ରାୟଗଡ଼ା: ରାୟଗଡ଼ା ଜିଲ୍ଲାରେ ଦୀର୍ଘ ଦିନ ଧରି ଆତଙ୍କ ଖେଳାଇଥିବା ଏକ ଆନ୍ତଃ-ଜିଲ୍ଲା ଲୁଟେରା ଗ୍ୟାଙ୍ଗକୁ ଧରିବାରେ ପୋଲିସକୁ ବଡ଼ ସଫଳତା ମିଳିଛି। ରାୟଗଡ଼ା ପୋଲିସ ଏହି ଗ୍ୟାଙ୍ଗର ୧୨ ଜଣ ସଦସ୍ୟଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ବିପୁଳ ପରିମାଣର ସୁନା, ରୁପା, ଗାଡ଼ି, ମୋବାଇଲ୍ ଫୋନ୍ ଏବଂ ଅପରାଧରେ ବ୍ୟବହୃତ ବିଭିନ୍ନ ସାମଗ୍ରୀ ଜବତ କରିଛି। ମଙ୍ଗଳବାର ଦିନ ଜିଲ୍ଲା ପୋଲିସ ମୁଖ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଜିଲ୍ଲା ଆରକ୍ଷୀ ଅଧୀକ୍ଷକ (SP) ରାଜ ପ୍ରସାଦ ଏହି ସୂଚନା ଦେଇଛନ୍ତି।

ଏହି ଲୁଟେରା ଗ୍ୟାଙ୍ଗଟି ଅତି ଚତୁରତାର ସହ ବନ୍ଦ ଥିବା କିମ୍ବା ଖାଲି ଥିବା ଘରଗୁଡ଼ିକୁ ଟାର୍ଗେଟ୍ କରୁଥିଲା। ସେମାନେ ପ୍ରଥମେ ଘର ମାଲିକଙ୍କ ଗତିବିଧି, ସିସିଟିଭି କ୍ୟାମେରା ଏବଂ ଗାଡ଼ିଗୁଡ଼ିକ ଉପରେ କଡ଼ା ନଜର ରଖୁଥିଲେ। ସୁଯୋଗ ଦେଖି ତାଲା ଭାଙ୍ଗି ଚୋରି କରୁଥିଲେ। ଚୋରି ସୁନାଗହଣାକୁ ସିଧାସଳଖ ବିକ୍ରି କରିବା କଷ୍ଟକର ହେଉଥିବାରୁ, ଗ୍ୟାଙ୍ଗରେ ଥିବା ଜଣେ ବଣିଆଙ୍କ ସହାୟତାରେ ସେମାନେ ସୁନାକୁ ତରଳାଇ ଏହାର ଆକାର ବଦଳାଇ ଦେଉଥିଲେ। ପରେ ଏହି ସୁନାକୁ ବିଭିନ୍ନ ଫାଇନାନ୍ସ ସଂସ୍ଥା ଏବଂ ବ୍ୟାଙ୍କରେ ବନ୍ଧା ପକାଇ ଋଣ ଆଣୁଥିଲେ କିମ୍ବା କମ୍ ଦାମ୍‌ରେ ବିକ୍ରି କରିଦେଉଥିଲେ।

ଗତ ଜୁଲାଇ ୨୫ ତାରିଖରେ ରାମନଗୁଡ଼ା ଥାନା ଅଞ୍ଚଳରେ ଏବଂ ଅଗଷ୍ଟ ୧ ତାରିଖରେ ଦୋରାଗୁଡ଼ା ଥାନା ଅଞ୍ଚଳରେ ହୋଇଥିବା ଦୁଇଟି ବଡ଼ ଧରଣର ଚୋରି ଘଟଣା ପରେ ପୋଲିସ ତଦନ୍ତକୁ ଜୋରଦାର କରିଥିଲା। ଏସପିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଗୁଇନ୍ଦା ବିଭାଗ, ସାଇବର ୟୁନିଟ୍ ଏବଂ ସ୍ପେଶାଲ୍ ରେଡ୍ ଟିମ୍‌କୁ ନେଇ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା। ବୈଷୟିକ ଜ୍ଞାନକୌଶଳ ଏବଂ ଗୁଇନ୍ଦା ସୂଚନା ଆଧାରରେ ପୋଲିସ ଏହି ଗ୍ୟାଙ୍ଗ୍ ନିକଟରେ ପହଞ୍ଚିବାରେ ସଫଳ ହୋଇଥିଲା।

ପୋଲିସ ଏହି ଗ୍ୟାଙ୍ଗ୍ ନିକଟରୁ ପ୍ରାୟ ୮୦ ଗ୍ରାମ ସୁନା, ୫୮୧ ଗ୍ରାମ ରୁପା, ୩୪.୭୫ ଗ୍ରାମ ତରଳା ଯାଇଥିବା ସୁନା ଏବଂ ବିଭିନ୍ନ ଫାଇନାନ୍ସ ସଂସ୍ଥାରେ ବନ୍ଧା ପଡ଼ିଥିବା ୧୨୫.୭୬ ଗ୍ରାମ ସୁନା ଗହଣା ଜବତ କରିଛି। ଏହାଛଡ଼ା ୧୨ଟି ମୋବାଇଲ୍ ଫୋନ୍, ୩ଟି କାର୍ ଏବଂ ଗୋଟିଏ ରୟାଲ୍ ଏନଫିଲ୍ଡ ବୁଲେଟ୍ ମୋଟରସାଇକେଲ୍ ମଧ୍ୟ ଜବତ କରାଯାଇଛି। ତାଲା ଭାଙ୍ଗିବା ପାଇଁ ବ୍ୟବହୃତ ସାମଗ୍ରୀ, ସୁନା ତରଳାଇବା ପାଇଁ ଗ୍ୟାସ୍ ସିଲିଣ୍ଡର ଏବଂ ଓଜନ ମେସିନ୍ ମଧ୍ୟ ପୋଲିସ ହାତରେ ଲାଗିଛି।

ବଲାଙ୍ଗୀର: ବଲାଙ୍ଗୀରର ଜଣେ ବ୍ୟବସାୟୀଙ୍କୁ ଅପହରଣ କରିବା ଏବଂ ତାଙ୍କଠାରୁ ୫୦ ଲକ୍ଷ ଟଙ୍କା ବଟି ଆଦାୟ ଉଦ୍ୟମ ଘଟଣାରେ ପୋଲିସ ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହି ମାମଲାରେ ଜଣେ ମହିଳା ସବ୍-ଇନ୍ସପେକ୍ଟର (SI) ଏବଂ ଜଣେ ସାମ୍ବାଦିକଙ୍କ ସମେତ ମୋଟ ୪ ଜଣଙ୍କୁ ଗିରଫ କରାଯାଇଛି।

ବଲାଙ୍ଗୀର ଏସପି ଅଭିଳାଷ ଜି ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଯେ, ଗତ ଅଗଷ୍ଟ ୧୪ ତାରିଖରେ ବଲାଙ୍ଗୀରରୁ ବ୍ୟବସାୟୀ ନରେନ୍ଦ୍ର ସାହୁ (୫୨) ଓରଫ ଗୁଣ୍ଡା ସାହୁଙ୍କୁ ଅପହରଣ କରାଯାଇଥିଲା। ଅପହରଣକାରୀମାନେ ତାଙ୍କୁ ଏକ ଏସୟୁଭି (SUV) କାର୍ ଯୋଗେ ଦଶପଲ୍ଲା ରାସ୍ତା ଦେଇ ଭୁବନେଶ୍ୱର ଆଣି ଏକ ହୋଟେଲରେ ବନ୍ଦୀ କରି ରଖିଥିଲେ। ପୋଲିସକୁ ବିଭ୍ରାନ୍ତ କରିବା ପାଇଁ ନରେନ୍ଦ୍ରଙ୍କ ମାରୁତି ଜିମ୍ନି କାରକୁ ରେଢ଼ାଖୋଲ ଏବଂ ଅନୁଗୋଳ ଆଡ଼କୁ ପଠାଇ ଦିଆଯାଇଥିଲା। ତେବେ ଅଗଷ୍ଟ ୧୫ ତାରିଖରେ ପୋଲିସ ଟିମ୍ ନରେନ୍ଦ୍ରଙ୍କୁ ଭୁବନେଶ୍ୱରରୁ ସୁରକ୍ଷିତ ଭାବେ ଉଦ୍ଧାର କରିଥିଲା। ଏହି ଘଟଣାରେ ମୁଖ୍ୟ ଅଭିଯୁକ୍ତ ଭୁବନେଶ୍ୱରର କ୍ଷୀତିଶ ଚନ୍ଦ୍ର ସାହୁ (୫୦), ବଲାଙ୍ଗୀରର ସଞ୍ଜିତ ବେହେରା, ସାମ୍ବାଦିକ ସଞ୍ଜୟ ଜେନା ଏବଂ ମହିଳା ଏସଆଇ ସ୍ନେହମଞ୍ଜରୀ ସାହୁଙ୍କୁ ଗିରଫ କରାଯାଇଛି। ସ୍ନେହମଞ୍ଜରୀ ହେଉଛନ୍ତି ମୁଖ୍ୟ ଅଭିଯୁକ୍ତ କ୍ଷୀତିଶଙ୍କ ଭଉଣୀ।

