ଦିଲ୍ଲୀରେ ପୁଣି ଏକ ଲଜ୍ଜାଜନକ ତଥା ଅମାନବୀୟ ଘଟଣା ସାମ୍ନାକୁ ଆସିଛି। ରାଜଧାନୀ ଦିଲ୍ଲୀରେ ଏକ ଘରୋଇ ସ୍ଲିପର ବସରେ ଜଣେ ବିବାହିତ ମହିଳାଙ୍କୁ ଗଣଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି। ଏହି ଘଟଣା ସମଗ୍ର ଦେଶରେ ଚାଞ୍ଚଲ୍ୟ ଖେଳାଇ ଦେଇଥିବା ବେଳେ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ବସର ଉଭୟ ଡ୍ରାଇଭର ଓ କଣ୍ଡକ୍ଟରଙ୍କୁ ଗିରଫ କରିଛି।

ରାନୀ ବାଗରୁ ନାଙ୍ଗଲୋଇ ଯାତ୍ରା

ସୂଚନା ଅନୁଯାୟୀ, ଗତ ୧୨ ମେ ତାରିଖ ରାତିରେ ଏହି ନିନ୍ଦନୀୟ ଘଟଣା ଘଟିଥିଲା। ପୀଡ଼ିତା ଜଣକ ତିନି ସନ୍ତାନର ଜନନୀ ବୋଲି ଜଣାପଡିଛି। ଅଭିଯୋଗ ଅନୁଯାୟୀ, ମହିଳା ଜଣଙ୍କୁ ଦିଲ୍ଲୀର ରାନୀ ବାଗ ଅଞ୍ଚଳରୁ ବସରେ ବସାଯାଇଥିଲା ଏବଂ ପରେ ନାଙ୍ଗଲୋଇ ଅଞ୍ଚଳକୁ ନେଇଯାଇ ବସ୍ ଭିତରେ ଏହି ଅମାନୁଷିକ କାଣ୍ଡ ଭିଆଯାଇଥିଲା। ବସ୍‌ଟି ଖାଲି ଥିବାର ସୁଯୋଗ ନେଇ ଡ୍ରାଇଭର ଓ କଣ୍ଡକ୍ଟର ମିଶି ମହିଳାଙ୍କ ସହ ଦୁଷ୍କର୍ମ କରିଥିଲେ।

ପୋଲିସର ତ୍ୱରିତ କାର୍ଯ୍ୟାନୁଷ୍ଠାନ

ଘଟଣା ସମ୍ପର୍କରେ ପୀଡ଼ିତା ପୋଲିସ ନିକଟରେ ଅଭିଯୋଗ କରିବା ପରେ ଦିଲ୍ଲୀ ପୋଲିସ ତୁରନ୍ତ ଏକ ମାମଲା (FIR) ରୁଜୁ କରିଥିଲା। ବର୍ତ୍ତମାନ ସୁଦ୍ଧା ଅଭିଯୁକ୍ତ ଡ୍ରାଇଭର ଓ କଣ୍ଡକ୍ଟରଙ୍କୁ ଗିରଫ କରାଯାଇଛି ଏବଂ ଅପରାଧରେ ବ୍ୟବହୃତ ହୋଇଥିବା ଘରୋଇ ବସ୍ କୁ ଜବତ କରାଯାଇଛି। ପୋଲିସ ପକ୍ଷରୁ ଏହି ଘଟଣାର ଟିକିନିଖି ତଦନ୍ତ ଜାରି ରହିଛି ଏବଂ ସବୁ ଦିଗରୁ ଯାଞ୍ଚ କରାଯାଉଥିବା ଅଧିକାରୀମାନେ ସୂଚନା ଦେଇଛନ୍ତି।

ଦିଲ୍ଲୀରେ ମହିଳାଙ୍କ ସୁରକ୍ଷାକୁ ନେଇ ବାରମ୍ବାର ପ୍ରଶ୍ନ ଉଠୁଥିବା ବେଳେ ଏହି ଘଟଣା ପୁଣି ଥରେ ନିର୍ଭୟା କାଣ୍ଡର ସ୍ମୃତିକୁ ତାଜା କରିଦେଇଛି। ପ୍ରଶାସନ ତରଫରୁ ଅଭିଯୁକ୍ତମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ଦାବି ଜୋର ଧରିଛି।

ସାତ ମାସର ଗର୍ଭବତୀ ଥିବା ଜଣେ ୧୫ ବର୍ଷୀୟା ଦୁଷ୍କର୍ମ ପୀଡ଼ିତା ଶନିବାର ଦିନ ନୂଆଦିଲ୍ଲୀ ସ୍ଥିତ ଏମ୍ସ (AIIMS) ଠାରେ ଏକ ପୁତ୍ର ସନ୍ତାନକୁ ଜନ୍ମ ଦେଇଛନ୍ତି। ନିକଟରେ ସର୍ବୋଚ୍ଚ ନ୍ୟାୟାଳୟ ତାଙ୍କୁ ଗର୍ଭଧାରଣର ଆଇନଗତ ସମୟସୀମା ଅତିକ୍ରମ କରିସାରିଥିଲେ ମଧ୍ୟ ଏହି ମାମଲାରେ ଗର୍ଭପାତ ପାଇଁ ବିଶେଷ ଅନୁମତି ପ୍ରଦାନ କରିଥିଲେ। ତେବେ ଡାକ୍ତରଖାନା କର୍ତ୍ତୃପକ୍ଷଙ୍କ ସୂଚନା ଅନୁଯାୟୀ, ନାବାଳିକା ଜଣକ ଏକ ସୁସ୍ଥ ପୁତ୍ର ସନ୍ତାନ ଜନ୍ମ ଦେଇଛନ୍ତି ଏବଂ ତାଙ୍କ ପରିବାର ଲୋକେ ଶିଶୁଟି ଉପରୁ ନିଜର ସମସ୍ତ ପିତାମାତା ଅଧିକାର ଛାଡ଼ିଦେଇଛନ୍ତି।

