ନୂଆଦିଲ୍ଲୀ: କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE) ପକ୍ଷରୁ ସ୍ପଷ୍ଟ କରାଯାଇଛି ଯେ, ଖାତା ପୁନଃମୂଲ୍ୟାୟନ ଏବଂ ମାର୍କ ଭେରିଫିକେସନ୍ ପୋର୍ଟାଲ୍ ଆରମ୍ଭ ହେବା ଦିନ ଏକାଧିକ ସାଇବର ଆକ୍ରମଣର ସମ୍ମୁଖୀନ ହୋଇଥିଲା। ତେବେ ଏହା ସତ୍ତ୍ୱେ ପୋର୍ଟାଲଟି ସମ୍ପୂର୍ଣ୍ଣ ରୂପେ କାର୍ଯ୍ୟକ୍ଷମ ରହିଛି। ବୋର୍ଡର ସୂଚନା ଅନୁଯାୟୀ, ନିର୍ଦ୍ଧାରିତ ସମୟ ସକାଳ ୭ଟାରୁ ଏହି ପୋର୍ଟାଲ୍ ଲାଇଭ୍ ହୋଇଥିଲା ଏବଂ ସୁରୁଖୁରୁରେ କାମ କରୁଛି।

ସିବିଏସ୍ଇ ଅଧିକାରୀମାନେ କହିଛନ୍ତି ଯେ, ଯେତେବେଳେ ହଜାର ହଜାର ଛାତ୍ରଛାତ୍ରୀ ଏକକାଳୀନ ମାର୍କ ଭେରିଫିକେସନ୍ ଏବଂ ଉତ୍ତରଖାତା ପୁନଃମୂଲ୍ୟାୟନ ପାଇଁ ଲଗ୍ ଇନ୍ କରିଥିଲେ, ସେତେବେଳେ ପ୍ଲାଟଫର୍ମକୁ ଡିନାଏଲ୍-ଅଫ୍-ସର୍ଭିସ୍ (DoS) ଆକ୍ରମଣ ମାଧ୍ୟମରେ ଟାର୍ଗେଟ୍ କରାଯାଇଥିଲା। ରିପୋର୍ଟ ଅନୁଯାୟୀ ମାତ୍ର ୨ ମିନିଟରେ ୧.୫ ନିୟୁତ (୧.୫ ମିଲିୟନ୍) ସାଇବର ଆକ୍ରମଣ ଉଦ୍ୟମ ହୋଇଥିଲା। ଏହି ବିପୁଳ ଟ୍ରାଫିକ୍ ଏବଂ ଅବାଞ୍ଛିତ କାର୍ଯ୍ୟକଳାପ ସତ୍ତ୍ୱେ ବୋର୍ଡର ବୈଷୟିକ ଟିମ୍ ପୋର୍ଟାଲକୁ କାର୍ଯ୍ୟକ୍ଷମ ରଖିବାରେ ସଫଳ ହୋଇଥିଲା। ପ୍ରଥମ ଦିନରେ ୧୬,୦୦୦ ରୁ ଅଧିକ ଛାତ୍ରଛାତ୍ରୀ ପୋର୍ଟାଲ ମାଧ୍ୟମରେ ଆବେଦନ କରିଥିଲେ, ଯାହା ସିଷ୍ଟମ୍ ଉପରେ ପ୍ରବଳ ଭାର ପକାଇଥିଲା।

ଏହି ସାଇବର ବିପଦ ସତ୍ତ୍ୱେ ଦ୍ୱାଦଶ ଶ୍ରେଣୀ (Class 12) ଛାତ୍ରଛାତ୍ରୀଙ୍କ ପାଇଁ ପୁନଃମୂଲ୍ୟାୟନ ଏବଂ ଭେରିଫିକେସନ୍ ପ୍ରକ୍ରିୟା ନିର୍ଦ୍ଧାରିତ ସୂଚୀ ଅନୁଯାୟୀ ଜାରି ରହିବ ବୋଲି ସିବିଏସ୍ଇ ପକ୍ଷରୁ କୁହାଯାଇଛି। ପୋର୍ଟାଲ୍ ବ୍ୟବହାର କରିବା ସମୟରେ କେବଳ ସରକାରୀ ବା ଅଫିସିଆଲ୍ ଚ୍ୟାନେଲ୍ ବ୍ୟବହାର କରିବାକୁ ବୋର୍ଡ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଛି। ଏଥିସହ କୌଣସି ବୈଷୟିକ ସମସ୍ୟା ଦେଖାଦେଲେ ତୁରନ୍ତ ନିର୍ଦ୍ଧାରିତ ସପୋର୍ଟ ସିଷ୍ଟମ୍ ମାଧ୍ୟମରେ ଜଣାଇବାକୁ ଅନୁରୋଧ କରାଯାଇଛି। ପରୀକ୍ଷା ପରିଚାଳନା ସଂସ୍ଥାଗୁଡ଼ିକ ଗୁରୁତ୍ୱପୂର୍ଣ୍ଣ ପ୍ରକ୍ରିୟାକୁ ଅଧିକରୁ ଅଧିକ ଅନଲାଇନ୍ କରୁଥିବାରୁ, ଏହି ଘଟଣା ବୃହତ୍ତର ଶିକ୍ଷାନୁଷ୍ଠାନଗୁଡ଼ିକ ସମ୍ମୁଖୀନ ହେଉଥିବା ସାଇବର ସୁରକ୍ଷା ଚ୍ୟାଲେଞ୍ଜକୁ ପୁଣିଥରେ ସାମ୍ନାକୁ ଆଣିଛି।