ପୋଲିସର କହିବା ଅନୁଯାୟୀ, ଅପହୃତ ବ୍ୟବସାୟୀଙ୍କୁ ଏକ ଖାଲି ବନ୍ଧୁକ ଧରାଇ ନକଲି ଭିଡିଓ ସୁଟିଂ କରାଯାଇଥିଲା। ମୁଖ୍ୟ ଅଭିଯୁକ୍ତ କ୍ଷୀତିଶଙ୍କ ମୋବାଇଲରୁ ଏଭଳି ୧୨ଟି ଭିଡିଓ ଜବତ କରାଯାଇଛି। ଭିଡିଓଗୁଡ଼ିକରେ ନରେନ୍ଦ୍ର ଅଭିଯୁକ୍ତଙ୍କୁ ଆକ୍ରମଣ କରୁଥିବା ଭଳି ଦୃଶ୍ୟ ସୃଷ୍ଟି କରାଯାଇଥିଲା ଏବଂ ତାଙ୍କୁ କ୍ଷମା ମାଗିବା ସହ ଟଙ୍କା ଫେରାଇବାକୁ ବାଧ୍ୟ କରାଯାଇଥିଲା। ଏହି ଭିଡିଓଗୁଡ଼ିକୁ ବ୍ୟବହାର କରି ବ୍ୟବସାୟୀଙ୍କଠାରୁ ୫୦ ଲକ୍ଷ ଟଙ୍କା ବଟି ଆଦାୟ କରିବାକୁ ଯୋଜନା କରାଯାଇଥିଲା ବୋଲି ଏସପି ସୂଚନା ଦେଇଛନ୍ତି। ପରିବାର ଲୋକେ ଯେପରି ପୋଲିସରେ ଅଭିଯୋଗ ନକରନ୍ତି, ସେଥିପାଇଁ ତାଙ୍କୁ ଧମକ ଦେଇ ଫୋନ୍ ମଧ୍ୟ କରାଯାଇଥିଲା।

ଏହି ଷଡ଼ଯନ୍ତ୍ରରେ ଖଣ୍ଡଗିରି ଥାନାରେ ମଧ୍ୟ ଏକ ମିଥ୍ୟା ମାମଲା ରୁଜୁ କରିବାକୁ ଉଦ୍ୟମ ହୋଇଥିଲା। ସାମ୍ବାଦିକ ସଞ୍ଜୟ ଜେନା ନିଜକୁ ଜଣେ ପୋଲିସ ଅଧିକାରୀ ଭାବେ ପରିଚୟ ଦେଇ ନରେନ୍ଦ୍ରଙ୍କ ନାମରେ ଏକ ଆକ୍ରମଣ ମାମଲା ରୁଜୁ କରିବାକୁ ଚେଷ୍ଟା କରିଥିଲେ। ଅନ୍ୟପକ୍ଷରେ, ମହିଳା ଏସଆଇ ସ୍ନେହମଞ୍ଜରୀ ସାହୁ ନିଜ ପଦବୀର ଦୁରୁପଯୋଗ କରି ନରେନ୍ଦ୍ରଙ୍କ ନାମରେ ଭୁବନେଶ୍ୱରରେ ଅପରାଧିକ ମାମଲା ରୁଜୁ କରିବାର ଧମକ ଦେଇଥିଲେ। ସ୍ୱାଧୀନତା ଦିବସ ପାଇଁ ପୋଲିସ ବ୍ୟସ୍ତ ରହିବ ବୋଲି ଭାବି ଅଭିଯୁକ୍ତମାନେ ଅଗଷ୍ଟ ୧୪କୁ ଅପହରଣ ପାଇଁ ବାଛିଥିଲେ।

ଉତ୍ତରାଞ୍ଚଳ ଆଇଜି ହିମାଂଶୁ କୁମାର ଲାଲ ସୂଚନା ଦେଇଛନ୍ତି ଯେ, ଏହି ବିବାଦ ପଛରେ ଏକ ବିରଳ ହନୁମାନ ମୁଦ୍ରା କାରବାରର ଅଭିଯୋଗ ରହିଛି। ଅଭିଯୁକ୍ତ କ୍ଷୀତିଶ ଦାବି କରିଛନ୍ତି ଯେ, ସେ ୨୦୨୦ ମସିହାରେ ଏହି ମୁଦ୍ରା ପାଇଁ ନରେନ୍ଦ୍ରଙ୍କୁ ୨.୭ କୋଟି ଟଙ୍କା ଦେଇଥିଲେ। ତେବେ ପୋଲିସ ଏପର୍ଯ୍ୟନ୍ତ ଏହି ଦାବିର କୌଣସି ପ୍ରମାଣ ପାଇନାହିଁ ଏବଂ ଅଭିଯୁକ୍ତ ଓ ପୀଡ଼ିତଙ୍କ ବୟାନରେ ତାଳମେଳ ନଥିବାରୁ ଘଟଣାର ଅଧିକ ତଦନ୍ତ ଜାରି ରହିଛି।

ପୁରୀ: ଚିଲିକା ହ୍ରଦ ଭିତରେ ନାବାଳକ ହତ୍ୟା ଘଟଣାରେ ୧୮  ଗିରଫ । ପୁରୀ ଜିଲ୍ଲା କୃଷ୍ଣପ୍ରସାଦ ପୋଲିସ ଥାନା ଅନ୍ତର୍ଗତ ଚିଲିକାରେ ଏକ ନାବାଳକ ହତ୍ୟାକାଣ୍ଡ ମାମଲାରେ ପୋଲିସକୁ ବଡ଼ ସଫଳତା ମିଳିଛି। ଏହି ଘଟଣାରେ ପୋଲିସ ମୁଖ୍ୟ ଅଭିଯୁକ୍ତ ଗଣେଶ ଦାସଙ୍କ ସମେତ ମୋଟ ୧୮ ଜଣ ଅଭିଯୁକ୍ତଙ୍କୁ ଗିରଫ କରିଛି।

ପୁରୀ ଏସପି ପ୍ରତୀକ ସିଂହଙ୍କ ସୂଚନା ଅନୁଯାୟୀ, ଗିରଫ ହୋଇଥିବା ସମସ୍ତ ୧୮ ଜଣ ଅଭିଯୁକ୍ତ ଖୋର୍ଦ୍ଧା ଜିଲ୍ଲା ଚନ୍ଦ୍ରପୁଟ ଗ୍ରାମର ବାସିନ୍ଦା। ଅଗଷ୍ଟ ୧୧ ତାରିଖରେ ହୋଇଥିବା ଅଭିଯୋଗ ଆଧାରରେ କୃଷ୍ଣପ୍ରସାଦ ପୋଲିସ ତଦନ୍ତ ଆରମ୍ଭ କରିଥିଲା। ଏହି ଘଟଣାରେ ଓମ୍ ଶିକାରୀ ନାମକ ଜଣେ ନାବାଳକଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଦୁଇ ଜଣ ଆହତ ହୋଇଛନ୍ତି। ପୋଲିସ ଅଭିଯୁକ୍ତମାନଙ୍କଠାରୁ ଅପରାଧରେ ବ୍ୟବହୃତ ୩ଟି ଡଙ୍ଗା ଏବଂ ଏକ କାଠ ପଟା ଜବତ କରିଛି। ଏସପିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ତନାଘନା ତଦନ୍ତ କରାଯାଇ ମାତ୍ର ୪୮ ଘଣ୍ଟା ମଧ୍ୟରେ ଏହି ଗିରଫଦାରୀ ସମ୍ଭବ ହୋଇପାରିଛି।

