ଖୋର୍ଦ୍ଧା: ପୁଣି ଅଲୋଡ଼ା ହେଲା ଶିଶୁକନ୍ୟା । ଗତକାଲି ବିଳମ୍ବିତ ରାତିରେ କୁହୁଡିର ଏକ ଘରୋଇ ଡାକ୍ତରଖାନାରୁ ଏକ ଦୁଇ ମାସର ଶିଶୁକନ୍ୟାକୁ ଜିଲ୍ଲା ପ୍ରଶାସନ ଉଦ୍ଧାର କରି ଖୋର୍ଦ୍ଧା ଶିଶୁ ମଙ୍ଗଳ ସମିତିକୁ ହସ୍ତାନ୍ତର କରିଛି । ଶିଶୁ ମଙ୍ଗଳ ସମିତିର ନିର୍ଦ୍ଦେଶ କ୍ରମେ ଏହି ଶିଶୁଟିର ଯତ୍ନ ଏବଂ ସୁରକ୍ଷା ନିମନ୍ତେ ଭୁବନେଶ୍ବର ପାତ୍ରପଡା ସ୍ଥିତ ଆମଘର ସ୍ବତନ୍ତ୍ର ପୋଷ୍ୟ ସନ୍ତାନ ଗ୍ରହଣ କେନ୍ଦ୍ରରେ ଅବସ୍ଥାପିତ କରାଯାଇଅଛି ।

ସୂଚନା ଅନୁସାରେ, କୁହୁଡି ସ୍ଥିତ ସାଇ ସେବା ସଦନ ଡାକ୍ତରଖାନାର ମୁଖ୍ୟଦ୍ବାର ନିକଟରେ ଶିଶୁଟି ଉଦ୍ଧାର ହେବାର ଦୁଇ ଦିନ ପୂର୍ବରୁ କେହି ଜଣେ ଏହି ଦୁଇ ମାସର ଶିଶୁଟିକୁ ବିଳମ୍ବିତ ରାତିରେ ଅସହାୟ ଅବସ୍ଥାରେ ଛାଡି ଦେଇଥିଲେ ଏବଂ କୁକୁର ଭୁକିବା ଏବଂ ପିଲାଟିର କାନ୍ଦିବାର ଶବ୍ଦ ଶୁଣି ଡାକ୍ତରଖାନାର ସିକିରୁଟି ଗାର୍ଡ ଏହି ଅସହାୟ ଶିଶୁଟିକୁ ଉଦ୍ଧାର କରିଥିଲେ ଏବଂ ଡାକ୍ତରଖାନାର ପରିଚାଳନା କମିଟି ଦ୍ବାରା ଶିଶୁଟିକୁ ଡାକ୍ତରଖାନାରେ ଚିକିତ୍ସା କରାଯିବା ସହିତ ଆଖପାଖ ଅଞ୍ଚଳରେ ଡାକ୍ତରଖାନା ତରଫରୁ ଧ୍ବନି ଯନ୍ତ୍ର ମାଧ୍ୟମରେ ଏହି ଶିଶୁଟି ବିଷୟରେ ପ୍ରଚାର କରାଯାଇଥିଲା ଏବଂ ସ୍ଥାନୀୟ ପୁଲିସ ମଧ୍ୟ ଏହାକୁ ତଦନ୍ତ କରିଥିଲେ । ଦୁଇ ଦିନ ମଧ୍ୟରେ ଏହି ଶିଶୁଟିର କୌଣସି ଅବିଭାବକ କିମ୍ବା ଦାବିଦାର ନ ଆସିବାରୁ ଡାକ୍ତରଖାନା ତରଫରୁ ଜିଲ୍ଲା ଶିଶୁ ସୁରକ୍ଷା ଅଧିକାରୀ ବାଣିଶ୍ରୀ ପଟ୍ଟନାୟକଙ୍କ ସହିତ ଶିଶୁଟିର ଯତ୍ନ ସୁରକ୍ଷାକୁ ନେଇ ଯୋଗାଯୋଗ କରାଯାଇଥିଲା । ଜିଲ୍ଲା ଶିଶୁ ସୁରକ୍ଷା ଅଧିକାରୀଙ୍କ ନିର୍ଦ୍ଦେଶ କ୍ରମେ ଖୋର୍ଦ୍ଧା ଛାଇଲ୍ଡ ଲାଇନ ଶିଶୁଟିକୁ ଡାକ୍ତରଖାନାରୁ ଉଦ୍ଧାର କରି ଶିଶୁ ମଙ୍ଗଳ ସମିତିରେ ହାଜର କରାଇଥିଲେ।

ଖୋର୍ଦ୍ଧା (ରଞ୍ଜିତ କେ.ଏନ. ସାମନ୍ତରାୟ): ‘କଣ କରିବି’; ଗରିବର ପଞ୍ଚାକ୍ଷର ଆଉ ସେମାନେ ଘୋଷୁନାହାନ୍ତି। ଦରିଦ୍ରତାରୁ ସେମାନେ ବାହାରିବାକୁ ଚେଷ୍ଟା କରୁଥିଲେ; କିନ୍ତୁ ବାଟ ପାଉ ନଥିଲେ ଖୋର୍ଦ୍ଧା ବୋଲଗଡ଼଼ ବ୍ଲକ୍‌ କୋଦୁଅବରେଣି ଗାଁର ଅନେକ ପରିବାର। ବୋହୂ ହୋଇ ଆସିଥିବା ଚାନ୍ଦୁଆ ଗାଁ ପିପିଲିର ଝିଅ ରୋଜଗାରର ରାହା ଦେଖାଇଲା। ଏବେ ୩୦ରୁ ଅଧିକ ପରିବାର ରୋଜଗାର, ସମ୍ମାନ ସବୁ ପାଇଛନ୍ତି। ବାସନ୍ତୀ ଏବେ ସମସ୍ତଙ୍କ ପାଇଁ ଦୀପଶିଖା ପାଲଟିଛନ୍ତି।

ପିପିଲିର ବାସନ୍ତୀ କୋଦୁଅବରେଣୀ ଗାଁର ପୂର୍ଣ୍ଣଚନ୍ଦ୍ର ମୁଦୁଲିଙ୍କୁ ୨୮ ବର୍ଷ ତଳେ ବାହା ହୋଇ ଆସିଥିଲେ। ଶାଶୁଘର ଅଭାବୀ ଲୋକ। ସବୁବେଳେ ଆର୍ଥିକ ସମସ୍ୟା ଲାଗି ରହିଥିଲା। ବାସନ୍ତୀ ବି ଅନେକ ଦିନ ଯାଏ କଣ କରିବେ; କିଛି ବାଟ ପାଉ ନ ଥିଲେ। ପରିବାର ଚଳାଇବାରେ କେମିତି ସ୍ୱାମୀଙ୍କୁ ସହଯୋଗ କରିବେ ସେଥିପାଇଁ ଚିନ୍ତା ଲାଗି ରହିଥିଲା। ଇଛା ଥିଲେ ଉପାୟ ଆସେ ଓ ପରିଶ୍ରମ କଲେ; ଡେରି ହେଉ ପଛେ ସଫଳତା ମିଳେ। ପିଲାବେଳେ ବାସନ୍ତୀ ଚାନ୍ଦୁଆ ସିଲେଇ ଶିଖିଥିଲେ। ପିଲା ବେଳେ ସଉକରେ ଶିଖିଥିବା ଏ କଳା ତାଙ୍କୁ ରୋଜଗାରର ରାସ୍ତା ଦେଖାଇଥିଲେ। ସଂଘର୍ଷ କରିବାକୁ ପଡ଼ିଥିଲା କିନ୍ତୁ ବାସନ୍ତୀ ଆଜି ଜଣେ ସଫଳ ଉଦ୍ୟୋଗୀ ଭାବେ ପରିଚୟ ସୃଷ୍ଟି କରିପାରିଛନ୍ତି। ବିଭିନ୍ନ ପ୍ରଦର୍ଶନୀ ଓ ଦୋକାନବଜାରରେ ତାଙ୍କ ହାତତିଆରି ଚାନ୍ଦୁଆ କାମର ଭାରି ପ୍ରଶଂସା।

