୁଜୁ ହୋଇଥିବା ମୂଳ ଏଫଆଇଆରକୁ ପୁନଃ ପଞ୍ଜୀକରଣ କରାଯାଇଛି। ସିବିଆଇର ଏକ ସ୍ୱତନ୍ତ୍ର ଟିମ୍ ଭୋପାଳରେ ପହଞ୍ଚି ମଙ୍ଗଳବାରଠାରୁ କ୍ଷେତ୍ରସ୍ତରୀୟ ତଦନ୍ତ ଆରମ୍ଭ କରିବେ। ଭାରତୀୟ ନ୍ୟାୟ ସଂହିତା (BNS)ର ଧାରା ୮୦(୨), ୮୫ ଏବଂ ୩(୫) ସହିତ ଯୌତୁକ ନିଷେଧ ଆଇନର ଧାରା ୩ ଏବଂ ୪ ଅଧୀନରେ ମାମଲା ରୁଜୁ କରାଯାଇଛି।

ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ

ଘଟଣାର ସମ୍ବେଦନଶୀଳତାକୁ ଦୃଷ୍ଟିରେ ରଖି ବିଚାରପତି ସୂର୍ଯ୍ୟକାନ୍ତଙ୍କ ନେତୃତ୍ୱରେ ଗଠିତ ସୁପ୍ରିମକୋର୍ଟଙ୍କ ଏକ ଖଣ୍ଡପୀଠ ଏହି ମାମଲାର ନିରପେକ୍ଷ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ତଦନ୍ତ ପ୍ରକ୍ରିୟା ବାଧାପ୍ରାପ୍ତ ନହେବା ପାଇଁ ଗଣମାଧ୍ୟମରେ କୌଣସି ବୟାନବାଜି ନକରିବାକୁ କୋର୍ଟ ଉଭୟ ପରିବାର ଏବଂ ଗଣମାଧ୍ୟମକୁ ତାଗିଦ କରିଛନ୍ତି। ଶୁଣାଣି ସମୟରେ ସଲିସିଟର ଜେନେରାଲ ତୁଷାର ମେହେଟ୍ଟା କହିଥିଲେ ଯେ, 'ପିତାମାତାଙ୍କ ପାଇଁ ଏକ ମୃତ ଝିଅ ଅପେକ୍ଷା ଛାଡ଼ପତ୍ର ନେଇଥିବା ଝିଅ ବଞ୍ଚି ରହିବା ଢେର ଭଲ'।

ଅଭିଯୁକ୍ତଙ୍କ ସ୍ଥିତି ଓ ଯୌତୁକ ନିର୍ଯାତନା ଅଭିଯୋଗ

ଘଟଣାର ୧୦ ଦିନ ପରେ ସ୍ୱାମୀ ସମର୍ଥ ସିଂହ ଆତ୍ମସମର୍ପଣ କରିଥିବା ବେଳେ ବର୍ତ୍ତମାନ ସେ ୭ ଦିନିଆ ପୋଲିସ ରିମାଣ୍ଡରେ ଅଛନ୍ତି। ସେହିପରି ଶାଶୁ ଗିରିବାଳା ସିଂହ ଆଗୁଆ ଜାମିନ ପାଇଥିବା ବେଳେ ଏହାକୁ ରାଜ୍ୟ ସରକାର ଏବଂ ତ୍ୱିଷାଙ୍କ ପିତା ହାଇକୋର୍ଟରେ ଚ୍ୟାଲେଞ୍ଜ କରିଛନ୍ତି। ତ୍ୱିଷାଙ୍କ ପରିବାରର ଅଭିଯୋଗ ଅନୁଯାୟୀ, ବିବାହ ସମୟରେ ବିଦାୟୀ ବେଳେ ଗିରିବାଳା ସିଂହଙ୍କ ଦାବି ମୁତାବକ ତାଙ୍କୁ ଅତିରିକ୍ତ ୨ ଲକ୍ଷ ଟଙ୍କା ଯୌତୁକ ଆକାରରେ ଦିଆଯାଇଥିଲା।