ପୋଲିସର ସୂଚନା ମୁତାବକ, ଗତ ଅଗଷ୍ଟ ୧୦ ତାରିଖ ସନ୍ଧ୍ୟା ୬ଟାରୁ ୭ଟା ମଧ୍ୟରେ ଏହି ଅଭାବନୀୟ ଘଟଣା ଘଟିଥିଲା। ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ଅନ୍ତର୍ଗତ ଚନ୍ଦ୍ରପୁଟ ଗ୍ରାମର କିଛି ଚୋର ରାମଲେଙ୍କା ପଞ୍ଚାୟତର କୁମାରପୁର ଗାଁ ନିକଟସ୍ଥ ମାଛଧରା ଅଞ୍ଚଳରେ ପହଞ୍ଚିଥିଲେ। କୁମାରପୁର ଗାଁର ଅଭିଯୋଗକାରୀ ଚିନ୍ମୟ ବେହେରାଙ୍କ ଏକ 'ଖଣ୍ଡା' (ମାଛଧରା ଜାଲ)ରୁ ଚିଙ୍ଗୁଡ଼ି ଚୋରି କରୁଥିବା ସମୟରେ ଅଭିଯୁକ୍ତମାନେ ମାରଣାସ୍ତ୍ର ଧରି ଆକ୍ରମଣ କରିଥିଲେ। ଅଭିଯୁକ୍ତ ଗଣେଶ, କାହ୍ନା, ମିଥୁନ, ରୁବେଶ ଏବଂ କାଳୁ ଅଭିଯୋଗକାରୀ, ତାଙ୍କ ଭାଇ ଏବଂ ନାବାଳକ ଓମ୍ ଶିକାରୀଙ୍କ ଉପରେ ଆକ୍ରମଣ କରିଥିଲେ। ଚିନ୍ମୟ ଓ ତାଙ୍କ ଭାଇ ଖସି ପଳାଇବାରେ ସକ୍ଷମ ହୋଇଥିଲେ ମଧ୍ୟ ନାବାଳକ ଓମଙ୍କର ମୃତ୍ୟୁ ହୋଇଥିଲା। ଘଟଣାର ପ୍ରାୟ ୨୦ ଘଣ୍ଟା ପରେ ଘଟଣାସ୍ଥଳରୁ ତାଙ୍କର ମୃତଦେହ ଉଦ୍ଧାର କରାଯାଇଥିଲା।

ପ୍ରଥମେ ଏହି ମାମଲାକୁ ଅପହରଣ ଓ ହତ୍ୟା ଉଦ୍ୟମ ରୂପେ ପଞ୍ଜିକରଣ କରାଯାଇଥିଲା। କିନ୍ତୁ ତଦନ୍ତ ସମୟରେ ଏହାକୁ ଡକାୟତି ସହ ହତ୍ୟା ମାମଲାରେ ପରିବର୍ତ୍ତନ କରାଯାଇଥିଲା। ଏହି ଘଟଣାରେ ଏକ ଆନ୍ତଃ-ଜିଲ୍ଲା ଚିଙ୍ଗୁଡ଼ି ଲୁଟେରା ଗ୍ୟାଙ୍ଗର ସମ୍ପୃକ୍ତି ଥିବାରୁ, ପୁରୀ ସଦର ଏସଡିପିଓ (SDPO) ଏବଂ କୃଷ୍ଣପ୍ରସାଦ ଆଇଆଇସି (IIC)ଙ୍କ ନେତୃତ୍ୱରେ ଏକାଧିକ ଟିମ୍ ଗଠନ କରାଯାଇଥିଲା। ଏହି ଟିମ୍ ପୁରୀ, ଗଞ୍ଜାମ ଓ ଖୋର୍ଦ୍ଧା ଜିଲ୍ଲାରେ ଏକକାଳୀନ ଚଢ଼ାଉ କରି ଅଭିଯୁକ୍ତମାନଙ୍କୁ କାବୁ କରିଥିଲେ। ଏହି ଘଟଣାରେ ସମ୍ପୃକ୍ତ ଅନ୍ୟ ଦିଗଗୁଡ଼ିକର ଖୁଲାସା ଏବଂ ଅପରାଧୀଙ୍କ ପ୍ରକୃତ ଭୂମିକା ଜାଣିବା ପାଇଁ ପୋଲିସ ଗିରଫ ଅଭିଯୁକ୍ତମାନଙ୍କୁ ଅଧିକ ପଚରାଉଚରା କରୁଛି।

ପୁରୀ: ସମ୍ପତ୍ତି ପାଇଁ ଭାଇ-ଭଉଣୀଙ୍କ ମଧ୍ୟରେ ରକ୍ତାକ୍ତ ସଂଘର୍ଷ । ପୁରୀ ଜିଲ୍ଲା କଣାସ ବ୍ଲକ ଅନ୍ତର୍ଗତ ତ୍ରିଲୋଚନପୁର ପଞ୍ଚାୟତ ଚାନ୍ଦପଡ଼ା ବଳାଜିତପୁର ଗାଁରୁ ଏପରି ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ପୈତୃକ ସମ୍ପତ୍ତି ଓ ଜମିବାଡ଼ି ବିବାଦକୁ କେନ୍ଦ୍ର କରି ଗୋଟିଏ ପରିବାରର ଭାଇ ଓ ଭଉଣୀଙ୍କ ମଧ୍ୟରେ ସଂଘର୍ଷ ଘଟିଛି। ସାମାନ୍ୟ ବଚସାରୁ ଆରମ୍ଭ ହୋଇଥିବା ଏହି ଝଗଡ଼ା ଶେଷରେ ଭୟଙ୍କର ମାରପିଟ୍‌ରେ ପରିଣତ ହୋଇଥିଲା, ଯେଉଁଥିରେ ଉଭୟ ପକ୍ଷରୁ ଏକାଧିକ ଲୋକ ଗୁରୁତର ଆହତ ହୋଇଛନ୍ତି।

ସୂଚନା ଅନୁଯାୟୀ, ଜମିଭାଗକୁ ନେଇ ପରିବାର ସଦସ୍ୟଙ୍କ ମଧ୍ୟରେ ଦୀର୍ଘ ଦିନରୁ ଅଶାନ୍ତି ଲାଗି ରହିଥିଲା। ତେବେ ନିକଟରେ ଏହି ବିବାଦ ଉଗ୍ର ରୂପ ନେଇଥିଲା। ରାଗିଯାଇ ଉଭୟ ପକ୍ଷର ଲୋକେ ପରସ୍ପରକୁ କାଠ ଫାଳିଆ ଏବଂ ଧାରୁଆ କଟୁରୀ ସାହାଯ୍ୟରେ ଆକ୍ରମଣ କରିଥିଲେ। ଏହି ମାରଣାସ୍ତ୍ର ଆକ୍ରମଣରେ ଭାଇ ଓ ଭଉଣୀଙ୍କ ସମେତ ପରିବାରର ଅନ୍ୟ ସଦସ୍ୟମାନେ ରକ୍ତାକ୍ତ ହୋଇଛନ୍ତି। ଆହତମାନଙ୍କୁ ତୁରନ୍ତ ଉଦ୍ଧାର କରାଯାଇ ସ୍ଥାନୀୟ ଡାକ୍ତରଖାନାରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଛି।