ନବଜାତ ଶିଶୁର ସ୍ୱାସ୍ଥ୍ୟବସ୍ଥା ସ୍ଥିର

ଏମ୍ସର ବରିଷ୍ଠ ଅଧିକାରୀମାନେ ସୂଚନା ଦେଇଛନ୍ତି ଯେ, ବର୍ତ୍ତମାନ ନବଜାତ ଶିଶୁଟିକୁ ନିଓନାଟାଲ୍ ଇଣ୍ଟେନ୍ସିଭ୍ କେୟାର ୟୁନିଟ୍ ବା ଏନଆଇସିୟୁ (NICU) ରେ ରଖାଯାଇ ପର୍ଯ୍ୟବେକ୍ଷଣ କରାଯାଉଛି। ଡାକ୍ତରଖାନା ପକ୍ଷରୁ କୁହାଯାଇଛି ଯେ, ଶିଶୁଟିର ସ୍ୱାସ୍ଥ୍ୟବସ୍ଥା ସ୍ଥିର ରହିଛି ଏବଂ ସମୟ ପୂର୍ବରୁ ଜନ୍ମ (ପ୍ରି-ଟର୍ମ) ହେତୁ କୌଣସି ବଡ଼ ଧରଣର ସ୍ୱାସ୍ଥ୍ୟ ସମସ୍ୟା ଦେଖାଦେଇ ନାହିଁ। ତଥାପି ଶିଶୁଟିର ନିରନ୍ତର ଯତ୍ନ ଆବଶ୍ୟକ ରହିଛି। ଅନ୍ୟପକ୍ଷରେ, ନାବାଳିକା ମା' ଓ ତାଙ୍କ ପରିବାରର ଅନୁରୋଧ କ୍ରମେ ତାଙ୍କୁ ଡାକ୍ତରଖାନାରୁ ଡିସଚାର୍ଜ କରାଯାଇଛି।

ଆରମ୍ଭ ହେଲା ପୋଷ୍ୟ ସନ୍ତାନ ଗ୍ରହଣ ପ୍ରକ୍ରିୟା

ପରିବାର ଲୋକେ ନବଜାତ ଶିଶୁ ଉପରୁ ନିଜର ଅଧିକାର ତ୍ୟାଗ କରିବାକୁ ଇଚ୍ଛା ପ୍ରକାଶ କରିବା ସହ ଏକ ଲିଖିତ ବୟାନ ମଧ୍ୟ ଡାକ୍ତରଖାନାକୁ ପ୍ରଦାନ କରିଥିଲେ। କର୍ତ୍ତୃପକ୍ଷ ଏହାକୁ ବିଧିବଦ୍ଧ ଭାବେ ଗ୍ରହଣ କରିଛନ୍ତି। ଶିଶୁଟିର ଅଧିକାର ଛାଡ଼ିବା ପରେ ବର୍ତ୍ତମାନ କେନ୍ଦ୍ରୀୟ ପୋଷ୍ୟ ସନ୍ତାନ ଗ୍ରହଣ ସଂସ୍ଥା (Central Adoption Agency) ମାଧ୍ୟମରେ ତାର ପୋଷ୍ୟ ପ୍ରକ୍ରିୟା ବା ଆଡପ୍ସନ୍ ପ୍ରକ୍ରିୟା ଆରମ୍ଭ କରାଯାଇଛି।

ସୁପ୍ରିମକୋର୍ଟଙ୍କ ଗୁରୁତ୍ୱପୂର୍ଣ୍ଣ ରାୟ

ଗତ ଏପ୍ରିଲ୍ ୨୪ ତାରିଖରେ ସୁପ୍ରିମକୋର୍ଟ ମହିଳାଙ୍କ ପ୍ରଜନନ ସ୍ୱାଧୀନତା ଉପରେ ଗୁରୁତ୍ୱାରୋପ କରି ମେଡିକାଲ୍ ଟର୍ମିନେସନ୍ ଅଫ୍ ପ୍ରେଗ୍ନାନ୍ସି (MTP) ଆକ୍ଟ, ୧୯୭୧ ଅଧୀନରେ ନାବାଳିକାଙ୍କୁ ଗର୍ଭପାତ ପାଇଁ ଅନୁମତି ଦେଇଥିଲେ। ଜଣେ ନାବାଳିକାଙ୍କୁ ଅନିଚ୍ଛାକୃତ ଭାବେ ଗର୍ଭଧାରଣ କରିବାକୁ ବାଧ୍ୟ କରିବା ସମ୍ବିଧାନର ଧାରା ୨୧ ଅଧୀନରେ ଥିବା ତାଙ୍କର ସମ୍ମାନ, ସ୍ୱାଧୀନତା ଏବଂ ବ୍ୟକ୍ତିଗତ ଅଧିକାରର ଉଲ୍ଲଂଘନ ବୋଲି ଅଦାଲତ ଦର୍ଶାଇଥିଲେ। ସୂଚନାଯୋଗ୍ୟ, ଜଣେ ନାବାଳକ ସହ ସମ୍ପର୍କରୁ ଏହି ଗର୍ଭଧାରଣ ହୋଇଥିଲା, କିନ୍ତୁ ଆଇନ ଅନୁଯାୟୀ ନାବାଳିକାଙ୍କ ବୟସ କମ୍ ଥିବାରୁ ଏହାକୁ ଦୁଷ୍କର୍ମ ବା ରେପ୍ କେସ୍ ଭାବେ ବିବେଚନା କରାଯାଉଛି।

ରାଜଧାନୀ ଦିଲ୍ଲୀରେ ଏକ ଅଭାବନୀୟ ତଥା ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ବରଙ୍କୁ ଭଲ ପାଉଥିବା ଜଣେ ପଡ଼ୋଶୀ ଯୁବତୀ ଇର୍ଷାନ୍ୱିତ ହୋଇ ବିବାହର ଠିକ୍ ପୂର୍ବରୁ କନ୍ୟା ଉପରକୁ ଏସିଡ୍ ମାଡ଼ କରିଛନ୍ତି। ଏହି ଏସିଡ୍ ଆକ୍ରମଣରେ ୨୧ ବର୍ଷୀୟା ପୀଡ଼ିତାଙ୍କ ଅବସ୍ଥା ଗୁରୁତର ରହିଥିବା ବେଳେ ତାଙ୍କୁ ଦିଲ୍ଲୀର ଜିଟିବି (GTB) ହସ୍ପିଟାଲ୍ରେ ଭର୍ତ୍ତି କରାଯାଇଛି। ପୋଲିସ ଅଭିଯୁକ୍ତ ଯୁବତୀଙ୍କୁ ଗିରଫ କରି ଘଟଣାର ତଦନ୍ତ ଆରମ୍ଭ କରିଛି।