ଦେଶରେ ନିଟ୍-ୟୁଜି (NEET-UG) ପରୀକ୍ଷା ପ୍ରଶ୍ନପତ୍ର ଲିକ୍ ହେବା ପରେ କେନ୍ଦ୍ର ସରକାର ଏବେ ଆଲର୍ଟ ମୋଡ୍‌ରେ ଅଛନ୍ତି। ଆସନ୍ତା ଜୁନ୍ ୨୧ ତାରିଖରେ ହେବାକୁ ଥିବା ରି-ଟେଷ୍ଟ୍ ବା ପୁନଃ ପରୀକ୍ଷାକୁ ସମ୍ପୂର୍ଣ୍ଣ 'ଫୁଲପ୍ରୁଫ୍' ତଥା ତ୍ରୁଟିଶୂନ୍ୟ କରିବା ପାଇଁ ସରକାର ଏକ ଅଭୂତପୂର୍ବ ପଦକ୍ଷେପ ନେବାକୁ ଯାଉଛନ୍ତି। ସୂଚନା ଅନୁଯାୟୀ, ପରୀକ୍ଷା କେନ୍ଦ୍ରଗୁଡ଼ିକରେ କଡ଼ା ସୁରକ୍ଷା ବଳୟ ମଧ୍ୟରେ ପ୍ରଶ୍ନପତ୍ର ପହଞ୍ଚାଇବା ପାଇଁ ଭାରତୀୟ ବାୟୁସେନା (IAF) ବିମାନର ବ୍ୟବହାର କରାଯିବା ନେଇ ସରକାର ଗମ୍ଭୀରତାର ସହ ବିଚାର କରୁଛନ୍ତି।

ପ୍ରତିରକ୍ଷା ମନ୍ତ୍ରୀଙ୍କ ଅଧ୍ୟକ୍ଷତାରେ ଗୁରୁତ୍ୱପୂର୍ଣ୍ଣ ବୈଠକ

ଏହି ରଣନୀତିକ ପଦକ୍ଷେପକୁ ନେଇ ନୂଆଦିଲ୍ଲୀଠାରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ଯୋଗାଯୋଗ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଉପସ୍ଥିତ ଥିଲେ। ଏହା ସହିତ ନ୍ୟାସନାଲ୍ ଟେଷ୍ଟିଂ ଏଜେନ୍ସି (NTA)ର ମହାନିର୍ଦ୍ଦେଶକ ଅଭିଷେକ ସିଂହ ଏବଂ ଶିକ୍ଷା ମନ୍ତ୍ରଣାଳୟର ଅନେକ ବରିଷ୍ଠ ଅଧିକାରୀ ମଧ୍ୟ ଏହି ଆଲୋଚନାରେ ଭାଗ ନେଇଥିଲେ। ପରୀକ୍ଷା ପ୍ରଶ୍ନପତ୍ର ପ୍ରସ୍ତୁତିଠାରୁ ଆରମ୍ଭ କରି ପ୍ରିଣ୍ଟିଂ ଏବଂ ସୁରକ୍ଷିତ ଟ୍ରାନ୍ସପୋର୍ଟେସନ୍ ପର୍ଯ୍ୟନ୍ତ ସମସ୍ତ ବିଷୟ ଉପରେ ଏହି ବୈଠକରେ ଟିକିନିଖି ଆଲୋଚନା କରାଯାଇଛି।

ପ୍ରଧାନମନ୍ତ୍ରୀ ନେବେ ଚୂଡ଼ାନ୍ତ ନିଷ୍ପତ୍ତି

ସରକାରୀ ସୂତ୍ରରୁ ମିଳିଥିବା ସୂଚନା ମୁତାବକ, ବାୟୁସେନା ବିମାନ ବ୍ୟବହାର କରିବାର ପ୍ରସ୍ତାବ ଉପରେ ଏଯାଏଁ କୌଣସି ଚୂଡ଼ାନ୍ତ ମୋହର ବାଜିନାହିଁ। ଏହି ପ୍ରସ୍ତାବକୁ ଚୂଡ଼ାନ୍ତ ଅନୁମୋଦନ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିକଟରେ ଉପସ୍ଥାପନ କରାଯିବ। ପ୍ରଧାନମନ୍ତ୍ରୀ ନିଜେ ବ୍ୟକ୍ତିଗତ ଭାବେ ଆଗାମୀ ଜୁନ୍ ୨୧ ତାରିଖରେ ହେବାକୁ ଥିବା ପୁନଃ ପରୀକ୍ଷାର ସମସ୍ତ ପ୍ରସ୍ତୁତିର ମନିଟରିଂ କରୁଛନ୍ତି।

ଆହ୍ୱାନ ପାଲଟିଛି ମୌସୁମୀ

ପ୍ରଶ୍ନପତ୍ର ଲିକ୍ ଅଭିଯୋଗ ଆସିବା ପରେ ମେ ୩ ତାରିଖରେ ଅନୁଷ୍ଠିତ ହୋଇଥିବା ପରୀକ୍ଷାକୁ ବାତିଲ କରାଯାଇଥିଲା। ବର୍ତ୍ତମାନ ମାତ୍ର ୩୮ ଦିନର କମ୍ ସମୟ ମଧ୍ୟରେ ପୁନର୍ବାର ସାରା ଦେଶରେ ପରୀକ୍ଷା ଆୟୋଜନ କରିବା NTA ପାଇଁ ଏକ ବଡ଼ ଆହ୍ୱାନ। ଏହା ସହିତ ବର୍ତ୍ତମାନର ମୌସୁମୀ ଋତୁ ଏବଂ ଖରାପ ପାଗ ଯୋଗୁଁ ଲାକ୍ଷାଦ୍ୱୀପ ଭଳି ଦୂରଦୂରାନ୍ତ ଅଞ୍ଚଳକୁ ସୁରକ୍ଷିତ ଭାବେ ପ୍ରଶ୍ନପତ୍ର ପଠାଇବା ପାଇଁ ବାୟୁସେନାର ସହାୟତା ଜରୁରୀ ବୋଲି ବିବେଚନା କରାଯାଉଛି। ଏହା ବ୍ୟତୀତ ବ୍ୟାଙ୍କଗୁଡ଼ିକ ସହ ଅନ୍ୟାନ୍ୟ ଅତ୍ୟନ୍ତ ସୁରକ୍ଷିତ ସ୍ଥାନରେ ପ୍ରଶ୍ନପତ୍ର ରଖିବା ପାଇଁ ବ୍ୟବସ୍ଥା କରାଯାଉଛି।