ଏହି ହିଂସାତ୍ମକ ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି। ଘଟଣାକୁ ନେଇ ଉଭୟ ପକ୍ଷରୁ କଣାସ ଥାନାରେ ଲିଖିତ ଅଭିଯୋଗ ଦାଏର କରାଯାଇଛି। ଅଭିଯୋଗ ପାଇବା ପରେ ପୋଲିସ ତୁରନ୍ତ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ରକ୍ତ ସମ୍ପର୍କରେ ଏଭଳି ହିଂସ୍ର ସମ୍ପତ୍ତି ବିବାଦ ସାଧାରଣରେ ଉଦ୍‌ବେଗ ସୃଷ୍ଟି କରିଛି। ପୋଲିସ ବର୍ତ୍ତମାନ ଆକ୍ରମଣକାରୀଙ୍କୁ ପଚରାଉଚରା କରିବା ସହ ଘଟଣାର ସତ୍ୟାସତ୍ୟ ଅନୁସନ୍ଧାନ କରୁଛି।

ଝାରସୁଗୁଡ଼ା: ଝାରସୁଗୁଡ଼ା ପୋଲିସକୁ ବଡ଼ ସଫଳତା । ଦୀର୍ଘ ୨୮ ବର୍ଷ ଧରି ପୋଲିସ ଆଖିରେ ଧୂଳି ଦେଇ ଫେରାର ଥିବା ଜଣେ ହତ୍ୟା ଅଭିଯୁକ୍ତଙ୍କୁ ଗିରଫ କରିବାରେ ପୋଲିସ ସକ୍ଷମ ହୋଇଛି। ୧୯୯୮ ମସିହାରେ ପୋଲିସ ହେପାଜତରୁ ଖସି ପଳାଇଥିବା ଏହି ଅଭିଯୁକ୍ତ ଶେଷରେ ଆଇନର ଜାଲରେ ଛନ୍ଦି ହୋଇଛି। ଅଭିଯୁକ୍ତ ଜଣକ ଝାରସୁଗୁଡ଼ା ଜିଲ୍ଲା ରେଙ୍ଗାଲି ଥାନା ଅନ୍ତର୍ଗତ ଭୃନ୍ଦୁପାଲି ଗାଁର ନୀଳମଣି ମହାନନ୍ଦ ବୋଲି ସୂଚନା । ୧୯୯୮ ମସିହା ଅକ୍ଟୋବର ୯ ତାରିଖରେ ପୂର୍ବ ଶତ୍ରୁତାକୁ କେନ୍ଦ୍ର କରି ଦୁର୍ଯ୍ୟୋଧନ ଦୀପଙ୍କୁ ହତ୍ୟା କରାଯାଇଥିଲା । ନୀଳମଣି ଏବଂ ତାଙ୍କର ଦୁଇ ସହଯୋଗୀ ହତ୍ୟା ପରେ ମୃତଦେହକୁ ଅଖାରେ ଭରି କେଲୋ ନଦୀରେ ଫିଙ୍ଗି ଦେଇଥିବା ଅଭିଯୋଗ ରହିଛି ।

ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତଙ୍କ ନାମରେ ଭାରତୀୟ ପିଙ୍ଗଳ ବିଧି (ଆଇପିସି)ର ଦଫା ୩୬୪, ୩୦୨, ୨୦୧, ୧୦୯ ଏବଂ ୩୪ ଅଧୀନରେ ମାମଲା ରୁଜୁ ହୋଇଥିଲା। ତେବେ ୧୯୯୮ ମସିହାରେ ପୋଲିସ ତାଙ୍କୁ ଟ୍ରାଞ୍ଜିଟ୍ ରିମାଣ୍ଡରେ ନେଉଥିବା ସମୟରେ ସେ ହାତକଡ଼ି ସହିତ ଖସି ପଳାଇବାରେ ସକ୍ଷମ ହୋଇଥିଲେ। ସେବେଠାରୁ ପୋଲିସ ତାଙ୍କୁ ଖୋଜୁଥିଲେ ମଧ୍ୟ ତାଙ୍କର କୌଣସି ପତ୍ତା ମିଳିନଥିଲା।

ପୋଲିସ ଠାରୁ ବର୍ତ୍ତିବା ପାଇଁ ଅଭିଯୁକ୍ତ ଜଣକ ନିଜର ପରିଚୟ ବଦଳାଇ ଦେଇଥିଲା। ସେ ନିଜ ନାମ ବଦଳାଇ ରାଜୁ ଗୋଣ୍ଡା ରଖିବା ସହ ଛତିଶଗଡ଼ର ରାୟଗଡ଼ ଠାରେ ବସବାସ କରୁଥିଲା। ଏପରିକି ସେଠାରେ ସେ ନିଜର ନୂଆ ପରିଚୟକୁ ପ୍ରମାଣିତ କରିବା ପାଇଁ ଜାଲ୍ ଆଧାର କାର୍ଡ ଏବଂ ପ୍ୟାନ୍ କାର୍ଡ ମଧ୍ୟ ପ୍ରସ୍ତୁତ କରିସାରିଥିଲା।

ଦୀର୍ଘ ଦିନର ତଦନ୍ତ, ଗୁପ୍ତଚର ସୂଚନା ଏବଂ କ୍ରମାଗତ ଅନୁସନ୍ଧାନ ପରେ ଝାରସୁଗୁଡ଼ା ପୋଲିସ ତାଙ୍କ ଠିକଣା ଠାବ କରିବାରେ ସଫଳ ହୋଇଥିଲା। ଅଭିଯୁକ୍ତଙ୍କୁ ଗିରଫ କରାଯାଇ ଅଧିକ ଆଇନଗତ କାର୍ଯ୍ୟାନୁଷ୍ଠାନ ପାଇଁ ସମ୍ପୃକ୍ତ ଅଦାଲତରେ ହାଜର କରାଯାଇଛି। ଯେତେ ବର୍ଷ ବିତିଗଲେ ମଧ୍ୟ ଅପରାଧୀ ଖସିପାରିବେ ନାହିଁ, ଏହି ଗିରଫଦାରୀ ତାହା ପ୍ରମାଣିତ କରିଛି।

ଭୁବନେଶ୍ୱର: ଭୁବନେଶ୍ୱରର ଚନ୍ଦ୍ରଶେଖରପୁର ଥାନା ଅଞ୍ଚଳରେ ଏକ ତ୍ରିକୋଣୀୟ ପ୍ରେମକୁ ନେଇ ଦୁଇ ଗୋଷ୍ଠୀ ମଧ୍ୟରେ ଭୟଙ୍କର ଗ୍ୟାଙ୍ଗୱାର ଦେଖିବାକୁ ମିଳିଛି। ଏହି ଘଟଣାରେ ଦୁଇ ଜଣ ଯୁବକ ଗୁରୁତର ଆହତ ହୋଇଥିବା ବେଳେ ପୋଲିସ ମୋଟ ୧୦ ଜଣଙ୍କୁ ଗିରଫ କରିବାରେ ସଫଳ ହୋଇଛି।

ମିଳିଥିବା ସୂଚନା ଅନୁଯାୟୀ, ଚନ୍ଦ୍ରଶେଖରପୁର ଥାନା ଅନ୍ତର୍ଗତ ବୁଦ୍ଧବିହାର ଏବଂ ଈଶାନେଶ୍ୱର ବସ୍ତି ଅଞ୍ଚଳରେ ଏକ ପ୍ରେମ ବ୍ୟାପାରକୁ କେନ୍ଦ୍ର କରି ବିବାଦ ସୃଷ୍ଟି ହୋଇଥିଲା। ଏହା ପରବର୍ତ୍ତୀ ସମୟରେ ଉଗ୍ର ରୂପ ନେଇ ଦୁଇ ପ୍ରତିଦ୍ୱନ୍ଦ୍ୱୀ ଗ୍ୟାଙ୍ଗ ‘ଉତ୍ତମ’ ଏବଂ ‘କୁମ୍ଭୀର’ ମଧ୍ୟରେ ରକ୍ତାକ୍ତ ସଂଘର୍ଷର କାରଣ ପାଲଟିଥିଲା। ଘଟଣାର ଗୋଟିଏ ଦିନ ପରେ ସାଲିଆ ସାହି ବସ୍ତି ଅଞ୍ଚଳରୁ ଉତ୍ତମ ଗ୍ୟାଙ୍ଗର ସଦସ୍ୟମାନେ ବାଇକ୍ ଓ ସ୍କୁଟିରେ ଆସି ମାରଣାସ୍ତ୍ର ଧରି ଅତର୍କିତ ଆକ୍ରମଣ କରିଥିଲେ।