ପ୍ରଥମେ ବହୁ କଷ୍ଟରେ ୫ ହଜାର ଟଙ୍କା ଯୋଗାଡ଼ କରି ଘରେ ଚାନ୍ଦୁଆ ପ୍ରସ୍ତୁତି ଉପକରଣ ଆଣିଥିଲେ। ଘରକୁ ହିଁ ଚାନ୍ଦୁଆ କଳାର ପ୍ରୟୋଗଶାଳା କରିଥିଲେ। ଧୀରେ ଧୀରେ ରୋଜଗାର ମିଳିବା ସହ କାମ ବି ବଢିଥିଲା। ସେ ଭଳିକି ଭଳି ଚାନ୍ଦୁଆ, ମନିପର୍ସ, ବ୍ୟାଗ, ଦୋଳ ମଣ୍ଡଣି, ଛତ୍ରି, ତ୍ରାସ, ଝାଲର, ବାହାଘର ଗେଟ, କୁସନ ଭଳି ୨୫ରୁ ୩୦ ପ୍ରକାର ସାମଗ୍ରୀ ପ୍ରସ୍ତୁତ କରିବା ସହ ଏହାକୁ ବିକ୍ରି କରି ଅର୍ଜିତ ଅର୍ଥରେ ସେ ଘର ଚଳାଇବା ଲାଗି ସ୍ୱାମୀଙ୍କୁ ସହଯୋଗ କରିଲେ। ତାଙ୍କ ହାତ ତିଆରି ଏହି ସାମଗ୍ରୀ ଗୁଡିକ ଗ୍ରାହକମାନଙ୍କୁ ବେଶ ଆକୃଷ୍ଟ କରିଥିଲା। ଏବେ ସେ ମାସକୁ ୨୦ ହଜାର ପର୍ଯ୍ୟନ୍ତ ରୋଜଗାର କରିପାରୁଛନ୍ତି। ଘର ଖର୍ଚ୍ଚ ଉଠିବା ସହ ସଞ୍ଚୟ ବି କରିପାରୁଛନ୍ତି।

ବାସନ୍ତୀଙ୍କୁ ଦେଖି ଗାଁର ଅନ୍ୟ ଝିଅବୋହୂ ବି ଏ କଳାପ୍ରତି ଆଗ୍ରହୀ ହୋଇଥିଲେ। ସେମାନଙ୍କୁ ଚାନ୍ଦୁଆ କଳା ଶିଖାଇବା ଆରମ୍ଭ କରିଥିଲେ ବାସନ୍ତୀ। ସେମାନଙ୍କୁ ବିନା ମୂଲ୍ୟରେ ତାଲିମ ଦେଇଥିଲେ। ଗାଁର ମହିଳା ଓ ଝିଅମାନେ ସେମାନଙ୍କ ଅବସର ସମୟରେ ବାସନ୍ତୀଙ୍କ ପାଖକୁ ଆସି ଏହି କାମ ଶିଖି ରୋଜଗାର କରୁଥିବା ସେ କହିଛନ୍ତି। ୩୦ରୁ ଅଧିକ ପରିବାର ବାସନ୍ତୀଙ୍କ ପାଇଁ ରୋଜଗାର ପାଇଛନ୍ତି।

ଖୋର୍ଦ୍ଧା: ଅଧାରେ ରହିଗଲା ଜଗା ଦର୍ଶନ । ମହାପ୍ରଭୁଙ୍କୁ ଦର୍ଶନ କରିବାକୁ ସୂଦୁର ଆନ୍ଧ୍ର ପ୍ରଦେଶରୁ ପୁରୀ ଆସୁଥିବାବେଳେ ବାଟରେ ଘଟିଲା ଭୟଙ୍କର ସଡକ ଦୁର୍ଘଟଣା । ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ବଡ଼ପୋଖରିଆ ନିକଟରେ ଟ୍ରକ ପଛପଟେ ପିଟିଲା କାର । ଦୁର୍ଘଟଣାରେ ଚାଲିଗଲା ୪ ଜଣଙ୍କ ଜୀବନ । ମୃତ୍ୟୁବରଣ କରିଥିବା ୪ ଜଣଙ୍କ ମଧ୍ୟରୁ ୨ ଜଣ ପୁରୁଷ ଓ ୨ ଜଣ ମହିଳା ବୋଲି ସୂଚନା ମିଳିଛି । ଘନ କୁହୁଡି ପାଇଁ ଭୋର ସମୟରେ ଘଟିଛି ଦୁର୍ଘଟଣା । ଘଟଣାସ୍ଥଳରେ ଜଙ୍କିଆ ପୁଲିସ ପହଞ୍ଚି ତଦନ୍ତ କରୁଛି ।

କାରଟି ବାଲୁଗାଁ ପଟୁ ଭୁବନେଶ୍ଵର ପଟକୁ ଆସୁଥିବା ବେଳେ ଦୁର୍ଘଟଣା ଘଟିଛି । ଦୁର୍ଘଟଣାରେ ପ୍ରାଣ ହରାଇଥିବା ୪ ଜଣ ଆନ୍ଧ୍ରପ୍ରଦେଶରୁ ପୁରୀ ଯାଉଥିଲେ । ମୃତକଙ୍କ ମଧ୍ୟରେ ଦୁଇ ଜଣ ମହିଳା ଓ ଦୁଇଜଣ ପୁରୁଷ ଅଛନ୍ତି । ପୋଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରି ବ୍ୟବଛେଦ ପାଇଁ ପଠାଇ ତଦନ୍ତ ଜାରି ରଖିଛି ।

ଭୁବନେଶ୍ବର: ଆସନ୍ତାକାଲି କଟକ ଓ ଖୋର୍ଦ୍ଧା ଜିଲ୍ଲାରେ ବିଏସକେଓ୍ବାଇ ସ୍ମାର୍ଟକାର୍ଡ ବଣ୍ଟନର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସକାଳ ୧୦ଟା ୪୫ରେ କଟକ ଯାଇ ସ୍ବାସ୍ଥ୍ୟ ଓ ବିକାଶର ନୂଆ କାହାଣୀ ଲେଖିବେ ମୁଖ୍ୟମନ୍ତ୍ରୀ। ଉପର ବାଲିଯାତ୍ରା ପଡିଆରେ ଆୟୋଜିତ କାର୍ଯ୍ଯକ୍ରମରେ ଯୋଗଦେଇ ଈଝକଣ ସ୍ମାର୍ଟକାର୍ଡ ବଣ୍ଟନ କରିବେ ନବୀନ । ଏହା ସହିତ କଟକ ଜିଲ୍ଲାବାସୀଙ୍କ ପାଇଁ ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଲୋକାର୍ପଣ କରିବେ।

ପରେ ୧୧ଟା ୪୦ରେ ଖୋର୍ଦ୍ଧା ଜିଲ୍ଲାର ବେଗୁନିଆସ୍ଥିତ ବିଜୁ ପଟ୍ଟନାୟକ ଷ୍ଟାଡିୟମରେ ପହଞ୍ଚିବେ ମୁଖ୍ୟମନ୍ତ୍ରୀ । ଜିଲ୍ଲାରେ ବିଏସକେଓ୍ବାଇ ସ୍ମାର୍ଟକାର୍ଡ ବଣ୍ଟନର ଶୁଭାରମ୍ଭ ସହିତ ବିଭିନ୍ନ ଜନହିତକର କାର୍ଯ୍ଯର ଶୁଭାରମ୍ଭ ଓ ଶିଳାନ୍ୟାସ କରିବେ ନବୀନ ପଟ୍ଟନାୟକ। ସେହିପରି ମୁଖ୍ୟମନ୍ତ୍ରୀଙ୍କ ଗସ୍ତକୁ ନଜରରେ ରଖି ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡ଼ାକଡି କରାଯାଇଛି। ମୁଖ୍ୟମନ୍ତ୍ରୀଙ୍କ ଗସ୍ତ ସମୟରେ କଟକରେ ୧୫ ପ୍ଲାଟୁନ ପୁଲିସ ଫୋର୍ସ ମୁତୟନ କରାଯିବ।

