ଭୁବନେଶ୍ୱର: ସାରା ଦେଶରେ ପବିତ୍ର ଗୁରୁ ଦିବସ ପାଳନ କରାଯାଉଥିବା ବେଳେ ରାଜଧାନୀ ଭୁବନେଶ୍ୱରର  ଗାନ୍ଧୀମାର୍ଗରେ ଦେଖିବାକୁ ଶିକ୍ଷକଙ୍କ ବିକ୍ଷୋଭ । ନିଜର ବିଭିନ୍ନ ଦାବି ପୂରଣ ପାଇଁ ଓଡ଼ିଶାର ଶତାଧିକ ଅନୁଦାନବିହୀନ ସ୍କୁଲ ଓ କଲେଜ ଶିକ୍ଷକ ରାଜଧାନୀର ମହାତ୍ମା ଗାନ୍ଧୀମାର୍ଗରେ ବିକ୍ଷୋଭ ପ୍ରଦର୍ଶନ କରିଛନ୍ତି। ଓଡ଼ିଶା ସ୍କୁଲ କଲେଜ ଶିକ୍ଷକ ଓ କର୍ମଚାରୀ ସମନ୍ବୟ ସମିତିର ଆହ୍ୱାନରେ ଭୁବନେଶ୍ଵର ସ୍ଥିତ ଲୋୟର୍ ପି.ଏମ୍.ଜି. ଗାନ୍ଧିମାର୍ଗରେ ଚାଲିଥିବା ଅହୋରାତ୍ର ଗଣଧାରଣା ୨୧ ଦିନରେ ପହଞ୍ଚିଛି । ଶିକ୍ଷକ, ଅଧ୍ୟାପକ, ଶିକ୍ଷାକର୍ମଚାରୀ ରାଜଧାନୀର ରାଜରାସ୍ତାରେ ପ୍ରଚଣ୍ଡ ଖରା ଓ ବର୍ଷାକୁ ଖାତିର ନକରି ମୁକ୍ତାକାଶ ତଳେ ନିଜ ଦାବି ନେଇ ଦିନରାତି ବିତାଉଛନ୍ତି । 

ଗ୍ରାଣ୍ଟ-ଇନ୍-ଏଡ୍ (GIA) ସୁବିଧା, ପେନ୍‌ସନ୍ ବ୍ୟବସ୍ଥା ଏବଂ ଅନ୍ୟାନ୍ୟ ଦୀର୍ଘ ଦିନର ଦାବି ପୂରଣ ନେଇ ଶିକ୍ଷକମାନେ ଦିନରାତି ଧାରଣାରେ ବସିଛନ୍ତି। ବାରମ୍ବାର ଦାବି ସତ୍ତ୍ୱେ ସରକାର ଅଣଦେଖା କରୁଥିବାରୁ ସେମାନେ ଶ୍ରେଣୀଗୃହ ଛାଡ଼ି ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହୋଇଛନ୍ତି ବୋଲି ପ୍ରତିବାଦକାରୀମାନେ ପ୍ରକାଶ କରିଛନ୍ତି।

କମିଟିର ପ୍ରମୁଖ ଦାବିଗୁଡ଼ିକ ମଧ୍ୟରେ ରାଜ୍ୟର ୧୯୪ଟି ହାଇସ୍କୁଲକୁ ଗ୍ରାଣ୍ଟ-ଇନ୍-ଏଡ୍ ବ୍ୟବସ୍ଥା ଅଧୀନକୁ ଆଣିବା କିମ୍ବା ଅନୁଦାନପ୍ରାପ୍ତ ବିଦ୍ୟାଳୟଗୁଡ଼ିକ ସହ ସମାନ ଆର୍ଥିକ ସହାୟତା ପ୍ରଦାନ କରିବା ଅନ୍ତର୍ଭୁକ୍ତ। ଏହି ଅବସରରେ କମିଟିର ପ୍ରତିନିଧି ସୁଭାଷ ଚନ୍ଦ୍ର ଦାଶ କହିଛନ୍ତି ଯେ, ଶିକ୍ଷକମାନେ ବର୍ଷ ବର୍ଷ ଧରି ଛାତ୍ରଛାତ୍ରୀଙ୍କୁ ଶିକ୍ଷାଦାନ କରୁଥିଲେ ମଧ୍ୟ ସେମାନଙ୍କୁ ପୂର୍ବ ଗ୍ରାଣ୍ଟ-ଇନ୍-ଏଡ୍ ନିର୍ଦ୍ଦେଶନାମାରୁ ବାଦ୍ ଦିଆଯାଇଛି। ଖାଲି ପଡ଼ିଥିବା ପଦବୀ ପୂରଣ କରିବା ଏବଂ ଅବସର ବୟସସୀମା ୬୦ରୁ ୬୨ ବର୍ଷକୁ ବୃଦ୍ଧି କରିବାକୁ ମଧ୍ୟ ସେମାନେ ଦାବି କରିଛନ୍ତି।