ଏହି ଆକ୍ରମଣରେ ବୁଦ୍ଧବିହାର କଲୋନୀ ସମ୍ପାଦକଙ୍କ ପୁଅ ଶୁଭମ ସରୋଜଙ୍କୁ ଖଣ୍ଡାରେ ଆକ୍ରମଣ ହୋଇଥିଲା, ଯାହା ଫଳରେ ତାଙ୍କ ବାମ ହାତରେ ଗଭୀର ଆଘାତ ଲାଗିଛି। ସେହିପରି ଅନ୍ୟ ଜଣେ ସ୍ଥାନୀୟ ବାସିନ୍ଦା ଚନ୍ଦନ ନାୟକଙ୍କୁ ମଧ୍ୟ ଅତି ନିର୍ମମ ଭାବେ ମାଡ଼ ମରାଯାଇଥିଲା। ପ୍ରଥମେ ସବ୍-ଇନ୍ସପେକ୍ଟର ଦେବ ସାମନ୍ତରାୟଙ୍କ ରିପୋର୍ଟ ଆଧାରରେ ଚନ୍ଦ୍ରଶେଖରପୁର ପୋଲିସ ନିଜ ଆଡୁ ଏକ ମାମଲା ରୁଜୁ କରିଥିଲା। ପରେ ଦୁଇ ଆହତଙ୍କ ଅଭିଯୋଗକୁ ଭିତ୍ତି କରି ଦୁଇଟି ପୃଥକ ମାମଲା ରୁଜୁ କରାଯାଇଛି ବୋଲି ଜୋନ୍-୬ ଏସିପି ମାନସ ରଞ୍ଜନ ପ୍ରଧାନ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି।

ତଦନ୍ତ ବେଳେ ଏହି ଆକ୍ରମଣରେ ସମ୍ପୃକ୍ତ ଥିବା ପ୍ରାୟ ୧୪ ଜଣଙ୍କୁ ଚିହ୍ନଟ କରାଯାଇଛି। ସେମାନଙ୍କ ମଧ୍ୟରୁ ଘଟଣା ପରଠାରୁ ଫେରାର ଥିବା ମୁଖ୍ୟ ଅଭିଯୁକ୍ତ ସୁନ୍ଦରପଦାର ଆକାଶ ବେହେରା ଓରଫ 'କୁମ୍ଭୀର' ସମେତ ମୋଟ ୧୦ ଜଣଙ୍କୁ ପୋଲିସ ଗିରଫ କରିଛି। ଚନ୍ଦ୍ରଶେଖରପୁର ଆଇଆଇସିଙ୍କ ନେତୃତ୍ୱରେ ବିଭିନ୍ନ ସ୍ଥାନରେ ଚଢ଼ାଉ କରାଯାଇଥିଲା। ଗିରଫ ଅଭିଯୁକ୍ତଙ୍କ ନିକଟରୁ ଗୋଟିଏ ବାଇକ୍, ଦୁଇଟି ସ୍କୁଟି, ଗୋଟିଏ ଖଣ୍ଡା, ଛୁରୀ ଏବଂ ଦୁଇଟି କାଠ ଫାଳିଆ ଜବତ କରାଯାଇଛି। ଫେରାର ଥିବା ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ପୋଲିସର ପ୍ରୟାସ ଜାରି ରହିଛି ଏବଂ ଏହି ଗ୍ୟାଙ୍ଗୱାରର ପୂର୍ଣ୍ଣାଙ୍ଗ ତଦନ୍ତ କରାଯାଉଛି।

ଭୁବନେଶ୍ୱର: ଖଣ୍ଡଗିରି ଥାନା ଅନ୍ତର୍ଗତ କୋଳଥିଆ ଅଞ୍ଚଳରେ ଘଟିଥିବା ଚାଞ୍ଚଲ୍ୟକର ଡବଲ୍ ମର୍ଡର ଘଟଣାରେ ପୋଲିସ ଦୁଇ ଜଣ ନାବାଳକ ଛାତ୍ରଙ୍କୁ ଗିରଫ କରିଛି। ସେମାନଙ୍କ ମଧ୍ୟରୁ ଜଣେ ଦଶମ ଶ୍ରେଣୀର ଛାତ୍ର ହୋଇଥିବା ବେଳେ ଅନ୍ୟ ଜଣେ ଦ୍ୱାଦଶ ଶ୍ରେଣୀର ଛାତ୍ର। ଏହି ଅମାନବୀୟ ତଥା ଯୋଜନାବଦ୍ଧ ହତ୍ୟାକାଣ୍ଡ ସମଗ୍ର ରାଜଧାନୀରେ ଚାଞ୍ଚଲ୍ୟ ଖେଳାଇ ଦେଇଛି। ଏହି ଅଭାବନୀୟ ଘଟଣାରେ ପ୍ରାଣ ହରାଇଥିବା ବ୍ୟକ୍ତିମାନେ ହେଲେ ୨୦ ବର୍ଷୀୟ ଯୁକ୍ତ ତିନି ବିଜ୍ଞାନ ଛାତ୍ର କୃଷ୍ଣ ଚନ୍ଦ୍ର ପାଢ଼ୀ (ବୁଦ୍ଧି) ଏବଂ ତାଙ୍କ ପିତା ୫୪ ବର୍ଷୀୟ ହିମାଂଶୁ ପାଢ଼ୀ। କୃଷ୍ଣଙ୍କ ଭଉଣୀ ଗୁରୁତର ଆହତ ହୋଇ ବର୍ତ୍ତମାନ ଏମ୍ସ ଭୁବନେଶ୍ୱରରେ ଜୀବନ ମରଣ ସହ ସଂଗ୍ରାମ କରୁଛନ୍ତି। 

ପୋଲିସ ସୂତ୍ରରୁ ପ୍ରକାଶ ଯେ, ସୋମବାର ରାତି ପ୍ରାୟ ୨ଟା ସମୟରେ ମୁଖାପିନ୍ଧା ଦୁର୍ବୃତ୍ତମାନେ ଜାତୀୟ ରାଜପଥ-୧୬ କଡ଼ରେ ଥିବା ଭଡ଼ା ଘରର କାନ୍ଥ ଡେଇଁ ପଶିଥିଲେ। ସେମାନେ ପ୍ରଥମେ କୃଷ୍ଣଙ୍କୁ ବାହାରକୁ ଟାଣି ଆଣି ଲୁହା ରଡ୍‌ରେ ନିର୍ମମ ଭାବେ ଆକ୍ରମଣ କରିଥିଲେ। ପୁଅକୁ ବଞ୍ଚାଇବାକୁ ଆସିଥିବା ବାପା ଓ ଭଉଣୀଙ୍କୁ ମଧ୍ୟ ସେମାନେ ଛାଡି ନଥିଲେ। ଏପରିକି ଆକ୍ରମଣ ସମୟରେ ଲଙ୍କାଗୁଣ୍ଡର ବ୍ୟବହାର କରାଯାଇଥିବା ଜଣାପଡିଛି।