ଦେଶର ସବୁଠାରୁ ବଡ଼ ମେଡିକାଲ୍ ପ୍ରବେଶିକା ପରୀକ୍ଷା ନିଟ୍ (NEET) କୁ ନେଇ ଏକ ବଡ଼ ନିଷ୍ପତ୍ତି ନିଆଯାଇଛି। ଆସନ୍ତା ବର୍ଷଠାରୁ ଏହି ପରୀକ୍ଷା ଅଫଲାଇନ୍ ବଦଳରେ ସମ୍ପୂର୍ଣ୍ଣ ରୂପେ ଅନଲାଇନ୍ ମୋଡ୍‌ରେ କରାଯିବ। ଏଣିକି ପରୀକ୍ଷାର୍ଥୀମାନଙ୍କୁ ଆଉ ଓଏମ୍‌ଆର୍ (OMR) ସିଟ୍ ଦିଆଯିବ ନାହିଁ। କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ଗୁରୁତ୍ୱପୂର୍ଣ୍ଣ ସୂଚନା ପ୍ରଦାନ କରିଛନ୍ତି।

ପେପର ଲିକ୍ ବିବାଦ ପରେ ବଡ଼ ପରିବର୍ତ୍ତନ

ଚଳିତ ବର୍ଷ ନିଟ୍ ୨୦୨୬ (NEET 2026) ପରୀକ୍ଷାରେ ପେପର ଲିକ୍ ଅଭିଯୋଗ ଆସିବା ପରେ ସାରା ଦେଶରେ ଛାତ୍ରଛାତ୍ରୀ ଓ ଅଭିଭାବକମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଥିଲା। ଏହି ଘଟଣାକୁ ଗମ୍ଭୀରତାର ସହ ନେଇ ନ୍ୟାସନାଲ ଟେଷ୍ଟିଂ ଏଜେନ୍ସି ବା ଏନଟିଏ (NTA) ପକ୍ଷରୁ ପୁନଃ ପରୀକ୍ଷା କରିବା ପାଇଁ ଘୋଷଣା କରାଯାଇଛି। ଏହି ବିବାଦ ପରେ ପରୀକ୍ଷା ବ୍ୟବସ୍ଥାରେ ସ୍ୱଚ୍ଛତା ଆଣିବା ଉଦ୍ଦେଶ୍ୟରେ ସରକାର ଏହି ବଡ଼ ପରିବର୍ତ୍ତନ କରିବାକୁ ନିଷ୍ପତ୍ତି ନେଇଛନ୍ତି। ପାରମ୍ପରିକ ପେନ୍ ଓ ପେପର୍ ବଦଳରେ ଏଣିକି କମ୍ପ୍ୟୁଟର ବେସଡ୍ ଟେଷ୍ଟ ବା ସିବିଟି (CBT) ମୋଡ୍‌ରେ ପରୀକ୍ଷା ପରିଚାଳନା କରାଯିବ।

ଶିକ୍ଷା ମନ୍ତ୍ରୀଙ୍କ ପ୍ରତିଶ୍ରୁତି ଓ ସ୍ୱଚ୍ଛତା ଉପରେ ଗୁରୁତ୍ୱ

ଏହି ନିଷ୍ପତ୍ତି ସମ୍ପର୍କରେ ସୂଚନା ଦେଇ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ଭବିଷ୍ୟତରେ ଯେପରି କୌଣସି ପେପର ଲିକ୍ ଭଳି ଘଟଣା ନଘଟେ ଏବଂ ପରୀକ୍ଷା ପ୍ରକ୍ରିୟାରେ ଶତପ୍ରତିଶତ ସ୍ୱଚ୍ଛତା ବଜାୟ ରୁହେ, ସେଥିପାଇଁ ଅନଲାଇନ୍ ପରୀକ୍ଷା ବ୍ୟବସ୍ଥା ଆପଣାଇବା ନିତାନ୍ତ ଆବଶ୍ୟକ ହୋଇପଡ଼ିଛି। ମେଡିକାଲ୍ ପାଠ୍ୟକ୍ରମରେ ନାମଲେଖା ପାଇଁ ଆଶାୟୀ ଥିବା ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତ ସହ କୌଣସି ପ୍ରକାରର ଆପୋଷ ବୁଝାମଣା କରାଯିବ ନାହିଁ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।

ଏନଟିଏ (NTA) ର ପୁନଃ ପରୀକ୍ଷା ପ୍ରସ୍ତୁତି

ସୂଚନାଯୋଗ୍ୟ ଯେ, ପେପର ଲିକ୍ ପ୍ରମାଣିତ ହେବା ପରେ ଏନଟିଏ ଦ୍ୱାରା ପ୍ରଭାବିତ ଛାତ୍ରଛାତ୍ରୀଙ୍କ ପାଇଁ ପୁନଃ ପରୀକ୍ଷା ସମ୍ପର୍କରେ ତାରିଖ ଘୋଷଣା କରାଯାଇଛି। ସରକାର ଓ ପରୀକ୍ଷା ପରିଚାଳନା କମିଟିର ଏହି ପଦକ୍ଷେପ ଦ୍ୱାରା ଭବିଷ୍ୟତରେ ପ୍ରବେଶିକା ପରୀକ୍ଷା ଗୁଡ଼ିକ ଅଧିକ ନିର୍ଭରଯୋଗ୍ୟ ଏବଂ ତ୍ରୁଟିଶୂନ୍ୟ ହେବ ବୋଲି ଆଶା କରାଯାଉଛି।