ବିକ୍ଷୋଭସ୍ଥଳରେ ଉପସ୍ଥିତ ଥିବା ଅନ୍ୟ ଶିକ୍ଷକମାନେ ଦର୍ଶାଇଛନ୍ତି ଯେ ସରକାର ଗୋଟିଏ ଦେଶ, ଗୋଟିଏ ନିର୍ବାଚନ କଥା କହୁଥିବା ବେଳେ ଶିକ୍ଷକମାନଙ୍କ ମଧ୍ୟରେ ଏଭଳି ଭେଦଭାବ ରହିବା ଅନୁଚିତ। ଆନ୍ଦୋଳନରତ ଶିକ୍ଷୟିତ୍ରୀ ସୁରମା ପଟେଲ କହିଛନ୍ତି, 'ସରକାର ଆମ କଥା ଶୁଣିବା ଉଚିତ୍। ଯଦି ସରକାର ନଶୁଣିବେ, ତେବେ କିଏ ଶୁଣିବ? ଆମେ ଅସହାୟ ଏବଂ ଆମର ଦାବିଗୁଡ଼ିକୁ ବିଚାର କରିବାକୁ ସରକାରଙ୍କୁ ନିବେଦନ କରୁଛୁ।' ଛାତ୍ରଛାତ୍ରୀଙ୍କ ଭବିଷ୍ୟତ ଗଢ଼ୁଥିବା ଶିକ୍ଷକମାନେ ଗୁରୁ ଦିବସ ପାଳନ କରିବା ପରିବର୍ତ୍ତେ ରାସ୍ତାରେ ବସିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ସେମାନେ କ୍ଷୋଭ ପ୍ରକାଶ କରିଛନ୍ତି। ଦାବି ପୂରଣ ନହେବା ପର୍ଯ୍ୟନ୍ତ ଏହି ଆନ୍ଦୋଳନ ଜାରି ରହିବ ବୋଲି କମିଟି ପକ୍ଷରୁ ସ୍ପଷ୍ଟ କରାଯାଇଛି।