ମେହେନ୍ଦୀ ପ୍ରସ୍ତୁତି ବେଳେ ଆକ୍ରମଣ

ପୋଲିସର ସୂଚନାନୁସାରେ, ଏହି ଘଟଣା ଦିଲ୍ଲୀର ଇନ୍ଦିରା ବିହାର ଅଞ୍ଚଳରେ ଘଟିଛି। ଆସନ୍ତା ରବିବାର ଅର୍ଥାତ୍ ଏପ୍ରିଲ୍ ୧୯ ତାରିଖରେ ପୀଡ଼ିତାଙ୍କର ବିବାହ ହେବାର ଥିଲା। ଘରେ ବିବାହର ମାହୋଲ ଥିବା ବେଳେ ପୀଡ଼ିତା ନିଜର ମେହେନ୍ଦୀ ଉତ୍ସବ ପାଇଁ ପ୍ରସ୍ତୁତି କରୁଥିଲେ। ଠିକ୍ ଏହି ସମୟରେ ୨୬ ବର୍ଷୀୟା ଅଭିଯୁକ୍ତ ଯୁବତୀ ଜଣକ ସେଠାରେ ପହଞ୍ଚି ତାଙ୍କ ଉପରକୁ ଏସିଡ୍ ଫିଙ୍ଗିଥିଲେ। ପରିବାର ଲୋକେ ତୁରନ୍ତ ତାଙ୍କୁ ଉଦ୍ଧାର କରି ହସ୍ପିଟାଲ୍ ନେଇଥିଲେ, ଯେଉଁଠାରେ ଡାକ୍ତରମାନେ ତାଙ୍କ ଅବସ୍ଥା ସଙ୍କଟାପନ୍ନ ଥିବା ସ୍ପଷ୍ଟ କରିଛନ୍ତି।

ପ୍ରେମ ଓ ଇର୍ଷାରୁ ବର୍ବରତା

ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତ ଯୁବତୀ ଜଣକ ପୀଡ଼ିତାଙ୍କ ପଡ଼ୋଶୀ ଅଟନ୍ତି ଏବଂ ସେ ବିବାହ ହେବାକୁ ଥିବା ବରଙ୍କ ସହିତ ସମ୍ପର୍କରେ ଥିଲେ। ବର ଅନ୍ୟତ୍ର ବିବାହ କରୁଥିବା ଦେଖି ସେ ଇର୍ଷାରେ ଏଭଳି ବର୍ବର କାଣ୍ଡ ଭିଆଇଥିବା ସନ୍ଦେହ କରାଯାଉଛି। ଉଭୟ ପୀଡ଼ିତା ଏବଂ ଅଭିଯୁକ୍ତ ପାଠପଢ଼ାରେ ମେଧାବୀ ଥିଲେ। ଅଭିଯୁକ୍ତ ଜଣକ ନିକଟରେ ଏକ ଶିକ୍ଷକତା ପରୀକ୍ଷା ମଧ୍ୟ ଉତ୍ତୀର୍ଣ୍ଣ ହୋଇଥିଲେ। ପୀଡ଼ିତାଙ୍କ ପରିବାରରେ ୫ ଭଉଣୀ ଏବଂ ଜଣେ ଭାଇ ଥିବା ଜଣେ ପଡ଼ୋଶୀ ସୂଚନା ଦେଇଛନ୍ତି।

ପୋଲିସର କାର୍ଯ୍ୟାନୁଷ୍ଠାନ

ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକ ଓ ଅସନ୍ତୋଷର ଛାୟା ଖେଳିଯାଇଛି। ସ୍ଥାନୀୟ ବାସିନ୍ଦା ଓ ପରିବାର ଲୋକେ ଦୋଷୀ ବିରୋଧରେ କଠୋର ଏବଂ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଘଟଣାକୁ ନେଇ ଗୋକଲପୁରୀ ପୋଲିସ ଷ୍ଟେସନରେ ଭାରତୀୟ ନ୍ୟାୟ ସଂହିତା (BNS) ର ଧାରା ୧୨୪(୧) ଅନୁଯାୟୀ ଏକ ମାମଲା ରୁଜୁ କରାଯାଇଛି। ଏକ ଫରେନ୍ସିକ୍ ଟିମ୍ ଘଟଣାସ୍ଥଳ ପରିଦର୍ଶନ କରି ପ୍ରମାଣ ସଂଗ୍ରହ କରିଛି। ପୋଲିସ ଅଭିଯୁକ୍ତ ଯୁବତୀଙ୍କୁ ଅଟକ ରଖିବା ସହ ପରବର୍ତ୍ତୀ ତଦନ୍ତ ଜାରି ରଖିଛି।

ଦିଲ୍ଲୀର ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (JNU) ପରିସର ଗୁରୁବାର ଦିନ ରଣକ୍ଷେତ୍ରରେ ପରିଣତ ହୋଇଛି। JNU ଛାତ୍ର ସଂଘ (JNUSU) ପକ୍ଷରୁ ଶିକ୍ଷା ମନ୍ତ୍ରଣାଳୟ ଅଭିମୁଖେ ଆୟୋଜିତ ଏକ ପଦଯାତ୍ରା ବେଳେ ପୋଲିସ ଏବଂ ଛାତ୍ରଙ୍କ ମଧ୍ୟରେ ଜୋରଦାର ସଂଘର୍ଷ ଘଟିଛି। ଏହି ଘଟଣାରେ ପ୍ରାୟ ୨୫ ଜଣ ପୋଲିସ କର୍ମଚାରୀ ଆହତ ହୋଇଥିବାବେଳେ ପୋଲିସ କାର୍ଯ୍ୟାନୁଷ୍ଠାନରେ ଅନେକ ଛାତ୍ର ମଧ୍ୟ ଆହତ ହୋଇଥିବା ଅଭିଯୋଗ ହୋଇଛି। ପରିସ୍ଥିତି ନିୟନ୍ତ୍ରଣ କରିବାକୁ ଯାଇ ପୋଲିସ ୫୧ ଜଣ ପ୍ରଦର୍ଶନକାରୀଙ୍କୁ ଅଟକ ରଖିଛି।

କାହିଁକି ହେଉଥିଲା ଆନ୍ଦୋଳନ?