ଖୋର୍ଦ୍ଧା: ୧୬ ନଂ ଜାତୀୟ ରାଜପଥର ଖୋର୍ଦ୍ଧା ଦଳେଇପୁଟ ଛକରେ ଗୋରୁମାଂସ ବୋଝେଇ ଟ୍ରକ ଜବତ କରାଯାଇଛି। ସଦର ଥାନା ଏହି ଗାଡି ଜବତ କରିଛି। ପୁଲିସ ଗାଡି ଜବତ କଲାବେଳେ ଅଭିଯୁକ୍ତ ଗାଡି ଛାଡି ପଳେଇଛନ୍ତି।ଏହି ଗୋରୁମାଂସ କେଉଁଠୁ ଆସିଲା, କୁଆଡେ ଯାଉଥିଲା ତାହା ତଦନ୍ତ ଚାଲିଛି। କିଛିଦିନ ତଳେ ରାମେଶ୍ୱର ଛକରୁ ନିରାକାରପୁର ପୋଲିସ ଗୋରୁମାଂସ ବୋଝେଇ ଟ୍ରକ ଜବତ କରିଥିଲେ। ଗୋରୁ ଚାଲାଣ ଧରପଗଡ଼ ପରେ ଗୋରୁମାଂସ ଚାଲାଣ କାରୀ ସକ୍ରିୟ ହୋଇ ଉଠିଛନ୍ତି। ଯାହାକି ପୁଲିସ ପାଇଁ ଚାଲେଞ୍ଜ ସୃଷ୍ଟି କରିଛି।

ବାଲୁଗାଁ: ମୋବାଇଲ ବିନା ଚଳିବା ବର୍ତ୍ତମାନ ସମୟରେ ଅସମ୍ଭବ ହୋଇପଡ଼ିଛି। ପିଲା ଠାରୁ ବୁଢା ଯାଏଁ ସମସ୍ତଙ୍କ ହାତରେ ମୋବାଇଲ ଦେଖିବାକୁ ମିଳୁଛି। ଖାସ କରି ଯୁବପିଢି ଏହି ମୋବାଇଲର ସାମାଜିକ ଗଣମାଧ୍ୟମରେ ବାୟା। ଏଭଳି ପରିସ୍ଥିତି ଉପୁଜିଛି ଯେ ସାମାଜିକ ଗଣମାଧ୍ୟମ ବିନା ଲୋକେ ବଞ୍ଚିବା କଷ୍ଟକର ହୋଇପଡିଛି। ଏହି ସାମାଜିକ ଗଣମାଧ୍ୟମ ଦ୍ଵାରା କିଏ ରାତାରାତି ନା କମେଇ ଫେମସ ହୋଇ କୋଟିପତି ହେଉଥିବା ବେଳେ ଆଉ କାହାର ଘର ସଂସାର ଉଜୁଡ଼ି ଜୀବନ ହାରୁଥିବାର ନଜିର ସାମ୍ନାକୁ ଆସୁଛି । କିଛି ଯୁବକ ଯୁବତୀ ମୋବାଇଲର ଫେସବୁକ ଦ୍ୱାରା ବିବାହ ବନ୍ଧନରେ ବାନ୍ଧିହୋଇ ସୁଖରେ ଘର ସଂସାର କରୁଥିବା ବେଳେ କେତେକଙ୍କ ଦାମ୍ପତ୍ୟ ଜୀବନ ଛାରଖାର ହୋଇଯାଉଛି। ଏହି ପରିପ୍ରେକ୍ଷୀରେ ଫେସବୁକର ଜଣେ ଅଜଣା ଯୁବତୀଙ୍କ ପ୍ରେମରେ ପଡି ଜଣେ ବିବାହିତ ପୁରୁଷ ଖୋର୍ଦ୍ଧା ଜିଲ୍ଲା ବାଣପୁର ଗମ୍ଭାରିମୁଣ୍ଡା ଅଞ୍ଚଳର ନିଜ ପତ୍ନୀ ଓ ପିଲାକୁ ଛାଡି ଫେରାର ହେଇଯାଇଥିବା ନେଇ ସ୍ତ୍ରୀ ବାଣପୁର ଥାନାରେ ଏକ ଲିଖିତ ଅଭିଯୋଗ କରିଛନ୍ତି।

ଘଟଣାରୁ ପ୍ରକାଶ ଯେ, ପୁରୀ ଟାଉନ ଥାନା ଅନ୍ତର୍ଗତ ରାଧେଶ୍ୟାମ ଗୋଡିଙ୍କ ପୁଅ ରବି ନାରାୟଣ ଗୋଡ଼ିଙ୍କ ସହିତ ବାଣପୁର ଥାନା ଅନ୍ତର୍ଗତ ଗମ୍ଭାରୀମୁଣ୍ଡା ଗ୍ରାମର ଦୀପାଞ୍ଜଳି ବରାଳ ଦୀର୍ଘ ପାଞ୍ଚବର୍ଷ ତଳେ ବୈଦିକ ରୀତିନୀତିରେ ବିବାହ କରିଥିଲେ। ଦୀପାଞ୍ଜଳିଙ୍କ ପରିବାର ବିବାହ ନିମନ୍ତେ ବର ପକ୍ଷକୁ ନଗଦ ୨ ଲକ୍ଷ ଟଙ୍କା ସହ, ଅଳଙ୍କାର ଏବଂ ବିଭିନ୍ନ ଜନିଷପତ୍ର ଦେଇଥିଲେ। ବିବାହର ବର୍ଷକ ପରେ ତାଙ୍କର ଏକ ଝିଅଟିଏ ଜନ୍ମ ହୋଇଥିଲା। ବର୍ତ୍ତମାନ ଝିଅକୁ ଚାରି ବର୍ଷ ଚାଲିଛି। ବର୍ଷେ ହେଲା ରବି ଗୋଆରେ ଚାକିରୀ ପାଇବାରୁ ପରିବାରକୁ ନେଇ ଗୋଆରେ ରହୁଥିଲେ। ଗୋଆରେ ରହିବାର କିଛି ମାସ ପରେ ଫେସବୁକ ଜରିଆରେ ଏକ ଅଜଣା ଯୁବତୀଙ୍କ ସହ ରବି ପ୍ରେମରେ ପଡି ସମ୍ପର୍କ ଆଗକୁ ବଢାଇଥିଲେ। ଦୀପାଞ୍ଜଳି ଏ ସମ୍ପର୍କରେ ଜାଣିବା ପରେ ଏ ନେଇ ବାରମ୍ବାର ପ୍ରତିବାଦ କରିବାରୁ ତାଙ୍କ ସ୍ୱାମୀ ରବି ଅନେକ ଥର ଶାରୀରିକ ଓ ମାନସିକ ନିର୍ଯାତନା ଦେଇଆସୁଥିବା ସହ ଏକଥା କାହାରିକୁ କହିଲେ ଜୀବନରେ ମାରିଦେବେ ବୋଲି ଧମକ ମଧ୍ୟ ଦେଉଥିଲେ। ତେବେ ଗତ ଜୁଲାଇ ମାସ ୧୨ ତାରିଖ ଦିନ ଗୋଆରେ ରହୁଥିବା ବେଳେ ସ୍ବାମୀ ରବି ତାଙ୍କ ସ୍ତ୍ରୀ ଦୀପାଞ୍ଜଳି ଓ ପିଲାକୁ ନକହି ଏକାକୀ ଛାଡିଦେଇ କେଉଁଆଡେ ଫେରାର ହେଇଯାଇଥିଲେ। ଦୀପାଞ୍ଜଳି ସ୍ୱାମୀଙ୍କୁ ବାରମ୍ବାର ଫୋନରେ ଯୋଗାଯୋଗ କରିଥିଲେ ମଧ୍ୟ ରବି ଫୋନ ଉଠାଇନଥିଲେ। ଶେଷରେ ଦୀପାଞ୍ଜଳି ଏ ସମ୍ପର୍କରେ ବାପ ଘର ଲୋକଙ୍କୁ ଜଣାଇବାରେ ସେମାନଙ୍କ ସହାୟତାରେ ତାଙ୍କର ଚାରି ବର୍ଷର ଝିଅକୁ ନେଇ ଗୋଆରୁ ନିଜ ବାପଘର ଗମ୍ଭାରୀମୁଣ୍ଡା ଫେରିଥିଲେ। ଗ୍ରାମକୁ ଆସିଲା ପରେ ଦୀପାଞ୍ଜଳି ବାଣପୁର ଓ ଚିଲିକା ବ୍ଲକର ମିଶନ ଶକ୍ତିର କିଛି ମହିଳାଙ୍କ ସହାୟତାରେ ବାଣପୁର ଥାନାରେ ସେ ସମ୍ପର୍କରେ ଏକ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ବାଣପୁର ଆଇଆଇସି କେସ ନମ୍ବର ୨୫୧/୨୧ ରେ ଦୀପାଞ୍ଜଳିଙ୍କ ସ୍ୱାମୀ ରବି ବିରୋଧରେ ଏକ ମାମଲା ରୁଜ୍ଜୁ କରି ତଦନ୍ତ ଜାରିରଖିଛନ୍ତି।