ଭୁବନେଶ୍ୱର: ପର୍ଯ୍ୟାୟକ୍ରମେ ଶିକ୍ଷକ ଆନ୍ଦୋଳନ ବ୍ୟାପକ ହେଉଛି। ବିଧାନସଭା ସମୟରେ ସରକାରଙ୍କ ଶିରପୀଡ଼ା ବଢ଼ୁଛି। ବିରୋଧୀ ବିଧାନସଭାରେ ଶିକ୍ଷକଙ୍କ ଦାବିକୁ ପ୍ରସଙ୍ଗ କରୁଥିବା ବେଳେ ବାହାରେ ମଧ୍ୟ ସରକାରଙ୍କୁ ଘେରୁଛନ୍ତି। ବିରୋଧୀ ଦଳରେ ଥିବା ବେଳେ ମୁଖ୍ୟମନ୍ତ୍ରୀ ଦେଇଥିବା ପ୍ରତିଶ୍ରୁତିକୁ କାହିଁକି ପାଳନ କରୁନାହାନ୍ତି ବୋଲି ପ୍ରଶ୍ନ କରୁଛନ୍ତି। ଏପରି ସ୍ଥିତିରେ ବିଦ୍ୟାଳୟରେ ଅନୁପସ୍ଥିତ ରହୁଥିବା ଶିକ୍ଷକଙ୍କ ଦୈନିକ ଉପସ୍ଥାନ ମାଗିଛି ବିଦ୍ୟାଳୟ ଓ ଗଣଶିକ୍ଷା ବିଭାଗ। ବିଭାଗ ପକ୍ଷରୁ ସମସ୍ତ ଜିଲ୍ଲା ଶିକ୍ଷା ଅଧିକାରୀ (ଡିଇଓ)ଙ୍କୁ କରାଯାଇଥିବା ଚିଠିରେ ଦର୍ଶାଯାଇଛି ଯେ ପ୍ରାଥମିକ ଶିକ୍ଷକ ମହାସଂଘ ପକ୍ଷରୁ ଶିକ୍ଷକମାନେ ଲୋୟର ପିଏମ୍‌ଜିରେ ଆନ୍ଦୋଳନ କରୁଛନ୍ତି। ବିଦ୍ୟାଳୟରେ ଅନୁପସ୍ଥିତ ରହୁଥିବା ଶିକ୍ଷକଙ୍କ ନାମ ସହିତ ସବିଶେଷ ତଥ୍ୟ ପ୍ରତିଦିନ ପ୍ରଦାନ କରିବାକୁ କୁହାଯାଇଛି।

ସେହିପରି ବିନା ଅନୁମତିରେ ମୁଖ୍ୟାଳୟ ଛାଡ଼ି ଆନ୍ଦୋଳନରେ ବସିଥିବା ଶିକ୍ଷକଙ୍କ ରିପୋର୍ଟ ମଧ୍ୟ ଦାଖଲ କରିବାକୁ କୁହାଯାଇଛି। କୌଣସି ଶିକ୍ଷକଙ୍କୁ ପୂର୍ବ ଅନୁମତି ବିନା ମୁଖ୍ୟାଳୟ ଛାଡିବାକୁ ଅନୁମତି ଦିଆଯିବନାହିଁ। ଏଥିରେ ଖିଲାପ ହେଲେ ଗମ୍ଭୀରତାର ସହ ବିଚାର କରି ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଉଲ୍ଲେଖ କରାଯାଇଛି। ବିଭାଗର ଏପରି ଚିଠି ପରେ ଶିକ୍ଷକଙ୍କ ଅକଲଗୁଡ଼ୁମ୍‌ ହୋଇଛି। ଛୁଟି ନେଇଥିଲେ ମଧ୍ୟ ମୁଖ୍ୟାଳୟ ଛାଡ଼ିବା ଅନୁମତି ନେଇ ନ ଥିବାରୁ ଅକଳରେ ପଡ଼ିଛନ୍ତି। ଏଣୁ ଅନେକ ଶିକ୍ଷକ ଅନିଚ୍ଛା ସତ୍ତ୍ବେ ଆନ୍ଦୋଳନରୁ ଫେରିବାକୁ ବାଧ୍ୟ ହେଉଥିବା ଜଣାପଡ଼ିଛି। ଅପପରପକ୍ଷେ, ସରକାରଙ୍କ ଏହି ନିଷ୍ପତ୍ତିକୁ ପ୍ରାଥମିକ ଶିକ୍ଷକ ମହାସଂଘର ନେତାମାନେ ନିନ୍ଦା କରିଛନ୍ତି। ସରକାର ଶିକ୍ଷକଙ୍କ ସ୍ୱରକୁ ଚାପିବା ପାଇଁ ଏପରି କରୁଛନ୍ତି। ଆଗାମୀ ଦିନରେ ଜିଲ୍ଲା ଓ ବ୍ଲକ୍‌ ସ୍ତରରେ ଆନ୍ଦୋଳନକୁ ବ୍ୟାପକ କରାଯିବ ବୋଲି ସଂଘ ପକ୍ଷରୁ କୁହାଯାଇଛି।