JNU କୁଳପତି ଶାନ୍ତିଶ୍ରୀ ଧୂଲିପୁଡି ପଣ୍ଡିତଙ୍କ ବିବାଦୀୟ ମନ୍ତବ୍ୟ ଏବଂ ଛାତ୍ର ନେତାଙ୍କ ବହିଷ୍କାର ବିରୋଧରେ ଛାତ୍ର ସଂଘ ପକ୍ଷରୁ ଏହି 'ଲଙ୍ଗ୍ ମାର୍ଚ୍ଚ'ର ଡାକରା ଦିଆଯାଇଥିଲା। ଛାତ୍ରମାନେ କ୍ୟାମ୍ପସରୁ ଶିକ୍ଷା ମନ୍ତ୍ରଣାଳୟ ପର୍ଯ୍ୟନ୍ତ ଶୋଭାଯାତ୍ରାରେ ଯିବାକୁ ଚେଷ୍ଟା କରୁଥିବା ବେଳେ ପୋଲିସ ସେମାନଙ୍କୁ ମୁଖ୍ୟ ଫାଟକ ନିକଟରେ ଅଟକାଇଥିଲା। ଏହି ସମୟରେ ଉଭୟ ପକ୍ଷ ମଧ୍ୟରେ ଧସ୍ତାଧସ୍ତି ଆରମ୍ଭ ହୋଇଥିଲା, ଯାହା ପରେ ହିଂସାତ୍ମକ ରୂପ ନେଇଥିଲା।

ପୋଲିସର ଅଭିଯୋଗ ଓ କାର୍ଯ୍ୟାନୁଷ୍ଠାନ

ଦିଲ୍ଲୀ ପୋଲିସର ସୂଚନା ଅନୁଯାୟୀ, ପ୍ରଦର୍ଶନକାରୀମାନେ ବ୍ୟାରିକେଡ୍ ଭାଙ୍ଗିବାକୁ ଚେଷ୍ଟା କରିଥିଲେ ଏବଂ ପୋଲିସ ଉପରକୁ ପଥର, ବାଡ଼ି ଓ ଜୋତା ଫିଙ୍ଗିଥିଲେ। କିଛି ଛାତ୍ର ପୋଲିସ କର୍ମଚାରୀଙ୍କୁ କାମୁଡ଼ି ଦେଇଥିବା ମଧ୍ୟ ଅଭିଯୋଗ ହୋଇଛି। ଆହତଙ୍କ ମଧ୍ୟରେ ଏସିପି ବେଦ ପ୍ରକାଶ, ଏସିପି ସଂଘମିତ୍ରା ଏବଂ ଦୁଇଜଣ ଏସଏଚଓ ସାମିଲ ଅଛନ୍ତି। ପୋଲିସ ଏହି ଘଟଣାରେ ଏକ ମାମଲା (FIR) ରୁଜୁ କରିଛି।

ଛାତ୍ର ନେତା ଅଟକ

ଏହି ଘଟଣାରେ ପୋଲିସ JNUSU ସଭାପତି ଅଦିତି ମିଶ୍ର ଏବଂ ପୂର୍ବତନ ସଭାପତି ନୀତୀଶ କୁମାରଙ୍କ ସମେତ ମୋଟ ୫୧ ଜଣଙ୍କୁ ଅଟକ ରଖିଛି। ଅନ୍ୟପକ୍ଷରେ, ଛାତ୍ର ସଂଘ ଅଭିଯୋଗ କରିଛି ଯେ ପୋଲିସ ବଳପୂର୍ବକ ଆନ୍ଦୋଳନକୁ ଦମନ କରିବାକୁ ଚେଷ୍ଟା କରିଛି ଏବଂ ଲାଠିଚାର୍ଜ ଯୋଗୁଁ ଅନେକ ଛାତ୍ର ଆହତ ହୋଇଛନ୍ତି। ପୋଲିସ କାର୍ଯ୍ୟାନୁଷ୍ଠାନ ବେଳେ ବି.ଆର. ଆମ୍ବେଦକରଙ୍କ ଏକ ଫଟୋଚିତ୍ର ନଷ୍ଟ ହୋଇଥିବା ନେଇ ମଧ୍ୟ ଛାତ୍ରମାନେ ଦାବି କରିଛନ୍ତି।

ଦିଲ୍ଲୀର ଦ୍ୱାରକା ଅଞ୍ଚଳରେ ଘଟିଥିବା ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ୨୩ ବର୍ଷୀୟ ଯୁବକ ସାହିଲ ଧାନେଶ୍ରାଙ୍କ ମୃତ୍ୟୁକୁ ନେଇ ସାରା ଦେଶରେ ଚର୍ଚ୍ଚା ଜୋର ଧରିଛି। ସୋସିଆଲ ମିଡିଆ ପାଇଁ ରିଲ୍ ପ୍ରସ୍ତୁତ କରିବା ନିଶାରେ ଜଣେ ନାବାଳକର ବେପରୁଆ ଗାଡ଼ି ଚାଳନା ଯୋଗୁଁ ତାଙ୍କ ପୁଅର ପ୍ରାଣହାନି ଘଟିଥିବା ମୃତ ସାହିଲଙ୍କ ମା' ଇନ୍ନା ମାକନ ଅଭିଯୋଗ କରିଛନ୍ତି। ଏହି ଘଟଣାରେ ଅଭିଯୁକ୍ତ ନାବାଳକକୁ ଜାମିନ ମିଳିବା ପରେ ପୀଡ଼ିତ ପରିବାର ଏବେ ନ୍ୟାୟ ପାଇଁ ସୋସିଆଲ ମିଡିଆରେ ଅଭିଯାନ ଆରମ୍ଭ କରିଛନ୍ତି।

ଦିଲ୍ଲୀର ଦ୍ୱାରକା ସଡ଼କ ଦୁର୍ଘଟଣାରେ ପୁଅକୁ ହରାଇଥିବା ଜଣେ ମା' ଏବେ ନ୍ୟାୟ ପାଇଁ ଲଢ଼େଇ କରୁଛନ୍ତି। ନାବାଳକର ବେପରୁଆ ଗାଡ଼ି ଚାଳନା କେବଳ ଦୁର୍ଘଟଣା ନୁହେଁ, ଏହା ଏକ ଅପରାଧ ବୋଲି ସେ ଦାବି କରିଛନ୍ତି। #JusticeForSahil #DelhiAccident #RoadSafety #ReelCulture #OdiaNews pic.twitter.com/GRupblCFgj