ନୂଆଦିଲ୍ଲୀ: ଜୁନ ୨୧ରେ ହେବ ନିଟ-ୟୁଜି ପରୀକ୍ଷା । ଜାତୀୟ ପରୀକ୍ଷା ଏଜେନ୍ସି ବା ନ୍ୟାସନାଲ୍ ଟେଷ୍ଟିଂ ଏଜେନ୍ସି (NTA) ପକ୍ଷରୁ ନିଟ୍ ୟୁଜି (NEET UG) ୨୦୨୬ ର ପୁନଃ ପରୀକ୍ଷା ତାରିଖ ସମ୍ପର୍କରେ ଏକ ବଡ଼ ଘୋଷଣା କରାଯାଇଛି। ସରକାରୀ ସୂଚନା ଅନୁଯାୟୀ, ଆସନ୍ତା ୨୧ ଜୁନ୍ ୨୦୨୬, ରବିବାର ଦିନ ଏହି ମେଡିକାଲ୍ ପ୍ରବେଶିକା ପରୀକ୍ଷା ପୁନର୍ବାର ଅନୁଷ୍ଠିତ ହେବ। ଭାରତ ସରକାରଙ୍କ ଅନୁମୋଦନ କ୍ରମେ ଏହି ନିଷ୍ପତ୍ତି ନିଆଯାଇଥିବା ଏନଟିଏ (NTA) ପକ୍ଷରୁ ସ୍ପଷ୍ଟ କରାଯାଇଛି।

ପୂର୍ବରୁ ୩ ମେ ୨୦୨୬ ରେ ଅନୁଷ୍ଠିତ ହୋଇଥିବା ପରୀକ୍ଷାରେ କେତେକ ଅନିୟମିତତା ଅଭିଯୋଗ ଆସିବା ପରେ କର୍ତ୍ତୃପକ୍ଷ ଏହି ପରୀକ୍ଷାକୁ ବାତିଲ୍ କରିଥିଲେ। ଛାତ୍ରଛାତ୍ରୀମାନଙ୍କ ଭବିଷ୍ୟତ ଏବଂ ପରୀକ୍ଷାର ସ୍ୱଚ୍ଛତାକୁ ଦୃଷ୍ଟିରେ ରଖି ଏକ ସାନି ପରୀକ୍ଷା କରାଇବାକୁ ନିଷ୍ପତ୍ତି ନିଆଯାଇଥିଲା। ବର୍ତ୍ତମାନ ଏହି ପୁନଃ ପରୀକ୍ଷା ୨୧ ଜୁନ୍ ରେ ହେବାକୁ ଥିବାରୁ, ପରୀକ୍ଷାର୍ଥୀଙ୍କୁ ପ୍ରସ୍ତୁତି ପାଇଁ ଅଧିକ ସୁଯୋଗ ମିଳିଛି।

ଏନଟିଏ (NTA) ନିଜର ଅଫିସିଆଲ୍ ଏକ୍ସ (X) ଆକାଉଣ୍ଟ ଜରିଆରେ ଏହି ଗୁରୁତ୍ୱପୂର୍ଣ୍ଣ ସୂଚନା ପ୍ରଦାନ କରିଛି। ଏଥିସହ ସଂସ୍ଥା ପକ୍ଷରୁ ଛାତ୍ରଛାତ୍ରୀ ଏବଂ ଅଭିଭାବକମାନଙ୍କୁ ଏକ ସ୍ୱତନ୍ତ୍ର ପରାମର୍ଶ ଦିଆଯାଇଛି। କୁହାଯାଇଛି ଯେ, ନିଟ୍ ଭଳି ଗୁରୁତ୍ୱପୂର୍ଣ୍ଣ ପରୀକ୍ଷାକୁ ନେଇ ସୋସିଆଲ୍ ମିଡିଆରେ ଅନେକ ଗୁଜବ ଏବଂ ଭୁଲ୍ ଖବର ପ୍ରସାରିତ ହେଉଛି। ତେଣୁ ଏଭଳି ଅସତ୍ୟ ଖବର ପ୍ରତି ଧ୍ୟାନ ନଦେଇ, କେବଳ NTA ର ଅଫିସିଆଲ୍ ୱେବସାଇଟ୍ ଏବଂ ଆଧିକାରିକ ପ୍ଲାଟଫର୍ମରୁ ଆସୁଥିବା ସୂଚନା ଉପରେ ବିଶ୍ୱାସ କରିବାକୁ ଅନୁରୋଧ କରାଯାଇଛି।

ନୂଆଦିଲ୍ଲୀ: ପ୍ରକାଶ ପାଇଲା ସିବିଏସଇ ଦ୍ବାଦଶ ପରୀକ୍ଷା ରେଜଲ୍ଟ । ପରୀକ୍ଷାର୍ଥୀମାନେ ଅଫିସିଆଲ୍ ୱେବସାଇଟ୍ ଯେପରିକି results.cbse.nic.in, cbse.gov.in, ଏବଂ digilocker.gov.in ମାଧ୍ୟମରେ ସେମାନଙ୍କର ମାର୍କ ଦେଖିପାରିବେ। ଏହା ବ୍ୟତୀତ UMANG ମୋବାଇଲ୍ ଆପ୍ ଏବଂ ଏସଏମଏସ୍ (SMS) ସେବା ମାଧ୍ୟମରେ ମଧ୍ୟ ଫଳାଫଳ ଉପଲବ୍ଧ ଅଛି। ଚଳିତବର୍ଷ ପାସ୍‌ ହାର ୮୫.୨୦% ରହିଛି । ଗତବର୍ଷ ତୁଳନାରେ ପରୀକ୍ଷା ପାସ୍ ହାର ୩.୧୯% କମ୍ । ଗତବର୍ଷ ପାସ୍ ହାର ୮୮.୯୩% ରହିଥିଲା ।

କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE) ପକ୍ଷରୁ ବୁଧବାର ଅପରାହ୍ନରେ ୨୦୨୬ ଦ୍ୱାଦଶ ଶ୍ରେଣୀ ଫଳାଫଳ ପ୍ରକାଶ ପାଇଛି। ଚଳିତ ବର୍ଷ ସିବିଏସ୍ଇ ଦ୍ୱାଦଶ ଶ୍ରେଣୀ ପରୀକ୍ଷା ପାଇଁ ମୋଟ ୧୭,୮୦,୩୬୫ ଜଣ ଛାତ୍ରଛାତ୍ରୀ ପଞ୍ଜିକରଣ କରିଥିବା ବେଳେ ସେମାନଙ୍କ ମଧ୍ୟରୁ ୧୭,୬୮,୯୬୮ ଜଣ ପରୀକ୍ଷା ଦେଇଥିଲେ ଏବଂ ୧୫,୦୭,୧୦୯ ଜଣ ପାସ୍ କରିଛନ୍ତି। ତେବେ ଚଳିତ ବର୍ଷ ସାମଗ୍ରିକ ପାସ୍ ହାର ୮୫.୨% ରହିଛି, ଯାହା ଗତ ବର୍ଷର ୮୮.୩୯% ତୁଳନାରେ ୩.୧୯% କମ୍ ଅଟେ।

ଚଳିତ ବର୍ଷ ମଧ୍ୟ ପୁଅମାନଙ୍କ ତୁଳନାରେ ଝିଅମାନେ ବାଜିମାତ୍ କରିଛନ୍ତି। ଝିଅମାନଙ୍କ ପାସ୍ ହାର ପୁଅମାନଙ୍କ ତୁଳନାରେ ୬.୭୩% ଅଧିକ ରହିଛି। ଆଞ୍ଚଳିକ ସ୍ତରରେ ଦେଖିବାକୁ ଗଲେ, ତ୍ରିଭେନ୍ଦ୍ରମ ସର୍ବାଧିକ ୯୫.୬୨% ପାସ୍ ହାର ସହ ଶୀର୍ଷରେ ଥିବାବେଳେ, ପ୍ରୟାଗରାଜ ସର୍ବନିମ୍ନ ୭୨.୪୩% ପାସ୍ ହାର ରେକର୍ଡ କରିଛି। ଅନ୍ୟପକ୍ଷରେ, ସ୍ୱତନ୍ତ୍ର ଆବଶ୍ୟକତା ଥିବା ପିଲାମାନଙ୍କ (CWSN) ପାସ୍ ହାର ୯୦.୧୬% ରହିଛି।

ନୂଆଦିଲ୍ଲୀ: ବାତିଲ ହେଲା NEET UG ୨୦୨୬ ପରୀକ୍ଷା । ମେ ୩ ତାରିଖରେ ଅନୁଷ୍ଠିତ ହୋଇଥିବା ନିଟ୍ ୟୁଜି (NEET UG) ୨୦୨୬ ପରୀକ୍ଷାକୁ ବାତିଲ କରିଛି ନ୍ୟାସନାଲ ଟେଷ୍ଟିଂ ଏଜେନ୍ସି (NTA) । ମଙ୍ଗଳବାର ଦିନ ଏନଟିଏ ପକ୍ଷରୁ ଏହି ଘୋଷଣା କରାଯାଇଛି। ପ୍ରଶ୍ନପତ୍ର ଲିକ୍ ନେଇ ଏନଟିଏ ଏଭଳି ନିଷ୍ପତ୍ତି ନେଇଛି । ଖୁବଶୀଘ୍ର ପରୀକ୍ଷାର ନୂଆ ତାରିଖ ଘୋଷଣା କରାଯିବ ବୋଲି ସୂଚନା ମିଳିଛି। ଦେଶସାରା ଥିବା ବିଭିନ୍ନ ସ୍ନାତକସ୍ତରୀୟ ମେଡିକାଲ ପାଠ୍ୟକ୍ରମରେ ନାମଲେଖା ପାଇଁ ଏହି ଜାତୀୟ ପ୍ରବେଶିକା ପରୀକ୍ଷା କରାଯାଇଥାଏ।

ପ୍ରାପ୍ତ ସୂଚନା ଅନୁଯାୟୀ, ରାଜସ୍ଥାନ ସ୍ପେଶାଲ ଅପରେସନ୍ସ ଗ୍ରୁପ୍ (SOG) ଏବଂ ଅନ୍ୟାନ୍ୟ କେନ୍ଦ୍ରୀୟ ଏଜେନ୍ସିଗୁଡ଼ିକ ପକ୍ଷରୁ ମିଳିଥିବା ତଥ୍ୟ ଆଧାରରେ ଏହି ନିଷ୍ପତ୍ତି ନିଆଯାଇଛି। ପରୀକ୍ଷା ପରିଚାଳନାରେ ଅନିୟମିତତା ନେଇ ଆସିଥିବା ଅଭିଯୋଗକୁ ଦୃଷ୍ଟିରେ ରଖି ପରୀକ୍ଷା ବାତିଲ କରିବା ଛଡ଼ା ଅନ୍ୟ କୌଣସି ବିକଳ୍ପ ନଥିଲା ବୋଲି ଏନଟିଏ କହିଛି। ଏପରି ଅନିୟମିତତା ସହ ପରୀକ୍ଷା ପ୍ରକ୍ରିୟାକୁ ଆଗକୁ ବଢାଇ ହେବ ନାହିଁ ବୋଲି ସ୍ପଷ୍ଟ କରାଯାଇଛି।