ଟାଂଗୀ :ଆଜି ସନ୍ଧ୍ୟା ସମୟରେ ଟାଂଗୀ ଗୋଷ୍ଟି ସ୍ବାସ୍ଥ୍ୟକେନ୍ଦ୍ର ପରିସରରେ ଡାକ୍ତର ସୁଭାସିଶ ଷଢଙ୍ଗୀ ଜଣେ ରୋଗୀକୁ ଆଉଟଡୋରରେ ଚିକିତ୍ସା କରୁଥିବା ସମୟରେ ଅନ୍ୟ ଜଣେ ରୋଗୀଙ୍କ ସ୍ବାମୀ ପହଞ୍ଚି ତାଙ୍କ ସ୍ତ୍ରୀ ଙ୍କୁ ଚିକିତ୍ସା କରିବାକୁ କହିଥିଲେ ତେବେ ଏହି ସମୟରେ ଉତ୍ୟକ୍ତ ଯୁବକ ତାଙ୍କ ସହିତ ଆସିଥିବା ଛଅ ଜଣରୁ ଅଧିକ ସମର୍ଥକ ଡାକ୍ତରଙ୍କ ସମେତ ଆଟେଣ୍ଡାଣ୍ଟ କୁ ନିସ୍ତୁକ ମାଡ ମାରିବା ସହିତ ଡାକ୍ତରଖାନା ପରିସରରେ ଲଙ୍କାକାଣ୍ଡ ଭିଆଇଥିବା ଜଣାପଡିଛିା। ଘଟଣା ସ୍ଥଳରେ ଟାଂଗୀ ପୋଲିସ ପହଞ୍ଚି ଦୁଇଜଣଙ୍କୁ ଗିରଫ କରିଥିବା ଜଣାପଡିଛିା ତେବେ ଘଟଣା ସଂପର୍କରେ ଟାଂଗୀ ଗୋଷ୍ଟି ସ୍ବାସ୍ଥ୍ୟକେନ୍ଦ୍ର ଭାରପ୍ରାତ୍ପ ଚିକିତ୍ସା ଅଧିକାରୀ ଡାକ୍ତର ଜିତେନ୍ଦ୍ର କୁମାର ସାହୁ ଖୋର୍ଧା ଜିଲ୍ଲାପାଳଙ୍କୁ ଘଟଣା ସଂପର୍କରେ ଅବଗତ କରିଥିବା ବେଳେ ରିପୋର୍ଟ ସଂଗ୍ରହ ବେଳକୁ ସ୍ବାସ୍ଥ୍ୟକେନ୍ଦ୍ର ର ସମସ୍ତ ଡାକ୍ତର ,କର୍ମଚାରିଙ୍କ ଯରୁରୀ ବୈଠକ ଚାଲିଥିବା ଜଣାପଡିଛିା

କୌଣସି ଅଧିକ ଅପ୍ରିତିକର ପରିସ୍ଥିତିକୁ ଦୃଷ୍ଟିରେ ରଖି ଡାକ୍ତରଖାନା ପରାସରରେ ଆଇଆଇସି ବିଜୟ କୁମାର ମଲିକଙ୍କ ସମେତ ଫୋର୍ସ ଉପସ୍ଥିତ ଅଛନ୍ତି। ଘଟଣାରୁ ପ୍ରକାଶ ଯେ ଚାନ୍ଦପୁର ଶାସ୍ତ୍ର୍ରୀନଗର ର ନବ କିଶୋର ପ୍ରଧାନ ଅସୁସ୍ଥ ଥିବା ତାଙ୍କ ସ୍ତ୍ର୍ରୀ ଙ୍କ ଅବସ୍ଥା ଦେଖିବାକୁ ଆଉଟଡୋର ରେ ଚିକିତ୍ସା କରୁଥିବା ଡାକ୍ତର ଶୁଭାସିସ ଷଢଙ୍ଗୀ ଙ୍କୁ ଜଣାଇଥିଲେ।ତେବେ ଏହି ସମୟରେ ଡାକ୍ତର ଶ୍ରୀ ଷଢଙ୍ଗୀ ଅନ୍ୟ ଜଣ ଗୁରୁତରେ ଶିଶୁ ରୋଗୀ କୁ ଚିକିତ୍ସା କରୁଥିବା ତଥା ଡାକ୍ତରଖାନା କୁ ମାକସ୍ ଲଗାଇ ଆସ ବୋଲି ପରାମର୍ଶ ଦେଇଥିଲେ। ଏହି ଘଟଣାକୁ ନେଇ ଡାକ୍ତର ଓ ସଂପୃକ୍ତ ବ୍ୟକ୍ତିି ମଧ୍ୟରେ ଉଚବାଚ ହୋଇଥିଲା ଓ ଡାକ୍ତର ଶ୍ରୀ ଷଢଙ୍ଗୀଙ୍କୁ ନବ ହଠାତ ଆକ୍ରମଣ କରିଥିଲା । ଡାକ୍ତର ଶ୍ରୀ ଷଢଙ୍ଗୀ ଙ୍କ ବେକ ,ଆଖି ଓ ମୁହଁ ରେ ଆଘାତ ଲାଗିଥିବା ବେଳେ ଡାକ୍ତରଙ୍କୁ ଛଡାଇବାକୁ ଯାଇ ଏହି ଡାକ୍ତରଖାନା ର ଆଟେଣ୍ଡାଣ୍ଟ ଦିନବନ୍ଧୁ ବେହେରା ଙ୍କ ମୁଣ୍ଡ ରେ ଆଘାତ ଲାଗିଥିବା ଜଣାପଡିଛିା ଏଭଳି ତୁମୁଳ କାଣ୍ଡ ସମୟରେ ଉତ୍ୟକ୍ତ ଯୁବକଙ୍କ ଛଅ ରୁ ଅଧିକ ସମର୍ଥକ ମଧ୍ୟ ପରିସ୍ଥିତି କୁ ଉତେଜିତ କରିଥିବା କୁହାଯାଇଛି। ଏଭଳି ଲଙ୍କାକାଣ୍ଡ ସମୟରେ ପୋଲିସ ଖବର ପାଇଁ ଘଟଣା ସ୍ଥଳରେ ପହଞ୍ଚି ନବ କିଶୋର ପ୍ରଧାନ ଓ ତାଙ୍କ ପୁଅ ସିଲୁ କୁ କାବୁ କରିନେଇଥିବା ଜଣାପଡିଛିା।କୌଣସି ପ୍ରକାର ଅପ୍ରିତିକର ପରିସ୍ଥିତି କୁ ନଜରରେ ରଖି ଟାଂଗୀ ଅତିରିକ୍ତ ତହସିଲଦାର ଶରତ ଚନ୍ଦ୍ର ଦେହୁରୀ ପହଞ୍ଚି ପରିସ୍ଥିତି ସଂପର୍କରେ ଅନୁଧ୍ୟାନ କରୁଥିବା ବେଳେ ଆଇଆଇସି ଶ୍ରୀ ମଲିକ ଡାକ୍ତରଖାନା ପରିସରରେ ଉପସ୍ଥିତ ରହି ପରିସ୍ଥିତି ପ୍ରତି ନଜର ରଖିଥିବା ଜଣାପଡିଛିା।