— Sakala News (@SakalaNews) February 17, 2026

ଗଣମାଧ୍ୟମକୁ ସୂଚନା ଦେଇ ଇନ୍ନା ମାକନ କହିଛନ୍ତି ଯେ, ଫେବୃଆରୀ ୩ ତାରିଖ ସକାଳେ ସାହିଲ ନିଜ ଅଫିସକୁ ଯାଉଥିଲେ। ସେହି ସମୟରେ ଲାଲ ବାହାଦୂର ଶାସ୍ତ୍ରୀ କଲେଜ ନିକଟରେ ଏକ ସ୍କର୍ପିଓ ଗାଡ଼ି ଦ୍ରୁତ ଗତିରେ ଆସି ତାଙ୍କ ମୋଟରସାଇକେଲକୁ ଧକ୍କା ଦେଇଥିଲା। ଗାଡ଼ି ଚଳାଉଥିବା ନାବାଳକ ଜଣକ ତାଙ୍କ ଭଉଣୀଙ୍କ ସହ ମିଶି ରାସ୍ତାରେ ରିଲ୍ ଏବଂ ଷ୍ଟଣ୍ଟ କରୁଥିଲେ ବୋଲି ସାହିଲଙ୍କ ମା' ଦାବି କରିଛନ୍ତି। ଦୁର୍ଘଟଣା ଏତେ ଭୟଙ୍କର ଥିଲା ଯେ ସ୍କର୍ପିଓଟି ସାହିଲଙ୍କୁ ଧକ୍କା ଦେବା ପରେ ଅନ୍ୟ ଏକ ପାର୍କିଂ ହୋଇଥିବା ଗାଡ଼ିକୁ ମଧ୍ୟ ପିଟିଥିଲା। ଏହି ଘଟଣାରେ ଜଣେ ଟ୍ୟାକ୍ସି ଚାଳକ ମଧ୍ୟ ଗୁରୁତର ଆହତ ହୋଇଥିଲେ।

ଅଭିଯୋଗ ଅନୁଯାୟୀ, ଗାଡ଼ି ଚଳାଉଥିବା ନାବାଳକର କୌଣସି ଡ୍ରାଇଭିଂ ଲାଇସେନ୍ସ ନଥିଲା ଏବଂ ପୂର୍ବରୁ ମଧ୍ୟ ଅନେକ ଥର ତାଙ୍କ ନାମରେ ଦ୍ରୁତ ଗତିରେ ଗାଡ଼ି ଚଳାଇବା ପାଇଁ ଚାଲାଣ କଟାଯାଇଥିଲା। ପୋଲିସ ଏହି ଘଟଣାରେ ଭାରତୀୟ ନ୍ୟାୟ ସଂହିତା ଅନୁଯାୟୀ ମାମଲା ରୁଜୁ କରି ନାବାଳକକୁ ହେପାଜତକୁ ନେଇଥିଲା। ତେବେ ଫେବୃଆରୀ ୧୦ ତାରିଖରେ ଦଶମ ଶ୍ରେଣୀ ବୋର୍ଡ ପରୀକ୍ଷା ଥିବା ଦର୍ଶାଇ ଜୁଭେନାଇଲ ଜଷ୍ଟିସ ବୋର୍ଡ ନାବାଳକକୁ ଅନ୍ତରୀଣ ଜାମିନ ପ୍ରଦାନ କରିଛନ୍ତି। ଗାଡ଼ିର ମାଲିକ ତଥା ନାବାଳକର ପିତାଙ୍କ ବିରୋଧରେ କାହିଁକି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ ବୋଲି ସାହିଲଙ୍କ ମା' ପ୍ରଶ୍ନ କରିଛନ୍ତି।

ଅଧୁରା ରହିଗଲା ସାହିଲଙ୍କ ସ୍ୱପ୍ନ

ମୃତ ସାହିଲ ଜଣେ ମେଧାବୀ ଛାତ୍ର ଥିଲେ। ସେ ନିଜର ବିବିଏ ପାଠପଢ଼ା ଶେଷ କରି ମାଞ୍ଚେଷ୍ଟର ୟୁନିଭର୍ସିଟିରେ ଉଚ୍ଚଶିକ୍ଷା ପାଇଁ ଯିବାକୁ ପ୍ରସ୍ତୁତ ହେଉଥିଲେ। ଜଣେ ସିଙ୍ଗଲ ମଦର ଭାବେ ଇନ୍ନା ଅତି କଷ୍ଟରେ ସାହିଲଙ୍କୁ ବଢ଼ାଇଥିଲେ। ନିଜ ପରିବାରର ଆର୍ଥିକ ସହାୟତା ପାଇଁ ସାହିଲ ପାର୍ଟ ଟାଇମ କାମ ମଧ୍ୟ କରୁଥିଲେ। ପୁଅକୁ ହରାଇବା ପରେ ଇନ୍ନା ଏବେ 'ଜଷ୍ଟିସ ଫର ସାହିଲ' ନାମରେ ଏକ ଅନଲାଇନ ପିଟିସନ ଆରମ୍ଭ କରିଛନ୍ତି, ଯେଉଁଥିରେ ହଜାର ହଜାର ଲୋକ ସ୍ୱାକ୍ଷର କରି ତାଙ୍କୁ ସମର୍ଥନ ଜଣାଇଛନ୍ତି। ଧନୀ ପରିବାରର ପିଲାମାନେ ରାସ୍ତାକୁ ନିଜର ଖେଳପଡ଼ିଆ ଭାବିବା ବନ୍ଦ କରନ୍ତୁ ବୋଲି ସେ କ୍ଷୋଭର ସହ କହିଛନ୍ତି।

ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏକ ବଡ ନିଷ୍ପତ୍ତି ନେଇଛନ୍ତି। ପ୍ରତିବର୍ଷ ଭଳି ଏଥର ମଧ୍ୟ ପଦ୍ମ ପୁରସ୍କାର ପାଇଁ ଦିଲ୍ଲୀରୁ କେନ୍ଦ୍ର ସରକାରଙ୍କୁ ନାମ ପଠାଯିବ। କିନ୍ତୁ ଦିଲ୍ଲୀ ସରକାର କେବଳ ଡାକ୍ତର ଏବଂ ସ୍ୱାସ୍ଥ୍ୟ କର୍ମୀଙ୍କ ନାମ ପଠାଇବେ। ଏଥିପାଇଁ ଦିଲ୍ଲୀ ସରକାର ଏକ ଇମେଲ ଆଇଡି  (padmaawards.delhi@gmail.com) ମଧ୍ୟ ଜାରି କରିଛନ୍ତି। ଯେଉଁଥିରେ  ଡାକ୍ତର ଓ ସ୍ବାସ୍ଥ୍ଯକର୍ମୀ ତାଙ୍କ ନାମ ପଠାଇ ପାରିବେ।  ଆଜି ଏ ନେଇ କେଜ୍ରିୱାଲ ଏକ ଡିଜିଟାଲ ସାମ୍ବାଦିକ ସମ୍ମିଳନୀ ମାଧ୍ୟମରେ ସୂଚନା ଦେଇଛନ୍ତି।