ପ୍ରାଥମିକ ତଦନ୍ତରୁ ଜଣାପଡିଛି ଯେ, ଏହି ଡବଲ ମର୍ଡର ପଛରେ ଏକ ପ୍ରେମ ବ୍ୟାପାର ଜନିତ ଶତ୍ରୁତା ରହିଛି। ଅଭିଯୁକ୍ତଙ୍କ ମଧ୍ୟରୁ ଜଣେ ନିଜର ସହପାଠୀଙ୍କୁ ହଇରାଣ କରିବା ଘଟଣାରେ କୃଷ୍ଣଙ୍କୁ ଦାୟୀ କରିଥିଲେ। ଏହି କାରଣରୁ ଗତ ପ୍ରାୟ ଏକ ବର୍ଷ ହେଲା ସେମାନଙ୍କ ମଧ୍ୟରେ ତିକ୍ତତା ଲାଗି ରହିଥିଲା, ଯାହା ଶେଷରେ ଏକ ଭୟଙ୍କର ହତ୍ୟାକାଣ୍ଡର ରୂପ ନେଇଥିଲା। ତେବେ ଅଭିଯୁକ୍ତମାନଙ୍କର ପୂର୍ବରୁ କୌଣସି ଅପରାଧିକ ରେକର୍ଡ ନଥିବା ସିପି (ପୋଲିସ କମିଶନର)ଙ୍କ ପକ୍ଷରୁ ସ୍ପଷ୍ଟ କରାଯାଇଛି।

ମୂଳତଃ ଗଞ୍ଜାମ ଜିଲ୍ଲା ସୋରଡ଼ା ଅଞ୍ଚଳର ଏହି ପାଢ଼ୀ ପରିବାର ଗତ ଦୁଇ ଦଶନ୍ଧି ଧରି କୋଳଥିଆରେ ନିଜ ସମ୍ପର୍କୀୟଙ୍କ ଘରେ ରହି ଆସୁଥିଲେ। ଗତବର୍ଷ କୃଷ୍ଣଙ୍କ ମା'ଙ୍କର ଦେହାନ୍ତ ହୋଇଯାଇଥିଲା। ଘଟଣାସ୍ଥଳର ସିସିଟିଭି ଫୁଟେଜ ଯାଞ୍ଚ କରିବା ପରେ ପୋଲିସ ଅଭିଯୁକ୍ତମାନଙ୍କୁ ଚିହ୍ନଟ କରି ସୋମବାର ବିଳମ୍ବିତ ରାତିରେ ଗିରଫ କରିବାରେ ସଫଳ ହୋଇଥିଲା। ଫରେନସିକ୍ ଟିମ୍ ଓ ସନ୍ଧାନୀ କୁକୁର ସହାୟତାରେ ଘଟଣାସ୍ଥଳରୁ ହତ୍ୟାରେ ବ୍ୟବହୃତ ଲୁହା ରଡ୍ ଏବଂ ଅନ୍ୟାନ୍ୟ ପ୍ରମାଣ ଜବତ କରାଯାଇଛି। ମଙ୍ଗଳବାର ଦିନ ଉଭୟ ନାବାଳକ ଅଭିଯୁକ୍ତଙ୍କୁ ଜୁଭେନାଇଲ୍ ଜଷ୍ଟିସ୍ ବୋର୍ଡ ଆଗରେ ହାଜର କରାଯାଇଛି ଏବଂ ପୋଲିସ ଏହି ଘଟଣାର ଅଧିକ ତଦନ୍ତ ଜାରି ରଖିଛି।

ସୁନ୍ଦରଗଡ଼: ଅପହରଣ ଓ ହତ୍ୟାକରି ଫେରିବା ବେଳେ ଦୁର୍ଘଟଣାରେ ଜଣେ ମୃତ । ସୁନ୍ଦରଗଡ଼ ଜିଲ୍ଲା ଭସ୍ମା ଥାନା ଖମାରବାହାଲ ନିକଟରେ ଘଟିଛି ଦୁର୍ଘଟଣା । ଜଣେ ଯୁବକଙ୍କୁ ଅପହରଣ ପରେ ହତ୍ୟା କରାଯାଇଥିବା ବେଳେ, ଘଟଣାସ୍ଥଳରୁ ଖସି ପଳାଉଥିବା ସମୟରେ ଏକ ସଡ଼କ ଦୁର୍ଘଟଣାରେ ଜଣେ ଅଭିଯୁକ୍ତର ମୃତ୍ୟୁ ଘଟିଛି। ଏହି ଦୁର୍ଘଟଣାରେ ଅନ୍ୟ ୨ ଜଣ ଗୁରୁତର ଆହତ ହୋଇଛନ୍ତି ।

ମୃତକ ଜଣକ ହେଉଛନ୍ତି ଝାଡ଼ଖଣ୍ଡର ବାସିନ୍ଦା ଶିବଧନ ଲୋହାର। ମିଳିଥିବା ସୂଚନା ଅନୁଯାୟୀ, ରବିବାର ବିଳମ୍ବିତ ରାତିରେ ଝାଡ଼ଖଣ୍ଡରୁ ଦୁଇ ଜଣ ବ୍ୟକ୍ତି ସୁନ୍ଦରଗଡ଼ ସରକାରୀ ମେଡିକାଲ କଲେଜ ଏବଂ ହସ୍ପିଟାଲରେ ନିଜ ସମ୍ପର୍କୀୟଙ୍କୁ ଭର୍ତ୍ତି କରିବା ପରେ ଦୁଇଟି କାର୍‌ରେ ଫେରୁଥିଲେ। ଏହି ସମୟରେ ତଳସରା ଥାନା ଅନ୍ତର୍ଗତ ସୁବଡେଗା ନିକଟରେ ଏକ ବାଇକ୍‌ରେ ଆସିଥିବା ୩ ଜଣ ଯୁବକ ସେମାନଙ୍କ ଗାଡ଼ିକୁ ପିଛା କରିଥିଲେ।

ଗୋଟିଏ କାର୍ ଖସି ପଳାଇବାରେ ସକ୍ଷମ ହୋଇଥିବା ବେଳେ, ଦୁର୍ବୃତ୍ତମାନେ ଅନ୍ୟ କାର୍‌କୁ ଅଟକାଇ ଶିବଧନ ଲୋହାରଙ୍କୁ ଅପହରଣ କରିଥିଲେ। ଅଭିଯୁକ୍ତମାନେ ତାଙ୍କୁ ଛୁରୀ ଭୁସିବା ସହ ତାଙ୍କ ମୋବାଇଲ୍ ଫୋନ୍ ଏବଂ ପର୍ସ ଛଡ଼ାଇ ନେଇଥିଲେ। ପୋଲିସ ସୂଚନା ଅନୁଯାୟୀ, ହେମଗିରି ଥାନା ଅନ୍ତର୍ଗତ ଦୁଦୁକା ଅଞ୍ଚଳରେ ଥିବା ରେଳ ଓଭରବ୍ରିଜ୍ ନିକଟରେ ତାଙ୍କୁ ହତ୍ୟା କରାଯାଇଥିଲା ଏବଂ ତାଙ୍କ ମୃତଦେହକୁ ନିକଟସ୍ଥ ଏକ ଡ୍ରେନ୍‌ରେ ଫିଙ୍ଗି ଦିଆଯାଇଥିଲା।

ଅପରାଧ ଘଟାଇବା ପରେ ଅଭିଯୁକ୍ତମାନେ ଅପହୃତ ବ୍ୟକ୍ତିଙ୍କ ସେହି କାର୍‌ରେ ସୁନ୍ଦରଗଡ଼ ଆଡ଼କୁ ଫେରାର ହେବାକୁ ଉଦ୍ୟମ କରିଥିଲେ। ତେବେ ଭସ୍ମା ଥାନା ଅନ୍ତର୍ଗତ ଖମାରବାହାଲ ଗାଁ ନିକଟରେ କାର୍‌ଟି ଭାରସାମ୍ୟ ହରାଇ ରାସ୍ତା ତଳକୁ ଖସି ପଡ଼ିଥିଲା। ଫଳରେ ଘଟଣାସ୍ଥଳରେ ଜଣେ ଅଭିଯୁକ୍ତର ମୃତ୍ୟୁ ଘଟିଥିଲା। ଦୁର୍ଘଟଣାରେ ଅନ୍ୟ ୨ ଜଣ ଅଭିଯୁକ୍ତ ଗୁରୁତର ଭାବେ ଆହତ ହୋଇଛନ୍ତି ଏବଂ ସେମାନଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।