ବାଲୁଗାଁ/ବାଣପୁର : ରାଜ୍ୟରେ ବାରମ୍ବାର ନୂଆ ନୂଆ ଉପାୟରେ ଲୋକଙ୍କୁ ଠକି ସର୍ବସ୍ବାନ୍ତ କରିଚାଲିଛନ୍ତି ସାଇବର ଲୁଟେରାମାନେ। ଏହି ପରିପ୍ରେକ୍ଷୀରେ ଖୋର୍ଦ୍ଧା ଜିଲ୍ଲାର ବାଣପୁର ଅଞ୍ଚଳର ଜଣେ ଯୁବକଙ୍କୁ ବିଦେଶରେ ଚାକିରି କରାଇ ଦେବେ ନେଇ ବିଭିନ୍ନ ବାହାନା କରି ତିନୋଟି କିସ୍ତିରେ ଆକାଉଣ୍ଟରୁ ୬୧ ହଜାରରୁ ଉର୍ଦ୍ଧ୍ଵ ଟଙ୍କା ଠକି ନେଲେ ସାଇବର ଲୁଟେରା। ଅପରପକ୍ଷରେ ବିଦେଶରେ ଚାକିରୀ ପାଇବା ଖୁସିରେ ନିଜର ବର୍ତ୍ତମାନ ଚାକିରୀ ଛାଡିଦେଇ ଯୁବକ ଏବେ ସାଇବର ଲୁଟରାଙ୍କ ଶିକାର ହୋଇଥିବାର ଜାଣିବାକୁ ପାଇ ତାଙ୍କ ପାଦ ତଳୁ ମାଟି ଖସିପଡିଛି ।

ସୁଚନା ମୁତାବକ ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ମଙ୍ଗଳପୁର ଗ୍ରାମର ଅନୀଲ କୁମାର ମାଝୀ (୨୮) ମୁମ୍ବାଇରେ ଅବସ୍ଥିତ ଟାଟା କମ୍ପାନୀରେ ସିଭିଲ ଇଞ୍ଜିନିଅର ଭାବେ କାର୍ଯ୍ୟରତ ଥିଲେ। ଗତ ଜୁନ ମାସ ୧୫ ତାରିଖରେ ‘ଅଲ ସଫର ଷ୍ଟିଲ ଇଞ୍ଜିନିଅରିଙ୍ଗ ଲିମିଟେଡ଼’ ନାମକ ଦୁବାଇ ସ୍ଥିତ ଏକ କମ୍ପାନୀରେ ଚାକିରି ନିମନ୍ତେ ଅଫର ଲେଟର ଅନୀଲଙ୍କ ପାଖକୁ ତାଙ୍କ ଇ-ମେଲରେ ଆସିଥିଲା। ଉକ୍ତ ଇ-ମେଲରେ ଦୁବାଇରେ ଚାକିରିର ଅଫର ଲେଟର ପାଇ ଅନୀଲ ଖୁସି ହୋଇ ସେଥିରେ ଦିଆଯାଇଥିବା କମ୍ପାନୀର ଜଣେ ଅଧିକାରୀଙ୍କ ମୋବାଇଲ ନମ୍ବରରେ ଯୋଗାଯୋଗ କରିଥିଲେ । ଟେଲିଫୋନ ମାଧ୍ୟମରେ ଅନୀଲ ସେ କମ୍ପାନୀରେ ଚାକିରି ପାଇଁ ଏକ ସାକ୍ଷାତକାର ମଧ୍ୟ ଦେଇଥିଲେ। ଜୁନ ୧୮ ତାରିଖରେ ଅନୀଲ ପ୍ରୋସେସିଙ୍ଗ ଫିସ ବାବଦକୁ ୧୦ ହଜାର ଟଙ୍କା ଡିପୋଜିଟ କରିବା ନିମନ୍ତେ ଏକ ମେଲ ପାଇ ନୂଆ ଦିଲ୍ଲୀର ଏକ ଷ୍ଟେଟ ବ୍ୟାଙ୍କ ଆକଉଣ୍ଟକୁ ନିଜ ଗୁଗୁଲ ପେ ମାଧ୍ୟମରେ ୧୦ହଜାର ଟଙ୍କା ପଠାଇଥିଲେ। ପୁଣିଥରେ ଜୁନ ୨୨ ତାରିଖରେ ଏକ ନକଲି ଭିସା ଅନିଲଙ୍କ ପାଖକୁ ମେଲରେ ପଠାଇ ୨୫ହଜାର ଟଙ୍କା ଡିପୋଜିଟ କରିବାକୁ ମେଲରେ ଲେଖିଥିଲା ସାଇବର ଲୁଟେରା। ଭିସା ପାଇ ଅନୀଲ ଖୁସି ହୋଇ ୨୫ହଜାର ଟଙ୍କା ଏବଂ ପୁଣିଥରେ ବିମାନ ଟିକେଟ ଓ ଅନ୍ୟାନ୍ୟ ଗସ୍ତ ଖର୍ଚ୍ଚ ବାବଦକୁ ୨୬ହଜାର ଟଙ୍କା ଉକ୍ତ ଆକାଉଣ୍ଟକୁ ପଠେଇଥିଲେ। ଏହିଭଳି ନିଜ ଗୁଗୁଲ ପେ ମାଧ୍ୟମରେ ୬୧ ହଜାରରୁ ଉର୍ଦ୍ଧ ଟଙ୍କା ସମ୍ପୃକ୍ତ ଆକାଉଣ୍ଟକୁ ଅନୀଲ ପଠାଇ ସାରିଛନ୍ତି। ପୁଣି ବାରମ୍ବାର ଉକ୍ତ କମ୍ପାନୀ ଅଧିକାରୀ ବିଭିନ୍ନ ବାହାନାରେ ଟଙ୍କା ମାଗିବାରୁ ଅନୀଲ ସନ୍ଦେହ କରି ଉକ୍ତ କମ୍ପାନୀର ୱେବସାଇଟ ଓ ବିଭିନ୍ନ ମାଧ୍ୟମରେ ଯାଞ୍ଚ କରି ସେହିଭଳି କୌଣସି କମ୍ପାନୀ ନ ଥିବାର ଜାଣିବାକୁ ପାଇଲେ । ସେ ଜାଣିଗଲେ ଯେ ସେ ଏକ ସାଇବର ଲୁଟେରାର ଶିକାର ହୋଇଛନ୍ତି ।

ବିଦେଶରେ ଚାକିରୀ ଲୋଭରେ ନିଜ ଟଙ୍କା ହରାଇବା ସହ ନିଜେ ଚାକିରି କରିଥିବା ମୁମ୍ବାଇର ଟାଟା କମ୍ପାନୀରୁ ମଧ୍ୟ ଇସ୍ତଫା ଦେଇ ପଳାଇ ଆସି ବର୍ତ୍ତମାନ ଅନୀଲ ଘରେ ବସି ଦୁଃଖରେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି। ଶେଷରେ ଅନୀଲ ଏ ନେଇ କଟକ ସାଇବର ସେଲ ଓ ବାଣପୁର ଥାନାରେ ଏକ ଲିଖିତ ଅଭିଯୋଗ କରିବା ସହ ବାଲୁଗାଁ ଏସଡ଼ିପିଓଙ୍କ ନିକଟରେ ଅଭିଯୋଗ କରିଛନ୍ତି।