ଗତ ଦେଢ ବର୍ଷ ଧରି ମାହାମାରୀରୁ ଜୀବନ ରକ୍ଷା କରିବା ପାଇଁ ସ୍ୱାସ୍ଥ୍ୟ କର୍ମୀମାନେ ନିରନ୍ତର ପରିଶ୍ରମ କରିଥିବାରୁ ଆମେ ସମସ୍ତେ କୃତଜ୍ଞ। କେବଳ ଦେଶ ନୁହେଁ ସମଗ୍ର ବିଶ୍ୱ ସେମାନଙ୍କ ନିକଟରେ କୃତଜ୍ଞ ଜଣାଉଛି ବୋଲି କେଜ୍ରିୱାଲ କହିଥିଲେ।

କେଜ୍ରିୱାଲ ଏହା ମଧ୍ୟ କହିଛନ୍ତି ଯେ, ସାରା ଦେଶରେ କେବଳ ଦଲ୍ଲୀ ସରକାର କରୋନାରୁ ସହିଦ ହୋଇଥିବା ଫ୍ରଣ୍ଟ ଲାଇନ କର୍ମଚାରୀଙ୍କୁ ଏକ କୋଟି ଟଙ୍କାର ସମ୍ମାନ ପ୍ରଦାନ କରିଛି। ବର୍ତ୍ତମାନ ସମସ୍ତ ଡାକ୍ତର ଓ ସ୍ୱାସ୍ଥ୍ୟ କର୍ମୀମାନଙ୍କୁ ଉପଯୁକ୍ତ ସମ୍ମାନ ଦେବାର ସମୟ ଆସିଛି। ଏଥିପାଇଁ ଦିଲ୍ଲୀ ସରକାର ଏଥର ନିଷ୍ପତ୍ତି ନେଇଛନ୍ତି ଯେ, ପଦ୍ମ ପୁରସ୍କାର ଅଧୀନରେ ପାଇବାକୁ ଥିବା ତିନିଟି ପୁରସ୍କାର ପାଇଁ ରାଜ୍ୟ ସରକାର କେନ୍ଦ୍ର ସରକାରଙ୍କୁ ପଠାଇଥିବା ନାମରେ କେବଳ ଡାକ୍ତର ଏବଂ ସ୍ୱାସ୍ଥ୍ୟ କର୍ମଚାରୀଙ୍କ ନାମ ରହିବ। ଏହି ନାମ ସାର୍ବଜନୀନ କରାଯିବ।

ଏଥିପାଇଁ କେଜ୍ରିୱାଲ ଏକ ଇମେଲ ଆଇଡି ମଧ୍ୟ ଦେଇଛନ୍ତି। ଯେଉଁଥିରେ ପଦ୍ମ ପୁରସ୍କାର ପାଇବାକୁ ଚାହୁଁଥିବା  ଡାକ୍ତର କିମ୍ବା ସ୍ୱାସ୍ଥ୍ୟକର୍ମୀମାନେ ପଠାଇ ପାରିବେ। ଇମେଲ ପ୍ରେରକଙ୍କୁ ଡାକ୍ତର କିମ୍ବା ସ୍ୱାସ୍ଥ୍ୟ କର୍ମଚାରୀଙ୍କ ନାମ ତଥା ପଦ୍ମ ପୁରସ୍କାର ପାଇବାକୁ ଚାହୁଁଥିବା କାରଣ ବିଷୟରେ ବିସ୍ତୃତ ଭାବରେ ଉଲ୍ଲେଖ କରିବାକୁ ପଡିବ।

ଆବେଦନ କରିବା ପ୍ରକ୍ରିୟା :-
-ଇମେଲ୍ ଆଇଡି- padmaawards.delhi@gmail.com 

-ଅଗଷ୍ଟ ୧୫ ସୁଦ୍ଧା ଚାହୁଁଥିବା ଡାକ୍ତର କିମ୍ବା ସ୍ୱାସ୍ଥ୍ୟ କର୍ମଚାରୀଙ୍କ ନାମ ପଠାନ୍ତୁ ଏବଂ ତାଙ୍କ କାର୍ଯ୍ୟକୁ ବିସ୍ତୃତ ଭାବରେ ବର୍ଣ୍ଣନା କରନ୍ତୁ।

– ଦିଲ୍ଲୀ ଉପମୁଖ୍ଯମନ୍ତ୍ରୀ ମନୀଷ ସିସୋଦିଆ ଏହି କମିଟିର ଅଧ୍ୟକ୍ଷ ହେବେ। ଏହି କମିଟି ଅଗଷ୍ଟ ୧୫ ସୁଦ୍ଧା ପଠାଯାଇଥିବା ଜନସାଧାରଣଙ୍କ ପରାମର୍ଶକୁ ଯାଞ୍ଚ କରିବ ଏବଂ ଏହା ପରେ ମନୋନୀତ ନାମଗୁଡିକ ସେପ୍ଟେମ୍ବର ୧୫ ସୁଦ୍ଧା କେନ୍ଦ୍ର ସରକାରଙ୍କ ନିକଟକୁ ପଠାଯିବ।

ନୂଆଦିଲ୍ଲୀ:  ଭାଇରାଲ ଭିଡିଓ ମାଧ୍ୟମରେ ରାତାରାତି ପ୍ରସିଦ୍ଧ ’ବାବା କା ଢାବା’ ଚଳାଉଥିବା କାନ୍ତ ପ୍ରସାଦ ଶୁକ୍ରବାର ଆତ୍ମହତ୍ୟା ଉଦ୍ୟମ କରିଥିବା ଜଣାପଡ଼ିଛି। ତାଙ୍କୁ ଉଦ୍ଧାର କରାଯାଇ ସଫଦରଜଙ୍ଗ ଡାକ୍ତରଖାନାରେ ଭର୍ତ୍ତି କରାଯାଇଛି। ସେ ମାତ୍ରାଧିକ ଶୋଇବା ବଟିକା ଖାଇବାରୁ ତାଙ୍କ ସ୍ବାସ୍ଥ୍ୟାବସ୍ଥା ବିଗିଡି ଯାଇଥିଲା। କାନ୍ତ ପ୍ରସାଦଙ୍କ ଅବସ୍ଥା ଏବେ ସ୍ଥିର ରହିଛି। ସେ ସଫଦରଜଙ୍ଗ ହସ୍ପିଟାଲର ଆଇସିୟୁ ୟୁନିଟ୍-୨ରେ ଭେଣ୍ଟିଲେଟରରେ ଅଛନ୍ତି। କୁହାଯାଉଛି ଯେ, ସେ ଗତ କିଛି ଦିନ ହେବ ମାନସିକ ଚାପରେ ଥିଲେ।