ଏହି ଘଟଣାରେ ସ୍ୱଚ୍ଛତା ବଜାୟ ରଖିବା ପାଇଁ ଭାରତ ସରକାର ଏହି ମାମଲାର ତଦନ୍ତ ଭାର କେନ୍ଦ୍ରୀୟ ତଦନ୍ତ ବ୍ୟୁରୋ (CBI) କୁ ହସ୍ତାନ୍ତର କରିବାକୁ ନିଷ୍ପତ୍ତି ନେଇଛନ୍ତି। ପେପର ଲିକ୍ ଭଳି ସଙ୍ଗିନ ଅଭିଯୋଗର ଏକ ପୂର୍ଣ୍ଣାଙ୍ଗ ତଦନ୍ତ କରାଯିବ। ତଦନ୍ତ ପ୍ରକ୍ରିୟାରେ ସିବିଆଇକୁ ସମସ୍ତ ପ୍ରକାର ସହଯୋଗ କରିବ ବୋଲି ଏନଟିଏ (NTA) ପକ୍ଷରୁ ପ୍ରକାଶ କରାଯାଇଛି। ପୂର୍ବରୁ ମେ ୧୦ ତାରିଖରେ ଏନଟିଏ ଦାବି କରିଥିଲା ଯେ, ଏଆଇ ସିସିଟିଭି, ବାୟୋମେଟ୍ରିକ୍ ଏବଂ ୫ଜି ଜାମର୍ ଆଦିର ବ୍ୟବହାର କରାଯାଇ କଡ଼ା ସୁରକ୍ଷା ବଳୟ ମଧ୍ୟରେ ପରୀକ୍ଷା କରାଯାଇଥିଲା। କିନ୍ତୁ ଅଭିଯୋଗର ଗମ୍ଭୀରତାକୁ ଦେଖି ବର୍ତ୍ତମାନ ଏହି କଠୋର ପଦକ୍ଷେପ ନିଆଯାଇଛି।

ପରୀକ୍ଷା ବାତିଲ ହେବା ଫଳରେ ଛାତ୍ରଛାତ୍ରୀ ଓ ସେମାନଙ୍କ ଅଭିଭାବକଙ୍କୁ ହେଉଥିବା ଅସୁବିଧା ପାଇଁ ଏନଟିଏ ଦୁଃଖ ପ୍ରକାଶ କରିଛି। ତେବେ ଛାତ୍ରଛାତ୍ରୀଙ୍କ ସ୍ୱାର୍ଥ ଏବଂ ପରୀକ୍ଷା ବ୍ୟବସ୍ଥା ଉପରେ ବିଶ୍ୱାସ ବଜାୟ ରଖିବା ପାଇଁ ଏପରି କରାଯାଇଥିବା ସ୍ପଷ୍ଟ କରାଯାଇଛି। ପୁନର୍ବାର ହେବାକୁ ଥିବା ପରୀକ୍ଷା ପାଇଁ ଛାତ୍ରଛାତ୍ରୀଙ୍କୁ କୌଣସି ନୂଆ ପଞ୍ଜୀକରଣ କରିବାକୁ ପଡ଼ିବ ନାହିଁ। 

ପୂର୍ବରୁ ଆବେଦନ କରିଥିବା ଛାତ୍ରଛାତ୍ରୀଙ୍କ ତଥ୍ୟକୁ ଆଧାର କରି ନୂତନ ଆଡମିଟ୍ କାର୍ଡ ଜାରି କରାଯିବ ଏବଂ ପୂର୍ବରୁ ମନୋନୀତ କରିଥିବା ପରୀକ୍ଷା କେନ୍ଦ୍ରଗୁଡ଼ିକ ମଧ୍ୟ ସମାନ ରହିବ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ, ପରୀକ୍ଷାର୍ଥୀଙ୍କୁ କୌଣସି ଅତିରିକ୍ତ ଦେୟ ଦେବାକୁ ପଡ଼ିବ ନାହିଁ ଏବଂ ସେମାନେ ପୂର୍ବରୁ ଦେଇଥିବା ପରୀକ୍ଷା ଫି' ଫେରସ୍ତ କରାଯିବ। ଏନଟିଏ ନିଜସ୍ୱ ପାଣ୍ଠିରୁ ଏହି ପୁନଃପରୀକ୍ଷାର ଖର୍ଚ୍ଚ ବହନ କରିବ। ପରୀକ୍ଷାର ନୂଆ ତାରିଖ ଏବଂ ଅନ୍ୟାନ୍ୟ ସୂଚନା ସମ୍ପର୍କରେ ଜାଣିବା ପାଇଁ କେବଳ ଅଫିସିଆଲ୍ ୱେବସାଇଟ୍ ଉପରେ ନିର୍ଭର କରିବାକୁ ବିଭାଗ ପକ୍ଷରୁ ପରାମର୍ଶ ଦିଆଯାଇଛି।