ଖୋର୍ଦ୍ଧା: ଗୁରୁବାର ବାଘମାରୀ ଛକ ଉପରୁ ବାଘମାରି ପୁଲିସ ଏକ ଗୋରୁ ବୋଝେଇ ଟାଟାଏସିଇ ଗାଡିକୁ ଜବତ କରିଛି । ଗାଡିରେ ଥିବା ୧୦ଟି ଗୋରୁଙ୍କୁ ପୁଲିସ ଉଦ୍ଧାର କରିଥିବାବେଳେ ଡ୍ରାଇଭରକୁ ଗିରଫ କରିଛି । ଗିରଫ ଜଣକ ହେଲେ ଖୋର୍ଦ୍ଧା ଆଦର୍ଶଥାନା ଅନ୍ତର୍ଗତ କେରଙ୍ଗ ଗ୍ରାମର ମମତାଜ ଖାନ ୩୧) ।

ସୂଚନା ଅନୁସାରେ, ଦିନ ପ୍ରାୟ ସାଢେ ଗୋଟେ ସମୟରେ ଓଆର- ୦୪-ଏଲ୫୬୯୨ନଂ ବିଶିଷ୍ଟ ଏକ ଗୋରୁ ବୋଝେଇ ଟାଟା ଏସିଇ ଗାଡି କୁଶପଲ୍ଲାରୁ କେରଙ୍ଗ ଅଭିମୁଖେ ଯାଉଥିଲା । ବିଶ୍ୱସ୍ତ ସୂତ୍ରରୁ ଖବର ପାଇ ବାଘମାରୀ ପୁଲିସ ଉକ୍ତ ଗାଡିକୁ ବାଘମାରୀ ଛକନିକଟରେ ଅଟକାଇଥିଲା । ଏଥିରେ ୧୦ଟି ଗୋରୁ ବନ୍ଧାଯାଇ ନିଆଯାଉଥିବା ପୁଲିସ ଜାଣିବାକୁ ପାଇଥିଲା । ତେଣୁ ଗାଡିକୁ ଜବତ କରିବା ସହିତ ସେଥିରେ ଥିବା ଗୋରୁଙ୍କୁ ପୁଲିସ ଉଦ୍ଧାର କରିଥିଲା । ଉଦ୍ଧାର ଗୋରୁଙ୍କୁ ଭୁବନେଶ୍ବରସ୍ଥିତ ଗୋଶାଳାରେ ଛଡାଯିବ ବୋଲି ଥାନାଅଧିକାରୀ ଅର୍ଚ୍ଚନା ମଲ୍ଲିକ ସୂଚନା ଦେଇଛନ୍ତି । ବେଆଇନ ଗୋଚାଲାଣ ଅଭିଯୋଗରେ ପୁଲିସ ୪୭/୨୧ନଂ ରେ ଏକ ମାମଲା ରୁଜୁ କରିଥିବାବେଳେ ଡ୍ରାଇଭର ମମତାଜକୁ ଗିରଫ କରିଛି ।

ପ୍ରକାଶ ଥାଉକି, ଏସପିଙ୍କ କାର୍ଯ୍ୟାଳୟ ସୂଚନା ଅନୁସାରେ, ଗତ ଦେଢମାସ ମଧ୍ୟରେ ମଧ୍ୟରେ ଜିଲ୍ଲାପୁଲିସ ୧୪୮ରୁ ଉର୍ଦ୍ଧ୍ବ ଗୋରୁ ଉଦ୍ଧାର କରିଥିବାବେଳେ ପ୍ରାୟ ୧୬ଟି ଗୋରୁଙ୍କର ମୃତ୍ୟୁ ଏବଂ ୯ଜଣଙ୍କୁ ପୋଲିସ ଗିରଫ କରିଥିବା ଜଣାପଡିଛି । ଗତ ଅପ୍ରେଲ ୨୪ରେ ଆଦର୍ଶ ଥାନା ପୁଲିସ ୧୬ନଂ ଜାତୀୟ ରାଜପଥର ଜିଲ୍ଲାପାଳଙ୍କ କାର୍ଯ୍ୟାଳୟ ଛକଠାରୁ ଏକ ଗୋରୁ ବୋଝେଇ କଂଟେନରକୁ ଜବତ କରିଥିଲା । ଗାଡିରୁ ୩୮ଗୋରୁଙ୍କୁ ପୁଲିସ ଉଦ୍ଧାର କରିଥିବାବେଳେ ଡ୍ରାଇଭର ଭଦ୍ରକ ଧାମନଗର ର ସେକ ହାଇଦର କୁ ଗିରଫ କରିଥିଲା । ସେହିପରି ଉକ୍ତ ମାସ ୨୭ ତାରିଖରେ ବାଘମାରୀ ପୁଲିସ ଏକ ଗୋରୁ ବୋଝେଇ ପିକଅପ ଭ୍ୟନ ଜବତ କରିଥିବାବେଳେ ଏଥିରୁ ୪ଟି ଗୋରୁ ଉଦ୍ଧାର କରିଥିଲା । ଗାଡିର ଡ୍ରାଇଭର ବାଣପୁରର ହେମନ୍ତ ପ୍ରଧାନ(୨୮) ଏବଂ ଗୋରୁ ବେପାରୀ କେରଙ୍ଗର ଇଲିଆସ ମହମ୍ମଦ(୪୫)କୁ ଗିରଫ କରିଥିଲା । ଏଥିସହିତ ଚଳିତମାସ ଗତମାସ ୧ତାରିଖ ରେ ନାଚୁଣୀ ଫାଣ୍ଡି ପୁଲିସ ସୁନାଖଳା ଅଂଚଳର ଏକ ଗୋରୁ ବୋଝେଇ ଗାଡି ଜବତ କରିଥିଲା । ୬ଗୋରୁ ଉଦ୍ଧାର ହୋଇଥିବା ବେଳେ ୨ଜଣଙ୍କ ଗିରଫ କରିଥିଲା । ସେହିପରି ୧୨ତାରିଖ ସନ୍ଧ୍ୟାରେ ବାଘମାରୀ ପୁଲିସ ପଙ୍ଗାରସିଂହର ନୟାଗଡ଼ ଅଭିମୁଖେ ଯାଉଥିବା ଏକ ଟାଟାଏସିଇ ଗାଡିକୁ କଂଟାମଳିମ ଛକନିକଟରୁ ଜବତ କରିଥିଲା । ଏଥିରୁ ୩ଟି ଗୋରୁ ଉଦ୍ଧାର କରିଥିଲା । ଏହାର ଦୁଇଦିନ ପରେ ଅର୍ଥାତ୍‌ ୧୪ ତାରିଖରେ ଟାଙ୍ଗି ପୁଲିସ ଦିକ୍ଷୀତପଡା ଅଂଚଳରେ ଚଢାଉକରି ଏକ ଗୋରୁ ବୋଝେଇ କଂଟେନର ଜବତ କରିଥିଲା । ସେଥିରୁ ୩ଜୀବନ୍ତ ଗୋର ଏବଂ ୧୬ଟି ମୃତ ଗୋରୁଙ୍କ ପୁଲିସ ଉଦ୍ଧାର କରିଥିଲା । ଏହି ଘଟଣାରେ ପୁଲିସ ଜଣଙ୍କୁ ଗିରଫ କରିଥିବା ବେଳେ କଟକ ଚୌଦାରସ୍ଥିତ ନନ୍ଦଗାଁ ଗୋସାଳରେ ଜୀବତ ଗୋରୁଙ୍କୁ ଛାଡିଥିଲା ବୋଲି ପୁଲିସ ତଥ୍ୟରୁ ଜଣାଯାଇଛି । ସେହିପରି ଗତ ୨୧ତାରିଖ ରାତିରେ ବେଗୁନିଆ ଫୁଲିସ ଏକ ଗୋରୁବୋଝେଇ ଗାଡିକୁ ଜବତ କରି ଏଥିରୁ ୨୦ଗୋରୁ ଉଦ୍ଧାର କରିବା ସହ ଜଣଙ୍କୁ ଗିରଫ କରିଥିଲା ।