ସୂଚନାଯୋଗ୍ୟ, ଗତ ବର୍ଷ ଗୌରବ ନାମକ ଜଣେ ୟୁଟ୍ୟୁବର୍ କାନ୍ତା ପ୍ରସାଦଙ୍କ ’ବାବା କା ଢାବା’ର ଏକ ଭିଡିଓ ପ୍ରସ୍ତୁତ କରି ଲୋକଙ୍କୁ ସାହାଯ୍ୟ କରିବାକୁ କହିଥିଲେ। ଯାହା ପରେ କାନ୍ତ ପ୍ରସାଦଙ୍କ ଢାବା ରାତାରାତି ପ୍ରସିଦ୍ଧ ହୋଇଯାଇଥିଲା। ଦେଶର ବିଭିନ୍ନ ସ୍ଥାନରୁ ଲୋକମାନେ ତାଙ୍କୁ ଆର୍ଥିକ ସହାୟତା ଦେଇଥିଲେ। ପରେ ସେ ଏକ ରେସ୍ତୋରାଁ ଖୋଲିଥିଲେ। ହେଲେ ଉକ୍ତ ରେସ୍ତୋରାଁ ପ୍ରଥମେ ପ୍ରଥମେ ଭଲ ଚାଲିଥିଲେ ମଧ୍ୟ ପରବର୍ତ୍ତି ସମୟରେ ଲାଭ ପରିବର୍ତ୍ତେ କ୍ଷତି ସହିବାକୁ ପଡ଼ିଥିଲା। ସେ କିଛି ଦିନ ତଳେ ପୁଣି ତାଙ୍କର ସେଇ ରାସ୍ତକାଡ଼ର ଢାବାକୁ ଫେରିଥିଲେ।  ରେସ୍ତୋରାଁ ଖୋଲିବା ତାଙ୍କର ଭୁଲ ନିଷ୍ପତ୍ତି ଥିଲା ବୋଲି ସେ କହିଥିଲେ।

https://www.thesakala.in/baba-ka-dhaba-couple-shuts-down-new-restaurant-after-heavy-losses-returns-to-old-eatery/

ନୂଆଦିଲ୍ଲୀ: ଦିଲ୍ଲୀ ସରକାର ଘରେ ଘରେ ରାସନ ପହଞ୍ଚାାଇବା ପାଇଁ ଯୋଜନା କରିଛନ୍ତି। ହେଲେ ଏହି ଯୋଜନାକୁ ଏବେ କେନ୍ଦ୍ରସରକାର ବିରୋଦ୍ଧ କରିଛନ୍ତି। ଏହି ଯୋଜନାକୁ ଲାଗୁ କରିବା ପାଇଁ ଅନୁମତି ଦେଉ ନହାନ୍ତି। ଏ ନେଇ ଆଜି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ସାମ୍ବାଦିକ ସମ୍ମିଳନୀ କରିଛନ୍ତି। ଏହି ସାମ୍ବାଦିକ ସମ୍ମିଳନୀରେ ସେ ସିଧାସଳଖ ପ୍ରଧାନମନ୍ତ୍ରୀ ମୋଦୀଙ୍କ ସହ କଥା ହେବାକୁ ଚାହିଁଛନ୍ତି ବୋଲି କହିଛନ୍ତି।

ଏହି ଯୋଜନା କାର୍ଯ୍ଯକାରୀ କରିବାରେ ସମ୍ମୁଖୀନ ହେଉଥିବା ପ୍ରତିବନ୍ଧକ ଉପରେ କେଜ୍ରିୱାଲ ନିଜର ମତ ଦେଇଛନ୍ତି। ଏହି ଯୋଜନାକୁ ଅନୁମତି ନ ମିଳିବା ମୋତେ ବ୍ୟଥିତ କରିଛି। ଆସନ୍ତା ସପ୍ତାହରୁ ଦିଲ୍ଲୀରେ ଡୋର-ଟୁ-ଡୋର ରାସନ ଯୋଜନା ଆରମ୍ଭ ହେବ। ଅର୍ଥାତ୍ ବର୍ତ୍ତମାନ ଲୋକମାନଙ୍କୁ ଧାଡ଼ିରେ ଠିଆ ହେବାକୁ ପଡ଼ିବ ନାହିଁ । ରାସନ ପାଇଁ ଆଉ ଠେଲାପେଲା ଆଉ ହେବ ନାହିଁ। ସରକାର ରାସନକୁ ପ୍ୟାକ୍ କରି ହିତାଧିକରୀଙ୍କ ଘରେ ପହଞ୍ଚାଇବେ।

ଏଥି ପାଇଁ ସମସ୍ତ ପ୍ରସ୍ତୁତି ସରିଯାଇଥିଲା, ଠିକ୍ ଆସନ୍ତା ସପ୍ତାହରେ ଏହି ବୈପ୍ଳବିକ ପଦକ୍ଷେପ ଆରମ୍ଭ ହେବାକୁ ଯାଉଥିଲା ଏବଂ ହଠାତ୍ ଏହାକୁ ଦୁଇ ଦିନ ପୂର୍ବରୁ ବନ୍ଦ କରିଦିଆଯାଇଛି। କହିଁକି ବନ୍ଦ କର ଦିଆଗଲା ବୋଲି କେଜ୍ରିୱାଲ ପ୍ରଶ୍ନ କରିଛନ୍ତି। ସେ କହିଛନ୍ତି, ଯେ ଏହି ଯୋଜନା ପାଇଁ ଆମେ କେନ୍ଦ୍ର ସରକାରଙ୍କ ଠାରୁ ଥର ପାଞ୍ଚ ଥର ଅନୁମତି ନେଇଛୁ, କିନ୍ତୁ ଏହା ସତ୍ତ୍ୱେ ଆରମ୍ଭ ହେବାର ଏକ ସପ୍ତାହ ପୂର୍ବରୁ ଏହାକୁ ପ୍ରତ୍ୟାଖ୍ୟାନ କରାଯାଇଥିଲା।