ଭୁବନେଶ୍ୱର: ଲକ୍ଷ୍ମୀସାଗର ସ୍ଥିତ ବିବେକାନନ୍ଦ ଶିକ୍ଷା କେନ୍ଦ୍ର ପରିସରରେ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ବିଦାୟ ସମାରୋହ ଉତ୍ସାହ ଓ ଆନନ୍ଦର ସହ ପାଳିତ ହୋଇଯାଇଛି। ଗତକାଲି (ରବିବାର) ଅନୁଷ୍ଠିତ ଏହି କାର୍ଯ୍ୟକ୍ରମରେ ଉଭୟ ଇଂରାଜୀ ଓ ଓଡ଼ିଆ ମାଧ୍ୟମର ଛାତ୍ରଛାତ୍ରୀମାନେ ଅଂଶଗ୍ରହଣ କରିଥିଲେ। କାର୍ଯ୍ୟକ୍ରମର ଶୁଭାରମ୍ଭରେ ଅତିଥିମାନେ ପ୍ରଦୀପ ପ୍ରଜ୍ଜ୍ୱଳନ ପୂର୍ବକ ଜଗତର ନାଥ ଶ୍ରୀଜଗନ୍ନାଥ ଓ ଯୁଗପୁରୁଷ ସ୍ୱାମୀ ବିବେକାନନ୍ଦଙ୍କ ଫଟୋଚିତ୍ରରେ ପୁଷ୍ପାଞ୍ଜଳି ଅର୍ପଣ କରିଥିଲେ।

ଏହି ବିଦାୟ କାଳୀନ ସଭାରେ ମୁଖ୍ୟ ଅତିଥି ଭାବେ ଇଂରାଜୀ ମାଧ୍ୟମ ବିଦ୍ୟାଳୟର ଚେୟାରମ୍ୟାନ୍ ଡଃ ପିତବାସ ତ୍ରିପାଠୀ, ଲର୍ଡ ଜଗନ୍ନାଥ ମିଶନ ଟ୍ରଷ୍ଟର ମ୍ୟାନେଜିଂ ଟ୍ରଷ୍ଟି ଶ୍ରୀଯୁକ୍ତ ବୈରାଗୀ ଚରଣ ନାୟକ, ଟ୍ରଷ୍ଟି ଶ୍ରୀମତୀ ସ୍ୱର୍ଣ୍ଣଲତା ମହାନ୍ତି, ବିଦ୍ୟାଳୟର ଡାଇରେକ୍ଟର ଶ୍ରୀଯୁକ୍ତ ରବିନ୍ଦ୍ରନାଥ ପଣ୍ଡା ଏବଂ ମ୍ୟାନେଜର ଶ୍ରୀଯୁକ୍ତ ସତ୍ୟାନନ୍ଦ ରାଜ ପ୍ରମୁଖ ଯୋଗ ଦେଇଥିଲେ। ବିଦ୍ୟାଳୟର ପ୍ରଧାନ ଶିକ୍ଷକ ଓ ପ୍ରଧାନ ଶିକ୍ଷୟିତ୍ରୀ ସଭାରେ ସଭାପତିତ୍ୱ କରିଥିଲେ।

ଅତିଥିମାନେ ନିଜର ବକ୍ତବ୍ୟରେ ଛାତ୍ରଛାତ୍ରୀଙ୍କୁ ଉଦବୋଧନ ଦେଇ କହିଥିଲେ ଯେ, ଶିକ୍ଷା ହେଉଛି ଜୀବନ ଗଢିବାର ମୂଳ ଆଧାର। ସତ୍ୟ, ଶିଷ୍ଟାଚାର, କଠିନ ପରିଶ୍ରମ ଓ ନୀତିମୂଲ୍ୟକୁ ଅନୁସରଣ କରି ଆଗେଇ ଚାଲିଲେ ଜୀବନରେ ସଫଳତା ନିଶ୍ଚିତ ଭାବେ ମିଳିଥାଏ। ଭବିଷ୍ୟତରେ ଜଣେ ଶିଷ୍ଟ ଓ ଦାୟିତ୍ୱଶୀଳ ନାଗରିକ ହୋଇ ଦେଶ ତଥା ସମାଜର ସେବା କରିବାକୁ ସେମାନେ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଥିଲେ।

ଅନ୍ୟାନ୍ୟ ଶିକ୍ଷକ ଓ ଶିକ୍ଷୟିତ୍ରୀମାନେ ମଧ୍ୟ ନିଜ ଅଭିଭାଷଣରେ ଛାତ୍ରଛାତ୍ରୀଙ୍କ ଉଜ୍ଜ୍ୱଳ ଭବିଷ୍ୟତ ପାଇଁ ଶୁଭେଚ୍ଛା ଜଣାଇବା ସହ ଆତ୍ମବିଶ୍ୱାସର ସହ ପରୀକ୍ଷା ଦେବାକୁ ଗୁରୁତ୍ଵାରୋପ କରିଥିଲେ। ଏହି ଅବସରରେ ଦଶମ ଶ୍ରେଣୀ ଛାତ୍ରଛାତ୍ରୀମାନଙ୍କୁ ବିଦ୍ୟାଳୟ ପକ୍ଷରୁ ସ୍ମୃତିଚିହ୍ନ ଓ ଉପହାର ପ୍ରଦାନ କରାଯାଇଥିଲା। ପରିଶେଷରେ ଧନ୍ୟବାଦ ଅର୍ପଣ ସହ କାର୍ଯ୍ୟକ୍ରମଟି ସୁରୁଖୁରୁରେ ସମାପନ ହୋଇଥିଲା।

ନୂଆଦିଲ୍ଲୀ: ପାକିସ୍ତାନର ଶିକ୍ଷା କ୍ଷେତ୍ରରେ ଏକ ଐତିହାସିକ ପଦକ୍ଷେପ ଦେଖିବାକୁ ମିଳିଛି। ୧୯୪୭ ମସିହାର ଦେଶ ବିଭାଜନ ପରେ ପ୍ରଥମ ଥର ପାଇଁ ପାକିସ୍ତାନର ଏକ ବିଶ୍ୱବିଦ୍ୟାଳୟରେ ସଂସ୍କୃତ ଭାଷା ଶିକ୍ଷା ଆରମ୍ଭ ହୋଇଛି। ଲାହୋର ସ୍ଥିତ ଲାହୋର ୟୁନିଭର୍ସିଟି ଅଫ୍ ମ୍ୟାନେଜମେଣ୍ଟ ସାଇନ୍ସେସ୍ (LUMS) ଏହି ପାଠ୍ୟକ୍ରମ ଆରମ୍ଭ କରିଛି, ଯାହାକୁ ନେଇ ଶିକ୍ଷାବିତ୍ ଏବଂ ଛାତ୍ରଛାତ୍ରୀଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି।

 କେମିତି ଆରମ୍ଭ ହେଲା ଏହି ପାଠ୍ୟକ୍ରମ?