ବାଲୁଗାଁ : ଲକଡାଉନ ଏବଂ ସଟଡାଉନ ସମୟରେ ମଦ କେବଳ ହୋମ ଡେଲିଭରୀ ଥିବା ବେଳେ ଏହାର ସୁଯୋଗ ନେଇ କଛି ଚୋରା ମଦ ବେପାରୀ ବେଧଡକ୍ ମଦ ବିକ୍ରି କରୁଛନ୍ତି। ପୋଲିସ ଓ ଅବକାରୀ ବିଭାଗ ପକ୍ଷରୁ ମଧ୍ୟ ଏହା ଉପରେ କଡାନଜର ରଖି ବିଭିନ୍ନ ସ୍ଥାନରେ ବାରମ୍ବାର ଚଢାଉ ଜାରି କରି ସେଥିରେ ସମ୍ପୃକ୍ତ ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚାଲାଣ କରାଯାଉଛି। ଏହି ପରିପ୍ରେକ୍ଷୀରେ ବୁଧବାର ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ଦୁଲ୍ଲଣୀ ଶାସନ ଗ୍ରାମରେ ପୋଲିସ ଏବଂ ଅବକାରୀ ବିଭାଗର ଟାଙ୍ଗୀ ଅବକାରୀ ନିରୀକ୍ଷକ ଆଲୋକ ପ୍ରଧାନ, ବାଲୁଗାଁ ଅବକାରୀ ଉପ ନିରୀକ୍ଷକ ମନୋଜ ବାରିକ, ବାଣପୁର ଥାନା ଏଏସଆଇ ଶ୍ରୀନିବାସ ପ୍ରଧାନ ଏବଂ ଏଏସଆଇ ପ୍ରତାପ ପାହାଡ଼ସିଂ ଆଦି ସାମିଲ ହୋଇ ମିଳିତ ଭାବେ ଚଢ଼ାଉ କରି ଜଣେ ମହିଳା ଏବଂ ଜଣେ ପୁରୁଷଙ୍କୁ ଗିରଫ କରିଛନ୍ତି। ଏହି ସଂପୃକ୍ତ ଦୁଇ ଅଭିଯୁକ୍ତ ଦୁଲ୍ଲଣୀ ଗ୍ରାମର ଅଲଗା ଅଲଗା ସ୍ଥାନରେ ଦେଶୀ ମଦ ବିକ୍ରି କରୁଥିବା ଅଭିଯୋଗରେ ଗିରଫ କରିବା ସହିତ ସେମାନଙ୍କ ନିକଟରୁ ୧୭୩ ଲିଟର ଦେଶୀ ମଦ ଜବତ କରାଯାଇଛି।ବାଣପୁର ପୋଲିସ କେସ ନଂ ୨୪୨/୨୧ ଏବଂ ଅବକାରୀ ବିଭାଗ କେସ ନଂ ୨୯/୨୧ ରେ ଦୁଇଟି ପୃଥକ ପୃଥକ ମାମଲା ୠଜୁକରି ଉଭୟ ଅଭିଯୁକ୍ତଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି ବୋଲି ସୂଚନା ମିଳିଛ।

ବାଲୁଗାଁ: ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ଅଧିନ ନାଭାଲ ଫାଣ୍ଡି ଅନ୍ତର୍ଗତ ବିଧାରପୁର ଗ୍ରାମରେ ଶୁକ୍ରବାର ସକାଳେ ଜଣେ ଯୁବକ ବେକରେ ଦଉଡି ଲଗାଇ ଆତ୍ମହତ୍ୟା କରିଥିବାର ନେଇ ଅଭିଯୋଗ ହୋଇଛି। ପାରିବାରିକ କଳହ ଯୋଗୁଁ ଆତ୍ମହତ୍ୟା କରିଥିବା ନେଇ ସନ୍ଦେହ କରାଯାଉଥିବା ବେଳେ ମୃତ୍ୟୁର କାରଣ ଏଯାବତ୍ ଅସ୍ପଷ୍ଟ ରହିଛି।

ସୂଚନା ଅନୁଯାୟୀ ଚିଲିକା ବ୍ଲକ ଅଠରବାଟିଆ ପଞ୍ଚାୟତ ଅନ୍ତର୍ଗତ ବିଧାରପୁର ଗ୍ରାମର ରଘୁନାଥ ଜେନାଙ୍କ ପୁଅ ଆଲୋକ କୁମାର ଜେନା କୌଣସି କାରଣ ବଶତଃ ଶୁକ୍ରବାର ସକାଳେ ନିଜ ଘରେ ବେକରେ ଦଉଡି ଲଗାଇ ଆତ୍ମହତ୍ୟା କରିଥିଲେ। ତେବେ କିଛି ସମୟ ପରେ ପରିବାର ଲୋକ ଏହା ଜାଣିଲା ପରେ ଆଲୋକଙ୍କୁ ଝୁଲନ୍ତା ଅବସ୍ଥାରେ ଦେଖି ସଂଗେ ସଂଗେ ତାଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇ ଯାଇଥିଲେ। ହେଲେ ଡାକ୍ତର ସେଠାରେ ଆଲୋକଙ୍କୁ ମୃତ ଘୋଷଣା କରିବା ସହ ଏ ବିଷୟରେ ବାଲୁଗାଁ ପୋଲିସକୁ ସୂଚନା ଦେଇଥିଲେ। ଖବର ପାଇ ନାଭାଲ ଫାଣ୍ଡି ଅଧିକାରୀ ଦିଲୀପ ସାହୁ ସଂଗେ ସଂଗେ ଘଟଣା ସ୍ଥଳରେ ପହଞ୍ଚି ଆଲୋକଙ୍କ ଶବକୁ ଜବତ କରି ପୋଷ୍ଟମର୍ଟମ ନିମନ୍ତେ ପଠାଇବା ସହ ବାଲୁଗାଁ ଥାନା କେସ ନମ୍ବର ୭/୨୧ରେ ଏକ ଅପମୃତ୍ୟୁ ମାମଲା ରୁଜୁକରି ବିଧାରପୁର ଗ୍ରାମର ଆଲୋକଙ୍କ ଘରକୁ ଯାଇ ତଦନ୍ତ ଜାରି ରଖିଛନ୍ତି। ପ୍ରାଥମିକ ତଦନ୍ତରୁ ପାରିବାରିକ କଳହ ଯୋଗୁଁ ଆତ୍ମହତ୍ୟା କରିଥିବା ନେଇ ସନ୍ଦେହ କରାଯାଉଥିବା ସ୍ଥଳେ, ଏଯାବତ୍ ମୃତ୍ୟୁର କାରଣ ସ୍ପଷ୍ଟ ଜଣା ପଡିନାହିଁ। ତେବେ ତଦନ୍ତ ପରେ ମୃତ୍ୟୁର କାରଣ ଜଣାପଡିବ ବୋଲି ନାଭାଲ ଫାଣ୍ଡି ଅଧିକାରୀ ଶ୍ରୀ ସାହୁ କହିଛନ୍ତି।