ଆଇନଗତ ଭାବରେ ଆମକୁ କେନ୍ଦ୍ରର ଅନୁମୋଦନ ଆବଶ୍ୟକ ନାହିଁ । ହେଲେ ଆମେ କେନ୍ଦ୍ରଠୁ ଅନୁମିତି ନେଇଛୁ। ଏହି ଯୋଜନା ଉପରେ ନିଷେଧାଦେଶର କାରଣ କେଜ୍ରିୱାଲ ବାରମ୍ବାର କେନ୍ଦ୍ର ସରକାରଙ୍କୁ ପଚାରିଥିଲେ। ସେ କହିଛନ୍ତି ଯେ, ଯେତେବେଳେ ହାଇକୋର୍ଟ ଏହି ଯୋଜନାରେ ସ୍ଥଗିତ ରଖିନାହାଁନ୍ତି, ସେତେବେଳେ ଆପଣ କିପରି କରିପାରିବେ। ଯେତେବେଳେ ଦେଶରେ ପିଜା, ବରଗର, ସ୍ମାର୍ଟଫୋନ୍ ଏବଂ ପୋଷାକ ଘରେ ପହଞ୍ଚି ପାରୁଛି ତେବେ ଗରୀବଙ୍କ ଘରକୁ ରାସନ ପହଞ୍ଚି ପାରିବ ନାହିଁ କାହିଁକି ।

କେନ୍ଦ୍ର ସରକାରଙ୍କ କିଛି ଅଧିକାରୀ କହିଛନ୍ତି ଯେ, ଏହି ରାସନ କେନ୍ଦ୍ରର ଅଟେ ଏବଂ ଏହି ଯୋଜନା କାର୍ଯ୍ଯକାରୀ କରି କେଜ୍ରିୱାଲ ସରକାର ଏହାର ପ୍ରଶଂସା ଲୁଟିବାକୁ ଚାହୁଁଛନ୍ତି। ଏହାର ଜବାବରେ କେଜ୍ରିୱାଲ କହିଛନ୍ତି ଯେ, ମୁଁ ଏହି ଯୋଜନାର ପ୍ରଶଂସା ନେବାକୁ ଚାହୁଁ ନାହିଁ। ମୋତେ ଏହାକୁ କାର୍ଯ୍ଯକାରୀ କରିବାକୁ ଦିଅ। ଏହା ଯୋଜନା ଜାତୀୟ ସ୍ୱାର୍ଥରେ ବୋଲି ସେ କହିଛନ୍ତି। ଅଦ୍ୟାବଧି ସରକାର ଦେଶର ଗରିବ ଲୋକଙ୍କୁ ୭୫ବର୍ଷ ଧରି ଲମ୍ବା ଧାଡିରେ ଠିଆ କରି ରଖିଥିଲେ। ସେମାନଙ୍କୁ ଆଉ ୭୫ ବର୍ଷ ପର୍ଯ୍ଯନ୍ତ  ଧାଡିରେ ଠିଆ ହୁଅନ୍ତୁ ନାହିଁ ନଚେତ୍ ସେମାନେ ଆମକୁ କେବେବି କ୍ଷମା କରିବେ ନାହିଁ ବୋଲି କେଜ୍ରିୱାଲ କହିଛନ୍ତି।

ମେ ୪ରେ ସାଗର ମୃତ୍ୟୁ ପରଠାରୁ ସୁଶୀଲ କୁମାର ଫେରାର ଅଛନ୍ତି। ସୁଶୀଲ କୁମାର ମଙ୍ଗଳବାର ଦିନ ରୋହିଣୀ କୋର୍ଟରେ ଜାମିନ ଆବେଦନ କରିଥିଲେ ହେଲେ ଜାମିନ ଆବେଦନକୁ କୋର୍ଟ ପ୍ରତ୍ୟାଖ୍ୟାନ କରିଛନ୍ତି। ଦିଲ୍ଲୀ ପୋଲିସ କହିଛି ଯେ ଯେଉଁମାନେ ସୁଶୀଲ କୁମାରଙ୍କ ବିଷୟରେ ସୂଚନା ଦିଅନ୍ତି ସେମାନଙ୍କୁ ୧ ଲକ୍ଷ ଟଙ୍କା ପୁରସ୍କାର ପ୍ରଦାନ କରାଯିବ। ପୋଲିସ ଏହା ମଧ୍ୟ କହିଛି ଯେ ଯିଏ ଏହି ମାମଲାରେ ଅନ୍ୟ ଅଭିଯୁକ୍ତ ଅଜୟଙ୍କ ବିଷୟରେ ସୂଚନା ଦେବ ଉକ୍ତ ବ୍ୟକ୍ତିଙ୍କୁ 50 ହଜାର ଟଙ୍କା ପୁରସ୍କାର ପ୍ରଦାନ କରାଯିବ । ଶନିବାର ଦିନ ଦିଲ୍ଲୀର ଏକ କୋର୍ଟ ଷ୍ଟାର ରେସଲର ସୁଶୀଲ କୁମାର ବିରୋଧରେ ଜାମିନ ବିହୀନ ୱାରେଣ୍ଟ ଜାରି କରିଛନ୍ତି।

ପୋଲିସ ଅଧିକାରୀଙ୍କ କହିବାନୁସାରେ, ଅଜୟ ସୁଶୀଲଙ୍କର ଜଣେ ଭଲ ବନ୍ଧୁ ତେଣୁ ଅଧିକ ଆଶଙ୍କା ରହିଛି ଯେ ଅଜୟ ସୁଶୀଲଙ୍କୁ ଲୁଚାଇବାରେ ସାହାଯ୍ୟ କରୁଛନ୍ତି। ତେଣୁ ଉଭୟଙ୍କୁ ଏକକାଳୀନ ପୁରସ୍କାର ଘୋଷଣା କରାଯାଇଛି | ଦିଲ୍ଲୀ-ଏନସିଆରର ବିଭିନ୍ନ ସ୍ଥାନରେ ପୋଲିସ ଚଢାଉ କରୁଛି। ତେବେ ଏପର୍ଯ୍ୟନ୍ତ କୌଣସି ସୂଚନା ମିଳିପାରି ନାହିଁ। ଅନ୍ୟପକ୍ଷରେ ସମସ୍ତ ପଳାୟନ ମାର୍ଗ ବନ୍ଦ ହେବା ପରେ ସୁଶୀଲ ଆତ୍ମସମର୍ପଣ କରିବା ସମ୍ଭବ ବୋଲି ଅଧିକାରୀମାନେ କହିଛନ୍ତି ।