ସୁନ୍ଦରଗଡ଼: ସ୍ୱାମୀ-ସ୍ତ୍ରୀଙ୍କ କଳି ନେଲା ପଡୋଶୀଙ୍କ ଜୀବନ । ସ୍ୱାମୀ-ସ୍ତ୍ରୀଙ୍କ କଳି ଛଡ଼ାଇବାକୁ ଯାଇଥିବା ପଡୋଶୀ ଯୁବକଙ୍କୁ ହତ୍ୟା । ସୁନ୍ଦରଗଡ଼ ଜିଲ୍ଲାର ତଲସରା ଥାନା ଅନ୍ତର୍ଗତ ମାୟାବାହାଲ ଦେହୁରୀପଡ଼ା ଗାଁରି ଆସିଛି ରପରି ଚାଂଚଲ୍ୟକର ଘଟଣା । ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ହେଉଥିବା ଝଗଡ଼ାର ସମାଧାନ କରିବାକୁ ଯାଇ ଜଣେ ପଡୋଶୀ ଯୁବକଙ୍କୁ ନିଜର ପ୍ରାଣ ହରାଇବାକୁ ପଡ଼ିଛି। ମୃତ ଯୁବକଙ୍କ ନାମ ହେମନ୍ତ ନାୟକ ବୋଲି ଜଣାପଡ଼ିଛି।

ସୂଚନା ଅନୁଯାୟୀ, ପଡ଼ୋଶୀ କନ୍ଦର୍ପ ଦେହୁରୀ ଏବଂ ତାଙ୍କ ପତ୍ନୀଙ୍କ ମଧ୍ୟରେ କୌଣସି କାରଣକୁ ନେଇ ପାରିବାରିକ କଳହ ସୃଷ୍ଟି ହୋଇଥିଲା। ଝଗଡ଼ା ଉଗ୍ର ରୂପ ନେବାରୁ କନ୍ଦର୍ପଙ୍କ ପତ୍ନୀ ନିଜର ଜୀବନ ବଞ୍ଚାଇବା ପାଇଁ ଦୌଡ଼ି ଯାଇ ହେମନ୍ତଙ୍କ ଘରେ ପହଞ୍ଚିଥିଲେ। ପତ୍ନୀଙ୍କ ପଛେ ପଛେ କନ୍ଦର୍ପ ମଧ୍ୟ ସେଠାରେ ପହଞ୍ଚିଥିଲେ। ତେବେ ହେମନ୍ତ ଏବଂ ତାଙ୍କ ପରିବାର ଲୋକେ ଉଭୟ ସ୍ୱାମୀ-ସ୍ତ୍ରୀଙ୍କୁ ବୁଝାସୁଝା କରିବାକୁ ଚେଷ୍ଟା କରିଥିଲେ । ହେଲେ କନ୍ଦର୍ପ ହେମନ୍ତଙ୍କ ଭଉଣୀଙ୍କୁ ମାଡ ମାରିଥିଲେ । ଏହାକୁ ନେଇ ହେମନ୍ତ ଓ କନ୍ଦର୍ପଙ୍କ ମଧ୍ୟରେ ଠେଲାପେଲା ହୋଇଥିଲା । ପରେ ଗାଁରେ କିଛି ଯୁବକ କନ୍ଦର୍ପଙ୍କୁ ନେଇ ତାଙ୍କ ଘରେ ଛାଡିଥିଲେ ।

ଘଟଣା ସାମାନ୍ୟ ଶାନ୍ତ ପଡ଼ିଯାଇଥିଲା। କିନ୍ତୁ, ରାତି ପ୍ରାୟ ୧୧ଟା ସମୟରେ ହେମନ୍ତ ନିଜ ଘର ବାହାରେ ବସିଥିବା ବେଳେ ପୂର୍ବ ରାଗକୁ ମନରେ ରଖି ଉତ୍‌କ୍ଷିପ୍ତ ଥିବା କନ୍ଦର୍ପ ହଠାତ୍ ସେଠାରେ ପହଞ୍ଚି ଏକ ଧାରୁଆ ଅସ୍ତ୍ରରେ ହେମନ୍ତଙ୍କ ମୁଣ୍ଡକୁ ଆକ୍ରମଣ କରିଥିଲେ। ଫଳରେ ଘଟଣାସ୍ଥଳରେ ହିଁ ହେମନ୍ତଙ୍କର ଶୋଚନୀୟ ମୃତ୍ୟୁ ଘଟିଥିଲା। ଏହି ଘଟଣା ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ କନ୍ଦର୍ପ ଦେହୁରୀଙ୍କୁ ଗିରଫ କରିଛି। ହତ୍ୟାକାଣ୍ଡର ପ୍ରକୃତ କାରଣ ଜାଣିବା ପାଇଁ ପୋଲିସ ପକ୍ଷରୁ ତଦନ୍ତ ଜାରି ରହିଛି।

ଢେଙ୍କାନାଳ: ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଅନ୍ତର୍ଗତ ଗଣ୍ଡତୈଳା ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଜଙ୍ଗଲୀ ଜନ୍ତୁ ଶିକାର ଉଦ୍ଦେଶ୍ୟରେ ବୋମା ପ୍ରସ୍ତୁତ କରୁଥିବା ବେଳେ ହଠାତ୍ ବିସ୍ଫୋରଣ ଘଟି ୩ ଜଣ ବ୍ୟକ୍ତି ଗୁରୁତର ଆହତ ହୋଇଛନ୍ତି।

ମିଳିଥିବା ସୂଚନା ଅନୁଯାୟୀ, ଗୁରୁବାର ବିଳମ୍ବିତ ରାତିରେ ସ୍ଥାନୀୟ କିଛି ଲୋକ ଜଙ୍ଗଲୀ ଜନ୍ତୁ ଶିକାର କରିବା ପାଇଁ ହାତତିଆରି ବୋମା ପ୍ରସ୍ତୁତ କରୁଥିଲେ। ତେବେ ବୋମା ସଂଯୋଗ କରୁଥିବା ସମୟରେ ଅସାବଧାନତା କାରଣରୁ ହଠାତ୍ ଏହା ବିସ୍ଫୋରଣ ହୋଇଥିଲା ବୋଲି ପ୍ରାଥମିକ ରିପୋର୍ଟରୁ ଜଣାପଡିଛି।

ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏହି ଭୟାବହ ବିସ୍ଫୋରଣରେ ଜଣେ ବ୍ୟକ୍ତିଙ୍କର ହାତ ଛିଣ୍ଡି ଯାଇଥିବା ବେଳେ ଅନ୍ୟ ଦୁଇ ଜଣଙ୍କ ଶରୀରରେ ଗଭୀର କ୍ଷତ ସୃଷ୍ଟି ହୋଇଛି। ଗୁରୁତର ଅବସ୍ଥାରେ ସମସ୍ତ ଆହତଙ୍କୁ ଉଦ୍ଧାର କରାଯାଇ ତୁରନ୍ତ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ସେଠାରେ ସେମାନଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାପଡିଛି। ପରଜଙ୍ଗ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପ୍ରକୃତରେ ସେମାନେ କେଉଁ ଉଦ୍ଦେଶ୍ୟରେ ବୋମା ପ୍ରସ୍ତୁତ କରୁଥିଲେ ଏବଂ ଏହି ବେଆଇନ କାର୍ଯ୍ୟରେ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି, ସେ ନେଇ ଖୋଳତାଡ଼ ଜାରି ରହିଛି।

ରାଜଧାନୀ ଭୁବନେଶ୍ୱରରୁ ଆସିଛି ଏକ ସାଂଘାତିକ ଖବର। ସହରର ଅତି ସମ୍ବେଦନଶୀଳ ତଥା ଭିଆଇପି ଅଞ୍ଚଳ ଭାବେ ପରିଚିତ ୟୁନିଟ୍-୬ ରୁ ଜଣେ ସନ୍ଦିଗ୍ଧ ଆତଙ୍କବାଦୀଙ୍କୁ ଗିରଫ କରାଯାଇଛି। ଏହି ଘଟଣା ସାମ୍ନାକୁ ଆସିବା ପରେ ସମଗ୍ର ସହରରେ ଚାଞ୍ଚଲ୍ୟ ଖେଳାଇ ଦେଇଛି ଏବଂ ସୁରକ୍ଷା ବ୍ୟବସ୍ଥାକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି।