ପ୍ରଥମେ ଏହା ଏକ ତିନି ମାସିଆ ‘ୱିକେଣ୍ଡ୍ ୱାର୍କସପ୍’ (ସପ୍ତାହନ୍ତ କର୍ମଶାଳା) ଭାବରେ ଆରମ୍ଭ ହୋଇଥିଲା। କିନ୍ତୁ ଛାତ୍ରଛାତ୍ରୀଙ୍କ ଅଦ୍ଭୁତପୂର୍ବ ଆଗ୍ରହକୁ ଦେଖି ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଏହାକୁ ଏକ ପୂର୍ଣ୍ଣାଙ୍ଗ ୪-କ୍ରେଡିଟ୍ ବିଶିଷ୍ଟ ପାଠ୍ୟକ୍ରମରେ ପରିଣତ କରିଛନ୍ତି। ଏହି ପାଠ୍ୟକ୍ରମର ନେତୃତ୍ୱ ନେଉଛନ୍ତି ଡକ୍ଟର ଶାହିଦ ରସିଦ, ଯିଏକି ଫୋରମ୍ୟାନ୍ ଖ୍ରୀଷ୍ଟିୟାନ୍ କଲେଜର ସୋସିଓଲୋଜି ବିଭାଗର ଆସୋସିଏଟ୍ ପ୍ରଫେସର ଅଟନ୍ତି। ସେ ନିଜେ ଅନଲାଇନ୍ ମାଧ୍ୟମରେ ବିଦେଶୀ ପଣ୍ଡିତଙ୍କଠାରୁ ସଂସ୍କୃତ ଶିକ୍ଷା କରିଥିଲେ।

ଗୀତା ଓ ମହାଭାରତ ମଧ୍ୟ ପଢ଼ାଯିବ

କେବଳ ସଂସ୍କୃତ ଭାଷା ନୁହେଁ, ବିଶ୍ୱବିଦ୍ୟାଳୟର ଗୁରମାନି ସେଣ୍ଟରର ନିର୍ଦ୍ଦେଶକ ଡକ୍ଟର ଅଲି ଉସମାନ କାସମି ସୂଚନା ଦେଇଛନ୍ତି ଯେ, ଆଗାମୀ ଦିନରେ ଏହି ପାଠ୍ୟକ୍ରମ ଅଧୀନରେ ମହାଭାରତ ଏବଂ ଶ୍ରୀମଦ୍ ଭଗବଦ୍ ଗୀତା ଭଳି ପ୍ରାଚୀନ ଗ୍ରନ୍ଥଗୁଡ଼ିକ ଉପରେ ମଧ୍ୟ ପାଠପଢ଼ା ହେବ। ସେ ଆଶା ପ୍ରକାଶ କରିଛନ୍ତି ଯେ, ଆଗାମୀ ୧୦-୧୫ ବର୍ଷ ମଧ୍ୟରେ ପାକିସ୍ତାନରେ ମହାଭାରତ ଏବଂ ଗୀତା ଉପରେ ଗବେଷଣା କରୁଥିବା ସ୍ଥାନୀୟ ବିଦ୍ୱାନମାନେ ବାହାରିବେ।

ପୁରାତନ ପାଣ୍ଡୁଲିପିର ସଂରକ୍ଷଣ ଲକ୍ଷ୍ୟ

ଏହି ପଦକ୍ଷେପର ଅନ୍ୟତମ ମୁଖ୍ୟ ଉଦ୍ଦେଶ୍ୟ ହେଉଛି ପାକିସ୍ତାନରେ ଥିବା ପ୍ରାଚୀନ ସଂସ୍କୃତ ପାଣ୍ଡୁଲିପିଗୁଡ଼ିକର ଅଧ୍ୟୟନ। ଡକ୍ଟର କାସମିଙ୍କ ଅନୁଯାୟୀ, ଲାହୋରର ପଞ୍ଜାବ ବିଶ୍ୱବିଦ୍ୟାଳୟ ଲାଇବ୍ରେରୀରେ ସଂସ୍କୃତର ବହୁ ମୂଲ୍ୟବାନ ପାଣ୍ଡୁଲିପି ଗଚ୍ଛିତ ଅଛି, କିନ୍ତୁ ୧୯୪୭ ପରଠାରୁ କୌଣସି ପାକିସ୍ତାନୀ ଗବେଷକ ଏହା ଉପରେ କାର୍ଯ୍ୟ କରିନାହାନ୍ତି। କେବଳ ବିଦେଶୀ ଗବେଷକମାନେ ଏହାର ବ୍ୟବହାର କରୁଥିଲେ। ଏବେ ସ୍ଥାନୀୟ ଛାତ୍ରଛାତ୍ରୀମାନେ ସଂସ୍କୃତ ଶିଖିବା ଦ୍ୱାରା ଏହି ଅମୂଲ୍ୟ ସମ୍ପଦର ଉପଯୁକ୍ତ ବ୍ୟବହାର ଏବଂ ସଂରକ୍ଷଣ ହୋଇପାରିବ।