ଖୋର୍ଦ୍ଧା : ଅଧିକ ଯୌତୁକ ଦାବୀରେ ମାନସିକ ଓ ଶାରୀରିକ ଯନ୍ତ୍ରଣା ଦେଇ ମୋ ଭଉଣୀ ଛବିନାକୁ ମାରିଦେଲେ ବାହାଘର ବେଳେ ୫୫ହଜାର ଟଙ୍କା ଯୌତୁକ ସମେତ ୬ଲକ୍ଷ ଟଙ୍କାର ଆସବାବପତ୍ର ଦେଇଥିଲୁ । ମାତ୍ର ତଥାପି ସେମାନଙ୍କ ମନ ବୁଝିଲାନି ଯେ,ଯନ୍ତ୍ରଣା ପରେ ଯନ୍ତ୍ରଣା ଦେଇ ଚାଲିଲେ । ଶେଷରେ ମୋ ଭଉଣୀକୁ ଶାଶୁଘର ଲୋକେ ଜୀବନରୁ ମାରିଦେଲେ । ଆଜି ଏମିତି ଅଭିଯୋଗ କରିଛନ୍ତି ଚନ୍ଦକା ଥାନା କୁଜିମହଲ ଗ୍ରାମର ସୋମନାଥ ବେହେରା । ତେବେ ବିବାହିତା ମହିଳାଙ୍କ ମୃତ୍ୟୁକୁ ନେଇ ନନା କଳ୍ପନା ଜଳ୍ପନା ସାଧାରଣରେ ପ୍ରକାଶ ପାଇଥିବା ବେଳେ ବାପଘର ପକ୍ଷରୁ ଥାନାରେ ହତ୍ୟା ଅଭିଯୋଗ ହୋଇଛି । କିନ୍ତୁ ଶୁଶୁର ଘର ପକ୍ଷରୁ ଏହାକୁ ଆତ୍ମହତ୍ୟା ବେଲି ଦର୍ଶାଯାଇଛି ।

ଅଭିଯୋଗ ଅନୁସାରେ, ଚନ୍ଦକା ଥାନା କୁଜିମହୁଲ ଗ୍ରାମର ସୁନାକର ବେହେରାଙ୍କ ବଡଝିଅ ତିଳତମା ବେହେରା ଓରଫ ଛବିନା(୨୯) ୨୦୧୬ ମସିହା ଜୁଲାଇ ୧୧ରେ ପଲା କୋଣାର୍କନଗରର ଶରତ ବେହେରାଙ୍କ ପୁଅ ସନ୍ତୋଷଙ୍କୁ ବୈଦିକ ରୀତିରେ ବିବାହ କରିଥିଲେ । ବରପକ୍ଷ ଦାବୀ ମୁତାବକ ନଗଦ ୫୫ ହଜାର ଟଙ୍କା ଯୌତୁକ ସମେତ ୬ଲକ୍ଷ ଟଙ୍କାର ଆସବାବପତ୍ର ଛବିନାଙ୍କ ପରିବାର ଦେଇଥିଲେ । ବିବହାର ୫ବର୍ଷ ମଧ୍ୟରେ ଛବିନାଙ୍କର କୌଣସି ସନ୍ତାନସନ୍ତତି ହୋଇନଥିଲେ । ଯାହାଫଳରେ ତାଙ୍କ ଶାଶୁ ଘରେ ଏହାକୁ ନେଇ ପ୍ରତ୍ୟେକ ସମୟରେ କଳହ ଲାଗି ରହୁଥିଲା । ଏପରିକି ଦୀର୍ଘ ବର୍ଷ ହେବ ଛବିନାଙ୍କ ସ୍ୱାମୀ ସନ୍ତୋଷ, ଶଶୁର ଶରତ, ଶାଶୁ ମଞ୍ଜୁଲତା ଓ ଦିଅର ପ୍ରକାଶ ବାପଘରୁ ଅଧିକ ଟଙ୍କା ଅଣିବାକୁ ବାଧ୍ୟ କରିଥିଲେ । ଏଥିରେ ଛବିନା ଅସମର୍ଥ ପ୍ରକାଶ କରିବାରୁ ତାଙ୍କୁ ଶାରୀରିକ ଓ ମାନସିକ ଯନ୍ତ୍ରଣା ଦେଉଥିଲେ । ଛବିନା ଏନେଇ ଭାଇକୁ ଜଣାଇବାରେ ଭାଇ ସୋମନାଥ ତାଙ୍କ ଶାଶୁଘରକୁ ଯାଇ ତାକୁ ବୁଝାଇ ଆସନ୍ତି । ଗତ ଏପ୍ରିଲ ୨୨ରେ ଛବିନାଙ୍କ ଜୀବନ ପ୍ରତି ବିପଦଥିବା ସେ ଫୋନରେ ବାପଘର ଲୋକଙ୍କୁ କହିଥିଲେ ଏହାଶୁଣି ଭାଇ ଆସିଥିଲେ ହେଁ ଛବିନାଙ୍କ ଶଶୁରଘର ଲୋକେ ତାଙ୍କ ଭଉଣୀ ସହ ଦେଖା କରାଇନଥିଲେ ଏପରିକି ୧୦ଦିନ ପୂର୍ବରୁ ପୁଣି ଜୀବନ ପ୍ରତି ବିପଦଥିବା ଛବିନା ବାପଘର ଲୋକଙ୍କୁ କହିଥିଲେ ମାତ୍ର କରୋନା କଟକଣା ଯୋଗୁ ପରିବାର ଲୋକ ଆସିପାରି ନଥିଲେ ତେବେ କାଲି ରାତି ସାଢେ ୧୦ଟାରେ ଛବିନାଙ୍କୁ ତାଙ୍କ ଘରକୁ ନେଇଯିବା ଲାଗି ସେ ଭାଇକୁ କାନ୍ଦି କାନ୍ଦି ଜଣାଇଥିଲା । ମାତ୍ର ଛବିନାକୁ ତାଙ୍କ ମାଆ ଆଶ୍ବାସନା ଦେଇ ବୁଝାଇଥିଲେ । କିନ୍ତୁ ସେହିଦିନ ରାତି ସାଢେ ୨ଟାରେ ଛବିନାର ଶାଶୁ ତମ ଭଉଣୀ ଗଧୁଆ ଘରେ ପଡିଯାଇଛି, ଆମେ ତାକୁ ମେଡିକାଲ ନେଇ ଯାଉଛୁ ବୋଲି ଫୋନରେ କହିଥିଲେ । ପରେ ସେ ମୃତ୍ୟୁବରଣ କରିଥିବା କହିଥିଲେ । ଯାହା ଛବିନାଙ୍କ ପରିବାର ଲୋକେ ବିଶ୍ୱାସ କରିପାରିନଥିଲେ । ପରେ ଛବିନାଙ୍କୁ ତାଙ୍କ ସ୍ୱାମୀ, ଶାଶୁ, ଶଶୁର ଓ ଦିଅର ମିଶି ଅଧିକ ଯୌତୁକ ପାଇଁ ହତ୍ୟା କରିଛନ୍ତି ବୋଲି ସୋମନାଥ ଥାନାରେ ଅଭିଯୋଗ କରିଛନ୍ତି । ମାତ୍ର ଛବିନା ଆତ୍ମହତ୍ୟା କରିଥିବା ଶାଶୁଘର ଲୋକେ କହୁଛନ୍ତି । ସୋମନାଥଙ୍କ ଅଭିଯୋଗ ଉପରେ ପୁଲିସ ୨୪୬/୨୧ରେ ଏକ ମାମଲା ରୁଜୁ କରିଛି । ମାଜିଷ୍ଟ୍ରେଟଙ୍କ ଉପସ୍ଥିତିରେ ପୁଲିସ ମୃତ ଦେହକୁ ଜବତ କରି ଖୋର୍ଦ୍ଧା ମେଡିକାଲରେ ବ୍ୟବଚ୍ଛେଦ ପରେ ବାପଘର ଲୋକଙ୍କୁ ହସ୍ତାନ୍ତର କରିଛି । ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ଏସଡିପିଓ ସୁସିଲ କୁମାର ମିଶ୍ର କହିଛନ୍ତି ।ସନ୍ତୋଷଙ୍କ ସମେତ ତାଙ୍କ ବାପା ଶରତଙ୍କୁ ପୁଲିସ ଅଟକ ରଖି ପଚରାଉଚରା କରୁଥିବା ଏସଡିପିଓ ଶ୍ରୀ ମିଶ୍ର କହିଛନ୍ତି ।