ଗୁପ୍ତ ଅପରେସନ୍ ଏବଂ ଗିରଫଦାରୀ

ମିଳିଥିବା ସୂଚନା ଅନୁଯାୟୀ, ଦୀର୍ଘ ଦିନ ଧରି ଗୁଇନ୍ଦା ବିଭାଗ ପାଖରେ ଉକ୍ତ ସନ୍ଦିଗ୍ଧଙ୍କ ଗତିବିଧି ନେଇ ସୂଚନା ରହିଥିଲା। ପୋଲିସ ଏବଂ ଗୁଇନ୍ଦା ବିଭାଗର ଏକ ସ୍ୱତନ୍ତ୍ର ଟିମ୍ ବିଶ୍ୱସ୍ତ ସୂତ୍ରରୁ ପକ୍କା ଖବର ପାଇବା ପରେ ୟୁନିଟ୍-୬ ଅଞ୍ଚଳରେ ଅତର୍କିତ ଚଢ଼ାଉ କରିଥିଲେ। ସେଠାରେ ନିଜର ପ୍ରକୃତ ପରିଚୟ ଲୁଚାଇ ରହୁଥିବା ଏହି ବ୍ୟକ୍ତିଙ୍କୁ କାବୁ କରିବାରେ ସୁରକ୍ଷା କର୍ମୀମାନେ ସଫଳ ହୋଇଛନ୍ତି। ଚଢ଼ାଉ ସମୟରେ ଅଭିଯୁକ୍ତଙ୍କ ନିକଟରୁ ନକଲି ପରିଚୟ ପତ୍ର, ମୋବାଇଲ୍ ଫୋନ୍ ଏବଂ ଅନ୍ୟାନ୍ୟ ଆପତ୍ତିଜନକ ସାମଗ୍ରୀ ଜବତ କରାଯାଇଥିବା ଜଣାପଡ଼ିଛି।

ବାହାର ରାଜ୍ୟ କିମ୍ବା ବିଦେଶୀ ଲିଙ୍କ୍ ସନ୍ଦେହ

ପ୍ରାଥମିକ ତଦନ୍ତରୁ ସନ୍ଦେହ କରାଯାଉଛି ଯେ ଏହି ବ୍ୟକ୍ତିଙ୍କର କୌଣସି ବଡ଼ ଆତଙ୍କବାଦୀ ସଂଗଠନ ସହିତ ଲିଙ୍କ୍ ରହିଛି। ସେ କାହିଁକି ଏବଂ କେଉଁ ଉଦ୍ଦେଶ୍ୟରେ ରାଜଧାନୀରେ ଡେରା ପକାଇଥିଲେ, ତାହାର ଖୋଳତାଡ଼ ଜାରି ରହିଛି। ରାଜଧାନୀରେ କୌଣସି ବଡ଼ ଧରଣର ବିଧ୍ୱଂସକାରୀ ଷଡ଼ଯନ୍ତ୍ର ରଚିବା ପାଇଁ ସେ ଏଠାରେ ରହୁଥିଲେ କି ନାହିଁ, ତାହା ଜାଣିବାକୁ ଅଧିକ ତଦନ୍ତ ଚାଲିଛି। ବର୍ତ୍ତମାନ ସୁରକ୍ଷା ଦୃଷ୍ଟିରୁ ତାଙ୍କୁ ଏକ ଗୁପ୍ତ ସ୍ଥାନରେ ରଖି ଉଚ୍ଚସ୍ତରୀୟ ଜେରା କରାଯାଉଛି।

ରାଜଧାନୀରେ କଡ଼ା ସୁରକ୍ଷା ବ୍ୟବସ୍ଥା

ଏହି ହାଇ-ପ୍ରୋଫାଇଲ୍ ଗିରଫଦାରୀ ପରେ କମିଶନରେଟ୍ ପୋଲିସ ପକ୍ଷରୁ ଭୁବନେଶ୍ୱରର ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରାଯାଇଛି। ସହରର ପ୍ରବେଶ ପଥ, ବସ୍ ଷ୍ଟାଣ୍ଡ, ରେଳ ଷ୍ଟେସନ୍ ସମେତ ବିଭିନ୍ନ ହୋଟେଲ ଏବଂ ଭଡ଼ା ଘରଗୁଡ଼ିକରେ ଯାଞ୍ଚ ପ୍ରକ୍ରିୟାକୁ ଜୋରଦାର କରାଯାଇଛି। ବିଶେଷ କରି ସନ୍ଦେହଜନକ ବ୍ୟକ୍ତିଙ୍କ ଉପରେ କଡ଼ା ନଜର ରଖିବାକୁ ପୋଲିସକୁ ନିର୍ଦ୍ଦେଶ ଦିଆଯାଇଛି। ସାଧାରଣ ନାଗରିକମାନେ ନିଜ ଆଖପାଖରେ କୌଣସି ସନ୍ଦିଗ୍ଧ ବ୍ୟକ୍ତିଙ୍କୁ ଦେଖିଲେ ତୁରନ୍ତ ଥାନାକୁ ଖବର ଦେବା ପାଇଁ ଅପିଲ କରାଯାଇଛି।

ରାୟଗଡ଼ା ସହରରେ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ଜଣେ ନବଜାତ ଶିଶୁ ପୁତ୍ରକୁ ରାସ୍ତା କଡ଼ରେ ଫିଙ୍ଗି ଦିଆଯାଇଥିବା ବେଳେ ସେଠାରୁ ତା’ର ମୃତଦେହ ଉଦ୍ଧାର କରାଯାଇଛି। ସହରର ଗୋଦାବରୀଶ ନଗର ଅଞ୍ଚଳରେ ଏହି ଅମାନବୀୟ ଘଟଣା ଘଟିଥିବା ଜଣାପଡିଛି।

ଆଜି ସକାଳୁ ଗୋଦାବରୀଶ ନଗର ଅଞ୍ଚଳର କିଛି ସ୍ଥାନୀୟ ଲୋକେ ରାସ୍ତା କଡ଼ରେ ଏକ ନବଜାତ ଶିଶୁ ପଡିଥିବାର ଦେଖିବାକୁ ପାଇଥିଲେ। ନିକଟକୁ ଯାଇ ଦେଖିବା ପରେ ଶିଶୁଟିର ମୃତ୍ୟୁ ହୋଇସାରିଥିବା ଜଣାପଡିଥିଲା। ଜନ୍ମକଲା ମାଆ ଶିଶୁଟିକୁ ଅଲୋଡ଼ା ଭାବି ଏପରି ଭାବେ ଫିଙ୍ଗି ଦେଇଥିବା ସନ୍ଦେହ କରାଯାଉଛି। ଏହି ଖବର ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହେବା ସହ ଲୋକେ ଏହାକୁ ତୀବ୍ର ନିନ୍ଦା କରିଛନ୍ତି। 

ଘଟଣା ସମ୍ପର୍କରେ ଖବର ପାଇ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା। ପୋଲିସ ନବଜାତ ଶିଶୁର ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଶିଶୁଟି ମୃତ ଅବସ୍ଥାରେ ଜନ୍ମ ହୋଇଥିଲା ନା ଜନ୍ମ ପରେ ତାକୁ ହତ୍ୟା କରାଯାଇଛି, ସେ ନେଇ ତଦନ୍ତ ଜାରି ରହିଛି। ଶିଶୁଟିକୁ କିଏ ଏବଂ କେଉଁ ପରିସ୍ଥିତିରେ ଏଠାରେ ଫିଙ୍ଗିଦେଇ ଗଲା, ସେ ନେଇ ପୋଲିସ ସ୍ଥାନୀୟ ଲୋକଙ୍କୁ ପଚରାଉଚରା କରୁଛି।